VBTC News

12/06/2024

PIPOL I SAPOTEM AMENDMENT
----
Pipol blong Vanuatu i sapotem Amendment blong Constitution 17A mo 17B tru long Nasenol Referendum. Hemi soem se YES nao hemi win.

Resalt ia hemi:

17A i pas wetem 59.28% (YES)- 40.74% (NO)
17B i pas wetem 57.98% (YES)- 42.02% (NO)

Resalt i kamaot long tedei naet.

12/06/2024

UPDATED.

Electoral Commission I anaonsem se bae hemi mekem ofisel dekleresen blong result blong National Referendum long 6.00pm tedei.

Electoral Commission bae hemi no mekem dekleresen blong resalt blong Nasenol Referendum long tedei.

Komisen Jeaman, Edward Kaltamat ise reason from oli nid blong corektem sam "MISMAJ" long counting.

Hemi no save talem wetaem stret bae anaonsmen i hapen mbe hemi se samtaem long wik ia.

12/06/2024

Vanuatu nasonal men's futbol tim I karem blessings blong President blong Ripablik blong Vanuatu tedei.

Taem His Excellency Nikenike Vurobaravu I blessem Vanuatu men's tim tedei mo wishim nasonal men's tim all the best long ol mats blong olketa blong OFC men's nations cup long manis ia.

12/06/2024

Conciliation bitwin Vanuatu Tijas Union (VTU), Teaching Seves comisen (TSC) mo Ministri blong Edukesen (MoET) I adjourn iko long Fridei namba 14 June.

Hemia folem absence blong Sekretari Generol blong Vanuatu Tijas Union long fes conciliation weh I sud tekem ples tedei.

VBTC nius I toktok wetem Akting Jeaman blo Teaching Seves comisen, Hardison Tabi mo hemi talem seh long conciliation tede lo ofis blo labour everi pati Oli present beh VTU nomo I no bin stap mekem oli adjournem.

Akting Jeaman Tabi I talem seh stand blo TSC hemi blong I neutral mo I koperet blo traem blo solvem issue weh I stap naoia.

12/06/2024

Vanuatu Tijas Union i refuse blong attendem Conciliation weh gavman i singoutem yestede.

Fes Conciliation bitwin Ministri blong Edukesen (MoET), Teaching seves Comisen (TSC) mo Vanuatu Tijas Union (VTU) i sud tekem ples tede moning long 9 oklok.

Long wan interview wetem Sekretari Generol blong VTU, Johnathan Yonah hemi talem seh risen bihaen lo rifusol blo hemi attend i from proses ia oli komplitim vinis.

Hemi seh proses ia i stap insaed long 30 deis notis blong industrial aksen.

Wetem hemia Mr Yonah i talem seh VTU i fil seh bambae hemi no saveh brijim trade dispute act.

SG Yonah i seh sipos Custodian blong act weh hemi komisena blo labour i wantem brijim act blong i singoutem wan nara conciliation hemi stap long hem blo i mekem beh stand blo VTU hemi no blo brijim act ia.

Hemi kontinu blo talem seh VTU i respektem act blo talem seh taem blo conciliation i ova vinis.

Hemi seh mo mata long ol discontinuance oda weh i kamaot long Gavman beh VTU i fil seh ino kat eni avenue long hem.

SG Yonah i talem edukesen blo ol pikinini hemi impoten beh Gavman i stap draggem ol proses blo givim wanem weh ol tija oli stap askem.

Long morning tedei i lukim presens blo Farmers union, Vanuatu association blong pablik sevens trade Union mo Vanuatu national workers Union oli stanap long solidarity wetem VTU.

11/06/2024

Fes Conciliation meeting blong Vanuatu Teachers Union, Ministry blong Education mo Teaching Service Commission ino moa hapen tedei morning.
VBTC News hemi kasem reliable infomesen se VTU hemi desaed blong ino atendem meeting.

Moa storian long ol hour we istap kam...

11/06/2024

Delta Shelter limited hemi openem Project blong bildim Strong House wei i save stanap agensem ol bigfala cyclone.

Wan partner blong Project ia, Pastor Mathew Jeffares ibin visitim ol house wei cyclone Pam long 2015 i damejem, mo hemi luk need blong kat ol Ni-Vans i mas bildim ol cycone resistant house.

Partner blong hem, Pastor Remo Shem hemi seh ol house ia Ikat 3 types, weh oli cost, 10.8m2 blong VT1.9 million, 17.2m2 blong VT3.4 million mo 30m2 blong VT4.7 million.

Delta Shelter I believe seh every Ni-Vans I needim aos ia from Vanuatu istap fesem plante Cyclone mo hemi mas ready.

11/06/2024

Terminet PSC Jeman: Ombudsman

Ombudsman Hamlison Bulu hemi mekem wan rikomendesen blong terminetem jemann blong Pablik Seves Comisen (PSC), Martin Mahe folem wan ripot blong hem weh i soem seh PSC chairman ia i feil blong upholdem constitution.

Rikomendesen blong Ombudsman ia i stap long wan public ripot weh hem i mekem abaot wok blong David Seule weh hemi no stop blong wok olsem wan memba blong PSC nomata weh term blong hem i finis long 2023.

Ripot ia weh i rilis long namba 10 long manis ia i soem seh nomata weh term blong Mr Seule i finis long namba 29 June long 2023, hemi kontiniu blong atendem ol miting blong PSC mo i kontiniu blong karem siting alawens mo akting jeman alawens.

Folem hemia, Ombudsman i mekem rikomendesen tu blong Mr Seule hemi mas refandem i gobak long Gavman evri mani weh hemi bin risivim unlawfuli tru long siting alawens mo akting alawens.

Ripot ia i faenemaot seh Mr Mahe nao i bin ususm posisen blong hem olsem Jeman blong PSC blong givim raet blong Mr Seule i kontiniu blong pat long ol wok blong Commission.

Ombudsman i talem tru long ripot ia seh aksem blong Jeman blong PSC ia hemi violatem Atikel 59 (1) blong Constitution mo i lid i ko blong brekem Lidasip Kod Akt, Seksen 13.

Investikesen blong Ombudsman i faenemaot tu seh Sekretari Jeneroll blong PSC hemi bin informem Mr Mahe abaot en blong kontrak blong Mr Seule be PSC Jeman hemi feil blong konsalt wetem Prime Minister. Hemi seh aksen blong hemia tu hem no folem Seksen 3 blong Lidasip Kod Akt.

Faending namba 3 i soem seh Mahe hemi feil blong folem rol blong hem olsem weh Seksen 12 (d) blong Pablik Seves Akt i talem. Hemia tu hemi brekem Lidasip Kod Akt.

Las faending blong ripot ia i soem seh olsem wan lida, anda long Lidasip Kod, Mr Mahe hemi brekem Seksen 13 (1) (a) blong Lidasip Kod Akt.

Las rikomendesen blong Ombudsman hemi blong Head of State hemi mas informem hem within 30 woking dei long wanem disisen hemi tekem beis blong ripot ia.

Olgeta faending ia Mr. Mahe ino akri long olgeta.

Long respon blong hem, PSC Chairman ise hemi mata blong State haus blong apointem Mr. Seule mo CEO blong Pablik service blong i infomem hem.

Mr. Mahe i claim se hemi no awea se term blong Mr. Seule hemi end.

Ombudsman Report ia hemi rilis long June namba 10, 2024.

Photo: Ombudsman Hamlison Bulu

11/06/2024

Vanuatu intanasonal we I ple wetem Auckland City FC blong New Zealand, Timothy Loic Boulet I kasem Port Vila intanasonal eapot tedei.

Loic emi last pleia we I save joinem tim Vanuatu tedei mo redi blong plei akensem Solomon Islands nasonal futbol tim long wiken ia.

Photo: VFF.

11/06/2024

Day 1 blong conciliation meeting bitwin MoET, TSC mo VTU bambae hemi stap tumoro Wednesday namba 12 June long 9:00 moning.

Infomesen weh i kam long Gavman tedei aftenun i seh Gavman i stap askem long ol pati responsibol we hemi Direkta Generol blong Ministry blong Edukesen (MoET) Bergman Iati, Akting Jeaman blong Teaching Seves Comisen (TSC), Hardison Tabi mo Sekretari Generol blong Vanuatu Tijas Union (VTU), Johnathan Yonah blong oli mas present tumoro long conciliation ia blo oli sortemaot ol claims mo demands weh i stap.

Conciliator weh Komesina blong Labour Murielle Meltenoven i appointem bambae i ova lukim Conciliation ia hemi 'Jino Kalnpel' weh i stap olsem compliance ofisa long ofis blo labour depatmen.

Conciliation ia bae Ofis blo labour department nao bae hemi facilitatem.

Folem rekwes blong VTU blo conciliation i tekem ples lo premises blo hem, hao eva Gavman i fil seh hemi stret fasin blong conciliation i tekem ples lo ofis blo labour depatmen from bambae hemi moa neutral venue.

Gavman emphasisem strong seh hemi olwes mas pem olgeta legal entitlement blong olgeta wokas beh wetem kes ia folem ol disputes konsenem bigfala mani konsen weh i kat alegesen blo mismanagemen long hem bambae ol pati responsibol oli mas sortem aot feswan blong Gavman i lukim weta olgeta claims o demands hemi Genuine o folem stret fasin blong Gavman i saveh sortem aot.

Olgeta dates blong Conciliation bambae fes wan hemi Wednesday namba 12 June, Friday namba 14 June mo Monday namba 17 June nekis wik.

Sapos oli no kamap long wan resolution bambae commissioner blong labour i saveh referem mata ia iko long Tribunal weh i stap anda long Trade dispute act.

Gavman i askem ol pati blong oli present long ol time ia blong rili solvem mata ia.

10/06/2024

Kol I Kamaot long Vanuatu Tijas Union (VTU) iko long Gavman blong i mas ko long premises blong VTU tedei blong oli sortem out ol dispute weh i stap.

Long wan press conference tedei moning VTU tru long sekretari Generol blong hem, Johnathan Yonah I kol mo kivim long Gavman kasem 5pm tedei aftenun namba 11 June blong oli ansa long kol ia.

SG Yona I talem seh Sipos Gavman I fail blong stap long VTU premises kasem given time, bambae VTU I extendem kol ia iko long lo ol nurses, Vanuatu nasenal wokas union mo ol Narawan moa blo oli join in tumoro long VTU blo Oli givim wan vois weh I loud moa iko lo Gavman blong dei blo adresem krae blo olgeta wokas.

No Mata long Statemen weh I kamaot long Gavman yestede weh I talem seh kavman I stap wok blo adresem ol welfea blo olgeta mo iven askem koperesen blong ol prinsipol mo Tija raon long Vanuatu blo resumim duti blo olgeta, VTU I feel seh oli fail blo givim wan ansa o solusen lo ol dispute weh I stap.

10/06/2024

Ful Statemen Blong Gavman blong Repablik blong Vanuatu tuwods Issue blong Strike blong olgeta Tija

Statemen ia i kamaot yestete namba 10 June.

"Gavman blong Repablik blong Vanuatu i stap issuim statement ia folem Industrial Aksen weh Vanuatu Teachers Union (VTU) i lidim.

Minista blong Intenal affeas, Hon. Johnny Koanapo hemi bin signem Discontinuance blong Industrial aksen (Amendmen) Oda No. 82 blong 2024 long June Namba 6 2024. Oda ia hemi spesifaeyem anda long seksen 2 seh afta weh oda ia hemi ko long effect, bambae VTU i mas no

(a) kolem, organisem, or Faenansem wan Strike long eni irregular industrial aksen o usum olsem wan tretening,

(b) Carry on, organisem, Faenansem wan lockout or usum olsem wan treteing.

No mata long ol legal reqwaemen weh i stap antap, tedei Mandei namba 10 June 2024, sam skul oli klos, tija oli desaed blong absen long ol respektif skul blong olgeta, weh i unnecessarili afektem ol pikinini long edukesen blong olgeta

Wetem Hemia Vanuatu Gavman i stap kol long olgeta Prinsipol mo tija raon long Vanuatu blong oli mas stap long ol respektif skul blo olgeta long namba 11 June 2024.

Gavman blong Vanuatu i wish blong advaesem ol Prinsipol mo tija seh Gavman i stap wok blong adresem ol grievances or welfea blong olgeta.

Olsem pat blong komitimen blong adresem Welfea blong ol tija, Komisina blong labour hemi statem proses blong Appointem wan Conciliator olsem weh i stap long Trade Dispute Act. [CAP 162] blong statem miting bitwin ol konsen pati

Gavman hemi remindem everiwan weh i involve seh fasin blong kontinu long strike hemi illegal, so Gavman i kol long ol prinsipol, skul kaonsel mo tija long koperesen blong olgeta blo resumim olgeta duti blo ol blo ristorem bak nomol raning blong ol skul

Vanuatu Gavman i talem tankio iko lo populesen blo repablik blo Vanuatu long komitmen blo olgeta blong keepim p*s i stap lo kauntri."

10/06/2024

“Taem customer, Fama, Staff mo me oli happy, hemia nao hemi SUCCESS” Milroy Cainton, Owner blong Pikinini Bar hemi talem.

Long past 6 manis, Mr Cainton hemi spendem ova 6 million vatu finis blong pem ol fruits long ol fama raon long Vanuatu mo value add iko long fruit Juice blong salem long bisnis blong hem.

Owner blong Pikinini Bar hemi talem seh sapos wan Ikat money, hemi mas growem tru long wan Bisnis.

Long wan interview hemi kat wetem VBTC tedei hemi seh “Ol lokol bisnis mas imas lukluk long bright side oltaem”

10/06/2024

Gavman hemi wish blo advaesem olgeta Principal mo Tija raon long Vanuatu seh Gavman I stap wok naoia blong adresem ol grievances o welfea blong olgeta.

Long wan press statement, Gavman I stap kol blong everiwan long olgeta I mas stap long ol respektif skul blong olgeta stat tumoro Tuesdei namba 11 June 2024.

Statement I seh fasin blong kontinu long strike tumoro iko hemi illegal, so hemi askem koperesen blong olgeta blong resumim ol duty blo olgeta.

10/06/2024

Vanuatu Teachers Union (VTU) I risivim ova 200 niu memba tedei.

Hemia sins fridei las wik weh strike I start mo tru aot long wiken kasem Monday tedei weh fulap long ol Tija weh oli no memba blong VTU oli kam blong register wetem union.

Konfemesen ia I kam long sekretari Generol blong VTU, Johnathan Yonah

Mr Yonah I talem seh risen wae oli kam regista hemi from olgeta tu oli kat ol semak grievances or welfea blong Gavman I mas adresem.

Mr Yonah hemi assurum bakaken ol memba blong VTU tedei seh oli kat raet ia blo exercisem konsen long welfea blong olgeta.

VTU I kat 1,467 membas weh I stap wetem hem naoia.

10/06/2024

Solomon Islands nasonal futbol tim I taj daon vinis long Port Vila intanasonal eapot.

10/06/2024

Vanuatu intanasonal, John Alick I kasem Port Vila intanasonal eapot.

10/06/2024

Electoral Commission bae hemi no mekem dekleresen blong resalt blong Nasenol Referendum long tedei.

Komisen Jeaman, Edward Kaltamat ise reason from oli nid blong corektem sam "MISMAJ" long counting.

Hemi no save talem wetaem stret bae anaonsmen i hapen mbe hemi se samtaem long wik ia.

09/06/2024

Niufala SDA jes aos long Fresh Water 5 long Port Vila I kam blong komplit long manis ia.

Nem blong jes aos ia emi Mautoa.

Bigfala jes ia oli buildim klosap long 2 weeks nomo.

I kat Ova long 50 volunteer we oli kam long Malekula nao oli help blong buildim jes aos ia wetem sapot blong ol kongregesen blong jes we oli help blong kukum kaikai blong ol wok man ia evridei.

Tok tankiu blong Mautoa jes mo semtaem talem tata long ol wok man ia I tekem ples tedei naet, 9 June 2024.

08/06/2024

Elektoral komisen hemi complitim counting blong olgeta vot blong fes national referendum. Ig*t 373 polling stations we Voting i tekem ples long hem.
Anaonsmen blong resalt bae hemi kamaot long tumoro monday 10 olsem we Election Ofis ibin talem.

VBTC bae hemi broadcastem Ofisel anaonsment blong resalt blong Referendum long everi platfom blong hem.

08/06/2024

Vanuatu Teacher's Union (VTU) i talem se hemi no pat blong kot kes bitwin Ministri blo Edukesen mo Trening.

Therefore, hemi save tekem stand blong hem folem strike we olgeta tija we oli memba blong hem, i mekem long las Friday 7 June.

Hemi rispon blong Sekretari Generol blong VTU, Johnathan Yonah long wan press konfrens tete.

SG Yonah i talem se Union i comply wetem ol loa blong International Labour Organization (ILO).

Mo ol loa ya i protektem ol memba blong hem raon long Vanuatu.

Hemi askem tu blong Ministri risponsibol i providem wan pruv, long kleim se Teaching Service Commission (TSC) i bin mis-usum ol mani long ol pas yia.

Wetem hemia VTU i kwestenem ministri, long ol budget we TSC olsem employa blong hem, i shud karem.

Union i talem se las yia 2023, salari blong olgeta tija hemi kasem 10 bilian Vatu.

Hemi gohed se ripot blong en blong las yia, 6 bilian Vatu nomo hemi bin spend.

VTU i biliv se sapos mani ya i stap wetem TSC, bai oli save stretem peimen blong olgeta tija ya, mo strike ya bai ino save hapen.

Union i talem se bai hemi submitim wan ripot igo long ILO, folem isiu ya.

SG Yonah i talem se bai oli karem sapot long ol sista okonaisesen raon long Pacific long nekis wik, we bai i lukim President blong Australian Education Union (AEU) bai i mitim VTU folem isiu ya.

VTU i kol long olgeta memba blong hem, blong gohed long strike ya nekis wik.

07/06/2024

Tufala Tugbot we Gavman I pem I kasem Santo long 8.30pm tunaet.

07/06/2024

Pared we I tekem ples tedei I end wetem wan petition we ol jif I givim long Gavman blong France tru long Embassy long Vanuatu.
Hemi wan long ol biggest parade we pipol blong Vanuatu I mekem blong sapotem pipol niu Caledonia.

07/06/2024

RVS Sokomanu, niufala sip weh Gavman blong Australia i givim long Vanuatu Polis Fos hemi aot long Singapore tete long longfala rod blong kam long Vanuatu.

Commissioner blong Vanuatu Polis Fos, Robson Iavro mo wan Ofisa blong Australia i mekem anaonsmen ia tete morning long Mala Base.

Sip ia weh hemi wan landing craft hemi tekem nem blong fes Presiden blong Vanuatu George Sokomanu, bae hemi kasem Vanuatu long namba 27 June.

Commissioner Iavro i talem seh sip ia bae hemi blong sapotem Gavman blong Vanuatu blong rispon long taem blong disasta mo providem ol humanitarian sapot.

07/06/2024

Commissioner blong Police, Robson Iavro i stap apil igo long evri citizen blong Port Vila blong putum p*s mo sefti blong ol pipol mo ol propetis i stap oltaem olsem prioriti.

Commissioner Iavro i mekem toktok ia from i g*t 2 bigfala iven weh i stap hapen long Port Vila tete.

Long tete morning fulap skul raon blong kaontri oli sarem dor blong olgeta mo bae long 1 o'clock tete afternun bae i g*t wan protest i tekem ples long Port Vila blong soem sapot blong Vanuatu long Kanaky.

Hemi seh Polis i redi blong stap blong mekem sua seh i g*t peace long taem ia.

07/06/2024

Ministri blong Edukesen mo Trening hemi fesfala Ministri blong kavman we i kivim sapot tuwods OFC Mens Nesens Kap long hom kraon.

Ministri blong Edukesen mo Trening hemi handem ova jek blong
500,000vt i ko long Lokol Okanaising Komiti (LOK) blong OFC Nesens Kap 2024.

Han ova ia i tekem ples long tete morning long konfrens rum blong ministri, taem i lukim John Tafau we hemi Teseri Daerekta blong Ministri hemi mekem han ova jek ia i ko long Jeaman blong LOK, Harry Atisson.

Hemi fes taem we VFF tru long OFC, bambae hemi rolemaot fes taem eva Osenia tunamen blong olgeta man long VFF Fresh Wota stedium we bae olgeta fan blong futbol long kantri bambae oli kat janis blong save watjem ol futbol jampion blong yumi long osenia oli ko long aksen long nekis wik.

07/06/2024

Maj blong showem solidariti wetem ol Kanaky pipol.

Oli stap Maj iko kolosap lo French Embassy long Port Vila

07/06/2024

Gavman Tru long Ministri blong Edukesen mo Trening, i talem se bai hemi dil wetem strike we ol memba blo Vanuatu Teacher's Union (VTU) i mekem tete.

Daerekta Generol blo ministri, Bergman Iati i talem se ig*t wan kes i stap yet long kot blong i dil wetem isiu ya. Mo aksen we VTU i tekem, bai hemi stap olsem wan condemn of court.

Hemi pointemaot se evri komisen long Vanuatu, olgeta Ministri responsible i lukaotem olgeta, hemia includum badjet blong olgeta.

DG Iati i talem se Teaching Service Commission i fail blong priparem wan badjet i kam long ministri, blong oli save stretem mani blong ol tija we oli memba blong VTU.

Hemi apil long olgeta tija we oli tekem strike blong gohed wetem ol lesson long klas.

06/06/2024

Sarakata Center skul long Luganville i klos from ol tija oli straek.

Ol tija oli wantem kavman i pem aut outstanding entitolmen blong olketa.

Principal Rayleen Joe we hemi onli woman principal long Luganville mo wok blong 22 yia i talem se kavman i mas luksave hadwok blong ol tija.

Long tete oli putum notis blong talem se no klas tete from i nogud blong ova 200 studen oli kam long skul be ol tija i no tij.

06/06/2024

Wan resident blong Freshwota, Mark Malon hemi sakem aot repot se pipol blong Freshwota i involve long rao we i kirap long eria blong erakor.

Malon I talem long VBTC News se hemi onli person we i lif long Freswota mo hemi atendem miting ia from insiden ia hemi involvem brata blong hem we i lif long eria blong Erakor.

Brata blong hem nao hemi kasem kil we i lukim ol yangfala i ston mo brekem hand blong hem.

Malon i bin ko blong providem proteksen long olgeta pikinini blong hem long yard we insiden istap long hem.

Mbe hemi no involve long faet mo rao ia hemi no blong Freshwota mo Erakor mbe hemi blong ol residen blong Erakor nomo.

Miting blong rao ia bae hemi tekem ples long nekis wik.