19/12/2023
🔴 Umwihwezo w'intwazangabo : "Igisirikare c'Uburundi gisigaye gicuritse, abasoda bato barusha amashure ba Jenerali !"
Inyuma y'uko hari abasoda b'Uburundi barahiye gusubira ku rugamba rwo kugwana na M23 muri Nord-Kivu, hari intwazangabo mu gisirikare c'Uburundi yaturungikiye uyu mwihwezo. We ashimika kwerekana ko hari impinduka ikomeye iriko iraba mu gisirikare naho abakirongoye batabibona, avuga ko igisoda c'Uburundi gifise abasoda batoya bize, bafise amashure kurusha na bamwe mu bajenerali. Avuga ko abasoda nk'abo bisaba kubumvisha neza urugamba bagiyeko. Abasirikare b'incabwenge gutyo barakeneye ko indongozi zabo nazo nyene ziba ziciye ubwenge.
🔴 Ibiherutse kubera muri Congo si ibintu bisanzwe
"Ibiherutse kubera muri Congo ntibisanzwe mu mateka y'igisirikare c'Uburundi. Kubona abasoda batoya babwira Général Muzinga ko badashobora gusubira kuja kugwana na M23, kubona bamubwira icese ko bakeneye kwitahira mu Burundi kandi bakabikora, kubona bahitamwo kuja gupfungwa hako baja ku rugamba, ivyo bigakorwa n'abasirikare amajana, si ikintu gisanzwe.
Birahambaye ko abarongoye igisirikare bicara bakiyumvira umutima uri hamwe impamvu abasoda batoya bigenjeje gutyo imbere ya Général muzima. Abasoda ubegereye barasigura neza ko batumva iyo ntambara barimwo, barasigura neza ko bahemukiwe n'igisoda ca Congo ku buryo badashobora kucizigira ukundi, barasigura neza ko badatahura ingene igisirikare kititwararika imiryango y'abasoda bahitanywe n'iyo ntambara. Ico batubahuka kuvuga ku mugaragaro ni ikibazo c'amafaranga Congo yoba iriha ibikorwa vyabo ariko bo ntibayahabweko. Bino bibazo vyabo birakomeye kandi birakeneye inyishu."
🔴 Abasoda b'incabwenge barasigurirwa, ntibaterwa ubwoba !
"Ico abatwara igisirikare bataratahura nuko abasoda b'ubu batameze nk'abakera. Kera, abasoda batoya (hommes de troupe) wasanga bize gushika mu mwaka wa gatandatu w'amashure y'intango canke ugasanga ntibanahejeje amashure matomato. Ibisongerezi vy'intwazangabo vyaba vyize