15/08/2021
Tontosa androany 15 aogositra 2021 ny fametrahana ny Governemanta vaovao teny amin'ny Lapam-panjakana Iavoloha. Araka ny efa nambara sy ny lamin’asa napetraka ary ny fifanarahana natao dia "contrat-programme-résultat" no fepetra mifehy ireto mpikambana vaovao mandrafitra ny Governemanta ireto. Izany hoe mitaky vokatra sy fanatanterahana ny hetahetam-bahoaka, ny fandraisan’andraikitra eo anivon’ny firenena.
Ny fananganana ity Governemanta vaovao ity dia natao laharam-pahamehana ny hisian’ny miralenta sy ny fifandanjan’ny isam-paritra. Araka izany dia misy solotenan'ny faritany enina ary mandray andraikitra ao avokoa ny zanaky ny faritra rehetra.
Niarahaba ireto mpikambana vaovao eo anivon'ny Governemanta ireto ny Filoham-pirenena Andry Rajoelina. Nohamafisiny tamin'izy ireo fa Governemantan'ny asa no napetraka. Izany hoe fomba fiasa mitaky vokatra, ary ny vahoaka Malagasy no hanara-maso ny asan'ny
tsirairay avy. "Miditra amin'ny tapany faharoa amin'ny fotoam-piasana nomen'ny vahoaka isika. Ary tonga amin'ny fotoana handehanana aingana kokoa amin'ny fanatanterahana ireo Velirano izay natao. Noho izany dia handrasana avy aminareo Minisitra ny fidinana ifotony, ny fihainoana sy ny famaliana ny hetahetam-bahoaka" hoy hatrany ny Filoha.
Mazava ny torimarika sy ny lalan-tsaina nomeny ireto Minisitra vaovao ireto hahatratrarana ny tanjona sy hanatanterahana ny asan'izy ireo: miasa aingana, miasa tsara ao anatin’ny fahitsiana, ny mangarahara, ny fitandrovana hatrany ny tombontsoa iombonana sy ny tombontsoa ambonin’ny firenena.
