07/10/2024
दशैंमा बचत गर्न विद्यार्थीलाई खुत्रुके वितरण
दमौली । जिल्लाको व्यास नगरपालिका वडा नं ४ स्थित कन्काई ग्लोवल एकडेमीले विजया दशमी पर्वको अवसरमा एक विशेष कार्यक्रम आयोजना गर्दै विद्यार्थीहरूलाई खुत्रुके वितरण गरेको छ । सो कार्यक्रममा, विद्यार्थीहरूलाई टीका र जमरा लगाएर खुत्रुके अर्थात भुड्की वितरण गरिएको हो । विद्यालयका कक्षा १ मा अध्यनरत ५५ जना विद्यार्थीलाई खुत्रुके वितरण गरेको विद्यालयका प्रबन्ध निर्देशक मिलन गोदारले जानकारी दिए । विगत दुई वर्ष देखि चाडपर्वमा खुत्रुके वितरण गदै आएको समेत उनले बताए ।
उनका अनुसार बालबालिकालार्ई बचत गर्ने र मितव्यायी ढंगले जीवनयापन गर्नको लागि खुत्रुके वितरण गरिएको हो । उनले भने, “आजको समयमा, बचतको महत्वलाई बुझ्न र अभ्यास गर्न अत्यन्त आवश्यक छ । हामीले यो कार्यक्रम आयोजना गरेर विद्यार्थीहरूलाई मितव्यायी ढंगले बचत गर्न महत्वपूर्ण रहेको सिकाउन चाहान्छौं । ” सो अवसरमा, विद्यालयले विद्यार्थीहरूलाई टीका र जमरा लगाइदिँदा पारिवारिक र सांस्कृतिक महत्वको बारेमा जानकारी गराइएको थियो। गोदारले भने, “नेपाली समाजमा चाडपर्वको महत्व अत्यधिक छ । तर, प्रविधिको तीव्र विकाससँगै मौलिक संस्कृति र परम्पराहरू भुल्न थालिएका छन्।
यस कारणले, हामीले चाडपर्वको महत्व बुझाउने कार्यक्रम आयोजना गरेका हौं।“ एकडेमीले विद्यार्थीलाई पढाई सँगसँगै व्यवहारिक सिकाईलाई समेत प्राथमिकता दिदै आएको छ ।
