https://www.facebook.com/102369536291263/

InfoSphere, Maseru (2025)

06/01/2025

LI-TV BOX TSA LEFOFO LI KENA LESOTHO

Mekhoa e mecha ea ho boha litsóantsó tsa libaeskopo le lipapali ho marang-rang e ntse e pharalla, ‘me Basotho ba bangata, bao litelevishene tsa bona e leng tsa moetso oa khajana, ha ba itheka moroalo kaha ba se ba sebelisa Android TV box. Kotsi ea sena ke h**e li-TV box tsa lefofo ke tsona tse bonahalang li rekoa ka bongata ke Basotho.

Android TV box ke lebokose le batlang le tsóana le decoder ea DSTV, ‘me lona le etsa h**e motho a fumane litsébeletso tse fumanehang ho marang-rang tse kang Netflix, Showmax le tse ling ka ho lefa seabo khoeli-le-khoeli. Android TV box e kenya li-app tse ngata haholo kaha e nyafa matla molikong oa Google Play.

Mabenkele a tsóanang le Takealot ke ona a thomileng thekiso ea Android TV koano Afrika, haholo Afrika Boroa. Leha ho le joalo, likhoebo tse ngata tsa Basotho le batho ka bo mong ba se ba kene thekisong ea lihlahisoa tsena.

H**e e be e bitsoa Android TV box ke hobane e sebelisa boko ba Android, ‘me ke sehlahisoa sa Google. Li-TV box tsa lefofo joaloka e hlahileng setsóantsóng ha se lihlahisoa tsa Google leha li sebelisa moliko oa li-app oa Google Play.

Tsa lefofo li bonahala joang?
• Ha li na mothusi oa Google (Google Assistant).
• Ha lia hlapanyetsoa ke Google. Tse hlapanyelistoeng li ngotsoe ‘Google Certified’.
• Li theko e tlase haholo; lipakeng tsa M300 le M700. Tsa ‘nete li qala ka bonyane M1000 hangata.
• Mabitso a tsona ke a sa tsebahaleng; boholo ba tsona li sebelisa lebitso la MXQ.
• Barekisi ba tsona ba atisa ho li rekisa li se ntse li tsétse li-app tsa lefofo tseo hangata ba khothaletsang h**e u emise ho lefella DSTV, Netflix le tse ling.

Moo kotsi e leng teng
Li-TV box tsena li tla li tsétsoe li-app tse ka utsoang litaba tsa hau tsa bohlokoa joaloka linomoro tsa lekunutu tsa Google le tsa bankeng; boholo li entsoe ke MaChina. Li-TV box tsa lefofo lia jema kapa hona ho emisa tsébetso nako-le-nako ha li imeloa; ka nako e ‘ngoe li timela ruri. Tsébeliso ea tsona ea data e holimo haholo ka lebaka la li-app tse itaolang hoo li ka etsang h**e Wi-Fi ea hau e imeloe haholo. Na uena u rekile TV Box eo e seng ea lefofo?

23/12/2024

STARLINK E SE E TLA KENA LESOTHO KA 2025, BAREKI BA E HLOELE SETHA

Tsébeletso ea inthanete ea Starlink, ea monna oa sekhorane se fetang likhorane tsohle lefatséng Elon Musk, e chechiselitse khakolo ea eona naheng ea Lesotho selemong se tlang, e leng 2025. Inthanete ena e mathang ka lebelo la lehalima e hlolehile ho khakola tsébetso linaheng tse 24 kaofela tsa Afrika tseo e neng e li phatlalalitse, ‘me tse kenyeletsang Lesotho.

Starlink, e oelang tlasá SpaceX, e atlehile ho khakola tsébetso linaheng tsa Afrika tse supileng (7) feela selemong sena ho tseo e neng e itlhophetse tsona. Linaha tseo ke Botswana, Burundi, Ghana, Madagasca, Sierra Leone, South Sudan, le Zimbabwe. Palo ena e tlisa kakaretso ea linaha tsa Afrika tseo Stralink e seng e khakotsoe ho tsona ho leshome le metso e mene (14). Bareki linaheng tsena ba tlalehoa ba imetse bokhoni ba inthanete ena kaha e le eona e tsépahalang ebile e le theko e tlase.

Qholotso e kholo e hlaha moo inthanete e matla e leng lehoetla libakeng tsa litoropo linaheng tsa Afrika kaha inthanete ea Starlink e papaela haholo libakeng tsa mahae moo metse e arohaneng. Starlink e okha matla ho sathelaete, 'me sathelaete ka ‘ngoe e abetsoe palo e itseng ea basebelisi sebakeng se le seng.

Basebelisi ba Starlink linaheng tsa Zimbabwe le Ghana ba tlaleha ha lebelo la inthanete ena le theohetse ka tlase ho 100mbps ka lebaka la ho imeloa, haholo litoropong tse kholo joaloka Harare le Accra. Ho leka ho laola boemo bona, Starlink e emisitse lithekiso tse ncha metseng ea litoropo e meholo joaloka Abuja, Lagos, Nairobi le Lusaka.

Ho fapana le linaheng tse tsoetseng pele tsa bophirima, moo inthanete ea Starlink e fihlang baahi ba litoropong ba se ntse ba na le mefuta e mengata ea inthanete e lebelo e theko e tlase, Starlink e shebahala e ne e sa itlhophela hoba nkokonono ea inthanete bakeng sa baahi ba litoropo moo matlo a atamelaneng.

Ho latela matsaranka a lithaba tsa Lesotho, ho boima ho likhámphani tse kang Econet Telecom Lesotho le Vodacom Lesotho ho isa lihlhahisoa tsa tsona tse kang fibre libakeng tsa metse e maloting, ‘me Starlink ke eona tsépo bakeng sa liofisi tsa ‘muso, likolo, litleleniki, le lebaahi ba metse ena. Ha joale, Lesotho le tla tsoa le ntse le bohile ha ngoale e khiba linaheng tse ling moo Starlink e seng e ntse e sebetsa.

Na le uena u potlaketse ho bona Starlink e kena Lesotho?

12/12/2024

MALOME VECTOR O TSONGOA HO GOOGLE HO FETA LIBINI TSOHLE AFRIKA BOROA, NTATE STUNNA O HLAHELLA HO BA LESHOME

Sephetho sa Google se bontsáng lintho tsohle tse ileng tsa tsongoa ho Google Search se supa ha khalala ea ‘mino ea Lesotho e ileng ea timela kotsing ea koloi likhoeling tse sa tsoa feta, Malome Vector, e le eena sebini se ileng sa tsongoa molikong oa Google ho feta libini tsohle Afrika Boroa selemong sa 2024.

Vector, eo lebitso la hae la tsoalo e leng Bokang ‘Moleli, o hlahlangoa ke khalala ea ‘mino ea Limpopo Shebeshxt, khalala ea Amerika Chris Brown, naleli ea Afrika Boroa machabeng Tyla, ‘moho le sekhorane sa ofisiri ‘minong oa Hip Hop P. Diddy. Khalala ea Lesotho Ntate Stunna, eo lebitso la hae la tsoalo e leng Thaabe Letsie le eena o hlahella ho libini tse leshome tse ka holimo.

Leha ba bangata ba hloma eka Malome Vector o hlahella holimo joalo ka lebaka la lefu la hae, se makatsang ke h**e ha a hlahelle lethathamong la bafu ba leshome ba ileng ba tsongoa haholo ho Google moo sebapali sa lifilimi Mpho Sepeng a itlhommeng pele. Ba bang ba bafu ba hlahellang lethathamong lena ke mokaubere lipolotiking tsa Afrika Boroa Tito Mboweni le Pravin Gordhan e leng letona la mehleng naheng eo.

29/11/2024

APP EA M-PESA LE EA ECOCASH LI NKHISETSANA MAHAFI

Nakong ena eo thekenoloji e ntseng e pharalla ho anela naha ea Lesotho ka moka, M-Pesa ea Vodacom Lesotho le Ecocash ea Econet Telecom Lesotho ha lia itheka moroalo kaha li se li fumaneha ho li-app bakeng sa tsébeliso e potlakileng – e bobebe ho basebelisi ba lifono tse bohlale. Infosphere e entse boithuto ka ho etsa liteko ka sepheo sa ho bapisa li-app tsena.

Mesebetsi e ka sehloohong ea li-app tsena

Liteko li bontsítse le ha li-app tsena ka bobeli li sebetsa hantle lintlheng tse ‘maloa tsa mesebetsi e ka sehloohong joaloka ho romela chelete, ho lefa bahoehi (merchants), le ho reka moea (airtime). App ea M-Pesa e bonahetse e ipabola ka ho ba le lethathamo le pharaletseng la litsébeletso tse kenyeletsang ho lefella motlakase, metsi, DSTV, lekhetho la mobu, seabo sa insh**ense, le tse ling. App ea Ecocash e bonahetse e haella ntlheng ena kaha lethathamo la eona le sa fihlele la app ea M-Pesa. App ea M-Pesa e boetse e fana ka mokitlane oa chelete, ha ea Ecocash e sa etse joalo.

Mekhoa ea ho lefa kapa ho romela chelete

M-Pesa e sebelisa mekhoa e meraro bakeng sa ho lefa le ho romela chelete; ekaba ho batho kapa bakeng sa lits’ebeletso:
1. Romela chelete kapa lefella litsébeletso (Make Payment)
2. Lefa motho kapa tsébeletso ea ho qetela (Pay Last and Send to Recent)
3. Lefa Bajalefa (Beneficiaries)
Nakong ea boithuto bona, EcoCash e bonahetse e na le mokhoa oa ho romela chelete kapa ho lefella litsébeletso feela. Mekhoa e kang oa ho lefa motho kapa tsébeletso e fetileng (Pay Last) ‘moho le ho romela chelete ho bajalefa ba se ntse ba bolokiloe ka hará app, ha e sebetse. Sena se etsa h**e ho nke nako e telele ho lefa.

Khatiso ea monoana

App ea M-Pesa e bonahetse e itlhoma pele ka ho bebofatsa mokhoa oa ho kena ka hará app kaha mosebelisi a netefatsa h**e ke eena ka ho beha monoana ebang a bona ho kenya nomoro ea lekunutu ho mo senyetsa nako. Mokhoa ona ha o fumanehe ho app ea EcoCash kaha mosebelisi a tlameha ho kenya nomoro ea lekunutu le ho netefatsa ka ho kenya nomoro e romeloang ho eena ka molaetsa (OTP).

Tsébeliso ea scan

li-app ka bobeli li bonahetse li sebelisa mokhoa oa scan; e leng ho fumana lintlha tse feletseng ka thepa ka ho e fetisa ka pele ho khámera sebakeng seo ho nang le nomoro ea code e thepeng e rekisoang.

Ho amohela, ho romela chelete le ho e khutlisa

App ea M-Pesa e ipabotse haholo mokhoeng oa ho romela chelete kaha e kenyelelitse mekhoa e sieo ho EcoCash joaloka ho amohela chelete ho hlaha ho karete ea banka, ho romela chelete ho batho ba bangata ka nako e le ‘ngoe, ho romela chelete likhámphaning tsa ho becha (betting), le ho ntsá chelete ho agent. Ntlheng ea ho ntsá chelete ho agent, app ea EcoCash e bontsítse ha tsébeletso eo e le hona e tla kena tsébetsong.

Mohloli

Litekong tsena, mohloli e bile app ea M-Pesa, eo e seng e le nako e telele e sebetsa – ha ea EcoCash eona esa tsoa thakholoa. Tebello ke h**e li-app tsena li bebofaletse Basotho ho reka ha bobebe le hona h**e ba fokotse ho tsamaea ka chelete, haholo linakong tse kang tsena tsa mafelo a selemo kaha linokoane li tsoile bosoele.

13/11/2024

KOTSI EA LI -APP LE LI-WEBSAETE TSE BAPALANG LIFILIMI LE LIPAPALI MAHALA HO BASOTHO

Nakong ena eo tsébeliso ea marang-rang e ntseng e phahama ka hará naha ea Lesotho, li-app le li-websaete tse fanang ka monyetla oa ho boha lit'soants'o tsa li baesekopo le lipapali tse hasoang ka kotloloho mahala li ntse li ata. Joaloka lintho tse ngata tsa mahala, li-app le li-websaete tsena li na le kotsi e tsábehang haholo naheng e kang Lesotho, moo melao ea marang-rang e sa ntse e hloptjoa.

Ho ea ka boithuto ba British Association for Screen Entertainment, ho li websaete tse 50 tse fanang ka lits'ebeletso tsa mahala, tse 45 li kotsi kaha li laoloa ke linokoane tsa marang-rang. Li-websaete tsena ke tsona tse sebelisoang linaheng tsohle tsa lefats'e ‘me Basotho ba li sebelisang ba ka utsoetsoa ha bonolo, ho sena moo ba ka fumanang thuso. Khothaletso ke h**e ho sebelisoe li-app le li-websaete tsa semmuso tse lefelloang joaloka Netflix, Showmax, Prime Video le DSTV Stream kaha li sireletsehile.

Kokoanahloko ea marang-rang e utsoang

Kotsi e kholo ka li-app le li-websaete tsena tsa litsébeletso tsa mahala ke kokoanahloko ea marang-rang e sebelisoang ke linokoane ho kena ka hará lifono, li-laptop le litheleveshene ho utsoa lintlha tsa bohlokoa ka basebelisi ba li-app le li-websaete tseo. Konoanahloko ena e ka hlokisa fono kapa sesebelisoa sa marang-rang botsitso nakong eo e nyarelang nomoro ea lekunutu (password), aterese ea email kapa nakong eo e utsoang lintlha tse ling tsa hau tsa bohlokoa.

Ts'enyo ea lifono le lisebelisoa tse ling tsa marang-rang

Boholo ba li-app le li-websaete tsena tse fanang ka lits'ebeletso tsa mahala bo senya lifono le lisebelisoa tse ling tsa marang-rang ka ho li etsa h**e li be botsoa hoo li ka qetellang li senyehile. Network le eona ea ameha kaha li-app le li-websaete tsena li sebelisa data e ngata haholo papisong le tse molaong.

Ho nyotobetsa moruo

Tse ling tsa libapali tsa libaesekopo tsa Lesotho li hlahella lits'oants'ong tse hlahisoang ke Netflix le Showmax, ‘me sena se bolela h**e kamehla ha u lefa seabo sa hau mapatlelong ana, u kenya letsoho ho nyolla bana ba Basotho. Ka lehlakoreng le leng, ha u sebelisa li-app le li-websaete tsa mahala teng, u kenya letsoho ho senyetsa Basotho ba bang le ho thefula moruo. Sets'oants'o sa molao o loantsáng litlolo tsa molao tsa marang-rang, Computer Crime and Cybersecurity Bill of 2024, se ntse se hlahlojoa ke mafapha a amehang. Sena se bolela h**e, linokoane tsa marang-rang tse sebelisang li-app le li-websaete tse hlahisang litsóantsó mahala ho hohela batho, ha li na ho qosoa naheng ea Lesotho ha joale ka lebaka la melao e’so phetheloe.

23/10/2024

WHATSAPP E NYAHLATSA HO SEBELISA LINOMORO TSA MOHALA (phone numbers)

Kh’amphani ea sethala sa lipuisano tsa sechaba ka marang-rang, WhatsApp e mothating oa ho etsa liphetoho tse kholo mokhoeng oa ts’ebetso oa app ea eona e sebelisoang ke palo e ka holim’a 2.78 billion lefats’eng ka bophara.

Liphetoho tsena tseo WhatsApp e li phatlalalitseng semmuso letsatsing la maobane (Labobeli), ke h**e WhatsApp e se e tla boloka linomoro tsa mohala tse nang le WhatsApp ka har’a app e le h**e leha fono e lahleha, u tle u fumane linomoro tseo ha u kena ka fono kapa sesebelisoa se seng. Phetoho ea bobeli ke h**e haufinyana, WhatsApp e tl’o nyahlatsa ts’ebeliso ea linomoro tsa mohala e be ho sebelisoa mabitso a basebelisi (usernames) feela joalo ka ho Facebook.

Phetoho ea ho boloka linomoro tsa mohala tse nang le WhatsApp hona ho app (eseng ka fonong) ho tla kena ts’ebetsong libekeng tse ‘maloa tse tlang. Letsatsi la ho nyahlatsa linomoro tsa mohala tse seng li tla fetoha mabitso a basebelisi feela lona ha le e so phatlalatsoe ha joale, empa tebello ke h**e seo se tla etsahala haufinyana.

WhatsApp e supa ha e etsa sena ho sireletsa basebelisi ba app ea eona h**e linomoro tsa mohala li se fihle matsohong a linokoane ha bobebe. Linokoane, haholo tsa marang-rang, li atleha ho etsa bosholu le bomenemene ha bonolo ha li ts’oere linomoro tsa batho tsa mehala.

20/10/2024

Shout out to my newest followers! Excited to have you onboard! Kabila Mapefane, Ntate Kaystar Lesoetsa

13/10/2024

HLOKOMELA LI-WI-FI TSA LEFOFO

Nakong ena eo marang-rang (internet) a seng a fetohile karolo e kholo ea bophelo, hona le linokoane tse tsoileng bosoele ho tla ka maraba a macha a reretsoeng ho ikhapela, ka lonya, chelete ‘moho le lintlha tsa bohlokoa ho basebelisi ba marang-rang ba imetsoeng ke litheko tsa data.

Leraba le bonahalang le ntse le ata linaheng tse ngata libakeng tse fanang ka marang-rang a mahala (Free Public Wi-Fi) ke la ho etsa Wi-Fi ea lefofo e rehoang mabitso a ts’oanang le a likhoebo kapa litsi tse joalo.

Wi-Fi ena ha e hloke password ‘me e ka etsa h**e motho a hlome e le ea ‘nete ea sebaka seo a leng ho sona. Mohlala; ha u le hoteleng ea Monate, u ka bona Wi-Fi ea ‘Monate Hotel’ e hlaha fonong ea hau empa haufi le eona ua bona hona le e ‘ngoe eo le eona e ngotsoeng ‘Monate Hotel Free Wi-Fi’. Eo e ngotsoeng ‘Free Wi-Fi’, hangata ke eona ea lefofo kaha ha e hloke le h**e u kope password ho botsamaisi ba sebaka seo. Libakeng tseo Wi-Fi ea teng e seng e ntse e sa hloke password joaloka likolong le lilaeborari teng ho kotsi ho feta kaha ho etsa Wi-Fi ea lefofo libakeng tse joalo hole bonolo haholo.

Hang ha u se u hakile fono ea hau ho marang-rang ao a lefofo, linokoane li se li fumane monyetla oa ho kena ka har’a fono ea hau moo li ka akhelang kokoanahloko e tla li thusa ho lobokanya kelello ea fono ea hau, ho utsoa chelete ea hau e ka har’a account ea banka, ekasitana le ho utsoa lits’oants’o le litaba tse hlokolosi tsa hau ka morero oa ho u lefisa bokholokhotho ba chelete h**e litaba tseo tsa hau li se phatlalatsoe ponts’eng ea lefats’e.

Tebello ke h**e ha lits’ebeletso tsa marang-rang li ntse li ata, linokoane tsa marang-rang le tsona lia ata, ‘me ho tla ka har’a naha hoa likh’amphani tse kang Starlink, tse tummeng ka ho phallela libaka tse sekisetsoang ka lits’ebeletso tsa Wi-Fi ea mahala, ho tla hloka sechaba se hlokolosi kaha linokoane tsa Wi-Fi ea lefofo li ka ba le thahasello ea ho ithuisa ka sona sechaba seo se kojoana li mahetleng.

U ka its’ereletsa joang ha u sebelisa Wi-Fi ea sechaba ea mahala?

Fumana lintlha ka botlalo ho batsamaisi ba sebaka kapa setsi seo u se etetseng malebana le Wi-Fi – se hake fono ea hau hang ha u bona hona le Wi-Fi sebakeng se joalo. Qoba ho sebelisa li-app tsa banka ha u ntse u sebelisa Wi-Fi ea moo u etetseng. Sebelisa maqhubu a boleke ba ‘Maipatile, (Virtual Private Networks (VPN) kamehla ha u sebelisa Wi-Fi eo eseng ea hau kaha a u thusa ho ipatela le eena monga Wi-Fi e joalo. Qoba ho bula li-website tse sa sireletsehang; tse sireletsehileng li qala ka ‘http’ ha tse sa sireletsehang li qala ka ‘https’ ha li bula.

Ntlha ea bohlokoa: Leqephe lena le reretsoe ho lemosa Basotho ka litaba tsa thekenoloji h**e ba nolofalloe ke ho sebelisa thepa eohle ea mehla ea morao-rao, ba sireletsehile ba bile ba le leseling la ho etsa khetho e nepahetseng ha ba reka le ho sebelisa thepa e joalo.

27/09/2024

U KA SHEBELLA NETFLIX LE SHOWMAX JOANG LESOTHO MOO LE HA U SE U TSOILE HO MARANG-RANG?

Mokhoa o mocha oa khaso ea marang-rang oa li-video o bitsoang ‘streaming’ o se o fetohile mohloli o ts’epahalang oa ho boha lits’oants’o tsa libaesekopo (films and series) linaheng tse ngata, ‘me taba eo e ntse e kekela le ka har’a naha ea Lesotho.
Leha ho le joalo, qholotso e kholo linaheng tse kojoana li mahetleng joaloka Lesotho ke litheko tse boima tsa data. Ka lehlohonolo la moteea-phala, li-app tse itlhommeng pele koano tsa khaso ena ea marang-rang, e leng Netflix le Showmax, li fana ka monyetla oa ho download-a libaesekopo fonong nakong eo motho a leng ho marang-rang e be o se a tla boha hamorao a se a tsoile moleng (offline).

Seabo sa khoeli-le-khoeli
Seabo sa khoeli-le-khoeli bakeng sa ho boha libaesekopo ho e ‘ngoe ea li-app tsena - Netflix (Mobile) le Showmax Entertainment (Mobile) ke M52 ha joale ha re ipapisa le matla a dollar ea Amerika. Ka seabo sena, u fumana libaesekopo tsohle tse ka har’a lilaeborari tsa li-app tsena kantle ho ho khetholloa ka h**e uena seabo sa hau se tlase.

U ka download-a joang?
U ka download-a libaesekopo ho Netflix le Showmax nakong eo u keneng ho marang-rang moo Wi-Fi e leng teng joaloka mosebetsing, sekolong, ha motsoalle, kapa lebenkeleng moo Wi-Fi e leng mahala – e be u se u tla boha ha u robile monakeli u le lapeng ka nako ea hau. Tsohle tseo u li downlowd-ileng li tla hlaha feela fonong eo ea hau – ha li tsamae ka karete ea mohopolo (memory card) le ka USB.
Ebang u sena phihlello ea Wi-Fi ka litsela tse hlalositsoeng seratsoaneng se kaholimo, u ka leta thojane h**e u tle u reke li-bundle tsa khitla tsa Vodacom Lesotho kapa tsa Econet Telecom Lesotho; 500MB ke M3 feela ha 1500MB e le M10 feela. Li-bundle tsa khitla tsa Vodacom Lesotho li sebetsa lipakeng tsa hora ea 11 bosiu ho isa ho 4 mesong, ha tsa Econet Telecom Lesotho li thoma ka hora ea 10 ho isa ho 5 hoseng. Ka li-bundle tsena u ka download-a libaesekopo ho Netflix le ho Showmax, e be u se u tla shebella ka letsatsi le motsotso oa khetho ea hau.

U hloka data e kae?
Baesekopo ea nako e isang ho lihora tse peli e hakanyetsoa ho ja 500MB ho Netflix Mobile Plan – Ho Showmax Entertainment Mobile Plan ke ho isa ho 800MB. Bakeng sa baesekopo ea nako e ka tlas’ana ho hora, Netflix e hakanyetsoa ho ja 150MB ha Showmax e hakanyetsoa ho ja 330MB. Ho Showmax, u na le moyetla oa ho ikhethela boleng ba sets’oants’o pele u se download-a, ka hona u ka sebelisa data e nyane ho isa ho 80MB bakeng sa baesekopo ea lihora tse peli. Likhakanyo tsena ke tse fumanoeng litekong tse entsoeng ke InfoSphere.

19/09/2024

GOOGLE E KOALA LI-ACCOUNT TSA GMAIL. U KA ETSA ENG HO PHOLOSA EA HAU?

Kh’amphani ea marang-rang, Google, e tummeng ka enjini ea ho tsoma litaba le lits’ebeletso tse ling joaloka email ea Gmail, e phatlalalitse ha e thakhotse lets’olo la ho koala li-account tse sa sebelisoeng khafetsa.

Ho ea ka phatlalatso ea Google, li-account tsohle tse nang le nako ea lilemo tse peli li sa sebelisoe li se ntse li koaloa ha joale. Account ea Gmail ke eona lumellang basebelisi ba lifono tsa Android ho kena selibeng sa li-app se bitsoang Google Play moo ho fuamanehang li-app tse ngata tse hlapanyelitsoeng joaloka WhatsApp, Facebook, YouTube le tse ling.

Ha account ea hau ea Gmail e ka koaloa, fono ea hau e tla hloleha ho inoesa ka nkho selibeng seo sa li-app ‘me e ka qetella e se e sebetsa joalo ka ‘masechocha - e amohela mehala le hona ho etsa melaetsa ea SMS feela, kapa e se e phela ka li-app tse hlahang mehloling e sa ts’epahaleng e ka bakelang uena kotsi ea ho utsoetsoa li-account tsa hau tse ling tse kang ea banka.

Google e hlalosa ha li-account tseo esale li ithoballa boroko nakong ea lilemo tse peli tse fetileng li le tsietsing ea ho koeteloa ke linokoane tsa marang-rang tse tsoileng bosoele ho senyetsa basebelisi ba marang-rang ba nang le tsebo e fokolang. Ka lebaka leo, Google e supa ha e sireletsa beng ba li-account tseo ka ho li koalla ruri.

U ka etsa eng ho qoba h**e account ea hau ea Gmail e koaloe kapa e koeteloe?

Ebang u na le nako e telele u sa sebelise account ea hau ea Gmail, u ka romela email ho mang kapa mang e le ho netefatsa h**e e ntse e sebetsa. U ka shebella video kapa li-video ho YouTube u ntse u kene ka account ea hau ea Gmail. U ka boela ua tsoma litaba ka browser ho enjini ea Google u ntse u kene ka account ea hau ea Gmail.

Ha u ka latela o mong oa mehato ena, Google e tla nchafatsa maemo a ts’ireletso bakeng sa account ea hau kaha e tla hlokomela h**e u sa ntse u ja mabele, ‘me ha u na koalloa lits’ebeletso. Na uena account ea hau ea Gmail e ntse e le maemong a matle?

12/09/2024

BASOTHO BA TLA FUMANA IPHONE 16 PELE HO MAAMERIKA

Lekhetlo la pele nalaneng ea fono ea boemo bo holimo, iPhone, Basotho ba tla ba monyetleng oa ho reka le ho sebelisa sehlahisoa se sa tsoa phatlalatsoa sa iPhone 16 lihora tse ‘maloa pele ho Maamerika.

iphone 16 e tla lokolloa semmuso ho fumaneha mebarakeng ka la 20 khoeling e holimo, ‘me e lebeletsoe ho tla ka meetso ea iPhone 16, iPhone 16 Plus, iPhone 16 Pro le iPhone 16 Pro Max. Se tla etsa h**e Basotho ba e fumane pele ke ho fapana hoa linako kaha re le pejana nakong papisong le naha ea Amerika.

E boetse ke lekhetlo la pele sehlahisoa se secha sa iPhone se tla fumaneha ho Maamerika ka letsatsi le le leng le Maafrika; maemong a tloaelehileng, kontinente ea Afrika, e tloaetseng hoba koekoe ea morao e tlohang le sepolo linthong tse ngata, e fumana lihlahisoa tsa boemo bona beke kapa libeke kamora’ Maamerika.

Liotara bakeng sa ho reka setlabocha sena li tla amoheloa ho tloha ka la 13 khoeling e holimo lefats’e ka bophara. Mabenkele a fumanehang Afrika Boroa a kang Takealot, Computer Mania, iStore, Game, Digicape le Makro, a tlalehoa a tla lokolla lifono tsena ka la 20. Ke hona mabenkeleng ana moo Basotho ba tla ba le monyetla oa ho reka mofuta ona oa fono ea kh’amphani ea Amerika pele ho Maamerika.

Likh’amphani tse sebetsang lapeng koano tsa mehala, Vodadom Lesotho le Econet Telecom Lesotho, li se li iphatlalalitse h**e le tsona li malala-a-laotsoe bakeng sa sehlahisoa sena, ‘me li tla tsebisa Basotho h**e na ba ka tla reka neng. Na le uena u potlaketse ho reka iPhone 16?

02/09/2024

INTERNET EA ELON MUSK E KENA LESOTHO, E SUPA VODACOM LE ECONET SEBAENG

Kh’amphani ea monna oa sekhorane, Elon Musk, e fanang ka lits’ebeletso tsa marang-rang (Internet) e bitsoang Starlink e tla khakola ts’ebetso ka har’a naha ea Lesotho pele selemo sena sa 2024 se kolumela. Khakolo ena ea Starlink, e leng le leng la malinyane a feme ea Musk e bitsoang SpaceX, e lebelletsoe e le ho supa Vodacom Lesotho le Econet Telecom Lesotho sebaeng kaha esale bobeli bona bo natefeloa ke ho lalasa joaloka ka lipoho tsa khothu lits’ebeletsong tsa marang-rang naheng ea Lesotho.

Starlink, e seng e ntse e tsoelapele ka ts’ebetso linaheng tse 102, e sa tsoa simolla ts’ebetso Botswana le Eswatini. Leha Starlink e ‘so fumane litokelo tsa ho sebetsa naheng ea Afrika Boroa, Lesotho teng e se e fumane litokelo tse joalo, ho ea ka website ea kh’amphani eo. Tebello ke h**e marang-rang a Starlink, a tummeng ka ho papaela litikolohong tse lithaba le matsoapo, a tla fihlela libaka tsohle tsa Lesotho, ho tloha mabalane ho fihla ka hare ho maloti. Sena ke ka lebaka la ts’ebeliso ea li-satellite tse fetang 6000 tse moeeng ha joale tsa kh'amphani ena.

E le ho phethahatsa toro ea letsoalloa lena la Afrika Boroa le hafang ka nkatana, Starlink e ikemiselitse ho fetoha mofani oa lits’ebeletso tsa marang-rang a phunyeletsang lihlaba le libataolo ka lebelo la lehalima linaheng tsohle tsa lefats’e. Ho kena hoa Starlink Lesotho, ho leptjoa ha ho tla susumetsa Vodacom Lesotho le Econet Lesotho ho theola litheko tsa tsona ‘moho le ho nyolla lebelo la marang-rang a tsona.

26/08/2024

SABC E NYAHLATSA LESOTHO
Lekhotla la khaso la Afrika Boroa, SABC, le lahletse naha ea Lesotho matjoing mokhoeng o mocha oa khaso ea marang-rang oa li-video, o bitsoang streaming ka sehlahisoa se bitsoang SABC+. SABC+, e leng app e sebetsang ho lifono le ho lithelevishene tse bohlale, e fana ka likanale (channels) tsohle tsa SABC mahala ‘moho le liea-le-moea tsohle tsa SABC kantle le ho sebelisa sekotlolo sa satellite kapa aerial. Tsena li fumanoa feela ka maqhubu a marang-rang (internet). Likanale tse fumanehang ho app ena li kenyeletsa SABC 1, SABC 2, SABC 3, SABC Sport, SABC Lehae, le SABC News.
Mekhoeng ea pejana ea thekenoloji (technology) e leng oa aerial ‘moho le oa satellite, SABC e ile ea fetoha lehae la Basotho ka ho ba fa litaba, thuto, boithabiso le lipapali kantle ho khethollo. App e ts’oanang le ena, DSTV Stream, ea kh’amphani ea Multichoice, e qothisanang lehlokoa le SABC - e bileng e seng e tloaetse ho bata SABC le sa ts’eloeng ke nta, eona e fumaneha linaheng tsohle tsa Afrika e tikolohong ea bana ba thari e nts’o (Sub-Saharan). Leha ho le joalo, DSTV Stream eona ha se mahala kaha e lefelloa.
Tlhaloso e fanoeng ke SABC mabapi le ho kotela naha ea Lesotho e supa ha melao e tsamaisang khaso mekhoeng e mecha ea thekenoloji e le eona e supang ha Maafrika-Boroa a lokela ho imona menoana a le mang lits’ebeletsong tsa SABC kaha app ena ea SABC+ e feta feela ka lits’ebeletso tsa lifono le marang-rang tsa naha eo. InfoSphere e ile ea lula fats’e ea etsa liteko ho app ena.
Likanale tse fumanehang ho app ena bakeng sa bohle ba Lesotho le linaheng tsohle tsa lefats’e ke SABC News, SABC Lehae, le liea-le-moea tsohle tsa SABC. Bakeng sa Basotho ba sa ithekeng moroalo ho tsa thekenoloji, maqhubu a marang-rang a boleke ba ‘Maipatile, Virtual Private Network (VPN), ke ona ao ba ka a sebelisang ho fumana likanale tsohle tsa SABC mahala. Leha ho le joalo, VPN le eona ea lefelloa. Taba ena ea SABC ea ho nyahlatsa Lesotho, e fana ka sets’oants’o se hlakileng sa h**e, naha ea Lesotho ekanna ea iphumana e setse morao haholo ho falleleng mokhoeng o mocha oa khaso, digital migration, kaha marang-rang e le karolo ea kholo mokhoeng oa khaso oa morao-rao.

19/08/2024

PHAPANG EA SMART TV, ANDROID TV LE GOOGLE TV KE EFE?

Matsatsing a morao tjena thekenoloji (technology) e fetoha ka sekhahla se nyarosang, ‘me mantsoe a kang ‘Smart TV’, ‘Android TV’ le ‘Google TV’ a bonahala a ntse a tloaeleha, a bile a sebelisoa sa mokana eka ke ntho e le ‘ngoe. Leha ho le joalo, phapang e teng e kholo pakeng tsa mefuta ena ea lithelevishene (televisions). Ho tseba phapang ena, ho ka u thusa ho etsa qeto e nepahetseng pele u nts’a chelete ea hau.

Smart TV ke e joang?
Ka mantsoe a sejoale-joale, Smart TV ke lentsoe le sebelisoang ho bua ka thelevishene efe-kapa-efe e bohlale. Ho boleloang ka bohlale? Ho boleloa h**e e kena ho marang-rang a inthanete (internet) ‘me e kenya li-app tse kang YouTube, Netflix, Showmax, Prime Video, Disney le tse ling. Smart TV se ahelletsoe le boko bo laolang mokhoa oa ts’ebetso (operating system) oa teng ho latela lets’oao (brand) la thelevishene ka ‘ngoe. Leha hole joalo, mats’oao a kang Sony, a se a hatetse pele ho sebelisa boko bo laolang mokhoa oa ts’ebetso oa Android. Ka kakaretso, li-smart tv li na le khaello kaha li-app tse sebetsang ka tsona e le tse fokolang ka palo ‘moho le tse boetseng li felloa ke nako nyalanong ea tsona le boko bo sebetsang ho Smart TV.

Android TV eona ke e joang?
Android TV ke thelevishene e bohlalehali ‘me e amohelang li-app ka mefuta-futa kaha boko ba eona e le ba Android ‘me bo sebetsa ‘moho le Google Play. Google Play ke seliba sa li-app ka mefuta ‘me ke sona se itlhommeng pele lefats’eng ka lenane la li-app. Android TV le eona e ts’ela li-app tse kang bo Netflix joaloka Smart TV, empa eona eka ts’ela le ho feta tse 50, ‘me e boetse e khona ho etsa download li-app ho hlaha lilibeng tse fapaneng ‘moho le ho browser. Holim’a moo, Android TV e na le Mothusi oa Google, Google Assistant, ea etsang h**e u lae thelevishene ea hau; u ka bua feela le eona joaloka ha u laea ngoana oa hau lapeng moo nakong eo u tsomang manoni a boithabiso le litaba. Mohala oa hau oa thekeng ‘moho le lisebelisoa tse ling joaloka sesupa-nako se bohlale (smart-watch), le tsona li ka hokeloa ‘moho le Android TV ho etsa h**e u fane ka litaelo feela ho thepa ea hau – lintho li iketse. Android TV e boetse e fumaneha ka mabokosana a hokeloang ho lithelevishene ho fana ka seliba sa li -app sa Android a bitsoang Android TV Boxes.

Google TV eona ke efe?
Google TV ke mofuta o mocha o ntlafalitsoeng oa Smart TV o fanang ka lits’ebeletso tsohle tse fanoang ke Adnroid TV. Google TV e etsa h**e tikoloho ea li-app e be bobebe bakeng sa ho tsoma seo u se hlokang, ‘moho le ho ithuta tatso ea hau ho manoni a hlamatsehang ho li-app tseo u li sebelisang ha u roba monakeli. Manoni ana a bokelloa molikong o le mong e le h**e ho’a hau e be ho imona menoana feela kantle le ho tsoma ka thata. Ka Google TV, thepa eohle ea hau e nang le boko ba Android e ka hokeloa ho thelevishene ea hau.

Phapang
• Smart TV: Thelevishene e kenang ho marang-rang a inthanete eo ho eona u ka sebelisang li-app tse ‘maloa joalo ka Netflix, YouTube le tse ling.
• Android TV: Thelevishene e hokahanang le lisebelisoa tse ling tsa Android ‘me e sebelisa li-app tse ngata-ngata, e boetse se etsa download. Li-app tsohle tse fumanehang ho Smart TV li teng ho Android TV ‘moho le tse sa fumaneheng ho Smart TV.
• Google TV: Smart TV se kopantsoeng le Adnroid TV, se boetse se ntlafalitsoe ho beha manoni a hau a boithabiso ka mahlopho ka sepheo sa ho u nolofaletsa ho imona menoana ka lits'ebeletso tsa tsa boithabiso tse hlahang ho marang-rang.

Ke efe e nepahetseng?
Khetho ke ea hau ho latela tlhoko ea hau le potongoane. Ebang u batla thelevishene feela ho shebella litaba le lits’oantso tsa libaesekopo tsa Netflix,Showmax, Prime Video joalo-jaolo, Smart Tv ke eona e u ts’oanelang. Ebang u batla ho natefeloa ke ho laea feela e be lintho lia iketsa - le ho hokahanya thepa le lisebelisoa tsa hau ‘moho, u boetse u etsa download li-app tse ngata tse fapaneng, Android TV le Google Tv ke tsona tse nepahetseng bakeng sa hau.

Litjeho li eme joang?
Ha re bapisa litjeho ho latela lets’oao ka leng, Google TV ke eona e bitsang haholo. E hlahlangoa ke Android TV. Smart TV ke eona e theko e tlase haholo papisong le tsena tse peli. Ho tseba phapang ea lithelevishene tsena ho tla u thusa ho etsa khetho e nepahetseng ha u fihla lebenkeleng.

InfoSphere

06/01/2025

23/12/2024

12/12/2024

29/11/2024

13/11/2024

23/10/2024

20/10/2024

13/10/2024

27/09/2024

19/09/2024

12/09/2024

02/09/2024

26/08/2024

19/08/2024

Address

Telephone

Website

Alerts

Contact The Business

Shortcuts

Share

Category