30/05/2024
LETSOHO LA MOLAO LE LE LELELE
Ellen Nkikana – Maseru
Molefi Qhoai (30) oa Choatike Ha Ramabanta, Maseru o hlahile Lekhotleng la ‘Maseterata Maseru ka pel’a ‘Maseterata Molapo, bochochising ba Mochochisi Chopho, a qosoa ka tlhekefetso ka motabo ea mosali (38), ho qheketsa, bosholu ba boqhobane le ho baleha litlamong ka La 28 Motšeanong, Selemong sena.
Ea okametseng Ofisi ea Mafokisi Pitso Ground Senior Inspector (S/Insp) Limpho Masasa o hlalositse h**e ‘melaelloa le e mong, ba ile ba baleha setokising ka La 18 Pherekhong Monongoaha. A re pelaelo ke h**e ba ile ba etsa bokeleme ba h**e ba iphasolle maotong moo ba neng ba fasuoe teng.
O re mohla letsatsi la monene, ha ba tla khola phalo, ba ne ba tšoeroe ka pelaello ea ho qheketsa ha lehlatsipa mesong ea La Hlano Mphalane 2022, moo lehlatsipa le neng le utloe mokhoathatsa, ea re ha lere phapha! la bona banna ba babeli ka kamoreng. A re bao ba ile ba batla chelete e M500.00 empa lehlatsipa la hlalosa ha le na le M300.00, eaba ba e nka.
O re ba boetse ba nka mohala oa thekeng, phoofo ea papa, mafura a phehang, radio le mekotla ea hae. S/Insp Masasa a bontša h**e banna bao ba ile ba boela ba hlekefetsa lehlatsipa ka motabo, moo ba ileng ba le hulanyetsa ka kamoreng ea ho lula, ba nt’o le hlekefetsa ka motabo bobeli ba bona.
A thatiseletsa ka h**e ha ba qeta, ba le tšosa ka h**e le le nyae le kolobe kaha ha le ka bua ka ketsahalo eo, ba tla ‘molaea; ea ba nyamella fifing la bosiu. A supa h**e ‘melaelloa e mong o ntse a kene pooneng, ‘me sepolesa se ntse se le ka mor’a hae.
Ha phethela S/Insp Masasa a ipiletsa ho litloli tsa molao h**e li khaotse kaha li nyotobetsa moruo oa naha le batseteli ba tla tšaba ho tsetela ka har’a naha eo litlolo tsa molao li phahameng.
A re ena ea tlhekefetso e bohloko haholo kaha e etsa batho ba nang le khatello ea maikutlo ebe bophelo ha bo tsoele pele ka moo bo neng bo lebelletsoe. “Ho phetlela mpa moea, ha motho a batloa ka litlolo tsa molao, ke ho senya nako kaha letsoho la molao le le lelele’’, a menyeletsa maritsa S/Insp Masasa.
Molefi o theohetse ka setsing sa Tlhabollong ea Batšoaruoa moo a tla boela a hlahe ka pel’a lekhotla ka La 11 Phuptjane, Monongoaha.
