23/12/2023
අපේ රට ආර්ථිකයෙන් සහ සංවර්ධනයෙන් ශුන්‍ය රටක් වුණත් එයම පන්නරයක් කරගෙන හිතේ ධෛර්යයෙන් වගේම ගතේ ශක්තියෙන් නොනැවතී ඉදිරියට යන කොල්ලො කෙල්ලො ඇතිතරම් මේ මහ පොළවේ ඉන්නවා. හැබැයි ඒ අයට බලධාරීන්ගේ නිසි ඇස ගැටීමක්වත් මැදිහත්වීමක්වත් නොලැබීම ඉතාම ඛේදජනකයි. මේවට හොඳම නිදසුන් පහුගිය මාස කිහිපයේම අපේ ඇස ගැටුණා. යාපනයේ අකිලා සපත්තු දෙකක්වත් නැතිව දුවලා දිනලා ලංකාවට රන් පදක්කමක් ගෙනාවා.
බොහෝ ආර්ථික අපහසුතා මැද්දේ නදීශා හෙල්ල ඔටුන්නක් කරගෙන රනින් රිදියෙන් අපේ රට දිගින් දිගටම සරසනවා. මේ අතරේ කිසිම අනුග්‍රාහකත්වයක් නැතුව, දක්ෂතාවය තිබුණත් කැලේම පිපිලා කැලේම පරවෙලා යන මලුත් ඕන තරම් අපි අතරේ තියෙනවා. එහෙම ලස්සනට විකසිත වීගෙන එන මලක් හොරෙන්ම පරවෙලා යන්න කලින් ඒ මල ගැන මුළු ලංකාවටම කියන එක සමාජ වගකීමක් බව හැගුණු නිසයි අපි මේ පුංචි කෙල්ලව හොයාගෙන ගියේ.
ඇය නමින් අයුෂ්මන්ත්‍යා ඉරජිණී කරුණාරත්න. මේ පාර නේපාලයේ පැවැත්වුණු 07 වන දකුණු ආසියානු කරාතේ ශුරතාවලියේ කිලෝ 42 බර පන්තියට අඩු කුමිතේ අංශයේ රන් පදක්කම දිනාගත්තේ ඇය. මේක ඇත්තටම අප්පච්චි කෙනෙක්ගේ ධෛර්යයෙනුත් දුවකගේ ශක්තියෙනුත් ලබාගත් ජයග්‍රහණයක්. ඒත් ඒ ජයග්‍රහණය පිටිපස්සෙ සංවේදී කතාවක් තියෙනවා.
🔵ඇය ඇගේ කතාව පටන්ගත්තෙ මෙහෙම…
මගේ වයස අවුරුදු 15 යි. ඉගෙනගන්නෙ කොළඹ ආනන්ද බාලිකා විද්‍යාලයේ. පවුලේ ඉන්නෙ අම්මයි, තාත්තයි, අයියයි අක්කයි. අම්මත් රැකියාවක් කරනවා. නමුත් ඇය වසර කීපෙක ඉඳන් ආතරයිටීස් රෝගයෙන් පෙලෙන නිසා ඉස්සර වගේ රැකියාවක් කරගන්න බෑ. තාත්තා පෙට්‍රෝලියම් එකේ. අක්කා මේ අවුරුද්දෙ ඒලෙවල් කරනවා. අයියා ඕලෙවල් කරලා ඉන්නෙ. අපි පදිංචි වෙලා ඉන්නෙ ජා ඇල.
🔵තරගාවලියට සූදානම් වුණේ සතියකින්…
මේ ශූරතාවලිය මෙදාපාර නේපාලෙයේ පැවැත්වුණේ. මගේ ඉවෙන්ට් එක කැඩෙට් ෆීමේල්. බර කිලෝ 42 ට අඩු. මාත් එක්ක තරග කරන්න හිටියේ නේපාලයෙයි, ඉන්දියාවෙයි, බංගලාදේශයෙයි තරගකාරියන් තුන්දෙනෙක්. රන් පදක්කම මම දිනාගනිද්දි රිදී පදක්කම ඉන්දියාවටත් ලෝකඩ පදක්කම නේපාලයටත් හිමිවුණා. මම ඇත්තටම මේ පාර මීට් එක තියෙනවා කියලා හරියටම දැනගත්තෙ මීට් එකට සතියකට කලින්.
මොකද මුලින් කිව්වෙ මේ පාර තරගාවලිය තියන්නෙ නෑ කියලා. ඉතින් සතියක් ඇතුළත තමයි මම පුහුණුවීම් කරලා මේ ඉවෙන්ට් එකට ලෑස්ති වුණේ. මුල ඉඳන්ම මම කරාතෙ පුහුණුවීම් කළත් වාර විභාගෙ එක්ක පුහුණුවීම් පොඩ්ඩක් මගහැරුණා. ඒත් කොහොමහරි මම සතියක් ඇතුළත හොඳට පුහුණුවීම් කළා.
🔵නර්ථනයටත් ක්‍රීඩාවටත් එක සේ දක්ෂයි…
මම ඕලෙවල්වලට කරන්නෙ පුරවැසි අධ්‍යාපනය, සෞඛ්‍ය සහ නර්ථනය. කරාතේවලට වගේම නර්ථනයටත් මම ගොඩක් ආසයි. මම පුංචි කාලේ හිරු සුපර් ඩාන්සර් තරගාවලියට සහභාගී වෙලා අවසන් 24 දක්වා ආවා. ඒ වගේම නෙට්බෝල්, වොලිබෝල් වගේ ක්‍රීඩාත් කරනවා. කවදහරි ලෝයර් කෙනෙක් වෙන්න තමයි කැමති. නමුත් කරාතෙනම් නතර කරන්නෙ නෑ.
🔵ලොකුම අභියෝගය වුණේ ටුවර් එකට සල්ලි හොයාගන්න එක…
මට මේ තරගාවලියට යන්න ලක්ෂ හතරක් ඕනෙ වුණා. ඉතින් සතියක් ඇතුළත ඒ ගාණ හොයාගන්න එක මට ලොකු ගැටලුවක් වුණා. ඒත් මගේ පාසලෙන් බැංකු කිහිපයක් හරහා මට ලෝන් එකක් අරන් දුන්නා. මං ලොකු ගැටලුවකට හිර වෙලා හිටපු වෙලාවෙ පාසලේ විදුහල්පතිනිය ඇතුළු සියලුම ගුරුවරුන් එදා ඒ කරපු උදව්ව මට මහ මෙරක් වගේ. ඒ වගේම අම්මගේ යාළුවොත් මට සල්ලි හොයාගන්න ගොඩක් උදව් කළා. මේ තරගය නිසා මට ඔලිම්පික් කමිටුවෙන් ලක්ෂයක මුදලක් ලැබුණා. ඒ වගේ ලැබෙන සල්ලිවලින් ඒ ණය පියවගෙන යනවා. සතියක් වගේ කාලයක්නෙ ලෑස්ති වෙන්න තිබුණේ. ඒ නිසා ස්පොන්සර්ශිප් හොයාගන්න අමාරු වුණා.
🔵රන් පදක්කම මම බලාපොරොත්තු වුණා…
ඇත්තටම මේ තරගයට සහභාගී වුණේ ජයග්‍රහණය බලාපොරොත්තුවෙන් තමයි. මොකද ගිය පාර ආසියානු කරාතේ ශූරතාවලියෙන් මට ලැබුණේ දෙවෙනි ස්ථානය. ඒ නිසා මේ පාර පළවෙනියා වෙනවා කියලා මට ලොකු විශ්වාසයක් තිබුණා. ඒ බලාපොරොත්තුවෙන්ම තමයි මම ඒ සතිය ඇතුළත පුහුණුවීම් කළෙත්. මේ වෙලාවෙ මම මගේ කෝච් මහේෂ් කුමාර සෙන්සේවත් ඉතාම ගෞරවයෙන් මතක් කරන්න ඕනෙ
🔵ෆිට්නස් ගැනනම් ගොඩක් හිතනවා..
සාමාන්‍යයෙන් වැඩිපුරම බත් තමයි කැවෙන්නෙ. නමුත් ඒ අතරට කඩල, කවුපි, මුං ඇට වගේ ධාන්‍ය වර්ගත් කනවා. දවල්ට කොහොමත් හොඳට බත් කනවා මස්, මාළු, බිත්තර එක්ක. රෑට ගොඩක් වෙලාවට පලතුරක් කනවා. එහෙම තමයි ෆිට්නස් තියාගන්න මහන්සි වෙන්නෙ. කඩ කෑමනම් කන්නෙම නෑ.
🔵අවුරුදු හතේ ඉඳන් කරාතේ කරනවා…
දෙක ශ්‍රේණියේ ඉඳන් කරාතෙ කළා. දැන් අවුරුදු නවයක් කරාතෙ පටන් අරන්. දිගින් දිගටම මෙඩ්ල්ස් ගන්නකොට මට මේක නතර කරන්න හිතුණෙම නෑ. ආසාව වැඩි වුණා. මේ වෙද්දි කරාතෙ මෙඩ්ල්ස් විතරක් පනස්ගාණක් තියෙනවා.
අයුෂ්මන්ත්‍යා අපිත් එක්ක මේ පිළිසඳර ගෙනිච්චේ තරමක අසනීප තත්ත්වයෙන් නිසා එතනින් පස්සෙ අපි කතා කළේ ඇයගේ මේ ගමනට යෝධ හෙවනැල්ලක් වෙන ඇගේ ආදරණීය අප්පච්චි එක්ක.ඔහු නමින් තුෂාර කරුණාරත්න.
🔵අද වෙනකල් දුවව පුහුණුවීම්වලට ගෙනියන්නේ මම
අපිට තරගය බලන්න අවස්ථාව ලැබුණෙ නෑ. නමුත් තරගයේ වීඩියෝ කිහිපයක් මගේ ලොකු දුවට එවලා තිබුණා. මට ලොකු සතුටක් දැනුණා. මොකද අපි බොහොම දුෂ්කර ගමනක් මේ යන්නෙ. දරුවො තුන්දෙනෙක්නෙ. අවුරුදු නවයක් තිස්සෙ කුලී ගෙදරක ඉන්නගමන් තමයි මේ තුන්දෙනාට ඉගැන්නුවේ. පොඩි දුව දෙක ශ්‍රේණියෙ කොළඹ සංඝමිත්තා බාලිකාවේ හිටපු කාලෙ ඉඳන්ම මම ඇයව අද වෙනකල් පුහුණු කටයුතුවලට එක්කගෙන යනවා.
🔵දුවගෙ ඉලක්කෙ වුණේ රන් පදක්කම විතරයි…
ගිය අවුරුද්දෙ තිබුණ තරගෙනුත් දුව දෙවෙනියා වුණා. ඒ නිසා මේ පාර එයාගෙ ඉලක්කය වුණේ රන් පදක්කම විතරයි. සමහර අවස්ථාවල පුහුණුවීම් නිසා අධ්‍යාපන කටයුතුවලටත් බාධා වුණා. නමුත් අවසානේ ඇය තමන්ගෙ රටටත් පාසලටත් ලොකු සතුටක් ගෙනත් දුන්නා.
🔵ලොකු දුවත් පුතත් කරාතේ චැම්පියන්ස්ලා…
ගිය අවුරුද්දේ ෂැනෝ කායි තරගාවලියෙන් ලොකු දුව 17 න් පහළ රන් පදක්කම දිනාගත්තා. ඒ වගේම වායු රයිෆල් ෂූට් සමස්ත ලංකා තරගාවලියෙදි sharp shooter වුණා. ලොකු දුව උසස් අධ්‍යාපනය වෙනුවෙන් මේ දවස්වල මහන්සි වෙන නිසා ක්‍රීඩා කටයුතුවලින් පොඩ්ඩක් ඈත් වෙලා ඉන්නෙ. පුතා ගිය අවුරුද්දේ ඕපන් නැෂනල් කරාතේ ශූරතාවලියෙන් රිදී පදක්කම ගත්තා.
ඔහුත් ෂැනෝ කායි තරගාවලියෙන් පිට පිට රන් පදක්කම් දිනාගත්තා. මගේ දරුවො තුන්දෙනාම ජාතික තලයේ ක්‍රීඩා හොබවන දරුවෝ. මට මගේ දරුවො තුන්දෙනා ගැන තියෙන්නෙ කියාගන්න බැරි සතුටක්. වගකීම් සහ යුතුකම් අතින් ගත්තොත් මම මේ රටට හොඳ සත්පුරුෂයො තුන්දෙනෙක් බිහිකළා කියලා මම හිතනවා. මම කියන දේ අහගෙන, අධ්‍යාපන කටයුතුත් හොඳින් කරගෙන, තමන්ගෙ දුක හොඳින් තේරුම් අරගෙන යන විදිහටයි මම දරුවො හදන්නෙ.
🔵මගේ කෙල්ල පට්ට ටැලන්ටඩ්
මගේ පොඩි දුව පට්ට ටැලන්ට් කෙල්ලෙක්. එයා අභියෝගවලට හරිම සැහැල්ලුවෙන් මූණ දෙන කෙනෙක්. මොකද ඔය රන් පදක්කම දිනාගත්ත වෙලාවේ ඇය මට කෝල් එකක් ගත්තා. නමුත් මට ඇහුණේ අනිත් රටවල තරගකරුවන්ට චියර් කරන සද්දෙ විතරයි. මට ඇත්තටම දුව කියපු දෙයක්වත් එදා ඇහුණෙ නෑ. නමුත් දුව කිව්වා “තාත්තේ මේ මිනිස්සු චියර් කරන්නෙ මට කියලා හිතාගෙනයි මම තරග කළේ” කියලා. ඒ තරම් මොරාල් එකක් දුවට තිබුණා.
🔵අම්මා පුළුවන් කාලේ දරුවො වෙනුවෙන් කළා…
බිරිඳ කරන්න පුළුවන් උපරිමය දරුවො වෙනුවෙන් කළා පුළුවන් කාලේ. නමුත් දැන් ඇය අසනීප තත්ත්වෙන් ඉන්නෙ. ඇගේ අසනීප තත්ත්වය උඩ තමයි මට වැඩිපුර කාලයක් දරුවො වෙනුවෙන් වෙන් කරන්න වුණේ. මම බොහොම අමාරුවෙන් ගෙවල් කුලී ගෙවාගෙන, දරුවන්ගෙ පන්ති ගාස්තු ගෙවාගෙන ගෙදර වැඩකටයුතුත් කරගෙන ඉන්නෙ. දරුවො පුංචි කාලෙම බිරිඳට මේ අසනීප තත්ත්වෙ ආපු නිසා දරුවො එයාලගේ වැඩ කරගන්න පුරුදු වුණා. මම හැමදාම පාන්දර හතරට අවදි වෙලා ගෙදර වැඩ කරලා තමයි වැඩට යන්නෙ. මගේ ජීවන රටාව එක්ක පැය හතරක නින්දක් තමයි හැමදාම ලැබෙන්නෙ.
🔵මේ දරුවන්ට වටින්නේ අනුග්‍රාහකයෝ…
මේ රටේ හොඳ දක්ෂතා තියෙන, ලංකාව රනින් බබලවන්න පුළුවන් දරුවො ගොඩක් ඉන්නවා. නමුත් ආර්ථික ප්‍රශ්න එක්ක ඒ දරුවන්ගේ දක්ෂතා ගොඩගන්න බැරුව එහෙම්ම වැලලිලා යනවා. ඉතින් අපි කොහොමහරි ඒ දරුවන්ගේ තැන ලබාදිය යුතුයි කියන පදනමෙන් මේ ගමන ගියාට ආර්ථික වශයෙන් ඉතාම අපහසුතාවයෙනුයි මේ ගමන යන්නෙ. මේ දරුවන්ගෙ දක්ෂතාවය දැකලා කවුරුහරි අනුග්‍රහයක් දක්වනම් දරුවන්ට ඒක ගොඩක් වටීවි.
එරංදි කෞශල්‍යා ✍️
