03/10/2024
ISTÓRIA AMRT ( https://amrt-ip.tl/historia )
La’os de’it simu responsabilidade atu “Prezerva no divulga, tradisaun valór no korajén hodi halo funu ba independénsia”, Arkivu & Muzeu Rezisténsia Timorense, I.P, (AMRT,I.P) instituisaun ida ne’ebé dedika liu-liu ba prezervasaun memória no ba patrimóniu istóriku kulturál no atu divulga mós valór Rezisténsia Funu Povu Timor-Leste nian, liu-liu ba grupu joven sira.
Nune’e AMRT simu todan hanesan protagonista kulturál hodi promove no patrosina no apoia atividade sira ne’ebé iha karákter kulturál, sientífika no edukativa iha área prezervasaun, no divulgasaun Memória Funu Rezisténsia Povu Timor-Leste nian, atu rekoñese no valoriza veteranu sira nia pozisaun sosiál, sira nia konsolidasaun identidade nasionál, no istória kontemporánea Timor-Leste nian no mós promosaun Pás no Respeitu ba Direitus Umanus.
Lei n.o 3/2006, loron 12 fulan Abril ne’ebé regula Libertasaun Nasionál sira nia Estatutu fó kbiit ba AMRT, ho nia Estatutu ne’ebé Dekretu –Lei N.o 22/2014, loron 3 fulan Setembru.
Nune’e mós, Arkivu & Muzeu Rezisténsia Timorense mak “entidade ne’ebé kompetente atu kuida no konserva aservu dokumentál ne’ebé komisaun sira Prezidente Repúblika mak harii ne’e mak prodúz, no konservasaun no jestaun arkivu no baze dadus “ iha ámbitu prosesu atribuisaun pensaun Reforma Estadu nian, ou apozentasaun, ba kombatente Libertasaun, finalizasaun prosesu rejistu no serimónia omenájen sira.
Prosesu ne’e konkretiza iha loron 15 fulan jullu tinan 2020 liuhusi Protokolu ida Sekretariu Estadu Antigu Kombatente Libertasaun Nasionál, Gil da Costa “Oan Soru”, no Diretór Ezekutivu & Prezidente AMRT,I.P. Hamar Antoninho Baptista Alves, mak asina hodi entrega arkivu dijitál no integrasaun dokumentu fíziku iha depózitu AMRT nian.
Entre komponente konxiénsia identidade oioin, povu nia istória koletiva mak importante liu. Iha Timor-Leste nia kazu, sertamente Rezisténsia mak parte istória ne’ebé importante liu iha nia istória. Husi sorin seluk parte ne’ebé reprezenta di’ak liu konxiénsia koletiva. Sei iha ema hotu nia Memória, envolve pesoalmente kuze Timor-oan hotu-hotu, hatudu liuhusi epizódiu barbarak ne’ebé hatudu sira nia karákter populár.
Ho hanoin ida ne’e, no sa’ida mak reprezenta prinsípiu kriasaun Arkivu & Muzeu Rezisténsia, iha tinan 2001, Prezidente Repúblika, Kay Rala Xanana Gusmão no Ministru Negósiu Estranjeiru no Kooperasaun no Nobel Pás, José Ramos Horta estabelese kontatu ho Fundasaun Mário Soares – hodi dedika ba prezervasaun Arkivu Istóriku Rezisténsia nian mak hanesan: Rezisténsia ba Rejime fasista Salazar no Movimmentu Libertasaun ex-kolónia sira nian ne’ebé ex-Prezidente Repúblika no ex-Primeiru-Ministru Portugal, Mario Soares, para hala’o Expozisaun ida iha Timor-Leste, Díli, kona-ba tinan 24 Funu Rezisténsia nian ho objetivu atu komemora Restaurasaun Independénsia, loron 20 fulan Maiu tinan 2002.
Kontatu sira ho baze iha realidade ne’ebé hatudu katak Mario Soares, la’os de’it hanesan estadista internasionál ida maibé baihira hala’o hela funsaun Estadu nian nia mos dedika-an ba defende direitu Timor-Leste nian ba Autodeterminasaun.
Iha tinan 1986, Timor nia kazu europeu sira haluhan ona, Prezidente Mario Soares, foin mak simu pose no halo diskursu iha Parlamentu Europeu husu ba konvidadu hotu ne’ebé prezente iha momentu ne’ebá atu fó atensaun no interese ba problema ne’ebé grave tabes no fó sai mós katak Portugal sei la husik Timor-Leste abandonadu ba destinu.
La kleur, Parlamentu Europeu aprova Rezolusaun ida, hodi husu Respeitu ba Direitu Autoderminasaun, ida passu importante ida ne’ebé marka relansamentu apoiu internasionál ba Povu Timor-Leste nia Funu.
Espozisaun loron 20 fulan Maiu tinan 2002, ho naran “ A Nossa Vitoria é Apenas Questão de Tempo, kuadru istóriku ida jerál Rezisténsia Povu Timor-Leste nian, ho tempu ne’ebé la kleur, bele reune konjuntu signifikativu dokumentasaun mai husi orijén oioin, institusionál no privada, nasionál no estranjeiru sira.
Konjuntu dokumentál ida ne’e ho natureza gráfika, fotográfika, Sonora no audiovizuál – objetu ka meiu inventariasaun konservasaun, dijitalizasaun no klasifikasaun husi Arkivu no Biblioteka Fundasaun Mario Soares, ho mós kolaborasaun espesiál iha Díli Istoriadór Profesór Doutor José Mattoso, konstitui núkleu espesiál ba Arkivu Rezisténsia aban-bainrua nian.
Abranje mós espesialmente Ramos Horta nia Arkivu Nobel ba Pás, (ho mediasaun inkansável Ligia de Jesus Ramos nia Xefe Gabinete iha Lisboa, ativista Portugés Barbedo Magalhães, Pascoela Barreto, Membru Komisaun Exekutiva CNRT nian ( Konsellu Nasionál Rezisténsia Timorense ) Primeira Embaixadora Timor-Leste iha Portugal no TAPOL (Tahanan Politik ) Organizasaun Naun-Governamental Direitus Umanus, Carmel Budiharjo ex-prizioneiru Polítiku Rejime Ditadór Soeharto nian mak harii iha tinan 1973 iha Indonézia, nia sede iha Londres.
Primeiru Núkleu Dokumentál ne’e, halo parte mós dokumentu sira ne’ebé husi rai-laran, no mós sira ne’ebé Asosiasaun Veteranu Rezisténsia Timorense mak rekolla no ikus liu no importante liu Arkivu Nino Konis Santana, Xefe Konsellu Ezekutivu Funu nian, Frente Armada- CEL/FA no Sekretariu Komisaun Diretiva FRETILIN nian.
Iha inísiu tinan 2002 ekipa ida husi Fundasaun Mario Soares ho Profesór Doutor José Mattoso nia koordenasaun no Kay Rala Xanana Gusmão hanesan Prezidente Repúblika iha tempu ne’ebé nia orientasaun, Abrigu subteráneu Mirtutu nia na’in sira mak subar, Caetano Ximenes, TG, nia Kaben Isabel Ximenes, Sra. Rosalina, no nia oan sira. Dokumentu sira ne’e sai hanesan Fundu importante ida atu Kompriende didi’ak Funu.
Iha loron 7 fulan Outubru 2002, iha Lisboa, ex-Prezidente Repúblika Demokrátika Timor-Leste, Kay Rala Xanana Gusmão no Prezidente Fundasaun Mário Soares, Mário Soares asina Protokolu Kolaborasaun ida hodi halo prezervasaun, reprodusaun dijitál no fotográfika, klasifikasaun no disponibilizasaun ba públiku dokumentasaun Funu nian.
Iha ne’ebá estabelese Konstituisaun iha Díli, Prezidente Repúblika, Arkivu Rezisténsia Timorense sira na’in rua mak sai protetór, iha instalasaun sira ne’ebé Asosiasaun Veteranu Rezisténsia mak fó, nune’e mós sira harii no implementa komisaun Akompañamentu ida. Komisaun ne’e Profesór Dr. José Mattoso mak prezide sientifikamente, ho supervizaun timorense ida ne’ebé iha responsabilidade veteranu Funu nian, Somotxo, José Agostinho Sequeira, Ex-Sekretáriu Rejiaun IV no Kolaboradór Xefe Estadu Maior FALINTIL nian. Halo parte iha Komisaun Akompañamentu ne’e Fundasaun Mario Soares nia Reprezentante ida, Dr. Alfredo Caldeira .
Somotxo, ema ida koñese di’ak liu istória Rezisténsia, tan nia halo parte iha funu durante tinan 24, no Prezidente Repúblika mak nomeia nia. Somotxo la halo direita serbisu hanesan membru Komisaun Akompañamentu nian, simu mós funsaun ida hanesan kolaboradór permanente Fundasaun Mário Soares nian, ho responsabilidade atu forma ekipa ida ba klasifikasaun dokumentasaun sira kona-ba Funu, Lian Tetun, no nia rasik mak halo serbisu sira ne’e tan arkivu sira nia detalle oi-oin, dala barak ho linguajen ne’ebé ho kódigu de’it, sifra, ho rekursu ba naran kódigu sira, muda ba mai durante funu la’o atu inimigu labele detekta sira no hakerek ho lian tetun.
Iha 2004 Prezidente Repúblika iha tempu ne’ebá hasai orientasaun atu Fundasaun Mário Soares bele hala’o rekolla dokumentasaun sira ne’ebé ex-kuadru funu nian, guerilleiru no populasaun klandestinu sira sei subar. Atu hala’o serbisu ida ne’e Somotxo mak sai hanesan responsável.
Sira lori besik fulan 3 hodi rekolla dokumentu sira ne’e iha terenu. Iha rekolla ne’e ex-Xefe Estadu Maior Jenerál F-FDTL, FALINTIL-Forsa Defeza Timor-Leste, Taur Matan Ruak mak fó apoiu lojístiku loke dalan ba salva-guarda no prezervasaun kona-ba arkivu sira ne’ebé importante liu.
Serbisu boot ida rekolla dokumentu sira funu nian ne’e, iha teritóriu tomak inklui sidade Díli, to’o tinan 2005, fó oportunidade ba hetan fila fali dokumentu barak ne’ebé iha hela kuadru: Frente Armada, Frente Klandestina no elementu populasaun sira nia liman.
Tan Volume, no importánsia dokumentasaun ne’ebé rekolla, Asosiasaun Veteranu sira nia sede iha Taibesi laiha kondisaun minima, nein seguransa, nein akondisionamentu nein serbisu hodi akomoda.
Tan ne’e autoridade timoroan sira, hili edifísiu antigu tribunál portugés atu sai instalasaun fízika ba futuru Arkivu & Muzeu Rezisténsia. Nune’e iha loron 20 fulan Maiu tinan 2002 hala’o espozisaun “A Nossa Vitoria é Apenas Questão de Tempo”.
Edifísiu, ho modelu no karakterístika hanesan edifísiu sira koloniál portugués nian sira iha époka ne’ebá, iha tempu okupasaun indonézia uza hanesan fatin administrasaun no iha fulan Setembru tinan 1999 bainhira sai husi Timor-Leste sira sunu tiha sorin. Edifísiu ne’e aprezenta área ida ho nia luan maizumenus 1325m2 no aumenta tan 1165m2 hodi halo jardin hale’u, iha sidade Díli nia klaran, besik iha Palásiu Governu no Parlamentu, nia sorin-sorin iha Edifísiu Liseu no Universidade Timor-Leste.
Nia projetu reabilitasaun iha faze rua, faze primeiru inaugura iha loron 7 fulan Dezembru 2005, faze ne’e abranje área intervensaun ne’ebé importante liu ho nia luan 500m2, no edifísiu ne’e halo kompletu iha loron 20 fulan Maio tinan 2012.
Durante IV Governu Konstitusionál nia mandatu, iha tinan 2007, Prezidente Repúblika, Kay Rala Xanana Gusmão, nomeia Komisaun Instaladora ida hodi konkretiza projetu global Arkivu & Muzeu Rezisténsia Timorense. Halo Parte iha komisaun ne’e Diretór Instituisaun Hamar Antoninho Baptista Alves, Tânia Bettencourt Correia, arkiteta, Virgílio Smith, reprezentante Asosiasaun Veteranu, no Alfredo Caldeira, reprezentante Fundasaun Mario Soares.
La’os Espozisaun Permanente de’it iha mós instalasaun definitiva sira inklui mós espasu ba espozisaun Temporária.; Sala Multimédia; Auditóriu ho kapasidade ba fatin 97; Kafetaria; Servisu administrasaun; Depózitu ba Arkivu fíziku; Espasu ba Prezervasaun; Dijitalizasaun no Klasifikasaun Dokumentu; Sala Leitura no Sala Investigadór sira.
Depois, iha tinan 2015 harii tan edifísiu ida ligadu ba ida harii uluk. Edifísiu ida harii ikus ne’e dedika liu-liu ba Audiovizuál no mós infraestrutura IT no Arkivu Dijitál. Iha ne’e, iha mós kondisaun di’ak ba produsan konteúdu audiovizuál sira.
Ho Arkiteta Tânia Bettencourt Correia nia projetu arkitetura, Projetu rekuperasaun no ampliasaun edifísiu nian hala’o fazeadamente durante tinan 10; Foufoun ho kooperasaun portugeza no Fundasaun Macau nia apoiu. Depois Governu Timorense mós fó apoiu liuhusi dotasaun orsamentál.
Bainhira primeira faze reabilitasaun edifísiu nakloke ba públiku, hala’o serimónia Entrega Dokumentu hosi ex-kombatente Frente Armada, Frente Klandestina- Movimentu Juvenil ne’ebé sei iha hela rai-laran. Nune’e mós elementu solidariedade, hanesan Portugal, Japaun no Estadus Unidus Amérika, entrega mós iha ne’e sira nia núkleu dokumentál sira.
Iha faze hahú, iha tinan 2002, prosesu salvaguarda no tratamentu Arkivu Rezisténsia, implementa liuhusi Protokolu Kooperasaun ho Fundasaun Mário Soares, konta ho finansiamentu importante no desizivu husi Fundu Fomentu Kulturál (FFC ) portugés, depois Fundasaun Oriente, Fundasaun Macau Instituto Português de Apoio ao Desenvolvimento (IPAD) no Fundasaun EDP, no ho apoiu iha terenu embaixada Portugal, Instituto Camões, Fundasaun Oriente, Fundasaun Xanana Gusmão, Fundasaun FALINTIL no AVR (Asosiasaun Veteranu Rezisténsia).
Ho Orientasaun superiór husi ex-Prezidente Repúblika, Kay Rala, Xanana Gusmão, Somotxo, José Agostinho Sequeira, Primeiru Diretór Arkivu & Muzeu Rezisténsia Timorense, Hamar Antoninho Baptisa Alves, kargu ne’ebé nia ezerse husi kedas loron 7 fulan Dezembru tinan 2005 to’o fulan Juñu tinan 2006.
Iha III Governu Konstitusionál, Somotxo simu knar nu’udar Vise-Ministru Interior Hamar Antoninho Baptista Alves mak okupa kargu ida Somotxo husik hela ne’e to’o agora.
Arkivu Muzeu Rezisténsia Timorense, Uma Lulik Erói kombatente Libertasaun Nasionál sira nian, iha ailaran no vila laran, sira presta sira nia omenájen kle’an ba erói sira ne’ebé mate iha kombate no ba mós sira ne’ebé sei moris, husi Matebian to’o Kablaki, husi Tasi Feto to’o Tasi Mane, Feto, Mane, Katuas no Ferik , sira ne’ebé Funu halakon sira infánsia, juventude, sira nia Direitu labarik nian, no kontinua sente ta’uk, sente umillasaun sira ne’ebé invazór sira rejista iha sira nia moris, nafatin ba bebeik iha sira nia isin no sira nia klamar.
Arkivu & Muzeu Rezisténsia Timorense hakru’uk ho respeitu kle’an, Rekoñese, no Agradese, ba ema hotu-hotu Feto no Mane sira ne’ebé durante tinan ba tinan ho korajen subar ba okupante sira, rai iha sira nia hela fatin dokumentasaun Funu nian tan komprende dokumentu sira nia importánsia atu rai nafatin evidénsia, Memória, kona períodu ne’ebé triste liu, no aumezmu tempu Épiku no Eróiku, Istória kona-ba nia País, nune’e hatutan ba nia oan no beioan sira no fó sai ba mundu Movimentu Libertasaun Timor-Leste nian ne’ebé la iha komparasaun iha mundu.
Gratidaun no Hakru’uk kle’an, ba ema hotu ne’ebé fó sira nia vida, ariska sira nia família, aldeia tomak, sira hatene hela katak karta mesak ida ka mensajén ida baihira inimigu hetan signifika katak sofrimentu, umillasaun oioin, mate, fuzilamentu no masakre inimigu sei halo ba sira.
Korajen, Sakrifísiu, sofrimentu, eroisidade ema sira rai metin Memória Funu nian durante tinan 24 ne’ebé inimigu sira mak provoka hodi prezerva dokumentu rihun ba rihun no mós objetu lubuk oan ida – ne’e mak ohin loron hanaran Arkivu & Muzeu Rezisténsia Timorense.
Ba sira Hotu, Gratidaun no Eternu Rekoñesimentu.
Fontes : https://amrt-ip.tl/historia
