MIB Radio London

Home
United Kingdom
London
MIB Radio London

Listen to The First Moroccan Community Radio in the United Kingdom
www.moroccanvoices.com

18/03/2024

🔴 شكونوعندو شي وصفة خفيفة لهاد السمكة
واش تجي مقلية ولا فالفران ؟
راني نقيتها مزيان تا ولات تتبان بحالا محيدها لشي مش من فمو هههه
#هابيمان

15/03/2024

جمعنا غلة اليوم... بيض بلدي كل الوحدة قد البطيخة ماشاء الله..
أجمل ما في الحياة هي تشوف حصاد ما زرعته..
شكون جامع شي فليسات ندير انا و ياه الحولي هاد العام..ربح غير مضمون ههههه
#هابيمان

13/03/2024

🔴 عندما وصل سي محمد بقلب عاصمة الضباب لندن سنة 1920 ارتعدت فراءص سكان حي كينزنتون الشهير منين شافو كمية الوقار الهاءل و الهيبة ديال سي محمد تاجر الصوف المعروف بمدينة اسفي..
يقول مارك واطسون، صاحب مطعم قرب الفندق لي كان فيه سي محمد، لقد جاء الناس من كل أنحاء المدينة ليسلمو على سي محمد و يقدمون له بعض الهدايا او لمجرد النضر اليه..
أين نحن من مثل هدا التاريخ...
الصورة مأخودة من آسفي وما اليه
#هابيمان

07/03/2024

🔴🔴 نداء عاااااجل
كنقلب على شي محامي متمكن حيت بغيت نرفع دعوى قضائية على مول هاد الريسطو... سولناه اشمن شلاضة عندكم، قالي صالاض ميشواز، قلت ليه جيبها مالها غادي تخلعنا!!! حاط لينا هاد الشناتف وقالي واش نجيب ليكم تسيزونيو؟؟؟
معرفتش اشمن تهمة نلبق ليه و نربحو ...
واش تهمة الطنز العكري... واش محاولة قتل بالضحك...والله معرفت
#هابيمان

07/03/2024

🔴✅️ كلمة حق و نتمنى تبارطاجيو للاستفادة
شفت بزاااااااف ديال البوسطات هاد الايام ديال شي وحدين تيتشكاو من خدمات القنصلية المغربية فلندن، ها لي تيقول ما تايجاوبوش ها لي معارت مالو..
انا الشهر لي فات قررت باش ندير جوازات سفر لولادي و نجدد جوازي و جواز المدام، تبعت المسطرة لي فالصورة، خديت موعد الكتروني، خطوة خطوة وجدت ووصورت الوثائق لي طلبو و مشيت يوم الموعد لي كان فالوقت..التاسعة صباحا..خلصت واجباتي و مشيت فحالي..دازت اسبوعين وصلني ايميل قاليك جي تاخد باسبوراتكم..
ااااااااااش بغيتو اكثر من هادشي ؟؟!!!!!
بنادم ما عارف تا الفرق بين القنصلية و السفارة و تتشكى؟؟؟
الصراحة الخدمات ديال القنصلية تحسنو بشكل كبييييير و الحمد لله ولينا بالمواعيد و تيتساهلو بزاااااااف مع لي ساااكنين بعاد.
الحاجة الوحيدة لي خايبة هي انها صغيرة و مكرهناش شي مقر كبير.
ملاحضة مهمة.. انا غير قلت كلمة حق و عن تجربة...بلا مايجي داك الحاقد يبدأ يعاير حيت عارفكم هههههههه
#هابيمان

01/03/2024

🔴🔴 تخيل معايا تكون جالس ما عليك ما بيك، و الصقيل فالطيارة.. تيبان ليك هاد المنضر قدامك... تبدأ تقول يااااااربي السلامة واش هدا جن ولا انس...ولا كان جن..واش تاهو خاصو فيزا ؟؟
اش بان ليكم نتوما ؟؟
جمعة مباركة طيبة للطيبين و الطيبات و الله يرضي عليكم متنساوش تقراو سورة الكهف تنير لكم بين الجمعتين
#هابيمان

29/02/2024

🔴🔴تحلف لشي واحد بأعضم الأيمان ان هادي لندن ميتيقش...
قورايشن وصلو ياااااا هووووووو
#هابيمان

28/02/2024

✅️ انت بوحدك لي تقرر قيمتك... حطيتي راسك وسط بوخايموج و تعاشرتي مع السكافاندريا، غادي يحطوك فالزنقة يشرب منك لي يسوى و لي ما يسواش و المخموج لي جا يهز ليك غطاك و يخشي يدو....
عطيتي لراسك قيمة..و اختاريتي تعاشر ناس طيبين غادي يعطيوك قيمة ..و يدار ليك الشأن و المرشان...
هانتوما على القلة ولا ماعارت الخابية تاهيا ما بقاتش ساهلة..
#هابيمان

26/02/2024

🔴🔴 هانتوما غي لي تيبغي يتكلف و يمحن راسو...
شري ليها شي كمشة ديال هاد السراتل غي ب 12 درهم , خمسين دبلييج ارا ما تحضر بيهم للعراسات و الموووناسابات ...
دابا دخلت عليهم بالله ووالنبي رسول الله ... واش كاين شي فرق ههههههه
تابعونا لمزيد من النصائح لمستقبل افضل
#هابيمان

24/02/2024

🔴🔴 دير خير ما يطرا باس، جيت بغيت ندير فيها رومانسي، قلت نفاجئ المدام بشي طبق عمرها كلاتو، بان ليا داك القديد فالفريكو طيبتو و زدت عليه المحمصة و قويت لاصوص زعما باش نتهلا...
جات شداتها بحال السخفة مسكينة تتاكل و عينيها بحالا مدمعين معرفتش واش جاتها مالحة ولا عجبها الطبسيل...
بنتي الصغيرة المتنمرة قالت ليا : دادي واش هادشي ناكلوه بمعلقة ولا فالغراف هههههههه
#هابيمان

24/02/2024

🔴🔴 ترى أين أنت يا صاحب الحداء البني...
بالله عليك أين أنت و مادا دهاك و زلزل عقلك حتى تترك حداءك و تتيه هاءما ... أم هو حداءك اللعين من تخلى عنك و تمرد عليك ؟؟
بالله عليك أين أنت؟؟.. هل همومك جبال انهكتك لدرجة لم تكترث..؟؟
لي بان ليه شي واحد لابس فردة و فردة لا قولو ليه را سباطك فالسونتر
#هابيمان

23/02/2024

🔴⛔️ كل درب فيه بحال هاد الدار، خاوية ما فيها حد و طالقين عليها قيامة ديال الإشاعات و الأساطير..
تيقولو مرة مرة تيسمعو الغوات و الشطيح و تيبان فيها الضو..
تيقولو شي نهار كانت تطل واحد المرأة لابسة الأبيض و شعرها واصل تا اللارض...
تيقولو واحد النهار سي علي خسر ليه الموطور قدام الكراج و هوما يبانو ليه جنيونات صغار لاعبين كاش كاش تما...
كل عواشر تتشم بحالا ريحة الجاوي خارجة منها ههههه
تنتوما عندكم شي دار فالدرب ؟
جمعة مباركة طيبة للطيبين و الطيبات و الله يرضي عليكم متنساوش تقراو سورة الكهف تنير لكم بين الجمعتين
#هابيمان

22/02/2024

✅️🔴 هق هق هق هق هق
مفهمتش علاش شي وحدين طالع ليهم الدم حيت وحدة ربحات فلوس صحيحة غي خيت تتقول هق هق هق هق..
وحدة ربي رازقها من حيت لا تحتسب و تا مالك؟؟
دير تنتا لايفات و بقا تقول بق بق بق طق طق طق و داكشي.. ولا هاااااهوا ثم هاااا هوا... و سمي راسك ولد الفيطنامية هههه
جمع فلوس و غبر لشي قنت را المغاربة داكرتهم ضعيفة دغيا ينساوك
انا هق هق هق عاااااااان عنعنعنعن فيرست كلاص و على ارتفاع 40 الف قدم و ماخ ماخ و داكشي
#هابيمان

21/02/2024

✅️🔴 يقول عبد العالي بعدما أطفأ سيجارتة الشقراء بسباطه البني:
اووووووودي والله ما بقيتي تيق بتاحاجة..
قلت ليه مالك اودي لاباس؟؟
قال متهكما و في نبرته سخرية و استشفاء : مشينا عند مرات خالي لبارح نسولو فيها، حطات لينا هاد الكيسان نشربو فيهم الما، قالت لينا هادو زوينين على العين و يدفعو البلا و الباس..
مشات تعمر اتاي، تنسمعو الغوات ..مالها... بغات تهز البراد لصق ليها كم البيجامة مع البلاكار، طاحت .. جات فوق البوطة الصغيرة لي فيها طنجرة ديال البلبوله جاب الله باقا دافيا، بغات تنوض شدات فيد الفران جرات معاها لاطة الكيكة....
معرفنا واش هاد الكيسان ديال العين و لا ديال القرطاس..
#هابيمان

19/02/2024

🔴🔴 صباحكم مبروك،... ابتسم... ابتسم فأنت لازلت حيا ترزق..
ابتسم و قل الحمد لله..را شي وحدين مافاقوش.. او بايتين فسبيطارات.. ابتسم فإن لك يوم آخر.. قل الحمد لله على كل حال، واطلب من الله اليوم خيرا.. فمن تكون حتى تنكر ان بعد كل عسر يسرا؟؟
الله يسهل عليكم و بداية اسبوع طيبة لكل من قرأ هدا البوسط
#هابيمان

17/02/2024

🔴⛔️ عشنا و شفنا و وصلنا للايام العجاف.. منين وليتي تشوف تا القهوة ولاو دايرين ليها Security Tag, عرف القضية تناكت في بريطانيا العوووووضما ماعارت...
واش لاحضتو ان الشأن لي كان لهاد البلاد ولى فخبر كان ؟؟
بزاااااااف ما غاديش يتافقو معايا ولكن ما كينش لي بقا فيا قد لي جاو من إسبانيا و إيطاليا و استقروا فبريطانيا ضنا منهم انها احسن..
خلاو بلاد الخير إسبانيا و إيطاليا الصراحة احسن بكثير الان من هنا...
منقول من مجلة الإقتصاد الدولية : خوروطولان اليوم
#هابيمان

17/02/2024

🔴⛔️ هاد الكرواصة لا بغيتي تفطر بيها خاصك بانيو ديال القهوة...
سولتو واش خاصني الموثق باش نسجلها فالمحافضة عاد نستهلكها؟
تخيل يجيو عندكم الضياف ووتحط ليهم وحدة فوسط الطبلة و تقوليهم مرحبا مرحبا..
#هابيمان

16/02/2024

🔴🔴🔴🔴 سبحان الله غريب هادشي لي وقع لي ..قصة حقيقية.
كانت تفركعات لي رويضة و معنديش السوكور، تفكرت انه عندي تأمين مع البنك لي تيتكلف بهاد الالاعيب، عيطت ليهم سيفطو لي AA,
جا عندي السيد للباركينغ..
لقيتو مغربي... قات واااو على مفاجأة..
اسميتو يوووووووسف...قلت سبحان الله على مفاجأة...
من كااازا تاااهوا... واتا قول والله...
من الحي المحمدي....لا لا لا...واش بصح ؟؟؟
لحية بحاالي ... و الواااااااعرة لي سطاتني انا هي انا وياه شارين نفس ساعة اليد فنفس اللون !!!!!!
كيفاش هاد البلان...
شكون لي عمرها وقعات ليه و لا لي عندو شي خبرة فعلم النجوم و الخوروطو يشرح لينا
جمعة مباركة طيبة للطيبين و الطيبات و الله يرضي عليكم متنساوش تقراو سورة الكهف تنير لكم بين الجمعتين
#هابيمان

15/02/2024

اعادة:
نحن في عطلة 3
لحضة هذيان مباغتة اختلط فيها الواقع بخيال ..
والله ما عرفت واش من الشمس المطنطنة، او لا الدوخة من داك الكوطليت المشحم و و الكفتة و البصلة و ماطيشة من عند با التهامي، ضواحي بوزنيقة...
المهم تخيلت ان احدهم يناديني... درت لقيت غير هاد الدابة مسكين، وااايلي...
واش تتهضر ؟؟؟
خاصني شي دوليبران واقيلا.. باسم الله الرحمن الرحيم....
قال لي بابتسامة تكاد تستشعر تهكمه فيها: اه..تنهضر ... و بغيت غي نقوليك بصحة الغدا.. ياك من عند با التهامي ؟ لي الفوق ؟ ههههه
قلت ليه : ااااه و مالك تتفرنس ؟
قال لي لا والو ...غير ضحكتيني.. حيت نتوما اصحاب الخاريج فيكم العياقة و القفوزية و عند بالكم تطيرو مع الطيور.. و فالاخر تيجي يحشيها ليكم با التهامي ديما و يجغمطكم فالحساب هههههه
قلت ليه :
لا اسي العود، هانتا غالط...
أنا عارف أن السربايا ديال با التهامي ديما زايدين على بنادم فالفاكتورة على الاقل شي 50 ولا 40 درهم و ماكين لا ريسيت (فاكتورة) لا والو.. ولكن هادشي لي عطا الله، اغلبية (ماشي كلشي ) الشوايات و المطاعم المنتشرة على سواحل شواطئ بلدنا الحبيب بحال مطعم با التهامي...
يحط ليك طباسل شلاضى ما طلبتيهمش.. يزرب عليك بقراعي ديال سيدي الروبيني حاسبهم سيدي علي، يدير ليك السماوي فحساب الشواية و لا حصل يقوليك واش نتا مع الطبلة لي فيها 12 ? اااه سمحلي... عااارفين هادشي اسي العود...
ولكن تنديرو عين ميكة ..حيت لا جيتي تبدأ تبهدل فيه غادي تبدأ تسمع عباد الله:
صافي ا شريف الغلط تيوقع..
صافي اشريف را ما دارهاش بلعاني..
صاااافي توما شحال فيكم ديال المحاسبة را يتحاسبو غي المزاليط..
صاااافي وااا الشريف مالك على جوج فرنك درتي ليه حالة...
و يشبعو فيك دعاوي ... و تولي نتا لي ممزيانش و فقير محشر...

اجي بعدا اسي العود.. نتا معرفناك واش محسوب على الخيل الأصلية ولا البغال ؟؟ و قبل مضحك عليا... و تطلب مني نهضر على حقي.. هضر غي على حقك نتا ... حاطينك فهاد الطنطينة لا ما لا نعمة و تيهزو عليك غي ميكات الزبل، نتا عود نتا ؟؟ اقرانك يتبوردو فالمواسم و البرادع و النخوة... سير ا نص عود سير...
#هابيمان

14/02/2024

السلام عليكم، واش معيدين مع السعودية ولا تال غدا ؟
الهلال ديال نونوس شفتوه ؟؟
ماااااعليناش....سمعو سمعو..
واحد فيديو قصير شفتو فرنسي ...قلت لعوض من بارتاجي الفيديو .. نعاودو ليك بطريقتي
18 عام و هوما مزوجين..ولكن هاد العام مختلف
وصلوا لواحد الحد ديال المشاكل لا يطاق .. الصبر مشى .. ولاو عايشين بحال الجيران.. على سبه..من والو يتخلق مشكل ..من والو ينوض صداع..
الهدره ولات بالغرام... الضحك بيناتهم محاتو الأيام..
و كانوا ناوين يبداو داكشي ديال الطلاق.... واحد النهار ...جمله وحده غيرات كلشي... ناض هو فالصباح قال ليها : اشنو نقدر ندير باش نخلي نهارك يكون أحسن اليوم ؟
شافت فيه و كعات ... قالت ليه : ملقييتي مايدار مطلعها عليا...؟
قال ليها لا.. تنهدر معاك بصح .. اشنو نقدر ندير باش نخلي نهارك يكون أحسن اليوم ؟
قالت ليه و هي كاعيه : سير جمع الروينه ديال الكوزينه...
قال ليها : اوكي.. و مشى جمع كلشي و هي مصدومه..
الغد ليه نفس السؤال قال ليها ..اشنو نقدر ندير باش نخلي نهارك يكون أحسن اليوم ؟
قالت ليه : صايب هاديك الجرده و الكاراج
قال ليها : اوكي.. و مشى جمع كلشي و هي مصدومه..
الغد ليه نفس السؤال قال ليها ..اشنو نقدر ندير باش نخلي نهارك يكون أحسن اليوم ؟
ديني هنا ...ديني لهيه ...بغيت هادي بغيت ديك ..
و كل نهار،.. هو يسول ..و هي تطلب ..و هو ينفد بلا ما يتشكى ...
مع الوقت حس بيها فرحانه ...هي ولات فرحانه و واحد النهار سولاتو داك السؤال...
قالت ليه : اشنو نقدر ندير باش نخلي نهارك يكون أحسن اليوم ؟..
و تبدلات الوضعيه ديالهم و ولاو مفاهمين أكثر...
الخلاصه لي فهمت من هاد الفيديو هي أنك لا وليتي عنيبه من درجة كولونيل ماجور و خليتيها تمسح فيك صباطها واحد العام راك غادي تعيش بلا مشاكل
و نتوما ؟؟؟
هههههههه
#هابيمان

13/02/2024

🔴⛔️ نصيحة لله فسبيل الله،
لا قلتي ليها هانا نمشي نجيب الحليب و الخبز و نجي و قالت ليك تسناني نمشي معاك نونسك... غي لبس سبرديلة حيت تابعاك تمارة...
صباحكم طيبة
صورة من الويب
#هابيمان

12/02/2024

🔴🔴 تحدي طاغيه داك بونضاضر لي ضليع فالماط..
شحال طول العمود الأحمر ؟؟؟
علما ان طول الأخضر 2 متر و الخيال ديالو 3 متر ..
🤪🤪🤪🤪
لي ربح غادي ياخد جاءزة غير قيمة قسيمة شراء عند محل اشواق للفونداطان
#هابيمان

09/02/2024

🔴⛔️ لاحضت هاد القضية بزاف فبعض المناطق، تيكون ثمن تذكرة دخول المغربي اقل من تذكرة الأجنبي الساءح...
هي من واحد الجهة مزيانة لينا كمغاربة... ولكن جاتني شوية... والله معرفت.. جاتني شوية زعما..سميتو عليه..ماعرفت ههههه بحالا ...خليني ساكت...
توما كي جاتكم؟؟
مهم من هادشي كامل... جمعة مباركة طيبة للطيبين و الطيبات و الله يرضي عليكم متنساوش تقراو سورة الكهف تنير لكم بين الجمعتين
#هابيمان

08/02/2024

🔴⛔️ في بلاد الكفار، تقوم المتاجر الكبرى بالاحتفال برمضان المبارك و تقوم بعروض تخفيضات للمواد الأساسية مثل الطحين و الزيت و الثمر و الحلوى...
و بعض بلدان المسلمين في مجرات بعيدة و خصوصا بلدان مجرة اندروميدا، يقومون بالزيادة فهاد المواد للاحتفال بشهر رمضان!!!!
يقول الشاعر كلبون بن المسموم في ديوانه الغير المفهوم :
ايااااا كفارا تعاملكم بتعامل الإسلام قد احرجنا...
و نحن امة قلب الإسلام نقولب بعضنا...
الصورة من Asda Park Royal لندن...
#هابيمان

06/02/2024

🔴🔴 قمة النفاق فالغرب... كنت تندوز من حدا هاد النصب التذكاري فقلب لندن، و اول مرة تنقرا اش كاتبين : they had no choice.. يعني ان الحيوانات لي شاركت فالحرب العالمية مكانش عندهم الاختيار و شاركو بزز منهم.. بحالا الملايين لي شاركو فالحرب لي ماتو شباب كان عندهم الاختيار... ولا الأفارقة مساكن لي هزوهم من الجبال من وسط ولادهم و قطعو بيهم البحور باش يشاركو فالحرب الاوروبية كان عندهم الاختيار...
ما ديوش عليا غي تنخربق...
#هابيمان

04/02/2024

🔴✅️ رمقني بنضرة حقد دفين.. عجيب امر هدا الطائر الحقود...
خرجتيه موصيبة...خليتيه فالدار موصيبة...
قلت ليه مالك تتشوف فيا باغي تاكلني تصحاب راسك نسر؟؟ را غادي نحل عليك القفز تولي تقلب على راسك فهاد البرد معندك فين تبات..ماحامدش الله..شوف كيفاش عندك انواع الزوان، ها القمح ها الشعير..ها الزريعة..و طاسة الماء سيدي علي.. ساكن فقفز جوج سلوكا و صالون و بالكون... اش كاين نخرج مك فهاد البرد يضرب بوك شي طوبيس ولا يشدك شي كرغولي يصلقك؟
ضحك و قال بلكنته البيروشية:
اووودي اش غادي نقوليك.. عطاتك ليام أيها البشري.. حنا ما قلناش خرجنا..جيب لينا غي شي بيروشة نتقاسمو معها هاد الخير حلالا طيبا و مكرهناش شي ماطلة ميزيدور راك فاااهم...
#هابيمان

03/02/2024

🔴🔴 منكدبش عليكم را العواشر هادي، ولكن والله تا حاس براسي تنترعد و شاداني بحال السخفة شوية...و مع انا قليل النية، قلت اوااااه، كيفاش هاد البلان، غي من الاثنين تال السبت، طيبات الرفيسة، السفة وواليوم الدغميرة ؟؟!!! شي بلان هدا...
لي تيفهم فالرموز المشفرة يشرح لينا الله يرحم والديكم
واش زعما تتوجد ليا فشي بلان ؟؟
واش باغيا شي سرتلة و تتهندس ليا ؟؟
#هابيمان

02/02/2024

🔴 المدفونة.. المردومة.. لها عدة القاب و قد ذكرها الرحالة البيزنطي من أصل كولومبي بابلو سكوباريو حيث قال ان زوجته شوميشة كانت توجد السفة في ادغال كولومبيا عندما انحنى تاجر مخدرات معروف انذاك ليذوق هدا الطبق الغريب و سقطت من جيب قاميجته رابعة ديال الكوكايين كان مخليها للعشا و طاحت فوق السفة.. عجبه المنضر وقال لشوميشة هاد السفة هاكا خاصك تبقاي تصابيها لينا ديما...
و عندما عاد بابلو للمغرب، مالقاوش الكوكاين و استبدلوه بالسكر الكلاصي... وا قولو كنتو عارفين هاد المعلومة..
جمعة طيبة للطيبين و الطيبات و الله يرضي عليكم متنساوش تقراو سورة الكهف تنير لكم بين الجمعتين
#هابيمان

31/01/2024

🔴🔴 أول مرة نسمع هاد المعلومة المهمة :
يقول الفيلسوف البرتغالي كارموص بلديطوس في كتابه : الطنز المر،
بنادم خاصو يكون بحال الميلفوي، يفكر بحال الميلفوي...
رضيتي بالدل و مشيتي لبلايص محرتكين و دورتي راسك بالمبهدلين، غادي تكون قيمتك لا تتجاوز 2دراهم، و يحطوك فلاطة كحلة داير عليك دبان حقير يبزق عليك و زجاج مجلخ لا يحميك...
عطيتي لراسك قيمة، و عاشرتي ناس مزيانين و مشيتي لبلايص نقيين و مزيانين...قيمتك تطلع و تولي الناس تعاملك على حسب القيمة لي عطيتي لراسك...و هاد ميلفويا دابا دايرة تقريبا 100 درهم..
و في رواية اخرى لفيلسوف مغربي مسخوط : ديال 2 دراهم و ديال 100 درهم بجوج منين تاكلهم غادي تخ&%$هم ههههه
شكون الفيلسوف لي عندو الصح هههه
#هابيمان

30/01/2024

🔴⛔️ عاجل لأصحاب الخدمة من الدار ❌️❌️❌️
وإياكم و الخدمة من الدار !!! علاش ؟؟
حيت يقدر يطرأ ليكم بحالي، تتولي لاعب ماتشات مع 9 صباح..وجهك غسلتيه ما غسلتيه هانية...تفطر 6 مرات.. و مع المدة تتنسى اصلا نتا فاش خدام ههههه
صباحكم مبروك و لي عندو شي واحد صاحبو خدام من الدار طاغيه # قوليه نقصرو شي ماتش ما طالعات ما طالعاش
#هابيمان

Address

High Street
London

Website

http://www.moroccanvoices.com/

Alerts

Be the first to know and let us send you an email when MIB Radio London posts news and promotions. Your email address will not be used for any other purpose, and you can unsubscribe at any time.

Contact The Business

Send a message to MIB Radio London:

Videos

🔴🔴تحلف لشي واحد بأعضم الأيمان ان هادي لندن ميتيقش... قورايشن وصلو ياااااا هووووووو #هابيمان

🔴⛔️🤪 معارت اش كان يقوليها ههههههه #هابيمان

🔴⛔️ ايييييييه ااا لياام ... هادي كنا نسميوها مالا.. و نتوما ؟ قليل واقيلا لي حرد مكافشو فهاد اللعيبة .. كنت تنصحاب تيلعبوها غي فدربنا هههه صدقات عالمية!!! #هابيمان

جمعة مباركة طيبة للطيبين و الطيبات واش بصح قالو ليا عندكم البرد ولا غي إشاعة!!! حنا باقي الصيف ههههه الله يرضي عليكم متنساوش تقراو سورة الكهف تنير لكم بين الجمعتين..

⛔️🔴 أسهل حل لمشكلة الشخير. تخلص من الشخير بصفة نهائية. وداعا لصداع ال#@ #هابيمان #morocco #صحة #معلومات

🟢🔴🟢🔴 قاليك هادو تيديرو الاعيب خطيرة بالموطور .. ما شافوش حائط الموت لي كانو تيديرو عندنا حدا قيسارية الحي المحمدي، باقي تنعقل على واحد مول الموسطاش، عبد الهادي الساندوخان، لابس واحد بيل سماطي كلو مشروط بحالا هارب من الحرب، مشعل كارو ماركيز و راكب على 103 بلا كاسك بلا لاصورانص و تيدور على حايط بلا شبكة بلا تا لعبة.. و تيبدا يسلم على بنادم و سايق بيد وحدة تقول مضارب مع الجادبية و الدخاخن خارجة من فمو و من الموطور ... واحد النهار تقطع ليه الفران تلاح من الموطور طار لقاوه فواحد الجردة فالبرنوصي و تيضحك و ما سامحش فالماركيز.. #هابيمان

يا ربي السلامة واش هادشي انس ولا جن؟؟!!

@followers Moroccan Madrassa

فيديو توضيحي على الناس لي تيسولو على المدرسة المغربية، للأسف معندناش بزاف ديال الأماكن شاغرة حيت عندنا فقط 8 معلمات و لكن ان شاء الله نقدرو نزيدو أقسام اخرى فيناير... لي عندو شي سؤال مرحبا نجاوبو عليه هنا باش كلشي يستافد او يرسل ايميل إلى: [email protected] Moroccan Madrassa

واش سمعتو التختيخ و التمخميخ

صباحكم مبروك و أمطار خير لندنية مباركة... 🟢🟢 لا قالت ليه كي جاك الطاجين؟؟ فهاد اللحضة كاينين 4 الانواع ديال الاجوبة !!! كل جواب و طريقو... ⛔️ الجواب الاخطر على حياتك و مستقبلك: تقوليها، ناقص شوية ملحة !!! ما غاديش تجاوبك، و تقدر تجيب الملحة و تخليك ديرها نتا.. وتخرجها منك روفيكس منبعد...تخليك تتنسا و تجبد ليك شي بلان... ⚠️ الجواب الغير صحيح و المتوسط الخطورة : مابيهش!!! تاني ماغاديش تجاوبك... و تعبس معاك و لكن تقدر متجبد معاك تا بلان. 🟩 الجواب الأقرب للصواب: جا زوين تبارك الله عليك.. هنا غادي تنشطها وتفرحها و تحسسها انها دارت لي عليها و أكثر، و تخليك هاني و تضمن راحتك 4 ايام اقل حاجة.. ✅️✅️✅️ الجواب الصحيح الخارق و قبل ما تذوق: ممممممم وا ريييييحة هادي طالعة ... باينة متختخ... شوفي كي تيبقبق و شقشق!!!! الدغمة الأولى : مممم بشااااخ بشااااخ ...واااا البنة البنة الدغمة الثانية: لا لا لا لا ..هادشي مجهد بحال ديال الجبل هاد الطاجين!! واش طيبتيه على العواد ؟؟ تيقني صديقي... هنا غادي تتبرع... و يوصلك براد منعنع و داك الطاس ديال ليدين واخا معندهاش... و داكشي ديال سربخغفصلسو 😅😉 ضروري ... من كتاب : انقشاع البلادة في سفر السعادة ادادا يا دادا... #هابيمان #المغربMorocco #morocco #لالغلاءالاسعاربالمغرب #مغربنا #مغاربة #لا_لغ

https://fb.watch/iHBqpWn5la/

واش بصح ولات الخضرة فبريطانيا أرخص من المغرب ؟؟؟

⛔️⛔️⛔️ هاد الغلاء لي ولى فالمغرب تيخلع الصراحة.. شي حد يقولينا واش بصح ولات الخضرة ارخص في بريطانيا ولا كيفاش؟؟ علاش فنضركم هاد الغلاء لي الصراحة قهر ماشي فقط المواطن الضعيف، ولكن حتى الطبقة المتوسطة ولات تتعاني .. #المغرب #غلاء #المغربMorocco #لالغلاءالاسعاربالمغرب

MIB RADIO LONDON supports the NHS strikes #NHS #nurse #nhsstaff

بريطانيون ينضمون لنا في الاحتفال بالنشيد الوطني

Moroccans couldn't care less When France scored the second Goal..that's the spirit guys..

لحضة تسجيل الهدف التاريخي... ياربي تفرحنا تاني غدا ... يارب تنسينا هموم الغربة بلحضات فرح تبقى مرسومة في ذاكرتنا.. يارب أعزنا بعزك و انصر منتخبنا و اجعل علم بلدنا تاجا فوق رؤوسنا..