Nəşriyyat yarandığı dövrdən bu günədək “Milli Ədəbiyyat”, “Çağdaş Ədəbiyyat”, “Tərcümə Ədəbiyyatı”, “Xatirə Ədəbiyyatı”, “İlk Kitab”, “Məşhurlar”, “Yerli Klassika”, “Xarici Klassika” və “Azərbaycan Ədəbiyyatı Rusca” adlı kitab silsilələri çap edir.
“XAN” nəşriyyatının “Milli Ədəbiyyat” silsiləsində Azərbaycan ədəbiyyatında əvvəlki dövrlərdə iz qoymuş müəllifləri çap edir. Yayım hüquqları alınmış
müəlliflərdən – Salam Qədirzadə, Əzizə Cəfərzadə və İsa Muğanna, eləcə də klassiklərimizdən – Yusif Vəzir Çəmənzəminli, Məmməd Səid Ordubadi, Pənahi Makulu, Həsən Seyidbəyli, Qulamhüseyn Səidi, Mirzə Əbdürrəhim Talıbov və b. müəlliflərin kitablarını nəşr edir.
“Çağdaş Ədəbiyyat” silsiləsində müasir dövrdə yaşayıb-yaradan yerli yazıçıların kitabları çap olunur. Bu silsilə ilə müntəzəm əməkdaşlıq edən Şəmil Sadiq, İlqar Fəhmi, Xanəmir Telmanoğlu, Sevinc Elsevər, Varis, Rüstəm Behrudi, İlham Tumas, Kənan Hacı, Tamerlan İsmayılzadə, Əziz Yaqubzadə və b. müəlliflərin bir çox kitabının nəşr və yayım hüququ məhz “XAN” nəşriyyatına məxsusdur.
“XAN” nəşriyyatı “Tərcümə Ədəbiyyatı” adlı silsiləsində dünyanın bir çox tanınmış yazıçılarının yaradıcılığına müraciət edir. Əsasən müəllif haqlarının alınması ilə həyata keçirilən bu kitab layihələrində müxtəlif janrlı kitablar çap olunur. Ceyms Rollins, Dmirti Qluxovski, Orhan Pamuk, Mixail Bakunin, Artur Konan Doyl, Edqar Allan Po, Qriqoriy Petrov, Teodor Drayzer, Oljas Süleymenov, Svetlana Alekseyeviç, İtalo Kalvino, Patrik Modiano, Ziqmund Freyd, Cek London, Fridrix Nitsşe, Piter Ceyms və başqa müəlliflərin əsərlərinə müraciət edərək keyfiyyətli tərcümə mətnlər ərsəyə gətirməyə çalışır. Bundan başqa Türkiyə Cümhuriyyəti Mədəniyyət və Turizm Nazirliyinin “Türk ədəbiyyatının xaricdə tanıdılması” layihəsinin dəstəyi ilə çap olunan kitablar da “Tərcümə ədəbiyyatı” silsiləsinə aiddir. Bu layihə çərçivəsində 30-dan çox kitab çap olunub.
“Xatirə Ədəbiyyatı” silsiləsi “XAN” nəşriyyatının ən uğurlu layihələrindən biridir. Bu silsilədə görkəmli şəxsiyyətlərin – şair, yazıçı, tarixi və incəsənət xadimlərinin həyatına həsr etdiyi kitablar nəşr olunur. Müxtəlif dövrlərdə yaşayıb yaratmış, dövrünün fikir tarixinə öz düşüncəsini qatmış, fəaliyyəti ilə tarixi hadisələrə imza atmış və öz sənətinin zirvəsinə çatmış bu şəxsiyyətlər haqda yazılan hər bir xatirə onların həyatını daha aydın anlamağımıza kömək edir. Azərbaycanda, Türkiyədə, İranda, Gürcüstanda, Rusiyada və dünyanın başqa ölkələrində yaşamış bu insanlar sənət və ədəbiyyat tarixində xatırlanmaqla yanaşı, özləri də memuar, xatirə-roman, avtobioqrafik əsər yazıblar. “Xatirə ədəbiyyatı” silsiləsində bu cür müxtəlif quruluşlu kitablara rast gəlmək mümkündür.
“İlk Kitab” silsiləsində ədəbi ictimaiyyət və oxucular arasında əsərləri vasitəsi ilə müəyyən nüfuz qazanmış, amma hələ kitabı çap olunmamış müəlliflərin kitabları nəşr edilir. Gənc yazarlara dəstək məqsədilə yaradılmış bu silsilədəki kitablar roman və ya hekayələr toplusundan ibarət olur. Bu silsilə müxtəlif mövzulu kitablarla zəngindir.
“Yerli Klassika” və “Xarici Klassika” silsilələri həm yerli, həm də dünya müəlliflərinin klassik nümunələrini çap edir. Bu silsilələrdə bir-birindən maraqlı əsərlərə rast gələ bilərsiniz.
“Azərbaycan Ədəbiyyatı Rusca” silsiləsi Azərbaycanda oxucu rəğbəti qazanmış yerli kitabların rus dilinə tərcümə edilməsi və yayılması məqsədi ilə yaradılıb. Bundan başqa, qeyri-ədəbi nümunələr arasında motivasiya və şəxsi-inkişaf müəlliflərindən – Co Novarro, Martin Karlins, Entoni Robinz, Piter Kouter, Brian Treysi, Andrey Kosenko, Ceylan Mumoğlu və s. kimi müəlliflərin kitablarının çapı “XAN” nəşriyyatının fəaliyyət dairəsinə aiddir.
