Издавачка куќа и фондација Македонија Презент

20/09/2024

„Оваа несреќа да се биде изгубен“ е нова збирка раскази и песни од наградуваната Нишнаабег раскажувачка и писателка Лиен Бетасамосак Симпсон. Овие визионерски дела ја надградуваат моќната употреба на фрагментот како алатка за интервенција, што Симпсон ја воведе во нејзината критички прифатена збирка „Острови на деколонијалната љубов“.

Една врана го набљудува еленот кој е зависен од солта на патиштата; Езерото Онтарио го поплавува Торонто за да го преобрази светот додека испраќа порака „ДАЛИ ГО РАЗБИРААТ?“; љубовници го посетуваат последниот преостанат агол од боровата шума; три другарки тајно собираат сок од јавор во богато соседство; а Кве добива лиценца за огнено оружје во руралниот дел на Онтарио.
Спојувајќи елементи од Нишнаабег раскажувањето, научната фантастика, современиот реализам и лирскиот глас, „Оваа несреќа да се биде изгубен“ гори со тивка интензивност, како логорски оган во вашата градина, предизвикувајќи ве да го преиспитате светот што мислевте дека го познавате.

08/11/2023

Промоција на стихозбирката „Мелодија на платно“ од Ице Беличев

„Мелодија на платно“ е уметничка слика која наместо со бои, е насликана со зборови, стихови, строфи и секако раскош од емоции кои градат поетски опус од четириесет песни во кои се среќаваат најразлични теми и мотиви.

📍Место: хотел „Сириус“ Струмица (конгресна сала)
09.11.2023 год. (четврток) 20:00 часот
Промотор: проф. д-р Ана Витанова - Рингачева

23/08/2023

Сѐ она што ќе проникне од човекот и е плод на неговата креација доуредена со емоции и поривни изливи, е всушност уметност која може да биде сеопфатна и да достигне до широките народни маси, во зависност од сферата во која креира и твори.
Нотите, боите, зборот, ритамот, се само некои од елементите од кои може да проникнат најразлични уметнички творби.
„Мелодија на платно“ е уметничка слика која наместо со бои, е насликана со зборови, стихови, строфи и секако раскош од емоции кои градат поетски опус од четириесет песни во кои се среќаваат најразлични теми и мотиви. Љубовта, како основна инспирација речиси на сите поети, е можеби и најзастапена, но секако не изостануваат и теми од човековото секојдневие, општеството, социјалниот живот, носталгијата, а и визијата, зачинети со доволна доза на стилски изразни средства, секако се застапени во голем број стихови и се провлекуваат низ целата стихозбирка.
Сите песни спакувани во „Мелодија на платно“ во себе кријат некоја порака и се пишувани на едноставен и разбирлив стил, како би биле поблиски до читателот и полесни за разбирање. Особено се истакнуваат архаизмите и неологизмите, кои како вид зборови даваат некоја поинаква димензија на песните оставајќи впечатливост во ­самите нив.

Авторот

25/04/2023

🇨🇦 Нов канадски БЕСТСЕЛЕР!

Кени, Луси, Хауи, Мејзи и Клара.
Пет деца оттргнати од своите семејства. Поранешни ученици во Мисионерското училиште.
Раштркани низ запуштените и валкани улици во источниот кварт на Ванкувер. Прогонувани од трагите на минатото. Со избричени глави. Обесчестени тела. Но, засекогаш поврзани со заедничките спомени и носталгични погледи. Тие бараат утеха и надеж.

Пет мали Индијанци. Секој во потрага по својот дом...

За својот дебитантски роман „Пет мали Индијанци“, авторката Мишел Гуд, во 2020 година ја добива престижната „Гувернерова награда“ за книжевна фикција. Веднаш по своето објавување, ова дело станува вистинска книжевна сензација и освојува бројни награди и признанија.
Со многу сочувство и проникливост „Пет мали Индијанци“ ја прикажува неизвесната потрага и борба на петте Индијанци да се помират со своето минато, обидувајќи се да го пронајдат своето место во светот...

Посебна благодарност до Canada Council for the Arts | Conseil des arts du Canada 🇨🇦 за поддршката при објавување на ова издание.

18/06/2022

30/05/2022

Поетската книга „Живот под ѕвездите“ содржи вкупно 53 песни, поделени во двата циклуса: „Урбанки“ и „Наивки“. Станува збор за урбана, сигналистичка поезија, која е специфична и оригинална и според тематско-мотивската носивост и содржина, но и според необичниот графички и визуелен изглед на песните.
Читајте македонска поезија...

30/05/2022

Триод, триади...

17/04/2022

Избраните песни од книгата „Камени јавачи“ од познатиот црногорски поет Новица Ѓуриќ како да се хаику, затоа што се толку многу концизни, јадровити и лапидарни, но и како да се тестаменти затоа што постојано потсетуваат, опоменуваат и подучуваат.
Во нив како да е собран цел еден човечки живот, но и сето минато (обичаите, историјата и традициите) од една страна, а секојдневието (брзањето, грешките и навиките) од друга страна.
Мислата на Ѓуриќ е прецизна и јасна, темите и мотивите - многубројни и катадневни, а стилот сликовит, специфичен и оригинален.
Овие песни говорат за зрелоста и искуството, добрината и искреноста, творбеноста и креативноста, неповторливоста и доживеаноста, уметноста и убавината!

Христо Петрески

29/10/2021

Во книгата „Богомолка“, Владимир Плавевски, автор на збирките раскази: „Играч на фанта“, „Амкање“, „Ловец на самовили“, „Поплава“, „Вистински раскази“, кога се има предвид неговата творечка легитимација во областа на литературата, се поклопува со неподелената констатација на книжевните теоретичари дека кратката раскажувачка форма, всушност, е единствената вистинска можност за проверка на творечките дострели на сите што се зафаќаат со прозниот исказ.
Од првиот до последниот расказ, од првата до последната страница на книгата речиси и да нема место што не го надополнува наративното јадро во кое проблемите од ефемерниот свет на нашето секојдневие се набљудуваат преку визурата на сериозно-сатирично-комичен поглед.

Христо Петрески

29/10/2021

БОГОВИ НА КЛАДА

На моите претци
Дедовци,
Прадедовци,
Животот е како отров
Времето застана,
Облаците се исти.
Ордите на Хуните
На Газни и Гора
Ни ги вадат очите
И ги садат во пустината!
Едното око ни е црно,
Другото ни е сино.
Дваесет дена и ноќи
Нашите Богови горат на клада.
Горат, но не може да изгорат!
Тоа, претци мои,
го доживеавте во Бухенвалд:
од телото ви ја одраа кожата!
Телото се истегнува
И нова кожа ви расте.
И во Аушвиц:
Ве ставаат во печка,
А вие низ оџакот
Стигнувате во Божјата куќа!
Но, што ќе правиме сега?
Нема веќе ни res extense, ни res cogitans.
(Декарт веќе не е во мода!)
Божјата куќа е срушена!
Каде е нашето место под сонцето?

Скопје, 2017.

29/10/2021

Има ли

Има ли,
има ли,
има ли
бел ден за мене?
Има ли,
има ли,
има ли
цвет што не вене?

Толку ли беа
песните,
песните мамо,
старите?
Толку ли беа
игрите
игрите и
другарите?

Има ли,
има ли,
има ли
бел ден за мене?
Има ли,
има ли,
има ли
цвет што не вене?

07/10/2021

Фестивал на филмски сценарија „Скрипт фест 2021“

Фестивалот започна во месец јануари со распишувањето на Конкурсот за филмски сценарија, на кој се јавија поголем број автори од земјава и странство и тоа со сценарија за филмови во речиси сите категории (кратки, играни, документарни, анимирани, експериментални...)
Од сите пристигнати сценарија беа избрани најдобрите сценарија од следниве автори и тоа: Владо Јаневски е награден за филмското сценарио за долгометражен игран филм „Под друга капа“; Васил Михаил наградата Скрипт фест ја добива за трите сценарија за краток филм : „Кујна“, „Паркинг“ и „My god, it’s full of stars“, а Гоце Ристовски е награден за сценариото за игран филм „Гола вода“ и сценариото за краткометражен игран филм „Кардинална грешка“.
Сите три награди се рамноправни и се доделуваат за најдобри сценарија пристигнати на Конкурсот за филмски сценарија на Фестивалот Скрипт фест 2021 година, а делови од наградените филмски сценарија се објавени во електронска форма и се достапни на следниот линк: www.macedoniapresent.mk во рубриката СКРИПТ ФЕСТ.
Фестивалот Скрипт фест оваа година се одржа со поддршка на Програмата за култура при Собранието на Град Скопје, за што сме бескрајно благодарни и сме уверени дека оваа наша добра соработка ќе продолжи и во иднина.

22/09/2021

ТИШИНА

Ја силувам тишината
низ сите мои пори и отвори,
а таа како оперска певица,
како куртизана и девица вреска и се опира,
и на кожата ми остава печат како вистински да ме допира.

Толку многу нешта што нема да ги речам,
толку многу зборови што да излезат
во прстиве ќе ги спречам,
а сакам од длабокото да вреснам,
сакам се од ред до ред во лице да ти кажам,
товар да си олеснам,
ама за сега како на божем
мудро ќе се стишам
и за сите тишини во тефтеров ќе ти напишам.
Бујрум ако смееш
прочитај ја тишината!!!

16/09/2021

ЛЕБ И МЛЕКО

Жарта пулсира во чадната пепел.

Го отклучив подрумот на мојот маг,
исчекорија звуци од цртежи.

Снегот се бранува на црно небо.

Во шумот на шамановиот звучник –
ненапишани воени сонети;

Песокта капе долж стаклено време.

Топли оброци и топла облека
ми се построени шир аватарот.

Ветрот воздивнува - килерот дише.

„Ајде, меѓусебно со леб да си
ја нахраниме плотта, и со млеко!“ –
трите гласа им се обратија на
четирите овоземски состојби,
а тие се согласија молкома.

30/06/2021

РАЗБУДИ СЕ

десет совети

Разбуди се отвори ги очите
Подај го срцето разбуди се
Колку си помал толку си поголем
Слези од планината во полето
Птиците и коњите нека јадат од твоите раце
Без исплашени да побегнат и помислат да летнат
Гази во тињата за да стигнеш на врвот
Калта на стапалата ти го бележи одот
И лизгањето ти го прави чекорот посигурен
На патот стрмен лажен и несигурен!

Христо Петрески
ОБРАТНА (филозофијата на полжавот)

07/04/2021

Поетската книга „Валцер на судбината“ од Анетка Ангелова е испишана со исповеден, лирски и раскажувачки набој и стил. Повеќето песни се создадени и спеани во наративен дискурс, а дел од творбите се пократки, поконцизни и лирски.
Во сите нив, авторката проговорува за љубовта, лузните, балканската жена и други теми и мотиви. Основен сподвижник е љубовта, а песните се како нурнувања во меморијата, распластување на сеќавањата и коментари за неменливото.
Со растреперен, искрен и доживеан поетски глас, авторката става акцент на својата биографија, животниот хронопис, судбинските нишки, семејната лоза и неизвесното и непредвидливо секојдневие.
Овие стихови треба внимателно и постепено да се читаат и восприемаат, зашто се натопени со тага, болка и емоции!
Х. П.

07/04/2021

Прозната книга „Длабоки сеќавања“ од Сузана Ѓорушевска е остварување со раскази во кое авторката главно потсетува на своите животни врвици, осврнувајќи се најчесто на секојдневието и на сопствените (нај)длабоки сеќавања.
Но, тука се и (рас)кажувањата од други лица и нивните лични судбини, кои ги регистрирала авторката на оваа книга и потоа била не само нивни запишувач, туку на одреден начин и нивен соучесник, па и носител и страдалник.
Во оваа книга има повеќе тага отколку радост, а меѓу другите теми и мотиви овде се говори и за: судбинското писмо, запленетата љубов, згрутчената тага на срцето, вистината, правдата, мајката...
Животот е полн со искушенија, турбуленции и фази, пресврти, па оваа книга претставува едно мало сведоштво за повеќе животни стории и тајни, кои се искрени, доживеани и впечатливи, па треба да се прочитаат, осознаат и запомнат!
Х. П.

05/10/2020

Со овој прозен запис авторот на специфичен начин нè втурнува во читањето на необични страници во магичниот неореализам за херменевтските прашања, кои суштествуваат во секое живо суштество. Темите и мотивите за основата и постулатот на неговото физичко егзистирање во сиот бескраен космос, како основа за постанокот и опстанокот во светската цивилизација, низ сите векови, во сферите на светската екумена.

Или, сево ова е Шекспировски предизвик „да се биде или не – прашање е сега!?“, односно на Његошевскиот антипод „да биде тоа – што не може да биде...“, т.е. врз дискурсот на патот на духот низ битието како космогониско откровение и озарение на творечкиот трансмисионен простор за влез во длабоките рефлексивни структури на романот, како што истакнува авторот.
проф. д-р Христо Петрески

03/10/2020

Последната поетска книга од македонскиот поет и прозаист Петко Шипинкаровски, „Обденица“, објавена постхумно, по неговата ненадејна и прерана смрт, истовремено и буди, и смирува и обеспокојува.
Таа е тестаментална, како глас – аманет упатен кон современиците, но и идните поколенија.
Тоа се стихови кои укажуваат и опоменуваат, а се однесуваат на нашата Татковина и Мајковина.
Како што знаменитиот писател и научник Блаже Конески убаво и трајно подвлече дека Јазикот е нашата единствена Татковина, така и авторот Петко Шипинкаровски јасно и гласно констатира: Татковино, песно моја!
Шипинкаровски се обраќа на реалниот, но и претпоставен (имагинарен) читател, со зборови на указ, укор, болка, јад, чемер, но и радост поради убавината, земјата, Езерото, писмото, животот...

29/07/2020

Излезе од печат првиот двоброј на новото книжевно списание „Пергамент“ во издание на издавачката куќа и фондација Македонија Презент како дел од проектот „Млади македонски писатели“ во кое се објавени и дел од творбите пристигнати на првиот конкурс за објавување книга во едицијата „Прва книга“.

27/07/2020

Со проектот 🇲🇰„Млади македонски писатели“ и едицијата „Прва книга“, Македонија Презент ви ја претставува книгата „Белези“ од младиот и надежен автор Мирослав Трајковски кој постојано трага по тајните и пре­дизвиците на животот и љубовта, испишувајќи инспиративни и вредни страници.
Неговите стихови и лирски записи се метафорични, сликовити, искрени, доживеани, лапидарни. Како на пример: „се вовлеков во снегови од хартија; да сум лед во топли денови; или - нежен, убав, задлабочен“.
Трајковски истражува низ малите градини во своето срце и негови опсесивни теми се љубовта, животот, смислата, надежта, иднината.
Ракопис што ветува и обврзува, автор кој веруваме и се надеваме - уште со својата следна книга ќе се зацврсти, ќе се етаблира и ќе си го пронајде и заземе своето место во севкупната, а не само во новата, свежа, полетна, млада, современа и актуелна македонска литература.

проф. д-р Христо Петрески

26/07/2020

Ни претставува посебно задоволство да ви ги претставиме четирите броја на новото списание Селект во издание на издавачката куќа и фондација Македонија презент:

1. Во потрага по убавата песна (Антологија на поезија од македонски автори во странство)
2. Почесен круг (Антологија на современиот македонски афоризам)
3. Распнат човек (Антологија на современа македонска хаику поезија)
4. Скопјани - за навек (Антологија на посветени песни)

17/06/2020

„Јазикот на светлината“, издание на „Македонија презент“, е насловот на новата, шеста поетска книга на Сузана В. Спасовска, за кој авторката неодамна ja доби и наградата „Антев златник“ на меѓународната поетска манифестација „Антево перо“. Во рецензијата за стихозбирката, писателот Венко Андоновски истакнува дека се работи за пообемен ракопис со повеќе циклуси, кои покажуваат дека поетесата има повеќе тематско-мотивски опсесии. -Но, во сите тие мотиви, едно нешто е секогаш исто: проблесокот, зенот, сознанието… Поезијата на Сузана В. Спасовска во оваа стихозбирка, главно посветена на светлината, сепак, ја сведува таа светлина на десетици разни еманации: на цвет, школка, вода, љубов, сонце… На дело е една поетска синтакса на светлината, превод на светлината во навидум неслични на неа нешта, и што е најважно, зад секоја песна се крие најважното својство на секој голем поет: крикот. Тие неми крикови, тие навистина стилски беспрекорни песни од оваа стихозбирка, убеден сум, стануваат мера за нашата современа поезија…, напиша Андоновски во рецензијата. Сузана В. Спасовска (1972) дипломирала и магистрирала на Филолошкиот факултет „Блаже Конески“ и подготвува докторат од областа на орфизмот и поезијата. Од 1996 ги објавила поетските книги: „И љубов и заговор“, „Смртно писмо“, „Божествена жена“, „Низ темјанот, еден лилјан“, „Пеперутка од пепел“, како и „Смртно писмо“ објавена и како е-книга. Нејзини песни се објавени и во антологиските избори на современата македонска поезија. Работи и како лектор и пишува и објавува книжевно-теориски текстови во периодиката.

11/01/2020

Првиот број на списанието „Книжевна Академија“ е објавен во 2003 година.
„Книжевна Академија“ е меѓународно научно списание за трајни вредности. Списанието е мултијазично и во него се објавуваат само оригинални научни трудови кои претходно не се публикувани.

08/01/2020

Култната книга „Времето на козите“ преведена на руски јазик.

08/01/2020

Во јануари 1952, двајца млади мажи од Буенос Аирес тргнуваат да ја крстарат Јужна Америка на мотор "Ла Пондероса", моќен 500цц Нортон. Еден од нив е дваесет и три годишниот Ернесто Че Гевара.

Овие дневници на Че, се напишани осум години пред Куба­нската револуција, исполнети со авантури и откритија, големи драми, но и мал хумор и импровизации. За време на неговите патувања низ Аргентина, Чиле, Перу и Венецуела, главните грижи на Че се бедата и сиромаштијата, но и секојдневната грижа каде да преноќат, со што да се прехранат и како да го продолжат далечниот и неизвесен пат.

Десет години подоцна целиот свет ќе го знае неговото име. Неговото патување можеби беше животна авантура, но дали не се претвори неговиот живот во многу поголема авантура!?

„Латино американски Џејмс Дин или Џек Керуак“
Washington Post

„Дневниците ја откриваат хуманата страна на Че, која историчарите вешто ја потиснаа“
Financial Times

05/01/2020

„Во екот на изборната кампања, еден познат политичар им се обраќа на граѓаните со следните зборови:- Слушајте ги ветувањата на партиите и запишувајте ги, или паметете што сè ќе ви велат. Ќе бидат тоа најубавите бајки кои, за жал, никогаш нема да се остварат...“

05/01/2020

Книжевното дело „Врутоци“ на македонскиот поет Мито Спасовски е химна и ода на роднокрајните рефрени, вивисекција на изминатиот пат, парадигма за татковството и татковинството.

05/01/2020

Темата со наслов Меѓународните институции како афирматори на културата и на културното наследство понуди богат и инспиративен материјал за истражување, што претставува податливо поле за културолошки проследувања на современите културнотворечки процеси во градењето на глобалните вредности актуелни за нашево време.