What are the opening hours?

Monday 08:30 - 17:00 Tuesday 08:30 - 17:00 Wednesday 08:30 - 17:00 Thursday 08:30 - 17:00 Friday 08:30 - 17:00 Saturday 08:30 - 17:00

TechNation

Home
Myanmar
Yangon
TechNation

နောက်ဆုံးပေါ် နည်းပညာသတင်းများကို တင်ဆက်ပေးနေတဲ့ TechNation: Tech Contents in Myanmar
(142)

22/07/2024

🛰️ အာကာသထဲအချိန်ကြာကြာသွားလာနိုင်ဖို့ မိမိဆီးကိုပြန်သောက်ရမယ့် စက်ကိုတီထွင်

အာကာသမှာသွားလာမယ့်သူတွေအတွက် အထူးသဖြင့် International Space Station (ISS) အပြင်ဘက်မှာ သွားလာပြီး လေ့လာဖို့တွေ ပြင်ဆင်စရာရှိတာတွေ ပြင်ဆင်ဖို့အတွက် သွားလာလှုပ်ရှားရာမှာ အပေါ့၊ အလေးသွားဖို့ကို လက်ရှိအချိန်အထိ ပစ်လို့ရတဲ့ အထူးထုတ် Diaper တွေကို အသုံးပြုနေကြပါတယ်။

ဒါပေမယ့် အခုအခါမှာ သိပ္ပံပညာရှင်များက မိမိစွန့်လိုက်တဲ့ ဆီးကို ၅ မိနစ်အတွင်း သန့်စင်ပြီးရေသို့ ပြန်လည် recycle လုပ်နိုင်မယ့် ကိရိယာကိုတီထွင်လိုက်တာကြောင့် အာကာသထဲမှာ အချိန်ကြာကြာသွားလာလှုပ်ရှားတဲ့အခါမှာ သောက်သုံးဖို့ရေသီးသန့် အများအပြားသယ်သွားဖို့ မလိုအပ်တော့ပါဘူး။
အခုစက်ကိရိယာရဲ့ အရွယ်အစားကိုလဲ သေးငယ်ပြီး ကျောပိုးအိတ်ထဲမှာ ဆန့်နိုင်အောင် စီမံထားပါတယ်။

လက်ရှိမှာတော့ စမ်းသပ်ဆဲကာလဖြစ်ပြီး အနာဂတ် အာကာသသွားလာမည့်သူများ အသုံးပြုနိုင်မှာဖြစ်ကြောင်း July 12 မှာထုတ်ဝေထားတဲ့ Frontiers in Space Technology Journal မှာဖော်ပြထားတာကို ပြန်လည်မျှဝေလိုက်ပါတယ်ခင်ဗျာ။

04/07/2024

🎧 AirPods အသစ်မှာ camera ပါထည့်ပေးတော့မယ် 📷

Apple ကသူတို့ ecosystem ကိုပိုပြီး upgrade လုပ်တဲ့အနေနဲ့ နောက်လာမယ့် AirPods အသစ်တွေမှာ ကင်မရာ တွေပါထည့်ဖို့ စီစဥ်နေတယ်လို့ သိရပါတယ်။ ဒါကလည်း ပုံမှန်ကင်မရာတွေ မဟုတ်ဘူးနော်။ အနီအောက်ရောင်ခြည်သုံး infrared cameras တွေ။ iPhone တွေရဲ့ face ID အတွက်သုံးထားတဲ့ infrared cameras တွေလို့လည်း သိရတယ်။

ဘာကြောင့် ဒီလိုလုပ်တာလဲဆိုတော့ အဓိကက နှစ်ချက်ရှိတယ်။ ပထမတစ်ချက်က အသံအတွေ့အကြုံကို ပိုကောင်းအောင် လုပ်ဖို့ပါ။ ဥပမာ သင်က ခေါင်းလှည့်လိုက်ရင် အဲဒီဘက်က အသံကို ပိုပြီးသဲကွဲအောင် ကြားရမှာပေါ့။ ဒုတိယတစ်ချက်ကတော့ လေထဲမှာ လက်ဟန်ခြေဟန်နဲ့ AirPods ကို ထိန်းချုပ်လို့ရအောင်လို့ပါ။ ဒါဆိုရင် ဖုန်းကို မထိဘဲနဲ့ သီချင်းတွေဖွင့်တာ၊ ပိတ်တာတို့၊ အသံတိုးတာ၊ ကျယ်တာတို့ လုပ်လို့ရသွားမှာပေါ့။

Apple က ဒီ AirPods အသစ်တွေကို သူတို့ရဲ့ Vision Pro နဲ့ တွဲဖက်သုံးလို့ရအောင် ဒီဇိုင်းထုတ်နေတာပါ။ ဒီလိုလုပ်လိုက်တာနဲ့ VR ထဲမှာ အသံအတွေ့အကြုံ ပိုကောင်းသွားမယ်လို့ မျှော်လင့်ရတယ်။ ဥပမာ ဗီဒီယိုကြည့်နေတုန်း ခေါင်းလှည့်လိုက်ရင် အသံကလည်း လိုက်ပြီးပြောင်းသွားမယ်ပေါ့။ တကယ့်အသံနဲ့ ပိုတူသွားမှာပေါ့။

ဒါပေမယ့် ဒီနည်းပညာကို မကြာခင်တော့ မြင်ရဦးမှာ မဟုတ်သေးဘူး။ ၂၀၂၆ လောက်မှ စထုတ်နိုင်မယ်လို့ ခန့်မှန်းထားတယ်။ Foxconn ဆိုတဲ့ ထိုင်ဝမ်ကုမ္ပဏီကနေ ဒီကင်မရာတွေကို ထုတ်ပေးမှာပါ။ ပထမဆုံးအသုတ်အနေနဲ့ AirPods (၁၀) သန်း လောက်အတွက် ထုတ်ပေးဖို့ ပြင်ဆင်နေပြီ။ တစ်နှစ်ကို AirPods ၁၈ သန်းကနေ ၂၀ သန်းလောက်အထိ ထုတ်နိုင်ဖို့လည်း စီစဉ်နေတယ်။

ကင်မရာပါတဲ့ AirPods တွေသာ တကယ်ထွက်လာခဲ့ရင် ဒါဟာ Apple ရဲ့ Spatial Computing Ecosystem အတွက် next level ကိုခုန်တက်သွားတာပါပဲ။

03/07/2024

🔒သင့် Password ကလုံခြုံရဲ့လား 🛡️

ဒီနေ့ခေတ်မှာ ကျွန်တော်တို့တွေဟာ အင်တာနက်ပေါ်မှာ အကောင့်ပေါင်းများစွာ ပိုင်ဆိုင်ကြပါတယ်။ Email၊ Social Media၊ Bank အကောင့်တွေအပြင် အခြားဝန်ဆောင်မှုတွေပါ ပါဝင်ပါတယ်။ ဒီအကောင့်တွေကို ကာကွယ်ဖို့ passwords တွေဟာ အရေးကြီးဆုံးသော့ချက်ပဲ ဖြစ်ပါတယ်။ ဒါပေမယ့် တချို့လူတွေကတော့ password ကိုပေါ့ပေါ့လေးပဲတွေးပြီး “123456” တို့ “password” တို့ ကိုယ့်ရဲ့မွေးနေ့တို့ကိုပဲ ပေးလိုက်တာတို့ လုပ်ကြတယ်။

ပထမဆုံး စကားဝှက်ရိုးရိုးလေးတွေ ဘာကြောင့်မသုံးသင့်သလဲဆိုတာ ပြောပြချင်ပါတယ်။ "123456" တို့ "password" တို့လို စကားဝှက်တွေက ခန့်မှန်းရလွယ်တယ်။ ဥပမာ သင့်ရဲ့မွေးနေ့ကို စကားဝှက်အဖြစ်သုံးထားရင် သင့်ကိုသိတဲ့သူတွေ ခန့်မှန်းနိုင်တယ်။ ဟက်ကာတွေရဲ့ ပစ်မှတ်ဖြစ်လွယ်တယ်။ သူတို့မှာ အဖြစ်များတဲ့စကားဝှက်စာရင်းတွေ ရှိနေတတ်တယ်။ ဒါ့အပြင် ကွန်ပျူတာပရိုဂရမ်တွေကိုသုံးပြီး password ကို အလွယ်တကူ ခန့်မှန်းနိုင်တဲ့နည်းလမ်းတွေ ရှိနေပါတယ်။ ဒီတော့ ရိုးရှင်းလွယ်ကူတဲ့ password တွေက လုံးဝကိုလုံခြုံမှုမရှိပါဘူး။

နောက်တစ်ခုက အကောင့်တိုင်းမှာ တူညီတဲ့စကားဝှက်ကို ဘာလို့မသုံးသင့်သလဲဆိုတာပါ။ ဒါက ဘယ်လိုလဲဆိုတော့ အကောင့်တစ်ခုက hack ခံရရင် ကျန်တဲ့အကောင့်အားလုံးပါ အန္တရာယ်ရှိသွားတာပေါ့။ သင့်ရဲ့ Email Password ကို တစ်ယောက်ယောက် သိသွားတယ်ဆိုပါစို့။ သင်က Bank, Social Media နဲ့ အခြား Account တွေမှာ Password တစ်မျိုးတည်းကိုပဲ သုံးထားမယ်ဆိုရင်၊ သူက အားလုံးကို ဝင်လို့ရပြီ။ အဲ့ဒါက တစ်ခါတည်းနဲ့ သင့်ရဲ့အိမ်သော့ရော၊ အခန်းသော့ရော၊ မီးခံသေတ္တာသော့ကိုပါ ရသွားသလိုပါပဲ။ ဒါကြောင့် အကောင့်တစ်ခုချင်းစီမှာ မတူတဲ့ password တွေသုံးသင့်တယ်။

အဲဒါဆိုရင် စကားဝှက်တွေကို ဘယ်လိုမှတ်ထားမလဲပေါ့။ ဒီနေရာမှာ Password Manager တွေက အသုံးဝင်လာပါတယ်။ Password Manager ဆိုတာ သင့်ရဲ့စကားဝှက်တွေကို စနစ်တကျ သိမ်းဆည်းပေးတဲ့ app တစ်မျိုးပါ။ ဘာကောင်းလဲဆိုတော့ ခက်ခဲရှုပ်ထွေးတဲ့ passwords တွေကို အလိုအလျောက်ထုတ်ပေးနိုင်တယ်။ အကောင့်တွေကို အလိုအလျောက် ဝင်ပေးနိုင်တယ်။ password တွေကို အလိုအလျောက် ဖြည့်သွင်းပေးနိုင်တယ်။ အကောင့်တစ်ခုချင်းစီရဲ့ passwords တွေကိုမှတ်ထားစရာမလိုပဲ password manager ရဲ့ password တစ်ခုတည်းကိုပဲ မှတ်ထားရုံနဲ့ password အားလုံးကို တစ်နေရာတည်းမှာ သိမ်းထားပေးနိုင်တယ်။

မိုဘိုင်းဖုန်းတွေမှာ သုံးလို့ရတဲ့ Password Manager တွေကို ပြောပြရရင် LastPass, 1Password, Bitwarden စတာတွေ ရှိပါတယ်။ Android ရော iOS မှာပါ သုံးလို့ရပါတယ်။ ဒီ app တွေက သင့်စကားဝှက်တွေကို encrypt လုပ်ပြီး လုံခြုံစွာသိမ်းဆည်းပေးပါတယ်။ ပြီးတော့ သင့်ဖုန်းကနေ ကွန်ပျူတာဆီကိုလည်း စကားဝှက်တွေကို sync လုပ်ပေးနိုင်တယ်။

နိဂုံးချုပ်အနေနဲ့ ပြောရရင် လုံခြုံစိတ်ချရတဲ့ password တစ်ခုဆိုတာ ခန့်မှန်းရခက်ပြီး ရှည်လျားရပါမယ်။ အကောင့်တိုင်းမှာလည်း မတူညီတဲ့ password တွေ သုံးသင့်ပါတယ်။ ဒါပေမယ့် အဲဒီစကားဝှက်တွေကို မှတ်မိဖို့ Password Manager တွေကို အသုံးပြုနိုင်ပါတယ်။ Password Manager တွေက သင့်ရဲ့အကောင့်တွေကို လုံခြုံစွာ ကာကွယ်နိုင်ရုံသာမက အသုံးပြုရတာလည်း ပိုမိုလွယ်ကူစေပါတယ်။ ဒါ့ကြောင့် သင့်ရဲ့ဒစ်ဂျစ်တယ်လုံခြုံရေးကို တိုးမြှင့်ဖို့ Password Manager တစ်ခုကို စတင်အသုံးပြုဖို့ အကြံပြုချင်ပါတယ်။

03/07/2024

လစဥ်ကြေးပေးရမယ့် Apple Intelligence + ကိုစီစဥ်နေတဲ့ Apple 🍎

Apple က လောလောဆယ်ထိတော့ သူတို့ရဲ့ Apple Intelligence အခမဲ့ပေးသွားမယ်လို့ ကြေညာထားပါတယ်။ ChatGPT သုံးခွင့်အပါအဝင်ပေါ့။ Apple က သူတို့ရဲ့ ကိုယ်ပိုင် AI ဆာဗာတွေကို သုံးမှာဖြစ်ပြီး Private Cloud Compute (PCC) လို့ခေါ်ပါတယ်။ ဒါ့အပြင် ChatGPT ကိုလည်း OpenAI ကို ငွေပေးစရာမလိုဘဲ သုံးခွင့်ရထားတယ်လို့ သိရပါတယ်။ ဒါဟာ Apple အတွက် တော်တော်လေးကောင်းတဲ့ အားသာချက်တစ်ခုပါပဲ။

ဒါပေမယ့် နောက်ပိုင်းမှာ ဘာတွေဖြစ်လာနိုင်သလဲ?

Bloomberg က Mark Gurman ရဲ့ အဆိုအရတော့ Apple က ဒီ feature ကနေ နောက်ပိုင်းမှာ အကျိုးအမြတ်ရအောင် လုပ်သွားဖို့ ရည်ရွယ်ထားတယ်လို့ ပြောပါတယ်။ ဥပမာ "Apple Intelligence+" လိုမျိုး ဝန်ဆောင်မှုတစ်ခု ထွက်လာနိုင်ပြီး လစဉ်ကြေးပေးသွင်းရတဲ့ ပုံစံဖြစ်နိုင်တယ်တဲ့။ iCloud လိုပေါ့။ ဒါ့အပြင် Apple က သူတို့နဲ့ ပူးပေါင်းလာတဲ့ AI ပါတနာတွေဆီကနေ subscription ဝင်ငွေရဲ့ တစ်စိတ်တစ်ပိုင်းကိုလည်း ရယူသွားမယ်လို့ သိရပါတယ်။

ဘယ်လိုပုံစံတွေ ဖြစ်လာနိုင်မလဲ?

အခမဲ့သုံးခွင့်ကို ကန့်သတ်ထားပြီး ပိုသုံးချင်ရင် ငွေပေးရတဲ့ပုံစံမျိုးတွေ ဖြစ်လာနိုင်ပါတယ်။ ဒီပုံစံက ChatGPT တို့၊ တခြား AI ကုမ္ပဏီတွေ လုပ်နေတဲ့ ပုံစံပါပဲ။ အခမဲ့သုံးရင် တစ်ရက်ကို ဘယ်နှစ်ကြိမ်၊ ဘယ်လောက်အထိပဲ သုံးလို့ရမယ်၊ ဒါထက်ပိုသုံးချင်ရင် ငွေပေးပြီး Premium ဝယ်ရမယ်ဆိုတဲ့ သဘောပေါ့။ Apple က PCC ကို အသုံးပြုတဲ့အခါ ဒီလိုမျိုး ကန့်သတ်ချက်တွေ ထားနိုင်ပါတယ်။

နောက်တစ်နည်းကတော့ Apple ရဲ့ ကိုယ်ပိုင် AI နည်းပညာတွေကိုတော့ အကန့်အသတ်မရှိ အခမဲ့သုံးခွင့်ပေးထားမယ်။ ဒါပေမယ့် ChatGPT လိုမျိုး ပြင်ပ AI ဝန်ဆောင်မှုတွေကို သုံးချင်တယ်ဆိုရင်တော့ Apple Intelligence+ လို subscription တစ်ခုဝယ်ပြီးမှ သုံးခွင့်ရမယ့် ပုံစံမျိုးပါ။ ဒီနည်းက Apple ရဲ့ ကိုယ်ပိုင်နည်းပညာကို အားပေးသလိုဖြစ်ပြီး တစ်ဖက်ကလည်း ဝင်ငွေရနိုင်တဲ့ နည်းလမ်းတစ်ခုပါပဲ။

ဘာကြောင့် Apple က ဒီလိုလုပ်ချင်ရတာလဲ?

AI နည်းပညာဟာ တော်တော်လေး ကုန်ကျစရိတ်များပါတယ်။ အထူးသဖြင့် ChatGPT လိုမျိုး အဆင့်မြင့် AI တွေကို မြောက်များစွာသော သုံးစွဲသူတွေအတွက် လည်ပတ်ပေးဖို့ဆိုတာ ငွေကုန်ကြေးကျ အရမ်းများပါတယ်။ ဒါ့ကြောင့် Apple အနေနဲ့ ဒီကုန်ကျစရိတ်တွေကို ကာမိအောင် တစ်နည်းနည်းနဲ့ ဝင်ငွေရှာဖို့ လိုအပ်လာနိုင်ပါတယ်။

ဒါ့အပြင် Apple ဟာ နောက်ပိုင်းမှာ AI နည်းပညာကို ပိုပိုပြီး အသုံးချလာမှာ သေချာပါတယ်။ နောက်ထွက်လာမယ့် iPhone တွေ၊ iPad တွေမှာ AI က ပိုပိုပြီး အရေးပါလာမယ်။ ဒီလိုအခြေအနေမှာ AI ဝန်ဆောင်မှုတွေကနေ ဝင်ငွေရနိုင်တဲ့ နည်းလမ်းတွေကို Apple က ကြိုတင်စဉ်းစားနေတာပါ။

02/07/2024

AI သုံးပြီး အကျဥ်းသားတွေကို ထိန်းချုပ်မယ့် အနာဂတ် ထောင်စနစ်

အနာဂတ်မှာ တကယ်ဖြစ်လာနိုင်တဲ့ AI သုံးထားတဲ့ Cognify လို့ခေါ်တဲ့ ထောင်စနစ်ရဲ့ concept video တစ်ခုကို Youtube မှာကြည့်လိုက်ရပါတယ်။ ဒီစနစ်က ထောင်သားတွေကို ရုပ်ပိုင်းဆိုင်ရာအရ ထောင်ချတာမဟုတ်ဘဲ သူတို့ရဲ့ ဦးနှောက်ထဲကို AI နဲ့ဖန်တီးထားတဲ့ မှတ်ဉာဏ်တွေ တိုက်ရိုက် ထည့်သွင်းပေးမှာပါ။ ဒီနည်းနဲ့ ထောင်သားတွေက အချိန်တိုတိုလေးအတွင်းမှာပဲ နှစ်ပေါင်းများစွာ ထောင်ကျခဲ့သလိုမျိုး ခံစားရမှာ။

စဉ်းစားကြည့်ရင် ဒါက နည်းပညာအရ တော်တော်လေး ခေတ်ရှေ့ပြေးတဲ့ concept တစ်ခုပါ။ ဒါက စိတ်ကူးယဥ်သိပ္ပံဇာတ်လမ်းတွေထဲက အကြောင်းအရာတွေနဲ့ တော်တော်လေး ဆင်တူနေပါတယ်။ စိတ်ထဲမှာ Black Mirror ဇာတ်လမ်းတွေ ပြန်မြင်ယောင်မိတယ်။

ခုချိန်ထိတော့ ဒီနည်းပညာက တကယ်မရှိသေးဘူး။ ဒါပေမဲ့ တိရစ္ဆာန်တွေအပေါ် စမ်းသပ်မှုတွေအရ လူတွေအပေါ်မှာလည်း သုံးလို့ရနိုင်တယ်လို့ သိပ္ပံပညာရှင်တွေက ယူဆနေကြတယ်။ ဒီနည်းပညာက လာမယ့် (၁၀) နှစ်အတွင်း ဖြစ်လာနိုင်တယ်လို့ သိပ္ပံပညာရှင်တွေက ယုံကြည်ထားကြပါတယ်။ ပြဿနာက ဘာလဲဆိုတော့ ကျင့်ဝတ်ပိုင်းဆိုင်ရာ အခက်အခဲတွေကို ကျော်လွှားနိုင်မှ ဒါကို တကယ်လက်တွေ့အသုံးချနိုင်မှာ။

ဒါကြောင့် စဥ်းစားစရာတွေကတော့ အများကြီးပဲ။ ဒီလိုမျိုး AI စနစ်က ဥပဒေချိုးဖောက်တဲ့ လူတွေကို ပြုပြင်ဖို့ တကယ်ရော ထိရောက်နိုင်ပါ့မလား၊ ဒါမှမဟုတ် လူ့အခွင့်အရေး ချိုးဖောက်မှုလို ဖြစ်သွားမလား၊ တကယ်လို့ အစိုးရတွေက ဒီစနစ်ကို အလွဲသုံးစားလုပ်ရင်ရင် ဘာတွေဖြစ်လာနိုင်မလဲ စတဲ့ စိုးရိမ်စရာတွေ ရှိနေပါတယ်။

TechNation ပရိတ်သတ်တွေရော ဒီအကြောင်းအရာနဲ့ ပတ်သက်ပြီး ဘယ်လိုထင်လဲ။ ဒါက တကယ်ဖြစ်လာနိုင်မယ်လို့ ထင်လား။ ဒါမှမဟုတ် သိပ္ပံဇာတ်လမ်းတွေထဲကလို စိတ်ကူးယဉ်သက်သက်ပဲလို့ထင်လား။ Comment ထဲမှာ ဝင်ပြီးဆွေးနွေးခဲ့ကြပါဦး။

Video ကိုတော့ ဒီ link မှာသွားကြည့်နိုင်ပါတယ်။ ➡️ https://youtu.be/YFUv4_lCBLY?si=HITI9M-7piy4QHSV

01/07/2024

🌌 Milky Way Galaxy နဲ့တိုက်မိမယ့် Andromeda Galaxy ကြီး 🌌

Andromeda Galaxy ဆိုတာဘာလဲ?

Andromeda Galaxy ဟာ ကျွန်တော်တို့ Milky Way Galaxy နဲ့ အနီးဆုံး အိမ်နီးချင်း galaxy ကြီး တစ်ခုဖြစ်ပါတယ်။ ၎င်းကို M31 လို့လည်း ခေါ်ကြပါတယ်။ Andromeda ဟာ Milky Way ထက် အရွယ်အစား ပိုကြီးပြီး ကြယ်တွေ သန်းပေါင်း ထရီလီယံနဲ့ချီပြီး ပါဝင်ပါတယ်။ ကမ္ဘာကနေ အလင်းနှစ် ၂.၅ သန်းခန့် အကွာအဝေးမှာ တည်ရှိပါတယ်။

ဘယ်တော့တိုက်မိမှာလဲ?

သိပ္ပံပညာရှင်တွေရဲ့ တွက်ချက်မှုအရ Milky Way နဲ့ Andromeda တို့ဟာ နှစ်ပေါင်း ၄.၅ ဘီလီယံခန့်အကြာမှာ တိုက်မိကြမှာ ဖြစ်ပါတယ်။ ဒါဟာ လူသားတွေအတွက် အလွန်ရှည်လျားတဲ့ အချိန်ကာလ ဖြစ်ပေမယ့် ကမ္ဘာကြီးရဲ့ သက်တမ်းနဲ့ နှိုင်းယှဉ်ရင်တော့ သိပ်မကြာလှပါဘူး။

ဘယ်လိုတိုက်မိမှာလဲ?

Galaxy နှစ်ခုဟာ တစ်နာရီကို ကီလိုမီတာ (110) နှုန်းနဲ့ မြန်မြန်ဆန်ဆန် တစ်ခုနဲ့တစ်ခု ဦးတည်နေကြတာ ဖြစ်ပါတယ်။ သူတို့ဟာ ပထမဆုံးအကြိမ် ထိတွေ့မိတဲ့အခါ တစ်ခုနဲ့တစ်ခု ဖြတ်သန်းသွားပြီး နောက်ပိုင်းမှာ ဆွဲငင်အားကြောင့် ပြန်လည်နီးကပ်လာကာ ပေါင်းစည်းသွားကြမှာ ဖြစ်ပါတယ်။ ဒီဖြစ်စဉ်တစ်ခုလုံးဟာ သန်းပေါင်းများစွာသော နှစ်တွေကြာမြင့်မှာ ဖြစ်ပါတယ်။

ဘာတွေဆက်ဖြစ်လာနိုင်လဲ?

၁။ Galaxy အသစ် ဖြစ်ပေါ်လာခြင်း - Milky Way နဲ့ Andromeda ပေါင်းစည်းပြီးနောက် ပိုကြီးမားတဲ့ galaxy အသစ်တစ်ခု ဖြစ်ပေါ်လာပါလိမ့်မယ်။ အချို့က ဒီ galaxy အသစ်ကို "Milkomeda" လို့ အမည်ပေးထားကြပါတယ်။

၂။ ကြယ်စနစ်အသစ်များ ဖြစ်ပေါ်လာခြင်း - Galaxy နှစ်ခု ပေါင်းစည်းရာမှာ ဓာတ်ငွေ့တိမ်တိုက်တွေ ထိတွေ့မိပြီး ကြယ်သစ်တွေ ဖြစ်ပေါ်လာနိုင်ပါတယ်။

၃။ နေစနစ်များ ရွေ့လျားခြင်း - ကြယ်တွေရဲ့ ဆွဲငင်အားကြောင့် နေစနစ်တွေဟာ မူလနေရာကနေ ရွေ့လျားသွားနိုင်ပါတယ်။

၄။ ကြယ်တွေ တိုက်မိဖို့ အလားအလာနည်းပါးခြင်း - Galaxy တွေ တိုက်မိတယ်ဆိုပေမယ့် ကြယ်တွေအကြား အကွာအဝေးဟာ အလွန်ကျယ်ဝန်းတာကြောင့် ကြယ်တွေ တိုက်မိဖို့ အလားအလာ နည်းပါးပါတယ်။

၅။ နက္ခတ္တဗေဒ လေ့လာမှုပုံစံ ပြောင်းလဲခြင်း - ကမ္ဘာကြီးကနေ မြင်ရတဲ့ ကောင်းကင်ပုံစံဟာ လုံးဝ ပြောင်းလဲသွားမှာ ဖြစ်ပါတယ်။

နိဂုံးချုပ်အနေနဲ့ ပြောရမယ်ဆိုရင် Milky Way နဲ့ Andromeda တိုက်မိမှုဟာ စကြဝဠာအတွက် ထူးဆန်းတဲ့ အဖြစ်အပျက် မဟုတ်ပေမယ့် ဤဖြစ်စဉ်ကို လေ့လာခြင်းဖြင့် ဂယ်လက်ဆီများ ဖွဲ့စည်းပုံနှင့် တိုးတက်ပြောင်းလဲမှုအကြောင်း ပိုမိုသိရှိလာနိုင်ပါတယ်။ ထို့အပြင် စကြဝဠာ၏ အနာဂတ်ကိုလည်း ခန့်မှန်းနိုင်မှာ ဖြစ်ပါတယ်။

01/07/2024

🌌 စကြဝဠာရဲ့ နက်နဲမှုတွေကို ဖော်ထုတ်နေတဲ့ James Webb Telescope 🔭

အာကာသထဲက စူပါဟီးရိုး James Webb Space Telescope (JWST) ကြီးအကြောင်းပြောပြချင်ပါတယ်။ အာကာသကြီးထဲမှာ ဘာတွေဖြစ်နေလဲဆိုတာ သိချင်တဲ့သူတွေအတွက် ဒီကောင်က တကယ့်ကို အံ့ဩစရာကောင်းတဲ့ ကိရိယာတစ်ခုပါပဲ။ ဒီတယ်လီစကုပ်ကြီးက ကျွန်တော်တို့ရဲ့ စကြဝဠာအကြောင်း နားလည်သိရှိမှုကို တစ်ခါတည်း အဆင့်မြှင့်တင်ပေးလိုက်တာပါ။

ပထမဆုံးအနေနဲ့ JWST ရဲ့ နောက်ခံသမိုင်းကြောင်းလေး ပြောပြပါရစေ။ ဒီစီမံကိန်းကြီးက ၁၉၉၆ ခုနှစ်လောက်ကတည်းက စတင်ခဲ့တာပါ။ အဓိက ရည်ရွယ်ချက်ကတော့ ကျွန်တော်တို့ စကြဝဠာရဲ့ အစောပိုင်းကာလတွေကို လေ့လာဖို့၊ ဂြိုလ်တွေရယ် ဂလက်ဆီတွေရယ် ဘယ်လိုဖြစ်ပေါ်လာသလဲဆိုတာ သိရှိဖို့ပါပဲ။ ဒါပေမယ့် ဒီစီမံကိန်းက လွယ်လွယ်နဲ့ ပြီးမြောက်တာတော့ မဟုတ်ပါဘူး။ နည်းပညာပိုင်းဆိုင်ရာ ပြဿနာတွေ၊ ငွေကြေးအခက်အခဲတွေ အမျိုးမျိုးကြုံခဲ့ရပါတယ်။ ဒါပေမယ့် နောက်ဆုံးတော့ NASA၊ ဥရောပအာကာသအေဂျင်စီ (ESA) နဲ့ ကနေဒါအာကာသအေဂျင်စီ (CSA) တို့ရဲ့ ပူးပေါင်းကြိုးပမ်းမှုကြောင့် ၂၀၂၁ ခုနှစ်မှာ အောင်မြင်စွာ လွှတ်တင်နိုင်ခဲ့ပါတယ်။

JWST ရဲ့ နည်းပညာပိုင်းဆိုင်ရာ အသေးစိတ်တွေကို ပြောရရင်တော့ သူ့ရဲ့ အဓိကမှန်ပြောင်းကြီးက beryllium ဆိုတဲ့ သတ္တုနဲ့ လုပ်ထားပြီး အပိုင်း ၁၈ ပိုင်း ပါဝင်ပါတယ်။ ဒီမှန်ပြောင်းကြီးဟာ Hubble Space Telescope ထက် ၃ ဆလောက် ပိုကြီးပါတယ်။ ဒါ့အပြင် နေရောင်ခြည်ကို ကာကွယ်ဖို့အတွက် အထပ် ၅ ထပ်ပါတဲ့ နေကာနဲ့ အအေးပေးစနစ်လည်း ပါဝင်ပါတယ်။ ဒါက အနီအောက်ရောင်ခြည်တွေကို စူးစမ်းလေ့လာဖို့အတွက် အရေးကြီးပါတယ်။

JWST ရဲ့ အဓိက သိပ္ပံဆိုင်ရာ ရည်ရွယ်ချက်တွေကတော့ ကြယ်တွေနဲ့ ဂြိုလ်တွေ ဘယ်လိုဖြစ်ပေါ်လာသလဲဆိုတာ လေ့လာဖို့၊ ဂလက်ဆီတွေရဲ့ ဇစ်မြစ်ကို ရှာဖွေဖို့နဲ့ စကြဝဠာကြီး ဘယ်လိုပြောင်းလဲနေလဲဆိုတာ စူးစမ်းဖို့ပဲ ဖြစ်ပါတယ်။ ဒီအတွက် NIRCam၊ NIRSpec၊ MIRI နဲ့ FGS/NIRISS ဆိုတဲ့ အဆင့်မြင့်ကိရိယာတွေ တပ်ဆင်ထားပါတယ်။ ဒီကိရိယာတွေက တစ်ခုနဲ့တစ်ခု မတူညီတဲ့ အလင်းတွေကို လေ့လာနိုင်ပါတယ်။

JWST က စတင်လွှတ်တင်ပြီးကတည်းက အံ့ဩစရာကောင်းတဲ့ ရှာဖွေတွေ့ရှိမှုတွေ လုပ်နိုင်ခဲ့ပါတယ်။ JWST ရဲ့ အံ့ဩစရာကောင်းတဲ့ တွေ့ရှိချက်တွေထဲက တစ်ခုကတော့ Big Bang ပြီးနောက် သန်း ၃၀၀ လောက်အကြာမှာ ဖွဲ့စည်းခဲ့တဲ့ အစောဆုံး ဂလက်ဆီတွေကို တွေ့ရှိခဲ့တာပါ။ ဒါ့အပြင် TRAPPIST-1 လို ကြယ်စနစ်တွေထဲက ဂြိုလ်တွေရဲ့ ဝန်းကျင်အခြေအနေတွေကိုလည်း လေ့လာနိုင်ခဲ့ပါတယ်။ တချို့ဂြိုလ်တွေမှာ ရေနဲ့ ကာဗွန်ဒိုင်အောက်ဆိုဒ် ရှိနိုင်ကြောင်းတွေ့ရှိခဲ့တာဟာ ကမ္ဘာပြင်ပမှာ သက်ရှိတွေ ရှိနိုင်ခြေကို ရှာဖွေတဲ့နေရာမှာ အရေးပါတဲ့ ခြေလှမ်းတစ်ရပ် ဖြစ်ပါတယ်။

ဒါပေမယ့် ဒီလိုအံ့ဩစရာကောင်းတဲ့ ကိရိယာကြီးဟာ စိန်ခေါ်မှုတွေလည်း ရှိနေပါသေးတယ်။ အာကာသထဲမှာ အရမ်းဝေးတဲ့နေရာမှာ ရှိနေတာဆိုတော့ ပြဿနာတစ်ခုခုဖြစ်ရင် ပြင်ဆင်ဖို့က မလွယ်ဘူးလေ။ နောက်ပြီး အချိန်ကြာလာတာနဲ့အမျှ ပျက်စီးနိုင်တဲ့အန္တရာယ်လည်း ရှိပါတယ်။ ဒါပေမယ့် သိပ္ပံပညာရှင်တွေက ဒီအန္တရာယ်တွေကို လျော့ချနိုင်အောင် အစွမ်းကုန်ကြိုးစားနေကြပါတယ်။

နိဂုံးချုပ်အနေနဲ့ ပြောရမယ်ဆိုရင် JWST ဟာ စကြဝဠာရဲ့ လျှို့ဝှက်ချက်တွေကို ဖော်ထုတ်ဖို့ ကြိုးပမ်းနေတဲ့ ကျွန်တော်တို့ရဲ့ ခရီးလမ်းမှာ အရေးပါတဲ့ မှတ်တိုင်တစ်ခု ဖြစ်ပါတယ်။ သူ့ရဲ့ ရှာဖွေတွေ့ရှိချက်တွေက စကြဝဠာအကြောင်း ကျွန်တော်တို့ရဲ့ နားလည်မှုကို အများကြီး တိုးတက်စေခဲ့ပါတယ်။ JWST က ဆက်လက်လည်ပတ်နေသ၍ နောက်ထပ်အံ့ဩဖွယ်ရာ တွေ့ရှိချက်တွေ ထွက်ပေါ်လာဦးမှာ ဖြစ်ပါတယ်။

30/06/2024

မှန်းချက်နဲ့နှမ်းထွက် မကိုက်ခဲ့တဲ့ Apple Pippin 🎮🍎

Apple ကို ကြားရင် iPhone တွေ၊ MacBook တွေပဲ မျက်စိထဲမြင်နေကြမှာပါ။ Apple လိုကုမ္ပဏီလည်း ထုတ်သမျှ products တိုင်းက အောင်မြင်နေတာတော့ မဟုတ်ပါဘူး။ ကုမ္ပဏီစထောင်ကတည်းကနေ ယနေ့ချိန်ထိ မအောင်မြင်ခဲ့တဲ့ products တွေအများကြီးပါပဲ။ ဒီနေ့တော့ Apple ရဲ့ မျက်နှာပန်းမလှခဲ့တဲ့ ထုတ်ကုန်တစ်ခုအကြောင်း ပြောပြချင်ပါတယ်။ အဲဒီထဲက တစ်ခုကတော့ Apple Pippin ပဲ ဖြစ်ပါတယ်။

Apple Pippin ဆိုတာ 1990 ခုနှစ်များအတွင်းက Apple က ထုတ်လုပ်ခဲ့တဲ့ ဂိမ်းကွန်ဆိုးလ်တစ်ခုပါ။ ဒါပေမယ့် သူက သာမန် ဂိမ်းစက်တစ်လုံးမဟုတ်ပါဘူး။ သူက ဂိမ်းကွန်ဆိုးလ်နဲ့ ကွန်ပျူတာကို ပေါင်းထားတဲ့ device ပါ။ ကျွန်တော်တို့ အခုခေတ်မှာ ဂိမ်းကွန်ဆိုးလ်က ဂိမ်းကစားဖို့ပဲဆိုပြီး သီးသန့်ထားကြတယ်မဟုတ်လား။ ဒါပေမယ့် Apple Pippin က ဂိမ်းကစားရင်းနဲ့ ကွန်ပျူတာလိုပါ သုံးလို့ရအောင် ကြိုးစားခဲ့တာပါ။

Apple က လူတိုင်းအိမ်မှာ ကွန်ပျူတာတစ်လုံးစီရှိသင့်တယ်လို့ ယူဆပြီး ဒီ device ကိုဖန်တီးခဲ့ကြတာပါ။ ဒါပေမယ့် ကွန်ပျူတာတွေက စျေးကြီးတော့ Apple က ဂိမ်းကွန်ဆိုးလ်ကနေ စတင်ပြီး နောက်ပိုင်းမှာ လူတွေက ကွန်ပျူတာဆီကို ကူးပြောင်းလာမယ်လို့ မျှော်လင့်ခဲ့ကြတာပေါ့။ ဒါဟာ သူတို့ရဲ့ မဟာစီမံကိန်းကြီးပေါ့။

ဒါပေမယ့် Apple Pippin က အောင်မြင်မှုမရခဲ့ပါဘူး။ Apple Pippin ကို စတင်မိတ်ဆက်တုန်းက ဈေးနှုန်းက $599 ပါ။ ဒါ့အပြင်ကိုမှ ဈေးကွက်ထဲက ပြိုင်ဖက်တွေထက်လည်း ဈေးကနှစ်ဆလောက်ကြီးနေပါသေးတယ်။ ဒါ့အပြင် Apple Pippin မှာက ဆော့စရာ games တွေလည်း အရမ်းနည်းတယ်။ ဒီအတွက်ကြောင့်လည်း gamers တွေကို မဆွဲဆောင်နိုင်ခဲ့ကြပါဘူး။ ဂိမ်းကွန်ဆိုးလ်မကျ ကွန်ပျူတာမကျ ဖြစ်နေတာကြောင့်လည်း ဈေးကွက်ထဲမှာ ထင်သလောက်နေရာမရခဲ့ဘူး။ ဒါကြောင့်ပဲ 1997 ခုနှစ်မှာ ထုတ်လုပ်မှု ရပ်ဆိုင်းခဲ့ရပါတယ်

Apple Pippin ဟာ နည်းပညာအရ ဆန်းသစ်တီထွင်မှုရှိပေမယ့်လည်း စျေးကွက်လိုအပ်ချက်နဲ့ မကိုက်ညီတဲ့အတွက် မအောင်မြင်ခဲ့တာလို့ ပြောလို့ရပါတယ်။ တကယ်တော့ ဒီလိုအရှုံးတွေကြောင့်ပဲ နောက်ပိုင်းမှာ iPhone, iPad စတဲ့ အောင်မြင်တဲ့ ထုတ်ကုန်တွေ ထွက်လာခဲ့တာပါ။

30/06/2024

🛜 WiFi နည်းပညာပေါ်ပေါက်လာပုံသမိုင်းကြောင်း

Wi-Fi ဆိုတဲ့စကားလုံးကို ကြားလိုက်ရုံနဲ့ ယနေ့ခေတ်မှာ ကျွန်တော်တို့အားလုံး ရင်းနှီးကျွမ်းဝင်နေကြပါပြီ။ ဒါပေမယ့် ဒီနည်းပညာ ဘယ်လိုပေါ်ပေါက်လာခဲ့သလဲဆိုတာ သိတဲ့လူနည်းပါတယ်။ ဆိုတော့ Wi-Fi ဘယ်လိုပေါ်ပေါက်လာခဲ့လဲဆိုတဲ့ သမိုင်းကြောင်းလေးကို ပြောပြချင်ပါတယ်။

Wi-Fi နည်းပညာရဲ့ မူလအစက 1985 ခုနှစ်လောက်မှာ စတင်ခဲ့ပါတယ်။ အမေရိကန် Federal Communications Commission (FCC) က ISM (Industrial, Scientific and Medical) ဆိုတဲ့ ရေဒီယိုလှိုင်းနှုန်းတွေကို လိုင်စင်မလိုဘဲ သုံးခွင့်ပြုခဲ့ပါတယ်။ ဒီဆုံးဖြတ်ချက်က Wi-Fi နည်းပညာ ပေါ်ပေါက်လာဖို့ အဓိကအခြေခံဖြစ်ခဲ့ပါတယ်။

Wi-Fi နည်းပညာ ဖွံ့ဖြိုးတိုးတက်လာတဲ့နေရာမှာ ဩစတြေးလျနိုင်ငံရဲ့ အခန်းကဏ္ဍက အရေးပါပါတယ်။ WiFi နည်းပညာကို တစ်ဦးတစ်ယောက်တည်းက တီထွင်ခဲ့တာ မဟုတ်ပါဘူး။ 1990 ပြည့်နှစ်များအစပိုင်းမှာ ဩစတြေးလျ သိပ္ပံပညာရှင် John O'Sullivan ဦးဆောင်တဲ့ Commonwealth Scientific and Industrial Research Organisation (CSIRO) က သုတေသီတွေဟာ WiFi နည်းပညာရဲ့ အခြေခံဖြစ်တဲ့ radio wave အချက်ပြမှုနည်းပညာကို တီထွင်ခဲ့ကြပါတယ်။

အရင်က ကွန်ပျူတာတွေ တစ်လုံးနဲ့တစ်လုံးချိတ်ဆက်ဖို့၊ အင်တာနက်ချိတ်ဆက်ဖို့ဆိုရင် ကြိုးတွေကိုပဲ သုံးရပါတယ်။ WiFi နည်းပညာကို တီထွင်ရတဲ့ ရည်ရွယ်ချက်က ကွန်ပျူတာတွေနဲ့ အခြားစက်ပစ္စည်းတွေကို ကြိုးမဲ့ချိတ်ဆက်နိုင်ဖို့နဲ့၊ အင်တာနက်အသုံးပြုမှု ပိုမိုလွယ်ကူအဆင်ပြေစေဖို့ပါ။

1997 ခုနှစ်မှာ Institute of Electrical and Electronics Engineers (IEEE) က 802.11 ဆိုတဲ့ ကြိုးမဲ့ကွန်ရက်စံချိန်စံညွှန်းကို ထုတ်ပြန်ခဲ့ပါတယ်။ ဒါဟာ Wi-Fi နည်းပညာရဲ့ ပထမဆုံး တရားဝင်စံချိန်စံညွှန်း ဖြစ်လာခဲ့ပါတယ်။

1999 ခုနှစ်မှာ Wi-Fi Alliance ဆိုတဲ့ အဖွဲ့အစည်းတစ်ခု ပေါ်ပေါက်လာခဲ့ပါတယ်။ သူတို့က "Wi-Fi" ဆိုတဲ့ အမည်နဲ့ လိုဂိုကို တီထွင်ခဲ့ပြီး၊ IEEE 802.11 စံချိန်စံညွှန်းနဲ့ ကိုက်ညီတဲ့ ထုတ်ကုန်တွေကို အသိအမှတ်ပြုပေးခဲ့ပါတယ်။

1997 ခုနှစ်မှာ ပထမဆုံး WiFi စံချိန်စံညွှန်း IEEE 802.11 ကို ထုတ်ပြန်ခဲ့ပြီး အမြန်နှုန်းမှာ 2 Mbps သာရှိခဲ့တယ်။ 1999 ခုနှစ်မှာတော့ ပိုမိုမြန်ဆန်တဲ့ WiFi 802.11b စံချိန်စံညွှန်းကို မိတ်ဆက်ခဲ့ပြီး အမြန်နှုန်း 11 Mbps အထိ တိုးမြှင့်နိုင်ခဲ့ပါတယ်။

နောက်ပိုင်းနှစ်တွေမှာ 802.11g, 802.11n (WiFi 4), 802.11ac (WiFi 5) စတဲ့ စံချိန်စံညွှန်းအသစ်တွေ ဆက်တိုက်ပေါ်ထွက်လာခဲ့ပြီး မြန်နှုန်းနှင့် လုံခြုံရေးပိုင်းတွင် သိသိသာသာ တိုးတက်လာခဲ့တယ်။ 802.11g က 54 Mbps, 802.11n က 600 Mbps, 802.11ac က 3.5 Gbps အထိ အသီးသီး တိုးတက်လာပါတယ်။

ယခုအခါ WiFi 6 (802.11ax) နဲ့ WiFi 6E တို့က နောက်ဆုံးပေါ် စံချိန်စံညွှန်းများဖြစ်လာပြီး အမြန်နှုန်း 9.6 Gbps အထိ ရှိလာပါတယ်။ WiFi 6E နဲ့ WiFi 6 က အမြန်နှုန်းတူတယ်ဆိုပေမယ့် WiFi 6E က 6 GHz လှိုင်းကို သုံးတာမို့ လိုင်းကြပ်တာတွေ မရှိသလို ပိုပြီးငြိမ်ပါတယ်။

2000 ပြည့်နှစ်များအစပိုင်းကစပြီး Wi-Fi နည်းပညာဟာ လျင်လျင်မြန်မြန်ပဲ ပျံ့နှံ့လာခဲ့တယ်။ Laptop တွေ၊ Smartphone တွေမှာ Wi-Fi ချိတ်ဆက်နိုင်တဲ့ စွမ်းရည်တွေ ပါလာခဲ့ပါတယ်။ ကဖေးဆိုင်တွေ၊ စားသောက်ဆိုင်တွေ၊ လေဆိပ်တွေမှာ Wi-Fi hotspot တွေ ပေါ်ပေါက်လာခဲ့ပါတယ်။

အခုခေတ်မှာတော့ WiFi က ကျွန်တော်တို့ နေ့စဉ်ဘဝရဲ့ တစ်စိတ်တစ်ပိုင်းလိုဖြစ်နေပြီ။ စမတ်ဖုန်းတွေ၊ တက်ဘလက်တွေ၊ ကွန်ပျူတာတွေ ချိတ်ဆက်ဖို့ WiFi မရှိမဖြစ်ဖြစ်နေပြီ။ ရုံးတွေ၊ ကျောင်းတွေ၊ ဆေးရုံတွေမှာတောင် WiFi က အရေးပါနေပြီ။ Smart Home ကိရိယာတွေဆိုလည်း WiFi နဲ့ပဲ အလုပ်လုပ်ကြတာများတယ်။

Wi-Fi နည်းပညာဟာ နှစ်ပေါင်း 30 ကျော်အတွင်းမှာ ကျွန်တော်တို့ရဲ့ နေ့စဉ်ဘဝရဲ့ မရှိမဖြစ် အစိတ်အပိုင်းတစ်ခု ဖြစ်လာခဲ့ပါတယ်။ ဒီနည်းပညာကြောင့်ပဲ ကျွန်တော်တို့ဟာ ကြိုးမဲ့အင်တာနက်ကို အလွယ်တကူ အသုံးပြုနိုင်လာခဲ့ကြပါတယ်။

29/06/2024

TN Quiz 🤔🧠

TechNation ပရိတ်သတ်ကြီးရေ ကိုယ့်ရဲ့ နည်းပညာနဲ့ ပတ်သတ်တဲ့ ဗဟုသုတ ဘယ်လောက်ရှိလဲဆိုတာ ဆန်းစစ်ကြည့်ဖို့အတွက် အဖြေမှန်ကို ရွေးပေးခဲ့ပါဦး။ အကယ်၍ အဖြေမှန်ကို သိတယ်ဆိုရင် comment မှာ ရေးပေးခဲ့ကြပါဦး။

29/06/2024

iOS 18 မှာပါလာမယ့် AirPods Pro features (5) ခု 🎧

Apple ရဲ့ iOS 18 update မှာ iPhone တွေအတွက် သာမကပဲ AirPods Pro တွေအတွက်ပါ AI နဲ့ machine learning နည်းပညာအသစ်တွေကို အသုံးပြုထားတဲ့ features အသစ်တွေပါလာမှ

Head Gestures

Apple က AirPods Pro ကို လက်မသုံးဘဲ၊ စကားမပြောဘဲ ခေါင်းလှုပ်ရှားမှုနဲ့ ထိန်းချုပ်နိုင်မယ့် gestures အသစ်တွေ ထည့်ပေးဖို့ရှိတယ်။ ဒီ features တွေနဲ့ ခေါင်းကို အပေါ်အောက် ညိတ်၊ ဘယ်ညာ ခါပြီး ဖုန်းကိုင်လို့ရသလို ဖုန်းချပစ်နိုင်မှာဖြစ်တယ်။ Siri Interactions တွေကလည်း စကားမပြောဘဲ ဖုန်းကိုင်တာ၊ ချတာ၊ message reply ပြန်တာ၊ notifications တွေကို စီမံခန့်ခွဲတာတွေကို လုပ်နိုင်မှာပါ။

Voice Isolation

Apple ရဲ့ iPhone တွေမှာ ဆူညံတဲ့ပတ်ဝန်းကျင်မှာ ရှိနေချိန်မှာတောင် ဖုန်းပြောနေတဲ့ အတောအတွင်း အသံကို ပိုရှင်းလင်းအောင် လုပ်ပေးနိုင်တဲ့ feature ရှိပါတယ်။ Apple က iOS 18 မှာ Voice Isolation ကို AirPods Pro မှာပါ ထည့်သွင်းပေးမှာဖြစ်လို့ နောက်ခံဆူညံသံတွေကို လျှော့ချပေးနိုင်မှာ ဖြစ်ပါတယ်။

ဖုန်းခေါ်ဆိုနေစဉ်မှာ AirPods Pro ရဲ့ မိုက်ခရိုဖုန်းတွေက ပတ်ဝန်းကျင်က အသံအမျိုးမျိုးကို ဖမ်းယူလေ့ရှိပါတယ်။ ဥပမာ ပတ်ဝန်းကျင်က လေတိုက်သံလိုမျိုးပါ။ ဒါပေမယ့် Voice Isolation နဲ့ဆိုရင် machine learning က ဒီအသံတွေကို ခွဲခြားသိရှိပြီး ပတ်ဝန်းကျင်ဆူညံသံတွေကို ပိတ်ဆို့ကာ ကိုယ့်အသံကိုပဲ ဦးစားပေးပြီး ပြတ်ပြတ်သားသား ကြားရအောင် လုပ်ပေးမှာပါ။

Personalized Spatial Audio for Gaming

Personalized Spatial Audio နဲ့ dynamic head tracking က AirPods (3rd generation)၊ AirPods Pro နဲ့ AirPods Max တွေမှာ gaming အတွက် ရရှိနိုင်မှာဖြစ်ပြီး သီချင်းနားထောင်တဲ့အခါ၊ ရုပ်ရှင်ကြည့်တဲ့ အခါမှာလည်း ပိုပြီးစီးမျောသွားစေမယ့် အတွေ့အကြုံမျိုး ပေးနိုင်မှာ ဖြစ်ပါတယ်။

Apple ပြောကြားချက်အရ AirPods Pro ကို mobile gaming မှာ latency ကိုအကောင်းဆုံးဖြစ်အောင်လုပ်ထားပြီး gaming experience ပိုကောင်းအောင် လုပ်ထားတယ် ဆိုပါတယ်။ AirPods Pro users တွေအနေနဲ့ teammates တွေနဲ့ စကားပြောတဲ့ အခါမှာလည်း 16-bit၊ 48kHz အသံအပါအဝင် ပိုမိုကောင်းမွန်တဲ့ အသံအရည်အသွေးကို ခံစားရမှာ ဖြစ်ပါတယ်။ Game Designers တွေအနေနဲ့လည်း ပိုပြီးစိတ်ဝင်စားဖို့ကောင်းတဲ့ experience ရစေဖို့ သူတို့ရဲ့ ဂိမ်းတွေထဲမှာ spatial audio ကို ထည့်သွင်းနိုင်မှာ ဖြစ်ပါတယ်။

Granular Adaptive Audio Control

Apple ရဲ့ second gen AirPods Pro တွေမှာ Adaptive Audio feature တစ်ခုဖြစ်တဲ့ Adaptive Noise Control ပါဝင်ပါတယ်။ ဒီ feature က ပတ်ဝန်းကျင်အပေါ် မူတည်ပြီး အသံနဲ့ Active Noise Cancellation ကို ချိန်ညှိပေးတယ်။

လက်ရှိမှာ Adaptive Audio က ပိတ်မလား ဖွင့်မလားဆိုတာပဲ ရွေးလို့ရတယ်။ iOS 18 မှာတော့ Apple က "Customize Adaptive Audio" ထပ်ထည့်ပေးထားပြီး ဆူညံသံ တွေကို ကိုယ့်စိတ်ကြိုက် ချိန်ညှိလို့ရသွားအောင် လုပ်ထားမှာ ဖြစ်တယ်။

Hearing Aid Mode

Bloomberg သတင်းဌာနရဲ့ Mark Gurman ရဲ့ မတ်လ အစီရင်ခံစာအရ AirPods Pro မှာ ဒီနှစ်နောက်ပိုင်း iOS 18 ထွက်ရှိလာတဲ့အခါ "နားကြားကိရိယာ" mode အသစ်တစ်ခု ပါလာမှာ ဖြစ်ပါတယ်။ AirPods Pro မှာ Conversation Boost ဖီးချာ ရှိပြီးသားဖြစ်ပြီး ဒီဖီးချာက ဝတ်ဆင်ထားသူရဲ့ ရှေ့တည့်တည့်က လူတွေရဲ့ အသံအတိုးအကျယ်နဲ့ ရှင်းလင်းမှုကို မြှင့်တင်ပေးပါတယ်။ ဒါပေမယ့် အခုအချိန်အထိ Apple က AirPods Pro ကို နားကြားကိရိယာအဖြစ် ကြော်ငြာထားခြင်း မရှိသေးပါဘူး။

28/06/2024

📱Google Pixel 9 series ကို August 13 တွင်မိတ်ဆက်မည်

Google က သူ့ရဲ့ Pixel 9 ဖုန်းတွေကို သြဂုတ်လ ၁၃ ရက်နေ့မှာ မိတ်ဆက်မယ်ဆိုတဲ့အကြောင်း teaser video လေးနဲ့အသိပေးသွားပါတယ်။ ပုံမှန်ဆို အောက်တိုဘာလမှ ထုတ်လေ့ရှိတာပါ။ ဒီတစ်ခါတော့ စောစောထုတ်တာပေါ့။

Video ထဲမှာ Pixel 9 series ကိုမိတ်ဆက်မယ်ဆိုတဲ့အကြောင်း Roman Numeral ‘IX’ နဲ့ Pixel 9 ရဲ့ ဒီဇိုင်းကို နည်းနည်းပြသွားပါတယ်။

ဒီတစ်ခါ Pixel 9 က သုံးမျိုးထွက်မယ်လို့ rumors တွေထွက်ထားတော့ရှိတယ်။ ပုံမှန် Pixel 9 နဲ့ Pixel 9 Pro အပြင် Pixel 9 Pro XL ပါထွက်လာမှာပါ။ Teaser video ထဲမှာ design ပိုင်းနဲ့ပတ်သက်ပြီး detail ပြမသွားပေမယ့် အရင်က leak ထားတဲ့ ပုံတွေအရဆိုရင် ဖုန်းတွေရဲ့ ဒီဇိုင်းကတော့ ဘေးဘက်တွေက ထောင့်ကျကျဖြစ်သွားမယ်။ နောက်က camera bar ကလည်း ဘေးဘောင်တွေနဲ့ ခုံးခုံးလေးဆက်မနေတော့ပဲနဲ့ ဆေးတောင့်ပုံစံလို pill shaped လေးဖြစ်သွားပါမယ်။

ဒါ့အပြင် Google ရဲ့ foldable phone အသစ်လည်း မိတ်ဆက်လာနိုင်ပါတယ်။ နာမည်ကတော့ Pixel Fold 2 လို့ ခေါ်မလား Pixel 9 Pro Fold လို့ ခေါ်မလားတော့ မသိသေးပါဘူး။ Pixel Watch 3 နာရီတွေလည်း ပါလာနိုင်တယ်လို့ ပြောနေကြပါတယ်။

Google က ဒီလိုပုံမှန်ထက် စောစောထုတ်တာ Apple ရဲ့ iPhone 16 တွေထက် အသာရအောင်လို့လို့ ထင်ပါတယ်။ ဒီပွဲကို သြဂုတ်လ ၁၃ ရက်နေ့ မြန်မာစံတော်ချိန် ည 11:30 PM မှာကျင်းပသွားမှာပါ။

28/06/2024

Galaxy Unpacked July 10 ရက်နေ့တွင် ကျင်းပမည် 📱

Samsung ရဲ့ နောက်ထပ် Unpacked အခမ်းအနားကို July (10) ရက်နေ့မှာ ပဲရစ်မြို့မှာ ပြုလုပ်မယ်။ ဒီအခမ်းအနားက Galaxy S24 series, Galaxy AI နဲ့ Galaxy Ring ရဲ့ ပုံတွေကို January လမှာ ပြသခဲ့ပြီးနောက်ပိုင်း ဒီနှစ်ထဲမှာ ပြုလုပ်မယ့် ဒုတိယအကြိမ် ဖြစ်တယ်။

Samsung ရဲ့ ကြေညာချက်အရ “Next Generation Galaxy AI နဲ့ Galaxy Ecosystem အသစ်တွေ” ကို မိတ်ဆက်မယ်လို့ ဆိုထားပြီး၊ ပဲရစ်မြို့က ဆန်းသစ်တီထွင်မှုတွေအတွက် အကောင်းဆုံးနေရာတစ်ခုလို့ ဖော်ပြထားတယ်။

ပဲရစ်မှာ 2024 အိုလံပစ်ပွဲကိုလည်း လက်ခံကျင်းပဖို့ရှိပါတယ်။ ပြီးတော့ Samsung ကလည်း အိုလံပစ်အတွက် sponsor အနေနဲ့ပါထားတော့ အိုလံပစ် edition Galaxy S ဖုန်းတွေပါ မြင်ရနိုင်ခြေရှိနေတယ်။

Unpacked အခမ်းအနားမှာ wearables တွေအပြင်, Galaxy Z Fold 6, Galaxy Z Flip 6 နဲ့ နောက်ထပ် earbud တွေကိုလည်း မိတ်ဆက်မယ်လို့ SamMobile က ဧပြီလမှာ သတင်းထုတ်ပြန်ထားတယ်။

US က customers တွေအတွက် Samsung website ဒါမှမဟုတ် Shop Samsung app ကနေ July (10) ရက်နေ့အထိ preorder တင်မယ်ဆိုရင် $50 Samsung Credit ပါပေးဦးမယ်လို့ ကြေငြာထားပါသေးတယ်။ ဒါ့အပြင်ကိုမှ preorder တင်မယ်ဆိုရင် $5,000 Samsung Credit ကံစမ်းမဲလည်း ကံစမ်းခွင့်ရမှာပါ။

Samsung ရဲ့ Galaxy Unpacked အခမ်းအနားကို သူတို့ရဲ့ YouTube channel, website နဲ့ Newsroom site တွင် တိုက်ရိုက်ထုတ်လွှင့်မည်ဖြစ်ပြီး July (10) ရက်နေ့ မြန်မာစံတော်ချိန် 7:30 PM မှာစတင်မှာ ဖြစ်ပါတယ်။

27/06/2024

GPS ကိုအစားထိုးနိုင်တဲ့ Quantum Compass 🧭

Imperial College London က သိပ္ပံပညာရှင်တွေဟာ “Quantum Compass” ကွမ်တမ်သံလိုက်အိမ်မြှောင် နည်းပညာကို စမ်းသပ်တီထွင်နေကြပါတယ်။ ဒီနည်းပညာက GPS လိုမျိုး တည်နေရာ ရှာဖွေတဲ့စနစ်တွေရဲ့ နောက်ထပ် ဗားရှင်းအသစ်လို့ ပြောလို့ရတယ်။ အထူးသဖြင့် GPS သုံးလို့မရတဲ့ နေရာတွေမှာ အသုံးဝင်မယ့် ပစ္စည်းပေါ့။

သူက ရူဘီဒီယမ်အက်တမ်တွေကို လေဆာနဲ့ အရမ်းအေးအောင်လုပ်ပြီး အဲဒီအက်တမ်တွေကို သုံးပြီး ရွေ့လျားမှုတွေနဲ့ တည်နေရာကို တိတိကျကျ တိုင်းတာနိုင်တယ်။

ဒီကိရိယာက GPS ထက် သာတဲ့အချက်တွေ အများကြီးရှိတယ်။ ပထမဆုံး ဂြိုဟ်တုအချက်ပြမှုတွေ မလိုဘူး။ ဒါ့အပြင် လိုင်းပျက်တာတွေ၊ ဟက်ခ်လုပ်တာတွေလည်း မဖြစ်နိုင်ဘူး။ ဒါကြောင့် ရေအောက်၊ မြေအောက်၊ အာကာသလိုနေရာတွေမှာ အရမ်းအသုံးဝင်မယ်။ GPS ထက် ပိုတိကျတဲ့အတွက် သင်္ဘောတွေ၊ အာကာသယာဉ်တွေ၊ ကားတွေမှာ အသုံးပြုနိုင်မယ်။

ဒါပေမယ့် အားနည်းချက်တွေလည်း ရှိသေးတယ်။ အရွယ်အစားက ကြီးလွန်းတော့ ဖုန်းလိုပစ္စည်းသေးသေးလေးတွေမှာ သုံးလို့မရသေးဘူး။ ပြင်ပအခြေအနေတွေကြောင့်လည်း အလုပ်မလုပ်တာမျိုး ဖြစ်နိုင်တယ်။ ပြီးတော့ လိုအပ်တဲ့ပစ္စည်းတွေက ရှုပ်ထွေးပြီး စျေးကြီးတယ်။ ဒါပေမဲ့ နောက်ပိုင်းမှာ ဒီနည်းပညာက နေရာအနှံ့မှာ အသုံးဝင်လာနိုင်ပါတယ်။

27/06/2024

သွားလေရာယူသွားလို့ရတဲ့ Starlink Mini ကိုမိတ်ဆက် 🛰️📡🛜

SpaceX က ကျောပိုးအိတ်ထဲ ထည့်သယ်လို့ရတဲ့ထိ သေးတဲ့ Starlink Mini ကိုစတင်ရောင်းချနေပြီဖြစ်ပြီး အသုံးပြုသူတွေက ဘယ်နေရာသွားသွား Starlink Mini ကိုယူသွားပြီး Satellite Internet ကိုသုံးနိုင်ပါပြီ။ အဆိုပါ Starlink Mini ကို $599 နဲ့ ဝယ်ယူရမှာဖြစ်ပြီး Standard disk kit ထက် $100 ပိုများပါတယ်။ Starlink Mini ကိုသုံးမယ့်လူက Starlink ရဲ့ standard plan တစ်ခုခုကို သုံးနေဖို့လိုပြီး Mini Roam ဝန်ဆောင်မှုအတွက် တစ်လ $30 အပိုထပ်ပေးရမှာပါ။ Starlink အိမ်သုံး plan တစ်ခုခုသုံးနေတယ်ဆိုရင်တော့ အိမ်သုံးအတွက်ရော mini အတွက်ပါအပါ တစ်လကို $150 လောက်တော့ ကျပါလိမ့်မယ်။

SpaceX က Starlink ဝန်ဆောင်မှုကို ပိုစျေးချိုစေဖို့ ကြိုးပမ်းနေပြီး လောလောဆယ်မှာ အသုံးပြုမှုများတဲ့ ဒေသတွေမှာသာ Starlink Mini kit အရေအတွက် ကန့်သတ်ပြီး ရောင်းချပါသေးတယ်။ Elon Musk ကလည်း Starlink Mini ကို စျေးချိုတဲ့ option တစ်ခုအဖြစ် တင်ပြခဲ့ပြီး စျေးနှုန်းကို ပုံမှန် dish ထက် တစ်ဝက်ခန့်သာ ကျသင့်မယ်လို့ ပြောခဲ့ပါတယ်။

Starlink Mini dish က built-in Wi-Fi router ပါဝင်ပြီး အရွယ်အစားသေးသလို အင်တာနက်ချိတ်ဆက်ရာမှာ ပါဝင်တဲ့ ပစ္စည်းတွေလည်း အနည်းငယ်သာလိုအပ်တယ်။ စွမ်းအင်သုံးစွဲမှုလည်းနည်းပြီး DC power input နဲ့ download speed 100 Mbps ကျော်ရပါမယ်။ Kit ထဲမှာ kickstand, pipe adapter, power supply နဲ့ USB-C connector ပါတဲ့ ကြိုးတစ်ချောင်းပါပါမယ်။

SpaceX က လောလောဆယ် အသုံးများတဲ့ ဒေသတွေမှာသာ တင်သွင်းနေပြီး Starlink Engineering ရဲ့ Vice President ဖြစ်သူ Michael Nicolls က အနာဂတ်မှာ နိုင်ငံတကာ စျေးကွက်တွေမှာလည်း ရောင်းချမယ်လို့ အတည်ပြုခဲ့ပါတယ်။

26/06/2024

Deepfake သုံးပြီး Elon Musk ယောင်ဆောင်ကာ Crypto လိမ်လည်မှုဖြစ်ပွား 💰👨‍💻

သိပ်မကြာသေးခင်က YouTube live မှာ Elon Musk ရဲ့ deepfake video ကိုသုံးပြီး crypto လိမ်လည်မှုကြီး ဖြစ်ခဲ့ပါတယ်။ Youtube ကနေတော့ အဲ့ဒီ live ကိုဖျက်ပစ်လိုက်ပါပြီ။ လိမ်တဲ့လူတွေက Tesla ပွဲတစ်ခုမှာ Elon Musk စကားပြောနေတဲ့ video ကိုသုံးပြီး AI နဲ့ Elon Musk ရဲ့အသံကိုလုပ်ပြီး လိမ်ခဲ့ကြတာပါ။

Live မှာက သူတို့ပေးထားတဲ့ website တစ်ခုကိုသွားပြီး ကိုယ့်ရဲ့ bitcoin၊ Ethereum၊ Dogecoin တွေကိုပို့ခိုင်းပါတယ်။ ပြီးတော့ ပေးလိုက်တဲ့ crypto ပမာဏရဲ့နှစ်ဆကို ပြန်ပေးမယ်ဆိုပြီး ခဏခဏကို ပြောပါတယ်။

Live ကိုကြည့်တဲ့သူ 30,000 ကျော်တောင်ရှိပြီး YouTube ရဲ့ Live Now recommendation ထိပ်ဆုံးကိုပါ ရောက်သွားပါသေးတယ်။ ကြည့်တဲ့သူ 30,000 ဆိုတဲ့ပမာဏကလည်း လူတွေကို အထင်မှားအောင်လို့ bots တွေနဲ့ လုပ်ထားတာလည်း ဖြစ်နိုင်ပါတယ်။

ဒီလိုလိမ်လည်မှုတွေဟာ Tesla လိုမျိုး Musk ရဲ့ ကုမ္ပဏီ ဟန်ဆောင်ထားတဲ့ YouTube accounts တွေကနေ လုပ်နေကြတာ ဖြစ်ပါတယ်။ ဒါ့အပြင် Official Artist Channel verified ဖြစ်ထားတဲ့ accounts တွေကိုတောင် hack ပြီးလိမ်နေကြတာပါ။

Elon Musk ရဲ့ နာမည်ကျော်ကြားမှုနဲ့ followers များတာကို အခွင့်ကောင်းယူပြီး Elon Musk deepfake လိမ်လည်မှုတွေက လွန်ခဲ့တဲ့ လအနည်းငယ်အတွင်းမှာတင်ပဲ တိုးလာပြီး၊ လိမ်လည်မှုတိုင်းမှာလည်း Musk ရဲ့ ကုမ္ပဏီတွေထဲက တစ်ခုအနေနဲ့ ဟန်ဆောင်ထားတဲ့ account တွေကို သုံးခဲ့ကြတာပါ။

26/06/2024

🇨🇳 တရုတ်ပြည်တွင်းအတွက် AI Partner ရှာနေဆဲဖြစ်တဲ့ Apple 🍎

iOS 18 မှာ Apple က OpenAI နဲ့ပေါင်းပြီး ChatGPT ကို iPhone မှာထည့်လိုက်ပါတယ်။ AI tasks တွေအတွက် Apple ရဲ့ကိုယ်ပိုင် AI model နဲ့ Siri ကို upgrade လုပ်ထားပြီးတော့ Siri ရဲ့လုပ်နိုင်စွမ်းကို ကျော်သွားတဲ့ tasks တွေအတွက်တော့ ChatGPT ကလုပ်ပေးမှာ ဖြစ်ပါတယ်။ ဒါပေမယ့် ChatGPT နှင့် အခြားသော အလားတူ AI ဝန်ဆောင်မှုတွေက တရုတ်နိုင်ငံမှာ မရရှိနိုင်တဲ့အတွက် Apple က တရုတ်ပြည်တွင်း သုံးဖို့အတွက် AI Partner လိုအပ်လာပါတယ်။

The Wall Street Journal ရဲ့ အစီရင်ခံစာအရဆို Apple က တရုတ်ပြည်တွင်းအတွက် Baidu၊ Alibaba Group နှင့် Beijing မြို့အခြေစိုက် Baichuan AI တို့နဲ့ ဆွေးနွေးမှုတွေ လုပ်ခဲ့ပေမယ့်လည်း သဘောတူညီချက်တစ်ခုမှ မရေသးပါဘူး။

Apple Intelligence features တွေက iOS 18၊ iPadOS 18 နှင့် macOS Sequoia တို့အတွက် မကြာခင် ထွက်လာတော့မှာ ဖြစ်ပါတယ်။ ဒါပေမယ့် Apple ကလက်ရှိမှာ EU နဲ့ပြဿနာတက်နေတဲ့အတွက် ဥရောပသမဂ္ဂနိုင်ငံတွေမှာ Apple Intelligence ကိုသုံးလို့ရမှာမဟုတ်ပါဘူး။ အကယ်၍ တရုတ် AI ကုမ္ပဏီတစ်ခုနှင့် သဘောတူညီမှုမရှိပါက တရုတ်မှာလည်း သုံးလို့ရမှာ မဟုတ်ပါဘူး။

တရုတ်မှာ ကုမ္ပဏီတွေက AI chatbots တွေကို မမိတ်ဆက်ခင် အစိုးရရဲ့ အတည်ပြုချက်ရယူရန် လိုအပ်ပြီးတော့ ယနေ့ချိန်အထိ နိုင်ငံပြင်ပက AI တွေကို အတည်ပြုပေးခြင်း မရှိသေးပါဘူး။ Apple က သူတို့ရဲ့ ကိုယ်ပိုင် language model အတွက် အတည်ပြုချက်ရရှိရန် ဖြစ်နိုင်ခြေကို စုံစမ်းခဲ့သော်လည်း တရုတ်အစိုးရက ခွင့်ပြုနိုင်ခြေမရှိပါဘူး ။ Apple Intelligence ကို တရုတ်မှာ သုံးလို့ရဖို့ဆို Apple အနေနဲ့ တရုတ် AI ကုမ္ပဏီတစ်ခုနှင့် သဘောတူညီမှု ရမှပဲ ဖြစ်မှာပါ။

သဘောတူညီမှု ရခဲ့ရင်တောင် Apple အနေနဲ့ စက်တင်ဘာလအတွက် Apple Intelligence ၏ တရုတ်ဗားရှင်းကို ပြင်ဆင်ဖို့ အချိန်မရတဲ့အတွက် Apple Intelligence က တရုတ်ကို နောက်ကျပြီး ရောက်လာနိုင်ပါတယ်။

The Wall Street Journal ရဲ့ အဆိုအရ Vivo၊ Huawei၊ Xiaomi နှင့် Honor တို့လိုမျိုး တရုတ်ပြည်တွင်းမှာ အရောင်းရဆုံး smartphone တွေမှာ AI features တွေရနေပြီ ဖြစ်တာကြောင့် Apple ကတရုတ်ဈေးကွက်မှာတော့ နောက်ကျကျန်နေပါပြီ။ Samsung တောင်မှ တရုတ်ပြည်တွင်းအတွက် Galaxy AI features တွေကို

Baidu, Meitu တို့နဲ့ သဘောတူညီမှုယူပြီး လုပ်ခဲ့ရတာ ဖြစ်ပါတယ်။

Address

MICT Park, Hlaing Universities Street
Yangon
11051

Opening Hours

Monday	08:30 - 17:00
Tuesday	08:30 - 17:00
Wednesday	08:30 - 17:00
Thursday	08:30 - 17:00
Friday	08:30 - 17:00
Saturday	08:30 - 17:00

Website

http://youtube.com/TechNationOfficial

Alerts

Be the first to know and let us send you an email when TechNation posts news and promotions. Your email address will not be used for any other purpose, and you can unsubscribe at any time.

Contact The Business

Send a message to TechNation:

Videos

စမ်းသုံးကြည့်သင့်တဲ့ Custom GPTs (4) ခု

စမ်းသုံးကြည့်သင့်တဲ့ Custom GPTs (4) ခု OpenAI က chatgpt free users တွေအတွက်ပါ custom GPTs တွေကို အလကားပေးသုံးထားပါတယ်။ ဒီ video မှာတော့ ChatGPT သုံးနေတဲ့သူတွေအနေနဲ့ productive ပိုဖြစ်လာဖို့အတွက် စမ်းသုံးကြည့်သင့်တဲ့ Custom GPTs 4 ခုကို ပြောပြပေးထားပါတယ်။ #TechNation #TechNationMyanmar #ChatGPT #CustomGPT #OpenAI

iOS 18 မှာပါလာမယ့် Apple Intelligence ဘယ်လောက်ကြမ်းလဲ?

iOS 18 မှာပါလာမယ့် Apple Intelligence ဘယ်လောက်ကြမ်းလဲ? ဒီ video မှာတော့ AI features တွေပါလာတဲ့ iOS 18 အပြင် Apple Intelligence ဆိုတာဘာလဲနဲ့ WWDC မှာ Apple မိတ်ဆက်သွားခဲ့တဲ့ စိတ်ဝင်စားဖို့အကောင်းဆုံး အကြောင်းအရာတွေကို ရွေးချယ်တင်ဆက်ပေးထားပါတယ်။ #TechNation #TechNationMyanmar #Apple #AppleIntelligence #WWDC #iOS18 #AI

NASA ရဲ့အရေးပါဆုံး Mars ဂြိုဟ်လေ့လာရေးယာဥ် Perseverance Rover အကြောင်း #TechNation #TechNationMyanmar #NASA #PerseveranceRover #Mars #MarsRover

Internet ဖြစ်ပေါ်လာပုံအကြောင်း တစ်စေ့တစ်စောင်း 🖥️🛜💻 #TechNation #TechNationMyanmar #Internet #HistoryofInternet

Android 15 မှာပါလာတဲ့ အမိုက်ဆုံး features (5)ခု TechNation ပရိတ်သတ်တွေရော ဘယ် feature ကအသုံးဝင်ဆုံးဖြစ်မလဲ? ဘယ်လို features တွေပါစေချင်လဲဆိုတာ comment ပေးခဲ့ကြပါဥ◌ီး #TechNation #TechNationMyanmar #Android15 #Google #Android

💻📱 Devices အမျိုးမျိုးကနေ file တွေလွယ်လွယ်နဲ့မြန်မြန် ကူးနည်း 📁 Phone အချင်းချင်းပဲဖြစ်ဖြစ်၊ Phone ကနေ computer ပဲဖြစ်ဖြစ် file ကူးမယ်ဆိုရင် Zapya ဖွင့်ရတာနဲ့၊ USB ကြိုးထိုးရတာနဲ့ အဆင့်တွေများပါတယ်။ ဒီ video မှာတော့ devices အမျိုးမျိုးကနေ files တွေကို အလွယ်ကူဆုံးနဲ့ အမြန်ဆုံး ကူးနိုင်မယ့် နည်းလမ်းကို ပြောပြပေးထားပါတယ်။ #TechNation #TechNationMyanmar #LocalSend #CrossPlatformFileTransfer

WWDC 2024 မှာ ဘာတွေမြင်ရနိုင်ခြေရှိလဲ?

WWDC 2024 မှာ ဘာတွေမြင်ရနိုင်ခြေရှိလဲ? June လ 10 ရက်နေ့မှာ စတင်ကျင်းပမယ့် WWDC 2024 ပွဲကြီးမှာ Apple အနေနဲ့ ဘာတွေကို မိတ်ဆက်လာနိုင်ခြေရှိလဲ? iOS 18 ကရော လူတွေခန့်မှန်းထားသလောက် ဖြစ်လာပါ့မလား? စိတ်ဝင်စားရင်တော့ ဗီဒီယိုကို အဆုံးထိသာ ကြည့်လိုက်ပါခင်ဗျာ။ #TechNation #TechNationMyanmar #Apple #AppleMyanmar #WWDC2024 #iOS18

🌕 လပေါ်မှာ ရထားလမ်းဆောက်ဖို့ ကြံနေတဲ့ NASA 🛤️🚆

🌕 လပေါ်မှာ ရထားလမ်းဆောက်ဖို့ ကြံနေတဲ့ NASA 🛤️🚆 NASA ရဲ့ဒီ project ဟာ စိတ်ကူးယဥ်ဆန်တယ်လို့ ထင်ရပေမဲ့ အနာဂတ်မှာ Sci-Fi ရုပ်ရှင်တွေထဲကလို လကမ္ဘာပေါ်မှာ ပြေးဆွဲနေတဲ့ ယာဥ်တွေကို မြင်လာရနိုင်ခြေရှိပါတယ်။ #TechNation #TechNationMyanmar #NASAFLOAT #RailwayOnMoon

🤖 AI ကမြန်မာလို နားလည်လာတာဟာ မြန်မာနိုင်ငံအတွက် အရွေ့တစ်ခု စတင်လိုက်တာလား?🇲🇲

🤖 AI ကမြန်မာလို နားလည်လာတာဟာ မြန်မာနိုင်ငံအတွက် အရွေ့တစ်ခု စတင်လိုက်တာလား?🇲🇲 ▶️ ဒီ video ထဲမှာတော့ AI ကိုမြန်မာလို ဘယ်လိုသုံးရမလဲဆိုတာနဲ့ ဘာတွေလုပ်လို့ရတယ်ဆိုတာပါ ပြောပြပေးထားပါတယ် #TechNation #TechNationMyanmar #AIChatbot #ChatgptMyanmar #GPT4 #Copilot

Youtube ကိုဒဲ့ယှဥ◌်ဖို့ ကြိုးစားနေတဲ့ TikTok ▶️🎵

Youtube ကိုဒဲ့ယှဥ◌်ဖို့ ကြိုးစားနေတဲ့ TikTok ▶️🎵 ကြီးမားလာတဲ့ creator industry နဲ့ ပြိုင်ဆိုင်မှု ပြင်းထန်လာတဲ့ social media platforms တွေကြားမှာ TikTok အနေနဲ့ Youtube က creators တွေနဲ့ viewers တွေကို သူတို့ platform ပေါ်ရောက်လာအောင် ဆွဲခေါ်နိုင်ပါ့မလား? #TechNation #TechNationMyanmar #TikTok #Youtube #TikTok60minutes

🦠ကင်ဆာဆဲလ်ကို အာကသထဲသယ်သွားရင် ဘာဖြစ်မလဲ?🌌

🦠ကင်ဆာဆဲလ်ကို အာကသထဲသယ်သွားရင် ဘာဖြစ်မလဲ?🌌 #TechNation #TechNationMyanmar #Cancercellinspace #ADAR1 #Rebecsinib #MedicalTechnology

🖼️ ❌ ဓာတ်ပုံထဲက မလိုချင်တဲ့ အရာတွေကို AI နဲ့ဖျောက်ကြမယ် 🤖 . ဒီ video မှာ AI ကိုသုံးပြီး ရှုပ်နေတဲ့ ဓာတ်ပုံတွေကို ရှင်းအောင် ဘယ်လိုလုပ်ရမလဲဆိုတဲ့ နည်းလမ်းတွေကို ပြောပြပေးထားပါတယ်။ #TechNation #TechNationMyanmar #AIObjectRemove #SnapEdit #AdobeFirefly #YocamOnlineEditor #AI #AIPhoto