16/11/2023
خیبر پختونخوا کے نگران وزیر برائے امور ضم اضلاع، صنعت وحرفت اور فنی تعلیم ڈاکٹر عامر عبد اللہ نے جمعرات کے روز قبائلی ضلع جنوبی وزیرستان لوئر کا ایک روزہ دورہ کیا۔ اپنے دورے کے دوران نگران وزیر نے ضلعی ہیڈکوارٹر وانا میں قبائلی مشران و عمائدین، منتخب نمائندوں اور نوجوانوں کے بڑے جرگے اور کھلی کچہری میں بطور مہمان خصوصی شرکت کی۔
جرگہ میں ڈپٹی کمشنر محمد ناصر خان، ایڈیشنل ڈپٹی کمشنر کشمیر خان، ڈسٹرکٹ پولیس آفیسر فرمان اللہ وردگ اور تمام لائن ڈیپارٹمنٹس کے سربراہان نے شرکت کی۔
اس موقع پر ایک اور اجلاس میں ضلعی انتظامیہ اور محکمہ پولیس کے حکام نے ضلع جنوبی وزیرستان لوئر میں ترقیاتی منصوبوں کی صورتحال، عوامی مسائل کے حل کیلئے حکومتی اور انتظامی مشینری کے اقدامات اور امن و امان سمیت دیگر متعلقہ امور سے متعلق نگران صوبائی وزیر کو تفصیلی بریفننگ دی۔
نگران وزیر نے اپنے دورے کے دوران ضلع جنوبی وزیرستان لوئر کے معززین علاقہ اور نوجوانوں سے بھی خصوصی ملاقات کی اور ان سے مقامی سطح پر درپیش عوامی مسائل کے حوالے سے دریافت کیا۔
نگران وزیر کا ضلعی ہیڈ کوارٹر پہنچنے پر مقامی انتظامیہ اور مشران نے بھر پور استقبال کیا جبکہ منعقدہ بڑے جرگے سے اپنے خطاب میں قبائلی عوام کی جانب سے بہترین مہمان نوازی پر ڈاکٹر عامر عبداللہ نے خراج تحسین پیش کرتے ہوئے ان کا شاندار الفاظ میں شکریہ ادا کیا اور کہا کہ وزیرستان کی ترقی اور خوشحالی صوبائی حکومت کی اولین ترجیحات میں شامل ہے اور اسی سلسلے میں وہ تمام قبائلی اضلاع کا دورہ کررہے ہیں تاکہ ضم اضلاع کے مسائل ترجیحی بنیادوں پر حل کئے جاسکیں۔
انہوں نے کہا کہ صحت اور تعلیم کے شعبوں میں نمایاں بہتری لانے کیلئے تمام وسائل بروئے کار لارہے ہیں اور اس ضمن میں کسی قسم کی کوتاہی برداشت نہیں کی جائے گی۔نگران وزیر نے کہا کہ علاقے میں گوسٹ سکولوں اور صحت مراکز کی نشاندھی کیلئے ان کا سروے کرکے ایسے غیر فعال سکولوں اور اداروں کا خاتمہ کریں گے۔
صوبائی وزیر نے جنوبی وزیرستان لوئر میں زراعت کے شعبے میں مزید بہتری لانے پر زور دیتے ہوئے کہا کہ ضلع میں سمال ڈیمز کا سروے ہوا ہے اور عنقریب ان کی فزیبلٹی رپورٹ مرتب کرلی جائے گی۔
انہوں نے جرگہ کو یقین دلایا کہ ضلع میں ووکیشنل مراکز ہر تحصیل کی سطح پر بنانے کیلئے اقدامات اٹھائےجائیں گے۔
ڈآکٹر عامر عبداللہ نے منشیات کے روک تھام پر زور دیتے ہوئے کہا کہ اس لعنت کو ختم کرنے کیلئے عوام قانون نافذ کرنے والے اداروں کا ساتھ دیں۔ نگران صوبائی وزیر نے اس موقع پر جنوبی وزیرستان اپر اور لوئر کی سرحدوں کے تعین کیلئے جلد خصوصی کمیشن بنانے کی یقین دہانی بھی کرائی۔
