21/07/2022
Wasiirka Arrimaha Dibedda Raashiya oo booqan doona Masar, Ethiopia iyo dalal kale
Wasiirka Arrimaha Dibedda ee dalka Raashiya, Sergey Viktorovich Lavrov ayaa la filayaa inuu Isbuuca soo socdo Socdaal Rasmi ah ku soo maro dhowr Waddan oo ku yaalla Qaaraddan Afrika.
Ilo-wareedyo la hadlay Wargeyska Al-Sharq Bloomberg ayaa sheegay in Wasiir Lavrov ay booqashada u bilaaban doonto maalinta Axadda ee soo socota, kuna beegan bishan July 24-da.
Lugtiisa Koowaad waxa uu maalinta Axadda ku tegi doonaa Caasimadda dalka Masar ee Qaahira, isagoo la kulmi doona dhigiisa dalkaasi iyo tiro Saraakiil kale.
Wargeyska Al-Sharq Bloomberg oo soo xigtay Ilo-wareed aan la shaacinin ayaa qoray inuu Wasiirka Arrimaha Dibedda Raashiya qorsheynayo inuu la kulmo Xoghayaha Guud ee Ururka Jaamacadda Carabta, Ahmed Aboul Gheit iyo tiro ka mid ah Ergooyinka dalalka xubnaha ka ah Ururka Jaamacadda Carabta.
Dhinaca kale, Safarka Wasiirka Arrimaha Dibedda ee dalka Raashiya, Sergey Viktorovich Lavrov oo qaadan doonaa muddo 4 maalmood ah (July 24-da ilaa 28-da), waxa u qorsheysan inuu Socdaal ku soo kala bixiyo dalalka Masar, Ethiopia, Uganda iyo Jamhuuriyada Kongo.
Si kastaba ha ahaatee, Socadalka Sergei Lavrov waxa uu ku soo beegmay hal isbuuc kadib, markii uu Madaxweynaha Maraykanka, Joe Biden booqday Israel iyo Sacuudiga, kana qeyb galay Shir Isbahaysi oo ka dhacay magaalladda Jeddah.
Joe Biden waxa uu Shirka uu la yeeshay Madaxda dalalka xubnaha ka ah Golaha Iskaashiga Carbeed ee GCC iyo Madaxda dalalka Masar, Urdun iyo Iraq ka sheegay inaysan Dowladda Maraykanka baylihin doonin Marnaanshaha dalalka Bariga Dhexe, si aysan dalalka Raashiya, Shiinaha iyo Iran galangal ugu helin Arrimaha Bariga Dhexe.
Media
