06/09/2024
सिरहामा मोटरसाइकल दुर्घटना: पछाडी सबार यूवकको मृत्यू, चालक र एक बालक घाइते
सिरहा । हुलाकी सडक अन्तर्गत सिरहाको औरही गाउँपालिका ४ मा भारतीय नम्बरको मोटरसाइकल दुर्घटना हुँदा पछाडी सबार यूवकको मृत्यू भएको छ ।
मृत्यू हुनेमा सिरहा नगरपालिका १८ का महिन्द्र यादवको १७ वर्षीय छोरा मनिष यादव छन् । उनी दुर्घटनामा परेको बीआर ३२एम ३०१२ नम्बरको मोटरसाइकलको पछाडीमा सबार थिए ।
मोटरसाइकल चालक सिरहा नगरपालिका १८ कै मिश्रिलाल यादवका २२ वर्षीय छोरा रविन्द्र यादव घाइते भएका छन् । उनको उपचार सिरहा प्रादेशिक अस्पतालमा भइरहेको छ ।
प्रहरीका अनुसार सिरहा बजारतर्फ गइरहेको उक्त मोटरसाइकलले साइकल चढेर घरतर्फ गइरहेका औरही गाउँपालिका ४ का ईन्दल ठाकुरका १० वर्षीय छोरा सुरज ठाकुरलाई ठक्कर दिएको थियो । त्यसपछि मोटरसाइकल सडकछेउको पिलरमा ठोक्कियो ।
पिलरमा ठोक्किएर मोटरसाइकल लडेपछि मनिष र रविन्द्र घाइते भएका थिए । मनिषलाई उपचारका लागि अस्पताल लग्दैगर्दा मृत्यू भएको बुझिएको छ ।
साइकलमा सवार बालक पनि घाइते भएका छन् । उनको दाहिने हात भाँचेको छ । प्रहरीका अनुसार बालकको उपचार पनि सिरहा प्रादेशिक अस्पतालमै भइरहेको छ ।
