05/06/2022
Ary fenon'ny Fanahy Masina ny Gasy rehetra
Eny, nilatsahany koa ary na ny mpangalatr'olona aza
(...)
05 jona 2022
Nidinan'ny Fanahy Masina Antananarivo
Sy ny faritra rehetra manodidina
Hitako, vao tamin'ny dimy maraina ny Fanahy dia efa nanidisidina,
Nanaitra ny tsirairay hifoha amin'ny torimasony
Izay mihitsy mantsy ny asany
Nidina tamin'ny olona rehetra : tsy mpino sy ny mpivavaka
Hamaha ny olan'ny fanahy tsy ankanavaka mba...
Hialany amin'ny fahazaran-dratsy
Andremanitra Izy, avy amin'Andremanitra;
Fahazavana manasitrana habokàna sy fahajambana
Tsy natao no sady tsy nateraka,
Tonga...
Hanohana sy hankahery (i)zay reraka,
Mazava miposaka toy ny masoandro
Hanafana ny finoana mandritry ny tontolo androm-..piainana
Mba tsy ho foana
Ray aman-dReny mpitari-dàlana Izy,
Masiaka rehefa mananatra,
Sarotiny rehefa manitsy
Tsy mitsitsy rehefa mikapoka
Ilay mpanafana amin'ny andro manintsy
Nitondra aispiraka amin'ny andro pentekôsta
Bevata Ndrianagnahary,
Ilay nidina tamin'ny apôstôly tao an-trano mangingina
Nampiteny amin'ny teny tsy fantatra ny olona tsirairay,
Ilay nampiteny amin'ny fitenim-paritra ny mponin'Ambohipo
Tao anaty andro iray...
Monja
Ilay nanao batisa jentily analin'isa
Dia Fanahin'ny fahamarinana,
Irak'i Jesoa
Koa ndao hitony, ndao hitsiky,
F(a) efa ato anatintsika ilay Fanahin'ny fahamasinana
Tafalatsaka ao am-po,
Tahaka ny poezia tsisy rima
(...)
Mibebaha mandrakariva f(a) efa ho avy ny Ray eh,
Koa ho Azy irery anie ny voninahitra
Hatramin'ny taloha indrindra ka ho mandrakizay !
Mandrakizay.
Fanahy, 05jona, LONOKY, Spoken word.