19/01/2023
ՀՐԱՏԱՐԱԿՈՒԱԾ Է «ՆՈՐ ՍԵՐՈՒՆԴ» ԱՄՍԱԹԵՐԹԻ ԱՌԱՋԻՆ ԹԻՒԸ
Աւստրալահայ գաղութը կը հարստանայ նոր ամսաթերթով մը:Աւստրալիոյ հայ համայնքի ընկերակցութեան (ACAA) նախաձեռնութեամբ, արդէն հրատարակուած է «Նոր Սերունդ» ամսաթերթին առաջին թիւը: Այս նոր հրատարակութիւնը կը շոշափէ ազգային թղթածրարներ, գաղութային, մշակութային եւ հայ ընթերցողը հետաքրքրող այլ նիւթեր: «Նոր Սերունդ»-ին մէջ դուք պիտի ընթերցէք հայրենիքին եւ գաղութին վերաբերող նիւթեր, հարցազրոյցներ, հաղորդագրութիւններ եւ յօդուածներ:
Ինչպէս նշուած է «Նոր Սերունդ» ամսաթերթի առաջին թիւին մէջ, նման հրատարակութեան դիմելու որոշումը առնուած է նկատի առնելով հայութեան դիմաց ցցուած մարտահրաւէրները զանազան միջոցներով դիմակայելու, ժողովուրդին եւ հայրենիքին բարօրութիւնը ապահովելու համար գաղութը զօրակոչի ենթարկելու եւ նոր սերունդը ազգային կեանքին մասնակից դարձնելու հրամայականը, ինչպէս նաեւ Սփիւռքի մէջ հայը հայ պահելու առաքելութիւնը: 2023-ի առաջին օրերուն ամանորեայ նման նուէր մը մատուցելով գաղութին, Աւստրալիոյ հայ համայնքի ընկերակցութիւնը կը յուսայ, որ գանատական Թորոնթօ քաղաքին մէջ հրատարակուող «Լուսաբաց»-ին հետ գործակցաբար հրատարակուող «Նոր Սերունդ» ամսաթերթը երկար շարունակէ իր առաքելութիւնը, որուն համար կ'ապաւինի նաեւ գաղութի փոքր, սակայն որակեալ ընթերցասէր խաւի աջակցութեան:
Ըլլալով անդրանիկ յատուկ հրատարակութիւն, «Նոր Սերունդ» ամսաթերթի Յունուար ամսուան գունազարդ 60 էջերով թիւը իր նիւթերուն մէջ տեղ յատկացուցած է նաեւ անցնող տարուայ վերջին օրերու զարգացումներուն եւ յայտարարութիւններուն:
«Նոր Սերունդ» ամսաթերթը կը հրատարակուի տպագիր ու ելեկտրոնային տարբերակներով՝ հասանելի ըլլալու համար բոլորին: Ուստի, «Նոր Սերունդ» ամսաթերթի արդէն հրատարակուած առաջին, նաեւ գալիք թիւերը ստանալու համար կարելի է ելեկտրոնային նամակ (Email) ուղարկել [email protected] հասցէին, նշելով ձեր ելեկտրոնային հասցէն՝ թուային տարբերակը ստանալու համար, կամ ձեր ֆիզիքական հասցէն՝ տպագիր տարբերակի առաքումը կազմակերպելու համար:
Վստահ ենք, որ «Նոր Սերունդ» ամսաթերթը իր ազդեցիկ դերը պիտի ունենայ մեր ազգային կեանքը կատարելագործելու ուղիին վրայ:
