Беларуская прэмія кінакрытыкаў "Чырвоны верас"

27/03/2024

Пераможцаў «Чырвонага верасу’24» паказалі на фестывалі ў Берліне. Арганізаваная нашым партнёрам Goethe-Institut im Exil падзея адбылася з 22 да 25 сакавіка ў культурніцкім цэнтры ACUD.

Фестываль ставіў на мэце паказаць разнастайнасць беларускай культуры ў выгнанні і сярод шэрагу івэнтаў меў некалькі кінапаказаў.

Публіка пабачыла стужку «Спатканне ў Мінску» Мікіты Лаўрэцкага, адзначанага «Чырвоным верасам» у катэгорыях «Найлепшы ігравы поўнаметражны фільм», «Найлепшы(ая) рэжысёр(ка)», «Найлепшая акторка» і «Найлепшая праца аператара(кі)». А таксама пераможцу ў намінацыі «Найлепшы дакументальны кароткаметражны фільм» – карціну «Маладосць па-беларуску» Ксеніі Галубовіч. На фестывалі паказалі серыял «Працэсы»: яго першая серыя «Ператрымка» перамагла на «Чырвоным верасе» ў катэгорыях «Найлепшы актор» і «Найлепшы сцэнар».

Берлінскай публіцы таксама паказалі фільм з кароткага спісу прэміі «Дзённік Анастасіі» Максіма Буйніцкага. Усе стужкі былі прэзентаваныя аўтарамі альбо героямі.

На 4 дні ACUD Kunsthaus пераўтварыўся ў маленькую выспу нашай культуры. На гэта мы і спадзяёмся ў «Чырвоным верасе»: што іншыя людзі атрымаюць магчымасць закахацца ў беларускае кіно і беларускае мастацтва.

Фота Змітра Брушко і Ксеніі Янко

23/02/2024

«Трэба жыць так, каб атрымаць столькі цаглін «Чырвонага верасу», каб штосьці з іх пабудаваць». Са смехам і жартамі ўчора ў Варшаве мы «даўзнагародзілі» тых, хто не даехаў да нашай урачыстай цырымоніі ў Берліне.

Рэжысёрка «Найлепшага дакументальнага кароткаметражнага фільму» Ксенія Галубовіч і «Найлепшы актор» Андрэй Новік атрымалі ўзнагароды «Чырвонага верасу'24» у Press Club Belarus. Разам з пераможцамі ў розных намінацыях, сярод якіх таксама Мара Тамковіч, Андрэй Кашперскі, Міхаіл Зуй, мы пагаманілі пра кінапрэмію па слядах берлінскай падзеі.

Здаецца, амаль усе цагліны дабраліся да сваіх законных уладальнікаў.

Фота калектыўнага аўтарства 😜

#чырвоныверас #беларускаекіно

22/02/2024

На цырымоніі ўзнагароджання ў Берліне суарганізатарка "Чырвонага верасу" Ірэна Кацяловіч і намінаваны рэжысёр Аляксей Палуян на дзвюх мовах зрабілі прамову з адказам на пытанне, чаму кінапрэмія ўручаецца ў Нямеччыне, а не ў Беларусі. Прыводзім цалкам тэкст гэтай прамовы.

***

Калі паглядзець на кароткі спіс кінапрэміі «Чырвоны верас», які адлюстроўвае беларускі кінапрацэс апошніх гадоў, багатая частка згаданых у ім асобаў не можа паехаць у сваю краіну. Для многіх з іх пераход мяжы значыў бы затрыманне паводле крымінальнай справы, а гэта гады ў турме ва ўмовах, дзе кожны дзень парушаюцца правы чалавека.

Калі б цырымонія ладзілася ў Беларусі – хутчэй за ўсё, яе арганізатары не атрымалі б на гэта дазволу ад Міністэрства культуры, а калі б зладзілі яе ўсё роўна – у памяшканне, імаверна, уварваліся б сілавікі і затрымалі ўсіх прысутных. Так здарылася на адной камернай кінаімпрэзе ў Менску перад новым годам.

Сёння незалежнае беларускае кіно магчымае перадусім у замежжы і падпольна ўнутры краіны. І, нягледзячы на гэта, аўтары робяць неверагоднае: збіраюць здымачныя групы, акумулююць сілы, каб працягваць рабіць беларускае кіно. У тым ліку кіно дазваляе нам сёння ўхіляцца ад удараў маштабных узрушэнняў, якія мы працягваем зазнаваць з 2020 года.

Сёння беларускія кінематаграфісты сабраліся на Еўрапейскім кінарынку Берлінскага міжнароднага кінафестывалю – на адной з найбуйнейшых міжнародных кінапляцовак свету. Гэта значыць, мы не згубіліся – і гэта мусіць быць галоўным натхненнем кінакрытыкаў.

Усе, хто стварае беларускае кіно, паказвае яго на міжнародных кінафестывалях, знаходзіць на яго грошы – мы ведаем, якая гэта тытанічная праца. Кінакрытыкі сёння тут, каб сказаць, што мы гэта заўважаем. Кінематаграфісты сёння тут, каб атрымаць пацверджанне таго, што беларуская кінасупольнасць разам і гатовая ісці побач.

Фота Дзмітрыя Брушко.

21/02/2024

Цырымонія ўзнагароджання «Чырвонага верасу» ў Берліне толькі скончылася, а мы ўжо настальгіруем, – і вось яшчэ трохі здымкаў ад Дзмітрыя Брушко.

#чырвоныверас #беларускаекіно

20/02/2024

About us in English, share with your foreign friends.

The winners of the second Red Heather Awards were presented in Berlin.

20/02/2024

Упэўненыя, такога вы не чакалі. Пераможцам «Чырвонага верасу’24» на цырымоніі ў Берліне мы ўручылі асаблівыя ўзнагароды – масіўныя цагліны, з якіх прабіваецца бліскучая галінка вераса. У такі спосаб мастак Аляксандр Адамаў увасобіў метафару беларускага кіно, якое працягвае стварацца ў неспрыяльных умовах.

Фота Вікторыі Адамавай

#чырвоныверас #беларускаекіно

19/02/2024

Так прайшла цырымонія ўзнагароджання «Чырвонага верасу’24» і рэсэпшан кінапрэміі з кацэртам Šuma на Еўрапейскім кінарынку Берлінале.

Дзякуй нашым партнёрам – Goethe-Institut im Exil, The German Marshall Fund of the United States і фонду «Trzy Trąby».

Фота Дзмітрыя Брушко

#чырвоныверас #беларускаекіно

18/02/2024

Віншуем яшчэ раз нашых пераможцаў і дзякуем тым, хто быў часткай учорашняга вечара!

Беларускія кінематаграфісты сабраліся на Еўрапейскім кінарынку Берлінскага міжнароднага кінафестывалю – на адной з найбуйнейшых міжнародных кінапляцовак свету. Гэта значыць, мы не згубіліся – і гэта хіба галоўнае натхненне беларускіх кінакрытыкаў.

#чырвоныверас #беларускаекіно

Фота Змітра Брушко

17/02/2024

Нарэшце сталі вядомыя сем найлепшых стужак за 2021 і 2022 годы па меркаванні журы «Чырвонага верасу’24».

«Найлепшы анімацыйны фільм»
«Shirey Mara» Наты Карнеевай

«Найлепшы ігравы кароткаметражны фільм»
«Смеццевая галава» Юрыя Сямашкі

«Найлепшы дакументальны кароткаметражны фільм»
«Маладосць па-беларуску» Ксеніі Галубовіч
«Метадычка» Паўла Мажара

«Найлепшы ігравы поўнаметражны фільм»
«Спатканне ў Мінску» Мікіты Лаўрэцкага

«Найлепшы дакументальны поўнаметражны фільм»
«Мара» Сашы Кулак
«Смеласць» Аляксея Палуяна

Яшчэ раз віншуем усіх пераможцаў, якія сапраўды заслугоўваюць таго, каб апынуцца ў цэнтры ўвагі!

17/02/2024

«Спецыяльнай згадкай» ад «Чырвонага верасу» былі ўганараваны:

Мара Тамковіч — «За віртуознае мастацкае адлюстраванне трагедыі цэлай краіны праз кароткі эпізод у менскай кватэры ў фільме «У жывым эфіры»

Калектыўны сведка — «За аматарскія і прафесійныя, выпадковыя і наўмысныя, у пісьме, відэа і ў памяці – за шматлікія сведчанні падзеяў пасля прэзідэнцкіх выбараў 2020 года ў Беларусі, якія складаюць летапіс краіны і становяцца часткаю нацыянальнай культуры

Захавальніцай гэтай узнагароды стала рэжысёрка фільма “Мы не ведалі адзін аднаго да гэтага лета” Вольга Абрамчык.

17/02/2024

Апладысменты і віншаванні! Сёння на ўрачыстай цырымоніі ў Gropius Bau Сinema ў Берліне сталі вядомыя першыя пераможцы Беларускай прэміі кінакрытыкаў «Чырвоны верас’24».

«Найлепшы сцэнар»
Андрэй Кашперскі і Міхаіл Зуй за фільм «Ператрымка»
Уладзімір Казлоў за фільм «Лета 1989»

«Найлепшая праца аператара(кі)»
Таццяна Гаўрыльчык і Есэ Мазух за фільм «Смеласць»
Юлія Шатун за фільм «Спатканне ў Менску»

«Найлепшае мастацкае рашэнне (праца мастака(чкі)-пастаноўшчыка(цы)»
Юрый Сямашка за фільм «Смеццевая галава»

«Найлепшы саўнддызайн (праца кампазітара(кі) і/ці гукарэжысёра(кі)»
Вольга Падгайская за фільм «Галасы. Дзе мой край»

«Адкрыццё года»
Юрый Сямашка

«Найлепшы актор»
Андрэй Новік за ролю ў фільме «Ператрымка»

«Найлепшая акторка»
Вольга Кавалёва за ролі ў фільмах «Спатканне ў Мінску» і «A Kid's Flick»

«Найлепшы(ая) рэжысёр(ка)»
Мікіта Лаўрэцкі за фільм «Спатканне ў Менску»

17/02/2024

Ужо сёння мы сустрэнемся ў цэнтры Еўрапейскага кінарынку «Берлінале», каб назваць найлепшых у беларускім кіно!

Дзе: Martin Gropius Bau
Калі: дзверы адчыняюцца а 19.00, цырымонія пачынаецца а 19.20.
Як трапіць: калі вы атрымалі запрашэнне на цырымонію, значыць, вы ў спісе гасцей. Каб трапіць у будынак перад цырымоніяй, трэба адзначыцца ў спісе ў Access Container побач з уваходам. З 18.30 вас там будзе сустракаць нашая вядомая калега.

Не забудзьцеся, што цырымонія ўзнагароджання «Чырвоны верас’24» – нагода прыгожа ўбрацца!

#чырвоныверас #беларускаекіно

16/02/2024

Яшчэ больш беларускага на Berlinale! Для гасцей цырымоніі ўзнагароджання «Чырвоны верас’24» сыграе гурт Šuma. Музыкі дадуць канцэрт на пляцоўцы Еўрапейскага фільммаркету ў фае Martin Gropius Bau адразу пасля ўручэння ўзнагародаў.

Шаманства і клубныя танцы, аўтэнтычныя спевы і модная электронная музыка пераплятаюцца ў музыцы гурта так, што не адрозніць, дзе пачынаецца адно і заканчваецца другое.

15/02/2024

Беларускім кінематаграфічным адкрыццём паводле прэміі «Чырвоны верас'24» у гэтую суботу могуць стаць:

Ананімная рэжысёрка
Павел Мажар
Юрый Сямашка

Цырымонія ўзнагароджання кінапрэміі «Чырвоны верас» адбудзецца 17 лютага падчас Еўрапейскага кінарынку Берлінале.

#беларускаекіно #беларусь #чырвоныверас

15/02/2024

Найлепшы беларускі анімацыйны фільм паводле кінапрэміі «Чырвоны верас'24» стане вядомы ўжо ў гэтую суботу.

На перамогу прэтэндуюць:

«Вячэра з індыком» Глеба Куфцерына
«The Primitives» Генадзя Буто
«Shirey Mara» Наты Карнеевай

Цырымонія ўзнагароджання кінапрэміі «Чырвоны верас» адбудзецца 17 лютага падчас Еўрапейскага кінарынку Берлінале.

#беларускаекіно #беларусь #чырвоныверас

14/02/2024

Найлепшы беларускі ігравы кароткаметражны фільм паводле кінапрэміі «Чырвоны верас'24» стане вядомы ўжо ў гэтую суботу.

На перамогу прэтэндуюць:

«Ператрымка» Андрэя Кашперскага
«Смеццевая галава» Юрыя Сямашкі
«У жывым эфіры» Мары Тамковіч

Цырымонія ўзнагароджання кінапрэміі «Чырвоны верас» адбудзецца 17 лютага падчас Еўрапейскага кінарынку Берлінале.

#беларускаекіно #беларусь #чырвоныверас

13/02/2024

Найлепшы беларускі ігравы поўнаметражны фільм паводле кінапрэміі «Чырвоны верас'24» стане вядомы ўжо ў гэтую суботу.

На перамогу прэтэндуюць:

«A Kid's Flick» Мікіты Лаўрэцкага
«Лета 1989» Уладзіміра Казлова
«Спатканне ў Мінску» Мікіты Лаўрэцкага

Цырымонія ўзнагароджання кінапрэміі «Чырвоны верас» адбудзецца 17 лютага падчас Еўрапейскага кінарынку Берлінале.

#беларускаекіно #беларусь #чырвоныверас