TBConline

Mashabiki wa soka na Timu ya Taifa Stars wamelitaka Shirikisho la Mpira wa Miguu Tanzania (TFF) kuvunja benchi la ufundi ili kutengeneza timu ya Taifa katika muundo utakaoleta ushindi. Hii ni baada ya kukamilika mchezo wa Taifa Stars ikitoka suluhu na Ethiopia 0-0. Je, kuna haja ya kuvunja benchi la ufundi la timu ya Taifa? 🎤 @e_j1official 🎥 @simbeyezekiel

Mwanamuziki na mpenzi wa soka, Foby amesema Taifa Stars haijacheza vizuri dhidi ya Ethiopia kutokana na kutokaa kambini kwa muda mrefu ambao ungesaidia kutengeza muunganiko mzuri wa timu. Foby amesema kukosekana kwa Mbwana Samatta pamoja na Simon Msuva siyo sababu ya timu ya taifa kukosa matokeo mazuri bali wachezaji kukosa muunganiko. Hata hivyo amesisitiza kwamba timu ya Taifa bado ina nafasi ya kufuzu fainali za AFCON 2025 kutokana na ubora wa baadhi ya wachezaji waliopo katika timu ya taifa. 🎤 @e_j1official 🎥 @simbeyezekiel

Mashabiki wa Timu ya Taifa Stars wamesema siyo kila mtu maarufu anaweza kuhamasisha mashabiki kujitokeza uwanjani kuja kuipa nguvu timu ya Taifa. Badala yake wamesema kwamba mashabiki ndio watu wa mpira na watumike wao kuhamasisha tofauti na kutumia wasanii kuhamasisha mashabiki kuja uwanjani. Mchezo umekamilika Taifa Stars dhidi ya Ethiopia kwa matokeo ya 0-0 ikiwa ni mchezo wa kwanza wa kuwania kufuzu fainali ya Kombe la Mataifa ya Afrika (AFCON) 2025. 🎤@e_j1official 🎥 @simbeyezekiel

Shabiki wa Timu ya Taifa Stars amesama mchango wa Rais Samia Suluhu Hassan katika michezo umeonekana kuongeza hamasa hasa kwa namna anavyomwaga pesa kwa kila goli ambalo timu zetu zimekuwa zikicheza katika michuano kimataifa. “Goli la Mama limekuwa na mchango mkubwa sana kwa timu zetu hata kwa timu ya Taifa kwani inawapa morali wachezaji,” amesisitiza shabiki huyo. Ni kuelekea mchezo wa kuwania kufuzu fainali za mataifa ya Afrika (AFCON) 2025, Tanzania ikikipiga leo dhidi ya Ethiopia. Mchezo huo utakuwa mbashara kupitia Televisheni ya Taifa TBC1 na redio, TBC Taifa. @e_j1official @simbeyezekiel

Mashabiki wa Simba na Yanga pamoja na vilabu vingine nchini wamesema leo wameungana kwa kuondoa tofauti zao na kwamba leo lao ni moja tu; kuipa nguvu Taifa Stars kwa pamoja kwani klabu zao zinatumika pia kutoa wachezaji wa kuijenga timu ya Taifa. Ni kuelekea mchezo wa kuwania kufuzu fainali za mataifa ya Afrika (AFCON) 2025 zitakazofanyika nchini Morocco. Mchezo wa leo Tanzania watakipiga dhidi ya Ethiopia kuanza saa 1:00. 🎤 @e_j1official 🎥 @simbeyezekiel

JK: Maandalizi ya mapema yatatupa heshima Afcon 2027 Rais Mstaafu wa Awamu ya Nne, Jakaya Kikwete amesema, Shirikisho la Soka Tanzania (TFF) na klabu za Tanzania wanapaswa kuwaandaa wachezaji wazawa ili kujenga timu ya Taifa imara itakayofanya vizuri kwenye michuano ya Kombe la Mataifa ya Afrika (AFCON) 2027. Kikwete amesema, lazima klabu na TFF zikae pamoja na klabu kubwa za Simba, Yanga na Azam ili kuweka mkakati wa kuwajenga wachezaji wanaoweza kuonesha ushindani mkubwa kwenye michuano hiyo. Rais Mstaafu Kikwete ametoa ushauri huo alipofanya mahojiano maalum na TBC Digital kuhusiana na nafasi ya Tanzania kwenye michuano ya Afcon ya mwaka 2027 ambapo Tanzania, Kenya na Uganda wameshinda nafasi ya kuandaa michuano hiyo. Kikwete ambaye ni mpenzi mkubwa wa soka, amesema, kujenga viwanja bora ni jambo moja lakini lazima tuwe na timu yenye uwezo wa kuvitumia viwanja hivyo na kuonesha umahiri mkubwa wa kusakata kabumbu kama waandaji wa michuano hiyo. Amesema, muda wa maandalizi ni sasa ili kuwa na timu bora ya Taifa itakayokuwa na uwezo wa kushindana hata kufika fainali kwenye michuano hiyo na sio kusindikiza wengine. Amepongeza uamuzi wa Serikali kuhakikisha Tanzania inaandaa michuano hiyo kwa kutoa baraka kwa TFF kuomba nafasi ya kuandaa Afcon kwa kushirikiana na Kenya na Uganda na kwamba hiyo ni hatua kubwa na ya kihistoria.

Mashabiki wa Timu ya Taifa ya Tanzania, Taifa Stars wakitamba wao kuwa wazalendo kwa kuipambania timu ya Taifa hasa kwa kutoa hamasa kwa Watanzania kujitokeza kufuatilia mchezo wa leo dhidi ya Ethiopia. “Toka hasubuhi tumezunguka kwenye vyombo mbalimbali vya habari kama kikundi cha kujitolea kuhamasisha Watanzania kuja uwanjani ili kuwapa nguvu wachezaji wetu. Sisi ni wazalendo wa kweli,” amesema shabiki mmoja wapo. Mchezo huo wa kuwania kufuzu fainali za mataifa ya Afrika (AFCON) 2025 ni katika ya Taifa Stars na Ethiopia. Mchezo huo utapigwa katika Uwanja wa Benjamin Mkapa kuanzia saa 1:00 usiku na kurushwa na TBC1 na TBC Taifa. 🎤@e_j1official 🎥 @simbeyezekiel

Shabiki wa Timu ya Taifa Stars amesema timu yetu ya Taifa inahitaji uzalendo kwa kuipa nguvu bila kujali kama wanafanya vizuri au vinginevyo akisisitiza kwamba wachezaji ni kama watoto, muda wote wanahitaji kushangiliwa ili wafanye vizuri zaidi. Aidha amewataka Watanzania kujitokeza kwa wingi katika Dimba la Benjamin Mkapa kuipa sapoti Stars kwa kuishangalia mwanzo mwisho bila kuangalia matokeo itakapocheza dhidi ya Wahabeshi kutoka Ethiopia kuanza saa 1:00 jioni. Mchezo utarushwa bureeeeee na kukuijia sebuleni kwako au kibanda umiza na Shirika la Utangazaji Tanzania (TBC) kupitia redio na televisheni. 🎤 @e_j1official 🎥 @simbeyezekiel

Kuelekea mchezo wa kuwania kufuzu fainali za mataifa ya Afrika (AFCON) 2025 timu ya Taifa Stars leo watashuka dimbani kukipiga na Ethiopia katika Uwanja wa Benjamin Mkapa. Shabiki wa Taifa Stars amesema amelipia mashabiki 20 kwa ajili ya kuingia uwanjani ili kuipa nguvu timu ya Taifa dhidi ya Wahabeshi hao kutoka Ethiopia. Mchezo huo utachezwa saa 1:00 na kurushwa bure kabisa na Shirika la Utangazaji Tanzania (TBC) kupitia redio na televisheni. @e_j1official @simbeyezekiel

Mkuu wa Mkoa wa Ruvuma, Kanali Ahmed Abbas, amesema ujenzi wa Bandari ya Mbamba Bay itakayokuwa makao makuu ya bandari za Ziwa Nyasa utakapokamilika, unatarajia kuongeza ufanisi wa Bandari ya Dar es Salaam na ushoroba wa Mtwara na hivyo kuongeza fursa za ajira na kuinua uchumi wa mkoa huo na Taifa kwa ujumla. Kwa sasa, amesema kazi ya usanifu na ujenzi wa uendelezaji wa bandari hiyo iliyopo wilayani Nyasa mkoani Ruvuma inaendelea kwa gharama ya shilingi bilioni 80.

Katibu Tawala wa Mkoa wa Mara, Gerald Kusaya amehuisha taarifa zake katika Daftari la Kudumu la Mpiga Kura kwenye kituo cha uandikishaji cha Mkendo katika Manispaa ya Musoma mkoani Mara. Zoezi hilo limeanza leo Septemba 04, 2024 na linatarajiwa kukamilika Septemba 10, 2024, ambapo Kusaya amewataka wananchi wa Mara kuhakikisha wanajitokeza kujiandikisha pamoja na kuboresha taarifa zao.

Naibu Waziri wa Katiba na Sheria Jumanne Sagini ametaja adhabu mbalimbali ambazo kwa mujibu wa sheria ya makosa ya adhabu zinatolewa kwa mtu aliyetenda makosa ya ubakaji. Amesema kifungu cha 131 kifungu kidogo cha 1 cha sheria ya kanuni ya adhabu sura ya 16 kimeainisha adhabu ya makosa ya kubaka kuwa ni kifungo kisichopungua miaka 30, viboko, na mahakama inaweza kutoa amri ya kumlipa fidia muathirika wa tukio. Aidha, amesema kuwa kifungu cha 131 kifungu kidogo cha 3 cha sheria hiyo kimeainisha kuwa ikiwa muathirika wa tukio ni mtoto mwenye umri wa chini ya miaka 10 adhabu pekee iliyopo ni kifungo cha maisha jela. Naibu Waziri Sagini amesema hayo bungeni Jijini Dodoma wakati akijibu swali la Mbunge wa Viti Maalum Najma Giga aliyeuliza kama Serikali haioni haja ya kupeleka bungeni Muswada wa Sheria utakaotoa adhabu ya kifo kwa wabakaji watoto walio na umri wa chini ya miaka tisa. Naibu waziri Sagini ameongeza kuwa endapo kosa hilo la ubakaji litatekelezwa na mtoto basi atahukumiwa na mahakama kwa mujibu wa sheria ya watoto.

Timu ya Pamba Jiji FC ya Mwanza inaendelea na maandalizi ya kuwakabili Singida Black Stars Septemba 15 katika Uwanja wao wa nyumbani, CCM Kirumba ulioko jijini Mwanza. Akizungumza na TBC Digital mkoani Mwanza, Msemaji wa Pamba Jiji, Moses William amesema katika mchezo huo mashabiki wa Pamba watarajie kuona mabao mengi zaidi timu yao ikiwabugiza wapinzani na kuwataka siku ya mechi kujitokeza kwa wingi. Halikadhalika, William amesema klabu hiyo haifikirii kuachana na Kocha wao, Goran Kopunovic.

Huku Klabu ya Pamba Jiji ya Mwanza 'Wana TP Lindanda' wakiwa wamerejea Ligi Kuu ya Tanzania Bara baada ya kukaa nje kwa miaka 22, wapenzi wa klabu nyingine iliyotikisa Jiji la Mwanza, Toto Africans pia wamehamasika wakihaha ili kuona timu yao ikirejea kukiwasha na kuwapa burudani. Mgongano wa maslahi unatajwa kuwa chanzo cha kupotea kwa klabu ya Toto Africans tangu iliposhuka daraja mwaka 2015 na imekuwa ikijaribu kurudi bila mafanikio huku ukata na kukosekana kwa uongozi imara vikitajwa kuwa sababu. Mwandishi Wetu Jofrey Kobeto aliyepo jijini Mwanza amezungumza na wadau wa timu hiyo ambao wameuomba uongozi wa Mkoa Mwanza kuingilia kati suala hilo ili kurejesha timu hiyo na kuongeza burudani katika jiji hilo linaloaminika kuwa la pili kwa ukubwa nchini Tanzania baada ya Dar es Salaam. Toto Africans Football Club ilianzishwa miaka 1970 na ilikuwa ni moja ya vilabu maarufu kutoka Kanda ya Ziwa Victoria kushiriki katika Ligi ya Tanzania na kutoa mchango mkubwa katika kukuza vipaji vya soka nchini. Historia inaonesha kwamba Toto Africans ilianza kama timu ya wachezaji wa ndani wa Mwanza na polepole ilikuja kuwa klabu yenye nguvu katika soka la Tanzania. Katika miaka ya 1980 na 1990, timu hii ilijijengea jina kama moja ya timu imara katika ligi. Ingawa klabu haijashinda mataji makubwa kama baadhi ya vilabu vikubwa nchini Tanzania, ushiriki wake katika Ligi Kuu na mashindano ya kitaifa ulikuwa ukileta hamasa kubwa jijini Mwanza na Tanzania kwa ujumla na hasa ilipokuwa ikikutana Pamba. Yapo madai kwamba Toto Africans ilikuwa na uhusiano wa kijamii na kisoka na Yanga Afrika sambamba na Klabu ya African Sports ya Tanga ambayo pia kwa muda mrefu imepotea kwenye ramani ya Ligi Kuu ya Tanzania Bara.

Mchezaji wa timu ya Taifa ya soka ya Tanzania, Dickson Job amesema wao kama wachezaji wamejipanga vema na wako tayari kuikabili Ethiopia katika mchezo wa hapo kesho. "Sisi kama wachezaji tuko tayari kwa asilimia 100. Walimu wetu tayari wamekamilisha kazi yao uwanjani kwenye mazoezi, na kilichobaki ni kumuomba Mwenyezi Mungu atupe afya njema. Tunawahakikishia Watanzania kwamba tutaenda kupambana kwa ajili ya timu yetu ya Tanzania." amesema Job Taifa Stars inashuka katika dimba la Benjamin Mkapa, Dar es Salaam kesho Septemba 04, 2024 katika mchezo wake dhidi ya Ethiopia, kusaka tiketi ya kushiriki Michuano ya Kombe la Mataifa ya Afrika (AFCON) mwaka 2025.

Muswada wa Sheria ya Marekebisho ya Sheria Mbalimbali (Na. 2) wa mwaka 2024 umewasilishwa bungeni Jijini Dodoma leo Septemba 03, 2024.   Akiwasilisha Muswada huo Mwanasheria Mkuu wa Serikali Hamza Johari amesema muswada huo unapendekeza marekebisho katika Sheria kuu nane ambazo ni Sheria ya Kuzuia Usafirishaji Haramu wa Binadamu Sura ya 432, Sheria ya Mwenendo wa Mashauri ya Jinai Sura ya 20, Sheria ya Serikali Mtandao Sura ya 273, Sheria ya Uhamiaji Sura ya 54, Sheria ya Ardhi Sura ya 113, Sheria ya Bohari ya Dawa Sura ya 70, Sheria ya Viwango Sura ya 130 na Sheria ya Tume ya Mipango Sura ya 127.   Amesema miongoni mwa marekebisho yanayopendekezwa ni kurekebisha Sheria ya Kuzuia Usafirishaji Haramu wa Binadamu Sura ya 432 ili kuimarisha nyanja zote za kuzuia usafirishaji haramu wa binadamu huku Sehemu ya nne ya Muswada in kipendekeza kufanya marekebisho katika Sheria ya Serikali Mtandao Sura ya 273 ili kuweka uwiano wa adhabu na kosa lililotendeka na kuzuia watu kutenda au kujaribu kutenda kosa husika na kifungu cha 57 kinapendekezwa kurekebishwa ili kuongeza adhabu kwa kosa la kuondoa, kuharibu au kubadili data, kumbukumbu za kielektroniki, mifumo au vifaa vya kielektroniki.   Sehemu ya tano ya Muswada huo inapendekeza kufanya marekebisho katika Sheria ya Uhamiaji, Sura ya 54 Ili kuondoa mapungufu yaliyojitokeza wakati wa utekelezaji wa sheria, vilevile inapendekezwa kurekebishwa kwa ajili ya kuweka masharti yanayohusu hadhi maalum kwa raia wa nchi nyingine mwenye asili ya Tanzania pamoja na marekebisho katika  kifungu cha 20 ambacho kinaweka masharti kuhusu utaratibu wa kuchukua maelezo ya mtu anayeshukiwa.   Bunge litaendelea kujadili muswada huo kisha kusomwa kwa mara ya  tatu kabla ya kupitishwa.

Mbunge wa Jimbo la Kigamboni Dkt. Faustine Ndugulile kwa mara ya kwanza tangu achaguliwe kuwa Mkurugenzi wa Shirika la Afya Duniani (WHO) Kanda ya Afrika amewashukuru Watanzania wote mbele ya Bunge linaloendelea na vikao vyake Jijini Dodoma kwa kumuunga mkono katika mchakato mzima wa uchaguzi hadi kuibuka mshindi katika nafasi hiyo.   Dkt. Ndugulile amechaguliwa kuwa Mkurugenzi wa Shirika la Afya Duniani Kanda ya Afrika katika mkutano wa 74 wa Kamati ya Shirika la Afya Duniani Kanda ya Afrika uliyofanyika Congo- Brazzaville Agosti 27, 2024 na kuwashinda wagombea wengine kutoka Niger na Senegal.

Naibu Waziri wa Nishati Judith Kapinga ametoa ufafanuzi bungeni Jijini Dodoma kuhusu utaratibu unaotumiwa na Serikali kuwalipa fidia watu wanaoathiriwa na majanga yanayotokana na hitilafu za umeme.   Amesema Serikali kupitia taasisi zilizo chini ya Mamlaka ya Udhibiti wa Huduma za Nishati na Maji (EWURA) hufanya uchunguzi ili kujiridhisha kama madhara yaliyotokea yamesababishwa na mifumo ya taasisi zake na inapobainika ni kweli, mwananchi anaweza kulipwa fidia kwa kufuata taratibu za kisheria.   Naibu Waziri Judith Kapinga ametoa ufafanuzi huo alipokuwa akijibu swali la Mbunge wa Viti Maalum, Anatropia Lwehikila aliyeuliza kuhusu utaratibu unaotumika kuwalipa fidia watu wanaopata majanga yanayosababishwa na hitilafu za umeme.

Mafunzo kwa Shirikisho la Askari wa Kike na wasimamizi wa sheria duniani yanaendelea katika Jiji la Chicago, Marekani kwa kushirikisha nchi mbalimbali ikiwemo Tanzania. Akizungumza wakati wa mafunzo hayo, Naibu Kamishna wa Uhamiaji kutoka Tanzania DCI Tatu Burhan amesema mafunzo waliyopatiwa yamejikita katika masuala ya ushirikiano wa kimataifa na utatuzi wa changamoto za wahamiaji wanaoingia katika mataifa mbalimbali na namna bora ya kutatua changamoto hizo. Amesema mafunzo hayo yamewapa mwanga wa namna bora ya kukabiliana changamoto za wahamiaji ambao wamekuwa wakiingia katika nchi mbalimbali kwa lengo la makazi huku akiweka wazi kuwa suala la wahamiaji ni mtambuka. Kwa upande wake Ronald Vitiello ambaye ni Mkufunzi Kutoka Wizara ya Huduma za Binadamu katika Jiji la Chicago akitoa mada kuhusu mipaka na wahamiaji amesema ni muhimu kwa washiriki wa mafunzo hayo kubadilishana uzoefu wa namna ya kukabiliana na wahamiaji. Mafunzo hayo yanaendelea huku mada mbalimbali zikiwasilishwa ili kuwajengea uwezo wa kiutendaji washiriki hao ambao ni kutoka nchi 64 duniani.

Usikose Wekeza Tanzania wiki hii. Ni Jumanne saa 12:00 jioni na marudio ni Jumatano saa 7:30 mchana TBC1 na katika channel ya YouTube ya TBConline. Wiki hii tupo na Mkurugenzi wa Uhamasishaji Uwekezaji kutoka Kituo cha Uwekezaji Tanzania (TIC), akielezea fursa mpya kwa wawekezaji wa ndani.