01/08/2024
[OPINION] Nangin magahod ang pagpatigayon sang 2024 Udyakan streetdancing competition sa Kabankalan, matapos ang pag-gamit sang 'Aim High Kabankalanon' bilang official soundtrack sang Agusto uno.
Nakibot ang kadam-an sa malagday nga streetdancing performance sang 15 tanan ka mga competing tribes para sa subong nga tuig nga Udyakan Festival, pero ano gid bala dapat ang soundtrack para sa selebrasyon?
Ang Udyakan Festival ang tuigan nga kahiwatan sa syudad, kun sa diin ang nagkalain-lain nga mga barangay, lakip na ang mga eskwelahan sa Kabankalan ang naga-partisipar agud ipakita ang ila talento, kultura kag kinaiya paagi sa pagsa-ot.
Kada competing tribe, may dala nga mga butang nga ila ginapabugal. Diri ginapakita ang matuod nga ginhalinan (cultural roots) sang mga Kabankalanon, pag pa-ambit sa mga bag-ong tubo ang importansya sang kultura, pag-protektar kag pag-preserba sang mga cultural heritages, kag pag-promote sang lokal nga turismo paagi sa nagkalain lain nga mga talento — arts, music, dance, kag iban pa.
Ang sonata (music) ang dako nga butang agud tigayon nga mapa-ambit sang mga Kabankalanon ang gusto nila ipabutyag sa mga pumuluyo kag mga dumulo-ong.
Wala sala sa pag-gamit sang 'Aim High Kabankalanon' nga soundtrack, apang, mas manami kun ang sonata nga gin gamit ang mas 'festive, lively, ukon energetic', agud nga mas natagaan hustisya ang selebrasyon nga maka pa-Udyak sa mga Kabankalanon. As the name of the festival suggests UDYAKAN.
Manami ang lyriko sang Aim High Kabankalanon nga sonata, sa diin nagapakita sang pag-isa agud malab-ot ang isa ka tumong — PAG-ASENSO.
Siguro na 'misplaced' ang sonata subong nga tuig nga selebrasyon, apang, indi ini rason para madulaan kita sang gana nga mag-suporta sa mga tribu nga nagpakita sang ila talento sa dalanon.
'Choice of music,' dako nga butang sa mga selebrasyon kag nagakadapat lang nga ang sonata nga paga-gamiton ang nagakangay sa selebrasyon. The rest, puwede ma butang sa iban nga okasyon.
Kabay nga maghiliusa ang tanan agud mapanami ang syudad — batunon ang tanan nga mga suwestyon nga positibo, bangud sa ulihi, kamo man sa giyahon ang magbinuliganay nga Kabankalanon.
Kabankalanons! NO NEED TO FIGHT! Mas maayo kun mag-binuligay kamo agud mangin masulhay ang pagpangabuhi sang tagsa-tagsa.
Saludo sa tanan nga mga tribu nga nagpakita sang ila mga talento, lakip na ang mga kamot kag indibidwal sa likod sang madinu-agon nga mga costumes.
Goodluck kag happy 27th Charter Anniversary, Kabankalan! * | By Reymund Titong
| Photo courtesy of Entins Click
