Nera Hodeta

09/09/2024

ಬೆಳವಡಿ ಸಂಸ್ಥಾನದ ಇತಿಹಾಸ

08/09/2024

ಮನೆ ಗಣೇಶ-2024

Send a message to learn more

05/09/2024

ಬೆಳಕಿನ ಆಕರ-ಪ್ರಭಾಕರ

ನಮಸ್ಕಾರ ವೀಕ್ಷಕರೆ
ನಾನು ರಾಜು ಉಸ್ತಾದ್
"ನೇರ ಹೊಡೆತ" ಹೆಸರಿನ
ಸಮೂಹ ಜಾಲತಾಣಕ್ಕೆ ನಿಮಗೆ ಸ್ವಾಗತ.

ಇದು ಕೆಎಲ್ ಇ ಅಷ್ಟಮ ಋಷಿ ಡಾ. ಪ್ರಭಾಕರ ಕೋರೆ ಕುರಿತು ಯಾರು, ಏನು ಹೇಳಿದರು? ಎನ್ನುವ ಸರಣಿಯ ನಾಲ್ಕನೇ ಕಂತು.

ಡಾ. ಪ್ರಭಾಕರ ಕೋರೆ ಅವರ ಕ್ರಿಯಾಶಕ್ತಿ ಅನನ್ಯ ಮತ್ತು ಅದ್ಭುತ. ಇವರು ತಮ್ಮ ಜೀವನದ ಮಹತ್ವದ 40 ವರ್ಷಗಳನ್ನು ಕೆಎಲ್ ಇ ಸಂಸ್ಥೆಗೆ ನೀಡಿ ಮನುಕುಲದ ಉದ್ಧಾರಕ್ಕೆ ಮಾಡಿರುವ ಸ್ಮರಣೀಯ ಕೆಲಸ-ಕಾರ್ಯಗಳ ಮೇಲೆ ರಾಣಿ ಚೆನ್ನಮ್ಮ ವಿಶ್ವವಿದ್ಯಾಲಯದ ಹಾಲಿ ಉಪಕುಲಪತಿ ಡಾ. ಸಿ.ಎಂ. ತ್ಯಾಗರಾಜ್ ಮತ್ತು ನಿವೃತ್ತ ಪ್ರಾದೇಶಿಕ ಆಯುಕ್ತ ಎಂ.ಜಿ. ಹಿರೇಮಠ ಅವರು ಬೆಳಕು ಚೆಲ್ಲಿದ್ದಾರೆ.

ಡಾ. ಪ್ರಭಾಕರ ಕೋರೆ ಅವರು ಕಳೆದ 40 ವರ್ಷಗಳಿಂದ ಕೆಎಲ್ ಇ ಕಾರ್ಯಾಧ್ಯಕ್ಷ ಹುದ್ದೆಯನ್ನು ಅವಿಶ್ರಾಂತವಾಗಿ ನಿಭಾಯಿಸುತ್ತ ಬಂದಿರುವುದರ ಖುಷಿಗೆ ಅವರ ಅಭಿಮಾನಿಗಳು ಜೂನ್ 8, 2024 ರಂದು ಬೆಳಗಾವಿ ನೆಹರುನಗರದ ಕನ್ನಡ ಭವನದಲ್ಲಿ ಆಯೋಜಿಸಿದ್ದ ಅಭಿನಂದನ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದ ಇವರು, ಕೋರೆ ಗಟ್ಟಿ ವ್ಯಕ್ತಿತ್ವ ಮತ್ತು ಅವರ ಘನಕಾರ್ಯಗಳ ಬಗ್ಗೆ ತಿಳಿಸಿದ್ದಾರೆ.

ಬನ್ನಿ ಅವರ ಮಾತುಗಳನ್ನು ಕೇಳೋಣ.

ಮೊದಲಿಗೆ ಡಾ. ಸಿ.ಎಂ. ತ್ಯಾಗರಾಜ್.

ಎರಡನೆಯದ್ದಾಗಿ ಎಂ.ಜಿ. ಹಿರೇಮಠ.

01/09/2024

ಕೋರೆ ಕುರಿತು ಕಿವಿ ಅರಳಿಸುವ ಮಾತು

ನಮಸ್ಕಾರ ವೀಕ್ಷಕರೆ
ನಾನು ರಾಜು ಉಸ್ತಾದ್
"ನೇರ ಹೊಡೆತ" ಹೆಸರಿನ
ಸಮೂಹ ಜಾಲತಾಣಕ್ಕೆ ನಿಮಗೆ ಸ್ವಾಗತ.

ಇದು "ಕೆಎಲ್ ಇ ಅಷ್ಟಮ ಋಷಿ ಡಾ. ಪ್ರಭಾಕರ ಕೋರೆ ಕುರಿತು ಯಾರು, ಏನು ಹೇಳಿದರು? ಎನ್ನುವ ಸರಣಿಯ ಮೂರನೇ ಕಂತು.

ಅಭಿವೃದ್ಧಿಯ ಜತೆಗೆ ಸಾಮಾಜಿಕ ಮತ್ತು ಸಾಂಸ್ಕೃತಿಕವಾಗಿ, ಡಾ. ಪ್ರಭಾಕರ ಕೋರೆ ಅವರ ಕೊಡುಗೆ ದೊಡ್ಡದಿದೆ. ಅದನ್ನು ಗುರುತಿಸಿ ಅನುಭೂತಿ ಪಡೆಯಬೇಕಿದೆಯಷ್ಟೆ.
ಕೆಎಲ್ ಇ ಕಾರ್ಯಾಧ್ಯಕ್ಷ ಹುದ್ದೆಯನ್ನು ಕಳೆದ 40 ವರ್ಷಗಳಿಂದ ಡಾ. ಪ್ರಭಾಕರ ಕೋರೆ ಅವರು, ಅವಿಶ್ರಾಂತ ಮತ್ತು ಯಶಸ್ವಿಯಾಗಿ ನಿಭಾಯಿಸುತ್ತ ಬಂದಿರುವುದರ ಖುಷಿಗೆ ಅವರ ಅಭಿಮಾನಿಗಳು ಬೆಳಗಾವಿ ನೆಹರುನಗರದ ಕನ್ನಡ ಭವನದಲ್ಲಿ ಜೂನ್ 8, 2024 ರಂದು ಆಯೋಜಿಸಿದ್ದ ಅಭಿನಂದನ ಸಮಾರಂಭದಲ್ಲಿ ಗಣ್ಯರು ಮತ್ತು ಚಿಂತಕರು ಇಂತಹ ಅನುಭೂತಿಯ ಮಾತುಗಳನ್ನು ಆಡಿದ್ದಾರೆ. ಡಾ. ಪ್ರಭಾಕರ ಕೋರೆ ಅವರ ಜೀವನ ಮತ್ತು ಸಾಮಾಜಿಕ ಕೊಡುಗೆಗಳ ಮೇಲೆ ಬೆಳಕು ಚೆಲ್ಲಿದ್ದಾರೆ. ಬನ್ನಿ ಅವರ ಮಾತುಗಳನ್ನು ಕೇಳೋಣ...

ಮೊದಲನೆಯದ್ದಾಗಿ ಖ್ಯಾತ ಸಾಹಿತಿ ಮತ್ತು ಚಿಂತಕ ಡಾ. ವಿ.ಎಸ್. ಮಾಳಿ ಅವರ ಮಾತು.

ಈಗ ಹ್ಯಾಂಡ್ ವೊವ್ಹರ್ ಟು ಡಾ. ವಿ.ಎಸ್. ಮಾಳಿ...

ಎರಡನೆಯದ್ದಾಗಿ ಶರಣೆ ಮತ್ತು ಸಾಮಾಜಿಕ ಕಾರ್ಯಕರ್ತೆ ಡಾ. ಗುರುದೇವಿ ಹುಲೆಪ್ಪನವರಮಠ ಅವರ ಮಾತು...

30/08/2024

ಕೋರೆ ಕುರಿತು ಕಿವಿ ಅರಳಿಸುವ ಮಾತು

ನಮಸ್ಕಾರ ವೀಕ್ಷಕರೆ
ನಾನು ರಾಜು ಉಸ್ತಾದ್
"ನೇರ ಹೊಡೆತ" ಹೆಸರಿನ
ಸಮೂಹ ಜಾಲತಾಣಕ್ಕೆ ನಿಮಗೆ ಸ್ವಾಗತ.

ಇದು "ಕೆಎಲ್ ಇ ಅಷ್ಟಮ ಋಷಿ ಡಾ. ಪ್ರಭಾಕರ ಕೋರೆ ಕುರಿತು ಯಾರು, ಏನು ಹೇಳಿದರು? ಎನ್ನುವ ಸರಣಿಯ ಎರಡನೇ ಕಂತು.

"ಅಭಿವೃದ್ಧಿ" ಡಾ. ಪ್ರಭಾಕರ ಕೋರೆ ಅವರ ಬೀಜಮಂತ್ರ. ಅದು ಹಳ್ಳಿಯದ್ದಿರಬಹುದು, ದಿಲ್ಲಿಯದ್ದಿರಬಹುದು. ರಾಜ್ಯದ್ದಿರಬಹುದು ಇಲ್ಲವೆ ರಾಷ್ಟ್ರದ್ದಿರಬಹುದು. ಅದರಲ್ಲೂ ಉತ್ತರ ಕರ್ನಾಟಕವೆಂದರೆ ಅವರಿಗೆ ಬಲು ಪ್ರೀತಿ. ಒಟ್ಟಾರೆ ತಾಯ್ನೆಲದಲ್ಲಾಗುವ ಅಭಿವೃದ್ಧಿ ಕಾರ್ಯಗಳಿಗೆ ಅವರು ಬೆನ್ನೆಲುಬಾಗಿ ನಿಂತುಕೊಳ್ಳುತ್ತಾರೆ. ಇಲ್ಲಿ ರಾಜಕೀಯ ಪಕ್ಷ, ಜಾತಿ, ವ್ಯಕ್ತಿ, ಪಂಗಡಗಳನ್ನು ಲೆಕ್ಕಿಸುವುದಿಲ್ಲ. ಇದಕ್ಕೆ ಅನೇಕ ಉದಾಹರಣೆ, ನಿದರ್ಶನಗಳು ಸಿಗುತ್ತವೆ.
ಇದರಲ್ಲೊಂದು 2006 ರಲ್ಲಿ ಬೆಳಗಾವಿಯಲ್ಲಿ ನಡೆದ ಕರ್ನಾಟಕ ವಿಧಾನ ಮಂಡಲಗಳ ಜಂಟಿ ಅಧಿವೇಶನ. ಇದಕ್ಕಾಗಿ ಅವರು ತಮ್ಮ ಸಂಸ್ಥೆಯ ಜೆಎನ್ ಎಂಸಿ ಆವರಣವನ್ನೇ ಬಿಟ್ಟುಕೊಟ್ಟಿದ್ದರು. ಬೇಕಿರುವ ಮೂಲಸೌಕರ್ಯಗಳನ್ನು ಒದಗಿಸಿದ್ದರು. ಇದರಿಂದಾಗಿ ಅಧಿವೇಶನ ಸುಸೂತ್ರ ಮತ್ತು ಯಶಸ್ವಿಯಾಗಿ ಜರುಗಿತು.
ಆಗವರು ಕಾಂಗ್ರೆಸ್ ಪಕ್ಷದಲ್ಲಿದ್ದರು. ಆದರೆ ಅಧಿವೇಶನ ನಡೆಸಿದ್ದು "ಜೆಡಿಎಸ್ ಮತ್ತು ಬಿಜೆಪಿ"ಯ ಸಮ್ಮಿಶ್ರ ಸರಕಾರ. ಇದು ಕಾಂಗ್ರೆಸ್ ನವರ ಕಣ್ಣು ಕೆಂಪಾಗುವಂತೆ ಮಾಡಿತು. ಅವರು ತಮ್ಮ ಪಕ್ಷದ ಸಂಘಟನೆ ಮೇಲಾಗುವ ವ್ಯತಿರಿಕ್ತ ಪರಿಣಾಮದ ಬಗ್ಗೆ ಯೋಚಿಸಿ ತುಮುಲ ಗೊಂಡಿದ್ದರು. ಹೀಗಾಗಿ ಅದರ ಹಿರಿಯ ನಾಯಕರು ಅಧಿವೇಶನದ ಸಂದರ್ಭದಲ್ಲೇ ಕೋರೆಯವರನ್ನು ತಮ್ಮ ಕೊಠಡಿಗೆ ಕರೆಯಿಸಿಕೊಂಡು ಆಕ್ಷೇಪಿಸಿದ್ದರು ಎನ್ನುವುದಕ್ಕಿಂತ ಒಂದರ್ಥದಲ್ಲಿ ತರಾಟೆಗೆ ತೆಗೆದುಕೊಂಡಿದ್ದರು. ಸಮ್ಮಿಶ್ರ ಸರಕಾರಕ್ಕೆ ಜೆಎನ್ ಎಂಸಿ ಆವರಣ ಕೊಟ್ಟಿದ್ದಕ್ಕೆ ಟೀಕಿಸಿದ್ದರು.
ಕೋರೆಯವರೇನೂ ನಡೆದ ಈ ಘಟನೆಯ ಬಗ್ಗೆ ಯಾರ ಮುಂದೆಯೂ ಬಾಯಿ ಬಿಟ್ಟಿರಲಿಲ್ಲ. ಆಪ್ತರೆದುರೂ ಹೇಳಿಕೊಂಡಿರಲಿಲ್ಲ. ಇದ್ಹೇಗೋ ಕಾಂಗ್ರೆಸ್ ವಲಯದಿಂದಲೇ ನುಸುಳಿ ಬಂದು ನನ್ನ ಕಿವಿ ತಲುಪಿತ್ತು. ಆಗ ನಾನು " ವಿಜಯ ಕರ್ನಾಟಕ" ದಿನಪತ್ರಿಕೆಯ ಬೆಳಗಾವಿ ಜಿಲ್ಲಾ ಪ್ರಧಾನ ವರದಿಗಾರನಾಗಿದ್ದೆ. ಅಧಿವೇಶನದ ವರದಿಗೆ ಆಗ ಪತ್ರಿಕೆಯ ಪ್ರಧಾನ ಸಂಪಾದಕರಾಗಿದ್ದ ವಿಶ್ವೇಶ್ವರ ಭಟ್, ಪ್ರಧಾನ ವರದಿಗಾರ ಪಿ. ತ್ಯಾಗರಾಜ್, ಪತ್ರಿಕೆಗೆ ಈಗ ಸಂಪಾದಕರಾಗಿರುವ ಸುದರ್ಶನ ಚನ್ನಂಗಿಹಳ್ಳಿ ಒಳಗೊಂಡು ಘಟಾನುಘಟಿಗಳ ತಂಡವೇ ಬೆಂಗಳೂರಿನಿಂದ ಆಗಮಿಸಿ ಬೆಳಗಾವಿಯಲ್ಲಿ ಬೀಡುಬಿಟ್ಟಿತ್ತು. ಇತರೆ ಪತ್ರಿಕೆಗಳಿಗಿಂತಲೂ ಮುಂಚೂಣಿ ವರದಿಗಾರಿಕೆ ನಡೆಸಿತ್ತು. ನನ್ನ ಕಿವಿಗೆ ತಲುಪಿದ್ದ ಕೋರೆಯವರ ಸುದ್ದಿಯನ್ನು ಪತ್ರಿಕೆಯ ಪ್ರಧಾನ ವರದಿಗಾರ ಪಿ. ತ್ಯಾಗರಾಜ್ ಅವರ ಮುಂದೆ ಹರವಿದೆ. ಅವರು ಕೂಡಲೇ ಸಂಪಾದಕರ ಗಮನಕ್ಕೆ ತಂದರು. ಕಿವಿ ಅರಳಿಸಿ ಕೇಳಿದ ವಿಶ್ವೇಶ್ವರ ಭಟ್ಟರು ಈ ಸುದ್ದಿ ಹೆಕ್ಕಿ ತೆಗೆದಿದ್ದಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದರಲ್ಲದೆ, ತಡ ಮಾಡದೆ ಇದರ ಹೆಚ್ಚುವರಿ ಮತ್ತು ನಿಖರ ಮಾಹಿತಿ ಸಂಗ್ರಹಿಸಿ ಪತ್ರಿಕೆಯ ಮುಖಪುಟದಲ್ಲಿ ಆದ್ಯತೆಯ ವರದಿಯಾಗಿ ಪ್ರಕಟಿಸಲು ತಂಡಕ್ಕೆ ನಿರ್ದೇಶನ ನೀಡಿದರು. ತಂಡ ಆ ಕೆಲಸ ಮಾಡಿತು. ಮರುದಿನ ನಮ್ಮ ಪತ್ರಿಕೆ ಬಿಟ್ಟರೆ ಉಳಿದ್ಯಾವ ಪತ್ರಿಕೆಯಲ್ಲೂ ಈ ಸುದ್ದಿ ಇರಲಿಲ್ಲ. ಬೆಳಗ್ಗೆ ಪತ್ರಿಕೆಯಲ್ಲಿ ಈ ಸುದ್ದಿ ನೋಡಿದ ಮುಖ್ಯಮಂತ್ರಿ ಎಚ್.ಡಿ. ಕುಮಾರಸ್ವಾಮಿ ಅವಾಕ್ ಆಗಿದ್ದರು. ವರದಿಯ ವಿವರವಾದ ಮಾಹಿತಿ ಪಡೆಯಲು ಮತ್ತು ನಿರ್ಬಿಡೆ ವರದಿಗಾರಿಕೆಯ ಬಗ್ಗೆ ಮೆಚ್ಚುಗೆ ಸೂಚಿಸಲು ವಿಶ್ವೇಶ್ವರ ಭಟ್ ರು ಒಳಗೊಂಡಂತೆ ಪತ್ರಿಕೆಯ ಬೆಂಗಳೂರು ತಂಡವನ್ನು ತಮ್ಮ ಕಾರ್ಯಾಲಯಕ್ಕೆ ಆಹ್ವಾನಿಸಿ ಮಾತನಾಡಿದ್ದರು. ಮುಖ್ಯಮಂತ್ರಿಗಳು ಬಹುಶಃ ಕೋರೆ ಅವರ ಜತೆಗೂ ಚರ್ಚಿಸಿರಬಹುದು. ಈ ವಿಷಯವಾಗಿ ಇದುವರೆಗೆ ನಾನೂ ಕೂಡ ಕೋರೆ ಅವರೊಂದಿಗೆ ಮಾತನಾಡಿಲ್ಲ.

2006 ರಲ್ಲಿ ಬೆಳಗಾವಿಯಲ್ಲಿ ರಾಜ್ಯ ವಿಧಾನ ಮಂಡಲಗಳ ಅಧಿವೇಶನ ನಡೆಯುವುದರ ಹಿಂದೆ ಬಹುದೊಡ್ಡ ಕಾರಣಗಳು ಇವೆ. ಇದು ಗಡಿ ಪ್ರದೇಶದ ಅಭಿದ್ಧಿಗೆ ಹೊಸ ಶಕ ಬರೆಯಿತು. ಗಡಿ ಭದ್ರತೆಯಲ್ಲಿ ಮಹತ್ವದ ಹೆಜ್ಜೆ ಇಟ್ಟಿತು.
ಮಹಾರಾಷ್ಟ್ರ ಗಡಿ ವಿವಾದ ತೆಗೆದುಕೊಂಡು ಸರ್ವೋಚ್ಚ ನ್ಯಾಯಾಲಯದ ಕಟ್ಟೆ ಹತ್ತಿತ್ತು. ಗಡಿ ಭಾಗದಲ್ಲಿ ಎಂಇಎಸ್ ನ ಉಪಟಳ ಹೆಚ್ಚಾಗಿತ್ತು. ಇದು ಕರ್ನಾಟಕಕ್ಕೆ ಕಿರಿಕಿರಿಯನ್ನುಂಟು ಮಾಡಿತ್ತು. ಇದಕ್ಕೆ ಮದ್ದು ಅರೆಯಲು ಕನ್ನಡಿಗರು ಸರಕಾರದ ಮೇಲೆ ಒತ್ತಡ ಇಟ್ಟಿದ್ದರು. ಈ ಸಂದರ್ಭದಲ್ಲಿ ದಿಟ್ಟ ನಿರ್ಧಾರ ತೆಗೆದುಕೊಂಡ ಮುಖ್ಯಮಂತ್ರಿ ಎಚ್.ಡಿ. ಕುಮಾರಸ್ವಾಮಿ ಅಧಿವೇಶನ ನಡೆಯಿಸಿ ಬೆಳಗಾವಿ ಕರ್ನಾಟಕದ ಎರಡನೇ ರಾಜಧಾನಿಯೆಂದು ಘೋಷಣೆ ಮಾಡಿದರು. ಜತೆಗೆ ಬೆಳಗಾವಿ ಕರ್ನಾಟಕದ ಅವಿಭಾಜ್ಯ ಅಂಗ ಎಂಬುದನ್ನು ಸ್ಪಷ್ಟಪಡಿಸಿದರು. ಪ್ರತಿವರ್ಷ ಚಳಿಗಾಲದ ಅಧಿವೇಶನವನ್ನು ಶಾಶ್ವತವಾಗಿ ನಡೆಯಿಸಲು ವಿಧಾನಸೌಧದ ನಿರ್ಮಾಣದ ತೀರ್ಮಾನ ಕೈಗೊಂಡರು. ಇದರ ಅಡಿಗಲ್ಲು ವಿಶಾಲ ಜಾಗ ಹೊಂದಿರುವ ಟಿಳಕವಾಡಿಯ ವ್ಯಾಕ್ಸಿನ್ ಡಿಪೋದಲ್ಲಿ ನಡೆದುಹೋಯಿತು. ಇದೆಲ್ಲ ಎಂಇಎಸ್ ಬಾಲ ಮುದುಡಿಕೊಳ್ಳುವಂತೆ ಮಾಡಿತು. ಅಧಿವೇಶನದಲ್ಲಿ ಎಂಇಎಸ್ ಶಾಸಕರು ಹಾರಾಡಿದರು. ಮೇಳಾವ ಆಯೋಜಿಸಿ ನಗರದಲ್ಲಿ ಗದ್ದಲ ಮಾಡಿದರು. ಡಾ. ಪ್ರಭಾಕರ ಕೋರೆ ಜೆಎನ್ ಎಂಸಿ ಆವರಣದಲ್ಲಿ ತಮ್ಮ ದೃಷ್ಟಿ ನೋಟದಲ್ಲೇ ಎಂಇಎಸ್ ಶಾಸಕರನ್ನು ಮೆತ್ತಗೆ ಮಾಡಿದರು. ಇಲ್ಲಿಂದ ಗಡಿ ಕನ್ನಡಿಗರಲ್ಲಿ ಆತ್ಮವಿಶ್ವಾಸ ಮತ್ತು ಭಾಷಾಭಿಮಾನ ಇಮ್ಮಡಿಗೊಂಡಿತು. ಈ ವಿಷಯದಲ್ಲಿ ಆಗಿನ ಎಚ್.ಡಿ. ಕುಮಾರಸ್ವಾಮಿ ಸರಕಾರದ ನಿರ್ಧಾರಗಳು ಮತ್ತು ಅಧಿವೇಶನಕ್ಕೆ ಕೋರೆಯವರು ಒಳಗೊಂಡಂತೆ ಇತರರು ನೀಡಿದ ಸಹಕಾರ ಸದಾ ಸ್ಮರಣೀಯ.
ಕಾಲಾಂತರದಲ್ಲಿ ರಾಜ್ಯ ಸರಕಾರ ಬದಲಾಯಿತು. ಬಿ.ಎಸ್. ಯಡಿಯೂರಪ್ಪನವರು ಮುಖ್ಯಮಂತ್ರಿ ಆದರು. ಅವರು ಬೆಳಗಾವಿಯಲ್ಲಿ ವಿಧಾನಸೌಧ ನಿರ್ಮಾಣ ಕಾರ್ಯವನ್ನೇನೂ ಕೈಬಿಡಲಿಲ್ಲ. ವ್ಯಾಕ್ಸಿನ್ ಡಿಪೋದಲ್ಲಿ ವಿಧಾನಸೌಧ ನಿರ್ಮಾಣಕ್ಕೆ ತಾಂತ್ರಿಕ ಅಡಚಣೆಗಳು ಉಂಟಾಗಿದ್ದವು. ಹೀಗಾಗಿ ವಿಶೇಷಜ್ಞರಿಂದ ನಗರ ಹೊರವಲಯ ವ್ಯಾಪ್ತಿಯಲ್ಲಿ ನಾನಾ ಜಾಗಗಳ ಪರಿಶೀಲನೆ ನಡೆಯಿತು. ಕೋರೆ ಈ ತಂಡದ ಭಾಗವಾಗಿದ್ದರು. ಕೊನೆಗೆ ಧಾರವಾಡ ಮಾರ್ಗದ ಹೈವೇಗೆ ತಾಗಿಕೊಂಡಿರುವ ಹಲಗಾ-ಬಸ್ತವಾಡ ಗ್ರಾಮದ ಗುಡ್ಡ ಅಂತಿಮಗೊಂಡಿತು. ನೀವು ಈಗಲ್ಲಿ ವಿಧಾನಸೌಧ ಕಾಣಬಹುದು.
ಈ ವಿಧಾನಸೌಧ ನಿರ್ಮಾಣದ ಗಾತ್ರ, ಆಕೃತಿ, ದೂರಾಲೋಚನೆ ಹೇಗಿರಬೇಕು ಎನ್ನುವ ಬಗ್ಗೆ ನಾನೊಮ್ಮೆ ವಿಜಯ ಕರ್ನಾಟಕಕ್ಕೆ ಡಾ. ಪ್ರಭಾಕರ ಕೋರೆ ಅವರ ಸಂದರ್ಶನ ಮಾಡಿದ್ದೆ. ಅವರು ದಿಲ್ಲಿಯ ಸಂಸತ್ ಮಾದರಿಯಲ್ಲಿ ಇರಬೇಕು ಎಂದಿದ್ದರು. ಮುಂದೊಂದು ದಿನ ಸಂಸತ್ ನ ಅಧಿವೇಶನವೊಂದು ದಕ್ಷಿಣ ಭಾರತದಲ್ಲಿ ನಡೆಯುವುದಿದ್ದರೆ ಸ್ಥಳ ಆಯ್ಕೆ ಅದು ಬೆಳಗಾವಿ ಆಗಬೇಕೆಂದಿದ್ದರು. ಯಾಕೆಂದರೆ ಇಲ್ಲಿ ಎಲ್ಲರಿಗೂ ಒಗ್ಗುವ ಆಹಾರ, ಬಹುಭಾಷೆ, ಸಂಸ್ಕೃತಿ, ಹವಾಮಾನ, ವಿಮಾನ, ರೈಲು ಸೌಕರ್ಯ, ದಟ್ಟಣೆ ಮುಕ್ತ ಜನಜೀವನ ಇದೆ. ಕರ್ನಾಟಕ ಸರಕಾರ ಈ ಅವಕಾಶದ ಬಳಕೆ ಮಾಡಿಕೊಳ್ಳಬೇಕೆಂದು ಸಲಹೆ ಮಾಡಿದ್ದರು.
ನನಗೆ ಇಷ್ಟೆಲ್ಲ ನೆನಪು ಏಕೆ ಆಯಿತು ಎಂದರೆ, ಡಾ. ಪ್ರಭಾಕರ ಕೋರೆ ಕಳೆದ 40 ವರ್ಷಗಳಿಂದ ಕೆಎಲ್ ಇ ಕಾರ್ಯಾಧ್ಯಕ್ಷ ಹುದ್ದೆಯನ್ನು ಯಶಸ್ವಿಯಾಗಿ ನಿಭಾಯಿಸುತ್ತ ಬಂದಿರುವುದರ ಖುಷಿಗೆ ಅವರ ಅಭಿಮಾನಿಗಳು ಬೆಳಗಾವಿ ನೆಹರುನಗರದ ಕನ್ನಡ ಭವನದಲ್ಲಿ ಜೂನ್ 8, 20024 ರಂದು ಆಯೋಜಿಸಿದ್ದ ಅಭಿನಂದನ ಸಮಾರಂಭದಲ್ಲಿ ಕೆಎಲ್ ಇ ಸಂಸ್ಥೆಯ ನಿವೃತ್ತ ಜಂಟಿ ಕಾರ್ಯದರ್ಶಿ ಡಾ. ವಿ.ಬಿ. ಹಿರೇಮಠರು, ಕಾಲಗರ್ಭದಲ್ಲಿ ಮುಚ್ಚಿ ಹೋಗಿದ್ದ 2006 ರಲ್ಲಿ ಡಾ. ಪ್ರಭಾಕರ ಕೋರೆಯವರು ಕಾಂಗ್ರೆಸ್ ನಾಯಕರಿಂದ ನಿಂದನೆಗೊಳಗಾಗಿದ್ದ ಘಟನೆಯ ಪುಟಗಳನ್ನು ತಿರಿವಿ ಇಟ್ಟಾಗ, ಸ್ಮೃತಿ ಪಟಲ ತಾನೇ ತೆರೆದುಕೊಂಡು ಹಳೆದಿನಗಳನ್ನು ಓದತೊಡಗಿತು.

ಬನ್ನಿ, ಆ ಕಾರ್ಯಕ್ರಮದಲ್ಲಿ ಡಾ. ವಿ.ಬಿ. ಹಿರೇಮಠರು ಏನು ಮಾತನಾಡಿದರು ಎನ್ನುವುದನ್ನೀಗ ಕೇಳೋಣ.

ಹ್ಯಾಂಡ್ ವೊವ್ಹರ್ ಟು ಡಾ. ವಿ.ಬಿ. ಹಿರೇಮಠ...

27/08/2024

ಕೋರೆ ಕುರಿತು ಕಿವಿ ಅರಳಿಸುವ ಮಾತು

ನಮಸ್ಕಾರ ವೀಕ್ಷಕರೆ
ನಾನು ರಾಜು ಉಸ್ತಾದ್
"ನೇರ ಹೊಡೆತ" ಹೆಸರಿನ
ಸಮೂಹ ಜಾಲತಾಣಕ್ಕೆ ನಿಮಗೆ ಸ್ವಾಗತ...

ಕೆಎಲ್ ಇ ಅಷ್ಟಮ ಋಷಿ ಡಾ. ಪ್ರಭಾಕರ ಕೋರೆ ಸಾಧನೆ, ಅದೊಂದು ಹೂವಿನಂತೆ. ಕೆಲವರಿಗೆ ಕೆಲವು ರೀತಿಯಲ್ಲಿ ಕಾಣಬಹುದು. ಕೆಲವರಿಗೆ ಅದರ ಸೌಂದರ್ಯ, ಇನ್ನೂ ಕೆಲವರಿಗೆ ಅದರೊಳಗಿನ ಪರಾಗದ ಧೂಳಿನ ಸುಗಂಧ, ಮತ್ತೆ ಕೆಲವರಿಗೆ ಅದರ ಬಣ್ಣ, ಇನ್ನೊಂದಿಷ್ಟು ಜನರಿಗೆ ಹೂವಿನ ನವಿರತೆ, ಅರಳಿ ಪೂರ್ಣ ರೂಪ ಪಡೆದ ಪಕಳೆಗಳು ಹಿಡಿಸಬಹುದು.
ಅದರ ಮೋಹಕ್ಕೊಳಗಾದವರು ಈ ಹೂವು ಅಡಿಯ ಸೇರುವ ಭಾಗ್ಯದ್ದು, ಎನ್ನಬಹುದು. ಇಲ್ಲವೆ ಮುಡಿಯನೇರಿಸಿ ಖುಷಿ ಪಡಬಹುದು.
ಒಟ್ಟಾರೆ ಇವರೆಲ್ಲರ ಭಾವ ಸಾರ ನನಗನಿಸಿದಂತೆ ಕುರುಡರು ಆನೆ ವರ್ಣಿಸಿದ ರೀತಿ ಇರುತ್ತದೆ. ಗಾತ್ರದ ಪೂರ್ಣ ಆಕೃತಿ ಕೆತ್ತಲು ಆಗುವುದಿಲ್ಲ. ಸಾಧನೆಯ ಕುಸುಮವೇ ಹಾಗೆ. ಅದರ ಪರಿಮಳ ಅಳೆದು, ತೂಗಿ, ಆಕೃತಿ ಕೆತ್ತಿ ಗಾತ್ರ, ಭಾರದ ನಿರ್ಧಾರ ಮಾಡಲು ಆಗುವುದಿಲ್ಲ. ಅದು ತನ್ನದೇ ರೀತಿಯಲ್ಲಿ ಪರಿಸರಕ್ಕೆ ಹರಡಿ ಜನರನ್ನು ತಲುಪಿ ಆಕರ್ಷಣೆಗೆ ಒಳಪಡಿಸಿರುತ್ತದೆ. ಸ್ಫೂರ್ತಿ, ಪ್ರೇರಣಾ ದಾಯಿನಿಯಾಗಿ ಕೆಲಸ ಮಾಡುತ್ತಿರುತ್ತದೆ.
ಇದಿಷ್ಟೆ ಅಲ್ಲ. ಇದಕ್ಕೆ ಹೊರತಾದ ಭಾವನೆಗಳೂ ಇರಬಹುದು! ಅದು ಅವರವರ ದೃಷ್ಟಿಕೋನವಷ್ಟೆ. ಇದೇನೇ ಇರಲಿ, ನಮಗೆ ಸಾಧಕನ ಸಾಧನೆಯಷ್ಟೆ ಮುಖ್ಯ. ಆತ ಬೆಳೆದ ಎತ್ತರ ಎಲ್ಲರಿಗೂ ಆದರ್ಶ. ಮುಂದಿನ ಪೀಳಿಗೆಗೆ ಮಾದರಿ. ಆತನ ಹೆಜ್ಜೆಯಲಿ ಹೆಜ್ಜೆ ಇಡುವ ಪ್ರಯತ್ನ ನಾವು ಮಾಡಬೇಕಿದೆಯಷ್ಟೆ.

ಡಾ. ಪ್ರಭಾಕರ ಕೋರೆಯವರು ಕೆಎಲ್ ಇ ಕಾರ್ಯಾಧ್ಯಕ್ಷ ಹುದ್ದೆಗೆ ಏರಿ ಕಳೆದ 40 ವರ್ಷಗಳಿಂದ ಅವಿಶ್ರಾಂತವಾಗಿ ದುಡಿಯುತ್ತಿರುವುದರಿಂದ ಅದರ ಖುಷಿಗೆ ಅವರ ಅಭಿಮಾನಿಗಳು ಬೆಳಗಾವಿ ನೆಹರುನಗರದ ಕನ್ನಡ ಭವನದಲ್ಲಿ ಜೂನ್ 8, 2024 ರಂದು ಆಯೋಜಿಸಿದ್ದ ಅಭಿನಂದನ ಸಮಾರಂಭದಲ್ಲಿ ಗಣ್ಯರನೇಕರು ಹೃದಯಸ್ಪರ್ಶಿಯಾಗಿ ಮಾತನಾಡಿದ್ದಾರೆ.
ಬನ್ನಿ ಅವರ ಮಾತಿಗೆ ಕಿವಿಯಾಗೋಣ.

ಮೊದಲಿಗೆ ಖ್ಯಾತ ಉದ್ಯಮಿ ಮತ್ತು ಸಮಾಜ ಕಾರ್ಯಕರ್ತ ಅವಿನಾಶ ಪೋತದಾರರ ಮಾತು.

ಎರಡನೆಯದ್ದಾಗಿ ಹೆಸರಾಂತ ವೈದ್ಯ ಡಾ. ಎಚ್.ಬಿ. ರಾಜಶೇಖರರ ಮಾತು.

23/08/2024

ಡಾ. ಪ್ರಭಾಕರ ಕೋರೆ ಮನದ ಮಾತು
ನಮಸ್ಕಾರ ವೀಕ್ಷಕರೆ
ನಾನು ರಾಜು ಉಸ್ತಾದ್
"ನೇರ ಹೊಡೆತ" ಹೆಸರಿನ
ಸಮೂಹ ಜಾಲತಾಣಕ್ಕೆ ನಿಮಗೆ ಸ್ವಾಗತ.

ಇದು "ಬಾಳಬುತ್ತಿ ಬಿಚ್ಚಿದ ಕೆಎಲ್ ಇ ಅಷ್ಟಮ ಋಷಿ ಡಾ. ಪ್ರಭಾಕರ ಕೋರೆ ಮನದ ಮಾತು...
ಸರಣಿಯ ಎರಡನೇ ಕಂತು.

ಡಾ. ಪ್ರಭಾಕರ ಕೋರೆ ಸಾಧನೆ, ಕೆಎಲ್ ಇ ಸಂಸ್ಥೆ ಮತ್ತು ಸಮಾಜಕ್ಕೆ ಅವರು ನೀಡಿದ ಕೊಡುಗೆ "ನೆಲದ ಮರೆಯಲ್ಲಿ ಹರಿಯುವ ಗುಪ್ತಗಾಮಿನಿ ಅಲ್ಲ. ತೆರೆದಿಟ್ಟ ಬಾನೆತ್ತರದ ಹಿಮಾಲಯ ಪರ್ವತ. ತೆರೆ‌ ಮರೆಯಲ್ಲಿ ಇರುವವರೂ ಇದನ್ನು ಕಾಣಬಹುದು.
ಯೋಧನಿಗೆ ಯುದ್ಧ ಭೂಮಿಯೇ ಪ್ರಮಾಣ. ನಾನೀಗ ಸಾಧಕನ ಹೆಜ್ಜೆ ಗುರುತುಗಳನ್ನು ನಿಮ್ಮೆದುರಿಗೆ ಇಡುತ್ತಿದ್ದೇನೆ. ಇದರೊಂದಿಗೆ ಡಾ. ಪ್ರಭಾಕರ ಕೋರೆ ಅವರ ಮಾತಿಗೂ ಕಿವಿಗೊಡೋಣ.

ಈಗ ಡಾ. ಪ್ರಭಾಕರ ಕೋರೆ ಮಾತು...
________________________
ಕೆಎಲ್ ಇ ಯ ಫರ್ಸ್ಟ್ ಸ್ಕೂಲ್

ಇದು ಕೆಎಲ್ ಇ ಯ ಮೊಟ್ಟ ಮೊದಲ ಶಿಕ್ಷಣ ಸಂಸ್ಥೆಯ ಕಟ್ಟಡ. ಬೆಳಗಾವಿಯ ಪ್ರಸಿದ್ಧ ಐತಿಹಾಸಿಕ ಕೋಟೆ ಆವರಣದಲ್ಲಿದೆ. ಮಿಲಿಟರಿ ಅಧೀನದಲ್ಲಿದ್ದ ಈ ಬಂಗಲೋ ನಂಬರ್ 24 ನ್ನು ಸಪ್ತರ್ಷಿಗಳು ಬಾಡಿಗೆಗೆ ಪಡೆದು ನವೆಂಬರ್ 16, 1916 ರಂದು ಶಾಲೆ ಆರಂಭಿಸಿದ್ದರು. ಡಾ. ಪ್ರಭಾಕರ ಕೋರೆ ಕೇಂದ್ರ ಸರಕಾರ ಮಟ್ಟದಲ್ಲಿ ತಮ್ಮ ರಾಜಕೀಯ ಸಂಪರ್ಕಗಳನ್ನು ಬಳಸಿ, ಈ ಬಂಗಲೋವನ್ನು ಕೆಎಲ್ ಇ ಸಂಸ್ಥೆಯ ಸ್ವಾಧೀನಕ್ಕೆ ಪಡೆದುಕೊಂಡಿದ್ದಾರೆ. 2016 ನವೆಂಬರ್ 16 ರಂದು ಭವ್ಯವಾಗಿ ಆಚರಣೆಗೊಂಡ ಕೆಎಲ್ ಇ ಯ ಶತಮಾನೋತ್ಸವ ಸಂದರ್ಭದಲ್ಲಿ ಪರಿಣಿತರಿಂದ ಇದನ್ನು ವ್ಯವಸ್ಥಿತವಾಗಿ ಅಭಿವೃದ್ಧಿ ಪಡಿಸಿ ಆಕರ್ಷಕ ಸ್ಮಾರಕವಾಗಿ ಪರಿವರ್ತಿಸಿ, ಸಾರ್ವಜನಿಕ ವೀಕ್ಷಣೆಗೆ ಇಟ್ಟಿದ್ದಾರೆ.

15/08/2024

ಡಾ. ಪ್ರಭಾಕರ ಕೋರೆ ಮನದ ಮಾತು
ನಮಸ್ಕಾರ ವೀಕ್ಷಕರೆ
ನಾನು ರಾಜು ಉಸ್ತಾದ್
"ನೇರ ಹೊಡೆತ" ಹೆಸರಿನ
ಸಮೂಹ ಜಾಲತಾಣಕ್ಕೆ
ನಿಮಗೆ ಸ್ವಾಗತ...

ನಾನೀಗ ಜಾಗತಿಕ ಮಟ್ಟದ ಶಿಕ್ಷಣ ಸಂಸ್ಥೆ, ಬೆಳಗಾವಿಯ ಕೆಎಲ್ ಇ ಯ ಕಾರ್ಯಾಧ್ಯಕ್ಷ ಡಾ. ಪ್ರಭಾಕರ ಕೋರೆ ಅವರ ಬಗ್ಗೆ ಮಾತನಾಡುತ್ತಿದ್ದೇನೆ.

ಡಾ. ಕೋರೆ ಅವರು, ಇದುವರೆಗಿನ ತಮ್ಮ ಜೀವನದಲ್ಲಿ ಅದೆಷ್ಟೋ ಸಾವಿರ ಭಾಷಣಗಳನ್ನು ಮಾಡಿದ್ದಾರೆ. ಗ್ರಾಮೀಣದಿಂದ ಹಿಡಿದು ರಾಷ್ಟ್ರ, ಅಂತಾರಾಷ್ಟ್ರೀಯ ಮಟ್ಟದ ವೇದಿಕೆಗಳಲ್ಲಿ ವಿಭಿನ್ನ ವಿಷಯಗಳ ಮೇಲೆ ತಮ್ಮ ವಿಚಾರಧಾರೆಯ ಪ್ರತಿಪಾದನೆ ಮಾಡಿದ್ದಾರೆ.
ಕೆಲವು ವೇದಿಕೆಗಳಲ್ಲಿ ಗೆಳೆಯನಾಗಿ, ಕೆಲವು ವೇದಿಕೆಗಳಲ್ಲಿ ಹಿರಿಯನಾಗಿ, ಕೆಲವು ವೇದಿಕೆಗಳಲ್ಲಿ ಕಿರಿಯನಾಗಿ, ಕೆಲವು ವೇದಿಕೆಗಳಲ್ಲಿ ವಿಷಯ ಪರಿಣಿತನಾಗಿ, ಕೆಲವು ವೇದಿಕೆಗಳಲ್ಲಿ ಸಮಾಜ ಕಾರ್ಯಕರ್ತ, ರಾಜಕಾರಣಿಯಾಗಿ, ಕೆಲವು ವೇದಿಕೆಗಳಲ್ಲಿ ಶಿಕ್ಷಣ ಸಂಸ್ಥೆಯ ಕಾರ್ಯಾಧ್ಯಕ್ಷನಾಗಿ, ಕೆಲವು ವೇದಿಕೆಗಳಲ್ಲಿ ಕುಟುಂಬದ ಸದಸ್ಯನಾಗಿ, ಕೆಲವು ವೇದಿಕೆಗಳಲ್ಲಿ ಜನರೊಳಗೊಬ್ಬನಾಗಿ, ಹೋರಾಟಗಾರನಾಗಿ ಪಾತ್ರಗಳ ನಿಭಾವಣೆ ಮಾಡಿದ್ದಾರೆ. ಸಂದರ್ಭಕ್ಕನುಗುಣವಾಗಿ ಕಟುವಾಗಿ, ಸೂಕ್ಷ್ಮವಾಗಿ, ಸಂವೇದನಾ ಶೀಲನಾಗಿ ಧ್ವನಿಗಳ ಬಳಕೆ ಮಾಡಿದ್ದಾರೆ. ಈ ಮೂಲಕ ಆಯಾ ಸಂದರ್ಭಗಳಿಗೆ ನ್ಯಾಯ, ಗೆಲುವು ಸಿಗುವಂತೆ ಮಾಡಿದ್ದಾರೆ. ಜನ, ಸಮಾಜದ ಹಿತ ಕಾಯ್ದಿದ್ದಾರೆ.
ಒಟ್ಟಾರೆ ಕಾಲಮಾನದ ಅಗತ್ಯ, ನಿರೀಕ್ಷೆಗಳು, ಶಿಕ್ಷಣ, ವೈದ್ಯಕೀಯ, ಸಂಶೋಧನೆ, ಕ್ರೀಡೆ, ಅಭಿವೃದ್ಧಿ, ಜೀವನ ಕ್ರಮ, ಒಳ್ಳೆಯದ್ದನ್ನು ಬೆಂಬಲಿಸುವುದು, ಸಾಮರಸ್ಯ, ಸಹಕಾರ, ಕೃಷಿ, ಗ್ರಾಮೀಣರ ಪರಿಸ್ಥಿತಿಯ ಮೇಲೆ ಬೆಳಕು ಚೆಲ್ಲಿದ್ದಾರೆ. ಆದರೆ ತಮ್ಮ ವೈಯಕ್ತಿಕ ಬದುಕಿನ ಘಟನೆಗಳು, ಕೆಎಲ್ ಇ ಮುನ್ನಡೆಸುವಲ್ಲಿ ಎದುರಾದ ಸವಾಲು, ಹೊಡೆತಗಳು, ಇದರ ನಡುವೆಯೂ ಹಿರಿಯರೆನಿಸಿಕೊಂಡವರು ನೀಡಿದ ಸ್ಮರಣೀಯ ನೆರವು, ಸಹಕಾರ, ಬೆಂಬಲ ಮತ್ತು ಬೆನ್ನೆಲುಬಾಗಿ ನಿಂತುಕೊಂಡವರ ಬಗ್ಗೆ ಮುಕ್ತವಾಗಿ ಮಾತನಾಡಿರುವುದು ಕಡಿಮೆ.

ಆದರೆ ಅವರು ಕೆಎಲ್ ಇ ಸಂಸ್ಥೆಯ ಕಾರ್ಯಾಧ್ಯಕ್ಷ ಹುದ್ದೆಗೆ ಏರಿ 40 ವರ್ಷಗಳ ಕಾಲ ಅವಿಶ್ರಾಂತವಾಗಿ ಆಡಳಿತ ನಡೆಸಿರುವುದರ ಖುಷಿಗೆ ಅಭಿಮಾನಿಗಳು, ಮಿತ್ರರು, ಸಂಸ್ಥೆಯ ನಿವೃತ್ತ ಆಜೀವ ಸದಸ್ಯರು, ಪ್ರಾಚಾರ್ಯರು, ಪ್ರಾಧ್ಯಾಪಕರು, ಅಧ್ಯಾಪಕರು, ಇತರ ಸಿಬ್ಬಂದಿ, ಸಂಘ-ಸಂಸ್ಥೆಗಳು, ಕನ್ನಡ ಭವನದ ಆಡಳಿತ ಮಂಡಳಿ, ಪದಾಧಿಕಾರಿ ಮತ್ತು ನಿರ್ದೇಶಕರುಗಳು ಬೆಳಗಾವಿ ನೆಹರುನಗರದಲ್ಲಿರುವ ಕನ್ನಡ ಭವನದಲ್ಲಿ ಜೂನ್ 8, 2024 ರಂದು ಆಯೋಜಿಸಿದ್ದ ಅಭಿನಂದನ ಸಮಾರಂಭದಲ್ಲಿ ಬಾಳಬುತ್ತಿ ಬಿಚ್ಚಿ ಹುಟ್ಟೂರು ಚಿಕ್ಕೋಡಿ-ಅಂಕಲಿ ಗ್ರಾಮದ ಜವಾರಿ ಕನ್ನಡ ಭಾಷೆಯಲ್ಲಿಯೇ ಮನಸಾರೆ ಮಾತನಾಡಿದ್ದಾರೆ. ಬದುಕಿನ ಸತ್ಯಗಳನ್ನು ತೆರೆದಿಟ್ಟಿದ್ದಾರೆ. ಅವರ ಮಾತುಗಾರಿಕೆ ಸಭಿಕರಿಗೆ ಬೆರಗು ತರಿಸಿದೆ. ಡಾ. ಕೋರೆ ಅತ್ಯದ್ಭುತ ವಾಗ್ಮಿ ಎಂಬುದೂ ಬಹುತೇಕ ಅದೇ ದಿನ ಅನಾವರಣಗೊಂಡಿದೆ ಎಂಬುದು ನನ್ನ ಅನಿಸಿಕೆ.

ಬನ್ನಿ... ಆ ಸುಂದರ ಮಾತಿನ ಪ್ರಯಾಣದಲ್ಲಿ ನಾವೂ ಭಾಗಿಯಾಗಿ ಮನಸ್ಸು ತೂರಿಸಿ ಕೇಳೋಣ.

ಈಗ, ಹ್ಯಾಂಡ್ ವೊವ್ಹರ್ ಟು ಕೋರೆ...

12/08/2024

ಮಾಝೆ ಮಾಹೇರ ಪಂಢರೀ

10/08/2024

ನಾಗರಪಂಚಮಿ-ನಾಗದೋಷ ನಿವಾರಣೆ

09/08/2024

ಉದರ ಪೋಷಣೆಗೆ ಸ್ವರ ಆಲಾಪ

07/08/2024

ನಮಸ್ಕಾರ ವೀಕ್ಷಕರೆ
ನಾನು ರಾಜು ಉಸ್ತಾದ್
"ನೇರ ಹೊಡೆತ" ಹೆಸರಿನ
ಸಮೂಹ ಜಾಲತಾಣಕ್ಕೆ ನಿಮಗೆ ಸ್ವಾಗತ...

ನಾನೀಗ ಕಾರ್ಗಿಲ್ ಯುದ್ಧ, ಕಡಿದಾದ ಬೆಟ್ಟ ಶ್ರೇಣಿಯ ಟೈಗರ್ ಹಿಲ್ ನೆನಪಿಸುವ ಹುತ್ತದ ಎತ್ತರ ಮತ್ತು ಗೆದ್ದಲಿನ ವಿಸ್ಮಯ ಜಗತ್ತಿನ ಬಗ್ಗೆ ಮಾತನಾಡುತ್ತಿದ್ದೇನೆ.

"ಹುತ್ತ" ಇದು ನಮ್ಮ ಧಾರ್ಮಿಕ ಭಾವನೆಗಳೊಂದಿಗೆ ಹೆಣೆದುಕೊಂಡಿದೆ. ಇದಕ್ಕೆ ಕಾರಣ ನಮ್ಮಲ್ಲಿರುವ ನಾಗದೇವತಾ ಆರಾಧನಾ ಪದ್ಧತಿ. ಅಥವಾ ರೂಢಿ. ನಾಗದೇವತಾ ಉಪಾಸಕರಂತೂ ಈ ಹುತ್ತ ಕಂಡರೆ ಸಾಕು. ಆಸ್ಥಾ ಸ್ಥಳದಂತೆಯೇ ಶ್ರದ್ಧೆಯಿಂದ ನಮಿಸಿ, ಗೌರವಿಸುತ್ತಾರೆ. ಪೂಜೆ, ಪುನಸ್ಕಾರಾದಿಗಳನ್ನು ನೆರವೇರಿಸಿ, ಭಕ್ತಿಯ ಸಮರ್ಪಣೆ ಮಾಡುತ್ತಾರೆ. ಜನ್ಮ ದೋಷಗಳನ್ನು ಕಳೆದು ಸುಖ, ಸಮೃದ್ಧಿಯ ಜೀವನ ನೀಡುವಂತೆ ಬೇಡುತ್ತಾರೆ. ಶಿವನ ಪುತ್ರ ಕಾರ್ತಿಕೇಯ ಸ್ವಾಮಿಯನ್ನು ನೆನೆಯುತ್ತಾರೆ. ಸರ್ಪದೋಷ ಬಾರದಂತೆ ಕೇಳಿಕೊಳ್ಳುತ್ತಾರೆ. ನಾಗರಪಂಚಮಿಯಲ್ಲಂತೂ ನಾಗ ಪೂಜೆ ಅಥವಾ ಈ ಹುತ್ತದ ಆರಾಧನೆ ಉತ್ತುಂಗದಲ್ಲಿರುತ್ತದೆ.
ಜನರ ಈ ಶ್ರದ್ಧೆ ಅದಕ್ಕೊಂದು ದೊಡ್ಡ ಹಬ್ಬದ ರೂಪವನ್ನೇ ನೀಡಿದೆ. ಅದುವೇ ನಾಗಪಂಚಮಿ. ಕವಿಪುಂಗವರಂತೂ ಈ ಹಬ್ಬವನ್ನು "ನಾಗರ ಪಂಚಮಿ ನಾಡಿಗೆ ದೊಡ್ಡ ಹಬ್ಬ" ವೆಂದು ಹಾಡಿ ಹೊಗಳಿದ್ದಾರೆ.
ಹೆಂಗಳೆಯರು ಮತ್ತು ಮಕ್ಕಳಿಗಂತೂ ಈ ಹಬ್ಬ ಬಲೂ ಅಚ್ಚುಮೆಚ್ಚು. ಅದು ಬರುವುದನ್ನೇ ಕಾಯುತ್ತಿರುತ್ತಾರೆ. ದೂರ ಅದ್ಯಾವುದೋ ಊರಿಗೆ ಶಾಲೆ ಕಲಿಯಲು ಹೋದ ಹೈಸ್ಕೂಲ್ ವರೆಗಿನ ಮಕ್ಕಳು ಹಬ್ಬದಷ್ಟೊತ್ತಿಗೆ ಮನೆ ಸೇರುತ್ತಾರೆ. ಹೊಸದಾಗಿ ಮದುವೆಯಾಗಿ ಗಂಡನ ಮನೆಗೆ ಹೋದ ಹೆಂಗಳೆಯರಂತೂ ಮರಳಿ ತವರು ನೋಡುವ ತವಕದಲ್ಲಿ "ಪಂಚಮಿ ಬಂತು ಸನಿಯಾಕ ನಮ್ಮಣ್ಣ ಬರಲಿಲ್ಲ ಕರೆಯಾಕ" ಎಂದು ತಳಮಳದ ಸ್ವರದಿ ತವಕವನ್ನು ಹೊರ ಹಾಕಿ ತವರಿನಿಂದ ಬರುವವರ ಹಾದಿ ಕಾಯುತ್ತಿರುತ್ತಾಳೆ.
ಇವರೆಲ್ಲ ಊರಿಗೆ ಬಂದರೆ ಸಾಕು ಅವರ ಸಡಗರವೇ ಬೇರೆ. ಊರಿನ ಆಪ್ತರೆಲ್ಲರನ್ನೂ ಭೇಟಿ ಮಾಡಿ, ಮನೆಯ ಪಡಸಾಲೆ, ಊರ ಬಯಲಿನ ಮರಕ್ಕೆ ಕಟ್ಟಿದ ಜೋಕಾಲಿಯಲ್ಲಿ ಗೆಳೆಯ, ಗೆಳತಿಯರೊಂದಿಗೆ ಕುಳಿತು ಜೀಕಿಕೊಳ್ಳುತ್ತ ಹೊಸ ಅನುಭವಗಳನ್ನು ಹಂಚಿಕೊಳ್ಳುತ್ತಾರೆ. ಈ ಕಾಲದಲ್ಲಿ ಮಳೆಯ ಸಿಂಚನ, ಶ್ರಾವಣ ಮಾಸದ ಪಾದಾರ್ಪಣೆ ಇರುತ್ತದೆ. ಒಟ್ಟಾರೆ ಪ್ರಕೃತಿ ಮುಂಗಾರು ಸಿರಿ, ಸಮೃದ್ಧಿಯಿಂದ ಕೂಡಿರುತ್ತದೆ. ಜನರಲ್ಲಿ ಹೊಸ ಉಲ್ಲಾಸ ತುಂಬಿರುತ್ತದೆ. ಇದು ಪಂಚಮಿಗೆ ರಂಗು ತಂದಿರುತ್ತದೆ. ಹಬ್ಬದ ದಿನ ದೇವಾಲಯಗಳ ಆವರಣದಲ್ಲಿರುವ ನಾಗದೇವತೆಗಳ ಮೂರ್ತಿ ಇಲ್ಲವೆ ಊರ ಹೊರ ವಲಯದ ಹುತ್ತದ ಬಳಿಗೆ ಹೋಗಿ ಪೂಜೆಗೈದು ಭಕ್ತಿ ಸಮರ್ಪಣಾ ದ್ಯೋತಕವಾಗಿ ಇಲ್ಲವೆ ಹಾವಿಗೆ ಎಡೆ ನೀಡುವ ಪ್ರತೀಕವಾಗಿ ಅವುಗಳ ಮೇಲೆ ನನ್ನ ಪಾಲು, ನನ್ನ ಅಪ್ಪನ ಪಾಲು, ನನ್ನ ಅವ್ವನ ಪಾಲು, ನನ್ನ ಅಣ್ಣ, ತಮ್ಮ, ತಂಗಿ, ಅಕ್ಕನ ಪಾಲು ಎಂದು ಹೇಳುತ್ತ ಹಾಲು ಎರೆಯುತ್ತಾರೆ.
ಈ ಹಬ್ಬ ಅವರ ಪಾಲಿಗೆ ಮಿನಿ ದೀಪಾವಳಿ. ಪಟಾಕಿಯ ಸದ್ದು, ಸಾಲು ದೀಪಗಳ ಬೆಳಕು ಬಿಟ್ಟರೆ ಉಳಿದಂತೆ ಅದೇ ತರಹೇವಾರಿ ಸಿಹಿ ತಿಂಡಿ, ತಿನಿಸು, ಉಂಡಿ, ಖಾರ ಪದಾರ್ಥಗಳ ರಾಶಿ ಇರುತ್ತದೆ. ಇವುಗಳನ್ನೆಲ್ಲ ಮನಸಾರೆ ತಿಂದು ಖುಷಿ ಪಡುತ್ತಾರೆ. ಹಬ್ಬಕ್ಕೆ ಮತ್ತೆ ಮನೆ ಮಕ್ಕಳು-ಮರಿಗಳಿಂದ ತುಂಬಿರುವುದನ್ನು ನೋಡಿ ಹಿರಿಯರು ಹಿರಿ ಹಿರಿ ಹಿಗ್ಗಿರುತ್ತಾರೆ. ಇದೇ ಖುಷಿಯಲ್ಲಿ ಬೀಗರು-ಬಿಜ್ಜರು, ಸಂಬಂಧಿಗಳಿಗೆಲ್ಲ ಡಬ್ಬ ತುಂಬ ಉಂಡಿ, ಖಾರ ತಿನಿಸು ಕಟ್ಟಿ ಕಳುಹಿಸಿ ಕೊಡುತ್ತಾರೆ. ಈ ವಿನಿಮಯ ಉಭಯ ಕಡೆಗಳಿಂದಲೂ ಆಗುತ್ತದೆ.
ಮರಳಿ ಗಂಡನ ಮನೆಗೆ ಹೋಗುವ ಮಗಳು, ಶಾಲೆ ಸೇರುವ ಮಕ್ಕಳೂ ಉಂಡಿ ತುಂಬಿದ ಡಬ್ಬಿಗಳನ್ನು ಒಯ್ಯುತ್ತಾರೆ.

ನಾನು ಇಷ್ಟೆಲ್ಲ ಪೀಠಿಕೆ ಏಕೆ ಹಾಕಿದೆನೆಂದರೆ, ಕಳೆದ ಬೇಸಿಗೆಯ ಕೊನೆಯ ದಿನಗಳಲ್ಲಿ ಬೆಳಗಾವಿಯಿಂದ ಗೋವಾ ಮಾರ್ಗದ ಜಾಂಬೋಟಿ ಕಡೆಗೆ ಹೊರಟಿದ್ದೆ. ಮಾರ್ಗ ಮಧ್ಯದಲ್ಲಿ ಪ್ರಕೃತಿಯ ರಮ್ಯತೆ ಸವಿಯುತ್ತ ಬೈಕ್ ಓಡಿಸುತ್ತಿದ್ದೆ. ಅದೊಂದು ಕಡೆ ಗದ್ದೆಯ ಬದುವಿನ ಮೇಲೆ ಆಳೆತ್ತರ ಮೀರಿದ ದೊಡ್ಡದಾದ ಮಣ್ಣಿನ ಗೋಪುರ ಕಾಣಿಸಿತು. ಕುತೂಹಲಗೊಂಡ ಮನಸ್ಸು ಓಡುವ ಬೈಕ್ ಗೆ ಬ್ರೆಕ್ ಹಾಕಿತು. ರಸ್ತೆ ಬದಿ ಅದನ್ನು ಸುರಕ್ಷಿತವಾಗಿ ನಿಲ್ಲಿಸಿ, ಗಿಡಗಂಟಿ, ಪೊದೆಗಳನ್ನು ಸೀಳಿ ಹಾದಿ ಮಾಡಿಕೊಳ್ಳುತ್ತ ಮಣ್ಣಿನ ಗೋಪುರದ ಬಳಿಗೆ ಹೋದೆ. ಅದು ಬೃಹತ್ ಹುತ್ತವೆಂಬುದು ಸ್ಪಷ್ಟವಾಯಿತು. ಅದರ ಎತ್ತರ, ಗಾತ್ರ, ಭಯ ತರಿಸುವಂತಿತ್ತು. ಮೊದಲೇ ಅರಣ್ಯ. ಪರಿಸರ ಝುಂಯ್ಯಿ ಗುಟ್ಟುತ್ತಿತ್ತು. ಸುತ್ತಲೂ ಕಣ್ಣಾಡಿಸಿದೆ. ಯಾರೂ ಕಾಣಿಸಲಿಲ್ಲ. ಪ್ರಾಣಿಗಳ ಸುಳಿದಾಟ, ಜಂತುಗಳ ಸರಿದಾಡುವ ಸದ್ದೂ ಕೇಳಿಸಲಿಲ್ಲ. ಆ ನಿರವತೆಯಲ್ಲಿ ಅಳುಕು ಇಣುಕಿತು. ಆ ಹುತ್ತದಲ್ಲಿ ಭಯಂಕರ ಸರ್ಪಗಳಿವೆಯೇನೋ ಎಂದು ಮನ ಕಂಪಿಸಿತು. ಕೂಡಲೇ ಅದಕ್ಕೆ ಕಡಿವಾಣ ಬಿಗಿದೆ. ಮನಕ್ಕೆ ಧೈರ್ಯ ತುಂಬಿದೆ. ಕ್ಯಾಮೆರಾ ಹೊರ ತೆಗೆದು ಹುತ್ತದ ಚಿತ್ರೀಕರಣ ಮಾಡಿದೆ. ಇದು ಮುಗಿದ ನಂತರ ಮತ್ತೆ ಪರಿಸರದ ಮೇಲೆ ಕಣ್ಣಾಡಿಸಿದೆ. ಎಲ್ಲೂ ಏನೂ ಅಪಾಯದ ವಾಸನೆ ಬಡಿಯದ್ದರಿಂದ ಧೈರ್ಯ ಇಮ್ಮಡಿಗೊಂಡಿತು. ಒಂದು ಕಡೆ ಸ್ತಬ್ಧವಾಗಿ ಹುತ್ತದ ಬಳಿ ನಿಂತೆ. ಬಾಲ್ಯದಲ್ಲಿ ಇವುಗಳನ್ನು ಹತ್ತಿರದಿಂದ ನೋಡಿದ್ದು ನೆನಪಾಯಿತು. ಹಿರಿಯರು ಹೇಳಿದ್ದ ಅಷ್ಟಿಷ್ಟು ಮಾಹಿತಿಯೂ ಸ್ಮೃತಿಪಟಲದ ಮೇಲೆ ಹಾಯ್ದು ಹೋಯಿತು. ಇವು ಹಾವಿನ ಮನೆ ಎಂಬುದು ಅವರ ಮತ್ತು ನಮ್ಮ ನಂಬಿಕೆ. ಆದರೂ ಇವುಗಳನ್ನು ಇರುವೆ ಆಕೃತಿ ಹೋಲುವ ಗೊರ್ಲಿ, ಗ್ವರ್ಲಿ ಅಥವಾ ಗೆದ್ದಲು ಎನ್ನುವ ಜೀವಗಳು ನಿರ್ಮಾಣ ಮಾಡುತ್ತವೆ ಎಂಬುದೂ ತಿಳಿದಿತ್ತು. ಇವುಗಳು ನಿರ್ಮಿಸಿದ ಇಮಾರತಿನಲ್ಲಿ ಹಾವುಗಳು ಅತಿಕ್ರಮವಾಗಿ ಪ್ರವೇಶಿಸಿ, ತಮ್ಮ ಬೀಲ ಮಾಡಿಕೊಂಡು ಬಿಡುತ್ತವೆ. ಹೀಗಾಗಿ ಯಾರೋಪಟ್ಟ ಶ್ರಮದ ಫಲವನ್ನು ಇನ್ನ್ಯಾರೋ ತಿಂದಾಗ ಹಿರಿಯರು "ಗೊರ್ಲಿ ಹುತ್ತ ಕಟ್ಟಿ ನಾಗಪ್ಪನಿಗೆ ಎಡೆ ಮಾಡಿತ್ತು" ಎಂದು ವ್ಯಂಗ್ಯವಾಡುತ್ತಾರೆ.
ಗೆದ್ದಲಿನದ್ದೂ ಒಂದು ವಿಸ್ಮಯ ಜಗತ್ತು. ಸಾಮಾನ್ಯವಾಗಿ ಇವು ನಾವು ನೋಡುವ ಇರುವೆ ರೀತಿಯಲ್ಲೇ ಇರುತ್ತವೆ. ಆದರೆ ಇವು ಇರುವೆಯಲ್ಲ. ಮುರಿದು ಬಿದ್ದ, ಒಣಗಿದ ಅಥವಾ ಜೀವ ಕಳೆದುಕೊಂಡು ಬರಡಾಗಿ ನಿಂತ ಸಸ್ಯ ಜನ್ಯ ವಸ್ತುಗಳು, ಕೃಷಿ ತ್ಯಾಜ್ಯ ತಿಂದು ಜೀವಿಸುತ್ತವೆ.
ಒಂದರ್ಥದಲ್ಲಿ ಕಬ್ಬಿಣಕ್ಕೆ ಹಿಡಿಯುವ ಜಂಗ್ ರೀತಿಯಲ್ಲಿ ಇವು ಕಟ್ಟಿಗೆಗೆ ಮುತ್ತಿಕೊಂಡು ತಿಂದು ಹಾಕುತ್ತವೆ. ಬಿಸಿಲು ಇವುಗಳಿಗೆ ಆಗುವುದಿಲ್ಲ. ಶರೀರ ಸೂಕ್ಷ್ಮವಾಗಿರುತ್ತದೆ. ಹೀಗಾಗಿ ಇವು ಶಾಖ, ತಾಪದಿಂದ ತಪ್ಪಿಸಿಕೊಳ್ಳಲು ತಮ್ಮ ಹಿಕ್ಕೆ, ಲಾಲಾರಸ ಬಳಸಿ ಸಂಚರಿಸಲು ಸುರಂಗ ಇರುವಂತೆ ಮಣ್ಣಿನ ಹೊದಿಕೆ, ಪೊರೆ ನಿರ್ಮಾಣ ಮಾಡಿಕೊಂಡಿರುತ್ತವೆ. ಅದುವೇ ಈ ಹುತ್ತದ ಆಕೃತಿ ನಿರ್ಮಾಣಕ್ಕೆ ಕಾರಣವಾಗುತ್ತದೆ. ಇದು ಸಾಧಾರಣ ಮಳೆಯಿಂದಲೂ ರಕ್ಷಣೆ ಕೊಡುತ್ತದೆ. ಮಣ್ಣು ಗಟ್ಟಿಯಾಗಿರುವುದರಿಂದ ಬೇಗ ಕದಡುವುದಿಲ್ಲ. ಇದರಲ್ಲಿ ಗೆದ್ದಲಿನ ಆಹಾರ ಸಂಗ್ರಹ, ಸಂತಾನಾಭಿವೃದ್ಧಿ ಮತ್ತು ಜೀವನ ಕ್ರಮ ಎಲ್ಲವೂ ಇರುತ್ತದೆ.
ಗೆದ್ದಲು ಕೀಟ ಪುರಾತನ ಕಾಲದಿಂದಲೂ ಇದೆ. ಇವುಗಳಲ್ಲಿ ನಾಲ್ಕು ಸಾವಿರ ಪ್ರಭೇದಗಳು ಇವೆ ಎನ್ನಲಾಗುತ್ತಿದೆ. ಸಂಸ್ಕೃತದಲ್ಲಿ ಇದಕ್ಕೆ "ಕಾಷ್ಟ ಹರಿಕ" ಅಂದರೆ ಕಟ್ಟಿಗೆ ತಿನ್ನುವ ಹುಳ ಎಂದೇ ಕರೆಯಲಾಗಿದೆ.
ಇವು ಸಂಘ ಜೀವಿಗಳು. "ಐಸಾಪ್ಟೆರಾ" ಗುಂಪಿಗೆ ಸೇರಿವೆ.
ಹೆಚ್ಚಾಗಿ ಕೆಂಪು ಮಣ್ಣಿನ ಆಶ್ರಯ ಪಡೆಯುತ್ತವೆ. ಗೂಡನ್ನು ಭೂಮಿಯ ಒಳಗೆ, ಮೇಲ್ಮೈ ಮತ್ತು ಮರದ ಆಸರೆ ಪಡೆದೂ ವೈವಿಧ್ಯಮಯ ಶಿಲ್ಪ ವಿನ್ಯಾಸದಲ್ಲಿ ಕಟ್ಟುತ್ತವೆ. ಗೂಡು ಅಭೇದ್ಯ ಕೋಟೆಯಾಗಿರುತ್ತದೆ. ಇದರಲ್ಲಿ ರಾಜ, ರಾಣಿ, ಕೆಲಸಗಾರ ಮತ್ತು ಸೈನಿಕ ಗೆದ್ದಲುಗಳು ಇರುತ್ತವೆ. ಇವು ತಮ್ಮ ಜವಾಬ್ದಾರಿಯನ್ನು ಅಚ್ಚುಕಟ್ಟಾಗಿ ನಿಭಾಯಿಸುತ್ತವೆ.
ಇವುಗಳ ಬಗ್ಗೆ ತಿಳಿದುಕೊಳ್ಳುತ್ತ ಹೋದರೆ ಕೌತುಕದ ಜಗತ್ತೇ ತೆರೆದುಕೊಳ್ಳುತ್ತದೆ. ಇವುಗಳ ಸಹಬಾಳ್ವೆ, ಸಹಕಾರ, ಜೀವನ ಕ್ರಮ ಮಾನವ ಸಮಾಜಕ್ಕಿಂತಲೂ ಶಿಸ್ತಾಗಿದ್ದು, ಇತರೆ ಕೀಟಗಳಿಗಿಂತ ಭಿನ್ನವಾಗಿದೆ.

ಹುತ್ತದ ಬಳಿ ಇಷ್ಟೆಲ್ಲ ವಿಚಾರ ಮಗ್ನವಾಗಿದ್ದಾಗ, ಬೀಸಿದ ಗಾಳಿಗೆ ಏನೋ ಸರಿದಾಡಿದ ಬಾಸವಾಯಿತು. ತಕ್ಷಣವೇ ಎಚ್ಚೆತ್ತು ಸುತ್ತಲೂ ಕಣ್ಣಾಡಿಸಿದೆ. ಅಂಥದ್ದೇನೂ ಇರಲಿಲ್ಲ. ಮತ್ತೆ ದೀರ್ಘ ಉಸಿರೆಳೆದುಕೊಂಡು ಹುತ್ತವನ್ನು ಮತ್ತೊಂದು ಆ್ಯಂಗಲ್ ನಲ್ಲಿ ನೋಡತೊಡಗಿದೆ. ಆಗದು ನನಗೆ ಕಾರ್ಗಿಲ್ ಟೈಗರ್ ಹಿಲ್ ನ ಕಡಿದಾದ ಬೆಟ್ಟ ಶ್ರೇಣಿಯಂತೆ ಕಾಣಿಸತೊಡಗಿತು. ಗೆದ್ದಲಿನ ಆ ಅದ್ಭುತ ಇಂಜಿನಿಯರಿಂಗ್ ಬೆರಗುತರಿಸಿತು.
ಕಾರ್ಗಿಲ್ ನೆನಪಾಗುತ್ತಲೇ ಮನಸ್ಸು 1999ನೇ ಸಾಲಿಗೆ ಜಾರಿತು. ಆ ವರ್ಷ ದೇಶಕ್ಕೆ ಸಾಮಾನ್ಯ ವರ್ಷ ಆಗಿರಲಿಲ್ಲ. ಭಾರತ-ಪಾಕಿಸ್ತಾನ ಗಡಿಯಲ್ಲಿ ಯುದ್ಧದ ದಟ್ಟ ಛಾಯೆ ಕವಿದುಕೊಂಡಿತ್ತು. ಕಳ್ಳ ಹೆಜ್ಜೆಯಲಿ ಗಡಿ ನುಸುಳಿ ಬಂದಿದ್ದ ಪಾಕಿಸ್ತಾನ ಸೇನೆಯನ್ನು ಹೊಡೆದೋಡಿಸಲು ಭಾರತೀಯ ಸೇನೆ ದಿಟ್ಟ ಹೋರಾಟ ನಡೆಸಿತ್ತು. ಯೋಧರ ಆತ್ಮಬಲ ಹೆಚ್ಚಿಸಲು ಇಡೀ ದೇಶ ಒಂದಾಗಿ ನಿಂತುಕೊಂಡಿತ್ತು. ಯೋಧರ ಬಲಿದಾನ, ಗಾಯಾಳುವಿನ ಸ್ಥಿತಿಗೆ ತೀವ್ರ ಸ್ಪಂದನೆ ನಡೆಸಿತ್ತು. ಹುತಾತ್ಮರಾದ ಯೋಧರ ಮನೆಗೆ ತೆರಳಿ ಜನ ನೆರವಿನ ಮಹಾಪೂರವನ್ನೇ ಹರಿಸತೊಡಗಿದ್ದರು. ಸರಕಾರ ಮತ್ತು ಆಡಳಿತವೂ ಅಷ್ಟೇ ಸಂವೇದನಾಶೀಲವಾಗಿ ಕಾರ್ಯನಡೆಸಿದ್ದವು.
ಈ ಸಂದರ್ಭದಲ್ಲಿ ನಾನು ಬೆಳಗಾವಿಯ "ಕನ್ನಡಮ್ಮ" ದಿನಪತ್ರಿಕೆಯಲ್ಲಿ ವರದಿಗಾರನಾಗಿದ್ದೆ. ಕಾರ್ಗಿಲ್ ಯುದ್ಧದಲ್ಲಿ ಹುತಾತ್ಮರಾದ ಜಿಲ್ಲೆಯ ಬಹುತೇಕ ಯೋಧರ ಮನೆಗೆ ತೆರಳಿ ಪರಿಸ್ಥಿತಿಯ ಪೂರ್ಣ ವರದಿ ಮಾಡಿದ್ದೆ. ಯೋಧರ ಪಾರ್ಥಿವ ಶರೀರ ಮರಾಠಾ ಲಘು ಪದಾತಿ ದಳದ ನೆಲೆ ಮತ್ತು ಜಿಲ್ಲಾಧಿಕಾರಿಗಳ ಕಚೇರಿ ಆವರಣಕ್ಕೆ ಬಂದಾಗಲೂ ಹಾಜರಿದ್ದು, ಪತ್ರಿಕೆಯ ಮೂಲಕ ಜನರಿಗೆ ಮಾಹಿತಿ ನೀಡಿದ್ದೆ. ದೃಶ್ಯ ಮಾಧ್ಯಮಗಳಲ್ಲಿ ತೋರಿಸುತ್ತಿದ್ದ ಯುದ್ಧದ ಭೀಕರ ಸನ್ನಿವೇಶ, ಕಡಿದಾದ ಬೆಟ್ಟಗಳ ರಣ ಭೂಮಿ ನೋಡಿದ್ದೆ. ಅದೆಲ್ಲ ನೆನಪು ಮತ್ತೆ ಅನಾವರಣ ಗೊಂಡಿತು. ಯೋಧರು ಮಣಭಾರ ಆಯುಧ, ಮದ್ದು, ಗುಂಡುಗಳನ್ನು ಹೊತ್ತು ಬಂದೂಕು ಚಲಾಯಿಸುತ್ತ ಆ ಕಡಿದಾದ ಬೆಟ್ಟಗಳನ್ನು ಹೇಗೆ ಹತ್ತಿರಬಹುದು? ಎಂದು ಮನ ಚಿಂತಿಸಿತು.
ಕಾರ್ಗಿಲ್ ಭಾರತದ ನೆಲದ ಲಡಾಖ್ ನ ದ್ರಾಸ್ ನದಿ ಪ್ರದೇಶದಲ್ಲಿದೆ. "ಟೈಗರ್ ಹಿಲ್" ಇಲ್ಲಿನ ಬೆಟ್ಟ ಶ್ರೇಣಿಯ ಅತ್ಯುನ್ನತ ಬಿಂದುವಾಗಿದೆ. ಇದರ ಎತ್ತರ 5,062 ಮೀಟರ್ ಅಂದರೆ 16,608 ಅಡಿಯಾಗಿದೆ. ಇಷ್ಟೆತ್ತರದ ಬೆಟ್ಟಗಳಲ್ಲಿ ಅಡಗಿ ಕುಳಿತು ತೋಪು ಹಾರಿಸುತ್ತಿದ್ದ ಶತ್ರುಗಳನ್ನು ನಮ್ಮವರು ಕೆಳಗಿನಿಂದ ಹೊಡೆದುರುಳಿಸುತ್ತ ಬೆಟ್ಟಗಳನ್ನು ಏರುತ್ತ ಗೆಲುವಿನ ಕೇಕೆ ಹಾಕುತ್ತಿದ್ದದ್ದು ರೋಮಾಂಚನಕಾರಿ ಸಂಗತಿ. ಇವರ ಸಾಹಸ, ವಿರೋಚಿತ ಇತಿಹಾಸಕ್ಕೆ ಸಾರ್ವಕಾಲಿಕವಾಗಿ ಸಾವಿರ ಸಾವಿರ ನಮನಗಳು.
ಭಾರತೀಯ ಸೇನೆ ಟೈಗರ್ ಹಿಲ್ ಮೇಲೆ ಮರು ಹಿಡಿತ ಸಾಧಿಸಿದ್ದು, ಕಾರ್ಗಿಲ್ ಯುದ್ಧದ ಅತಿಪ್ರಮುಖ ಗೆಲುವಾಗಿದೆ. ನಂತರ ದಿನಗಳ ಯುದ್ಧದಲ್ಲಿ ಶತ್ರುವಿನ ಅಳಿದುಳಿದ ಸೈನಿಕರು ಹೆಚ್ಚು ಪ್ರತಿರೋಧ ತೋರದೆ ಜಾಗ ಖಾಲಿ ಮಾಡಿ ಓಡಿಹೋದರು.
ಕಾರ್ಗಿಲ್ ಯುದ್ಧ 1999 ರ ಮೇ ತಿಂಗಳಿನ ಮೊದಲ ವಾರದಿಂದ ಜೂನ್ ತಿಂಗಳಿನ ಎರಡನೇ ವಾರದವರೆಗಿನ ಕಾಲದಲ್ಲಿ ಭೀಕರವಾಗಿ ನಡೆಯಿತು. ಭಾರತೀಯ ಸೇನೆ ಪ್ರತಿಕೂಲ ಪರಿಸ್ಥಿತಿಯಲ್ಲೂ ಯುದ್ಧದ ಮೇಲೆ ಹಿಡಿತ ಸಾಧಿಸುತ್ತ ಹೋಗಿ ಜುಲೈ 8 ರಂದು ಟೈಗರ್ ಹಿಲ್ ಮೇಲೆ ವಿಜಯದ ತ್ರಿವರ್ಣ ಧ್ವಜ ನೆಟ್ಟು ಶತ್ರುವಿನ ಎದೆ ಝಲ್ ಎನ್ನುವಂತೆ ಮಾಡಿತು. ಪಾಕಿಸ್ತಾನ ಸೇನೆ ಹೀನಾಯವಾಗಿ ಸೋತು ತೀವ್ರ ಮುಖಭಂಗ ಅನುಭವಿಸಿತು. ಯುದ್ಧ ಜುಲೈ 26ಕ್ಕೆ ಕೊನೆಗೊಂಡಿತು. ಯುದ್ಧದ ಗೆಲುವು, ಹುತಾತ್ಮ ಯೋಧರ ಸ್ಮರಣೆ ಹಾಗೂ ಪಾಲ್ಗೊಂಡ ಯೋಧರ ಗೌರವಕ್ಕಾಗಿ ಭಾರತ ಪ್ರತಿವರ್ಷ ಜುಲೈ 26 ರಂದು "ಕಾರ್ಗಿಲ್ ವಿಜಯ್ ದಿವಸ್"ದ ಆಚರಣೆ ಮಾಡುತ್ತಿದೆ.
1999 ರಲ್ಲಿ ಭಾರತದ ಪ್ರಧಾನಿಯಾಗಿದ್ದ ಅಟಲ್ ಬಿಹಾರಿ ವಾಜಪೇಯಿ ಅವರು ಉಭಯ ದೇಶಗಳ ನಡುವೆ ಸಂಬಂಧ ಸುಧಾರಣೆಗೆ ಅನೇಕ ಉಪಕ್ರಮಗಳನ್ನು ಕೈಗೊಂಡಿದ್ದರು. ಪಾಕಿಸ್ತಾನದ ಆಗಿನ ಪ್ರಧಾನಿ ನವಾಜ್ ಶರೀಫ್ ರೊಂದಿಗೆ ಮಾತುಕತೆ ಮಾಡಿದ್ದರು. ಉದಾರ ನಡೆಯ ಭಾಗವಾಗಿ ಪಾಕಿಸ್ತಾನಕ್ಕೆ ಬಸ್ ಯಾತ್ರೆ ಕೈಗೊಂಡಿದ್ದರು. ಆದರೆ ಅಲ್ಲಿನ ಸೇನಾ ಜನರಲ್ ಆಗಿದ್ದ ಪರ್ವೇಜ್ ಮುಷರಫ್ ಈ ಸೌಹಾರ್ದದ ಸ್ವಾದ ಅರಿಯದೆ ವಿಶ್ವಾಸದ ಬೆನ್ನಿಗೆ ಚೂರಿ ಇರಿದು ಭಾರತೀಯ ನೆಲದಲ್ಲಿ ಪಾಕಿಸ್ತಾನದ ಸೇನೆಯನ್ನು ಮೋಸ ಮಾರ್ಗದಲ್ಲಿ ನುಗ್ಗಿಸಿದ. ಇದು ಕಾರ್ಗಿಲ್ ನ ಭೀಕರ ಯುದ್ಧಕ್ಕೆ ಕಾರಣವಾಯಿತು. ಮುಂದೆ ಇದರ ಫಲವನ್ನು ಪಾಕಿಸ್ತಾನ ಅನುಭವಿಸಿತು.

ಇಷ್ಟೆಲ್ಲ ನೆನಪುಗಳು ಹುತ್ತದ ಮುಂದೆ ನಿಂತ ನನ್ನ ಮೈ ಮನಗಳಲ್ಲಿ ಮತ್ತೆ ಹರಿದಾಡಿ ತಾಜಾಗೊಂಡವು. ಇದೇ ಉಸಿರಿನಲ್ಲಿ ಸುಖಾಸುಮ್ಮನೆ ಮೈಮೇಲೆ ಬಿದ್ದ ಶತ್ರುವಿನ ಬಗ್ಗೆ ಭಾರತೀಯ ಯೋಧರು ಏನು ಅಂದುಕೊಂಡಿರಬಹುದು? ಎನ್ನುವ ಪ್ರಶ್ನೆ ಮೂಡಿತು. ಸ್ವಲ್ಪ ವಿಚಾರಿಸಿದಾಗ ಮನದಲ್ಲಿ ಕವನವೊಂದು ರೂಪಪಡೆಯ ತೊಡಗಿತು. ಅದಕ್ಕೊಂದು ಆಕಾರ ಕೊಟ್ಟು ನಿಮ್ಮೆದುರಿಗೆ ಇಟ್ಟಿದ್ದೇನೆ.
ಕವನ ಹೀಗಿದೆ...
ಶೀರ್ಷಿಕೆ:-

"ವಿಜಯ ಪತಾಕೆ"

ನೆಟ್ಟು ತೋರುವೆವು ನಾವು
ಅಭಿಮಾನದ ಹಾರುವ ಧ್ವಜ
ಕಳ್ಳ ಹೆಜ್ಜೆಯಲಿ ಶತ್ರು ನುಸುಳಿರುವ
ನಮ್ಮ ನೆಲದ ಶಿಖರದುತ್ತುಂಗದಲಿ
ಮಳೆಯೇನು? ಚಳಿಯೇನು?
ಏದುಸಿರು ತರುವ ಬಿಸಿಲೇನು?
ಎದೆ ಸೀಳಲು ಗಡಿಯಾಚೆಯಿಂದ
ಸಿಡಿದು ಬರುವ ಗುಂಡೇನು?
ಛಲ ಹುರಿಗೊಂಡಿದೆ. ಗುರಿ ನಿಶ್ಚಯವಾಗಿದೆ
ಶತ್ರುವಿನ ಎದೆ ಬಗಿದು ಮಣ್ಣಿಗಟ್ಟುವೆವು.
ನಮಗಂಜಿಕೆಯೇ? ಗಟ್ಟಿ ಗುಂಡಿಗೆ ನಮ್ಮದು
ವಜ್ರಕಾಯದ ವರದವರು. ಇವರೇನು ನಮಗೆ?
ಕಾದು ಕಾಲವನೆದುರಿಸುವೆವು
ಸಿಡಿದು ಪರ್ವತವ ಸೀಳಿಡುವೆವು
ಏನು ಬಲ್ಲನು ಶತ್ರು? ಭೂಗರ್ಭದೊಳಗಿನ ಜ್ವಾಲಾಮುಖಿ
ಸಿಡಿಲಬ್ಬರದ ನಮ್ಮ ರಣ ಶೌರ್ಯ, ಸಾಹಸಕೆ ಸಾಟಿ ಏನು?
ಕೆಟ್ಟನು ಶತ್ರು ವಿಶ್ವಾಸದ ಬೆನ್ನಿಗೆ ಚೂರಿ ಇರಿದು
ಕಳಚಿದ ಅವನ ಮುಖ ಗೋಸುಂಬೆ ವರ್ಣ
ನಮಗೆ ಗೊತ್ತಿಲ್ಲವೇ ಇವನ ಧೂರ್ತತನ
ಅದಕ್ಕಾಗಿ ಗಡಿ ಉದ್ದಕೂ ಇದೆ ವ್ಯಾಘ್ರಗಳ ಹಿಂಡು
ಇವನ ನಡೆ, ಕುಚೇಷ್ಟೆಗಳಿಗೆ ಮನ ಕುದ್ದು ಹೋಗಿದೆ
ಸೂರ್ಯನೊಡಲಿನ ತಾಪದಂತೆ
ಶಸ್ತ್ರ ಸಜ್ಜಿತರಾಗಿ ಗಡಿ ನುಸುಳಿದವರ ಎದೆ ಬಿರಿಯಲು
ಜೈ ಹಿಂದ್ ಗರ್ಜನೆಯೊಂದೇ ಸಾಕು
ದೊಣ್ಣೆಗೆ ಬೆದರುವ ಈ ಕುರಿಮಂದಿಯ ಮೇಲೆ
ತೋಪು, ತೋಳ್ಬಲಗಳ ಬಳಕೆ ನಮಗಿಷ್ಟವಿಲ್ಲ
ಇವರ ಬಗ್ಗೆ ನಮಗೆ ಹಗೆ ಎಂಬುದೂ ಇಲ್ಲ
ಅವರಿರಲಿ ಅವರಷ್ಟಕೆ ಉತ್ತಮ ನೆರೆಯಾಗಿ
ನಾವು ಆದಿ ಅನಾದಿಯಿಂದಲೂ ಶಾಂತಿ ಪ್ರಿಯರು
ಅಹಿಂಸಾ ಪರಮೋ ಧರ್ಮಃದ ಪಾಲಕರು
ವಸುಧೈವ ಕುಟುಂಬಕಂ ನಮ್ಮ ಮಂತ್ರ
ಇವು ನಮ್ಮ ಶಕ್ತಿ, ಇವು ನಮ್ಮ ಯುಕ್ತಿ, ಕೆಣಕಿದರೆ ಅವು ಬೆಂಕಿ
ಒಲುಮೆ ಗಳಿಸಿದರೆ ಹೊನ್ನುಂಟು
ಬಾಗಿ ನಮಿಸಿದರೆ ನೆಲೆಯುಂಟು
ಎಗರಿ ಬಿದ್ದರೆ ಹೆಡಮುರಿಗಟ್ಟಿ
ವಿಜಯ ಪತಾಕೆ ಹಾರಿಸುವೆವು

ಹೇಗಿದೆ ಕವನ? ಹಿಡಿಸಿದರೆ ನಿಮ್ಮ ಅಭಿಪ್ರಾಯವನ್ನು ಚ್ಯಾನೆಲ್ ನ ಕಾಮೆಂಟ್ ಬಾಕ್ಸದಲ್ಲಿ ದಾಖಲಿಸಿರಿ.

ನಮಸ್ಕಾರ್
ಜೈ ಹಿಂದ್...

01/08/2024

ಶಿಕ್ಷಣ ಶಿಲ್ಪಿ ಡಾ. ಪ್ರಭಾಕರ ಕೋರೆ

ನಮಸ್ಕಾರ ವೀಕ್ಷಕರೆ
ನಾನು ರಾಜು ಉಸ್ತಾದ್
"ನೇರ ಹೊಡೆತ" ಹೆಸರಿನ
ಸಮೂಹ ಜಾಲತಾಣಕ್ಕೆ ನಿಮಗೆ ಸ್ವಾಗತ.

ನಾನೀಗ ಶಿಕ್ಷಣ, ಸಹಕಾರ, ಕೃಷಿ ಮತ್ತು ಸಾಮಾಜಿಕ ಸೇವಾ ಕ್ಷೇತ್ರಗಳಲ್ಲಿ ಆಕಾಶದಷ್ಟು ಅವಕಾಶಗಳನ್ನು ತೆರೆದಿಟ್ಟ ಹಾಗೂ ಲಕ್ಷಾಂತರ ಜನರಿಗೆ ಜೀವನ ರೂಪಿಸಿಕೊಳ್ಳಲು ವೇದಿಕೆ ಕಲ್ಪಿಸಿ, ಕರ್ನಾಟಕದ ಹೆಸರು ದೇಶ ಮತ್ತು ವಿದೇಶಗಳಲ್ಲಿ ರಿಂಗುಣಿಸುವಂತೆ ಮಾಡಿದ ದೂರದೃಷ್ಟಿಯ ಧೀಮಂತ ನಾಯಕ ಡಾ. ಪ್ರಭಾಕರ ಕೋರೆ ಅವರ ಬಗ್ಗೆ ಮಾತನಾಡುತ್ತಿದ್ದೇನೆ.

ಸಾಮಾನ್ಯವಾಗಿ ನಾವು ಉನ್ನತ ಶಿಕ್ಷಣ ಹಾಗೂ ಅದರ ಗುಣಮಟ್ಟ ಇಲ್ಲವೆ ಗುಣಾತ್ಮಕತೆಯ ಬಗ್ಗೆ ಮಾತನಾಡುವಾಗ, ಇಂಗ್ಲಂಡ್ ದ ಕೇಂಬ್ರಿಡ್ಜ್, ಆಕ್ಸ್‌ಫರ್ಡ್ ಮತ್ತು ಅಮೇರಿಕದ ಹಾರ್ವರ್ಡ್ ವಿಶ್ವವಿದ್ಯಾಲಯಗಳ ನೆನಪು ಮಾಡಿಕೊಳ್ಳುತ್ತೇವೆ. ಅದೇ ಪ್ರಚಲಿತ ಭಾರತದ ವಿಷಯ ಬಂದಾಗ, ಶಿಕ್ಷಣ ಆಕಾಂಕ್ಷಿಗಳ ಹಾಗೂ ಶಿಕ್ಷಣ ತಜ್ಞರ ಸ್ಮೃತಿ ಪಟಲದ ಮೇಲೆ ಬೆಳಗಾವಿಯ "ಕೆಎಲ್ ಇ" ಸಂಸ್ಥೆಯ ಹೆಸರು ಸುಳಿದು ಹೋಗುತ್ತದೆ. ಆ ಎತ್ತರಕ್ಕೆ ಈ ಸಂಸ್ಥೆ ಈಗ ಬೆಳೆದು ನಿಂತಿದೆ. ಇದರ ಶ್ರೇಯಸ್ಸು ಕಳೆದ 40 ವರ್ಷಗಳಿಂದ ಆ ಸಂಸ್ಥೆಯ ಕಾರ್ಯಾಧ್ಯಕ್ಷರಾಗಿ ಸೇವೆ ಸಲ್ಲಿಸುತ್ತಿರುವ ಡಾ. ಪ್ರಭಾಕರ ಕೋರೆ ಅವರಿಗೆ ಸಲ್ಲುತ್ತದೆ. ಇದಿಷ್ಟೂ ಅವಧಿಗೆ ಇವರ ಅವಿರೋಧ ಆಯ್ಕೆ ನಡೆದಿರುವುದು ಇತಿಹಾಸ. ಇದಕ್ಕೆ ಸಹಕರಿಸಿದ ಸಂಸ್ಥೆಯ ಅಧ್ಯಕ್ಷ ಮತ್ತು ನಿರ್ದೇಶಕರುಗಳ ನಡೆ ಸ್ಮರಣೀಯ. ಸಿಬ್ಬಂದಿಗಳ ಅರ್ಪಣಾ ಸೇವಾಭಾವವೂ ಮೆಚ್ಚುವಂಥದ್ದು.
ನನಗಿಲ್ಲಿ ದೃಷ್ಟಾಂತವೊಂದರ ನೆನಪಾಗುತ್ತಿದೆ. ಎಲ್ಲರೂ ಅರಿತಿರುವಂತೆ ವಿಜಯನಗರ ಸಾಮ್ರಾಜ್ಯ ಭಾರತೀಯ ಇತಿಹಾಸದಲ್ಲಿ ಅಮರವಾದದ್ದು. ಇದನ್ನು "ಹಕ್ಕ-ಬುಕ್ಕ" ಎಂಬ ಸಹೋದರರು ಸ್ಥಾಪಿಸಿದರು. ಸಂಗಮ, ಸಾಳ್ವ, ತುಳುವ ಮತ್ತು ಅರವೀಡು ಹೆಸರಿನ ಒಟ್ಟು ನಾಲ್ಕು ರಾಜ ವಂಶಗಳು ಆಳಿದವು. ಆದರೆ ಅದು ಪ್ರವರ್ಧಮಾನದ ತುತ್ತತುದಿಗೆ ಎರಿದ್ದು, ತುಳುವ ವಂಶದ ಶ್ರೀಕೃಷ್ಣ ದೇವರಾಯನ ಕಾಲದಲ್ಲಿ.
ಹಾಗೆಯೇ ಇಲ್ಲಿ ಸಪ್ತರ್ಷಿಗಳು 1916 ರಲ್ಲಿ ಕೆಎಲ್ ಇ ಸಂಸ್ಥೆ ಸ್ಥಾಪಿಸಿದರು. ಕೊಡುಗೈ ದಾನಿಗಳು ಅವರ ಕೈ ಬಲಪಡಿಸಿದರು. ಮುಂದೆ ಬಂದವರು ಸಂಸ್ಥೆಯ ಬೇರುಗಳನ್ನು ಹಿಡಿದಿಟ್ಟರು. ಡಾ. ಪ್ರಭಾಕರ ಕೋರೆಯವರು ಚುಕ್ಕಾಣಿ ಹಿಡಿದ ನಂತರ ಶಿಕ್ಷಣ ಸಾಮ್ರಾಜ್ಯದ ವಿಸ್ತರಣೆಯ ದಂಡಯಾತ್ರೆ ಆರಂಭಗೊಂಡಿತು. ಅವರ ಅಶ್ವಮೇಧ ಕುದುರೆಯ ಓಟ ಇನ್ನು ನಿಂತಿಲ್ಲ. ಅದು ರಾಜ್ಯದಿಂದ ರಾಜ್ಯಕ್ಕೆ, ದೇಶದಿಂದ ದೇಶಕ್ಕೆ ಜಿಗಿದು ಹೊಸ ಶಾಖೆಗಳ ಸ್ಥಾಪನೆ ನಡೆಸಿದೆ. ಈ ನಡುವೆ ಸಂಸ್ಥೆ ತನ್ನ ವಯಸ್ಸಿನ ಸೆಂಚ್ಯುರಿ ಬಾರಿಸಿ, ಅದರ ಮೇಲೆ ಎಂಟು ರನ್ ತೆಗೆದಿದೆ. ಸ್ವತಃ ಪ್ರಭಾಕರ ಕೋರೆಯವರೂ 2024, ಆಗಸ್ಟ್ 1ಕ್ಕೆ ತಮ್ಮ ವಯಸ್ಸಿನ 77 ವರ್ಷ ಪೂರ್ಣ ಗೊಳಿಸಿ, ಸಹಸ್ರ ಚಂದ್ರದರ್ಶನದ ಕಡೆಗೆ ಹೆಜ್ಜೆ ಇಟ್ಟಿದ್ದಾರೆ. ಈಗಲೂ ದಣಿವರಿಯದೆ ದುಡಿಯುತ್ತಿದ್ದಾರೆ. ಯುವಕನ ಉತ್ಸಾಹದಲ್ಲಿದ್ದಾರೆ. ಹೀಗಾಗಿ ಇವರನ್ನು ಸಂಸ್ಥೆಯ ಅಷ್ಟಮ ಋಷಿ ಎಂತಲೂ ಕರೆಯುತ್ತಾರೆ.
ಆಗ 37ರ ಪ್ರಾಯದ ಕೋರೆ
1984 ರಲ್ಲಿ "ಕೆಎಲ್ ಇ" ಕಾರ್ಯಾಧ್ಯಕ್ಷ ಗದ್ದುಗೆ ಏರಿದಾಗ ಸಂಸ್ಥೆಯ ಅಂಗಸಂಸ್ಥೆಗಳ ಸಂಖ್ಯೆ ಕೇವಲ 38 ರಷ್ಟಿತ್ತು. ಈಗ ಅದರ ಸಂಖ್ಯೆ 310ಕ್ಕೆ ಏರಿದೆ. ಆಗ ವಾರ್ಷಿಕ ಬಜೆಟ್ 9 ಕೋಟಿ ರೂ.ಗಳ ಸಮೀಪವಿತ್ತು. ಈಗ 3,000 ಕೋಟಿ ರೂ. ದಾಟಿದೆ.
ಸಂಸ್ಥೆಯಲ್ಲಿ ವೃತ್ತಿಪರ ಕೋರ್ಸ, ಶಾಲಾ-ಕಾಲೇಜು, ಸಂಗೀತ, ರೇಡಿಯೋ ಕೇಂದ್ರ, ಕೃಷಿ ತರಬೇತಿ, ವಿಜ್ಞಾನ, ದಂತ, ಆರೈಕೆ, ಸಂಶೋಧನೆಗಳಿಂದ ಹಿಡಿದು, ಆರೋಗ್ಯ ಮತ್ತು ತಾಂತ್ರಿಕ ವಿಶ್ವವಿದ್ಯಾಲಯಗಳು ಇವೆ. 1,40,000 ಕ್ಕೂ ಅಧಿಕ ವಿದ್ಯಾರ್ಥಿಗಳು ಓದುತ್ತಿದ್ದಾರೆ. 18 ಸಾವಿರ ಸಿಬ್ಬಂದಿಗಳು ಇದ್ದಾರೆ.
"ಯುಎಸ್ ಎಂ-ಕೆಎಲ್ ಇ" ಅಂತಾರಾಷ್ಟ್ರೀಯ ವೈದ್ಯಕೀಯ ಕಾರ್ಯಕ್ರಮದಡಿ, ಮಲೇಷ್ಯಾ ದೇಶದ "ಯೂನಿವರ್ಸಿಟಿ ಸ್ಯಾನ್ಸ್" ನ ವಿದ್ಯಾರ್ಥಿಗಳಿಗೆ ಬೆಳಗಾವಿಯ ಕೆಎಲ್ ಇ ಕ್ಯಾಂಪಸ್ ನಲ್ಲಿ ವೈದ್ಯಕೀಯ ಶಿಕ್ಷಣ ನೀಡಲಾಗುತ್ತಿದ್ದು, ಇದಕ್ಕಾಗಿ ಪ್ರತ್ಯೇಕ ಸುಸಜ್ಜಿತ ಮಹಾವಿದ್ಯಾಲಯದ ನಿರ್ಮಾಣ ಮಾಡಲಾಗಿದೆ.
ಕೆಎಲ್ ಇ ಸಂಸ್ಥೆಯ ಸೇವಾಕಾರ್ಯ ನಗರ ಮತ್ತು ಪಟ್ಟಣ ಪ್ರದೇಶಕ್ಕಷ್ಟೇ ಸೀಮಿತವಾಗಿಲ್ಲ. ಅದು ಗ್ರಾಮೀಣ ಪ್ರದೇಶಕ್ಕೂ ವಿಸ್ತರಿಸಿಕೊಂಡಿದೆ. ಗ್ರಾಮೀಣದಿಂದ ಹೆಚ್ಚು ಆದಾಯ ಬರದಿದ್ದರೂ ಇಲ್ಲಿ ಶೇ. 50 ರಷ್ಟು ಸಂಸ್ಥೆಗಳನ್ನು ನಡೆಸುತ್ತಿದೆ.
ಕೆಎಲ್ ಇ ಸಂಸ್ಥೆಗಳು ಜ್ಞಾನ ವಿನಿಮಯ ಮತ್ತು ಕುಶಲತೆ ಹೆಚ್ಚಿಸಿಕೊಳ್ಳಲು ಜಾಗತಿಕ ಮಟ್ಟದ ಸಂಸ್ಥೆ ಮತ್ತು ವಿಶ್ವವಿದ್ಯಾಲಯಗಳೊಂದಿಗೆ ಸಹಭಾಗಿತ್ವ, ಒಡಂಬಡಿಕೆ, ಒಪ್ಪಂದ
ಮಾಡಿಕೊಂಡಿವೆ. ವಿಶ್ವ ದರ್ಜೆಯ ಪ್ರಯೋಗಾಲಯ, ಕ್ರೀಡಾ ಸೌಕರ್ಯಗಳನ್ನು ಹೊಂದಿವೆ.
ಸಂಸ್ಥೆ ಬೆಳೆಸಲು ಮತ್ತು ಅದನ್ನು ಆರ್ಥಿಕವಾಗಿ ಸಶಕ್ತಗೊಳಿಸಲು ಡಾ. ಪ್ರಭಾಕರ ಕೋರೆ ಅವರು ಬಹು ಆಯಾಮದಲ್ಲಿ ಕ್ರಮಕೈಗೊಂಡಿದ್ದಾರೆ. ತಮಗಿರುವ ರಾಜಕೀಯ ಮತ್ತು ಸಾಮಾಜಿಕ ಪ್ರಭಾವ, ಸಂಪರ್ಕಗಳನ್ನು ಬಳಸಿಕೊಂಡಿದ್ದಾರೆ. ಅದರ ಫಲ ಇಡೀ ಸಮಾಜಕ್ಕೆ ಸಿಗುತ್ತಿದೆ.
ಸಾಹಿತ್ಯ, ಸಂಗೀತ, ಕ್ರೀಡೆ ಮತ್ತು ಸಾಮಾಜಿಕ ಸೇವಾ ಕ್ಷೇತ್ರದ ಹೆಸರಾಂತರು, ಆಧ್ಯಾತ್ಮೀಕ ಗುರುಗಳು, ಕೈಗಾರಿಕೋದ್ಯಮಿಗಳು, ವಿಜ್ಞಾನಿಗಳು ಸಂಸ್ಥೆಯ ಕೇಂದ್ರ ಸ್ಥಾನ ಸೇರಿ ಅಂಗ ಸಂಸ್ಥೆಗಳಿಗೆ ಭೇಟಿ ನೀಡುತ್ತಲೇ ಇರುತ್ತಾರೆ.
ರಾಜಕೀಯ ದಿಗ್ಗಜರ ಸಂಖ್ಯೆಗೂ ಕಡಿಮೆ ಇಲ್ಲ. ರಾಷ್ಟ್ರಪತಿಗಳು, ಪ್ರಧಾನ ಮಂತ್ರಿಗಳು, ಕೇಂದ್ರ ಸಚಿವರುಗಳು, ನಾನಾ ರಾಜ್ಯಗಳ ರಾಜ್ಯಪಾಲರುಗಳು, ಮುಖ್ಯಮಂತ್ರಿಗಳು ಭೇಟಿ ನೀಡಿ ಸಾಧನೆಯ ಬಗ್ಗೆ ಬೆರಗು ವ್ಯಕ್ತಪಡಿಸಿ ಬೆಂಬಲಿಸಿದ್ದಾರೆ.
ಈಗ ಹೇಳಿ... ದಿಟ್ಟ ನಿರ್ಧಾರದ
ಈ ಶಿಖರಸಾಧಕ ನಾಯಕ ಡಾ. ಪ್ರಭಾಕರ ಕೋರೆ
ವಿಜಯನಗರ ಸಾಮ್ರಾಜ್ಯದ
ಶ್ರೀಕೃಷ್ಣ ದೇವರಾಯನಲ್ಲವೆ?!

ನೀವು ಏನೇ ಹೇಳಿ. ನನ್ನ ಪರಿಕಲ್ಪನೆ ಮತ್ತು ಅಭಿಪ್ರಾಯ ಹೀಗಿದೆಯಷ್ಟೆ...

ಡಾ. ಪ್ರಭಾಕರ ಕೋರೆ ಹುಟ್ಟಿದ್ದು, ಅದೊಂದು ಅಮೃತ ಗಳಿಗೆ. ದೇಶ ದಾಶ್ಯದ ಸಂಕೋಲೆಯಿಂದ ಮುಕ್ತವಾಗಲಿತ್ತು. ಸ್ವಾತಂತ್ರ್ಯೋದಯದ ಹೊಂಗಿರಣಗಳು ಪೂರ್ವ ದಿಕ್ಕಿನ ಬಾನಿನಂಚಿನ ಮಬ್ಬುಗತ್ತಲೆಯಿಂದ ಹೊರಬಿದ್ದಿದ್ದವು. ಅವುಗಳ ಹೊಳಪು ಸಮಗ್ರ ದೇಶವಾಸಿಗಳಲ್ಲಿ ಹರುಷ ತುಂಬಿತ್ತು. ಹೊಸ ಬೆಳಕಿನ, ಹೊಸ ಭರವಸೆಯ ಸೂರ್ಯ ಇನ್ನೇನು ನಮ್ಮ ಮಡಿಲಿನಲ್ಲಿ ಇರಲಿದ್ದಾನೆ ಎಂದು ಅವರೆಲ್ಲ ಕುಣಿದು ಕುಪ್ಪಳಿಸತೊಡಗಿದ್ದರು. ಸ್ವಾತಂತ್ರ್ಯ ಹೋರಾಟಗಾರರಲ್ಲಂತೂ ಎಲ್ಲಿಲ್ಲದ ಚೇತರಿಕೆ ಬಂದಿತ್ತು. ಅವರೆಲ್ಲ ದೇಶದ ರಾಜಧಾನಿ ದಿಲ್ಲಿಯ ಕಡೆಗೆ ಮುಖ ಮಾಡಿ ಅಲ್ಲಿ ನಡೆದಿದ್ದ ಲಘುಬಗೆಯ ರಾಜಕೀಯ ಬೆಳವಣಿಗೆಗಳ ಸುದ್ದಿ-ಸದ್ದುಗಳನ್ನು ಕಿವಿಗೊಟ್ಟು ಆಲಿಸುತ್ತಿದ್ದರು.
ಬ್ರಿಟಿಷ್ ವ್ಹೈಸ್ ರಾಯ್ ಲಾರ್ಡ್ ಮೌಂಟ್ ಬ್ಯಾಟನ್ ರು ಮಹಾತ್ಮಗಾಂಧಿ, ಜವಾಹರಲಾಲ್ ನೆಹರು, ಸರದಾರ ವಲ್ಲಭಭಾಯಿ ಪಟೇಲ್ ಒಳಗೊಂಡು ಇತರೆ ಪ್ರಮುಖ ನಾಯಕರೊಂದಿಗೆ ನಡೆಸಿದ್ದ ಚರ್ಚೆ ಹಾಗೂ ಅಧಿಕಾರ ಹಸ್ತಾಂತರಿಸಲಿರುವ ದಿನಾಂಕದ ಕಡೆಗೆ ಲಕ್ಷ್ಯ ಕೊಟ್ಟಿದ್ದರು. ಇದರಲ್ಲಿ ಡಾ. ಪ್ರಭಾಕರ ಕೋರೆಯವರ ತಂದೆ ಬಸವಪ್ರಭು ಕೋರೆಯವರೂ ಒಬ್ಬರಾಗಿದ್ದರು. ಅವರಿಗೆ ಡಬಲ್ ಖುಷಿ ಇತ್ತು. ಒಂದು ಸ್ವಾತಂತ್ರ್ಯದ್ದಾದರೆ ಮತ್ತೊಂದು ಮಡದಿ ಶಾರದಾದೇವಿ ಕೋರೆ ತುಂಬು ಗರ್ಭಿಣಿ ಯಾಗಿರುವುದಾಗಿತ್ತು. ಎರಡೂ ಖುಷಿ ಹೊತ್ತು ಚಿಕ್ಕೋಡಿ ತಾಲೂಕಿನ ಅಂಕಲಿ ಗ್ರಾಮದ ಜನೋತ್ಸವ ಮತ್ತು ಕುತೂಹಲದಲ್ಲಿ ಪಾಲ್ಗೊಂಡಿದ್ದರು. ಈ ನಡುವೆ 1947ರ ಜುಲೈ ತಿಂಗಳಿನ ದಿನಗಳು ಮುಗಿದು, ಆಗಸ್ಟ್ ತಿಂಗಳು ಕಾಲಿರಿಸಿತು. ಅದೇ ತಿಂಗಳದ ಮೊದಲ ದಿನವೇ (ಆಗಸ್ಟ್ 1) ಶ್ರೀಮತಿ ಶಾರದಾದೇವಿಯವರು ಗಂಡು ಮಗುವಿಗೆ ಜನ್ಮ ನೀಡಿದರು. ಆ ಮಗುವೇ ಡಾ. ಪ್ರಭಾಕರ ಕೋರೆಯವರು. ದೇಶದ ಸ್ವಾತಂತ್ರ್ಯದ ಹೊಸ್ತಿಲಿನಲ್ಲಿ ಈ ಮಗು ಜನಿಸಿದ್ದು, ಇಡೀ ಪರಿವಾರಕ್ಕೆ ಅಪಾರ ಖುಷಿ ನೀಡಿತು. ಆ ಖುಷಿಯನ್ನು ಅವರು ಇಡೀ ಊರಿಗೆ ಹಂಚಿ ಹಬ್ಬ ಆಚರಿಸಿದರು. ಆಗ ದೇಶಕ್ಕೆ ಸ್ವಾತಂತ್ರ್ಯ ಸಿಗಲು ಇನ್ನು ಕೇವಲ 14 ದಿನಗಳು ಮಾತ್ರ ಬಾಕಿ ಉಳಿದಿದ್ದವು. ಸ್ವಾತಂತ್ರ್ಯದ ಹೊಸ ಬೆಳಕಿನಲ್ಲಿ ಹುಟ್ಟಿದ ಈ ಮಗು ಈಗ ನಾನಾ ಕ್ಷೇತ್ರಗಳಲ್ಲಿ ಇಡೀ ದೇಶವೇ ನಿಬ್ಬೆರಗಾಗುವ ಸಾಧನೆ ಮಾಡಿದೆ. ಮುಂದೆ ಮಾಡಬೇಕೆನ್ನುವವರಿಗೆ ಮಾದರಿ ನೀಡಿದೆ.

ಪ್ರಭಾಕರ ಕೋರೆಯವರ ಬಾಲ್ಯ ಹುಟ್ಟೂರು ಅಂಕಲಿ ಗ್ರಾಮದಲ್ಲಿಯೇ ಕಳೆಯಿತು. ಕುಟುಂಬದ ಕಬ್ಬಿನ ಗದ್ದೆಗಳಲ್ಲಿ ತಿರುಗಾಡುವುದು, ಕೆಲಸದವರಿಗೆ ನೆರವಾಗುವುದನ್ನು ಮಾಡುತ್ತಿದ್ದರು. ದೃಷ್ಟಿ ಬೀರಿದಾಗ ನಿಸರ್ಗದ ಮಡಿಲಿನಲ್ಲಿ ಕಾಣಿಸುತ್ತಿದ್ದ ವೈಭವದ ದೃಶ್ಯಗಳು ಅವರ ಮನಸೂರೆ ಗೊಳ್ಳುತ್ತಿದ್ದವು. ಮೋಹಕ, ಭಾವುಕರಾಗಿ ನೋಡುತ್ತಿದ್ದರು. ವೈವಿಧ್ಯಮಯ ಸೃಷ್ಟಿಗೆ ನಮಿಸುತ್ತಿದ್ದರು. ಕೃಷ್ಣಾ ನದಿಯಲ್ಲಿ ಈಜಿ ಖುಷಿ ಪಡುತ್ತಿದ್ದರು. ಬಿಡುವು ಸಿಕ್ಕಾಗ ಗೆಳೆಯರೊಂದಿಗೆ ಫುಟ್ಬಾಲ್, ವ್ಹಾಲಿಬಾಲ್, ಕಬಡ್ಡಿ ಆಡುತ್ತಿದ್ದರು. ವಸ್ತಾದ ಎನ್ನುವ ಶಿಕ್ಷಕ ಕುಸ್ತಿ ತರಬೇತಿ ನೀಡುತ್ತಿದ್ದ. ಒಟ್ಟಾರೆ ಗ್ರಾಮ ಪರಿಸರ ಅವರಿಗೆ ನಂದಗೋಕುಲದ ನಿರ್ಮಾಣ ಮಾಡಿತ್ತು.
7ನೇ ತರಗತಿ ವರೆಗಿನ ಶಿಕ್ಷಣ ತಂದೆಯವರೇ ಸ್ಥಾಪಿಸಿದ್ದ ಅಂಕಲಿ ಎಜ್ಯುಕೇಶನ್ ಸೊಸೈಟಿಯಲ್ಲಿ ನಡೆಯಿತು. ತಂದೆ ಅತ್ಯಂತ ಶಿಸ್ತಿನ ಸಿಪಾಯಿ. ಜತೆಗೆ ದೈವೀಭಕ್ತ. ತಾಯಿ ಸಭ್ಯ ಗೃಹಿಣಿ, ಅನ್ನಪೂರ್ಣೇಶ್ವರಿ. ಮನೆಯಲ್ಲಿ ಅನ್ನ ದಾಸೋಹ ಯಾವಾಗಲೂ ಇದ್ದೇ ಇರುತ್ತಿತ್ತು.
ತಂದೆಗೆ ಖಾದಿ ಮೇಲೆ ವಿಪರೀತ ಪ್ರೇಮ. ಮಕ್ಕಳೂ ಅದನ್ನೇ ಧರಿಸಬೇಕೆಂದು ಪ್ರೇರೇಪಿಸುತ್ತಿದ್ದರು. ರಾತ್ರಿ 9 ಗಂಟೆ ಆಯಿತು ಎಂದರೆ ಎಲ್ಲ ಮಕ್ಕಳೂ ಮನೆಯಲ್ಲಿರಬೇಕಿತ್ತು. ತಂದೆ ಅಪ್ಪಟ ಕನ್ನಡಿಗನಾದರೂ, ಉದ್ಯಮಿಯಾಗಿದ್ದರಿಂದ ಗಡಿಯಲ್ಲಿ ಬಳಕೆಯಲ್ಲಿದ್ದ ಮರಾಠಿಯನ್ನೂ ತಿಳಿದಿರಬೇಕೆಂಬ ಆಸೆ ಇಟ್ಟುಕೊಳ್ಳುತ್ತಿದ್ದರು. ಆದರೆ ಪ್ರಭಾಕರ ಕೋರೆಯವರು ಮರಾಠಿ ಭಾಷೆಯನ್ನು ಅರಿತುಕೊಂಡರೂ ಕನ್ನಡ ಅಭಿಮಾನದಿಂದ ಒಂದಿಂಚೂ ಕದಲಲಿಲ್ಲ. ಕನ್ನಡ ಕಾರ್ಯಗಳನ್ನು ಎಳೆಯ ವಯಸ್ಸಿನಿಂದಲೇ ಆರಂಭಿಸಿದ್ದರು. ಈಗ ಕನ್ನಡವನ್ನೇ ಉಸಿರಾಗಿಸಿಕೊಂಡಿದ್ದಾರೆ.
ಪ್ರಾಥಮಿಕ ಶಿಕ್ಷಣ ಪೂರ್ಣಗೊಂಡನಂತರ ಪ್ರಭಾಕರ ಕೋರೆಯವರು, ಪ್ರೌಢ ಶಿಕ್ಷಣಕ್ಕಾಗಿ ಕೆಎಲ್ ಇ ಸಂಸ್ಥೆಯ ಬೆಳಗಾವಿಯ ಜಿ.ಎ. ಹೈಸ್ಕೂಲ್ ಗೆ ಬಂದರು. ಮುಂದೆ ಇಲ್ಲಿನ ಗೋಗಟೆ ವಾಣಿಜ್ಯ ಮಹಾವಿದ್ಯಾಲಯದಿಂದ ಬಿ.ಕಾಂ. ಪದವಿ ಪಡೆದರು. ತಮ್ಮ ನಾಲ್ಕು ಜನ ಸಹೋದರರು ಮತ್ತು ಮೂರು ಜನ ಸಹೋದರಿಯರಲ್ಲಿ ಪದವಿವರೆಗಿನ ಶಿಕ್ಷಣ ಪಡೆದ ಏಕೈಕ ವ್ಯಕ್ತಿ ಇವರಾಗಿದ್ದಾರೆ.
ಇವರು ಗೋಗಟೆ ವಾಣಿಜ್ಯ ಮಹಾವಿದ್ಯಾಲಯದ ವಿದ್ಯಾರ್ಥಿ ಪರಿಷತ್ ನ ಪ್ರಧಾನ ಕಾರ್ಯದರ್ಶಿ ಸ್ಥಾನಕ್ಕೆ ಅವಿರೋಧವಾಗಿ ಆಯ್ಕೆಯಾದದ್ದು, ಇದೇ ಸಂರ್ಭದಲ್ಲಿ ಜಪಾನ್ ದೇಶದ ಓಸಾಕಾದಲ್ಲಿ ಜರುಗಿದ ವಿದ್ಯಾರ್ಥಿ ಪರಿಷತ್ ನ ಸಮಾವೇಶ "ಎಕ್ಸಪೋ" ದಲ್ಲಿ ಪಾಲ್ಗೊಂಡದ್ದು ಅವರೊಳಗಿನ ನಾಯಕನನ್ನು ಗಟ್ಟಿಗೊಳಿಸಿತು. ಅದು ಪ್ರಗತಿಯತ್ತ ಮುನ್ನುಗ್ಗಲು ಪ್ರೇರಣೆ ನೀಡಿತು. ಅವರು ವಯಸ್ಕರಾದಂತೆ ಶಿಕ್ಷಣ, ಓದು, ಕೃಷಿ, ಸಹಕಾರ, ರಾಜಕೀಯ, ಚಲನಚಿತ್ರ ಉದ್ಯಮ ಮತ್ತು ಸಮುದಾಯಿಕ ಚಟುವಟಿಕೆಗಳಲ್ಲಿ ಅತೀವ ಆಸಕ್ತಿ ಬೆಳೆಸಿಕೊಂಡರು. ಇದೆಲ್ಲ ಅವರನ್ನು ಒಬ್ಬ ಅದ್ಭುತ ಸಂಘಟನಾಕಾರನನ್ನಾಗಿ ರೂಪಿಸಿತು.
ಈ ನಡುವೆ ಪ್ರಭಾಕರ ಕೋರೆ ಪುಣೆ ಫರ್ಗುಸನ್ ಕಾಲೇಜಿನಿಂದ ಬಿಎಸ್ ಸಿ ಪದವಿ ಪಡೆದಿದ್ದ ಆಶಾ ಕೊಠಾವಳೆ ಅವರೊಂದಿಗೆ 1973ರಲ್ಲಿ ಮದುವೆಯಾದರು. ಇದು ಅವರ ಜೀವನಕ್ಕೆ ಹೊಸ ತಿರುವು ನೀಡಿತು. ಪ್ರೀತಿಯ ಮಕ್ಕಳಾದ ಪ್ರೀತಿ, ದೀಪ್ತಿ ಮತ್ತು ಅಮಿತ್ ಅವರ ಜನ್ಮವಾಯಿತು. ಖುಷಿ ತುಪ್ಪದ ಕಣ ಕಣಗಳಂತೆ ಕುಟುಂಬದಲ್ಲಿ ತುಂಬಿಕೊಂಡಿತು. ಕೋರೆ ಸಿಟ್ಟಿನ ಸ್ವಭಾವವನ್ನು ತಿದ್ದಿದ ಕೀರ್ತಿ ಆಶಾತಾಯಿ ಕೋರೆ ಅವರಿಗೆ ಸಲ್ಲುತ್ತದೆ. ಕೋರೆ ಸಾಧನೆಯ ಹಿಂದೆಯೂ ಅವರೆ ಬೆನ್ನೆಲುಬಾಗಿ ನಿಂತುಕೊಂಡಿದ್ದಾರೆ. ಗಂಡ, ಹೆಂಡತಿಯ ಪ್ರೀತಿ ಲಕ್ಷ್ಮೀ ಮತ್ತು ನಾರಾಯಣನಂತೆ. ಈಗಲೂ ಅವರು ಮದುವೆಯ ಹೊಸ ದಿನಗಳ ಪ್ರೀತಿಯನ್ನೇ ಕಾಯ್ದುಕೊಂಡಿದ್ದಾರೆ. "ಮೇಡ್ ಫಾರ್ ಈಚ್ ಅದರ್" ಎನ್ನುವಂತೆ ಒಬ್ಬರು ಮತ್ತೊಬ್ಬರಿಗೆ ಶಕ್ತಿ, ಆಸರೆಯಾಗಿ ನಿಂತುಕೊಂಡಿದ್ದಾರೆ.
ಪ್ರಭಾಕರ ಕೋರೆ 1974ರಲ್ಲಿ ಅಂಕಲಿ ಎಜ್ಯುಕೇಶನ್ ಸೊಸೈಟಿಯ ಕಾರ್ಯದರ್ಶಿಯಾಗಿ ನಿಯುಕ್ತಿಗೊಂಡರು. ಇವರ ಹಿರಿಯ ಸಹೋದರ ಚಿದಾನಂದ ಕೋರೆ ಕೆಎಲ್ ಇ ಸಂಸ್ಥೆಯ ಕಾರ್ಯಾಧ್ಯಕ್ಷರಾಗಿದ್ದರು. ಆದರೆ 1981ರಲ್ಲಿ ಹೃದಯಾಘಾತದಿಂದ ಅಕಾಲಿಕವಾಗಿ ನಿಧನವಾದರು. 1963ರಲ್ಲಿ ತಂದೆ ಇಹಲೋಕ ತ್ಯಜಿಸಿದಾಗ ಅವರ ಜವಾಬ್ದಾರಿ ಹೊತ್ತಿದ್ದ ಇವರು ಅಗಲಿಕೆಯಾದದ್ದು ಕುಟುಂಬದ ಎಲ್ಲರಿಗೂ ಬರಸಿಡಿಲು ಬಡಿಸಿತು. ಸಂಸ್ಥೆಯಲ್ಲಿ ತೆರವಾದ ಇವರ ಸ್ಥಾನಕ್ಕೆ 1982ರಲ್ಲಿ ನಡೆದ ಉಪಚುನಾವಣೆಯಲ್ಲಿ ಪ್ರಭಾಕರ ಕೋರೆ ಅವರು ನಿರ್ಧೇಶಕರಾಗಿ ಆಯ್ಕೆಗೊಂಡರು. ಸಂಸ್ಥೆಯಲ್ಲಿ ಸವಾಲಿನ ಕೆಲಸಗಳನ್ನು ನಿಭಾಯಿಸಿ ಸೈ ಎನಿಸಿಕೊಂಡರು. ಇದು ಸಂಸ್ಥೆಗೆ 1984ರಲ್ಲಿ ನಡೆದ ನಿಗದಿತ ಚುನಾವಣೆಯಲ್ಲಿ ಪ್ರಭಾಕರ ಕೋರೆ ಅವರನ್ನು ಕಾರ್ಯಾಧ್ಯಕ್ಷ ಸ್ಥಾನಕ್ಕೆ ಅವಿರೋಧವಾಗಿ ಆಯ್ಕೆಯಾಗುವಂತೆ ಮಾಡಿತು.
ಡಾ. ಕೋರೆ, ಸಂಸ್ಥೆ ಮತ್ತು ಅವುಗಳ ಆವರಣಗಳನ್ನು ಕಲಾತ್ಮಕವಾಗಿ ಕಟ್ಟಿದ್ದಾರೆ. ನಿಸರ್ಗ ಬಾಲ್ಯದಲ್ಲಿ ಅವರ ಮೇಲೆ ಬೀರಿದ್ದ ಪ್ರಭಾವದ ಛಾಪು ಇಲ್ಲಿ ಎದ್ದು ಕಾಣಿಸುತ್ತದೆ. ಕಟ್ಟಡಗಳ ಸೌಂದರ್ಯವೂ ಮನ ಸೆಳೆಯುತ್ತದೆ. ನಮ್ಮ ಸಂಸ್ಥೆಗಳೂ ಹೀಗಿರಬೇಕೆಂದು ಇತರರಲ್ಲಿ ಆಸೆ ಹುಟ್ಟಿಸುತ್ತವೆ.
ರಾಜಕೀಯವಾಗಿ ಡಾ. ಪ್ರಭಾಕರ ಕೋರೆ ಕರ್ನಾಟಕದ ಮುಖ್ಯಮಂತ್ರಿ, ಕೇಂದ್ರ ಸಚಿವ ಆಗದಿದ್ದರೂ, ಅಷ್ಟೇ ಗೌರವದ ಸ್ಥಾನದಲ್ಲಿ ಕುಳಿತುಕೊಂಡಿದ್ದಾರೆ. ಅಮೇರಿಕೆಯ ಅಧ್ಯಕ್ಷರಾಗಿದ್ದ ಡೊನಾಲ್ಡ್ ಟ್ರಂಪ್ ಅವರನ್ನು ಭೇಟಿ ಮಾಡಿ ಚರ್ಚಿಸಿರುವ ಛಾತಿಗಾರಿಕೆ ಮತ್ತು ಗೌರವ ಅವರಿಗೆ ಸಂದಿದೆ.
ಕರ್ನಾಟಕದ ವಿಧಾನ ಪರಿಷತ್ ಸದಸ್ಯ, ಸಭಾಪತಿ, ಮೂರು ಅವಧಿಗೆ ರಾಜ್ಯಸಭಾ ಸದಸ್ಯ, ರಾಜಕೀಯದ ಇತರೆ ಹುದ್ದೆ ಮತ್ತು ಜವಾಬ್ದಾರಿಗಳನ್ನು ಯಶಸ್ವಿಯಾಗಿ ನಿಭಾಯಿಸಿದ್ದಾರೆ. ಅಲ್ಲೂ ತಮ್ಮ ಕಾರ್ಯಕುಶಲತೆಯ ಹೆಚ್ಚುಗಾರಿಕೆ ಮೆರೆದು, ಪಕ್ಷ, ಪ್ರತಿಪಕ್ಷದವರಿಂದಲೂ ಮೆಚ್ಚುಗೆ ಪಡೆದಿದ್ದಾರೆ.
ಕೋರೆ ಹೆಜ್ಜೆ ಇಟ್ಟಲ್ಲೆಲ್ಲ ತಮ್ಮ ಛಾಪು ಮತ್ತು ಪ್ರಭಾವ ಬಿಟ್ಟಿದ್ದಾರೆ. ಇದು ಅವರ ಸ್ವಭಾವವೆನ್ನಿ... ಇಲ್ಲವೆ ಸಮಾಜ ಅಥವಾ ಕೆಲಸದ ಕಾಳಜಿ, ಕಳಕಳಿ ಎನ್ನಿ. ಒಟ್ಟಾರೆ ಅವರೊಬ್ಬ ನಮ್ಮೊಳಗಿನ ದಂತಕಥೆಯಷ್ಟೆ...

ನಮಸ್ಕಾರ

ಜೈ ಹಿಂದ್...