Taga Mactan ug Sixto Distrito

03/03/2023

05/11/2022

30/09/2022

Septembre 30, 2022

DEGAMO DAUG SA PROTESTA BALIK PAGKA GOBERNADOR

(Kining balita hatud kaninyo ni EM BENTILLO LIGAN)

Balik sa pagka Gobernador sa Negros Oriental si Roel Degamo nga kaliwat og Cordovanhons human midaug sa protesta batuk sa kasamtangan nga naglingkod nga gideklarar nga mananaug sa niaging Mayo 9, 2022 nga eleksyon nga si Pryde Henry Teves.

Ang COMELEC en banc mipagawas na sa ilang desisyon nga nagdeklarar nga nuisance candidate nga susama og pangalan sa Gobernador nga si Ruel Degamo ug mipagawas na sa Writ of Ex*****on.

Gibaliwala sa COMELEC ang proclamation ni Teves tungod kay nalabwan ang boto niini ni Degamo human gipuno ang boto sa nuisance candidate nga kapin sa 49,000 diin si Degamo dunay boto nga 277, 462 samtang kang Teves 296, 897.

Ikaduha na kining kandidato sa pagka Gobernador nga nidaug sa eleksyon niadtong Mayo apan napilde sa protesta diin ang una bag-o lang gipagawas ang desisyon sa COMELEC mao ang kasamtangang Gobernador sa Lalawigan sa Albay nga si Noel Rosal.

Si Konsehal Joseph Armogila sa Siyudad sa Legazpi diin si Rosal mao ang kanhi Mayor ang nisang-at og protesta .

Nisang-at og Disqualification Case si Armogila tungod sa giingong pagpanghatag og hinabang salapi ni Rosal ngadto sa tricycle drivers ug Senior Citizens sa ilang siyudad sud sa campaign period. (CAL)

29/09/2022

Septembre 29, 2022

SENADO MI-RATIFY SA BICAM REPORT PAG-USWAG SA BRGY ug SK ELEKSYON

(News update sponsors: Ador Aytona, Em Bentillo Ligan and Mario-Allene Orino)

Hingpit nang ipauswag sa mga Senador ug mga Kongresista ang eleksyon sa Barangay ug Sangguniang Kabataan.

Gikompirmar na sa Senado ang report sa Bicameral Conference Committee nga naglangkob sa mga Senador ug mga Kongresista ang nauyonan nga version may labot sa pag-uswag sa eleksyon sa Barangay ug SK.

Ang Bicameral Committee maoy gitahasan sa pagtakdo sa lain-laing version sa.mga balaudnon nga giduso sa mga Senador ug Kongresista.

Si Senador Joseph Victor Ejercito nga maoy mibasa sa report sa BICAM mibutyag nga ang nauyonan nga version mao ang pag-uswag sa eleksyon sa katapusang Lunes sa Oktubre sunod tuig imbes Disiyembre 2023.

Garbo pa kaayo si Ejercito nga maoy mihatag sa Committee Report tungod kay matud niya nga mao kini ang ilang panaad ug pasalig sa katawhan nga mopasar og balaudnon nga alang sa kaayohan sa katawhan.

“This humble representation is honored to present this conference committee report which was the result of thorough deliberation and commitment to our constituents to pass a law that would promote the welfare of our barangays.” nagkanaypn si Senador Ejercito

Tulo lang ka mga Senador ang nisupak sa pag-uswag sa BSKE nga.mao sila si Senate Minority leader Aquilino Pimentel III, Senador Risa Hontiveros ug Senador Pia Cayetano.

Ang pagsupak sa tulo ka.mga senador tungod kay wala silay nakitang lig-ong rason pag-uswag sa Barangay ug SK elections sanglit andam na ang COMELEC alang niini.

Kun pirmahan ni Presidente Ferdinand "Bongbong" Marcos Jr. ang balaudnon, hingpit nang dili mahinayon ang eleksyon sa Barangay ug SK nga gikatakda karung umaabot Disiyembre 5, 2022 diin una unta kining gutakda niadtong Mayo 2020. (CAL)

26/09/2022

16/08/2022

Agusto 16, 2022

PAG-USWAG SA BRGY. UG SK ELEKSYON GIAPROBAHAN SA COMMITTEE LEVEL SA KONGRESO

(Kining balita hatud nila ni ADOR AYTONA, Maam ELAINE B. MEAD ug SWEET)
Aprobado sa House Committee on Suffrage and Electoral Reforms sa boto 12-2 ang tinguha pag-uswag sa eleksyon sa mga opisyal sa Barangay ug Sangguniang Kabataan (SK).

Gikan sa Disiyembre 5, 2022, ipauswag kining sa unang Lunes sunod tuig kun sa Disiyembre , 2023.

Apil sa giuyonan sa Komitiba mao ang pagwagtang sa balaud alang sa gijatakda nga eleksyon karung umaabot Disiyembre, 2022 ug magpabilin ang naglingkod karun nga mga opisyal sa Barangay ug SK hangtud nga dunay ikapuli nila sa 2023.

Human sa Committee level, iduso na kini sa plenary sa Ubos Bay Balauranan arun paaprobahan sa mayoriya sa mga Kongresista.

Hinuon, lahi usab ang version ni Senadora Imee Marcos kay ipauswag kini sa Mayo sunod tuig.

Sama sa Ubos Bay Balauranan, kinahanglan aprobahan sa Senate Committee on Suffrage and Electoral Reforms ang balaudnon ni Sen. Marcos.

Ang duha ka versions sa balaudnon iduso sa Bicameral Committee arun usahon ug pilian unsa nga version ang ipatunan o dunay laing rekomendasyon ang komitiba diin kinahanglang aprobahan ug pirmahan sa House Speaker ug sa Senate President. (CAL)

12/07/2022

Hulyo 12, 2022

NATS SITOY WAY GIKUPTANG KOMITIBA SA SB SA CORDOVA

Taliwala sa gitanyag nga pagkig-uliay ug pagkihiusa sa mga Cordovanhon ni Cordova Mayor Cesar "Didoy" Suan, ang bugtong opposition nga nakasud sa Sangguniang Bayan (SB) kun sa Konseho nga si Konsehal Natileigh "Nats" Sitoy wala hatagi og Chairmanship sa lain-laing komitiba.

Siya hinuon ang gihimong vice-chairperson sa Committee on Women, Family Welfare, PWD, Gender and Development nga gipangulohan ni Konsehal Lemuel Pogoy ug membro sa tanang komitiba.

Si Pogoy maoy pinakadaghang komitiba nga gihuptan nga moabot og unom ug siya usab ang Majority Leader sa Konseho.

Gawas sa Committe on Women, Family Welfare, PWD, Gender and Development, si Pogoy usab ang nangulo sa mosunod nga mga komitiba: Finance, Budget, and Appropriations; Environmental Protection and Natural Resources; Public Utilities, Communications, and Transportation; LGU Economic Enterprises, Markets, and Slaughterhouse; ug Disaster Risk Reduction Preparedness and Management.

Tagtulo ka mga komitiba usab ang gipangulohan sa duha ka bag-ong mga konsehal nga sila si Konsehal Remar Baguio ug Chito Bentazal ug ni Konsehal Jose Wahing.
Mga komitiba nga gihuptan ni Baguio naglakip sa Education; Employment, Skills Training and Labor Management; ug ang Good Government, Public Ethics, Achievements, Recognitions, and Accountability.

Si Bentazal ang nangulo sa mga komitiba sa Agriculture and Fisheries; Tourism, Culture, Heritage, Arts, Recreation, and Talents samtang si Wahing sa mga komitiba sa Peace and Order, Public Safety; Health and Sanitation; ug Housing and Land Utilization.
Ang bag-o ug labing bata nga sakop sa Konseho nga si Konsehal Dason Larenz Lagon maoy naghupot sa komitiba sa Infrastructure ug sa Games and Amusements.
Usa lang ka komitiba ang gihuptan sa third-termer nga si Konsehal Teodorico "Dodong" Casquejo Jr. nga mao ang Trade, Commerce and Industry, and Micro-Business Economic Enterprises.

Ingon man tagsa lang usab ang komitima nga gidala nila ni Konsehal Jerome Lepiten nga maoy nangulo sa Committee on Ordinances, Codification, Rules and Legal Matters, ang Presidente sa Association of Barangay Councils nga si Cogon Barangay Chairman Francisco "Ike" Ando Jr. nga naghupot sa Committee on Barangay Affairs ug si Sangguniang Kabataan Federation Chairperson Daniesse Karen Sumagang, Chairperson sa Committee on Youth and Sports Development. Ang komitiba nga gihuptan nila ni Ando ug Sumagang gitagana na kini nila basi sa gilatid sa balaud.

Si Bise-Mayor Victor "Boyet" Tago III, Presiding Officer sa Konseho maoy naghupot sa Oversight Committee.

Gipasalig ni Konsehal Sitoy nga madungog gihapon iyang tingog bisan og wala siyay gihuptan nga chairmaship sa komitiba sa Konseho.

Matud ni Sitoy nga membro siya sa tanang komitiba ug madungog gihapon ang tingog sa katawhan pinaagi kaniya diha sa Konseho.

Ang pamahayag ni Konsehal Sitoy iyang giluwatan pinaagi sa iyang facebook account.

Gibutyag sa Konsehala nga nag positibo siya sa Covid-19 ug nag-isolate sa ilang balay.

Hinuon, arang-arang na ang iyang pamati sa lawas ug dili angay mabalaka ang Cordovanhons kaniya.

Nagpasalamat si Konsehal Sitoy sa mga tawo nga mipaabot sa ilang pagpakabana kaniya kalabot sa iyang sitwasyon sa Konseho. (iTVNews Cebu)

13/01/2022

15/12/2021

Dec. 15, 2021

BAKAK ANG PASANGIL SA MAYOR NGA GIBABAGAN ANG SKYWAY

Dakong bakak ang pasangil ni Lapulapu City Mayor Junard Ahong Chan nga gibabagan sa mayoriya sa Konseho ang gisugyot nga Lapulapu Expressway (LLEX) project.

Kini ang gipadayag sa mga konsehal nga sakop sa mayoriya atol sa ilang gipatawag nga Press Conference human gipadayag sa mayor nga iyang ibutang sa billboards ang pangalan sa nibabag sa proyekto.

Sila si Konsehal Junrey Gestopa ug Konsehal Flaviano "Bobbit" Hiyas miklaro nga wala gayud sila plano sa pagbabag sa proyekto apan nakurat nalamg sila nga kalit ipapasar ni Konsehal Nelson Yap ang resolution nga maghatag og katungod sa mayor pagpirma sa Joint Venture Agreement kun kasabutan tali sa mga kompaniya nga mougma sa proyekto pinaagi ss Private-Public Partnership kun PPP atol sa ilang Special Session niadtong Martes bisan nagpadayon pa ang ilang pagtuki sa nalatid sa kasabutan.

Matud sa mga sakop sa Mayoriya nga klaru kaayo nga gituyo pagpugos pagpapasar ang resolution arun dunay ipasangil ang mayor nga gibabagan sa mga konsehal.

Si Konsehal Michael Dignos nga daghan pa unta siya og mga pangutana kalabot sa kontrata apan gusto sa kampo sa mayor nga uyonan gilayon kini bisan og dakong posibilidad nga alkanse ang siyudad.

Matud ni Dignos nga basi sa kontrata, way bayranan sa mga buhis ang mga kompaniya nga mougmad ug mopadagan sa LLEX skyway project sud sa 50 ka tuig samtang 1% lang bahin sa siyudad.

Banabana nga mokita ang pribadong kompaniya og P381.8 bilyones sud sa 50 ka tuig samtang ang kinatibuk-ang makita sa Siyudad P3.8 bilyones diin mo-average og P76 milyones matag tuig.

Apan matud ni Dignos nga angay kwentahon kun dili ba mosobra hinuon sa P3.8 bilyones ang libreng buhis nga itanyag sa siyudad sud sa 50 ka tuig diin apil sa libre ang business taxes, realty taxes ug uban pang mga boluhisan.

Dugang usab ni Konsehal Hiyas nga iapil usab pagkwenta ang paggamit sa pribadong kompaniya ang kapin sa 5 ka kilometro nga Aviation Road nga gipanag-iya sa siyudad diin gibana-bana nga mobalor kini og dul-an sa P 2 bilyones.

Gawas niini, matud ni Hiyas nga way konsultasyon nga gihimo sa mga molopyp ug lain-laing sektor nga maapektohan sa pagsira sa Aviation Road nga gamiton sa LLEX.

Labing minus lima ka mga barangay ang maapektohan sa pagsira sa Aviation Road ug way gipakita ang pribadong kompaniya og laing agi-anan.

Lakip niini, ang Basak, Pajac, Bangkal, Buaya, Ibo ug uban pa.

Laing gikabalak-an sa mga konsehal nga sakop sa Mayoriya mao multa nga moabot og P1 bilyones kun mapakyas ang siyudad sa ilang obligasyon ss proyekto.

Lakip niini,.mao ang pagkuha Road Right of Way nga maagian sa proyekto diin daghang pribadong yuta ang maigo nga naglakip sa Cebu Light Industrial Park sa Barangay Basak.

Maoy sugyot sa Mayoriya nga patas-an gikan sa uno porsento ngadto sa 2 o 3 porsento ang bahin sa siyudad sa kita sa toll fee sa LLEX.

Gitinguha usab nila nga minusan gikan sa 50 ka tuig ngadto nalang sa 35 ka tuig ang kontrata sama sa susamang proyekto nga gipatuman sa CCLEX ug sa kaulohan nga mas mubo ang tuig ug taas ang bahin sa lokal nga Kagamhanan.

Gipadayag usab sa Mayoriya nga dili angay ipasangil sa mayor kaniya ang masinati unya nga kahuot sa dagan sa trapiko kun magsugod na ang Cebu-Cordova 3rd bridge tungod kay masinati gyud kini bisan aprobahan ang LLEX sanglit humanon sud sa tulo ngadto sa upat ka tuig ang proyekto.

Matud sa.mga sakop sa Mayoriya, dili unta taas ang panahon nga antuson sa Oponganon ang kahuot sa dagan sa trapiko kun gisayo niini pagduso ang gisugyot nga skyway. (CAL)

28/11/2021

TAN-AWA: Dili ikalimud nga magdasok ang mga kustomer nga mangaon sa bag-ong kan-anan sa lungsod sa Cordova, ang BRIC Food Park sa Barangay San Miguel nga duol sa bugtong mall sa lungsod.

Apan nisamot kadaghan ang mga kustomer sa BRIC Food Park tungod sa mga kalingawan matag gabii nga makapukaw sa atensiyon sa mga mangaon ug mag-inum.

Usa sa giatngan sa mga kustomer nga dili lamang taga Cordova apan apil ang gikan sa mga silingang Siyudad ug Kalungsuran sa Metro Cebu mao ang banda ni Martin Andales, igsuon ni Vilma Andales, kanhi TV host sa gisirad-an nga ABS-CBN Central Visayas.

Sagad ilang kanta mga mellow, slow-rock, folk songs ug Tagalog hits gikan sa dekada 1970's, 80's ug 90's.

Bahaan sab sa mga song requests ang banda ni Andales diin sukipan pa og tips sa mga kustomer.

Daghan usab ang mo-request og kanta sa iyang social media.

Kauban ni Andales sa banda,
ang bass guitarist nga si Danny Orgillo ug ang drummer nga si Patrick Lim nga mogamit sa electronic drum.| VIA CAL