කොපී

Home
Sri Lanka
Galle
කොපී

නිවන් දක්නා තෙක් ලියමි.

22/09/2024

කලින් කලට කඩා වැටෙන නේකවිධ තාරුකාවන් මත්තේ අපි අපේ ප්‍රාර්ථනාවන් තවරා ඇත්තෙමු. පෑයූ සෑම තාරුකාවක් හාම උත්කර්ශයට පත් වී ඇත්තෙමු. හුරු පුරුදු නෑදෑ තරු රටාවන්ගෙන් ඔබ්බෙහි වූ හුදෙකලා තරු පොකුරක මලානික තරුවක් අඹර දිලෙන්නට පටන් අරගෙන තිබේ.

තවත් කඩාවැටෙන තරුවකට අපි අපේ ප්‍රාර්ථනා තවරන්නෙමු.
තරු කෙරෙහි විස්වාසය තබන්නෙමු. තරු දිලෙන්නා හාම අපටත් ආලෝකය ලැබේවයි පතමු.
තරුවකට සුබ පතමු.❤
Anura Kumara Dissanayake

22/09/2024

පොලෝ සාරය උරා බී හැදෙන රූස්ස පිළිල උදුරුවාලනු වස් මහා සුළි කුණාටුවක් එන්නට ඕනෑය. වෙල් වතුර උතුරුවා ගං වතුර ගලා විත් කුටමැට්ට තුන්හිරිය වනසවාලිය යුතුය. ⁣
ඉනික්බිති වෙල් වසා ඇල් සහල් බිජුවට වපුරුවාලිය යුතුය.
දළු දමා ආ යුතුය.
ඵල නෙලා ගත යුතුය.

🚩

04/09/2024

කැලඹිලිසහගත විභාග කාලපරිච්ඡේදයකින් ඉක්බිති නිවාඩුවක යෙදෙන බොහෝ විද්‍යාර්ථි පිරිස් සේම මමත් මගේ චින්තා පුරවරයේ අපිළිවෙලින් එක්රැස් වූ වටිනා නොවටිනා දහසක් දෑ කඩමින් බිඳිමින් යලි යලිත් තැන්පත් කරමින් යම් පිළිවෙලක් සොයා වෙහෙසෙමින් සිටිමි. වෝල්ටර් වයිටි පන්නයේ කණ්ණාඩි කූට්ටමත්, අනිවාර්තයේ වැවී හැඩපලු ගෙතුණු කොණ්ඩයත් අතරට මදිපාඩුවක්ව තිබූ කළු ගැහී ගිලී ගිය දෑස් විභාග සමයේදී අලුතින් එකතු වී ඇත. දෙසතියකින්, සති තුනකින් හෝ මාසයකින් නොකැපූ රැවුලත් හා එක්ව පෙර කී අංග ලක්ෂණයෝ මා දකින්නෙකුට මා ගැන පහසු නිර්වචනයක් ලඟා කර දෙයි.

යන්තමින් දැලි පාට පමණක් ඉතිරි වන්නට හැර රැවුල් ගස් සියල්ල සූරා කෙසඟ සිරුරේ බ්‍රාහ්මණ ලීලය පලවා හැර නිසරු සල්ලාල පෙනුමකින් මගට බැස ගමනේ යෙදෙද්දී පෙරකී පහසු සමාජ නිර්වචනය තව තවත් සරල කරවනු ඇත. මේ ගමන් අතරතුර මම මගේම ඊගෝව හා සංවාද කරමි. මගේම ⁣බාහිරය ගැන මගේ අභ්‍යන්තරය වෙත දොස් පවරමි. බාහිරයේ අනන්‍යතාවය අභ්‍යන්තරය හා සමපාත කරවන ලෙසින් ඉල්ලා සිටිමි.

එසේ බිදී විසිරී යන මගේ ඊගෝව හා සමගම පෙරකී අපිළිවෙල සන්තානයද බිඳී විසිරී යයි. නිදිවැරුම් හා අඛණ්ඩ හැදෑරීම් විසින් රෝගාතුරව හුන් සිතිවිලි සමූහය නැවත කෙමෙන් කෙමෙන් සුවපත් වෙයි. දැන් නැවතත් මට හුරුපුරුදු සමාජ දේශපාලන වේදිකාවෙන් බැසගත හැකිය. කවියක් කතාවක් කියවා ගීයක වචන අසන්නට හැකිය.
#කොපී

28/08/2024

ප්‍රියා සූරියසේනගේ ස්වර මාත්‍රාවක් දෙසවන් තුළටම කාන්දු වෙමින් පැවතුණත්, බස් රථයේ බජව්ව ඉයර්පෝනයක හැකියාව ඉක්මවා යන තරම් ප්‍රබලය. දමිල වචන දෙක තුනක් සිංහල මෙලඩියක් අස්සෙන් ඇසේ. දමිල මෙලඩියක මැද්දෙන් සිංහල වචන ඇසේ. රැයින් රෑ වන තුරුත් පසුදා පහන් වනතුරුත් මේ අසහනය මැද්දේ ගමන් කල යුතුය. පස්ස රිදෙයි. ගී ⁣පැටලෙයි. නින්ද නොයයි.

දැන් වික්ටර් රත්නායකයෝ මල් පොකුරු පොකුරු ගයත්. මල් අසිරි සිරිය ලැබෙන්නට කියද්දීම මොකක්දෝ දමිල වචනයක් කියවෙයි. නිල්ල නියන බමරු ගැන කියද්දී කොහේදෝ සිට ආ දණිස් අමාරුවක් මතු වෙයි. පසුපස දෙසට වේගයෙන් ඇදී යන විදුලි එලි ගණනාවක් එක පෙලට ජනෙල් වීදුරුවෙන් පෙනෙයි. පැයක් ගියත් දෙකක් ගියත් ගණ අඳුර මැද කණාමැදිරි එලි ඒ ලෙසින් පස්සට ඇදෙයි. බසය ඉස්සරහට යෙයි.

වික්ටර් රත්නායකයන් තවත් ගීයක් පටන් ගනී. ඉන් පස්සේ තවත් ගායකයෙක් එයි. බස් බජවිවෙි දමිල සංගීතයෙන් බාධා කිරීම් ලැබෙයි. බසය ඉදිරියට ඇදෙයි. විදුලි එළි පස්සට යෙයි.
#කොපී

18/08/2024

දහසකුත් එකක් වාහනත් දුහුවිල්ලත් පිරී පවත්නා නල්ලූර් වීදි වසරේ එක් කාලයකදී පමණක් ජනී ජනයාගේ නිරුවත් දෙපයින් සංතර්පණය ලබන්නට ගනී. දුහුවිලි පුසුඹත් කාස්ටකයත් හැර පොල් තෙල් සුවඳත්, සඳුන් කපුරු දුමාරයත් වීදිය විනිවිද හමන්නට ගනී.
සියුම් කැටයමින් සරහන ලදුව මහා ජන පෙරහරින් ඇදෙන වේල් කරත්තයක පසුපසින් නල්ලූර් කෝවිල පැදකුණු කිරීම හින්දූන් පමණක් සිරිත් කොටගත්තක් නොවේ. පෙර කී සඳුන් සුවඳත්, පොල්තෙල් පුසුඹත්, වැලි පොලොවේ දෙපා ඇතිල්ලෙන කිතියත්, ⁣දමිල බසන් ගැයෙන ස්තෝත්‍රත් ආදී නේක ආහ්ලාදයන්ගෙන් මත් වනු රිසි බොහෝ සර්වාගමික පිරිස් මේ කරත්තය පසුපස ඇදී ඇදී යෙත්. කෝවිල පැදකුණු කර ඉක්බිති කඹ ආධාරයෙන් කරත්තය යලි ඇදගෙන යන්නට ස්වකීය සවි ශක්තිය හුවමාරු කරගනිත්. කෝවිල් බිම මතුයෙහි ඇවිලී දැවෙන කපුරු පුපුරක අග්නියෙන් ආශිර්වාදය ලබා ගනිත්.

#කොපී

14/08/2024

ගගනතෙර සිහින'තර සැනසිණි
තටු කපා සිඳ දමා වැනසිණි
උඹලාට වගේ නෑ සියොතුනි
ඉගිලීම අකැප වග දැනගමි

තද අරටු කොඳු කැඩිණි
වේදනාවෙන් දැවිණි
කාස්ටක පොලොව මත
දණ නමා වැඳ වැටිණි

පපු කැනැති තෙත සිඳිණි
මුදු පහන් සිත බිඳිණි
උඹලාට වගේ නෑ සියොතුනි
ඉගිලීම අකැප වග දැනගමි.

#කොපී

13/08/2024

මායාමය කර්කශභාවයකින් සුසැදි උතුරුකරයේ ⁣බෝඩිමක අලස විදුලි පංකාවක් පාමුල වැතිරී හිඳ ලියමි.

සරසවිය රස වන්නේත් සවිය වන්නේත් එහි නීරසභාවය හා දුබලතාවය හරිහැටි කළමනාකරණය කරගන්නෙකුට පමණි. මෙහි නීරසය කාස්ටක දුහුවිල්ල හා මුසු කොට සවිමත් අත්තිවාරමක් දමාගත්තෙකුට සිය ඉදිරි ජීවන ගමන ඒ සවිශක්තිය මතින් ඇරඹිය හැකිය. දෑවුරුද්දක් අවසානයේ යෙදෙන විභාග කාලපරිච්ඡේදය නීති අධ්‍යයනයේ මෙතෙක් මා අත් විඳි කැලඹිලිසහගතම මනෝභාවයන්ගෙන් මා පුරවමින් සිටියි. එකී කැලඹිල්ලෙන් ඇති කෙරෙන බොහෝ මනෝමය රික්තයන් කෙරෙහි බලපවත්නා සේම මේ සටහන තුළද අතුරාලිය යුතු යැයි යම් නිශ්චිත සිතිවිල්ලක් මා කෙරෙහි නැත.

පංකාවේ සුළඟින් ඇවිස්සී ඇඹරෙමින් හමා යන සිහින් දුහුවිලි පියරු අංශු දෑස් මත පතිත වී කැවෙන්නට වෙයි. දුරකතන තිරයේ විදුලි එලියට ආකර්ශනය වූ කෘමීන් කිහිප දෙනෙක් මුහුණේත් පපුවේත් වදිමින් ඔබ මොබ පියාඹා යත්. සටහන අතරවාරයේ කොහේදෝ අවකාශයක සිට ඇදෙන අන්තාර්ජාතික නීති නියමාවලියක නමක්, දෙකක්, නඩු නීතියක් සිතිවිලි අතරට වැදී සකල මානසික උද්‍යෝගය කලඹවා අමතක වී යයි.

මේ සියලු හුරුපුරුදු කර්කශභාවයන් මධ්‍යයේ මට යලිත් පෙර කී කාස්ටක දුහුවිල්ලත් සවිමත් අත්තිවාරමත් සිහිපත් වේ. මහා මන්දිර තුලින් වියැකී ගියද පැල්පත් තුල රඳනා සාම්‍යයක් පිලිබඳ ගැයෙන ගී දෙපදයක් ඒ හා මතකයට එයි, සැණින් අමතක වී යයි.

#කොපී

23/07/2024

මල් පිපෙනව
බමරු එනව
රොන් අරගෙන යන්න යනව
වැහි වහිනව
හෙණ ගහනව
මල් පෙති ගැලවී වැටෙනව
වැහි කළුවර
සීත මැදින්
සමනල මනලොල ඇදෙනව
පෙති ගැලවුණ
නටු මත්තේ
ආයෙත් සුමිහිර පිපෙනව
#කොපී
©

09/07/2024

යවුලින් ගහන ජීවිත ගමන තුළ නියත ගමනාන්තයක් පිළිබඳ බලාපොරොත්තු රැඳවීම සුදුස්සක් නොවේ. මේ ගෙවන ජීවන රටාව තවත් දශකයක දෙකක ඇවෑමෙන් කණපිට හැරී තිබෙන්නට පුලුවන. ඉදින් යම් නොස්ටැල්ජීය මතක ගබඩාවක් සටහන් කොට තබා ගැනීම සමකාලීන ජීවිතය යථා කාලයේ චිත්තරූපගත කරගන්නට රුකුල් සපයනු ඇත. කර්කශ වූත් මායාමය වූත් විවිධත්වයෙන් ගහන උතුරුකරයේ ගෙවෙන ජීවිතය පිළිබඳ වචනයෙන් රූපගත කෙරෙන මේ සිතිවිලි සෙලෝලයිඩ් පටය මගේ ජීවන සන්ධ්‍යාවේ සංතෘප්තිය උදෙසාය.

සරසවියක ගතකෙරෙන ශාස්ත්‍රීය ජීවන රටාවට රුකුල් සපයන සොඳුරු සිසිනිඳු සුරපුරයක් නොවේ යාපනය. සුවහසක් ලාංකික සරසවි අපේක්ෂකයන් බලාපොරොත්තු රඳවන සුපිපි මල් ගොමුවක්ද මෙහි නොවේ. එහෙත් මෙහි යම් යම් දේ ඇත. සෙසු සරසවියක් සිහිනෙකුදු නොලද අන්දමේ විවිධත්වයක් මෙහි ඇත.

උතුරු සන්ධ්‍යාවේ වර්ණවත්භාවය පිළිබඳ මා පෙර ලියූ සටහනක් ඔබ කියවා ඇතුවාට සැක නැත. කොටු පවුරත් පන්නායි තීරයත් ඇසුරෙහි පඬුවන් වලා පවුරු එකින් එක නිමී අඳුරුව ගිය කල්හි කහ දුඹුරු පැහැති විදුලි බුබුළු ආලෝකයෙන් මහා මාර්ගය තෙ⁣මෙන්නට ගනී. ඒ විදුලි එලි මැද්දෙන් පන්නායි තීරය හරහා යන්නෙකුට විදුලි එලියේ මන්දාලෝකයක් දිලෙන කලපු රැල්ලේ විචිත්‍ර ස්වරය ඇසිය හැකිය. පන්නායි තීරයේ මද දුරක් බමන මතින් පාපැදිය පාගා පන්නායි පාලම මතට සේන්දු වන තරුණයෝ මේ චමත්කාර ස්වර⁣යත් ලවණ මිශ්‍රිත සුලං රැල්ලේ පහසත් රිසි සේ විඳගනිත්.

කලපුවට මුහුණලා පාලමේ සිටගන්නෙකුට පසෙකින් කහවන් විදුලි ආලෝකයෙන් තවන ලද කොටු පවුරත්, අනෙක් පසින් කෙලවරක් නොදක්නා ඈත දියඹත් දක්නට ලැබේ. රාත්‍රී යාත්‍රාවේ යෙදෙන ඔරුකරුවෙක් කලපු දියට සිය රිටෙන් අනිමින් තාවර වෙවී ඇදෙන දර්ශනය දක්නට ඇත්තේ ඉඳහිට දිනෙකය. දසදහස් ගණනින් තාරුකාවෝ ක්ෂිතිජයේ පටන් හිස්මුදුන දක්වා විසිරී වැතිරී සිටිත්. සිය දැවෙන සිතිවිලි නිවාලනු වස් රාත්‍රියේ පන්නායි තීරයට යනෙන බොහෝ පිරිසක් යාපනයේ වෙති. මග අයිනේ තැනෙක දැල්වෙන දුම්වැටියක වෙලී මෙහි වාතලයට බොහෝ සුසුම් පොදි මුසු වේ.
#කොපී
©

09/07/2024

දාහයෙන් ගත දවන
ගිම්හාන⁣යට එන්න.
සුළඟ හා මුසව එන
මගෙ සුසුම් විඳගන්න.

හිමිදිරිය පිනි හැලෙන
දවස් තෙක් ඉවසන්න.
යලි හමන සුළඟ දිග
නුඹෙ කඳුළු අමුණන්න.
#කොපී
©

04/07/2024

සීලිමේ හරි මැද හොල්ඩරයකින් එල්ලී එඩිසන් උන්නැහේ සිය සුසුදු දසන් දක්වා හිනැහෙයි. ඒ බිත්තියේ වැදී මේ බිත්තියේ වදින හිනාව යලිත් තවත් බිත්තියක වැදී ජනේලයෙන් මිදුලට පනියි. වැහි වලාකුළු ගහණ රෑ අහස යට අන්ධකාරයේ සෝඛ දුක්ඛයට නතු වූ තණපතක් දෙකක් මෙ⁣තෙක් වේලා හෙලූ කඳුළු බිංදු එඩිසන් උන්නැහේගේ හිනාව වැද දිලෙන්නට පටන් ගනී. එකදු තරුවක් නොදක්නා අහස් කුස යට තාරුකාවකින් පාර සොයා යන බොහෝ පිරිස් අතරමං වනු ඇත. වැහිබර රාත්‍රිය මහා ඛේදයකි.
මේ දැනුත් එඩිසන් උන්නැහේ සිනාසෙන්නේ මංමුලා වූ මගේ සිතිවිලි සමගිනැ'යි මට සිතේ.
#කොපී
©

04/07/2024

ජිබ්‍රාන් මත්තේම නහී නම්,

තුරුළු වී හුන් පපුව මැද්දට
කවියක් ඇණ නුඹ මරා දා
මගේ හදවත ගැඹුරු තැනකින්
නුඹව වළලා ගමි සියාදා..
#කොපී
©

01/07/2024

සමනලුන් සඳහාම
සුවඳවත් වූවා මිස.
මලක් ඉවසනු කෙලෙස
පෙති පෙලන රුදු බමර තුඩු විස.
#කොපී
©

30/06/2024

හැම උදයෙම
හැම බිමකම
හැම බිස්සෙම තණ මත්තේ
නුඹෙ ඇස්වල
පෙම වස්සන
කඳුළුයි ඉතිරිව ඇත්තේ

හිමිදිරියක
පිනි වැස්සක
හිරි පොදයක හඬ මැද්දේ
සඳ මැදියම
නුඹ අත්හළ
සුසුමයි සුළඟට ඇන්දේ

#කොපී
©

29/06/2024

වලාකුළු හිස පිරිමදිද්දී
තැනිතලාතර දෑස රන්දන
ඉරිතලාගිය සසල හිත් වෙයි
විරාගික උස් කඳු මුදුන් යට.

වලා කඳුළැලි හෙලා යහමින්
මලානික කඳු අතර දොවමින්
සරාගික දියවර අරන් යයි
ගලාගෙන තැනිතලා අතරට.
#කොපී
©

Address

Galle

Telephone

+94760302251

Website

http://thaaliwritings.blogspot.com/, http://Slwrite.blogspot.com/

Alerts

Be the first to know and let us send you an email when කොපී posts news and promotions. Your email address will not be used for any other purpose, and you can unsubscribe at any time.

Videos

මේ ඇරඹුම් අවධියයි. ❤ හැඟුමින් පිරවිය යුතු තවත් හිස් පිටු බොහෝයි. https://youtu.be/102jimIt2xA #කොපී

♥️ඇවිත් තිබුණත්....(Awith Thibunath)....♥️ An Original by Geeth Premarathna https://youtube.com/@geethpremarathnaofficial?si=WL9GyAVI4EeodfEX Artist - Geeth Premarathna Lyrics - Tharaka liyanage Melody & Music - Geeth Premarathna 🥀නුඹේ ගැන කවි ලියා කියවමි තරු දහස් ඇති අහස් තලයට........🥀 ළගදීම....✨️🎶

🥀නුඹව අමුණා ලියූ පදවැල් අහස් තලයේ දිය වුණාවේ. තවත් දවසක හවස් වරුවක නුඹෙන් තොර කවි ලියවුණාවේ.🥀❤️ "නුඹ නොමැති කවි"...(Nuba Nomathi Kawi...) Geeth Premarathna First Original Song.. Artist - Geeth Premarathna Lyrics - Tharaka Liyanage ( කොපියා) Melody & Music Arrangements - Geeth Premarathna Mix & Mastering - Sheshal Marian https://youtube.com/shorts/1Q3cq97LJoM?si=2zsSy3Bkglv2EUFe Releasing Soon...🎶♥️ Subscribe You Tube Chanel... Like,Comment & Share🥰♥️🎶

Listen to the sound of waves within you. 🌊

2023 Recap...

නේකවිධ පංති අතර අනේකවිධ ආසන ඇත. එකෙක් විටෙක හිස් ය. තවෙකෙක් තවත් විටෙක හිස් ය. එහෙත් හැමෙකෙක්ම හැමවිටම පිරී ඇත්තේය.

❤️

රිදෙනකොට පපු අහුමුළු වියෝ ගින්නෙන් ඉරිතැළු මගේ රූ ඔය හද එළු වීද ප්‍රේමිය කඩතොළු උරහිසට කඳුළැල් හෙලූ වෙරළ ඉම තරුකැට බැලූ පෙමක් වී උතුරා ගැලූ තවත් නැතිවද වැහි කුළු #කොපී #poetry ©