28/11/2022
YAADANNOO ARTIST USMAAYYOO MUUSSAA
Sagantaa Yaadannoo wareegama Artist Usmaayyoo Muussaatii fi Eeybi Khitaaba Seenaa Artist Usmaayyoo Muussaa haala bareedaan, bifa nama gammachiisuun, akkaataa Oromoof wareegamuu fi wareegama nama hawwisiisutti Magaalaa Finfinnee Hoteela Ililliitti gaggeeyfameeti jira.
Sagantaan Eeyba Manguddootiin jalqabdee waa'een khitaaba seenaa Qabsaawaa Artist Usmaayyoo Muussaa saahiba isaa kan tahe Qabsaawaa fi Artist Suutee Bareentootiin tuttuqamee, Artist Usmaayyoon nama akkamii fi Qabsaawaa hangamii akka tahe imimmaaniin kukkuulamee dhiyaate.
Itti aansuun, Intala hangafaa Qabsaawaa Artist Usmaayyoo Muussaa tan taate Artist Saartuu dhaan haasawni gabaabaan; Kan akkaataa jiruu fi jireenya maatii Usmaayyootii fi dararaa isaan kheeysa dabran, wareegama isaa boodaas faffaca'insa maatii irra gahee fi miidhaa faffaca'insa isaanii, Akkaataa Qindeeyfamaa fi barreeyfama khitaaba Seenaa Usmaayyoo Muussaa, waggaa 16'n dabraniif Yaadannoo Abbaa isaanii Usmaayyoo Muussaa kophaa isaanii akka maatiitti godhaa turuu isaanii, Bu'aa bahii yaadannoo wareegama Artist Usmaayyoo Muussaa waggaa 16 duraatii fi kan waggaa 16 ffaa, Yaadannoo Wareegama isaa kan waggaa 16 kun kan addaa tahuu fi Oromoon hirmaatee galma guutee mullachuun Abbaan isaanii Oromoof akka qabsaawee fi Abbaan isaanii Abbaa isaanii qofa osoo hin taane Abbaa Ilmaan Oromoo hundaa tahuu fi Sagantaan yaadannoo kun milkaahuun gammachuun guddaan akka isitti dhagayame, Namootaa Sagantaa kanaas dabalatee, Khitaabaa fi CD'n akka qophaa'ee eeybifamuuf gumaacha godhan galateeyfachuun, Qabsaawonni akka Usmaayyoo Muussaa kan ilmaan isaanii faffaca'anii jiran kan seenaan isaanii hin beekkamnee fi hin dubbatamne hedduun akka jiran beeynee akka gargaarruu fi akka wal bira dhaabbannu jechuun, Hirmaattota hunda galateeyfachuun fi Sirba abbaa isii kan "SEENAA DHAABBATAA" kan ju'uun galma guutuu sossooftee haasawa isii xumurte. Jabduu intalaati atuu, Nuuf buli saartuu.๐
Itti aansuun, Dr Gammachuu Magarsaa gara Wal tajjiitti afeeramuun haasawa godhaniin Wanta tokko kan tahuun nama qaaneysu ni beeytanii? Je'ee gaafateeti, "Oromoo tahuudha" je'ee ifumaaf deebise. Dhugaa dubbachuuf Oromoo tahuun nama qaanfachiisa. Silaa akkana hin ju'uu garuu waaniin jechuu qabuufi jechuun galma guutuu miira kheeysa galchuun garii Afaan qabachiisuu, garii ija kheeysa wal lallaalchise. Khan boohee fi kan imimmaan ija maru hanga je'ee himuu hin dandayu malee, hanga hin dhabu.
Dr Gammachuun "Oromoo gaafa barbaachisu osoo waliif hin dirmanne, gaafa boohichaa wal hin hanqanne" akka waan jechuu fedheetti, akka maletti anaannachaa, ilkaan ciniinnachaa asii fi ichi deddeemaa haasawe. Kana malees Oromoon hidhaa jiruus hedduudha. Kan wal ajjeesuus hedduudha. Ifaan ifatti, Kan sababa tokkootiin kuun miidhamuus hedduudha jechuu baatuus, akki Oromoon amma kheeysa jiru kan lolaa kun akka itti hin tolin ifaan ifatti ibsate. Kun ammoo akka dhaabbachuu qabu dubbate.
Itti fufuun; Sheekkoo takka hime. Sheekkoon sun ilmaan abbaa ajjeesuuf wal mariyatee fi Abbaa isaanii jiddutti waan tahe himti. Sheekkoo sanirraa Abbaan Lafaa, Abbaan biyyaa agabee huuqqachuu fi kan itti dhufe ammoo quufee gagabbachuu faatu jira. Sheekkoon san guutuun guututti ergaa ajaa'ibaati if kheeysaa qabdi. Sheekkoo san barbaadaatii dhageeyfadhaa. Dhumaatii Haadholii, Manguddootaatii fi Daa'immaniitiif sababa kan tahe jara biraati jechuun, sababa kan biroo wal loleef dhiiyni isaanii lola'aa jira ergaa jettu dabarsiti. Sheekkoo addaati.
Dr Gammachuun Artist Usmaayyoo Muussaa sirritti akka beekuu fi mana hidhaatti deddeebi'ee warra laalaa ture kheeysaa tokko tahuu isaa ibsuun, Artist Usmaayyoo Muussaatii fi Obboleeytiin isaa (Obboleeytii wajjiin dhalatan jechuu kiyyaa miti) Qabsaawota Ilmaan Afran Qalloo kan hangafaati jechuun, haasawa isaa itti fufe. qabsaawota jalqabaa kan Duuti itti murtooytee karshallee buute tahuu nu yaadachiise.
Artist Oromoon waan isatti as deemu firraa arkee akka tokkummaan qolatuuf, akka fala barbaaddatuuf sirbaan nuuf himaa ture. Nuti garuu hin dhageenye. Isin Dhagayuu hin dandeenye. Joollee hin baanu. Warra umrii kiyyaatii fi warra umriin natti dhiyaataniin baana jechuun dubbii jajjabduu dubbate.
Ali Birraaniis kanuma himaa ture. Isin garuu "ITTUMA SIRBUUF, SIRBA DHAGEEYFATTAN"๐ฅฒ je'e.
Kana malees jaarsa tokko kan hidhamtoota gaafa Usmaayyoo Muussaa faa san torbaanitti dinnichaa faa fudhatee mana hidhaa dhaqee laalu tokko dubbate. Jaarsi sun nama xoorataan isaa Qarshii 800 ti. Mee isin ifiifuu xoorataan kheeysan xiqqaa kanaa isinii fi maatii kheeysaniifuu hin gahuu, akkamitti torbaan torbaaniin hidhamtoota dheeyxanii laaltu? Je'eetiin gaafadhe je'e. Jaarsiniis Dr Gammachuu mana kiyyatti erga disxii waa itti bilcheeysanitti waa bilcheeysuu dhiifnee waggaa sadihi. Manqorqoriyaadha qabna. Isumatti shaayii danfifna. Ilmaan kiyya Shaayuma san ganama daabboon nyaatanii oolan.
Garuu "ABDIIN ILMAAN KIYYA KANAA, WARRA ARRA HIDHAA JIRU KANA" naan je'e je'e. ๐ญ
Mee isin gaafa Usmaayyoo Muussaa faan hidhaa jiran, dheeyxanii fuula isaa warri argitan ni jirtanii? Maaliif dheeyxanii laaluu dhabdan?
Arrallee Usmaayyoo hedduutu hidhaa jira. Meeqa kheeysantu dhaqee laalutti jira? Maatii Usmaayyoo eenyuutu quba qaba? Akki khun hin tahu.... Jechuun haasawa isaa gabaabse.
Sagantaan Eeyba khitaabaa fi CD yeroo gahu kheeysummaa tahuun namoota wal tajjii gubbatti yaamaman kheeysaa dhiirarraa Dr Gammachuu Magarsaa, Koloneel Gammachuu Ayyaanaa, Hamza Borana , M***a Adem Oumer fi kkf yoo tahu, gama dubartootaa irraa ammoo; Artist Saartuu Usmaayyoo Muusaa , haadha qabeenyaa Aadde Sara Hassen Adem , Ittigaafatamtuu Waajjira Paartii Magaalaa laga Xaafoo Aadde Fariyaa Aliyyii , Kabajamtuu Miseensa Caffee Oromiyaa Aadde Wasiila Abdoo fi Shamarran Affeellamaa fi Aannan fidanii dhufan faadha. Khitaabni Seenaa Usmaayyoo Muussaa "SIIDAA DHAABBATAA" kan ju'uu fi CD'n isaa haarayni haala kanaan eeybifame.
Khitaabni kun akkuma eeybifameen mee bitiin isaa eenyuun haa jalqabamu gaafii jettu eega kaasanii booda Haadha Qabeenyaa Obboleeytii teenya Aadde Saaraa Aadamiin haa jalqabamu jechuun maaykiin itti kenname. Aadde Saaraan Khitaaba Seenaa Usmaayyoo Muussaatii fi CD'n isaa Hanguma fedhe maallaqa guddaa fedheen yoo jalqabamees garaa nama hin gahu. Haa tahuu garuu khitaaba isaa kan Qarshii Kuma dhibba lamaan(200,000) niin jalqaba jechuun galma guututti gammachuu fi onnee addaa uumuun fuula nu ibsite. Galmi guutuun harka dhawuun isii Galateeyfate.
Itti aansuun Maaykiin Kabajamtuu Obboleeytii teenya Aadde Fariyaa Aliyyiitti kenname. Isiniis akkuma maaykii fudhatteen Galma guutuu nagaya gaafachuun jalqabde. Itti aansitee waa'ee Artist Usmaayyoo Muussaa kaaftee, gumaacha inni qabsoo Oromoo kheeysatti godhe, Aartiin akkamitti akka dhalootaaf xurree tattaraare, Usmaayyoon waan yeroo tokkoo qofa akka hin sirbinii fi sirbi isaa kan arraatii fi kan boruu akka tahe nu yaadachiifte.
Itti fufuun sirba Usmaayyoo Muussaa kan "yaa daddaba jiruu, karamiin na deemta" ju'uu fi Kan "Hidhaafii ajjeechaan hamilee nu cabsee karaa nun deebisu" ju'uun galma guutuu sagalee takkaa fi harka dhawuun sirbisiifte. Sagaleen isii ammoo kan ajaa'ibaati. Sagalee isiitiif ragaan Oromoo galma san kheeysa jirtu cufa. Namuu ni dinqisiifate. Itti fufuun haasawa gooteen; Aartistoota hangafaa kanneen akka Artist warra gaafa Afaan Oromoo Teephii fi Raadiyo cabsa ja'an akka hin cabsine mirkaneeyse akka gargaarruu fi maatii Aartistoota wareegamanii akka gargaarru akeekte. Tokkummaas akka nuuf kennu Rabbi kadhachuun itti fuftee, akkuma nama dhunfaa tokkotti akka hirmaatte ibsite. Ammallee akkasumattiin khitaaba kana bita jechuun khitaaba 1 Qarshii kuma soddomiin bitte. Kana maddittiis iddoon jiruu fi Godina Harargee Bahaattiis tahee bakkuma fedhettuu Khitaabni khun akka raabsamuu fi akka gurguramu haala mijjeeysuu fi deeggarsa yaadaatiin biraan dhaabbadha jechuun waada galtee haasawa isii xumurte.
Kabajamtuun miseensi Caffee Oromiyaa Aadde Wasiilaa Abdootiis khitaaba Seenaa Qabsaawaa fi Artist Gameeysa kanaa Qarshii Kuma Shantamaan khitaaba tokko bitte. Galata guddaadha qabdi.
Sagantaa arraan tanaa; Sagantaa haalaan qindoomina qabdu, tan kurfiin isii akkaan tolte, Sagantaa dhaamsa dhama qabu dabarsitu, Sagantaa hamilee namatti hortu, Sagantaa yoo waliin hojjanne, yoo waliin sossoone galma akka geenyu namaaf akeektu, Sagantaa tokkummaan irratti hojiin mullatte, Sagantaa addaati.
Gama boodaarratti Sagantaan badhaasaa godhamte. Badhaasni Maatii Artistoota Wareegamaniitiif kenname. Badhaasa kana kennuuf keessummaan yaamamanii maatii Aartistoota wareegamaniitiif badhaasa yeroo kennan Aadde Saaraa Aadam haadha Artistii keenya kan wareegame Artist tiif qarshii kuma diiydam(20,000) yoo kennitu, Aadde Fariyaa Aliyyiitiis Ilma Artist Hangafaa Artist tiin Transport(Noolii) godhu jechuun qarshii kuma shan(5000) harkatti kenniteef. Galata guddaatu isaaniin mala.
Gumaachi gama leeccallootiin godhame hedduudha. Haa tahuu malee, kan akkaan natti tolee fi kaniin ajaa''ibe kan Obboleeysa keenya tokkooti. Inniniis deeggarsa godhuuf yaadeeti garuu maqaa isaatiin osoo hin taane, maqaa Qabsaawaa Gameeysaa fi Hundeeysaa ABO Sooreysa tiin Qarshii Kuma Shantam (50,000) fi Maqaa Doktora Kabajaa Artist tiin Qarshii Kuma shantama (50,000) gumaachuun, walitti qarshii kuma dhibba tokko(100,000) gumaacha godhe.
Kan daranuu namatti tolu kuma dhibba tokkicha yeruma san Mobile Banking dhaan gara Account Artist saartuu Usmaayyoo dabarsuu isaati. Dhugumatti namni kun nama addaati. Dhugumatti namni kun Abbaa qabeenyaa qofa osoo hin taane, inninuu Qabeenya keenya guddaadha. Rabbiin isaafii warra gumaacha godhan kan birootiis guddoo dhuma hin qabne haa kennuuf jenna.
Gumaacha taasifame kheeysaa muraasni:
Dhaabbata Kabsachiisaa fi Misoomaa Soof Umar 50,000
Dhaabbata Tola ooltummaa Kuraa Galaan 50,000
Jawar Mohammed 100,000
ABO 20,000
KFO 10,000 fi kkf hedduudha.
Isaan hundi Galata qabu.
Ummanni keenya kan akka jirutti Sagantaa Yaadannoo waggaa 16 ffaa Wareegama Artist Usmaayyoo Muussaa kana bareechitan hundi keeysanuu hedduu Galatoomaa.๐
Abbaa keenya Artist Usmaayyoo Muussaatii fi Abbootii teenya tan fuula Rabbii deemte hundaaf Rabbiin Raahmata haa godhu. Jannata isaan haa qubsiisu. Nutiis ilmaan isaan caalu nu haa godhu. ๐คฒ
Hub:
Waanumaan yaadadhuu fi tanii arkee dhagayeen barreeyse malee qabiyyeen Sagantichaa akkaan ballaadha. Waaniin barruu gabaabduu tanaan himee fixuu miti. Hirmaattotaa fi Gumaacha godhamees hangumaan yaadadheen barreeyse. Waaniin dogongoraan itti ida'ee fi taniin irraa irriseefiis dhifamaan isin gaafadha. Na ofkolchaa.๐
FUGUG Times
~~~~~~~~~~~~~
Adem Dhalate
Sadaasa 27, 2022
Finfinnee