'हरेक विषय महिला विषय र महिला विषय सबैको विषय' भन्ने मान्यतालाई स्थापित गर्दै लैंगिक समानता र सामाजिक न्याय प्रवर्धनको उद्देश्यसहित हरेक क्षेत्रका हरेक बहसमा सबैका विचारलाई बाहिर ल्याउने हाम्रो प्रयास नै समरेखा म्यागजिन हो ।
समाजमा पछाडि पारिएका समुदायको आवाजलाई प्राथमिकता दिँदै यस अभियानमा सिंगो समुदायलाई अभ्रि्रेरणा प्रदान गर्नु यसको लक्ष्य रहेको छ । महिला अधिकारको स्थापना, न्यायमा सहज पहुँच, न
िर्णय प्रक्रियामा समान सहभागिता, समान हैसियतको नागरिक र पहिचानसहित बाँच्न पाउने अधिकारका लागि नेपाली महिलाहरुले धेरै संघर्ष गर्दै आएका छन् । त्यस्तै इतिहासको विभिन्न कालखण्डदेखि आफूहरुले भोग्दै आएको भेदभाव, उँचनीचका पर्खाल भत्काउँदै समाजका अन्य उत्पीडित समुदायले पनि आ-आफ्नो तहबाट आवाज उठाएका छन् तर पनि ती आवाजहरु मूलप्रवाहीकरण हुन बाँकी नै छ ।
भनिन्छ, पत्रकारिता आवाजविहीनहरुको आवाज हो । तर आजको मिडियाको मूलस्वरुप हेर्दा यो आवाजविहीनहरुको सच्चा आवाज बन्न सकेको देखिँदैन । समाजमा पछाडि पारिएका समुदायको आवाजको समुचित प्रतिनिधित्व मिडियामा अझै हुन सकिरहेको छैन, जसका कारण समाजमा व्याप्त रुढीग्रस्त मूल्यमान्यता समयानुकूल परिवर्तन हुन सकेका छैनन् । राज्यसत्ता सञ्चालनका प्रक्रियामा ती तमाम उत्पीडितहरुको अर्थपूर्ण सहभागिता हुन सकिरहेको छैन । समाजमा व्याप्त रुढीग्रस्त मूल्यमान्यतामा परिवर्तन तथा लैंगिक समानता र सामाजिक न्याय स्थापनाको अभियानमा पत्रिकाको माध्यमबाट थोरै भएपनि योगदान पुर्याउन सकिए समरेखा प्रकाशनको सार्थकता हुनेछ । यहाँहरु सबैको रचनात्मक सल्लाह, सुझाव तथा सहयोगले समरेखाको यो अभियानलाई निरन्तरता प्रदान गर्न महत्वपूर्ण भूमिका खेल्नेछ ।
सम्पादक/प्रकाशक
लक्ष्मी आचार्य
कार्यालय
समरेखा द्वैमासिक
Samarekha Bio-Monthly
घोराही नगरपालिका- ११, घोराही, दाङ
email : [email protected]
website : samarekha.com.np
