21/05/2024
#መትከላት #ንጥፈታት #ኣይኮኑን
መትከላት ንጥፈታት ኣይኮኑን። ንጥፈት ሓደ ውሱን ተግባር እዩ። ኣብ ሓደ ኣጋጣሚ ውጽኢታዊ ዝኾነ ንጥፈት፣ ኣብ ካልእ ኣጋጣሚ ናይ ግድን ውጽኢታዊ ይኸውን ማለት ኣይኮነን። ወለዲ ልክዕ በቲ ንቀዳማይ ውላዶም ዘዕበዩሉ ኣገባብ ንካልኣይ ውላዶም ንምዕባይ ብምፍታን፣ ነዚ ሓቂ ከረጋግጹዎ ይኽእሉ እዮም።
ንጥፈታት ኩነታዊ ብዝኾነ መልክዑ ውሱናት ክኾኑ ከሎዉ፣ መትከላት ግና ዕምቈት ዘሎዎምን ሱር-መሰረታውን ሓቅታት እዮም። ብተወሳኺ መትከላት ኣብ ዝኾነ ቦታ ብማዕረ ኣብ ግብሪ ክውዕሉ ይኽእሉ እዮም። መትከላት ኣብ ህይወት ውልቀሰባት፣ ኣብ ሓዳር፣ ኣብ ቤተሰብ፣ ኣብ ውልቃዊ ወይ ኣብ ህዝባዊ ትካላት ክትግበሩ ይኽእሉ እዮም። እዞም ሓቅታት ወይ መትከላት ብልማድ መልክዕ እንተ ተኣታትዮም፣ ሰባት ሰፋሕቲ ንጥፈታት ብምፍጣር ንዘጋጥሙዎም ዝተፈላለዩ ጸገማት ዝብድሁሉ ዓቕሚ ከዕጥቑዎም እዮም።
መትከላት ክብርታት (Values) ኣይኮኑን። ሓደ ጭፍራ ጉሓላሉ ናይ ገዛእ ርእሱ ክብርታት ኣሎዉዎ። ይኹን እምበር ኣንጻር ናይ’ዞም ንዛረበሎም ዘሎና መሰረታዊ መትከላት እዩ። መትከላት ግዝኣታት እዮም። ክብርታት ግና ካርታታት እዮም። ንመትከላት ግቡእ ክብሪ ክንህቦም ከሎና፣ ወነንቲ ሓቂ ኢና። ከም ውጽኢቱ ድማ ሓቀኛ ናይ ነገራት ፍልጠት ይህልወና።
መትከላት ንጠባይ ደቂ ሰባት ኣደብ ዘትሕዙ መምርሕታት እዮም። መትከላት ነባርን ቀዋምን ክብሪ ኣሎዎም። መትከላት ሱረ-መሰረታዊ እዮም። መትከላት ኣብ ክትዕ ወይ ኣብ መጐተ ዝኣትዉ ኣይኮኑን፤ ምኽንያቱ መትከላት ንጹራት እዮም። መትከላት ንጹራት ምዃኖም ብቕልጡፍ ንምርዳእ፣ ኣንጻሮም ኣብ ዝኾነ መሰረት ተመርኲስካ ውጽኢታዊ ህይወት ክትጐናጸፍ ምፍታን ሓደ መገዲ እዩ። ዝኾነ ሰብ ንዘይ ቅሱንነት፣ ንምትላል፣ ንሕሱምነት፣ ንከንቱነት፣ ንምናምንነት፣ ንብልሽውና ቀጻልነት ዘሎዎ ሓጐስን ዓወትን ንምዕታር ከም ጽኑዓት መሰረት ጌሩ ክወስዶም ኣይክእልን እዩ።
ካርታታትና ወይ ኣጠማምታታትና ናብ’ዞም መትከላት ብዝቐረቡ ቁጽሪ፣ ብዝሓሸ መልክዑ ቅኑዓትን ተግባራውን ክኾኑ እዮም። ቅኑዓት ካርታታት ንውልቃውን ሓድሕዳውን ኣድማዕነትና ብሰፊሑ ክጸልዉዎ እዮም። እዚ ድማ ኣብ ኣጠማምታናን ኣብ ጠባይናን ክንዲ ዝኾነ ይኹን ጻዕሪ ብምግባር ክንረክቦ ዘይንኽእል ረብሓ እዩ።
ምንጪ፦ #7 #ልማዳት #ዕዉታት #ሰባት
@
Solomye Shop is an online shop that sells best quality modern marken, habesha produkte, haar, hautpflege, elektronik, and bücher at fair price & with worldwide free shipping.