01/05/2023
مئی روش۔ جہد تاں منزلا روان ایں
عبدالرؤف جکھرانی
19می صدی ئے ہشتمی دہی مزور تحریکا پہ یک اہمیں روشے اث۔ اے روشا 16-12 کلاک کار کھنغ خلافا یک دراژیں جہد ے دیما آختہ، گوں اے جہد ا 8 کلاک کار کھنغ و مزور تحریکئے تھی باز اہمیں نتیجہ دِہ واضح بیثغ اثنت۔ کلاں شہ مستریں سبق مزورانی یکمشت بیغ و حقاں پہ جہد کھنغ در کفتغ اث۔ پیرس کمیون اندرا اے اغد ِہ گیشتر پدر بیثغ اث کہ محنت کش طبقہ رنگ و نسل، ملک و زبان اے کلاں شہ بے فرقی ئا وثی حقا دزگیر انت، ھمانرنگاکہ سرمایہ دار طبقہ برِاعظمانی دیری، نامئے دژمنی و جنگ و جدلی تاریخے رندا دِہ مزورانی خلافیں۔ ھر وختے ئا کہ مزور طبقاتی بنیاد ئے ناما جہد ے ئا درکفتغنت آں بے سر و سامان بیغ رندا دِہ ہر قسم ئے وسائل، ریاستی زورآوری، میڈیا سرا گرفت و سکھیں حون ریشیں دژمنا را پچھاڑیا بھاڑا کھننت۔ سرمایہ داری نظامئے بنیاد ”شرح منافع“ سرا ایریں، اے سرمایہ دار منافع سرا ہچ برداش نہ کھننت۔ سرمایہ دار ہروختا شرح منافع گیشترا شہ گیشتر کھنغ نیت ئا ”باز کار کھم مزوری“ ایجنڈا سرا کار کھننت۔ منڈی لافا مسابقت بنیاد سرا پیداوار کھمیں قیمتا شوشکغ(بہا) سرمایہ دارانی مجبوری ایں، ھمے وجہا شہ گیشتر قمت ودھینغا گوں منافع کمائغ ممکن نئیں۔ گیشیں منافع وہمانہی لافا باز ا شہ باز منافغ زیرغ اے ڈولا بیث کھنت کہ کار کھنغئے مزوری کھم کھنغ بیث۔
ظاھری ئا محنت ئے اجرت کھم کھنغ دِہ یک راہے استیں، ایشیا شہ گیشتر آنہانی راہ ایشیں کہ آں کار کھنغ وختاباز کھننت و کار کھنغ نیاما سکھی کھار نت۔ اے ڈولا سرمایہ دار”گیشتر کار کھم مزوری“ راہ گرنت۔ گُشنت کہ سرمایہ داری، زرعی غلامی ختم بیغا رندا شروع بیثہ۔ حقیقتا ماں گندغا کھَیث کہ”زرعی غلامی“ کھُٹثہ”اجرتی غلامی“ شروع بیثہ۔ جاگیرداری ختم بیغ و سرمایہ داری شروع بیغا رندا بازیں شئے بدلثغ انت، پر خاصکن محنت ئے استحصالئے شکل بَدلثہ۔ محنت کش طبقہ پیشا شہ گیشتر ڈکھانی لافا کھفتہ۔ سرمایہ داریا کلاں شہ پیشا محنت ئے استحصال گیشتر وختا کار گرغا شہ شروع کھثہ۔ مزور ا شہ مُوڑی آں 12 شہ 18 کلاک کارا گرغ اثنت۔ اے سجّویں کارا یک فکسیں اُجرتے ہندا گرغ اثنت۔ اے رنگا منافع ئے شرح گیشترا شہ گیشتر کھنغا پہ مشین سرا کار کھنوخیں مزور وث دِہ مشینانی ڈولا بیثو ُ روغ اثنت۔ آنہاں را جند ئے زند ا پہ ھچ وخت نہ ملغ اث۔ مزورہروختا یا کارا کھنغ اثنت یا گُڈا سَکھّیا منتھو 6 کلاک وھاو اکھفغ اثنت۔ رندا دوہمی روشا گڑتھو مشیناں گوں مشین بیئغ اثنت۔
صنعتی انقلاب پھیذاغا رندا دنیا بدلانا روغ اث۔ نوخ نوخیں مشین ایجادبیّانا شثغنت۔ کہنیں مشینانی ہندا دوہمی نوخیں مشین آختغنت۔ مشینانی آیئغا گوں پیداوار لافا باز گیشتری آختہ۔ وثی لاف ورغا شہ گیشتر بیثہ۔ اے پیداوار قومی ملکیتا شہ گوئستو منڈیاں تاں پجثو شثغث۔ صنعتی طاغتانی سامراجی بے نیتی پُشتاسرمایہ داری ئے”شرح منافع“ فلسفہ سَکھّیاروان اث۔ دنیا لافا نوخ نوخیں مشینانی آیئغ وجوانیں سامانانی ٹہغا رندا دِہ مزوراں را آں چیزانی گِرغا پہ کمائثغیں زَرّ پھیلو نہ بیغ اثنت۔ اگر کسے پھذی ساہا گِرغ دِہ است اث گڈ ا دِہ آں سامانانی کار آرغا پہ وخت نیست اث۔ ھمے ڈکھاں شہ ٹریڈیونین ٹہغا شہ گتو(گِفتو) کار کھنغئے دراژ دراژیں وختئے خلافا روشا ”ہشت 8 کلاک“ کار کھنغئے مطالبہ دیما آختہ۔ آہستہ آہستغا اے یک مزنیں تحریکے بیثوشثہ۔ شہ ہمیذا اے مطالبہ دیما آختہ کہ 24 کلاک 3 ہندا بیث۔ 8 کلاک پہ کمائنغ، 8 کلاک وھاو کھنغاپہ، سئیمی 8 کلا ک وثی لوغا پہ نندغ کھڑوبیئغا ایر بیثہ۔ پر اے تحریکا را ساہ ہماں وختا کپتہ کہ دو انقلابی لیڈر کارل مارکس و فریڈرک اینگلس ئا اجرت و منافع و سرمایہ دارانی شیر جثغیں زَرّانی پیدا بیئغ باروالکھثہ۔
اجرت و پیداواری قدر ئے براوری سرا نغاہ پھرا سرپھذی آختہ کہ سرمایہ داری عملئے پیشی بہراشہ سرمایہ دار وثی کلیں خرچاں کَشّغنت و مزور اُجرتا پہ ناچھیکیں بَہرے کَشّغنت۔ اِیشیا شہ پھذی بچّثغیں کلاکانی لافا مزور ہماں کارا کہ بے زّرا کھنغنت۔ آں کلیں کمائی سرمایہ دارانی پھدّوا روغیں۔ ھمے رنگا مزورانی گیشتریں کارہماں کہ 12ئا شہ 16 یا 18 کلاک کارا کھنغ اثنت مطالبہ کثیش کہ کار کھنغئے وخت کھم بی 8 کلاک ایر بیث۔ ٹریڈ یونین ئا بارگیننگ بنیاد سرا سسٹم نیاما شہ دگّے کَشّتہ گڈ دہ سرمایہ داراں ہچ رنگا قبول نکثہ۔مزور تحریک پیرس کمیون ڈولیں پندھے جثو آختغ اث۔ آنہانی گُرا جہد کھنغا شہ علاوہ تِھی دگ نیست اث۔ ہمنگا کار کھنغئے وخت کھم کھنائنغا پہ امریکہ لافا یک تحریکے ئا سغر کشتہ، گوں صنعتکاریا ٹریڈ یونین دیما پھیذاغ اث۔ اکتوبر 1884 ء ئا شکاگو لافا شہ فیڈریشن آف آرگنائزڈ ٹریڈز اینڈ لبر یونیز پلیٹفارما امریکی مزوراں یک نیشنل مزور کنونشنے لافا اعلان کثہ کہ 1 مئی 1886ء ئا شہ 8 کلاک کار کھنغ قانونی گشغ بیث۔
اگر حکومت اے لوٹا پھیلو نکھنت گڈ مزور تنظم پھیلویں امریکہ لاف ہڑتال کھننت۔ حکومتا ہچ رنگا اے ٹھونکا را دلگوش نداثہ۔ مزوراں ہڑتالاپہ سمبردی شروع کثہ۔ 1 مئی آ 5 لکھ مزور یکمشتیا ھڑتال کھنغاپہ درا آختغنت۔ ایکھویں شکاگو لافا 40 ہزار مزوراں ہڑتال کثہ۔ ہماں ہڑتالا دوہمی آؤخیں مڑدم دِہ باز اثنت۔ امریکہ ئے کُلّیں شہرانی لافا ہڑتال و جلوس بیثغنت۔ مزورانی ہڑتال پُر امن اث گڈ 3 مئی ئا پولیسا2 مزور کشتہ، ہماں روشا رندا مزور شہ ڈکھ و زہر ا پھُربیثو شثغ اثنت۔ 4 مئی ئا شکایگو ئے ہمے مارکیٹ لافا یک مز ائیں جلسہ یے بیثہ۔ گُشنت کہ ہماں روشا ہَور ئے ترمپ ترمپ دِہ گوارغ اث، 6 لکھ مڑدم 8 کلاک کار کھنغ ایجنڈا ئاگوں ھموذا اوار اثنت۔ اے یک پُر امنیں جلسہ یے اث، مڑدمانی دستابگی ئیں(وائیٹ) جھنڈا اثنت۔ پولیسا حکم داثہ کہ ایذا شہ بروّیت، آں شہ اوذا نہ شثغنت۔ کمیں وختا رندا مزور و پولیس نیا ما گرماگرمی بیثہ۔ پولیسا مزو رانی سرا تھیر گواری کثہ۔ تیرگواریا گوں بازیں مزور شہید بیثغنت، آنہانی جہل کفغا گوں بگی ئیں جھنڈا و گُذ حونا حونگاربیثو سہُر بیثغنت۔
شہ ہماں روشا پھذا سہریں جھنڈا مزور تحریک و انقلابئے پھجار بیثہ۔ مرشی دِہ سہریں جھنڈا مزورانی جہد ئے شان و سوشلسٹ انقلابئے نشانی ایں۔ اے قہر ا رندا اغدِہ ریاستا ھماں شہیدانی لیڈرانی سرا کھُشغئے الزام جثہ۔ ہمانہانی سرا کیس بیثغنت۔ کورٹا شہ ہماں لیڈراں بازیں ورنایاں را پھاہی چاڑثہ۔ سرمایہ دار ہمے رنگاانصاف کھننت۔ ہموذا کہ آنہانی منافع ٹونک بیث آں ہڑ کَشّنت۔ نامئے انسانی قدر و تہذیب شموشنت۔ آنہانی اخلاق ہموذا گندغ کھَیث ہموذا کہ آہانی سرمایہ محفوظ بیث، دانکہ کسے ایشانی کثغیں نا جائزیانی خلافا آوازے کھڑو مکھنت۔
کار کھنغئے دراژی کھم کھنغا پہ محنت کش طبقہئے پُر امنیں جہدا را ریاستی ظلم، کوش و حون ریشغئے رندا دِہ مزورانی جہد ختم نہ بیثہ جہد دیما جُزّاناشثہ۔ فریڈرک اینگلس ئے سروغانیا پیرس ئے جہد ئے حقاں پہ سری سری دھکا دوہمی انٹرنشنل کانفرنس ئے 1889ء ئے اجلاس لافا اے قرارداد آختہ کہ 1 مئی محنت کشانی عالمی روشیں، آؤخیں سالا اے روش منائنغ بیث۔ 1889 ء ئا رندا 1 مئی پھیلویں دنیالافا منائنغ بیغیں۔ محنت کش اے ٹھونک سرا مرشی دِہ یکمشت انت و لوٹنت کہ اے جہد سرمایہ داری نظامئے کھُٹغا تاں روان بیث۔
مرشی دِہ اے گندغا کَیث کہ سرمایہ داری نظام گوں پاکستان و سجّوئیں دنیا لافا لوڈ و زوالان ایں، ہر رنگے ئا کہ 150 سالا پیشا کارل مارکس و فریڈرک اینگلس ئا گُشتغ اث۔ اگر مرشی گِند جی آختغیں کرونا وائرس سرمایہ داری نظامئے دیم سرا یک چھانپولے نئیں؟ حقی ٹھونک ایشیں گوستغیں جہداں ہماں حق کہ مزوراں مڑثو گتھغ(گپتغ) اثنت، ھماں دِہ شثغنت۔ مرشی پاکستان لافا مزور 12 کلاک کارا کھنغنت، روش مزوری اے حدا تاں کمّینیں کہ روشئے دووخت نغن ورغ دِہ ڈُکھاں گوں بیث۔ مزور تحریک سامراجی طاغتاں لاغر کثو اِشتہ، اے کمزوری ئے وجہ مزورانی نظریاتی لیڈ رانی کمزوری ایں۔ مزورانی گوئرا حقانی گِرغا پہ دو دگ انت، مرغ یا گُڈ حقانی گرغا پہ جہد کھنغ ایں۔ مئی روش سبق یک روانیں جہد ئے کاروان بیئغ ناماایں۔اے روش شموشغ نہ بیث۔ اے جہد محنت کَشّانی میرات ایں۔ اگر وثی حقانی گِرغا پہ جہد کھنغ بیث تہ ہماں روش دِیرنئیں کہ راہ منزلاں سر بیث۔
بام رنگ مئی 2020