05/02/2024
စာဖတ်မိတ်ဆွေများသို့—
တိုးမြစ်စာအုပ်တိုက်ရဲ့ အသိပေးတင်ပြခြင်း။
ပြန်ကြားရေးဝန်ကြီးဌာနက သူတို့ရဲ့ပုံနှိပ်ထုတ်ဝေ
ဥပဒေပါ စည်းကမ်းတွေနဲ့ ငြိစွန်းလို့ဆိုပြီး၊
တိုးမြစ်စာအုပ်တိုက်ရဲ့စာအုပ်ထုတ်ဝေခြင်းလုပ်ငန်း
အသိအမှတ်ပြုလက်မှတ်ကို ရုပ်သိမ်းလိုက်ကြောင်း
အကြောင်းကြားစာ ပေးပို့လာပါတယ် ။
ဆိုင်ရာက နိုင်ငံပိုင်သတင်းစာမှာ ဖော်ပြတဲ့အခါ
‘နိုင်ငံတော် လုံခြုံရေး ၊ တရားဥပဒေစိုးမိုးရေး၊
အများပြည်သူအေးချမ်းသာယာရေး….
နိုင်ငံသားတိုင်းတန်းတူမှု၊ လွတ်လပ်မှု၊တရားမျှတမှု
အခွင့်အရေး… စတာတွေကို ထိခိုက်စေတဲ့
အကြောင်းအရာတွေကို ရေးသားထုတ်ဝေလို့မို့
အခုလို ပိတ်သိမ်းရတာလို့ ဆိုပါတယ် ။
[ ကြေးမုံ/ ၁ ဖေ၂၀၂၄ ]
နိုင်ငံပိုင်သတင်းစာမှာ ဘာ စာအုပ်ကို ရေးသားပုံနှိပ်
ထုတ်ဝေလို့ ပိတ်ရတယ် မပါတော့ပေမဲ့ ကျနော်တို့ဆီ
လိပ်မူ ပို့တဲ့ စာမှာတော့ သမိုင်းပညာရှင် ဒေါက်တာ
အောင်ခင် ရေးတဲ့ ‘ စိတ်ဓာတ်တော်လှန်ရေး’
စာအုပ်ကို ထုတ်ဝေလို့ တိုးမြစ်တိုက်ကို- ထုတ်ဝေခွင့်
လိုင်စင် ပိတ်သိမ်းရတယ်လို့ ဖော်ပြပါထားတယ်။
[ ရုံးစာ(လက္ခံရရှိ) / ၃၁ ဇန် ၂၀၂၄ ]
ဘာစာအုပ်? ဆိုတာ နိုင်ငံပိုင်သတင်းစာကနေ
ထုတ်ပြန်တဲ့ အသိပေးကြေညာချက်မှာ ဖော်ပြခြင်း
ပြုမထားတဲ့အတွက် စာဖတ်သူ မိတ်ဆွေအများစုက
သို့လော သို့လော မေးမြန်းလာကြတာကြောင့်မို့
အခုလို ရေးသား အသိပေးရခြင်းပါပဲ။
အားလုံးသော စာဖတ်သူများ သိကြတဲ့အတိုင်းပါပဲ။
‘စိတ်ဓာတ်တော်လှန်ရေး’စာအုပ်ဟာ၂၀၁၉ ခုနှစ်
ဇန်နဝါရီလက ပထမအကြိမ် ထုတ်ဝေခဲ့တာဖြစ်ပြီး
၂၀၂၃ ခုနှစ် ဒီဇင်ဘာလမှာ ပြင်ဆင်ဖြည့်စွက်ချက်
အလျဉ်းမရှိဘဲ စျေးနှုန်းနဲ့ စာရွက်သာ ပြောင်းလဲကာ
ဒုတိယအကြိမ် ထုတ်ဝေခဲ့တာ ဖြစ်သလို
ဆိုင်ရာ မူပိုင်နဲ့ မှတ်ပုံတင်ဌာနသို့လည်း သတ်မှတ်
စည်းကမ်းနဲ့ အညီ တင်သွင်းပြီးမှသာ စျေးကွက်
အတွင်း ဖြန့်ချိထားခဲ့တာ ဖြစ်ပါတယ်။
စာအုပ်ပါ အကြောင်းအရာများဟာ
၂၀၁၀-၁၁ ခုနှစ်ကာလက အသံလွှင့်ချက်များဖြစ်ပြီး
စာအုပ်တအုပ်လုံးရဲ့ခြုံငုံအမည်ဖြစ်တဲ့-
'စိတ်ဓာတ်တော်လှန်ရေး’ အသံလွှင့်ဆောင်းပါးဟာ
Jonathan Israel ရဲ့ A Revolution of the Mind ဆိုတဲ့
စာအုပ်ကို မိတ်ဆက်ပေးထားတာပါ။
လူ့သမိုင်းတလျှောက် လူသားရဲ့ အတွေးအခေါ်တွေ
ပြောင်းလဲ တော်လှန်တိုးတက်လာပုံ အကြောင်း
ခြင်းရာပါပဲ။အခြား အသံလွှင့်ဆောင်းပါးတွေကတော့
ထိုခေတ်ကာလ မြန်မာနိုင်ငံရေး အခြေအနေတွေအပေါ်
သုံးသပ် တင်ဆက်ထားခဲ့တာတွေပါ။ အနီးသမိုင်းလို့
ဆိုနိုင်သော်လည်း အခုအခါ ကြာရှည်လေးမြင့်ခဲ့ပါပြီ။
၁၀ နှစ်နီးပါးမျှ ရှိခဲ့ပြီ။
သို့သော် —
ဆိုင်ရာတို့က နိုင်ငံလုံခြုံရေး၊ အများပြည်သူအေးချမ်း
သာယာရေး ၊ နိုင်ငံသားများရဲ့တန်းတူမှု လွတ်လပ်မှု
တရားမျှတမှုကို ထိခိုက်စေသောကြောင့်ဟု ဆိုကာ
ထုတ်ဝေသူ တိုးမြစ်စာအုပ်တိုက်ကို လိုင်စင်ပိတ်သိမ်း
လိုက်ကြောင်း ကြေညာလိုက်သောအခါ
—ဘာကြောင့်လဲ
—ဘာအတွက်လဲ
—ဘာအပြစ်ရှိလို့လဲ
—ဘယ်လို ဖြစ်လို့လဲ
—ဘာစာအုပ်နဲ့ ငြိသွားတာလဲ…. စသဖြင့် စသဖြင့်
စိတ်ပူစွာ အံ့ဩမှင်သက်စွာ မေးမြန်းလာကြတဲ့၊
အနီး အဝေး မြန်မာပြည် တနံတလျားက စိုးရိမ်ပေး
ကြတဲ့ စာပေမိတ်ဆွေများကို အခုလို ပေါင်းရုံးပြီး
ရှင်းပြရခြင်း ဖြစ်ပါတယ်။
ကျနော်တို့နဲ့အတူ ရပ်တည် အားပေးနေကြတဲ့
အနယ်နယ်အရပ်ရပ်က စာဖတ်သူမိတ်ဆွေများကို
တသက်မမေ့နိုင် ကျေးဇူးတင်လျက်ရှိပါတယ် ခင်ဗျား။
တိုးမြစ်စာအုပ်တိုက်ရဲ့သက်တမ်း ၁၄ နှစ်ကာလအတော
အတွင်း စာဖတ်သူများအပေါ် ရိုးသားစွာ ၊ သစ္စာရှိစွာ၊
ယုံကြည်ချက် မှန်ကန်စွာနဲ့ လွတ်လပ်ပြီး အမှီအခိုကင်းသော စာအုပ်တိုက်တတိုက်အဖြစ် ရပ်တည်လျက်-
စာပေဝန်ကို တတ်နိုင်သမျှ ထမ်းခဲ့ပါကြောင်း၊ အခုလို
လမ်းခုလတ်မှာ ခေတ္တခွဲခွါရမယ့် အဖြစ် အတွက်လည်း
အားနာမိပါကြောင်း စကားဆိုပါရစေ။
တိုးမြစ်စာအုပ်တိုက်က ထုတ်ဝေဖြန့်ချိခဲ့တဲ့
စိတ်ဓာတ်တော်လှန်ရေး’စာအုပ်အတွက်
တိုးမြစ်ထုတ်ဝေသူတွင်သာ အလုံးစုံ တာဝန်ရှိ
ပါသော်လည်း ဆိုင်ရာ ဆိုင်ရာ ဥပဒေများအရ
စာအုပ်ကို ပုံနှိပ်ပေးလို့ဆိုပြီး ကြားထဲက ပုံနှိပ်လိုင်စင်
အသိမ်းခံရတဲ့ 'လပြည့်လင်း’ပုံနှိပ်လုပ်ငန်းကိုလည်း
တိုးမြစ်စာအုပ်တိုက်က တောင်းပန်စကားဆိုပါရစေ။
အနူးအညွှတ် တောင်းပန်လိုက်ပါတယ်။
စာဖတ်သူများအတွက်
စာဖတ်သူများနဲ့အတူ ရပ်တည်လျက်
စာပေအပေါ် သစ္စာရှိစွာဖြင့်—
တိုးမြစ်စာအုပ်တိုက်၊ ရန်ကုန်မြို့။
၅ ဖေဖော်ဝါရီ ၂၀၂၄။ တနင်္လာနေ့။
(ပူးတွဲပုံ - ၁ ဖေ ၂၀၂၄ ထုတ် သတင်းစာဖြတ်ပိုင်း)
![မြန်မာစာဆိုကြီး တင်မိုး အသက် ကိုးဆယ် မွေးနေ့ [ ၁၉ နိုဝင်ဘာ ၁၉၃၃—၂၉ ဇန်နဝါရီ ၂၀၀၇ ]"တော်လှန်ရေးသည် အဟောင်းအဖို့ သေမင်...](https://img3.medioq.com/600/143/662681166001434.jpg)
