30/08/2024
Paghirot intawon kita, yana kay tag uran E drain perme it mga naka stock na tubig ha gilid han panimalay ngan maglurulimpyo kta..buruglig kta iglakip nala it iyo khirani libong, ky it mga lamok waray pinipili pagbisita, para ini hit safety naton ngatanan labi na pra ha aton mga anak na prone hit dingue..
Keep safe everyone 💕
DENGUE UPDATE: 21 KATAWO NA AN NAMATAY TUNGOD HAN DENGUE HA REGION 8
21 na katawo an binawi-an hin kinabuhi ha Eastern Visayas yana nga tuig tungod han sakit nga dengue.
Ha gibabag-uhi nga report han DOH-Region 8 kakulop, Agosto 29, umabot na ha 9,577 an ka*o hin dengue ha Sinirangan Bisayas tikang han Enero tobtob Agosto 24, 2024. Ini in gulpi nga paghitaas han naigo hini nga sakit kun igtatanding ha parehas nga panahon han una nga tuig nga aada la ha 2,630.
Dida gihapon hini nga panahon yana nga tuig, 21 katawo na an namatay. Hitaas gihapon ini nga ihap kay han Enero tobtob Agosto 2023, an naawat an kinabuhi in 9 la katawo.
An probinsya han Leyte an may gidadamu-i nga nagka-dengue ha ihap nga 2,951, samtang an probinsya han Samar an gidadamu-i an namatay ha ihap nga 11 yana nga tuig.
Kasagaran han nasasakit han dengue in kalalakin-an nga nag-eedad hin usa ngadto ha napulo ka tuig.
An DOH in mahugot an pag-aghat ha publiko nga maglimpyo han ira kabablayan ngan libong, ngan limpyuhan an mga burutangan hin tubig, ngan magpakunsulta ha doktor kun may hitaas nga hiranat nga duha na ka adlaw. #