28/03/2022
کرک(شعبہ تعلقات عامہ) مجرم اگر نہ بولے تو جرم بولتا ہے۔ سٹی پولیس نے دونوں پاؤں سے معذور درزی کی دکان کا صفایا کرنے والے نامعلوم ملزمان کو ٹریس کرکے گرفتار کر لیا۔ چوروں سے پولیس نے چوری کا سارا سامان برآمد کر لیا۔ تھانہ کرک سٹی کے علاقے تبلیغی مرکز کرک کے رہائشی محمد فیاض جو کہ دونوں پاؤں سے معذور ہے جس کی دوکان کو نامعلوم ملزمان نے رات کی تاریکی میں تالے توڑ کر صفایا کر دیا تھا اور اس کے ساتھ قریبی دوسرے درزی طفیل کی دکان سے بھی سامان لے کر چوری کیا تھا۔ معذور درزی کی فریاد سن کر تھانہ سٹی پولیس نے فوری مقدمہ درج کرلیا۔ جس پر ڈی پی او کرک شفیع اللہ خان گنڈا پور نے ایس ایچ او سٹی کو نامعلوم چور کی گرفتاری کا ٹاسک حوالہ کیا۔ تھانہ کرک سٹی کے عوام دوست ایس ایچ او قسمت خان نے خفیہ خبر رساں اہلکاروں کی معاونت سے جدید تکنیکی بنیادوں اور سائنسی خطوط کی مدد سے رات کی تاریکی میں درزیوں کے دوکانوں کا صفایا کرنے والے نا معلوم چوروں کو ٹریس کرکے دو چوروں سعید اللہ عرف تور ولد گلاپ خان خان سکنہ کندہ کرک اور رضاء اللہ ولد مخی الدین سکنہ مرکز کورونہ کو گرفتار کر لیا۔ پولیس نے چوروں سے چوری ہونے والے دو سلائی مشین، ایک بیٹری، ایک چارجر ایک انورٹر اور تقریبا 110000 روپے مالیت کے کپڑے جبکہ درزی طفیل دوکان سے بھی تقریبا 140000 مالیت کے چوری ہونے والے کپڑے بھی برآمد کر لئے۔ چوروں کی گرفتاری پر معذور درزی فیاض نے سٹی پولیس اور بالخصوص ڈی پی او کرک شفیع اللہ خان گنڈا پور اور ایس ایچ او قسمت خان کا شکریہ ادا کرکے کہا کہ میں اور میرا پورا خاندان پولیس کے مشکور ہیں جنہوں نے ہمارے مجرموں کو پکڑا اور ہمارے روزگار کے ذریعے کو بچا لیا۔ اس حوالے سے ایس ایچ او قسمت خان کا کہنا تھا کہ معذور افراد کیساتھ میرا دلی لگاؤ ہے اور سرکاری فرائض سے ہٹ کر میری ہمدردیاں اور تعاون بھی ان حصوصی افراد کیساتھ ہیں۔