25/04/2023
یہ فوجی چیخ کے بولا موبائل نیچے کر
مجھے چھپانا ہے چہرہ موبائل نیچے کر
سنیں گے لوگ اگر یہ فرعون سا لہجہ
بنے گا میرا تماشا موبائل نیچے کر
مجھے سکھایا گیا ہے کہ میں ہی سب کچھ ہوں
تو پھر یہ حکم ہے میرا موبائل نیچے کر
میری ہی بات یہاں ماننی پڑے گی تمہیں
ہے میرے ہاتھ میں ڈنڈا موبائل نیچے کر
میں اپنا بندہ چھڑانے یہاں پہ آیا ہوں
نہ پھوٹے میرا یہ بھانڈا موبائل نیچے کر
مجھے دکھانا نہیں ہے زمانے والوں کو
ہے میرا چہرہ گھِنونا موبائل نیچے کر
ہے نیچ سوچ میری اور میرا رویہ بھی
نہ ہو یہ سر میرا نیچا موبائل نیچے کر
یہ تین چاند سے بچے جو ہم نے مارے ہیں
کہیں نہ ہو کوئی چرچا موبائل نیچے کر
خبر نہ ہو کہیں اخبار لکھنے والوں کو
بجےگا شہر میں ڈنکا موبائل نیچے کر
قمر کاظمی
