MARA Publications

19/10/2023

မင်းနဲ့ကိုယ်ကြား လွဲပုံလွဲနည်း ၂၀ …

မင်းက ကိုယ့်အဖိုးလာဖြစ်နေလို့ မင်းနဲ့ကိုယ်နဲ့ လွဲသွားတယ်
အခြားတစ်ယောက် ကျပျောက်ခဲ့တဲ့ ပေါက်မဲထီလက်မှတ်ကို ကိုယ့်ရှေ့ကလူက အရင်ကောက်သွားသလို မင်းနဲ့ကိုယ်နဲ့ လွဲခဲ့တယ်
မင်း ထ သွားတဲ့ဘတ်စ်ကားပေါ်က ထိုင်ခုံအလွတ်မှာ ကိုယ် ဝင်ထိုင်လိုက်ရသလို မင်းနဲ့ ကိုယ်နဲ့ လွဲခဲ့တယ်
မင်းလက်ချင်းချိတ်ထားတဲ့ မင်းဘေးကကောင်က မင်းအမြင်ကို ကွယ်နေလို့ မင်းနဲ့ကိုယ်နဲ့ လွဲသွားတယ်
ဒီဘဝမှာ ကိုယ်က လိင်တူချစ်သူဖြစ်နေလို့ မင်းနဲ့ကိုယ်နဲ့ လွဲသွားတယ်
ဗေဒင်ဆရာက စနေသားတွေဆို တတ်နိုင်သလောက်ရအောင်ရှောင်လို့ မင်းကို ဟောလိုက်လို့ ဗေဒင်ယုံတဲ့မင်းနဲ့ ကိုယ်နဲ့ လွဲသွားတယ်
မီးပွိုင့်မှာ တစ်ယောက်တစ်လမ်းဆီ လမ်းခွဲထွက်သွားရသလို မင်းနဲ့ ကိုယ်နဲ့ လွဲသွားတယ်
မင်းမင်္ဂလာဆောင်ကို လာတက်ရင်းနဲ့ မင်းကိုမှ ရွေးချစ်မိသွားသလို သတို့သမီးမင်းနဲ့ ကိုယ်နဲ့ လွဲခဲ့တယ်
ကိုယ် ကျောင်းပြောင်းသွားတဲ့နေ့မှာမှ ကိုယ့်ကျောင်းဟောင်းကို မင်း ပြောင်းလာရသလိုမျိုး မင်းနဲ့ကိုယ်နဲ့ လွဲခဲ့တယ်
မင်းရဲ့သမီးနဲ့ ကိုယ်နဲ့ ညက်နေတုန်းမို့ မင်းနဲ့ကိုယ်နဲ့ လွဲသွားတယ်
ကိုယ်ခေါင်းငုံ့ငိုနေတုန်းအချိန်မို့ ကိုယ့်ရှေ့ကမင်းကို မမြင်မိတဲ့အတွက် မင်းနဲ့ကိုယ်နဲ့ လွဲခဲ့တယ်
ဆိုင်တစ်ဆိုင်တည်းမှာထိုင်နေရင်းနဲ့ ကိုယ်စီကျောပေးထားသူနှစ်ဦးလို မင်းနဲ့ကိုယ်နဲ့ လွဲခဲ့တယ်
ခြေစွမ်းမပြနိုင်လို့ ကိုယ် လူစားလဲခံရတဲ့အချိန်မှာမှ မင်းက ကွင်းထဲဝင်လာလို့ လူငယ်ခြေတက်လေးမင်းနဲ့ ကိုယ်နဲ့ လွဲသွားတယ်
အိပ်မက်ထဲက မမှတ်မိတဲ့မျက်နှာလိုမျိုး နောက်တစ်ရက်ရောက်တာနဲ့ မင်းနဲ့ကိုယ်နဲ့ လွဲ လွဲသွားတယ်
မင်းပါမယ့်အစီအစဉ်အရောက်မှာမှ တီဗွီခလုတ်ကို ထ ပိတ်မိသလို မင်းနဲ့ကိုယ်နဲ့ လွဲခဲ့တယ်
ပယောဂဆရာက မင်းကိုယ်ထဲကကိုယ့်ကို ကြိမ်စင်္ကြာနဲ့ နှင်ထုတ်လိုက်လို့ မင်းနဲ့ကိုယ်နဲ့ လွဲသွားတယ်
မင်းရှိတဲ့နေရာတွေ ကိုယ် ရောက်တတ်ပေမယ့် အရောက်နောက် နောက်ကျနေလို့ မင်းနဲ့ကိုယ်နဲ့ လွဲသွားတယ်
မင်း ခွင့်ယူတဲ့နေ့နဲ့ကြုံလို့ အခြားတစ်ယောက်ကို မ လိုက်ရသလိုမျိုး မင်းနဲ့ ကိုယ်နဲ့ လွဲသွားတယ်
မင်းဆီ လာနေတုန်းမှာပဲ ကိုယ်ဝန်ဖျက်ချခံလိုက်ရလို့ မင်းနဲ့ကိုယ်နဲ့ လွဲသွားတယ်
မင်းနဲ့ကိုယ်နဲ့ အနီးဆုံးအထိရောက်၊ ကတိစကားများစွာ ထားခဲ့ပြီးမှ မင်းနဲ့ကိုယ်နဲ့ လွဲလေ့ရှိလို့ မင်းနဲ့ကိုယ်နဲ့ ပြန် ပြန်လွဲသွားတယ်

လတ်လွန်းဝေဦး
နိုဝင်ဘာ ၁၅၊ ၂၀၂၂

Photo - 5 Centimeters Per Second

်စာ

09/10/2023

Hello ...

ကျနော်တို့ Mara Publications ကနေ နောက်ဆုံးထွက်ရှိထားတဲ့ ကဗျာဆရာ ဆစ်ခ်ရဲ့ တစ်ကိုယ်တော် ကဗျာစုစည်းမှုစာအုပ်ဖြစ်တဲ့ “မင်းကိုပြောပြချင်ပြီး ပြောပြလို့မရတဲ့ ကိစ္စတွေ” ကဗျာစာအုပ်ကတော့ ပထမအကြိမ်ထုတ်ဝေထားတဲ့ အုပ်ရေ ၅၀၀ ကုန်သွားပြီ ဖြစ်ပါတယ်ဗျ

ဒါကြောင့် Page မှာတော့ စာအုပ်အမှာတွေကို လောလောဆယ် လက်ခံလို့မရသေးဘူးဆိုတဲ့အကြောင်းလေး အသိပေးချင်ပါတယ်နော်

ဒါပေမဲ့ လက်ရှိမှာ page မှာလည်း စာအုပ်အမှာတွေ ထပ်တက်လာမှု၊ စာအုပ်ဆိုင်တချို့ကနေလည်း ထပ်တိုးမှာယူထားမှုတွေ ရှိလာတာကြောင့် သိပ်မကြာခင်မှာပဲ ဒုတိယအကြိမ်အဖြစ် ထပ်မံရိုက်နှိပ်ထုတ်ဝေသွားဖို့ ကျနော်တို့ စီစဉ်ထားပါတယ်

ဒီလိုပြန်လည်ထုတ်ဝေရာမှာလည်း ဒုတိယအကြိမ်မူကို ပထမအကြိမ်မူနဲ့ မတူကွဲပြားတဲ့ ခံစားမှုလေး ရစေဖို့အတွက် အပြင်အဆင်ပိုင်းဆိုင်ရာ အပြောင်းအလဲ သေးသေးလေးကိုပဲ အမှတ်တရအနေနဲ့ ပြောင်းလဲသွားမှာဖြစ်ပါတယ်
(ထပ်တိုးဖြည့်စွက်မှုတွေ၊ အရေးအသားအရ ပြင်ဆင်ချက်တွေ၊ ပန်းချီ/ဒီဇိုင်းပိုင်းဆိုင်ရာ ကြီးကြီးမားမား ပြောင်းလဲမှုမျိုးတွေ တစ်ခုမှ ပြုလုပ်သွားမှာမဟုတ်ပါဘူး ခင်ဗျာ)

ဒါကြောင့် သိပ်မကြာခင် ထပ်မံရိုက်နှိပ်တဲ့အခါ ဒုတိယအကြိမ်မူရဲ့ အသွင်သစ်ကို ကြေညာပေးသွားမှာဖြစ်ပြီး အမှာတွေကိုလည်း ပြန်လည်လက်ခံသွားမှာဖြစ်ကြောင်း ကြိုတင်အသိပေးပါတယ်ဗျ

ကဗျာဆရာဆစ်ခ်ရဲ့ စာအုပ်ကို မှာယူအားပေးဖတ်ရှုကြတဲ့အတွက် အထူးပင်ကျေးဇူးတင်ရှိပါတယ်ခင်ဗျာ

သိပ်မကြာခင်မှာလည်း MARA Publications ရဲ့ ၅ အုပ်မြောက် စာအုပ်အတွက် Pre-order တွေကို ကောက်ခံသွားဖို့ရှိပြီး ဘာစာအုပ်လေးလဲဆိုတာသိရအောင် Page ကို စောင့်ကြည့်ပေးကြပါဦး

အားလုံးပဲ သာယာတဲ့နေ့လေး ပိုင်ဆိုင်ကြပါစေခင်ဗျာ

ချစ်ခင်စွာဖြင့်
MARA Publications

06/10/2023

ကျနော်တို့ MARA Publications ရဲ့ စာအုပ်တွေကို ဝယ်ထားသူတွေအတွက် အမှတ်တရအစီအစဉ်လေးပါခင်ဗျာ 😎

ဒီအစီအစဉ်လေးကို ကျနော်တို့ MARA ရဲ့ ထွက်ရှိပြီးတဲ့ စာအုပ် ၄ အုပ်ထဲက အနည်းဆုံး ၂ အုပ်နဲ့အထက် ဝယ်ယူထားသူတွေ ပါဝင်နိုင်မှာဖြစ်ပြီး အဲဒီသူတွေထဲက စုစုပေါင်း ၅ ဦးကို MARA Logo လေး ရိုက်နှိပ်ထားတဲ့ ဟောဒီ ခွက်လေးကို မဲနှိုက်ရွေးချယ်ပြီး လက်ဆောင်ပေးသွားမှာဖြစ်ပါတယ် ✌️

ဒီအစီအစဉ်မှာပါဝင်ဖို့ အရမ်းကြီးထူးထူးခြားခြားမလိုပါဘူး
ဒီပိုစ့်လေးရဲ့ Comment မှာ MARA Publications ရဲ့ ထွက်ရှိပြီးတဲ့ စာအုပ်တွေထဲက အနိမ့်ဆုံး ၂ အုပ်ရှိထားတဲ့ပုံကို ဓါတ်ပုံရိုက်ပြီး မန့်ပေးရုံပါပဲ ✌️

သိပ်မကြာခင်မှာ မဲနှိုက်ရွေးချယ်ပြီး ကံထူးသူတွေကို ကြော်ငြာပေးသွားမှာဖြစ်ပါတယ်ဗျ

အားလုံးပဲ ပျော်ရွှင်ဖွယ်ရာ သောကြာနေ့ပါ😎

ချစ်ခင်စွာဖြင့်
MARA Publications

01/10/2023

ဏေသစ်အတွက် MARA ရဲ့ မေးခွန်း ၅ ခု



၁။ လွန်ခဲ့တဲ့နှစ်အတော်ကြာတုန်းက နှစ်ယောက်တွဲစာအုပ်တစ်အုပ်ထွက်ဖို့ စီစဉ်ခဲ့ဖူးတယ်လို့ ကျနော်တို့ သိရဖူးတယ်။ အဲဒီနောက် အကြောင်းကြောင်းကြောင့် စာအုပ်မဖြစ်ခဲ့ဘူးပေါ့နော်။ အဲဒီနောက် နှစ်များစွာကြာပြီးမှပဲ စက္ကူမြေခွေး ဆိုတဲ့ ခင်ဗျားရဲ့ တစ်ကိုယ်တော်စာအုပ် ထွက်ဖို့ဖြစ်လာတယ်။ ဒီခြားနားသွားတဲ့နှစ်တွေအတွင်းမှာ ဘာတွေအဓိက ပြောင်းလဲသွားခဲ့သလဲ။ ပထမစာအုပ်မထွက်ဖြစ်ခဲ့ပြီးနောက်၊ ကြားထဲမှာ အခုလောက်ထိ နှစ်တွေဟသွားဖို့ ဘာတွေက အဓိကအကြောင်းအရင်းဖြစ်စေခဲ့သလဲ။

ဖြေ။ ။ နှစ်တွေ အများကြီး ကြာစေခဲ့တာကတော့ အကြောင်းကြောင်းကြောင့်လို့ပဲ ဖြေရမယ်။ အဓိက တာဝန်ရှိတာကတော့ ကိုယ်ကိုယ်တိုင်ပါပဲ။ စာအုပ်အနေနဲ့ မြန်မြန်ဆန်ဆန် ထွက်ရှိလာဖို့ အပေါ် သိပ် အားမစိုက်ဖြစ်ခဲ့တာ၊ ကိုယ့် တကိုယ်ရည်သဘောအရဆိုရင် ဒီလို ထွက်လာဖို့က မဖြစ်မနေ အရေးကြီးတယ်လို့ သိပ် မထင်ခဲ့တာလည်း ပါမယ်။ ၂၀၁၄ နဲ့ အခု ၂၀၂၃ ကြား ဘာတွေ အဓိက ပြောင်းလဲသွားလဲဆိုရင်တော့ ဒီနှစ်တွေ အတောအတွင်းမှာ ကိုယ့်ကိုယ်ကိုယ် ပို သိရှိလာမှုပဲ ဖြစ်မယ်။ ကိုယ် ရေးချင်တဲ့ အရေးအသားက ဘယ်လို လမ်းကြောင်းဆိုတာမျိုး ပို ပုံပေါ်လာခဲ့တယ်။ အရင်က ကြိုက်ခဲ့တဲ့ အပုဒ်တွေ အခု မကြိုက်တော့တာ၊ အရင် တချို့သော ကာလတွေမှာ မကြိုက်ခဲ့ပေမယ့် ခုချိန်မှာ ကိုယ့်အပေါ် ကိုယ်စားပြုမှုတရပ်အနေနဲ့ လက်ခံနိုင်လာတာတွေလည်း ရှိလာတယ်။



၂။ ခင်ဗျားရဲ့ အရေးအသားတွေထဲမှာ အထင်ရှားဆုံး၊ စာဖတ်သူတွေကြားထဲ အပြန့်နှံ့ခဲ့ဆုံးက ဇင်မောင်ကျော်ကိုကိုသန့် ကဗျာဖြစ်မယ်လို့ ကျနော်ထင်တယ်။ အဲဒီကဗျာကိုပဲ နောက်ဆက်တွဲ ဆက်ရေးသူတွေ၊ ဆင့်ပွားချိတ်ဆက်ရေးသူတွေလည်း အများကြီးရှိခဲ့တယ်။ ဒီတော့ ဇင်မောင်ကျော်ကိုကိုသန့်ဟာ ဏေသစ်ရယ်လို့ တွဲမြင်ထင်မှတ်မိသူတွေလည်း ရှိကြမှာပဲ။ ကျနော် သိချင်တာက ဇင်မောင်ကျော်ကိုကိုသန့်ဆိုတဲ့ ဇာတ်ကောင်ကို ဘယ်လိုအိုင်ဒီယာရခဲ့သလဲ။ ဇင်မောင်ကျော်ကိုကိုသန့်ဟာ ခင်ဗျားရဲ့ ကိုယ်ပွားတွေအမျိုးမျိုး‌ရောနှောထားတဲ့ ခင်ဗျားပဲလား။ ပြီးတော့ အခုချိန်မှာ လူတွေကြားထဲ ပုံစံအမျိုးမျိုးနဲ့ရောက်နေတဲ့ ဇင်မောင်ကျော်ကိုကိုသန့် ကိုယ်ပွားတွေအပေါ်ကိုကော ခင်ဗျားရဲ့ အမြင်။

ဖြေ။ ။ ကျနော့်အတွက် ဇင်မောင်ကျော်ကိုကိုသန့်ကို ရေးရာမှာ ထူးဆန်းတယ်ပြောလို့ရမယ့် အတွေ့အကြုံတခု ရှိတယ်။ စစချင်းမှာ “ဇင်မောင်ကျော်ကိုကိုသန့်” ဇာတ်ကောင်နေရာမှာ ပထမနာမ်စား “ကိုယ်” ဆိုပြီး သုံးဖို့ပဲ ရည်ရွယ်ထားခဲ့တာ။ “နောက်တစ်ခါ မျက်စိဖွင့်ကြည့်တော့ ကိုယ်ချစ်တဲ့ ကောင်မလေးဟာ လေဆိပ်တိုင်းမှာ ရောက်နေပြီ။ ကိုယ် လှမ်းခေါ်တယ်။ အားပေးတဲ့ အသင်း ဂိုးပေါက်ချော်သွားတဲ့ ဟာခနဲ အသံမျိုးနဲ့” ဆိုတာမျိုးပေါ့လေ။ ဒါပေမယ့် ရေးရင်း စဉ်းစားကြည့်တော့ ဒါတွေဆိုရင် တခြားတယောက်ယောက်မှာ ဖြစ်ပျက်နေတာကို narrator တယောက်ရဲ့ ဇာတ်ပြောက တဆင့် မြင်ရတာ ပို အရသာ ရှိမယ်လို့ ခံစားလာရတယ်။ အသောဇာတ် (Comedy) ဆန်ဆန် လွဲချော်နေမှုမျိုးနဲ့ လိုက်အောင် ကို့ရို့ကားယား နာမည်တစ်ခု ဖန်တီးကြည့်ရာမှာ ဇင်မောင်ကျော်ကိုကိုသန့် ဖြစ်လာတယ်။ ဒီအပေါ် ဩဇာရှိတဲ့ အရေးအသားတွေဆိုရင်တော့ နေမျိုးရဲ့ “မောင်နီရဲ့ ကလေးတွေ” နဲ့ ဇေယျာလင်း ဘာသာပြန်တဲ့ ဒီးန်ယန်းဂ်ရဲ့ “ပြာသို့” ကို ညွှန်းရလိမ့်မယ်။

ဇင်မောင်ကျော်ကိုကိုသန့်က ကျနော်ပဲလားဆိုရင်တော့ ကျနော့် တစိတ်တပိုင်းပါပဲလို့ အသေအချာ ပြောနိုင်တယ်။ ဒီအချိန်အရောက်မှာတော့ အသည်းကွဲ သူရဲကောင်းတစ်ဦးဆိုတာမျိုးအနေနဲ့ ကျနော့်ဘာသာ မြင်ကြည့်ဖို့ ခက်လာတာပေါ့။ ကိုယ့်ဘာသာလည်း ဇင်မောင်ကျော်ကိုကိုသန့် ဇာတ်ကောင်နဲ့ အပုဒ်သစ်တွေ ဖန်တီးဖို့ ကြိုးစားတယ်။ ဒါပေမယ့် အဆင်မပြေသေးတော့ အရင်အရေးအသားတိုင်းပဲ လွှတ်ထားပေးချင်စိတ်က ပိုများလာတယ်။ တခြားသူတွေက ယူပြီး ရေးကြတဲ့အပေါ်ကိုလည်း သဘောကျရတယ်။ သူတို့ဆီက နှစ်ခြိုက်မှုတခုနဲ့ တုံ့ပြန်တယ်လို့လည်း ခံစားမိတယ်။ သူတို့ရဲ့ ဇင်မောင်ကျော်ကိုကိုသန့်သည် ကိုယ့် မူရင်းဇာတ်ကောင်ထက် သူတို့ဘက်က တုံ့ပြန်ခံစားမှုတွေ၊ တယောက်ချင်းရဲ့ ကိုယ်ပိုင်ဘဝတွေကို ပို ထင်ဟပ်နေမယ်ဆိုတာကိုလည်း နားလည်ထားပြီးသားပါပဲ။ ကိုယ်တိုင်တောင် မူလဇာတ်ကောင်ဆီကနေ ဝေးဝေးလာနေခဲ့တာကိုး။



၃။ ခင်ဗျားရဲ့ အရေးအသားအများစုမှာ ဇာတ်ကြောင်းက တိုက်ရိုက်မဟုတ်ဘဲ အပေါ်ယံတစ်လွှာနဲ့ ဖုံးထားတယ်၊ လျို့ဝှက်ထားတယ်လို့ ကျနော် ခံစားရမိတာတွေရှိတယ်။ ခင်ဗျားတွေ့ကြုံခဲ့တဲ့ အတွေ့အကြုံ၊ ခင်ဗျားရဲ့ ခံစားမှုတွေ၊ ခင်ဗျားပြောချင်တဲ့စကားတွေကို ပြန်လည်ပုံဖော်တဲ့နေရာမှာ အခုလိုမျိုး မူလဇာတ်လမ်းနဲ့ တိုက်ရိုက်မဆိုင်လှတဲ့ နောက်ထပ်ဇာတ်လမ်းတစ်ခုနဲ့ ဖော်ပြရတာ၊ မူလဇာတ်လမ်းကို ဒီလိုလျှို့ဝှက်မှုနဲ့ ဖုံးထားရတာမျိုး လုပ်မိဖို့ ဘာက တွန်းအားဖြစ်စေတာလဲ။ ဏေသစ်ရဲ့စာတွေက အရေးအသားထဲမှာတောင် မျက်နှာဖုံးတစ်ခုရှိနေတယ်လို့ တစ်ယောက်ယောက်က မှတ်ချက်ပေးလာရင်ကော ခင်ဗျား ဘယ်လိုပြန်ပြောချင်လဲ။

ဖြေ။ ။ ဟုတ်တယ်။ အဲဒါမျိုး ရေးရတာက ကျနော့်အတွက် ပျော်စရာကောင်းတဲ့ စိန်ခေါ်မှုမျိုးပဲ။ ကိုယ့်အကြောင်းတွေ ကိုယ်ပြောရသည့်တိုင်အောင် တိုက်ရိုက်ပြောဆိုရတာမျိုးထက် မျက်နှာဖုံး တခုနောက်ကွယ်က ပြောရတာက ပို သက်တောင့်သက်သာ ရှိတယ်။ ဇာတ်ကောင်နဲ့ ကိုယ်ကြားမှာ အကွာအဝေးတခု ထားလိုက်တဲ့ အခါ သူ့ကိုရော ကိုယ့်ကိုယ်ကိုယ်ပါ ပို သဘောပေါက်နိုင်လာတာကို တွေ့ရတယ်။ သူနဲ့ ကိုယ်ရဲ့ တူညီမှုတွေရော၊ ကွဲပြားမှုတွေရော မြင်လာတယ်။ နောက် သူသည် ကိုယ်မဟုတ်နေဘူးလို့ ခံစားရတော့ကာ စိတ်ကွန့်မြူးစရာ ဖြစ်နိုင်ချေတွေ ပိုများသွားတယ်။ ဇာတ်လမ်းကလည်း အဲဒီကနေပဲ စပြီး ဖြစ်လာတယ်။ ကျောရိုးယူထားတဲ့ ဇာတ်ကြောင်းတွေ ရှိရင်တောင် ကိုယ့်ဇာတ်လမ်းသည် မူလဇာတ်ကြောင်းအပေါ် သစ္စာရှိစရာမလိုဘူးဆိုတဲ့ ခံစားချက်ကလည်း လူကို ဝန်ပေါ့စေတယ်။ မျက်နှာဖုံးတွေရဲ့ ကောင်းတဲ့ အချက်တွေပေါ့။ ဒါတွေကြောင့် အားနည်းသွားတဲ့ အချက်တွေလည်း ရှိမှာပါပဲ။



၄။ ကဗျာရေးတယ်၊ ဝတ္ထုမဆန်ဘဲ လျို့ဝှက်တဲ့ဇာတ်ကြောင်းပုံပြင်ဆန်တဲ့ ပင်ကိုယ်ရေးအရေးအသားတွေ ရေးတယ်၊ ကဗျာဘာသာပြန်တယ်၊ ဝတ္ထုတိုတွေ ဘာသာပြန်တယ်၊ စသဖြင့် ခင်ဗျား ရေးခဲ့တယ်ပေါ့နော်။ တနည်းနည်းနဲ့ ဆက်နွယ်နေတဲ့ ဒီ ၄ မျိုးမှာ ခင်ဗျားအတွက် ပိုတိမ်းညွတ်ရာက ဘာလဲ။ ပြီးတော့ ဘယ်လိုအချိန်တွေမှာ အဲဒီလိုအရေးအသားမျိုး ပြုလုပ်ဖို့ စိတ်ပါတတ်သလဲ၊ များသောအားဖြင့်မှာကော ဘယ်လိုအကြောင်းအရာမျိုးတွေကို ရေးရတာက ခင်ဗျားကို ပိုပြီးသက်သောင့်သက်သာဖြစ်စေသလဲ။

ဖြေ။ ။ အဆန်းမဟုတ်ပေမယ့် ဝန်ခံရရင် ဒီ ၄မျိုးလုံးက ကိုယ့်အကြောင်းကိုယ် ပြောပြဖို့ တနည်းနည်းနဲ့ ကြိုးစားတာတွေချည်းပဲ ဖြစ်နိုင်တယ်။ ဘာသာတွေ ပြန်တယ်ဆိုရင်တောင် ကိုယ့်ကို တနည်းတဖုံ ဆွဲဆောင်လာတဲ့ အရေးအသားတွေကို ရွေးချယ်မိတာမျိုးပေါ့။ ကိုယ်တိုင်ရေးနဲ့ ပတ်သက်တဲ့ တကိုယ်ရည် ရွေးချယ်မှုကျတော့ ကဗျာမှာဆိုရင် ကိုယ့်ရဲ့ ရှုပ်ထွေးနောက်ကျိနေတဲ့ စိတ်အခြေအနေတွေကို ထဲထဲဝင်ဝင် ဖော်ပြနိုင်စွမ်း ပိုများတယ်။ အရေးအသားရဲ့ ညီညွတ်မှု၊ အစီအစဉ်ကျနမှုကို ဆန့်ကျင်ဖို့၊ ပုံဖျက်ဖို့အတွက် ကိုယ့်ဘက်က လုပ်နိုင်တာတွေက ကဗျာမှာ ပိုများတယ်။ ဇာတ်ကြောင်းပုံပြင်ဆန်တာတွေမှာဆိုရင်တော့ စောစောက ပြောသလို မျက်နှာဖုံးတွေက ပေးတဲ့ သက်တောင့်သက်သာမှုတွေ ရမယ်။ ဒါပေမယ့် ဇာတ်လမ်းအပေါ် အာရုံစိုက်မှုက ကိုယ့်ကို ချုပ်နှောင်မှန်းမသိ ချုပ်နှောင်သွားတာတွေလည်း ရှိတာပေါ့လေ။



၅။ စာဖတ်သူအခန်းကဏ္ဍ ကို ခင်ဗျား ထည့်စဉ်းစားလား။ အခုလို ဆိုရှယ်မီဒီယာခေတ်ကြီးမှာ ကိုယ်မရေးတဲ့အရေးအသားက ကိုယ့်နာမည်ကြီးနဲ့ (ကိုယ့်မူရင်းအရေးအသားများစွာထက်ပိုပြီး) ပေါက်နေတယ်၊ လူတွေကြားထဲရောက်နေတယ်ဆိုတဲ့အဖြစ်တွေအပေါ်မှာ ဘယ်လို သဘောထားသလဲ။ အဲဒါကနေဆက်စပ်ပြီး နောက်ဆုံးမေးခွန်းအနေနဲ့ စာဖတ်သူတိုင်းအတွက် ရည်ရွယ်ပုံမရခဲ့တဲ့ ခင်ဗျားရဲ့ အရေးအသားတွေကနေပဲ ကောက်ချက်ချပြီး မေးကြည့်ရရင်တော့ ဒီ စက္ကူမြေခွေးစာအုပ်နဲ့ပတ်သက်ပြီးတော့ကော စာဖတ်သူတွေကြားထဲမှာ ဘယ်လိုပုံစံနဲ့ ရှိနေစေချင်တာမျိုးရှိမလဲ။

ဖြေ။ ။ ဒီမေးခွန်းအတွက်တော့ ကျေးဇူးဗျာ။ ဟုတ်တယ် “ ဘဝကို ရတယ် ဘာမှမဖြစ်ဘူး ဆိုတဲ့စိတ်နဲ့ပဲ နေထိုင်တယ်” ဆိုတာနဲ့ စတဲ့ စာသားတွေက ကျနော် ရေးတာ မဟုတ်ပေမယ့် ကျနော့် နာမည်နဲ့ ပေါက်နေတဲ့ အပေါ် စိတ်ကသိကအောက်တော့ ဖြစ်ရတယ်။ ဘယ်ကဘယ်လို စ အမှတ်လွဲသွားကြတယ်တော့ မသိဘူး။ မူလရေးသူက လို့ သိထားရတယ်။ ကိုယ်တိုင် သတင်းမှားဖြန့်နေတာ မဟုတ်ပေမယ့် ဒီအတိုင်း ပေါက်နေတဲ့ အပေါ် သူ့ကိုလည်း အားနာရတယ်။ ကျနော်ရေးတာ မဟုတ်ကြောင်း ကြုံတိုင်းလည်း ရှင်းပြခဲ့တယ်။ နောက်ထပ် ဂွကျတာ တခုက ဘာလဲဆိုတော့ ကျနော်ကကျတော့ ထိလွယ်ရှလွယ်တဲ့ လူ၊ တော်တော်ဖြစ်တဲ့ လူမျိုးလို့ ကိုယ့်ကိုယ်ကိုယ် မြင်ထားတော့ကာ အဲဒီပုံဖော်မှုက ကိုယ်နဲ့ အရမ်းကွာလွန်းနေတာ ဆိုတဲ့အပေါ်လည်း တမျိုး စိတ်မသက်မသာ ဖြစ်ရတယ်။ (ဒီအဖြေမှာတင် တော်တော်ဖြစ်တတ်တဲ့ လူမှန်း သိသာနေပါပြီ :3) အချိန်တခုကြာတော့လည်း ဒီကိစ္စတွေမှာ ကိုယ့်ဘက်က သိပ် မတတ်နိုင်တဲ့ အပေါ်လည်း ပိုတော့ လက်ခံနိုင်လာတာပေါ့လေ။

စက္ကူမြေခွေးအတွက်လည်း အဲဒီ ဆင်ခြင်မှုဘောင်တခုအတွင်းကပဲ ရှိနေပါတော့တယ်။ စာဖတ်သူ တယောက်ချင်းစီရဲ့ အမြင်တွေကို ကိုယ့်ဘက်က သွားလွှမ်းမိုးလို့ မရနိုင်တာ လက်ခံပြီးသားပါပဲ။ ဒါပေမယ့် ဘာမှ မမျှော်လင့်ပါဘူးဆိုတာမျိုးလည်း မဟုတ်ဘူး။ ဖြစ်နိုင်ရင်တော့ - ဒီရေးသားသူဟာ အကြောင်းအရာအားဖြင့် သော်လည်းကောင်း၊ အရေးအသားအားဖြင့် သော်လည်းကောင်း အထိုင်ကျမသွားဖို့၊ တနေရာတည်းမှာ အကြာကြီး ရှိမနေဖို့ ကြိုးစားခဲ့တယ်ဆိုတာကို သတိပြုမိစေချင်တယ်။ ပါဝင်တဲ့ တပုဒ်ချင်းစီရဲ့ ကွာခြားမှုတွေကနေ အဲဒီအချက်ကို မြင်စေချင်တယ်။ လူတယောက်ထဲမှာပဲ အမျိုးမျိုးကွဲထွက်နေတဲ့၊ အချင်းချင်း ရှေ့နောက် ဆန့်ကျင်နေတဲ့ ပဋိပက္ခတွေကို မြင်လိုမြင်ငြား မျှော်လင့်မိတာပါပဲ။

ဒါပေမယ့် ဒီမျှော်လင့်ချက်တွေက အရေးကြီးလားဆိုတော့လည်း မဟုတ်နေပြန်ပါဘူး။ ဒါတွေအားလုံးကလည်း ကိုယ်တတ်နိုင်တာ အလွန်က ကိစ္စတွေပဲ မဟုတ်လား။ ။

29/09/2023

ဇင်မောင်ကျော်ကိုကိုသန့်ဟာ အိပ်ရာကနေ နိုးလာတယ်
(အာခီယာ)

ဇင်မော်ကျော်ကိုကိုသန့်ဟာ ဒုတိယအကြိမ် မျက်လုံးတွေကို
ပြန်မှိတ်ချလိုက်တယ်။ ၂၃ နှစ်အရွယ် သူ့ကို
၁၆ နှစ်အရွယ်သူက ဘာလို့ဒီလိုရှင်သန်ခဲ့ရတာလဲ။ လို့ မေးလိုက်တယ်။ နောက်ဆုံးအကြိမ် သူတို့တွေ့တုန်းက ဇင်မောင်ကျော်ကိုကိုသန့်ဟာ ၁၈နှစ်အရွယ်။ ဘ၀ကို ဒဏ်ရာတစ်ခုလို
မသတ်မှတ်သေးပေမဲ့ ဒဏ်ရာတစ်ခုဖြစ်မလာနိုင်အောင် ဂရုတစိုက် စောင့်ရှောက်နေရတဲ့
အချိန် ချစ်တဲ့မိန်းမဟာ ရုတ်တရက် အသက်တွေကြီးပြီး နိုင်ငံခြားကို ထွက်သွားခဲ့ပြီ။ လက်မှတ်တွေဟာ ဇင်မောင်ကျော်ကိုကိုသန့်ဟောင်း ကို ဘက်စ်ကားတိုင်းမှာ ကော်တွေနဲ့ ကပ်ထားခဲ့တယ်။ ပြန်မလာနိုင်တော့မဲ့ အရာတွေအတွက် ဇင်မောင်ကျော်ကိုကိုသန့်ဟာ လက်တွေကို
ဖြန့်ကားထားတုန်းပဲ။ သူဟာ အိပ်ရာကနေ နိုးလာတယ်။ မမျှော်လင့်ပဲ တစ်စုံတစ်ယောက်နဲ့ အချိန်အတန်ကြာ ရယ်မောခဲ့တာကို အရမ်းဆာတယ်။ လက်ရှိသက္ကရာဇ်မှာ ချစ်ရတဲ့သူတွေ
တစ်ယောက်မှ မရှိကြတော့ဘူး။ နံရံက ဓါတ်ပုံကို ခလုတ်တိုက်မိပြီး အလိမ်စ
ကားတွေကို သွေးအေးအေးနဲ့ထိုင်ပြောနေတဲ့ သူငယ်ချင်း နဲ့ အသေအချာနားထောင်နေတဲ့ သူ့ကို ဇင်မောင်ကျော်ကိုကိုသန့်ဟာလည်း သွေးအေးအေးနဲ့ ကြည့်ရှု့နေခဲ့တယ်။ လေထဲမှာ
ဆေးလိပ်ပြာတွေ မျာလာတာ စောက်ရမ်းကို လှတာပဲ။ လို့ဆိုပြီး ဇင်မောင်ကျော်ကိုကိုသန့်ဟာ ခေါင်းကို ငုံ့ချလိုက်တယ်။ သူဟာ အိပ်ရာကနေ နိုးလာတယ်။ ကုတင်ဘေးမှာ လွန်ခဲ့သောနှစ်ပေါင်းများစွာက လက်ရေးအဟောင်းတွေ ရွေ့လျားနေကြတယ်။ ဇင်မောင်ကျော်ကိုကိုသန့်ရဲ့ အခန်းဟာ မှောင်သင့်တာထက် ပိုပြီးတော့ မှောင်တယ်။ ဘ၀မှာ မမြင်ချင်တဲ့အရာတွေကို တစ်ခါတစ်ရံကြည့်ရဖို့ သူ့ဆီမှာ ချောင်းကြည့်ပေါက်လေးတစ်ပေါက် ရှိတယ်။ အဲ့ဒီအပေါက်လေးကနေ သူမုန်းတီးခဲ့တဲ့သူတွေကို ပြန်ခွင့်လွှတ်ပေးနိုင်ဖို့ တံခါးရဲ့လက် တံတွေကို
အနောက်သို့ ရွှေ့ပေးရတယ်။ အချို့သူတွေဟာ လက်ရှိကာလမှာ အသက်အတော်ကြီးနေကြ
ပြီရဲ့။ ဇင်မောင်ကျော်ကိုကိုသန့်ဟာ အဲ့ဒီချောင်းကြည့်ပေါက်ကို မမှတ်မိတော့တဲ့သော့နဲ့ ခတ်လိုက်တယ်။သူဟာ အိပ်ရာကနေ နိုးလာတယ်။ လူအုပ်ကြီးတစ်ခုကြားထဲရောက်နေပြီး အဲ့ဒီလူအုပ်ကြီးလို ပြုမူမလှုပ် ရှားနိုင်တဲ့ ခံစားချက်မျိုးနဲ့။ အနားကနေ ချစ်တဲ့သူတွေ ထွက်သွားခံရမှာကြောက်လို့ ဇင်မောင်ကျော်ကိုကို သန့်ဟာ ချစ်ရတဲ့သူတိုင်းကို အရင်ဆုံး စီးလက်စဖိနပ်တွေ ချန်ထားပစ်ခဲ့တယ်။ ပြီးတော့ ** ထီးတစ်လက်ကို ကောက်ကိုင်ပြီး မိုးထဲလေထဲပြေးဆင်းသွားတဲ့ ကောင်မလေးနောက်ကို ပြေးလိုက်တယ်။ ချက်ချင်းပဲဆောင်းရောက်သွားတယ်။ ** အချို့သင်္ဘောတွေဟာ သူ့ဆီမှာ ကမ်းကပ်နောက်ကျတာကို နောက်ကျမှသိလိုက်ရတယ်။ သူဟာ အိပ်ရာကနိုးလာတယ်။ သူ့ဘ၀ရဲ့အရာရာကို ဘူတာတွေဆီမှာ အစီအစဉ်လိုက်ြ ပန်တွေ့တယ်။ မျက်လုံးတွေဟာ ကိုမာရသွားတယ်။ ဒုတိယအကြိမ် ကိုမာမရခင်တုန်းက သူဟာ ပျော်
ရွှင်ပုံပေါက်တဲ့ ကောင်လေးတစ်ယောက်။ တတိယအကြိမ်ရောက်တဲ့အခါ သူ့ရဲ့မာရီယိုဟာ မှိုတွေဘယ်လောက်စားစား ကြီးထွားမလာတော့ဘူး။ ဒါကြောင့် တံခါးမှန်သမျှကို သံကြိုးအထပ်ထပ်နဲ့ ပိတ်ပစ်လိုက်တယ်။ ဇင်မောင်ကျော်ကိုကိုသန့်ဟာ အိပ်ရာကနေ နိုးမလာချင်တော့ဘူး။ ဒါပေမဲ့ သူဟာ အိပ်ရာကနေနိုးလာတယ်။ အရမ်းပျော်ရွှင်ခဲ့တယ်။ ချစ်ရတဲ့မိန်းမဟာ ရုတ်တရက်အသက်တွေ ငယ်သွားပြီး သူ့ဆီကိုဘက်စ်ကားစီးပြီး ပြန်လာနေပြီတဲ့။ နေ့လည်ခင်းနှင်းတွေဆီက ကြယ်ပွင့်တွေဆီမှာ သူတို့ ရယ်မောကြတယ်။ နှင်းအဆက်ဆက် ကြယ်အဆက်ဆက် မပျက်ယွင်းကြဘူး... စတဲ့ စာလုံးတွေကို သစ်ပင်တွေ ဆီမှာ လိုက်ချိတ်ကြတယ်။ နင်သာဒီကြိုးလေးကို ဆွဲထားရင် ငါတို့အတူရှိနေကြရဦးမှာလို့ ချစ်တဲ့မိန်းမကပြောတယ်။ ဇင်မောင်ကျော်ကိုကိုသန့်ဟာ ရုတ်တရက် အသက်တွေကြီးသွားပြီး ငိုတယ်။ နေဟာ
အလွန်ပူပြင်းတဲ့အမှောင်နဲ့ ဇင်မောင်ကျော်ကိုကိုသန့်တို့ကို ၀င်တိုက်သွားတယ်။ သူဟာ အိပ်ရာကနေ နိုးလာတယ်။ ဒါပေမဲ့ အိပ်ရာကနေ ပြန်မနိုးချင်တော့ဘူး။ ဇင်မောင်ကျော်ကိုကိုသန့်ဟာ အလင်းစူးထဲကိုပြေးနိုင်သလောက် ပြေးထွက်ခဲ့တယ်။ ဒါပေမဲ့ ဘယ်ဆီကိုမှ မရောက်ဘူး။ တတိယအကြိမ် မျက်လုံးတွေကို ပြန်ဖွင့်တော့ ဇင်မောင်ကျော်ကိုကိုသန့်ရဲ့ လက်ထဲမှာ လွန်သွားစက်တစ်ခုကို ကိုင်လျက်သား။ခေါင်းက တအူအူထွက်နေတဲ့ မီးခိုးတွေဟာ သူ့့ကို ငေးမောလျက်။ လည်ပင်းကနေ သွေးအမည်းတွေကျလာတဲ့အခါမှာ ဇင်မောင်ကျော်ကိုကိုသန့်ဟာ အိပ်နေတယ်။ ဒီတစ်ခါ ဇင်မော်ကျော်ကိုကိုသန့် အိပ်
ရာကနေ နိုးလာတော့ အခြားဇင်မောင်ကျော်ကိုကိုသန့် ၃၊ ၄ ယောက်ကို တွေ့ရတယ်။ ရေချိုးခန်းထဲက မှန်အမှောင်ထဲမှာ။ ဒါပေမဲ့ သူဟာ အိပ်ရာကနေ ထပ်မနိုးတော့ဘူး။

ဇင်မောင်ကျော်ကျော်ကိုကိုသန့် = ဏေသစ်၏ အရေးအသားတစ်ခုမှ ခေါင်းစဉ်အမည်။

** _______ ** = ဏေသစ်၏ အရေးအသား။

အာခီယာ
၁၅၊ အောက်တိုဘာ၊ ၂၀၁၅

်စာ

22/09/2023

မင်းကိုပြောပြချင်ပြီး ပြောပြလို့မရတဲ့ကိစ္စတွေ ကဗျာစာအုပ်အတွက် Pre-order တွေကို ကျနော်တို့ စတင်ပို့ဆောင်နေပြီဖြစ်ပြီး ‌ရောက်တဲ့သူတွေဆီလည်း ရောက်ရှိနေပါပြီခင်ဗျ

Signed Copy Sticker ပါဝင်မယ့် အမှာအုပ်ရေ ၁၀၀ လည်း ပြည့်သွားခဲ့ပြီဖြစ်ပါတယ်

ဝယ်ယူဖတ်ရှုပေးသူတိုင်းကို MARA Publications အနေနဲ့ ကျေးဇူးတင်ရှိပါတယ်

ကျနော်တို့တိုက်အနေနဲ့ စုစုပေါင်း ၄ အုပ် ထုတ်ထားပြီး ၄ အုပ်စလုံးကိုလည်း Page မှာ မှာယူနိုင်ပါသေးတယ်

သိပ်မကြာခင်မှာလည်း အမှတ်စဉ် ၅ စာအုပ်ကို ထုတ်ဝေသွားတော့မှာမို့ စောင့်မျှော်ပေးကြပါဦးနော်

ချစ်ခင်စွာဖြင့်
MARA Publications

19/09/2023

မာရ်နတ်ရဲ့ ဝင်ရောက်နှောင့်ယှက်ထားမှုကြောင့် ဘုရားရှင် အာယုသင်္ခါရလွှတ်ခါနီးမှာ တားဆီးပိတ်ပင်စကားလေး တစ်ခွန်းခွန်းကိုတောင် ဝင်ပြောဖို့အတွက် သတိလက်လွတ် မေ့လျော့ခဲ့တဲ့ ရှင်အာနန္ဒာရဲ့အဖြစ်လိုပဲ ပြောချင်လျက်နဲ့ ပြောမထွက်တဲ့ (ဝါ) ပြောလို့မရတဲ့ ကိစ္စတွေ။ ကိုယ့်ကို တစ်ကွင်းလုံးမွှေနှောက်ကစားပြီးမှ အနိုင်ပိုင်း ကျောခိုင်းထွက်ခွာသွားတဲ့ မိန်းမတစ်ယောက်ယောက်ရဲ့နောက် ပြေးလိုက်ပြီး ပြောပြလိုက်ချင်တဲ့ ကိစ္စတွေ။ ကိုယ့်အနောက်မှာ ကျန်ရစ်ခဲ့တဲ့ နှင်းဆီပင်လေးရဲ့ ပွင့်ဖတ်တွေကို နူးညံ့စွာ ပွတ်သပ်ပြီးမှ တီးတိုးနှစ်သိမ့် ပြောပြခဲ့ချင်တဲ့ ကိစ္စတွေ။ အဲဒီဖြစ်ရပ်တွေအားလုံးရဲ့ နောက်ကွယ်မှာတော့ ကိုယ့်နှလုံးသားကို ဖျစ်ညှစ်ဆုပ်ကိုင်ထားတဲ့ အခြေအနေနဲ့ အချိန်ကာလဆိုးရဲ့ ညစ်တီးညစ်ပတ် လက်ကြီး။ ဘဝကို လျှပ်စီးတစ်ချက် လက်သလိုမျိုးသာ နေထိုင်နိုင်ခဲ့မယ်ဆိုရင်တော့ ဘာအရေးလဲ။ အခုတော့ အဲဒီလို မနေထိုင်နိုင်တဲ့အတွက် ကိုယ့်ကို ချစ်တဲ့၊ ကိုယ်က ချစ်ရတဲ့သူတွေရဲ့ ရှေ့မှောက်မှာတင် အာစေးထည့်ခံထားရသလို ဆွံ့အ နာကျင်။ တိုက်ပွဲအားလုံးမှာ အသက်ရှင်ကျန်ရစ်ခဲ့ရသူ ဖြစ်ပါတယ်။


သင်၏ တွေဝေမိန်းမောနေသော

- ဆစ်ခ်

Publisher

18/09/2023

စာအုပ်ရပါပြီခင်ဗျာ
စာရေးသူလက်မှတ်တွေလည်း ရေးထိုးပြီးပါပြီ

Pre-order တွေကို လာမယ့်ရက်ပိုင်းထဲ ပေးပို့သွားတော့မှာဖြစ်ပါတယ်ခင်ဗျ

ကဗျာဆရာဆစ်ခ်ရဲ့ "မင်းကိုပြောပြချင်ပြီး ပြောပြလို့မရတဲ့ ကိစ္စတွေ" ကဗျာစာအုပ်ကို မှာယူချင်သေးတဲ့သူတွေအနေနဲ့လည်း Page Chat Box မှာ မှာယူနိုင်ပါသေးတယ်

ချစ်ခင်စွာဖြင့်
MARA Publications

17/09/2023

- ညတွေမှာ၊ ကိုယ့်နာမည်ကို မင်းအမှတ်ရနေပါစေလို့ ဆုတောင်းမိတဲ့ အချိန်တွေမှာ -

ကံဆိုးရင် မင်းနာမည်ကို စတင်မေ့ပစ်နိုင်ဖို့ ကြိုးစားရမယ့်ကိစ္စကို ကိုယ်က ဆက်လက်မေ့လျော့နေဦးမှာ ဖြစ်တယ်
ကံကောင်းရင်တော့ ကိုယ့်ခေါင်းဟာ ရှစ်စိတ်တိတိ ကွဲသွားမှာဖြစ်ပြီး တစ်စိတ်ချင်းစီတိုင်းဟာ အရည်ရွှမ်း ချိုမြ
မင်းရဲ့ လျှာဖျားတွေကို အရသာရှိစေကြလိမ့်မယ်
ဒါပေမဲ့ မင်းဟာ ကိုယ့်ဦးနှောက်တွေကို ဖောက်စားခဲ့တာတော့ မဟုတ်
အဲဒီအစား ကိုယ့်ဆံပင်တွေကိုပဲ ညင်ညင်သာသာ ထိုးဖွပွတ်သပ်ပေးခဲ့တာ
ကိုယ့်အအေးဓာတ်ကို ကိုယ့်မျက်စိရှေ့မှာတင် လက်နှစ်ဖက်နဲ့ ရုတ်ချည်း ဖျောက်ဖျက်ပြခဲ့တာ
ရှက်ဖွယ်လိလိပါပဲ
အိတ်ကပ်ထဲ စံပယ်ပန်းတွေ အပြည့်ထည့်ပြီး လျှောက်သွားနေမိတယ်
ကိုယ့်မွှေးရနံ့ဟာ ညနေခင်း လူရှင်းတဲ့ ဘားဆိုင်လေးတစ်ဆိုင်ကနေ
မင်းတို့ရဲ့ ချစ်စရာ ဝရံတာလေးဆီထိ ပျံ့နှံ့ရောက်ရှိ
အဲဒီမှာ ကိုယ်မသိတဲ့ လူတစ်ယောက်ယောက်က မင်းရဲ့ ညအိပ်ဝတ်စုံပေါ်က တိရစ္ဆာန်ရုပ်ကလေးတွေကို ရေတွက်နေမှာ
ဒါမှမဟုတ် မင်းရဲ့ ခွေးသွားစိတ်တွေကို ချောမွေ့အောင် ဆီထိုးအားဖြည့်ပေးနေမှာ
ငှက်ကလေးတွေကို ကိုယ် မနာလိုပါဘူးကွာ
ဒါကြောင့်ပဲ ဘာကြောင့်မှန်းမသိ ပျောက်ရှသွားတဲ့ အတောင်ပံတွေနဲ့
ကိုယ့်နာမည်ကို မင်းမေ့လျော့သွားနိုင်ချေအပြည့်ရှိတဲ့ နံနက်ခင်းတွေကနေ ကိုယ်ပြေးထွက်
တစ်စုံတစ်ယောက်အကြောင်းကိုပဲ
အကြိမ်ပေါင်းများစွာ အိပ်မက်မက်နေဦးမှာပါပဲ။

- ဆစ်ခ် -
3rd day of July, 19

14/09/2023

ဆစ်ခ်အတွက် MARA ရဲ့ မေးခွန်း (၅) ခု



၁။ မတ်လတုန်းက “ Unsent Letters to Lana “ ဆိုပြီး ထုတ်ခဲ့သေးတယ်နော်။ အဲဒီစာအုပ်နဲ့ အခု ထပ်ထွက်လာမယ့် “ မင်းကို ပြောပြချင်ပြီး ပြောပြလို့ မရတဲ့ ကိစ္စတွေ” စာအုပ်ကြား ဘာတွေ အဓိကကွာသွားမလဲ ... အရေးအသား၊ အကြောင်းအရာ စသဖြင့် ...

- အထင်ရှားဆုံး ကွာခြားမှုကတော့ ဒါက ဖန်တီးအားထုတ်မှု ပါဝင်တဲ့ ကဗျာစာအုပ်ဖြစ်ပြီး Unsent ကတော့ ကျနော့်ရဲ့ အတော်လေး တသီးပုဂ္ဂလဆန်တဲ့ အလွတ်သဘော အရေးအသားတွေလို့ ပြောလို့ရတယ်။ Mara Publications က ‘မင်းကို ပြောပြချင်ပြီး ပြောပြလို့မရတဲ့ ကိစ္စတွေ’ စာအုပ်နဲ့ စတင်ဖို့ ရည်ရွယ်ခဲ့ပေမယ့်လည်း အကြောင်းအမျိုးမျိုးကြောင့် နောက်ကျပြီးမှ ထွက်ရှိလာခဲ့ရတာ။ ကျနော့်ကိုယ်ကျနော် အခြားသော စာပေပုံသဏ္ဍာန်တွေထက် ကဗျာရေးသူတစ်ယောက်အဖြစ်ပဲ ပိုပြီး သတ်မှတ်ထားသူမို့ ဒီစာအုပ်ထွက်ရှိတဲ့အပေါ် ပိုပြီး ပျော်ရွှင်ရတယ်လို့တော့ ဝန်ခံရမှာပါပဲ။



၂။ ခင်ဗျားကို ကြည့်ရတာ ဘာသာရေးကိုင်းရှိုင်းတဲ့ လူတစ်ယောက်လို့တော့ ထင်စရာ မရှိဘူးနော်။ ဒါပေမယ့် ကဗျာတွေထဲမှာ မာရ်နတ်နဲ့ ဘုရားရှင်အကြောင်းတွေ၊ ငါးရာ့ငါးဆယ် နိပါတ်တော်တွေ ပါနေသလို၊ Osho ကိုးကားချက်တွေ၊ ဘုရားသခင်ဆိုတဲ့ အသုံးအနှုန်းတွေလည်း ပါနေတယ်။ ကိုယ့်ရဲ့ ယုံကြည်မှု (faith) အကြောင်း ဖြစ်ဖြစ်၊ ဝိဉာဏရေးရာ သက်ဝင်မှု (spirituality) အကြောင်းဖြစ်ဖြစ် တစ်ခုခု ပြောပြပေးနိုင်မလား

- ဒီမေးခွန်းကတော့ စားတယ်ဗျာ။ ကျနော့်ဘက်က ပြန်မေးခွန်းထုတ်စရာရှိတာက ဘာသာရေးကိုင်းရှိုင်းတယ် ဆိုတဲ့ စကားရပ်အပေါ် ကျနော်တို့ ဘယ်လိုအနက်ပြန်ကြသလဲ ဆိုတာပေါ့လေ။ ဒါပေမဲ့ အခုလို ပြန်မေးခွန်းထုတ်လို့ ကျနော့်ကို ဘာသာရေးကိုင်းရှိုင်းသူတစ်ယောက်အဖြစ် မြင်စေချင်တာတော့ မဟုတ်ဘူး။ တခြားသူတစ်ယောက်က ကိုယ့်အပေါ် ဘယ်လိုဘယ်ပုံ မြင်ခြင်း/မမြင်ခြင်းဟာ ဘာအရေးမှကို မပါတာလို့ ယူဆတာမို့။ ကဗျာဘာသာစကားထဲမှာ ဒီလိုမျိုး ဘာသာရေးနဲ့ဆက်နွယ်တဲ့ အသုံးအနှုန်းတွေ ထည့်ဝင်သုံးစွဲထားတဲ့ အပေါ်မှာတော့ အထွေအထူး ပြောစရာ မရှိပါဘူး။ ဘုရားရှင်၊ မာရ်နတ်၊ ငါးရာ့ငါးဆယ်ဇာတ်နိပါတ်စတာတွေဟာ ဘီယာ၊ အရက်၊ မိန်းမအင်္ဂါဇာတ်နဲ့ ဆဲဆိုသံတွေလိုမျိုး ကျနော့် ဘဝထဲမှာ ထဲထဲဝင်ဝင် ဝင်ရောက်အလုပ်လုပ်နေတဲ့ အရာတွေမို့လို့ပါပဲ။ ဒီနေရာမှာ ရှင်းအောင် ပြောစရာရှိတာက ကျနော့်ရဲ့ ကဗျာတိုင်းနီးပါးကို ကျနော့်ရဲ့ တွေ့ကြုံဖြတ်သန်းမှုကနေပဲ အဓိကအားဖြင့် ရေးသားတယ်ဆိုတာပေါ့လေ။ ဘယ်သူ့ဘဝမှ မင်းဘဝမဟုတ်ဘူး ဆိုတဲ့အသိနဲ့ ကျနော့်ဘဝကို နေထိုင်ကြည့်တယ်။ သူများဘဝတွေကိုလည်း နားလည်ပေးကြည့်တယ်။ ဒါကို ကျနော့် ယုံကြည်မှုလို့ ပြောချင်ပြောလို့ ရပါတယ်။ တခြား ယုံကြည်မှုတွေအကြောင်းကတော့ မပြောချင်ဘူးဗျာ။


၃။ မနက်တွေမှာ ကိုယ့်နာမည်ကို မင်းမေ့သွားပါစေလို့ မျှော်လင့်မိတဲ့ အချိန်တွေမှာ၊ နေ့လည်တွေမှာ မင်းနာမည်ကို ကိုယ် ယောင်ယမ်း အော်ခေါ်မိဖို့ ထိန်းချုပ်ရတဲ့ အချိန်တွေမှာ၊ ညနေတွေမှာ မင်းနာမည်နဲ့ ကိုယ့်နာမည် ရောယှက် အေးစက်မာခဲသွားတဲ့ အချိန်တွေမှာ၊ ညတွေမှာ ကိုယ့်နာမည်ကို မင်း အမှတ်ရပါစေလို့ ဆုတောင်းမိတဲ့ အချိန်တွေမှာ … စတဲ့ အပုဒ်တွေကို ဒီစာအုပ်ထဲမှာ တွေ့ရတယ်။ အချစ်ခံစားချက်၊ အသည်းကွဲရနာကျင်ရတဲ့ ခံစားချက်တွေကို ကဗျာထဲ ထည့်သွင်းရေးသားဖို့ ဘယ်လို အဆင့်တွေကို ဖြတ်သန်းခဲ့ရလဲ

- ရှင်းပါတယ်။ ချစ်ဖူးဖို့ ပြီးတော့ အသည်းကွဲဖူးဖို့ပေါ့။ ပြီးတော့ အဲဒီလို ခံစားချက်မျိုးတွေဟာ ခင်ဗျားရဲ့ တစ်နေ့တာလုံးအထိ စိုးမိုးထိန်းချုပ်နေတာမျိုးကို တွေ့ကြုံဖူးဖို့။

၄။ နောက်ဆက်တွဲ မေးခွန်းပါ။ အသည်းကွဲနေတဲ့ စာဖတ်သူတွေအတွက် တစ်ခုခု ပြောရမယ်ဆို ဘာပြောချင်လဲ

ဟ၊ ဒါ ဘယ်လို မေးခွန်းလဲဗျာ 😆

၅။ “ စစ်ပွဲနောက်ခံကားချပ်ပေါ် ဖြတ်ပြေးနေတဲ့ အရိပ်နဲ့ သင်ချစ်ကျွမ်းဝင်ခဲ့တဲ့ နေ့တွေ” အကြောင်းလည်း ခင်ဗျားရေးထားတာပဲ။ ဆိုးဆိုးရွားရွား ယိုင်ထွက်မသွားအောင် ထိန်းထားရတဲ့ ကာလတွေမှာ ကိုယ့် ဟန်ချက်ကိုယ် ပြန်ရှာဖွေဖို့ ခင်ဗျား အသုံးပြုနေဖြစ်တဲ့ နည်းလမ်းတွေ ရှိလား

- ဒီအကြောင်းတွေ ကျနော်တို့ မပြောရရင် သိပ်ကောင်းမှာပဲလို့ ကျနော် အရင်ဆုံး ခံစားချက်ဖြစ်မိတာကိုတော့ ဖွင့်ဟရမှာပဲဗျာ။ ခင်ဗျား သုံးနှုန်းသလို ဆိုးဆိုးရွားရွား ယိုင်ထွက်မသွားအောင် ထိန်းထားရတဲ့ကာလတွေ အကြောင်းပေါ့ဗျာ။ အနည်းဆုံးတော့ ကျနော်တို့ဟာ ဟန်ချက်ကို ထိန်းနိုင်ခဲ့ကြလို့သာ ဒီအကြောင်းတွေကို ပြောနေနိုင်သေးတာမျိုးပေါ့လေ။ ဒီနေရာမှာ ပုံပျက်သွားတဲ့၊ ပုံသဏ္ဍာန်တောင် မရှိတော့တဲ့ ဘဝတွေအတွက် ကျနော် ပြောကြည့်ဖို့ ကြိုးစားချင်ပါတယ်။ တစ်ခုသော နွေဦးမှာ ပန်းပွင့်လို ပွင့်ဖြာထွက်သွားတဲ့ ဦးခေါင်းဆိုတာထက် ပိုပြီး ကျနော် ပြောပြချင်ပါတယ်။ ဒါပေမဲ့ ကျနော့် ယုံကြည်မှုအတိုင်းပဲ ခင်ဗျားရဲ့ ကိုယ်ပိုင်ဘဝထဲကနေ ဘယ်လောက်ပဲ ကြိုးစားပြီး ပြောပြပြ တကယ့် ကာယကံရှင်ရဲ့ ဘဝထဲက အသံကို ခင်ဗျား မရနိုင်ဘူးဗျာ။ ဒါကြောင့်မို့လည်း ကိစ္စအများစုမှာ သင်ဟာ ပြုလုပ်နေတာမဟုတ်၊ အလိုလို တုံ့ပြန်နေတာသာ ဖြစ်တယ် ဆိုတဲ့ အိုရှိုးရဲ့ စကားရပ်ကို ထည့်သွင်းကိုးကားမိခဲ့တာ ဖြစ်မှာပါပဲ။ ဒါဟာ နောက်ဆုံးသော ဆောင့်သွင်းချက်ကို အပြင်မှာပဲ ပန်းထုတ်လိုက်ရတာမျိုးလည်း ဖြစ်ပါတယ်။

11/09/2023

𝗣𝗿𝗲-𝗼𝗿𝗱𝗲𝗿 စတင်ကောက်ခံပါပြီခင်ဗျာ

စာအုပ်အမည် - မင်းကိုပြောပြချင်ပြီး ပြောပြလို့မရတဲ့ကိစ္စတွေ
စာရေးသူ - ဆစ်ခ်
မျက်နှာဖုံးပန်းချီ - မုတ်သုံ
မျက်နှာဖုံးဒီဇိုင်း - အမ်ဂျီသာယာ
ဘာသာပြန် - ဏေသစ်၊ ပိုင်ဉာဏ်
စာအုပ်တန်ဖိုး - ၅၀၀၀ ကျပ်

ကျွန်တော်တို့ MARA Publications ရဲ့ ၄ အုပ်မြောက်ဖြစ်ပြီး ကဗျာနဲ့ ကဗျာဆိုင်ရာစာအုပ်တွေအတွက်တော့ ပထမဆုံး ထုတ်ဝေမှုဖြစ်ပါတယ်။

ဘုရားရှိခိုးပါ၊ ဖွန်ကြောင်ပါ၊ ရိုလာကိုစတာစီးပါ ကဗျာစာအုပ်ပြီးနောက်မှာ ထွက်ရှိလာခဲ့တဲ့ ကဗျာဆရာဆစ်ခ်ရဲ့ ဒုတိယမြောက် တစ်ကိုယ်တော်စာအုပ်ဖြစ်ပါတယ်။

ဒီစာအုပ်ကို ကျနော်တို့ Page မှာ Pre-order တင်တဲ့သူတွေထဲက ပထမဆုံး အယောက် ၁၀၀ ကတော့ စာရေးသူလက်မှတ် + Signed Copy စတစ်ကာ + စာမှတ်ကဒ် ရရှိမှာပဲ ဖြစ်ပါတယ်။

(အလားတူ ကျနော်တို့စာအုပ်တိုက်ရဲ့ မိတ်ဖက် Page တွေဖြစ်တဲ့ Books Not B***s နဲ့ စာအုပ်ဆိုင် The Bookland တို့မှာလည်း ပထမဆုံး အယောက် ၁၀၀ စီကို စာရေးသူလက်မှတ် + Signed Copy စတစ်ကာ + စာမှတ်ကဒ်တွေ ပေးသွားဖို့ စီစဉ်ထားပါတယ်။)

မှာယူလိုသူတွေအနေနဲ့ Page ရဲ့ Chat Box မှာ

အမည် -
လိပ်စာ -
ဖုန်းနံပါတ် -
စသဖြင့် အပြည့်အစုံပေးပို့ပြီးမှာယူနိုင်ပါတယ် ။

Pre-order မှာယူထားသူတွေကို စက်တင်ဘာလ တတိယအပတ်မှာ စာအုပ်ကို ပို့ဆောင်ပေးသွားမှာပါ။

မင်းကိုပြောပြချင်ပြီး ပြောပြလို့မရတဲ့ကိစ္စတွေစာအုပ်အတွက် ကြိုတင်အမှာအားလုံးကို နေရာ ၃ နေရာကနေပဲ လက်ခံသွားမှာဖြစ်ပြီး ကျနော်တို့ 𝗠𝗔𝗥𝗔 𝗣𝘂𝗯𝗹𝗶𝗰𝗮𝘁𝗶𝗼𝗻𝘀 Page ရဲ့ Chat Box ၊ Books Not B***s Page နဲ့ စာအုပ်ဆိုင် The Bookland Page တို့ကနေပဲ မှာယူလို့ ရရှိနိုင်မှာ ဖြစ်ပါတယ်။

အဆိုပါ Page ၂ ခုရဲ့ Link ကိုလည်း တွဲပြီး ဖော်ပြပေးလိုက်ပါတယ်ခင်ဗျာ

Books Not B***s
https://www.facebook.com/BookstoreByXi6k?mibextid=ZbWKwL

စာအုပ်ဆိုင် The Bookland
https://www.facebook.com/sarokesinethebookland?mibextid=ZbWKwL

အားလုံးပဲ ပျော်ရွှင်ချမ်းမြေ့ကြပါစေခင်ဗျာ 🖤

ချစ်ခင်စွာဖြင့်
𝗠𝗔𝗥𝗔 𝗣𝘂𝗯𝗹𝗶𝗰𝗮𝘁𝗶𝗼𝗻𝘀

10/09/2023

မိုးအနည်းငယ် စဲသွားချိန်မှာ ကိုယ်စတင်တွေးမိတာက

ဟုတ်တယ်။ ကိုယ်တို့မှာ အချစ်မရှိတော့တာ ဖြစ်နိုင်တယ်*။ မိုးထဲရေထဲ မင်းဆီ ပြန်လာဖို့ ကြိုးစားတိုင်းလည်း မိုးထဲရေထဲပဲ ကိုယ်ဟာ ပြန်ပြန်ရောက်နေတယ်။ အားနာစိတ်တစ်ဝက်နဲ့ ကြက်ကို လည်လှီးသတ်ဖို့ကြိုးစားနေတဲ့ လတ်ဆတ်မှုကို ကြိုက်နှစ်သက်သူဟာလည်း ကိုယ်ဖြစ်ကောင်းဖြစ်နေလိမ့်မယ်။ သမိုင်းတလျှောက်လုံး ကိုယ့်ဘက်ကိုယ် ပြန်ဦးလှည့်ထားတဲ့ ဓားတွေကိုပဲ ကိုယ်သွန်းလုပ်ချင်ခဲ့တာ။ ဒါပေမဲ့ ဝါဝင်ချိန်တိုင်း နိဗ္ဗာန်အပေါ် ပို၍ ပို၍ အယုံအကြည်ကင်းမဲ့လာသူတစ်ယောက်ဘဝကိုပဲ ကိုယ် ရခဲ့။ သပ္ပူရိသအပေါင်း သူတော်ကောင်းတို့ ဆိုတဲ့ ဆော်ဩသံကြားရတိုင်း မိုက်ခွက်ကို သွားလုပြီး မအေလိုးတွေ အလိမ်အညာတွေလို့ အော်ဟစ်ပစ်လိုက်ချင်စိတ်ကို ထိန်းခဲ့။ ထီးတွေ မိုးကာအင်္ကျီတွေရဲ့ အကူအညီနဲ့သာ ကိုယ်တို့အားလုံးဟာ အခြားတစ်ယောက်ယောက်ကို ချစ်ခဲ့ကြတာချည်းပဲ။ ဟုတ်တယ်။ ကိုယ်တို့မှာ အချစ် မရှိတော့တာ ဖြစ်နိုင်တယ်လို့ စိုစွတ်မြေသားကို ထိုင်ကြည့်ရင်း ကိုယ်ဆက်တွေးနေမိတယ်။ ဒါမှမဟုတ်လည်း ကိုယ်တို့ (ဝါ) အချစ်ဟာ နဂိုမူလပုံစံကနေ ရွေ့လျောပျက်ယွင်းသွားတာ။ ကိုယ်တို့မှတ်ဉာဏ်ထဲကနေ ရက်ရက်စက်စက် အဖျောက်ဖျက်ခံပစ်လိုက်ရတာ။ ကိုယ့်ပုဆိန်လေးပဲ ကိုယ့်ကို ပြန်ပေးပါလို့ ဘယ်လောက်တောင်းပန်တောင်းပန် နတ်ရေကန်ထဲကနေ သက်တမ်းကုန်ဆုံးသွားတဲ့ ကွန်ဒုံးအထပ်လိုက်ကြီးကိုပဲ ပြန်ပေးအပ်ခြင်း ခံလိုက်ရသလိုပေါ့။ ကိုယ့်လမ်းကိုယ်လျှောက်နေရင်းက မကောင်းဆိုးဝါး လူအုပ်ကြီးကြားထဲ ခဏခဏ ရောပါသွားတာ။ မင်းကော ဘာတွေတွေးနေလဲ။ နံနက်ခင်းရဲ့ နေရောင်ခြည်ရနံ့ ထည့်ချက်ထားတဲ့ အိမ်ထောင့်ရှင်အတွက် မုန့်ဟင်းငါးတစ်ပွဲ အကြောင်းလား။ ဆယ်လ်ဖီရိုက်တဲ့အခါ ဦးခေါင်းကို ဘယ်လောက်ဒီဂရီ စောင်းထားသင့်တယ်ဆိုတဲ့ အကြောင်းလား။ ဘာပဲဖြစ်ဖြစ် ကိုယ်တို့မှာ ရှိတဲ့ အချစ်ကတော့ အဆက်မပြတ် ရေထိုးပေးနေရင်းကပဲ ပေါ့ပျက်ကုန်ဆုံးသွားခဲ့ပြီ။ သွားကြားမှာ ကပ်နေတဲ့ ငရုတ်သီးဖတ်ဘဝနဲ့ပဲ ကိုယ်တို့ဆီ ပြန်လာခဲ့ပြီ။ တစ်ဘဝလုံး ကိုယ့်ကို လိုက်ဒုက္ခပေးနေတဲ့ လိပ်ခေါင်းကို ဖြတ်ပစ်လိုက်သလို တစ်ချိန်မှာ ကိုယ်တို့ဟာ အချစ်ကို ဖြတ်ပစ်ကောင်း ဖြတ်ပစ်ရလိမ့်မယ်။ ပြီး၊ ဖင်ခေါင်းထဲကနေ သွေးစက်လက်ကျနေရင်းကပဲ အချစ်ဟာ ဘယ်လောက်အထိ ကြီးမြတ်ကြောင်း တစ်ယောက်ဦးခေါင်းကို တစ်ယောက်ပွတ်သပ်ရင်း တိုးတိုးညင်သာ ဆက်လက်ပြောကြားသွားကြတာပေါ့။

*ငါတို့အချစ်မရှိတော့တာဖြစ်နိုင်တယ်/ကိုအောင်

ဆစ်ခ်

What I Start Pondering When the Rain Pauses

Well, it could be true that we’ve all run out of love. Every time I try to get back to you in the rain, I am sent back into it again and again. I might be the one who feels somewhat remorseful while trying to slit the throat of a fowl for his appetite for freshness. I've wanted to mould the swords pointing at me throughout history. But all I get is the life of a person whose belief in Nirvana gets weaker with each Buddhist lent. Whenever I hear speakers delivering persuasive speeches, urging “ Dear good-faith people …”, I am compelled to restrain myself from seizing their microphone and yelling “Lies, you motherf**kers!” at the top of my lungs. Our love for one another is only made possible with the aid of umbrellas or raincoats, that’s it. I ponder, gazing at the soaked earth, that we might have been all out of love. Or, love or even us ourselves might have deteriorated from their original forms and got brutally discarded from our memories. It feels as though, no matter how hard I plead, the pond of spirits would only return a heap of expired condoms in lieu of my little axe. Walking in my own way, I have become lost in the sea of demons. What are you thinking now? A bowl of Mohinga cooked for the househusband, fragrant with a scent of sunlight? The perfect angle to tilt yourself for a selfie? The love between us has anyway become stale and flavourless despite our continuous attempts of adding water, only to return to us as a piece of chilli pepper stuck between our teeth. Perhaps, like the pile that has tormented me all my life, we may need to amputate love at some point. Even as blood drips from our anuses, we shall continue whispering how magnificent love is, patting each other’s heads.

*We might have been all out of love / Ko Aung



ဆစ်ခ်ရဲ့ မင်းကို ပြောပြချင်ပြီး ပြောပြလို့မရတဲ့ကိစ္စ‌တွေ ဆိုတဲ့ ကဗျာစာအုပ်ထဲမှာ ပါဝင်လာမယ့် ကဗျာတစ်ပုဒ်ကို ဒီညရဲ့ဖတ်စရာအဖြစ် ဖော်ပြပေးလိုက်ပါတယ်

ကဗျာကို ဘာသာပြန်ပေးသူတွေကတော့ ဏေသစ်နဲ့ ပိုင်ဉာဏ်ဖြစ်ပါတယ်

သိပ်မကြာခင်မှာပဲ ဒီစာအုပ်ကို MARA Page ကနေ Pre-order ကောက်ယူသွားတော့မှာပဲ ဖြစ်ပါတယ်

ချစ်ခင်စွာဖြင့်
MARA Publications

04/09/2023

ဟယ်လို …
သိပ်မကြာခင်မှာ ထွက်ရှိလာတော့မယ့် ကျနော်တို့ MARA Publications ရဲ့ ၄ အုပ်မြောက် စာအုပ်လေးနဲ့ မိတ်ဆက်ပေးချင်ပါတယ်ဗျို့

ကဗျာဆရာ ဆစ်ခ်ရဲ့ မင်းကို ပြောပြချင်ပြီး ပြောပြလို့မရတဲ့ကိစ္စတွေ ဆိုတဲ့ ကဗျာစာအုပ်ဖြစ်ပြီး ပိုင်ဉာဏ်၊ ဏေသစ်တို့ရဲ့ ဘာသာပြန်လက်ရာတွေနဲ့အတူ ဖတ်ရှုနိုင်တော့မှာပါ

ဒီစာအုပ်ဟာ ကျနော်တို့ MARA အတွက်တော့ ကဗျာနဲ့ ကဗျာဆိုင်ရာစာအုပ်တွေအတွက် ပထမဆုံး ထုတ်ဝေမှုဖြစ်ပြီး ကဗျာဆရာဆစ်ခ်နဲ့အတူ နှစ်ကြိမ်မြောက် လက်တွဲခွင့်ရတဲ့စာအုပ်လည်းဖြစ်ပါတယ်

မျက်နှာဖုံးနဲ့ အတွင်းသရုပ်ဖော်အနေနဲ့ ပန်းချီဆရာ မုတ်သုံရဲ့ လက်ရာတွေကိုလည်း ခံစားနိုင်မှာပါ

သိပ်မကြာခင်မှာ Pre-order ကောက်ယူတော့မှာမို့ Page မှာ စောင့်မျှော်ပေးကြပါဦး

အားလုံးပဲ ပျော်ရွှင်ချမ်းမြေ့ကြပါစေခင်ဗျာ

ချစ်ခင်စွာဖြင့်
MARA Publications

28/08/2023

ပြီးတော့ ငါ့ကို အမြဲတမ်းစိတ်မသက်မသာမှုဖြစ်စေတဲ့အကြောင်းအရာတစ်ခု။ အဲဒီတုန်းက ငါ့အသက်က ဆယ်နှစ်ကျော်ကျော်လောက်ပဲရှိဦးမယ်။ ကားလမ်းအိမ်လို့ ငါခေါ်တဲ့ စျေးပိုင်းက အိမ်ကို ငါ တစ်ရက်သွားနေခဲ့တယ်။ အဲဒီတုန်းက ငါ့အဖိုး ချဲလေးမောင်လို့လူတွေခေါ်ကြတဲ့ ဦးလေးမောင်ဟာ လေဖြတ်နေခဲ့ပြီ။ မာနအင်မတန်ကြီးပြီး ထက်မြက်တဲ့ ပြီးတော့ သူ့မာနကို နည်းနည်းလေးမှအထိအပါးမခံခဲ့တဲ့ ငါ့အဖိုးဟာ လေဖြတ်ပြီးတဲ့အခါကျတော့ အဲဒီမာနတွေ၊ သူ့မှာရှိဖူးတဲ့ ပြင်းထန်တောက်လောင်တဲ့ ယုံကြည်မှုတွေဟာ မမြင်ရတဲ့အရှိန်တစ်ခုက ဆွဲယူစုပ်သွင်းလိုက်ခြင်း ခံလိုက်ရသလိုမျိုးဖြစ်သွားတယ်။ ငါ့အဖိုးဟာ တတိတိလေလျော့နေတဲ့ ပူဖောင်းတစ်လုံးလို ဖြစ်သွားတယ်။ ငါ့အဖိုးဆီမှာ ကျန်နေခဲ့တဲ့အရာဟာ ဝမ်းနည်းလွယ်မှုနဲ့ အဲဒီဝမ်းနည်းလွယ်မှုအပေါ် သူကိုယ်တိုင်ရဲ့ ဒေါသသင့်မှုဖြစ်လိမ့်မယ်ထင်တယ်။ အဲဒီနေ့က ငါဟာ အဖိုးရှေ့မှာ ဒန်ပေါက်စားနေခဲ့တယ်။ ငါ့အဖိုးဟာ သူ့အတွက်လုပ်ထားတဲ့ကြက်သားကြော်ကို နည်းနည်းလေးမှမထိတော့ဘဲ ငါ့ကိုသာ သူ့ကုတင်ပေါ်ကနေ ငေးကြည့်နေခဲ့တယ်။ ဒန်ပေါက်က သူနဲ့မတည့်ဘူး။ ဒါကြောင့်မို့ ငါဟာလည်း သူ့ကို ကျွေးလို့မရခဲ့ဘူး။ ဒါပေမဲ့ အဲဒီဒန်ပေါက်ကိုပဲ စားချင်နေတဲ့ ငါ့အဖိုးရဲ့မျက်လုံးတွေ။ ဘာလို့မှန်းမသိဘဲ ငါဟာ ငါ့အဖိုးကို ဒန်ပေါက်စားမလားအဖိုးလို့ မေးမိတယ်။ ငါ့အဖိုးမျက်လုံးတွေဟာ သိပ်ကို အရောင်လက်သွားတာပဲ။ မဟုတ်ဘူး အရောင်လက်နေတဲ့တစ်ခုခုက ငါ့အဖိုးမျက်လုံးတွေ ဖြစ်သွားကြတာ။ ဒါပေမဲ့ ငါဟာ မေးပြီးပြီးချင်းပဲ " အဖိုးနဲ့မတည့်လို့ စားလို့မရဘူး ၊ ကြက်သားကြော်ပဲ စားနော် " လို့ ထပ်ပြောမိတယ် ။ အဲဒီအခါကျ ငါ့အဖိုးဟာ ငါ့ကို ဆဲခဲ့တယ် ။ ဗလုံးဗထွေးလေသံနဲ့ ငါ့ကို ငါနဲ့ကိုင်တုပ်ပြီး ဆဲနေခဲ့တယ်။ ဒဏ်ရာရသွားတဲ့တောရိုင်းတိရစ္ဆာန်တစ်ကောင်ရဲ့ စူးစူးဝါးဝါးအော်ဟစ်လိုက်သလို တကယ့်ကို နာကျင်သွားသလို အသံမျိုးပဲ။ ဒါပေမဲ့ ဗလုံးဗထွေးနဲ့မို့ ငါဟာ အဲဒါကို ရယ်မိခဲ့တယ်။ အခု ပြန်တွေးကြည့်တော့ အဲဒီ ငါ့ရယ်သံဟာ ငါ့တစ်သက်လုံးကို ကြီးစွာသော အရှက်ရမှု၊ အပြစ်ရှိမှု၊ ကိုယ့်ကိုယ်ကို အမြဲတမ်းအပြစ်တင်မှုအဖြစ်နဲ့ ကျန်နေခဲ့တယ်။ နောက်တော့ သိပ်မကြာခင် ငါ့ အဖိုးဆုံးတယ်။ လူတွေဟာ ဘယ်အချိန်မှာ ရပ်ကြသလဲ၊ ဒါမှမဟုတ် ထွက်ခွာကြသလဲဆိုတာ ငါ မသိဘူး။ ငါ့အတွက်တော့ ငါ့အဖိုးရှေ့မှာ အဲဒီလို ရယ်မိတဲ့အတွက် တစ်သက်လုံးအပြစ်မကင်းမှုကို ခံစားနေရတယ်။ ငါပြန်လာတော့ ငါဟာပြောင်းလဲသွားခဲ့ပြီ။ ငါ့ဆီမှာရော အာသာငမ်းငမ်းဖြစ်နေတဲ့ အလိုဆန္ဒတွေ ဘာရှိသေးသလဲပဲ။ ရှိလို့ ငြင်းပယ်ခံရတဲ့အခါတော့လည်း ငါဟာ ငါ့အဖိုးနဲ့ငါနဲ့ကြားက အဲဒီဒန်ပေါက်တစ်ပွဲကို သွားသတိရနေမိတယ်။ ငါလည်း ဘယ်အချိန်မှာ ရပ်တတ်သလဲ၊ ဒါမှမဟုတ် ထွက်ခွါတတ်သလဲဆိုတာကို ငါ မသိဘူ ။ ဒီမြို့လေးကို ငါ ချစ်တာပေါ့။ ဒါပေမဲ့ တစ်ပြိုင်တည်းမှာပဲ ငါ့ရဲ့နောက်ထပ်အစစ်အမှန်ဟာ ဒီမြို့ထဲမှာ မရှိတော့ဘူးဆိုတာကို ကြာလေ ငါ ခံစားလို့ရလာလေပဲ။ ငါဟာ ဘယ်အဖိုးနဲ့ သေချာတူသလဲဆိုတာ ငါ မသိဘူး။ အေးချမ်းစွာနေတတ်တဲ့ ဦးနီနဲ့လား၊ မာနကြီးပြီး ထက်မြက်သလို နည်းနည်းလည်းတစ်ကိုယ်ကောင်းဆန်တတ်၊ သူ့မာနကို ဘယ်တော့မှအထိအပါးမခံတဲ့ ဦးလေးမောင်နဲ့လား။ ငါ့ဆီမှာ အဲဒီအေးချမ်းလိုမှုနဲ့ အတ္တမာနကြီးမှုဟာလည်း ရောစပ်ပြီး အပြိုင်တောက်လောင်နေတယ်လို့ ငါ ထင်မိတာပဲ။ ဒါပေမဲ့ ငါ့ အဖိုးတွေကတော့ မရှိတော့ဘူး။ ငါကတော့ ရှိနေသေးတယ်။ အဲဒါဟာ ငါ့အဖိုးတွေ ရှိနေသလိုပဲလားဆိုတာကိုတော့ ငါလည်း မသိဘူး။ ရုတ်တရက်ကြီး ငါဟာ တတိတိလေလျော့နေတဲ့ ပူဖောင်းတစ်လုံးလို ငါ့ကိုယ်ငါ ခံစားနေရတယ်။ ပျောက်ဆုံးမှုဟာ သူ့ကိုယ်ထဲ ငါ့ကို တရိရိဆွဲသွင်းနေသလိုမျိုးပဲ။

လတ်လွန်းဝေဦး
(ငါ့ဘဝထဲက ရန်သူတော်ခိုငှက်‌တွေ မှ)

MARA Publications ရဲ့ ဒုတိယမြောက်ထုတ်ဝေမှုဖြစ်တဲ့ လတ်လွန်းဝေဦးရဲ့ ငါ့ဘဝထဲက ရန်သူတော်ခိုငှက်တွေစာအုပ်ကို Page မှာ မှာယူနိုင်ပါသေးတယ်ခင်ဗျာ

စာအုပ်တန်ဖိုး - 6500 ကျပ်
စာအုပ်အမည် - ငါ့ဘဝထဲက ရန်သူတော်ခိုငှက်တွေ