เว็บไซต์คืออะไร?

https://www.facebook.com/214305272492695/

KOI World, Bangkok (2025)

14/10/2024

အားလုံးပဲမင်္ဂလာပါဗျာ

အခုတစ်ခေါက်ကတော့ အလှမွေးငါးလေးတွေကိုမွေးမြူရာမှာ လိုက်နာသင့်တဲ့ ဆောင်ရန်ရှောင်ရန်လေးတွေကို တင်ပြပေးလိုက်ပါတယ်ဗျ။

အလှမွေးငါးလေးတွေကို မွေးမြူဖို့ရွေးချယ်ရာမှာဆိုရင် ၂မျိုး၂စားရှိပါတယ်။

1.ရေချိုအလှမွေးငါး

2.ရေငံအလှမွေးငါး ပဲဖြစ်ပါတယ်။

အခု ပြောပြပေးမဲ့ အကြောင်းအရာကတော့ ရေချိုအလှမွေးငါးတွေအတွက် ဆောင်ရန်ရှောင်ရန် လေးတွေပဲဖြစ်ပါတယ်။

ရေချိုအလှမွေးငါး မွေးမြူရာမှာ မွေးမြူသူ Level skill ၃ ဆင့်ခွဲထားပါတယ်။

1.Beginner skill

2.Intermediate skill

3.Professional skill တို့ပဲဖြစ်ပါတယ်။

ကျွန်တော် အခုpostထဲမှာပါတဲ့အကြောင်းအရာတွေက အခုမှစမွေးမဲ့ beginner သမား များအတွက်အဓိက ရည်ရွယ်ထားတာ ဖြစ်ပါတယ်။

1.ငါးရွေးချယ်နည်း။

ကျွန်တော်တို့တွေ ငါးလေးတွေစမွေးမယ်ဗျာ ဘယ်လိုငါးလေးတွေကနေစမွေးသင့်လဲ ဆိုတဲ့အချက်က စပြောပေးပါမယ်။
ပထမဆုံးအနေနဲ့စမွေးမဲ့ငါးတွေဟာ မွေးမြူသူအပေါ်မှာ ပထမဆုံးလက်ထဲစရောက်တဲ့အချိန်ကထဲက စိတ်ပျက်သွားစေနိုင်မဲ့ငါးတွေကိုမရွေးချယ်စေချင်ဘူး။

ဥပမာ lucky fish / gar fish / flower horn စတဲ့ငါးတွေဟာ အရွယ်အစားကြီးမားသလို အစာကျွေးမှု ဂရုစိုက်ပေးနိုင်မှုတွေက အထူးလိုအပ်ပါတယ် ဒီလိုငါးတွေကို အတွေ့အကြုံမရှိဘဲမွေးမယ်ဆိုရင်တော့ ( မတော်တဆ ငါးသေသွားတာ ရောဂါဝင်တာ ငါးမလှလာတာ ဖြစ်သွားခဲ့ရင် )
ဒီငါးမွေးတဲ့ဝါသနာကိုစွန့်ပစ်မိမှာအမှန်ပါပဲ ဒါကြောင့် ကိုယ်နဲ့ကိုက်ညီမဲ့ငါးတွေကို ပဲစရွေးချင်ပါတယ်။

ကျွန်တော်အကြံပြုချင်တဲ့ငါးတွေကတော့ zebra / guppy / molly စတဲ့ အရွယ်အစားသေးပြီး အကြမ်းခံ ထိန်းသိမ်းရလွယ်ကူတဲ့ငါးလေးတွေနဲ့ပဲ အစပြုစေချင်ပါတယ်။

ဒီငါးလေးတွေဟာ ကန်နေရာယူမှုကလဲ သိပ်မရှိတဲ့အတွက် အိမ်သူအိမ်သားတွေရဲ့ ငြီးငြူမှုလဲ လျော့နည်း နိုင်ပါတယ်။
( ဒီလိုကန်အသေးလေးကနေ ဝါသနာရင့်လာတော့ အိမ်ထဲမှာ ငါးကန်အပြည့်ဖြစ်သွားတဲ့သူတွေလဲကြုံဖူးပါတယ် )
နောက် လူအများစုကတော့ ငါးမွေးရင် တစ်ကောင်ထဲအဖော်မဲ့အထီးကျန်ဆန်မှာကိုစိုးရိမ်ကြပါတယ် ဒါကြောင့် အုပ်စုလိုက်ကူးခပ်နေရတာကိုပဲမြင်တွေ့စေချင်ကြပါတယ်
ဒီလို အုပ်စုဖွဲ့ကူးခပ်တာကိုကြည့်ချင်တဲ့ သူတွေကလဲ မိမိကန်ထဲထည့်မဲ့ငါးတွေရဲ့ သဘောသဘာဝကိုလဲသိသင့်ပါတယ်။

အချို့သောငါးတွေက အုပ်စုလိုက်အတူနေနိုင်ပေမဲ့ အချို့ငါးတွေကတော့ အခြားငါးများကိုတိုက်ခိုက်အနိုင်ကျင့်ကြပါတယ်
ဥပမာ cichlids ငါးမျိုးတွေဟာ အခြားငါးများကို အနိုင်ကျင့်ဗိုလ်ကျတတ်ကြပါတယ် ဒါကြောင့် ဒီငါးတွေကို သီးသန့်မွေးမြူသင့်ပါတယ်

2.ငါးရွေးချယ်ဝယ်ယူနည်း။

ကျွန်တော်တို့မွေးမြူငါးနာမည်တွေငါးအမျိုးအစားတွေ သိပြီးရင် ငါးတွေဝယ်ယူတော့မယ်ဆ်ု ဘယ်လိုငါးအခြေအနေရှိတဲ့ငါးတွေကို ဝယ်ယူရမလဲဆိုတာကို ပြောပြပေးပါဦးမယ်။

အလှမွေးငါးဆိုင်တစ်ဆိုင်ကိုရောက်သွားတဲ့အခါ ဆိုင်မှာရှိတဲ့ငါးတွေအားလုံးရဲ့အခြေအနေနဲ့ ဆိုင်ရှင်ရဲ့ငါးကန်တွေပေါ်ဂရုစိုက်မှုကိုအရင်အကဲခပ်သင့်ပါတယ်။

ဥပမာ ဆိုင်ခန်းထဲမှာရှိတဲ့ငါးအများစုဟာ မှိုင်နေတာ ငါးကန်ထဲကူးခပ်သွားလာမှုမရှိတာ အချို့သောငါးတွေကသေနေပြီး အချို့သောငါးတွေက လေအိပ်ပေါက် ရေထဲမျောနေတာ စတဲ့အခြေအနေအများစုနဲ့ တိုက်ဆိုင်နေရင် ဒီဆိုင်ကငါးတွေကို ဝယ်ဖို့စဉ်းစားသင့်ပါတယ်။

နောက် ငါးကန်ရေတွေဟာ ဘယ်အချိန်သွားသွား အမြဲနောက်ကျိနေမယ်ဆိုရင်တော့ ဆိုင်ရှင်က ငါးတွေကိုဂရုစိုက်မှုမရှိကြောင်းပေါ်လွင်နေပါပြီ ဒီလိုအနေအထားတွေဖြစ်နေပြီဆိုရင်တော့ အခြား ပိုစိတ်ချရတဲ့ ငါးဆိုင်ကနေဝယ်ယူတာ ပိုအဆင်ပြေနိုင်ပါတယ်။

တကယ်လို့မိမိနေရာကအခြားဆိုင်မရှိဘူးဆိုလဲ ထိုငါးတွေထဲမှ
ရေအမြဲကူးခပ်နေတဲ့ငါး
အမြှီးအတောင်မကုပ်တဲ့ငါး
ရေယက်သွေးကြောမပေါ်တဲ့ငါး
whitespot/ရေသန်းမပါတဲ့ငါး
စတဲ့အချက်တွေ ကင်းလွတ်တဲ့ငါးကိုပဲရွေးချယ်မွေးမြူစေချင်ပါတယ်
( ဒီအချက်တွေကတော့ ဘယ်ငါးဆိုင်မဆိုရွေးချယ်သင့်ပါတယ် )

3.ငါးမှန်ကန်ပြင်ဆင်တပ်ဆင်ခြင်း

ကျွန်တော်တို့တွေ မွေးမဲ့ငါးလဲရွေးချယ်ပြီးပြီ ဝယ်လဲဝယ်ပြီးပြီဆိုတော့ ငါးတွေအတွက်အိမ်လိုအပ်လာပါပြီ
ငါးမှန်ကန်ကိုဘယ်လိုပြင်ဆင်မလဲဆိုတော့ အရင်ဆုံးငါးကန်ထားဖို့နေရာလိုအပ်လာပါပြီ ငါးကန်နေရာက လူသွားလူလာများပြီး ဆူညံသံတွေများတဲ့နေရာမှာ ထားဖို့ကအဆင်မပြေနိုင်ပါဘူး

လူဝင်လူထွက်နည်းပြီးနေရောင်တိုက်ရိုက်မကျတဲ့ အခန်းတစ်နေရာမှာစီစဉ်ပေးရပါမယ် နောက် ငါးကန်တင်တဲ့စင်ကလဲ လိုအပ်လာပါပြီ ငါးကန်တင်စင်ဟာ ငါးကန်ရဲ့ရေဝိတ်ကို ကြာရှည်ခံနိုင်တဲ့စင်မျိုးကိုရွေးချယ်သင့်ပါတယ်
ငါးကန်ရဲ့အရွယ်အစားကလဲ မိမိမွေးမဲ့ငါးအရွယ်အစား/အရေအတွက်နဲ့လိုက်ဖတ်ညီရပါမယ် ငါးကန်အရွယ်အစားရွေးချယ်ရာမှာ မိမိမွေးထားတဲ့ငါးရဲ့ အကြီးဆုံးဖြစ်လာမဲ့ဆိုဒ်ကိုပါထည့်တွက်ပြီးပြင်ဆင်သင့်ပါတယ်။

အကြမ်းအားဖြင့်တော့ ငါးအရွယ်အစား ၁လက်မအတွက် ရေ4.5L ရှိရပါမယ်။ ငါးကန်ထဲမှာငါးထည့်တဲ့အခါကျရင် ငါးဆန့်ရင်ပြီးရောဆိုတဲ့စိတ်နဲ့ ပြည့်ကျပ်နေအောင်မမွေးမြူသင့်ပါဘူး ငါးတစ်ကောင်အတွက် ရှိသင့်တဲ့ ရေပမာဏကို အနီးစပ်ဆုံး ဖြစ်အောင်ထားပေးရပါမယ် ဒါမှလဲ ကျန်းမာပျော်ရွှင်တဲ့ငါးတွေကိုပိုင်ဆိုင်နိုင်မှာဖြစ်ပါတယ်

4.ငါးကန်ကို လိုအပ်ပစ္စည်းတပ်ဆင်ခြင်း

အလှမွေးငါးတွေအတွက် အဓိကလိုအပ်ချက်ကတော့ ရေအပူချိန် ရေph နဲ့ ရေသန့်စင်မှုတွေပဲဖြစ်ပါတယ်

Heater

ငါးကန်တိုင်းမှာ လိုအပ်တဲ့အပူချိန်ရရှိစေရန်အတွက် heater တပ်ဆင်ပေးဖို့လိုအပ်ပါတယ် ငါးအများစုကတော့ 72°F to 84°F အတွင်းမှာ ရှိတဲ့အပူချိန်တွေလိုအပ်ပါတယ်

Water Ph

ရေph ကိုလဲ ပုံမှန်စစ်ဆေးပေးသင့်ပါတယ် ရေph မမှန်ကန်မှုကြောင့်လဲ ငါးရောဂါနဲ့ ရေညှိပြဿနာတွေတိုးပွားစေပါတယ် ph level ထိန်းသိမ်းပုံကိုလဲ post တင်ပေးထားပါတယ်ဗျ

Filter System

နောက်အရေးအကြီးဆုံး အချက်တစ်ခုကတော့ filter စနစ် တပ်ဆင်ခြင်းပါပဲ filter ကိုရွေးချယ်ရာမှာ biological filter system နဲ့ mechanical system ဆိုပြီး ၂မျိုးရှိပါသေးတယ် ဒီအကြောင်းကိုလဲ post တင်ပေးထားပါတယ်ဗျ။

အဓိကကတော့ ငါးကန်ထဲမှာ အညစ်အကြေးနဲ့ ဓာတုပစ္စည်းကင်းစင်မှု / အကျိုးပြု bacteria ပေါက်ဖွားစေမှုတို့ပဲဖြစ်ပါတယ်။

5.ငါးကန်အလှဆင်ပစ္စည်းတပ်ဆင်ခြင်း

ငါးကန်ထဲမှာအလှဆင်ပစ္စည်းထည့်ခြင်းကလဲ အချို့သော လူတွေကနှစ်သက်သလို အချို့ကြတော့လဲ မနှစ်သက်ကြပါဘူး
အလှဆင်ပစ္စည်းထည့်မယ်ဆိုရင် အထူးသတိထားရမှာက ငါးတွေကို ထိခိုက်ဒဏ်ရာ ရစေနိုင်တဲ့ အချိန်အတက်တွေ မပါစေဖို့ရွေးချယ်ပေးရပါမယ် နောက်အလှဆင်ပစ္စည်းများကို ကန်ထဲမထည့်ခင် ရေနှင့်စင်ကြယ်စွာဆေးကြောပြီးမှထည့်သင့်ပါတယ်
နောက် ကန်ထဲမှာ ပုန်းခိုစရာ အိမ်လေးတွေ သစ်ဆွေးတုန်း တွေထည့်ပေးလို့ရပါတယ်။

ငါးကန်ကို အချို့က မီးများတပ်ဆင်၍အလှဆင်ကြပါသေးတယ်။

မီးများတပ်တဲ့အခါမှာလား အရမ်းစူးရှစွာမပေးသင့်ပါဘူး
ငါးများလန့်တတ်ပြီး ကန်ထဲမှာ ရေညှိများပေါက်ဖွားစေနိုင်ပါတယ်။

မီးအလင်းအားပေးမှုကိုလဲ တစ်နေကုန်မပေးသင့်ပါဘူး။

6.အလှမွေးငါးအသစ်ထည့်တော့မယ်ဆိုရင် ???

ကဲ အပေါ်ကပြောခဲ့တဲ့ အချက်တွေအကုန်ပြည့်စုံသွားပြီဆိုရင်တော့ ငါးဝယ်ပြီး ကန်ထဲထည့်ရုံပဲကျန်တော့တာပေါ့ ဒီနေရာမှာလဲ ငါးကိုကန်ထဲကို တန်းမထည့်သင့်ပါဘူး ငါးထည့်ထားတဲ့အိတ်ကို ကန်ရေထဲ ၁၅မိနစ် မိနစ်၂၀ခန့် အရင်စိမ်ထားသင့်ပါတယ် ပြီးမှ အိတ်ထဲကို ကန်ရေ အနည်းငယ်ရော၍ အပူချိန်မျှအောင်လုပ်ပြီးမှ ငါးကိုကန်ထဲလွှတ်သင့်ပါတယ်
ပိုပြီးစနစ်ကျစေချင်တယ်ဆိုရင်တော့ ဆေးကုကန်သပ်သပ်ထားသင့်ပါတယ် ဒါမှငါးအသစ်တွေကို မိမိအရင်ငါးများနှင့်မရောခင် ကျန်းမာရေးကောင်းမကောင်းကို ၁ပါတ်မျှ စောင့်ကြည့်ပြီးမှ ရောတာပိုကောင်းပါတယ်။
ဒါ့အပြင် မိမိငါးများထဲမှနေမကောင်းဖြစ်သောငါးတွေကို ဆေးကုကန်သပ်သပ်ခွဲ၍ ကုသခြင်းအားဖြင့် အခြားငါးများအားမကူးစက်စေရန်ကာကွယ်ပြီးဖြစ်ပါတယ်။

7.မဖြစ်မနေလုပ်ဆောင်ပေးရမည့်အချက်များ

1.ရေပုံမှန်လှဲပေးခြင်း ( 25% or 50% )
2.ငါးများကိုအစာလိုအပ်သည်ထက်ပိုမကျွေးမိစေရန် ( နည်းနည်းနှင့်ခဏခဏကျွေးရန် )
3.Filter material များအား 2 or 3ပါတ်တစ်ခါ ဆေးပေးရန်
( ငါးကန်ရေဟောင်းနှင့်သာဆေးရန် )
ကဲ ဒီအချက်တွေအားလုံးကို သင်သာလိုက်နာပြီဆိုရင် အလှမွေးငါးလှလှလေးတွေကို ကျန်းမာသန်စွမ်းစွာ အမြဲမြင်တွေ့နိုင်မှာပဲဖြစ်ပါတယ်။

13/10/2024

Channa pulchra မြန်မာနိုင်ငံတွင် မွေးဖွားသည့် Channidae မျိုးစိတ်ဝင် ငါးရံ့မျိုးစိတ်ဖြစ်သည်။ မြန်မာနိုင်ငံအနောက်ပိုင်း ရခိုင်ရိုးမရှိ ကြာစိချောင်းမြစ်ဝှမ်းမှ ကောက်ယူထားသော နမူနာမှ R. Britz က ၂၀၀၇ ခုနှစ်တွင် ပထမဆုံး ဖော်ပြခဲ့သည်။

13/10/2024

🤗🤗🤗

12/10/2024

အိမ်ခြံထဲကန်လေး ဘယ်လိုလုပ်ကြမလဲ?

11/10/2024

၃ လသား စမ်းချောင်းကန်လေး

11/10/2024

ရေငံငါးတွေပဲ ဘာငါးလည်းတော့မသိဘူး သိတဲ့သူရှိရင်ပြောခဲ့ပါဦး

18/09/2024

Super red arapaima spec

12/08/2024

ဟင်္သာတမှာ ပိုက်တိုးတာတဲ့ ဘာငါးလဲ 😮

06/08/2024

ငါးမွေးသင့်သောအကြောင်းပြချက်

အားလုံးပဲမင်္ဂလာပါဗျ ကျွန်တော်အခုမိတ်ဆက်ပေးချင်တဲ့အကြောင်းအရာကတော့ “အလှမွေးငါးလေးတွေကိုဘာကြောင့်မွေးမြူကြလဲ” နဲ့ “ဘာကြောင့်မွေးမြူသင့်တယ် ဆိုတဲ့အကြောင်းအရာလေးပဲဖြစ်ပါတယ် လေ့လာကြည့်ရအောင်ဗျာ!!!!

ယခုခေတ်မှာဆိုရင် မြို့တိုင်းမြို့တိုင်းမှာရှိတဲ့ အိမ်တိုင်း နီးပါး/ စားသောက်ဆိုင် / ဆေးရုံ / ကုမ္ပဏီစတဲ့နေရာတွေမှာဆိုရင် အလှမွေးငါးတွေကို မှန်ကန်နဲ့သော်လည်းကောင်း အုတ်ကန် ကြွေကန် စတည်ဖြင့်သော်လည်းကောင်း မွေးမြူလာကြပါပြီ
အလှမွေးငါးတွေဟာ အခြားအိမ်မွေးတိရိစ္ဆာန်များထက်ကို

1.နေရာ

2.အချိန်

3.ကုန်ကျစရိတ် သက်သာတာကြောင့် တိချစ်သူအများစုက အလှမွေးငါးလေးတွေကို ရွေးချယ်လာကြပါတယ်
ယခုခေတ်အခြေအနေမှာဆိုရင် အလှမွေးငါးများကိုရောင်းသူဝယ်သူများပြားလာတဲ့အပြင် အလှမွေးငါးမျိုးစိတ်သစ်များတိုးတက်လာနှုန်းကလဲ အရှိန်အဟုန်မြင့်မားနေပါပြီ
နိုင်ငံအနှံ့နေရာအနှံ့က ငါးမျိုးစိတ်သစ်တွေကို လိုက်ပြီးရေတွက်မယ်ဆိုရင်တော့ ပြီးဆုံးနိုင်မှာမဟုတ်တော့ပါဘူး
လူတွေကအလှမွေးငါးတွေကို ဘာကြောင့်မွေးကြလဲ

1. အချို့က ရွှေငါး ၉ ကောင်မွေးရင် လာဘ်ကောင်းတယ်
Lucky fish မွေးရင် ငွေဝင်တယ် ကံကောင်းတယ်စသည်ဖြင့် အယူအဆတွေကြောင့်မွေးမြူကြပါတယ်

2. အချို့ကျတော့လဲ အိမ်ကလူတစ်ယောက်ယောက်ကမွေးတာ ဒါမှမဟုတ် ဘေးအိမ်ကလူတွေငါးမွေးတာကို မြင်ပြီး ကိုယ်ပါလိုက်မွေးကြည့်ရင်းနဲ့ မွေးဖြစ်သွားတာ / လက်ဆောင်ပေးလို့မွေးရင်းနဲ့စိတ်ဝင်စားသွားတာတွေ

3. အချို့ကြပြန်တော့လဲ ငါးရဲ့အလှအပကိုစွဲလန်းမိပြီး အိမ်မှာခေါ်မွေးဖြစ်တာတွေ စသည်ဖြင့် အကြောင်းအမျိုးမျိုးကြောင့် အလှမွေးငါးကိုအရူးအမူးဖြစ်သည်အထိ စိတ်ပါဝင်စားလာကြပါတယ်

ဘယ်လို အကြောင်းပြချက်နဲ့ပဲမွေးမွေး ငါးလေးတွေက သက်ရှိတွေဖြစ်ကြပါတယ်။ သူများအသက်ကို ကိုယ့်အိမ်က ကန်ထဲမှာ မွေးမြူတာဖြစ်တဲ့အတွက်ကြောင့် နည်းစနစ်မှန်ကန်တဲ့ နည်းလမ်းတွေနဲ့ ငါးလေးတွေကို ပျော်ရွှင်ကျန်းမာစွာနဲ့သက်တမ်းစေ့နေနိုင်အောင်ဖန်တီးပေးရမှာ ငါးချစ်သူတို့ရဲ့တာဝန်ဖြစ်ပါတယ်ဗျာ

#အလှမွေးငါးလေးတွေကို ဘာကြောင့်မွေးမြူသင့်လဲ ?
အလှမွေးငါးလေးတွေဟာ အခြား အိမ်မွေးတိရိစ္ဆာန်များထက်ကို တွင်ကျယ်စွာနဲ့ မွေးမြူလာကြပါပြီ

အမေရိကန်နိုင်ငံမှာဆိုရင် တစ်နိုင်ငံလုံးရဲ့ ၆၈% က အလှမွေးငါးကန်လေးတွေကိုပိုင်ဆိုင်ကြပါတယ်တဲ့ဗျာ Woww!!!! သူတို့ဘာကြောင့်များဒီလောက်ထိမွေးမြူကြလဲဆိုတာ တကယ်ကိုစိတ်ဝင်စားဖို့ကောင်းလာပါပြီ

သိပ္ပံညာရှင်များနဲ့ဆရာဝန်များ၏လေ့လာစမ်းသပ်မှုတွေက ဖော်ပြနေပါတယ် အလှမွေးငါးကန်တွေကို ပိုင်ဆိုင်ထားယုံနဲ့ အောက်ပါ အကျိုးကျေးဇူး ၈ ချက်ထဲက အနည်းဆုံး ၁ချက် ကိုတော့ ရရှိနိင်မှာ အမှန်ပဲဖြစ်ပါတယ်

1.ကျန်းမာရေးအတွက် အထောက်အကူပြုခြင်း
ဘယ်လိုပြဿနာတွေကို ဖြေလျော့ပေးနိုင်လဲဆိုတော့

(1) စိတ်ဖိစီးမှုများခြင်းကိုလျော့ကျစေခြင်း

(2) သွေးတိုးရောဂါကိုသက်သာစေခြင်း

(3) စိတ်ဖိစီးမှု/သွေတိုးမှုကြောင့် ဖြစ်တဲ့နှလုံးရောဂါများကိုကာကွယ်ပေးခြင်း

(4) အယ်လ်ဇိုင်းမား ရောဂါတို့ကို ကာကွယ်ပေးခြင်းတို့ပဲဖြစ်ပါတယ်

ဒီလိုရောဂါတွေကို တကယ်ရောကာကွယ်ပေးနိုင်ပါ့မလား ဆိုတာကို အလှမွေးငါးကန်လေးတွေကို ကိုယ်တိုင်ဖန်တီးပြီး ဟုတ်မဟုတ်စမ်းကြည့်ကြတာပေါ့

ဒါ့အပြင်ဆေးရုံးဆေးခန်းအများစုမှာ ငါးကန်လေးတွေ ထားရှိတာကိုသင်တို့သတိထားမိမယ်ထင်ပါတယ်

ဒါဟာ အလှပြထားရုံတင်မကပါဘူး ဆေးရုံဆေးခန်း လာပြသူများ မြင်နိုင်တဲ့နေရာထားရှိတာကြောင့် ငါးကန်လေးကို တခဏတာ ငေးမောကြည့်ရုံနဲ့ စိတ်ထဲမှာ အနည်းငယ်ကြည်နူးမိတဲ့ခံစားချက်ကို ရရှိစေနိုင်တာကြောင့် ထားခြင်းဖြစ်ပါတယ်

2. အခြားအိမ်မွေးတိရိစ္ဆာန်များမွေးမြူခြင်းထက် အလှမွေးငါးလေးတွေက ပိုပြီး တည်ငြိမ်အေးချမ်းခြင်း ဒီအချက်ကလဲမှန်ကန်နေပါတယ် အခြားခွေးကြောင်ငှက်တွေက သူတို့ပျော်သည်ဖြစ်ဖြစ် ရန်လိုရင်ဖြစ်ဖြစ် အမြဲ ဆူညံနေကြတာပါပဲ အလှမွေးငါးလေးတွေကျတော့ သူတို့အုပ်စုနဲ့သူတို့ရေကန်လေးထဲမှာ တိတ်တိတ်ဆိတ်ဆိတ်နဲ့အမြဲကူးခပ်နေတာပါပဲ

3. ကလေးငယ်တွေရှိတယ်ဆိုရင် ကလေးလေးတွေအတွက် ငါးကန်ကနေ သဘာဝကိုချစ်တတ်လာအောင် သတ္တဝါလေးတွေကို ကြင်နာတတ်လာအောင် သင်ပြပေးနိုင်ခြင်း
ယနေ့လူငယ် နောင်ဝယ်လူကြီးဆိုတဲ့အတိုင်း တစ်ချိန်တိုင်းပြည်တာဝန်ထမ်းဆောင်မဲ့လူငယ်လေးတွေကို ငယ်စဉ်ကထဲက လေ့ကျင့်ပျိုးထောင်ပေးသင့်ပါတယ်
အခုလိုငယ်ရွယ်စဉ်ကထဲက သတ္တဝါအချင်းချင်း ကြင်နာခြင်းနဲ့ သဘာဝကိုချစ်မြတ်နိုးတတ်မှ လူသားနဲ့ကမ္ဘာမြေကြီးကိုအကျိုးပြုမဲ့ လူသားအရင်းအမြစ်ဖြစ်စေမှာပါ

4. တိရိစ္ဆာန်လဲမွေးချင်တယ် ကိုယ့်အိမ်ကကျဉ်းနေရင်လဲပြဿနာမရှိပြန်ဘူး အခန်းထောင့်တစ်နေရာစာလေးမှာ ငါးကန်အသေးလေး ထားနိုင်တဲ့အတွက်ကြောင့် နေရာယူသက်သာခြင်း

5.အခြားခွေးကြောင်ငှက်တွေကို စျေးပိုချိုခြင်း
အလှမွေးငါးလေးတွေက စျေးနှုန်းကလဲ 0ကျပ်ကနေ သိန်းချီပြီး တန်ကြေးရှိပါတယ် မိမိနှစ်သက်ရာ ငါးအမျိုးအစားနဲ့စျေးနှုန်းကို ရွေးချယ်မွေးမြူနိုင်ပါတယ်
ဘာကြောင့် 0ကျပ်ကနေစပြောလဲဆိုတော့ အလှမွေးငါးချစ်သူတွေထဲမှာကိုယ်နဲ့ရင်းနှီးခင်မင်တဲ့သူစီကနေ ငါးလေးတွေကိုလက်ဆောင်တောင်းယူမွေးနိုင်ခြင်းကြောင့် 0ကျပ်လို့ပြောတာပါ

6. ထိန်းသိမ်းမှုကလဲ ပုံမှန်ရေလဲ အစာကျွေးပေးရုံနဲ့ အချိန်ကုန်သက်သာခြင်း အခြားခွေးကြောင်တွေလို အစာခွက်ဆေးပေးရတာ လမ်းလျှောက်ထွက်ပေးရတာ ခွေးမစင်ကျုံးရတာ မရှိတဲ့အတွက် ဝန်မပိစေပါဘူး

7. ကိုယ့်ရဲ့ တိလေးတွေမွေးချင်တဲ့စိတ်ကိုလဲ ငါးတစ်မျိုးထဲမွေးယုံနဲ့ကျေနပ်စေနိုင်ခြင်း

8. ကိုယ့်ရဲ့စိတ်ကူးထဲကအတိုင်း ပုံဖော်ထားတဲ့ ငါးကန်ရဲ့အလှကို ကိုယ်တိုင်ဖန်တီးပြီး ညဘက်တွေ ပျင်းတဲ့အခါတိုင်း တစိမ့်စိမ့်ကြည့်ရင်းနဲ့ စိတ်ချမ်းစာမှုကို ပေးနိုင်ခြင်း စတဲ့အချက်တွေကြောင့် အလှမွေးငါးတွေကို မွေးမြူသင့်ပါတယ်
ကဲ ဒီလိုအချက်အလက်လေးတွေနဲ့ ထောက်ပြလိုက်တော့ ငါးမွေးကြည့်ချင်တဲ့ ခံစားချက်လေးဖြစ်ပေါ်သွားတယ်မလား
ကဲပါ !!!! ကြာပါတယ်ဗျာ ငါးမွေးဖို့စိတ်ကူးယဉ်မနေဘဲ အခုပဲ အလှမွေးငါးမွေးဖို့စိတ်ကူးကို လက်တွေ့ အကောင်အထည် ဖော်လိုက်ကြရအောင်ဗျာ

အခုလိုအချိန်ပေးဖတ်ပေးတဲ့အတွက် ကျေးဇူးတင်ပါတယ်ဗျ

05/08/2024

GloFish Vs Dye Injection Fish ( အနုမြူရောင်ထွက်သောငါး နှင့် ဆိုးဆေးထိုးထားသောငါးများ )
====

ကျွန်တော်တို့အလှမွေးငါးလောကမှာ သာမန်အရောင်အသွေးများထက်ပိုထူးခြားစွာအရောင်များပါဝင်တဲ့ ငါးလေးတွေကို ဈေးကွက်ထဲမှာ ဖောဖောသီသီတွေ့မြင်လာရပါပြီ။ အရောင်ပါဝင်သောငါးများမှာ

၁။ ပုံမှန် နဂိုရှိရင်းမျိုးစိတ်ကြောင့်ဖြစ်ပေါ်လာသောအရောင်

၂။ သိပ္ပံနည်းပညာဖြင့်မျိုးရိုးပြုပြင်မှု‌ေကြာင့်ဖြစ်‌ေပါ်လာ‌ေသာအ‌ရောင် နှင့်

၃။ လူများကတရားမဝင် ဆိုးဆေးထိုးပေးမှုကြောင့်ဖြစ်ပေါ်လာသောအရောင် စသည်ဖြင့် အထက်ပါအခြေအနေ( ၃ )မျိုးကြောင့်ဖြစ်လာနိုင်ပါတယ်။

နဂိုရှိရင်းမျိုးရိုးဗီဇကြောင့် ဖြစ်ပေါ်သော အရောင်များက အရမ်းထူးခြားမှုရှိမနေပေမဲ့ ကျန်တဲ့ မျိုးရိုးပြုပြင်မှုနဲ့ ဆိုးဆေးထိုးမှုတွေက ငါးလေးတွေအပေါ် ကောင်းကျိုးနဲ့ဆိုးကျိုးများရှိနေပါတယ်။

မျိုးရိုးပြုပြင်မှုကြောင့်ဖြစ်ပေါ် အရောင်တွေအကြောင်းကိုအဦးဆုံးရှင်းပြပေးချင်ပါတယ်။ သူတို့လေးတွေကို GloFish လို့ခေါ်ပြီး အနူမြူ‌ေရာင်ပါ‌ေသာပထမဆုံးငါးမျိုးအဖြစ် Zebra Danio လေးတွေကို 2003 ခုနှစ်မှာ တရားဝင်မှတ်ပုံတင်ပြီး အလှမွေးငါးဈေးကွက်ထဲစတင်ဖြန့်ချိခဲ့ကြပါတယ်။ ပထမဆုံး ဒီငါးလေးတွေ ဖန်တီးရချင်းရဲ့အကြောင်းပြချက်က သူတို့ရဲ့အရောင်တွေကိုကြည့်ပြီး ရေသယံဇာတထဲမှာ အဆိပ်အတောက်များ၊အညစ်အကြေးများ မည်မျှပါဝင်နေသည်ကိုသိရှိရန်အတွက် ရည်ရွယ်ဖန်တီးခဲ့ကြပါတယ်။ စင်္ကာပူနိုင်ငံသား သိပ္ပံပညာရှင်မ‌ျားက စတင်ခဲ့ကြပြီး Fluorescent color ( အနုမြူအရောင် ) များထုတ်လွှတ်နိုင်သော ရေနက်ပိုင်းနေ ရေနေသတ္တဝါများရဲ့ မျိုးရိုးဗီဇကို ထုတ်ယူပြီး မျိုးရိုးမြှင့်တင်မည့် စမ်းသပ်ငါးတွေရဲ့ မျိုးရိုးဗီဇနဲ့ ပေါင်းစပ်လိုက်ပါတယ်။ ဒီမျိုးရိုးမြှင့်ထားတဲ့ငါးတွေကနေတဆင့်မွေးဖွားလာတဲ့သားသမီးတွေမှာပါ အနုမြူအရောင်ဗီဇကျန်ရှိအောင်ပြုလုပ်ခဲ့ကြပြီး ထိုငါးမျိုးဆက်တစ်လျှောက်လုံးကို မျိုးရိုးဗီဇပြောင်း‌လဲခဲ့ကြပါတယ်။
သတ္တဝါတွေမှာတွေ့ရတဲ့ Fluorescent color တွေဟာ လူလုပ်ဖန်တီးထားတဲ့ အရောင်များမဟုတ်တဲ့အတွက် ဒီဗီဇပြောင်းငါးများရဲ့အသက်ခန္ဓာကိုအန္တရာယ်မပေးနိုင်ပါဘူး။ သဘာဝထဲမှာဆိုရင် ပိုးစုန်းကြူး ၊ ပင်လယ်ရေနက်ပိုင်းနေ ရေဘဝဲ၊ ငါးပုစွန်များ၊ သန္တာကျောက်တန်းများ ၊ ရေခူများ( Jellyfish ) စတဲ့ ရေနေသတ္တဝါများနှင့် ပိုးစုန်းကြူးတွေဟာ အနုမြူရောင်ထုတ်လွှတ်ပေးနိုင်ကြပါတယ်။

ယခုလက်ရှိ‌အလှမွေးငါးဈေးကွက်မှာမြင်တွေ့နိုင်တဲ့အရောင်တွေက Moonrise Pink, Starfire Red, Sunburst Orange, Electric Green, Cosmic Blue, and Galactic Purple စသည်အရောင်များဖြစ်ပြီး

ဗီဇပြောင်းလဲခံထားရတဲ့ငါးမျိုးစိတ်များဟာ Zebra danios (Danio rerio), Black skirt tetras (Gymnocorymbus ternetzi), Tiger barbs (Puntius tetrazona), Rainbow shark (Epalzeorhynchos frenatum), Betta fish (Betta splendens)

စတဲ့ ငါးမျိုးစိတ်တွေပဲဖြစ်ကြပါတယ်။

ဒီဗီဇပြောင်း အနုမြူရောင်ပါတဲ့ငါးတွေဟာ ဆိုးဆေးထိုးထားတဲ့ငါးတွေလို တရားမဝင်အလှမွေးငါးဈေးကွက် မဟုတ်ကြပါဘူး။ 2001 ခုနှစ်မှာ Alan Blake နှင့် Richard Crockett တို့တည်ထောင်ခဲ့ကြတဲ့ GloFish ကုမ္ပဏီဟာ သက်ဆိုင်ရာပြည်နယ်ဥပဒေများနှင့်အညီ အနုမြူရောင်ပါသောငါးများကို တရားဝင်လိုင်စင်မူပိုင်ခွင့် ရယူပြီးဈေးကွက်ထဲတရားဝင်ဖြန့်ဖြူးရောင်းချခွင့်ရရှိထားပြီးဖြစ်ပါတယ်။

ဒီလိုဗီဇပြောင်းထားတဲ့ အနုမြူရောင်ပါတဲ့ငါးတွေက မျိုးစိတ်အသစ်တွေတော့မဟုတ်ပါဘူး။ Zebra Danio, Tiger Barb , Black Skirt Tetra , Betta တွေရဲ့ နဂိုမူရင်းမျိုးစိတ်သဘာဝအတိုင်း ပြုစုစောင့်ရှောက်မှုပေးယုံပါပဲ။ သူတို့ရဲ့ထပ်ဖြည့်ထားတဲ့ အရောင်လေးတွေတောက်ပစေချင်တယ်ဆိုရင်တော့ ငါးကန်ကို အနက်ရောင်နောက်ခံနဲ့ အပြာရောင် ၊ အဖြူရောင်အလင်းဖျော့ဖျော့ကို ၈-၁၀ နာရီလောက်ထွန်းပေးထားယုံနဲ့ အလင်းတောက်ပလာစေနိုင်ပါတယ်။ သူတို့စိတ်အားတက်ကြွလေ အရောင်ပိုတောက်ပလာစေနိုင်လေဖြစ်တာကြောင့် ကန်ကို သဘာဝနဲ့အနီးစပ်ဆုံးတူညီအောင်ပြင်ဆင်ပေးရပါမယ် ၊ သစ်ဆွေးတုန်း ၊ အောက်ခင်းကျောက်စရစ်ခဲအသေးများ ၊ အပင်များ နဲ့ ရေအရည်အသွေးကောင်းစေဖို့ filter media , ရေအပူချိန် ၊ pH , GH/Kh စတာတွေကို အထူးဂရုစိုက်ပေးရပါမယ်။

ယခုငါးအမျိုးအစားအများစုက အုပ်စုလိုက်နေထိုင်ကြရတာကိုနှစ်သက်တဲ့အတွက် အနည်းဆုံး ၆ ကောင်ခန့်စုပေါင်းမွေးမြူပေးရပါမယ် ၊ အခြားသော အသေးစိတ်ဂရုစိုက်မှုများကို ကျွန်တော်ယခင်ကတင်ပေးခဲ့သော post တွေဖတ်ရှုလို့ရပါတယ်။

ယခု Fluorescent color ပါတဲ့ငါးလေးတွေဟာ Beginner Type ငါးတွေဖြစ်တဲ့အတွက် တော်တော်မ‌ျားများနဲ့အဆင်ပြေပါတယ်။

မည်သည့်ငါးအမျိုးအစားမဆို ငါးဆိုင်မှဝယ်ယူလာပြီးပါက မိမိအိမ်ကကန်ထဲသို့တိုက်ရိုက်ထည့်သွင်းချင်းမပြုလုပ်ရပါဘူး။ ဝယ်လာသောငါးအိတ်ကို လွှတ်မည့်ကန်ထဲသို့ နာရီဝက်ခန့်စိမ်ထားပြီးမှ အိတ်ကိုဖွင့်ရပါမယ် ၊ အိတ်ထဲမှတဆင့် အခြားရေပုန်းအလွတ်ထဲ‌ရေရောငါးရောအကုန်သွန်ချပြီး ၊ လွှတ်မည့်ကန်ထဲကရေကို တစ်ခွက်ချင်းအနည်းငယ်စီလောင်းထည့်ပေးရပါမယ် ။ ဘာကြောင့်ယခုလိုလုပ်ခိုင်းရလဲဆိုရင် ငါးဆိုင်မှာသုံးသောရေအပူချိန် ၊ pH နဲ့ water parameter တွေက မိမိအိမ်ကရေနှင့် ထပ်တူကျ မကျ မသေချာတဲ့အတွက် ရုတ်ချည်း‌ေရအပြောင်းအလဲဖြစ်ရင် ငါးတွေ တအိအိနှင့်ရက်ပိုင်းအတွင်းသေဆုံးတတ်ပါတယ်။ ပိုမိုစိတ်ချရစေရန် Quarantine Tank ( ဆေးကုသကန် ) သီးသန့်မှာ ၂ပတ်ခန့်သီးခြားမွေးမြူထားပါက မိမိအိမ်တွင်ရှိပြီးသားငါးများအတွက် ရောဂါကူးစက်မှုလျော့နည်းစေပါတယ်။

03/08/2024

ငါကန်လေးဆောက်တဲ့အခါ idea လေးယူလို့ရအောင်ပါ

01/08/2024

ငါးကန်လေး ကိုယ်တိုင်လုပ်လို့ရအောင်ပါ

31/07/2024

Green Spotted S**t Fish

Green Spotted S**t တွေကို Argus Fish , Leopard S**t , Butter Fish , Spotted Butt , Spotted Butter Fish , Spade Fish အစရှိသဖြင့် နာမည်အမျိုးမျိုးနဲ့ခေါ်ဝေါ် ကြ ‌ေသာ်လဲ အမျိုးအစားက တူတူပဲဖြစ်ပါတယ်။ သူတို့ရဲ့ခန္ဓာကိုယ်ဟာ ငယ်ရွယ်တုန်းမှာ အဝိုင်းပြားပုံစံရှိပြီး အရွယ်ရောက်လာတာနဲ့အမျှ ပြားလျှပ်ပြီး လေးထောင့်ဆန်တဲ့ခန္ဓာကိုယ်နဲ့ ဦးခေါင်းပိုင်းကို ခပ်စောင်းစောင်းခွျန်သွားတဲ့ပံုစံရှိပါတယ်။ အ‌ဆူးတောင်များဟာ တောင့်တင်းလှပြီး အဆိပ်အနည်းငယ်ပါဝင်ပါတယ် ။ သူတို့ရဲ့ခန္ဓာကိုယ်ဟာ ငွေစိမ်းရောင် သို့မဟုတ် ကြေးညိုရောင် အောက်ခံရှိပြီး အမဲအစက်ပြောက်များက တစ်ကိုယ်လုံးမှာရှိပါတယ်။ ထိုအမဲအစက်‌ေပြာက်‌ေတွက ငယ်ရွယ်တုန်းမှာ အမြှီးအတောင်မကျန်သိသာစွာပါရှိပြီး အရွယ်ရောက်တဲ့အခါ အချို့နေရာများသာကျန်ရှိပါတယ်။
ထို Spotted S**t ကို Linnaeus ဆိုတဲ့ပုဂ္ဂိုလ်က 1776ခုနှစ်မှာဖမ်းဆီးရမိပြီး အလှမွေးငါးဈေးကွက်ထဲကို ပြန့်နှံ့လာပါတယ်။ သူတို့တွေဟာ ရေချိုရေငန်စပ် ( Brackish Water ) အပြင် ရေငန်တွေထဲမှာပါရှင်သန်နိုင်ကြပါတယ်။ သူတို့တွေကလဲ ကမ္ဘာအလှမွေးငါးဈေးကွက်မှာနာမည်ရပြီးသားငါးတစ်မျိုးဖြစ်ပါတယ် ။ ဒီလိုကမ္ဘာဈေးကွက်ဝင်တဲ့ အလှမွေးငါးလေးတွေဟာ မြန်မာနိုင်ငံထဲမှာလဲတွေ့ရှိရတဲ့အတွက်ကြောင့် အကယ်၍မွေးမြူချင်မိပါက အခြေခံလိုက်နာရမဲ့ ဂရုစိုက်နည်းလေးတွေကို အောက်မှာလေ့လာကြည့်လို့ရပါတယ်‌ဗျာ 😊
* မူလဇာတိ = Spotted S**t တွေကို အင်ဒိုပစိဖိတ်ရပ်ဝန်း ‌ေရချို‌ေရငန်စပ်မြစ်ဝများနဲ့ပင်လယ် တစ်လျှောက်မှာ တွေ့ရှိရပါတယ်။ ယခုလက်ရှိနိုင်ငံတကာဈေးကွက်မှာ အဓိကရောင်းချနေတာက ထိုင်းနိုင်ငံထွက် ငါးများဖြစ်ကြပါတယ်။ မြန်မာနိုင်ငံမှာလဲ ရေချိုရေငန်စပ်နေရာဖြစ်တဲ့ ဧရာဝတီတိုင်းဖက်မှ စကတ်ငါးများကိုဖမ်းယူရောင်းချလျက်ရှိပါတယ်။

*ရေအမျိုးအစား = ရေခ်ိုရေငန်စပ် သို့မဟုတ် ရေငန်ရေအမျိုးအစားဖြင့် မွေးမြူခြင်းက ပိုပြီးသင့်လျော်ပါတယ်။ water_hardness 12 – 18dGh , salinity ( 214.29 – 321.43 ppm ) ဆားငန်နှုန်းခန့်‌ဖြင့်မွေးမြူရပါမယ်။

* အပူချိန် / ph = အပူချိန် 20 – 28°C ( 68 – 82° F ) / pH 7.5 – 8.5 အတွင်းမွေးမြူရပါမယ်။

* အကြီးဆုံးရောက်နိုင်သောအရွယ်အစား = သဘာဝထဲမှာ စကပ်တေွရဲ့အရွယ်အစားက 15 လက်မ ( 38.10 cm ) အထိကြီးထွားနိုင်ကြပါတယ်။ ဒါပေမဲ့ အလှမွေးငါးမှန်ကန်တွေထဲမှာတော့ 6 – 8လက်မ ( 15 – 20 cm ) အထိပဲကြီးထွားနိုင်ကြပါတယ်။

* ကန်အရွယ်အစား = S**t ငါးတွေဟာ လွတ်လပ်စွာရေကူးရတာကိုကြိုက်နှစ်သက်ကြပါတယ် ။ ဒါအပြင်သူတို့ရဲ့ ကြီးမားတဲ့အရွယ်အစားနဲ့ အုပ်စုဖွဲ့နေထိုင်မှုစရိုက်ကြောင့် အရွယ်အစားငယ်တုန်းအရွယ်မှာမွေးမယ်ဆိုရင်တောင် အနည်းဆုံး 50 gal ဆန့်တဲ့ ကန်‌ေတွနဲ့‌ေမွးမြူသင့်ပါတယ် ။ အရွယ်ရောက် ငါးတစ်အုပ်အတွက်ဆိုရင် 125 gal ဆန့်တဲ့ကန်တွေမှသာအဆင်ပြေပါမယ်။

* သက်တမ်း = သဘာဝသက်တမ်းက အနှစ်20 ကျော် အထိနေနိုင်တဲ့အတွက် ၊ ကောင်းမွန်သောအစာရေအနေအထားနဲ့ မှန်ကန်စွာစောင့်ရှောက်ပေးနိုင်ပါက သက်တမ်းစေ့နေထိုင်နိုင်မှာပဲဖြစ်ပါတယ်။

* အစားအစာ = S**t ငါးရဲ့သိပ္ပံနာမည်က S**tophagus ဖြစ်ပါတယ် ။ အဓိပ္ပာယ်ကတော့ ” Offal-Eater” or ” Excrement- Eater ” ( အသေကောင်စားငါး ဒါမှမဟုတ် အညစ်အကြေးစားငါး ) ပဲဖြစ်ပါတယ် ။ ဒါပေမဲ့ ဒီလိုနာမည်သတ်မှတ်လိုက်‌ေပမဲ့ သူတို့တွေစားသုံးတဲ့အရာက အသေကောင်/အညစ်အကြေးတွေထဲမှာရှင်သန်တဲ့ သက်ရှိအကောင်များကိုစားသုံးခြင်းလား ၊ ဒါမှမဟုတ် ထိုအညစ်အကြေးများကိုပဲ‌တကယ်စားသံုးတာလား ဆိုတာအတိအကျမသိပါဘူး ။ ဒါပေမဲ့ ထိုမည်သည့်အရာကိုပဲစားစား အလှမွေးငါးကန်ထဲမွေးမြူပါက ကောင်းမွန်သောအစာအဟာရတွေနဲ့မွေးမြူနိုင်ပါတယ်။ သဘာဝထဲမှာဆိုရင် သူတို့ရှေ့မှာပေါ်လာသမျှ ငါး ၊ ပုဇွန် ၊ ‌တီကောင် ၊ နဲ့ အခြားအင်းဆက်များ ၊ ရေအောက်အပင်များ စသဖြင့် အစားစုံ ကောင်းစွာစားနိုင်ကြပါတယ်။ ဒါကြောင့် မိမိကန်ထဲရောက်လာတဲ့အခါမှာလဲ ငါးအသေးများ ၊ တီကောင် ၊ ရေတီ ၊ ပုဇွန် နဲ့ ‌ပဲစိမ်းတီး ၊ အရွက်များ ၊ အစာခြောက်ကျင့်နိုင်ပါကအစာခြောက်များပါ ကျွေးနိုင်ပါတယ်။

*ကျွေးရန်သင့်တော်သော အစာတံဆိပ် = အစာခြောက်များထက် အစာစို ပုဇွန် ငါး ရေတီများကို‌ေကာင်းစွာနှစ်သက်ပါတယ်

* အုပ်စုဖွဲ့နေထိုင်မှုရှိမရှိ = S**t တွေရဲ့ အမူအကျင့်က အုပ်စုလိုက်အမဲလိုက်တာဖြစ်တဲ့အတွက် ငါးတစ်အုပ်မှာအနည်းဆုံး ၄ ကောင်ခန့်မှစမွေးမြူ‌ေပးရပါမယ်။

* တွဲဖက်မွေးနိုင်သောငါးအမျိုးအစား = S**t ငါးတွေဟာ အရွယ်ရောက်ပြီးချိန်မှာ ရေငန် သို့မဟုတ် ရေချိုရေငန်စပ် သောရေမျိုးများမှာသာရှင်သန်နိုင်ကြပါတယ် ။ ဒါကြောင့် သူတို့ရဲ့ သဘာဝနဲ့ အနီးစပ်ဆုံးတူသော Mono Angel , Archer , puffer နဲ့အခြား‌ေသာ Brackish water နေနိုင်သောငါးမျိုးများကိုသာရွေးချယ်သင့်ပါတယ် ။ ထိုရွေးချယ်လိုက်သော tankmateများမှာ အရွယ်တူဆိုဒ်တူ များကိုသာရွေးချယ်သင့်ပါတယ်။ အရွယ်အလွန်ကွာခြားပါက တစ်ကောင်နဲ့တစ်ကောင်တိုက်ခိုက်ခြင်း ၊ စားပစ်ခြင်းများဖြစ်နိုင်ပါတယ်။

* ထိန်းသိမ်းဂရုစိုက်မှု = S**t ငါးတွေက အညစ်အကြေးအရမ်းထွက်ပါတယ်။ အကောင်အရွယ်အစားကြီးမားမှုအပြင် အထက်မှာပြောခဲ့သလို အခြားငါးများရဲ့အညစ် အကြေးတွေကိုပါ ဖွပစ်တဲ့အတွက် ကန်ရေညစ်ညမ်းမှုပိုမြန်လေပဲဖြစ်ပါတယ် ။ ဒါ‌ေကြာင့်‌ ကောင်းမွန်တဲ့ Filter System ကိုတပ်ဆင်ပေးပြီး ၊ အပတ်စဉ် 30 – 50% ရေလဲလှယ်ပေးရပါမယ်။ S**t တွေက Brackish or Saltwater နဲ့ မွေးမြူရတဲ့အတွက် ရေလဲပြီးတိုင်း ယခင်ရေရဲ့ salinity ppm အတိုင်းရအောင်ပြန်ချိန်ညှိပေးရပါမယ်။

* ကန်အပြင်အဆင် = S**t ငါးတွေရဲ့ သဘာဝက ဒ‌ီရေတောပင်များဖြစ်တဲ့ လမုပင်များကြား ၊ ကုန်းတွင်းအိုင်များ၊ မြစ်ဝများမှာရှင်သန်ကြပါတယ်။ ကန်ထဲမှာမွေးမြူတဲ့အခါ သစ်တွေးတုန်း ၊ သန္တာကျောက်များ ၊ ကျောက်တုံးများနဲ့အလှဆင်‌ေပးနိုင်ပြီး အောက်ခင်းကို သဲဒါမှမဟုတ် ကျောက်စရစ်ငယ်များခင်းထားနိုင်ပါတယ်။ အလင်းရောင်ကသာမန်အလင်းပေးယုံနဲ့တင်အဆင်ပြေပါတယ်။

* အထီးအမခွဲနိုင်ခြင်း = ယခုချိန်ထိ သိသာသောခွဲခြမ်းမှုများမပြုလုပ်နိုင်သေးပါဘူး။

* သားဖောက်ခြင်း = Captive Breeding လုပ်နိုင်တဲ့သူအနည်းငယ်သာရှိထားပေမဲ့ မည်ကဲ့သို့ လုပ်ဆောင်ရမည်ကိုမဖော်ပြထားပါဘူး ။ သူတို့ရဲ့သဘာဝက အထီးအမအများဟာ သားပေါက်ဥချချိန်မှာ ရေချိုမြစ်ဝများသို့လာရောက်ကြပါတယ် ။ ဥချပြီး ပါက မူလ ရေငန်ရှိရာသို့ပြန်သွားကြပါတယ်။ သားပေါက်လေးများဟာ သားလောင်းဘဝကနေ မဒန်းအရွယ်ထိ ရေချိုမှာပဲ ရှင်သန်နေထိုင်ကြပြီး အရွယ်ရောက်ချိန်မှသာ ရေချိုရေငန်စပ် သို့မဟုတ် ရေငန်ရှိရာသို့သွားကြပါတယ် ။

* အခြားအရောင်များ = အနီရောင် စကပ်ငါး ။

* အခြားမျိုးကွဲများ = Red S**t or Ruby S**t ဟုခေါ်သောအမျိုးအစားကို Sri Lanka , New Guinea နဲ့ Australia ဒေသတွေမှာတွေ့ရှိရပြီး ၊ ထိုမျိုးများဟာ Green Spotted S**t များထပ် ပို၍တန်ဖိုးကြီးမားပါတယ်။
* ဆောင်ရန်ရှောင်ရန် = S**t ငါးများဟာ မွေးမြူရအလွန်ခက်ပါတယ် ။ ဒါ‌့အပြင် သူတို့ရော ဆူးတောင်များဟာ အဆိပ်ပါဝင်ပါတယ် ။ အသက်အန္တရာယ် မပေးနိုင်ပေမဲ့ ထိုးမိပါက အဆိပ်ကြောင့်အချိန်‌ေတာ်ကြာယားယံနာကျင်ရနို်င်ပါတယ်( အမြန်သက်သာစေရန် ရေနွေးရေထဲမှာ ထိခိုက်မိသောနေရာကိုစိမ်ထားနိုင်ပါတယ် ) ။ ရေလဲပြီးတိုင်း မူလဆားငန်နှုန်းပြန်ရအောင် ပြုပြင်ပေးဖို့မမေ့သင့်ပါဘူး။

*မွေးမြူလျှင်လိုအပ်သောပစ္စည်းများ = အဓိကက ကန်အကျယ်အဝန်းကောင်းစွာရှိပြီး ၊ ရေအရည်အသွေးတိုင်းကိရိယာများ ၊ heater , filter system များ ၊ သစ်ဆွေးတုန်း ၊ ကျောက်တုံး ၊ အောက်ခံသဲများ ရှိရင်မွေးမြူနိုင်ပါပြီ ။ ရေအောက်အပင်များကတော့ စားပစ်နိုင်တဲ့အတွက် မစိုက်သင့်ပါဘူး။

#ကျူးကျော်မျိုးစိတ်ဖြစ်နိုင်ခြေရှိမရှိ = လက်ရှိချိန်ထိတော့ မူလရေမြေပြင်ပမှာ ရှင်သန်ကျက်စားနိုင်စွမ်းမတွေ့ရသေးပါဘူး။

#မှတ်ချက် ။ ။ အရိုင်းကိုဖမ်းဆီးပြီးရောင်းချတာဖြစ်တဲ့အတွက် အစာကျွေးရခက်မှု နဲ့ အထက်မှာပြောခဲ့တဲ့အတိုင်း မှန်ကန်ထဲမှာ သူတို့တွေရဲ့သဘာဝနဲ့အနီးစပ်ဆုံးတူအောင်ထားပေးနိုင်မှသာ အသက်ရှင်နိုင်ကြမှာဖြစ်တဲ့အတွက် Professional သမားများသာမွေးမြူသင့်ပါတယ်။
အကယ်၍ အသက်ငယ်ရွယ်ချိန်မှာ ဝယ်ယူမိပါက ရေချိုဖြင့်ကောင်းစွာ မွေးနိုင်ပြီး အရွယ်အစား တဖြေးဖြေးကြီးလာပါက ရေချိုရေငန်စပ်သော ရေအမျိုးအစားကို ဖြေးဖြေးချင်းကျင့်ပြီးပြောင်းပေးရပါမယ်။ အချို့ ကျွမ်းကျင်သောသူများက အမြဲရေချိုနဲ့ပဲ မွေးမြူတာကိုတွေ့ရှိရပေမဲ့ ၊ ရေချိုရေငန်စပ်ရေ ၊ ရေငန်‌ေရ အမျိုးအစားများကသာ သူတို့ကိုသက်တမ်းစေ့အောင်မွေးမြူနိုင်မှာဖြစ်ပါတယ်။

30/07/2024

Japan က ရေမြောင်းထဲမှာ မွေးထားတဲ့ KOI လေးတွေရှိတဲ့ နေရာ ၃ ခု

29/07/2024

Burmese Border Loach

Burmese Border Loach တွေက အလှမွေးငါးဈေးကွက်ထဲကို ရောက်ရှိလာတာသိပ်မကြာသေးပါဘူး ။ 2004 ခုနှစ်မှာ Kottelat ဆိုတဲ့ ပုဂ္ဂိုလ်ဟာ မြန်မာနဲ့ထိုင်းနယ်စပ်ကြားရှိ ဘုရားသုံးဆူကားလမ်းဘေးနားတစ်ဝိုက်က မြစ်ချောင်း တွေမှာစတင်တွေ့ရှိခဲ့ကြပါတယ်။

သူတို့ရဲ့အသွင်သဏ္ဌာန်က အခြားသော Loach များကဲ့သို့ ခန္ဓာကိုယ်ရှည်ရှည်လျားလျားရှိပြီး နှာခေါင်းထိပ်မှာ နှုတ်ခမ်းမွေး ၄စုံပါရှိပါတယ်။ ယခုချိန်မှာဆိုရင်တော့ သူတို့‌ေတွကို နာမည် အမျိုးမျိုးနဲ့ နိုင်ငံတကာ ဈေးကွက်ထဲမှာရရှိနိုင်‌ေနပြီဖြစ်ပါတယ် ။ အများဆုံးခေါ်ကြတာကတော့ Burmese Border Loach , Botia Kubotai , Marble Loach , Cloud Botia , Polka Dot Boris , Botia ” Angelicus ” နဲ့ Angelicus Loach တွေပဲဖြစ်ကြပါတယ်။

ယခုကဲ့သို့ ကမ္ဘာအလှမွေးဈေးကွက်မှာနာမည်ရနေတဲ့ Burmese Loach လေးတွေကို ကိုယ်တိုင်ကလဲ တန်ဖိုးထားမွေးချင်တယ်ဆိုရင် အောက်မှာဖော်ပြပေးထားတဲ့ ယေဘူယျ ဂရုစိုက်နည်းလေးတွေကိုဖတ်ကြည့်ပေးပါဦး။

* မူလဇာတိ = ဒီ Burmese Border Loach တွေကို ထိုင်း — မြန်မာ နယ်စပ်လမ်းဖြစ်တဲ့ ဘုရားသုံးဆူ ကားလမ်းတစ်လျှောက်ရှိ မြစ်ချောင်းလေးတွေမှာ စတင်တွေ့ရှိခဲ့ကြပါတယ် ။ ဒါ့အပြင် သံလွင်မြစ် ၊ ဂျိုင်းမြစ် ၊ အတ္တရံ အစရှိတဲ့ မြစ်များရဲ့ ရေတိမ်ပိုင်းတွေမှာလဲတွေ့ရှိရပါတယ် ။

*ရေအမျိုးအစား = အောက်စီဂျင်ပြည့်ဝစွာပါသော အက်စစ်ဆန်တဲ့ ရေချိုအမျိုးအစားနဲ့ water hardness 2-8 dGh အတွင်း‌မှာ မွေးမြူပေးရပါမယ်။

* အပူချိန် / ph = သူတို့ရဲ့သဘာဝထဲမှာ နေထိုင်ကြတဲ့အတိုင်း အပူချိန်ကို 24 – 28° C ( 75 – 82 °F ) နဲ့ pH 6 – 7 ကြားမှာထား၍မွေးမြူပေးရပါမယ်။

* အကြီးဆုံးရောက်နိုင်သောအရွယ်အစား =သူတို့တွေရဲ့အရွယ်အစားက သဘာဝမှာဆိုရင် 3.35 လက်မ ( 8.5 cm ) လောက်ထိပဲကြီးထွားနိုင်ပြီး ၊ ငါးမွေးမှန်ကန်အတွင်းမှာတော့ 4 – 5 လက်မ ( 10 – 12 cm ) အထိ ကြီးထွားနိုင်ကြပါတယ် ။

* ကန်အရွယ်အစား = သူတို့တွေဟာ အုပ်စုဖွဲ့နေရတာကြိုက်ပြီး ‌လွတ်လွတ်လပ်လပ် သွားလာရတာကိုနှစ်သက်ပါတယ် ။ ဒါကြောင့် မွေးမြူမယ်ဆိုရင် 30 ဂါလန် အနည်းဆုံးထားပြီးမွေး‌ပေးရပါမယ် ။ ကန်အရွယ်အစားသေးငယ်ပါက အခြားငါးများရဲ့ဒဏ်ကြောင့် stress ဝင်ပြီး ရောဂါဖြစ်လွယ်နိုင်ပါတယ်။

* သက်တမ်း = သဘာဝသက်တမ်းကတော့ 8 – 12 နှစ် အထိ နေရှင်သန်နိုင်တဲ့အတွက် ကောင်းမွန်တဲ့ အစာအာဟာရနဲ့ ပတ်ဝန်းကိုဖန်တီးပေးနိုင်ပါက သက်တမ်းစေ့‌ေနနိုင်ပါတယ်။

* အမူအကျင့် = သူတို့ရဲ့သဘာဝက အလင်းရောင်ကို အရမ်းမကြိုက်ကြပါဘူး ။ မြစ် / ချောင်း များရဲ့အောက်ခြေမှာရှင်သန်ကြပြီး ကြမ်းပြင်ပေါ်ရှိ သဲများ ၊ ကျောက်စရစ်ကျောက်မှုန်များကို ထိုးဖွပြီး အစာရှာစားလေ့ရှိပါတယ်။
သူတို့လေးတွေဟာ ကျောက်ကြိုကျောက်ကြား ၊ သစ်တွေးတုန်းကြား ၊ သစ်ရွက်‌ေဆွးကြားတွေထဲမှာ ပုန်းခိုရတာကိုနှစ်သက်ပါတယ်။ ဒါကြောင့် မှန်ကန်အတွင်းမွေးမြူပါက နေ့ဖက်အလင်းရောင်ရှိတဲ့အချိန်မှာ တော်ယံုသိပ်မမြင်ရပါဘဲ ၊ ညဖက်သို့မဟုတ် အလင်းရောင်နဲတဲ့ အချိန်တွေမှာသာ ပုန်းရာကနေထွက်လာပြီးအစာရှာတတ်ကြပါတယ်။ သူတို့တွေက သူတို့မကြိုက်တဲ့ ကန်အနေအထားနဲ့ ၊ ရေအခြေအနေမှာဆိုရင် ကန်အပြင်သို့ခုန်ထွက်ပြေးနိုင်တာကိုလဲသတိထားစောင့်ကြည့်ရပါမယ်။ ( ကျွန်တော် ငယ်ငယ်တုန်းကတော့ ( 2008 ခုနှစ်ဟုထင်ရ ) သူတို့တွေကို ရေကြွက်ဆိုပြီး ကျောင်းရှေ့မှာလာရောင်းတာကိုဝယ်မွေးဖူးပါတယ်။ အဲ့အချိန်တုန်းက ကလေးအရွယ်ဆိုတော့ ၂ပေ ၁ပေ လောက်ကန်ထဲမှာ ရွှေငါးတွေရော ၊ ဆိုတေး၊ဒေါင်း အကုန်ရောထည့်ပြီးမွေးထားတော့ ဒီကောင်လေးတွေဝယ်ပြီးသိပ်မကြာဘူး ၂ ကောင်လုံးနောက်နေ့မနက်ရောက်တော့အစအနရှာမရ ပျောက်သွားဖူးတယ် 😅 )

* အစားအစာ = သူတို့တေွဟာ သဘာဝထဲမှာဆိုရင် အမဲလိုက်ကျက်စားကြတဲ့ငါးအမျိုးအစားဖြစ်ပါတယ်။ ငါးသားပေါက်ငယ် ၊ ရေတီ ၊ ပိုးမွှားငယ်များနဲ့ ကျောရိုးမဲ့‌သက်ရှိအကောင်ငယ်များကိုစားသုံးကြပါတယ်။ ဒါပေမဲ့ အလှမွေးကန်ထဲရောက်တဲ့အခါမှာတော့ အစာခြောက် ၊ အစာစို ၊ အေးခဲစာ စသဖြင့်ကျွေးလို့ရပါတယ်။ ဒါပေမဲ့ သူတို့က ရေအောက်ကြမ်းပြင်ကျက်စားတဲ့ငါးဖြစ်တဲ့အတွက် ကန်အောက်ခြေထိကျတဲ့ ( sinking type ) အစာကို ရွေးချယ်ပေးရပါမယ်။

*ကျွေးရန်သင့်တော်သော အစာတံဆိပ် = protein 35% ထက်မနည်းသော အစာတံဆိပ်ကောင်းများကိုရွေးချယ်ပေးရပါမယ်။

* အုပ်စုဖွဲ့နေထိုင်မှုရှိမရှိ = သူတို့တွေက အုပ်စုဖွဲ့ နေထိုင်နိုင်ကြပါတယ် ။ ကန်အသစ်ထဲ စတင်မွေးမြူပါက အကောင်များများမွေးမြူနိုင်ရင် ကန်နဲ့နေသားကျမှု ပိုပြီးမြန်စေပါတယ်။ ဒါကြောင့် ကန်တစ်ကန်ထဲမှာ အနည်းဆု‌ံး 6 – 8 ကောင်အထိထားပေးရပါမယ်။

* တွဲဖက်မွေးနိုင်သောငါးအမျိုးအစား = သူတို့တွေဟာ အခြား‌သော ရန်လိုမှုနည်းပြီး အကောင်အရွယ်အစားသေးငယ်သောငါးတော်တော်များများနဲ့ တွဲဖက်မွေးမြူနိုင်ပါတယ် ။ E.g neon tetra , zebra danio, tiger Barb , etc..
အပင်ကန်သမားများအတွက် ဒီကောင်လေးတွေကအားကိုးရတဲ့အချက်တစ်ချက်ရှိပါတယ်။ သူတို့တွေက အပင်နဲ့ကပ်ပါလာသော ခရုများကို စားသောက်ရှင်းလင်းပေးပါတယ် ၊ ဒါပေမဲ့ အားနည်းချက်က ကန်ထဲရှိသမျှ ခရုအမျိုးအစား‌ေတာ်‌ေတာ်များများနဲ့ ပုဇွန်‌ငယ်တွေကိုပါ စားပစ်နိုင်တဲ့အတွက် ဒီငါးတွေထည့်မယ်ဆို အကျိုးရှိတဲ့ အသုံးဝင်တဲ့ ခရု/ပုဇွန်တွေကိုအရင်ဆုံးဖယ်ထားဖို့လိုပါတယ်။
သူတို့တွေဟာ တော်များများနှင့်တွဲဖက်မွေးမြူနိုင်တယ်ဆိုပေမဲ့ ကန်နေရာကျဉ်းခြင်း ၊ ပုန်းခိုရန်‌ေနရာနဲခြင်း စသည့်အခြေအနေတွေမှာဆိုရင် အခြားငါးများကိုရန်လိုတတ်ပါတယ် ၊ တွေ့သမျှငါးတွေဘေးမှာ ဝေ့ဝိုက်ပြီး ( Spiraling Dance ) ရန်လိုတဲ့အနေအထားနဲ့ တွေ့ရှိပြီဆိုပါက မွေးမြူသူအနေနဲ့ ကန်ကိုဘာတွေပြုပြင်ဖို့လိုလဲဆိုတာ ဂရုစိုက်ပေးရပါမယ်။

* ထိန်းသိမ်းဂရုစိုက်မှု = သူတို့တွေရဲ့ သဘာဝက ရေတိမ်ပြီး oxygen ပြည့်ဝနေတဲ့ နေရာကနေ လာတာဖြစ်တဲ့အတွက် ငါးမွေးကန်ထဲမှာလဲ သဘာဝအတိုင်း oxygen အမြဲ ပြည့်ဝအောင်ထားပေးရပါမယ်။ ဒါကြောင့် ငါးကန်ရေအရည်အသွေးကိုလျော့ကျစေတဲ့ ammonia အဆိပ်ဓာတ်လျော့နည်းအောင် တစ်ပါတ်တစ်ခါ 30% – 50% အထိ အပတ်တိုင်းရေလဲပေးရပါမယ်။

* ကန်အပြင်အဆင် = သဘာဝနဲ့အနီးစပ်ဆုံးတူအောင်ဖန်တီးပေးရပါမယ်။ ရေစီးဆင်းမှုရှိစေရန် power head ဒါမှမဟုတ် wave maker တပ်ဆင်ပေးပြီး ၊ ကန်အောက်ခြေမှာ သူတို့တူးဆွနိုင်ရန်ချွန်ထက်မှုမရှိသော ကျောက်စရစ်တုံး ၊ ‌ချောင်းသဲ ဒါမှမဟုတ် ကျောက်စရစ်မှုန်များခင်းပေးခြင်း ၊ ပုန်းခိုနိုင်ရန်အတွက် ကျောက်တုံးကျောက်ဆောင် ၊ သစ်ဆေွးတုန်းများ ၊ သစ်ရွက်ဆွေးအနည်းငယ် ထည့်ပေးခြင်း ၊ ရေဂမုန်းကဲ့သို့အရွက်ကြီးမျိုးအပင်စိုက်ခြင်း ၊ ရေပေါ်ပင်များ ဖြစ်သော ရေနှင်းဆီ ၊ ဘဲစာမှော် စသည်တို့ဖြင့်ပြင်ဆင်ပေးရပါမယ်။ မီးထွန်းမည်ဆိုပါက စူးဝါးစွာမထွန်းဘဲ ခပ်မှိန်မှိန်‌ေလးသာထွန်း‌ေပးရပါမယ်။

* အထီးအမခွဲနိုင်ခြင်း = အမတွေရဲ့ခန္ဓာကိုယ်ဟာ အထီးတွေထက် သိသိသာသာပိုပြည့်လုံးပါတယ်။ အမတွေရဲ့ နှာတံ( နှာမောင်းပုံစံပါးစပ်ပေါက် ) ဟာ လံုးဝန်းတဲ့ပံုစံရှိပြီး အထီးတွေက အနဲငယ်ပို၍ရှည်လျားတဲ့ နှာတံရှိပါတယ်။

* သားဖောက်ခြင်း = ခုချိန်ထိတော့ home breed လုပ်နိုင်တဲ့မှတ်တမ်းမတွေ့ရသေးပါဘူး ။

* အခြားအရောင်များ = သူတို့တွေဟာ အသက်အရွယ်ပေါ်မူတည်ပြီး color pattern တွေပြောင်းလဲနိုင်ပါတယ်။
အရွယ်ရောက် ပြီးသား ငါးရဲ့အရောင်မှာ အောက်ခံ‌ေရွှအိုရောင်ခန္ဓာကိုယ်‌ေပါ်မှာ အနက်ရောင် ဒေါင်လိုက်ဘားစင်းတွေ တည်ရှိနေတတ်ပါတယ် ။ အချို့အရွယ်အစားများမှာ ထိုအနက်ရောင်ဘားစင်းများကြားတွင်းမှာ‌ေရွှအိုရောင်အကွက်များ ၊ အစက်အပြောက်များလဲပါရှိနေပါတယ်။

* အခြားမျိုးကွဲများ = သူတို့တွေရဲ့ မျိုးစိတ်ပိုင်းဆိုင်ရာအချက်အလက်များကို အကျယ်တပြန့်သေချာလေ့လာထားတဲ့ စာစောင်တွေမရှိတဲ့အတွက် မသိရှိရသေးပါဘူး။

* ဆောင်ရန်ရှောင်ရန် = သူတို့တွေဟာ ရေအပူချိန်နဲ့ph ရုတ်တရတ်ပြောင်းလဲမှုဒဏ်ကိုမခံနိုင်ပါဘူး ၊ ကန်ကျဉ်းကျဉ်းလေးထဲမှာအခြားငါးများနှင့်‌ေရာ‌ေမွးပါက ကန်အပြင်သို့ခုန်ထွက်ပြီးသေဆုံးနိုင်ပါတယ်။

*မွေးမြူလျှင်လိုအပ်သောပစ္စည်းများ = အောက်ခံ သဲသို့မဟုတ် ကျောက်စရစ်များ ၊ heater ၊ သစ်ဆွေးတုန်း ၊ အရွက်ကြီးပင်များ၊ wave maker ၊ airpumpနဲ့ filter system‌ေကာင်း‌ေကာင်းလိုအပ်ပါတယ်။

#ကျူးကျော်မျိုးစိတ်ဖြစ်နိုင်ခြေရှိမရှိ = ယခုအချိန်ထိတော့ Burmese Border Loach တွေနဲ့ပက်သတ်ပြီး ပတ်ဝန်းကျင်ထိခိုက်မှုများမှတ်တမ်းမတွေ့ရှိရသေးပါဘူး။

#မှတ်ချက် ။ ။ ထိန်းသိမ်းမှုက အရမ်းမခက်ခဲပါဘူး ၊ အစာသေချာကျွေးတတ်ပြီး ၊ ရေကိုကောင်းကောင်းပြုပြင်ပေးပါက beginners တွေနဲ့ intermediate သမားများအတွက် အဆင်ပြေပါတယ်။