31/10/2023
𝐑𝐄𝐅𝐋𝐄𝐗Ã𝐎 𝐃𝐈Á𝐑𝐈𝐀 𝐂𝐀𝐓Ó𝐋𝐈𝐂𝐎:
QUARTA, 01 DE NOVEMBRO 2023
𝗦𝗘𝗠𝗔𝗡𝗔 𝗫𝗫𝗫 𝗗𝗢 𝗧𝗘𝗠𝗣𝗢 𝗖𝗢𝗠𝗨𝗠
Ⓢⓞⓛⓔⓝⓘⓓⓐⓓⓔ Ⓣⓞⓓⓞⓢ ⓞⓢ Ⓢⓐⓝⓣⓞⓢ
𝗔𝗣 𝟳 : 𝟮 – 𝟰, 𝟵 – 𝟭𝟰
𝟭 𝗝𝗢 𝟯 : 𝟭 – 𝟯
𝗠𝗔𝗧 𝟱 : 𝟭 – 𝟭𝟮
𝐍𝐚𝐢 𝐉𝐞𝐬𝐮𝐬 𝐊𝐫𝐢𝐬𝐭𝐮 𝐧𝐢𝐚 𝐄𝐯𝐚𝐧𝐠𝐞𝐥𝐡𝐨 𝐭𝐮𝐢𝐫 𝐒𝐚𝐮𝐧 𝐌𝐚𝐭𝐞𝐮𝐬:
Iha tempo neba, Jesus hare ema lubun boot, Nia sae ba foho. Hafoin, Nia tur tiha, escolante sira besik ba Nia. Nia hahu hanorin sira hodi dehan nune’e: “Ksolok ba ema kiak sira nebe kiak iha laran, basa, reino lalehan sira nian. Ksolok ba sira nebe tanis, basa sira sei hetan kmaan. Ksolok ba sira nebe haraik-an, basa sira sei simu rai hanesan liman rohan. Ksolok ba sira nebe hamlaha no hamrook ba justisa, basa sira sei bosu. Ksolok ba sira nebe laran luak, basa sira sei hetan diak. Ksolok ba sira nebe laran mos basa sira sei hare Maromak. Ksolok ba sira nebe buka dame, basa ema sei bolu sira Maromak oan. Ksolok ba sira nebe ema duni, fo terus tan buka justisa, basa reino Lalehan sira nian. Ksolok ba imi, wainhira tan Hau ema hateten aat imi, duni imi, hodi foti lia bosok oi-oin hasoru imi. Imi haksolok ba, hahi ba, basa imi nia kolen iha Lalehan wain liu.”
L̲i̲a̲ M̲a̲k̲s̲o̲i̲n̲!
𝗥𝗘𝗙𝗟𝗘𝗦𝗔𝗨𝗡:
Loron ida ohin Igreja selebra todos os santos. Todos os santos katak sira hotu nebe moris ho gloria hamutuk ho Maromak iha Lalehan. Sira hotu nebe sempre luta to’o mate, sacrifica sira nia-an tomak ba Maromak maski ho desafio oi-oin. Ita nia Maromak santo, ita bele banati tuir Nia liu husi dalan oi-oin atu sai santo; balun sira sai nailulik, balun sira religioso/a, balun sira forma familia (laen no feen), sai aman, sai inan, sai joven no mos sai labarik tuir ida-idak nia maneira moris. Ema santo sira barak iha Igreja hatudu mai ita ezemplo moris iha fiar iha situasaun konkreto. Nu’udar Igreja ida, ita hotu fo honra no husu ba santo/a sira hotu atu bele haraik tulun mai ita hodi nune’e ita bele moris iha santidade nia laran. Ne’e mak ita dehan halo devosaun. Halo devosaun ba santo/a ida atu bele banati tuir ninia ezemplo moris atu ita mos bele sai santo iha ita nia moris.
Nu’udar familia, ita hotu iha ema santo nebe ita banati tuir. Prinsipalmente, familia Nazare mak ita nia ezemplo moris nu’udar familia. Papa Leo XIII hateten: Familia Santo Nazare (Jesus, Maria no Jose mak ‘divinepatem for humanity.” Ita mos iha familia nebe sai ezemplo: Luigi Beltrame Quattocchi no Maria Corsini, parseiro laen no feen husi Italia no paseiro laen no feen Louise Martin no Marie Azelie Guerin, inan-aman husi Santa Therese husi Lisieux. Nu’udar paseiro laen no feen no mos sai parente, sira esforsu-an iha relasaun, servisu no edukasaun ba labarik. Husi oan nain sia ne’e, nain 5 feto moris sai madre no nain 4 mate tiha. Sira hetan moras no fahe malu. Maibe sira sai ezemplo iha familia no iha misaun. Devosaun ba familia santo sira ne’e lori ita hotu sai paseiro laen no feen nebe luta nafatin moris iha santidade nia laran. Papa Francisco dehan: Santidade laos katak halo buat buat boot-famosu ou viral maibe halo buat kiik ruma ho fiar no domin. Iha oportunidade balun, nia hateten katak buat ida nebe simples husi santidade mak moris alegria ho ita nia buat nebe iha: kapasidade no frakeza tomak.
Tan ne’e, mai ita hotu husu Maromak nia bensaun iha selebrasaun todos os santos ne’e atu ita hotu bele esforsu-an no sacrificio ba Maromak nia misaun ho ita nia kapasidade no frakeza sira hotu. Ita entrega-an tomak ba Maromak atu hasanto ita ho knar sira nebe ita halo tanba liu husi knar kiik sira ne’e ita apriende atu sai santo. Maromak husi ita atu fiel, obedese no servisu ho fuan no laran tomak atu nune’e bele desenvolve ita nia fiar no moris iha santidade nia laran.
𝑶𝒓𝒂𝒔𝒂𝒖𝒏:
Maromak rohan laek no bele hot-hotu, Ita haraik tulun mai ami atu hahi hamutuk iha festa ida deit Santo hot-hotu nia hahalok kmanek. Ami harohan atu santo sira hotu nia harohan daet, ami bele hetan Ita Boot Nia laran luak. Ami harohan ne’e hodi Nai Jesus Kristu nia naran hamutuk iha Espiritu Santo. Amin!
“𝑽𝑰𝑽𝑨𝑻 𝑫𝑬𝑼𝑺 𝑼𝑵𝑼𝑺 𝑬𝑻 𝑻𝑹𝑰𝑵𝑼𝑺 𝑰𝑵 𝑪𝑶𝑹𝑫𝑰𝑩𝑼𝑺 𝑵𝑶𝑺𝑻𝑹𝑰𝑺 𝑬𝑻 𝑪𝑶𝑹𝑫𝑰𝑩𝑼𝑺 𝑯𝑶𝑴𝑰𝑵𝑼𝑴”
(Atu Maromak Santissima Trindade moris iha ita ida-idak nia fuan no iha ema hotu nia fuan)
Kuluhun, 01 de Novembro 2023
ᴾᴱ. ᴿᴵᶜᴴᴬᴿᴰᴼ ᴾᴬˢᴬᴺᴳ, ˢᵛᴰ
