Winners Way TV

የዊነርስ ዌይ ቴሌቭዥን ጣቢያ ባለቤት የሆነው የህያው ተስፋ የፈውስና የተአምራት አገልግሎት ከዚህ ቀደም በተለያዩ አለም አቀፍ የቴሌቭዥን ጣቢያዎች ፕሮግራሙን ሲያስተላልፍ ቆይቷል፡፡ በኢቢኤስ እና ኤልሻዳይ የሳተላይት ቴሌቭዥን ጣቢያዎች ላይ ከሶስት አመታት በላይ በቋሚነት የቤተ-ክርስቲያኖቹ ፕሮግራሞች ተላልፈዋል፡፡ ከዚህም በተጨማሪ ሲጄ-ቲቪ እና ሲሲ-ቲቪ በቅርቡ ፕሮግራሞች ሲተላለፉባቸው የቆዩ ጣቢያዎች ናቸው፡፡ ፕሮግራሞቹ በቤተ-ክርስቲያኖቹ ራዕዩን ተካፍለው አብሮ-ሰራተኛ በሆኑ ባለሙያዎች ተቀርጸው ለተመልካች እንዲደርሱ ሆነዋል፡፡

እያደገ በመጣው የፕሮግራሞች ብዛትና ተደራሽነትን የማስፋት ፍላጎት እንዲሁም የቴሌቭዥን ጣቢያ

ለመክፈት በተያዘው እቅድ መሰረት ከዚህ በፊት በሌሎች ጣቢያዎች ፕሮግራሞችን በማስተላለፍ የካበተውን ልምድና የባለሙያዎች ቡድን በመያዝ በሚያዚያ 2008ዓ.ም የዊነርስ ዌይ የሳተላይት ቴሌቭዥን ጣቢያ ተከፍቶ የሙከራ ስርጭቱን ጀምሯል፡፡ ጣቢያው በዋነኝነት መንፈሳዊ ይዘት ያላቸውን ፕሮግራሞች ለእይታ የሚያቀርብ ነው፡፡ በመሆኑም ጣቢያውን ለመቆጣጠርና በአግባብ ለማስተዳደር ይቻል ዘንድ ይህ የቢሮ አደረጃጀትና የአሰራር ሂደት ፕሮፖዛል/ምልከታ አስፈልጓል፡፡

ይህ ፕሮፖዛል በአሁኑ ወቅት በጣቢያው የአመራርና ስራ ቡድን ውስጥ ያሉ የሰው ሀይል፣ የቁሳቁስና የክህሎት ግብአቶችን እንደመነሻ በመያዝ፤ በቀጣይ የሚያስፈልጉ ተጨማሪ ግብአቶችን፣ የአሰራር ስትራቴጂዎችን፣ የስራ እቅዶችን፣ የቢሮ አደረጃጀትን እና በስራው ላይ ላሉ ወይም ሊፈጠሩ የሚችሉ ችግሮች የመፍትሄ አቅጣጫ አመላካች ሀሳቦችን ይዟል፡፡ ፕሮፖዛሉ በጣቢያው ውስጥ በየአደረጃጀቱ የሚሰሩ ባለሙያዎችና የሌሎች ባለሙያዎች ምልከታዎች ማዕከል አድርጎ የተዘጋጀ ከመሆኑም በተጨማሪ ከሌሎች የቴሌቭዥን ጣቢያዎች ልምድ ትምህርት ተወስዶ የተሰራ ነው፡፡ ስለዚህም በሌሎች የቴሌቭዥን ጣቢያዎች ላይ የሚታዩ ችግሮችን ለማስወገድ እና አዳዲስ እይታዎችን የያዙ ሀሳቦችን በመያዝ ጣቢያው በያዛቸው ራዕዮች መሰረት ደረጃውን የጠበቀ ውጣታማና በህዝብ ዘንድ ተወዳጅ የሆነ የቴሌቭዥን ስራን ለመስራት ያስችላል፡፡