05/10/2024
عوامی نیشنل پارٹی کے مرکزی رہنما اور پارلیمانی لیڈر انجینئر زمرک خان اچکزئی نے عالمی یوم اساتذہ کے موقع پر اساتذہ کے کردار کو خراج تحسین پیش کرتے ہوئے کہا ہے کہ تعلیم کی بنیاد پر ہی قوموں کی ترقی کا سفر ممکن ہوتا ہے اور اساتذہ اس سفر کے حقیقی رہنما ہوتے ہیں۔ ان خیالات کا اظہار انہوں نے اپنے جاری کردہ بیان میں کہا انہوں نے کہا کہ بلوچستان میں تعلیم کے فروغ اور معیاری تعلیم کی فراہمی میں اساتذہ کی خدمات ناقابلِ فراموش ہیں۔ انہوں نے کہا کہ اساتذہ نہ صرف علم کی روشنی پھیلانے والے ہیں بلکہ نوجوان نسل کی کردار سازی اور معاشرتی ترقی میں بھی ان کا کلیدی کردار ہے۔
انہوں نے اس بات پر زور دیا کہ جدید تقاضوں سے ہم آہنگ تعلیم کا نظام اور اساتذہ کی مسلسل پیشہ ورانہ تربیت وقت کی اہم ضرورت ہے، تاکہ طلباء کو عالمی معیار کے مطابق تعلیم مل سکے۔
