13/04/2023
Nan galchu hin jedhin!!!!
====================================
Hantuuta mana namaa keessa jiraattu tokkotu uraa keessan waan namoonni hojjetan argite. Jarri manaa kan isaan kaa'aa turan kiyyoo ittiin hantuuta qaban tahuu hubattee rifatte. Sana booda waan argite kana bineeldota mana keessaa hundatti himtee akeekkachiisuuf murteessite.
Jalqaba gara Lukkuu deemuun itti himte lukkuunis akkas jettee deebisteef: "Dhugaa dha wanti kun siif rakkoo guddaa dha ana garuu waan na miidhu maal qabaree? Na biraa deemi" jetteen. Itti aansuun ammoo Hoolaa bira deemuun waan argite kana itti himte. Hoolaanis "Dhiifama waaqa siif kadhachuu malee homaa siif gochuu hin danda'u" jetteen. Dhumarra Sa'a(Dullattii) bira deemtee itti himte. Dullattiin sunis "anarratti miidhaa fidu qabaaree? Hin qabu" jettee deebisteef. Hantuutni sunis bineeldota hunduma irraa yaada furmaataa dhabdee mana isheetti deebitee gadduu fi yaadda'uu eegalte.
Halkan sana tasa sagaleen waca wayii mana keessaa dhaga'ame. Kiyyoo sanatu waa qabe. Haati manaa namichaas kiyyoon sun hantuuta qabe jechuun dukkana keessa caccabdee fiigdee gaafa dhaqxu, kan qabame hantuuta osoo hin taane "Bofa" ture. Eegee isaa waan qabamee lubbuuf muddamaa tureef haadha mana ofirratti hidde. Isheenis achumatti iyyitee lafa dhoofte. Abbaan manaa sanaas gara mana yaalaatti ishee geesse.
Erga dawaa mana yaalaa irraa fudhatee galees, nyaata babbareedaa hojjetee akka isheen fayyituuf 'lukkuu' qabu sana qaleef. Firoonni haadha manaa isaa gaafachuuf gaafa fagoo irraa dhufanis ittiin isaan geggeessuuf 'hoolaa' sana qalee firoota isaa ittiin galche.
Dhukkubni ishee ittuma cimee dhuma irratti haati mana isaa lubbuun dabarte/duute. Achumaanis namichi 'sa'a' sana qalee ittiin sirna awwaalcha haadha mana isaa raawwate.
Kanaaf maal jechuu fedheeni, gaafa namni dhufee rakkoo isaa nutti himatu nun miidhu, maaltu na galcha? jechuun dura itti haa yaadnu. Ati addunyaa kana jiraachuun kee ofii kee gammaddee jiraachuuf qofa miti.
🙏 Kabbee Kabbitoo
