08/09/2024
कञ्चनपुरको भीमदत्त नगरपालिका–१० तिलकेनीमा वि.सं. २०४७ भदौ २० गते सामान्य कृषक परिवारमा जन्मेकी थिइन्, हेमन्ती साउद । अहिले दार्चुलाको सहायक प्रमुख जिल्ला अधिकारी जिम्मेवारीमा छिन्। १३ वर्षदेखि निजामती सेवामा सक्रिय उनी कार्य सम्पादन मूल्यांकनमा अब्बल छिन्। सुदूर पहाडमा प्रशासन हाँक्ने उनै हेमन्तीलाई सरकारले निजामती सेवा पुरस्कार–२०८१ मा ५० हजार रुपैयाँ नगद राशीको पुरस्कार प्रदान गरेको छ। कठोर संघर्ष र मिहेनतले उनलाई निजामती सेवामा सफलतातर्फ डोर्यायो। साउदका आमाबुवाले दूध, घिउँ बेचेर आउने पैशाले छोराछोरीको विद्यालयको खर्च जोहो गर्नुपर्ने बाध्यता थियो। हेमन्ती भन्छिन्, ‘आमाबुवाले धेरै दुःखकष्ट झेलेर पढाउनुभयो। अहिलेको सफलताको श्रय आमालाई जान्छ। उहाँहरुले नगर्नु भएको भए अहिले यहाँ हुने थिएन।’हेमन्तीले स्नातक पहिलो वर्षको अध्ययन गर्ने क्रममै २०६८ माघ १५ गते पहिलो प्रयासमै सहलेखापालमा नाम निकालेकी थिइन् । ०७५ मा नेपाल ल क्याम्पसबाट एलएलबी गरेकी उनले काठमाडौँ विश्वविद्यालयबाट ०७९ मा दिगो विकाश विषयमा स्नातकोत्तरको अध्ययन पूरा गरिन्। काठमाडौँमा अध्ययनकै क्रममा हेमन्ती ०७८ मा खुलातर्फ शाखा अधिकृतमा नाम निकाल्न सफल भएकी थिइन्। त्यसपछि उनी जिल्ला प्रशासन कार्यालय दार्चुलामा कार्यरत छन्। Source : Nepalkhabar
