Capital News Sinhala, No. 142/21, Devika Gardens, Wijekumaratunga Mw, Kirulapone, Colombo (2024)

22/01/2023

ශ්‍රී ලංකාවට පැමිණෙන සංචාරකයින් සඳහා මේ මොහොතේ නව කොවිඩ් නීති පැනවීමේ අවශ්‍යාතාවක් නොමැති බව ශ්‍රී ලංකා සංචාරක සංවර්ධන අධිකාරිය පවසනවා.
එහි සභාපති ප්‍රියන්ත ප්‍රනාන්දු මහතා සඳහන් කළේ පසුගියදා පැවති සාකච්ඡාවකදී ඒ සම්බන්ධයෙන් අවසන් එකඟතාවකට පැමිණ ඇති බවයි.
ශ්‍රී ලංකා සංචාරක සංවර්ධන අධිකාරිය, සෞඛ්‍ය බලධාරීන් සහ සංචාරක ක්ෂේත්‍රයේ ආයතන සමග පැවති සාකච්ඡාවකදී මෙම තීරණයට එළඹ ඇති බව සඳහන්.
මෙරටට පැමිණෙන සංචාරකයින් සඳහා නව කොවිඩ් පාලන ක්‍රමවේද හඳුන්වාදීමට සංචාරක සංවර්ධන අධිකාරිය පසුගිය 17 වැනිදා කටයුතු කළ අතර එය පසුව, 20 වනදා දක්වා කල් දැමීමට පියවර ගනු ලැබුවා.
කෙසේවෙතත් වර්තමානයේ පවතින තත්ත්වයන් සැලකිල්ලට ගැනීමේදී නව නීති මාලාවක් පැනවීමේ අවශ්‍යතාවක් නොමැති බවට හඳුනාගෙන ඇති බව සංචාරක සංවර්ධන අධිකාරියේ සභාපති ප්‍රියන්ත ප්‍රනාන්දු මහතා සඳහන් කළා.
යම් හෙයකින් එවැනි නීති මාලාවක් හඳුන්වා දෙන්නේනම් සෞඛ්‍ය අමාත්‍යංශය හරහා පමණක් එය ක්‍රියාත්මක කිරීමට ද පසුගියදා පැවති සාකච්ඡාවේ දී එකඟතාව පළව ඇති බව සඳහන්.

22/01/2023

අධ්‍යාපන චාරිකා සඳහා පාසල් සිසුන් රැගෙන යා හැකි දුර ප්‍රමාණය සීමා කිරීමට අධ්‍යාපන අමාත්‍යංශයේ අවධානය යොමු වී තිබෙනවා. ඒ අනුව දිනකට සිසුන් රැගෙන යා හැකි උපරිම දුර ප්‍රමාණය කිලෝ මීටර් 100කට සීමා කිරීමට අධ්‍යාපන අමාත්‍ය සුසිල් ප්‍රේමජයන්තගේ අවධානයට ලක්ව ඇති බවයි එම අමාත්‍යංශයේ උසස් නිළධාරියෙකු වෙත කියා සිටියා.
එලෙස අධ්‍යාපන චාරිකා සඳහා රැගෙන යන සිසුන් පස්වරු 6ට පෙර යළි අදාළ පාසලට රැගෙන ආ යුතු වනවා. ඉදිරියේදී පාසල් සිසුන් රැගෙන යන අධ්‍යාපන චාරිකා සඳහා තෝරාගන්නා ප්‍රදේශ පිළිබඳවද වැඩි අවධානයක් යොමු කිරීමටද නියමිතව තිබෙනවා.
නව උපදෙස් ඇතුළත් චක්‍රලේඛයක් සියලු පාසල් හා අධ්‍යාපන බලධාරීන් වෙත කඩිනමින් නිකුත් කිරීමටද පියවර ගන්නා බවයි අධ්‍යාපන අමාත්‍යංශයේ උසස් නිලධාරියා වැඩිදුරටත් පැවසුවා.
එලෙස නව චක්‍රලේඛයක් නිකුත් කිරීමට අධ්‍යාපන අමාත්‍යංශයේ අවධානය යොමු වී ඇත්තේ ඉකුත් සිකුරාදා රාත්‍රියේ නුවරඑළිය නානුඔය රදැල්ල ප්‍රදේශයේදී කොළඹ තර්ස්ටන් විද්‍යාලයේ සිසුන් රැගත් බස් රථයක් අනතුරට ලක් වීම හේතුවෙන්.

22/01/2023

කුරුණෑගල නගරාධිපති තුෂාර සංජීව ව එම ධුරයෙන් ඉවත් කර තිබෙනවා.
අති විශේෂ ගැසට් නිවේදනයක් මගින් වයඹ ආණ්ඩුකාරවරයා විසින් ඔහුව ධුරයෙන් නෙරපා ඇති බව වාර්තා වනවා.
කුරුණෑගල නගර සභාවේ අයවැය සම්මත කර ගැනීමට අපොහොසත් වීම ඊට හේතුව ලෙස දැක්වෙනවා.
වයඹ පළාත් ආණ්ඩුකාරවරයා ලෙස කටයුතු කරන්නේ හිටපු නාවික හමුදාපති, අද්මිරාල් ඔෆ් ද ෆ්ලීට් වසන්ත කරන්නාගොඩ මහතායි.

22/01/2023

ගාලු කුමාරි දුම්රියේ ත්‍රිරෝද රථයක් ගැටී ඇති බව වාර්තා වනවා.
මාතර වැලිගම දී එම අනතුර සිදුවී තිබෙනවා.
ඉන් එක් අයෙක් මියගොස් තවත් අයෙක් තුවාල ලබා ඇති බව වාර්තා වනවා.
අද (22) උදෑසන 6.45 ට එම අනතුර සිදුවී තිබුණා.

22/01/2023

අධ්‍යයන පොදු සහතික පත්‍ර උසස් පෙළ විභාගය පැවැත්වීමට අදාළ මූලික කටයුතු සියල්ල මේ වන විට සැලසුම් කර ඇති බව විභාග දෙපාර්තමේන්තුව පවසනවා.
විභාග කොමසාරිස් ජනරාල් අමිත් ජයසුන්දර මහතා සඳහන් කළේ අද (22) දිනය තුළ විභාග මධ්‍යස්ථාන සකස් කිරීමේ කටයුතු සිදුකෙරෙන බවයි
2022 - 2023 අධ්‍යයන පොදු සහතික පත්‍ර උසස් පෙළ විභාගය හෙට (23) දිනයේ සිට විභාග මධ්‍යස්ථාන 2,200කදී පැවැත්වීමට නියමිතයි.
මෙවර උසස් පෙළ විභාගය සඳහා පාසල් සහ පෞද්ගලික අයදුම්කරුවන් 331,709 දෙනෙකු පෙනී සිටීමට නියමිත අතර විභාගය පෙබරවාරි මස 17 වැනිදා දක්වා පැවැත්වෙනවා.
එමෙන්ම විභාග කොමසාරිස් ජනරාල් අමිත් ජයසුන්දර මහතා සඳහන් කළේ විභාග මධ්‍යස්ථානවල ආරක්ෂාව සඳහා ද විශේෂ වැඩපිළිවෙළක් ක්‍රියාත්මක කර ඇති බවයි.

19/01/2023

එක්දින ජාත්‍යන්තර ක්‍රිකට් පිටියේ ද්විත්ව ශතකයක් රැස් කිරීමට සමත් වූ ලාබාලතම ක්‍රීඩකයාගේ ලෝක වාර්තාව තමන් සතු කර ගැනීමට ඉන්දීය යොවුන් පිතිකරු ශුබ්මන් ගිල් ඊයේ රාත්‍රියේ සමත් වුණා. ඒ, නවසීලන්තය සමඟ පැවති පළමු එක්දින ක්‍රිකට් තරඟයේදී.
එහිදී ශුබ්මන් ගිල් පන්දු 149කදී 6හේ පහර 9ක් සහ 4රේ පහර 19ක් සමඟ රැස් කළ ලකුණු සංඛ්‍යාව 208ක්. ඔහු මෙම ද්විත්ව ශතකය රැස් කරන විට ඔහුගේ වයස අවුරුදු 23යි දින 145ක්. ඔහු මෙලෙස බිඳ හෙලුවේ ඉකුත් වසරේ දෙසැම්බ්ර් මාසයේදී අවුරුදු 24යි දින 145ක් වයසැති ඉන්දීය පිතිකරුවෙකුම වූ ඉෂාන් කිෂාන් ලකුණු 210ක් රැස් කරමින් බිහි කර තිබූ ලෝක වාර්තාවයි.
එමෙන්ම මෙම තරඟයේදී එක්දින ලකුණු දහසේ සීමාව පසුකර යාමට සමත් වූ අතර ඒ සඳහා ඔහු වැය කර තිබුණේ ඉනිම් 19ක් පමණයි. එය සැලකෙන්නේ ඉන්දීය පිතිකරුවෙකු අඩුම ඉනිම සංඛ්‍යාවකින් එක් දින ලකුණු දහසේ සීමාව පසුකර ගිය පළමු අවස්ථාව ලෙසයි.
මෙම තරඟයේ ප්‍රථමයෙන් පන්දුවට පහර දුන් ඉන්දියාව ලකුණු 349ක් රැස් කළ අතර නවසීලන්තයට සියලු දෙනා දැවී රැස් කර ගත හැකි වූයේ ලකුණු 337ක් පමණයි. ඉන්දියාවට ප්‍රබල සටනක් ලබා දුන් නවසීලන්තයේ මිචෙල් බ්‍රේස්වෙල් පන්දු 78කදී 6යේ පහර 10ක් සහ 4රේ පහර 12ක් සමඟ ලකුණු 140ක් රැස් කළද එය ජයග්‍රහණයට ප්‍රමාණවත් වූයේ නැහැ.

19/01/2023

ලොව වයස්ගතම පුද්ගලයා ලෙස සැලකෙන Lucile Randon නමැති කන්‍යා සොයුරිය මියගොස් තිබෙනවා.
විදෙස් මාධ්‍ය වාර්තා කළේ ප්‍රංශයේ ජීවත් වූ 118 හැවිරිදි වියේ පසු වූ ඇය ටූලෝන් හි පිහිටි වැඩිහිටි නිවාසයකදී මියගොස් ඇති බවයි.
1904 වසරේ පෙබරවාරි මාසයේදී උපත ලැබූ Lucile Randon කන්‍යා සොයුරිය 2022 වසරේදී ලොව වයස්ගතම පුද්ගලයාට හිමි ගිනස් ලෝක වාර්තාවට හිමිකම් කියනු ලැබුවා

19/01/2023

පළාත් පාලන මැතිවරණය සඳහා පෙනී සිටින අපේක්ෂකයින්ගේ ඉන්ධන කෝටාව වැඩිකිරීම සඳහා ඉල්ලීම් ලැබී තිබුණ ද ඊට අනුමැතිය ලබාදීමට නොහැකි බව ලංකා ඛනිජ තෙල් නීතිගත සංස්ථාව පවසනවා.
එහි සභාපති මොහොමඩ් උවයිස් මොහොමඩ් මහතා සඳහන් කළේ පවතින තත්ත්වය හමුවේ ප්‍රායෝගිකව එම කෝටාව වැඩි කිරීමට හැකියාවක් නොමැති බවයි.
මැතිවරණ කොමිෂන් සභාව සමග ඊයේ පස්වරුවේ පැවති සාකච්ඡාවකින් අනතුරුව මාධ්‍ය වෙත අදහස් දක්වමින් ලංකා ඛනිජ තෙල් නීතිගත සංස්ථාවේ සභාපති මොහොමඩ් උවයිස් මහතා මෙම අදහස් පළකළා.

19/01/2023

ඉන්දීය විදේශ කටයුතු අමාත්‍ය එස්.ජයශංකර් මහතා අද (19) දිවයිනට පැමිණීමට නියමිතව තිබෙනවා.
විදේශ කටයුතු අමාත්‍යාංශය සඳහන් කළේ දෙදින නිල සංචාරයක් සඳහා ඔහු දිවයිනට පැමිණීමට නියමිත බවයි.
මෙම සංචාරය තුළදී ඉන්දීය විදේශ කටයුතු අමාත්‍යවරයා ජනාධිපති රනිල් වික්‍රමසිංහ මහතා මෙන්ම අග්‍රාමාත්‍ය දිනේෂ් ගුණවර්ධන, විදේශ කටයුතු අමාත්‍ය අලි සබ්රි මහතා සමග ද ද්වී පාර්ශවික සාකච්ඡා පැවැත්වීමට නියමිතව තිබෙනවා.

19/01/2023

අද දින දිවයිනේ බොහෝ ප්‍රදේශවල ප්‍රධාන වශයෙන් වැසි රහිත කාලගුණ තත්ත්වයක් පවතින බව කාලගුණවිද්‍යා දෙපාර්තමේන්තුව පවසනවා.
නිවේදනයක් නිකුත් කරමින් කාලගුණවිද්‍යා දෙපාර්තමේන්තුව මේ බව පවසනවා.
මේ අතර උතුරු මැද, වයඹ සහ ඌව පළාත්වලත් හම්බන්තොට දිස්ත්‍රික්කයේත් විටින් විට පැයට කිලෝමීටර් 40ත් 50ත් අතර තද සුළං ඇතිවිය හැකි බවද එම දෙපාර්තමේන්තුව පවසනවා.

17/01/2023

ගාලු පාරේ, වැලිගම, කප්පරතොට පාලම ආසන්නයේ දී මාතර දෙස සිට කොළඹ දෙසට ධාවනය වූ පුද්ගලික බස් රථයක් මාර්ගයෙන් ඉවතට පැන මාර්ගයේ ගමන් කරමින් සිටි මවකගේ හා පුතෙකුගේ ගැටීමෙන් සිදු වූ අනතුරෙන් මව මිය ගොස් තිබෙනවා.
මෙලෙස මියගොස් ඇත්තේ 68 හැවිරිදි කිරලවැල්ල ප්‍රදේශයේ පදිංචිව සිටි කාන්තාවක්.
අනතුරින් බරපතළ තුවාල ලැබූ ඔවුන් දෙදෙනා මාතර රෝහලට ඇතුළත් කිරීමේදී මව මියගොස් ඇති බව පොලීසිය පවසනවා.
අදාළ බස් රථයට වැලිගම බස් නැවතුම්පොළෙන් ගොඩවූ පුද්ගලයින් සිව්දෙනෙකු බස් රථයේ කොන්දොස්තර සමග ඇති වු ගැටුමක් දුරදිග යාමෙන් පසු ඔවුන් බස් රථයේ රියදුරුට ද පහර දී තිබෙනවා.
එම අවස්ථාවේ දී රියදුරු අසුනෙන් ඇදවැටීම හේතුවෙන් රියදුරුගේ පාලනයෙන් ගිලිහුණු බස් රථය මාර්ගයෙන් ඉවතට පැන මෙම අනතුර සිදුව ඇති බව සිදුකළ විමර්ශනවලදී අනාවරණය වී ඇතැයි සඳහන්.
අනතුර සම්බන්ධයෙන් බස් රථයේ රියදුරු සහ තවත් පුද්ගලයින් දෙදෙනෙකු අත්අඩංගුවට ගෙන ඇති අතර වැලිගම පොලීසිය වැඩිදුර විමර්ශන සිදුකරනවා.

17/01/2023

2022 අපොස උසස් පෙළ විභාගයට අදාළ උපකාරක පන්ති සංවිධානය කිරීම සහ එම පන්ති මෙහෙයවීම අද මධ්‍යම රාත්‍රියේ සිට තහනම් වනවා. එමෙන්ම විෂයානුබද්ධ දේශන, සම්මන්ත්‍රණ සහ වැඩමුළු පැවැත්වීම ද තහනම් කර ඇති බව විභාග කොමසාරිස් ජනරාල් එච්.ජේ.එම්.සී අමිත් ජයසුන්දර මහතා සඳහන් කළා.
විභාගය සඳහා අනුමාන ප්‍රශ්න ඇතුළත් ප්‍රශ්න පත්‍ර මුද්‍රණය කිරීම සහ ඒවා බෙදාහැරීමත්, විභාග ප්‍රශ්න පත්‍රවල ප්‍රශ්න දෙන බවට හෝ ඒ හා සමාන ප්‍රශ්න ලබාදෙන බවට පෝස්ටර්, බැනර්, අත්පත්‍රිකා විද්‍යුත්, මුද්‍රිත හෝ සමාජ මාධ්‍ය ජාලා මගින් ප්‍රසිද්ධ කිරීමත් සිදුනොකළ යුතුයි.
කිසියම් පුද්ගලයෙකු, ආයතනයක් ‍හෝ වෙනත් පාර්ශවයක් මෙම නියෝග නොසළකා කටයුතු කළහොත් දැඩි නීතිමය පියවර ගන්නා බව විභාග කොමසාරිස් ජනරාල්වරයා පැවසුවා.
එවැනි ආකාරයේ උපදෙස් කඩකිරීමක් සිදුවුවහොත් ඒ පිළිබඳව පොලීසිය හෝ 1911 විභාග දෙපාර්තමේන්තුවේ ක්ෂණික දුරකථන අංකය අමතා දැනුම් දෙන ලෙස විභාග කොමසාරිස් ජනරාල් එච්.ජේ.එම්.සී අමිත් ජයසුන්දර මහතා දැනුම්දෙනවා
2022 අධ්‍යයන පොදු සහතික පත්‍ර උසස් පෙළ විභාගය ලබන 23 වනදා ආරම්භ වන අතර විභාගය පෙබරවාරි මස 17 වන දින දක්වා පැවැත්වීමට නියමිතයි ඒ සඳහා පාසල් සහ පෞද්ගලික අයදුම්කරුවන් 331,709 දෙනෙකු පෙනී සිටීමට නියමිත බව විභාග කොමසාරිස් ජනරාල්වරයා පැවසුවා.

17/01/2023

බස්නාහිර, සබරගමුව, දකුණු, මධ්‍යම, ඌව සහ වයඹ පළාත්වල සවස් කාලයේදී හෝ රාත්‍රී කාලයේදී තැනින් තැන වැසි හෝ ගිගුරුම් සහිත වැසි ඇති විය හැකි බව කාලගුණවිද්‍යා දෙපාර්තමේන්තුව සඳහන් කළා
බස්නාහිර සහ සබරගමුව පළාත්වලත්, ගාල්ල සහ මාතර දිස්ත්‍රික්කවලත් ඇතැම් ස්ථානවලට මි.මී 75ක පමණ තරමක තද වැසි ද ඇතිවිය හැකි අතර නැගෙනහිර පළාතේ සිහින් වැසි වාර කිහිපයක් ඇති වෙන බව සඳහන්.
දකුණු පළාතේ උදෑසන කාලයේදී වැසි ස්වල්පයක් ඇතිවිය හැකියි
ගිගුරුම් සහිත වැසි සමග ඇතිවිය හැකි තාවකාලික තද සුළංවලින් සහ අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස කාලගුණවිද්‍යා දෙපාර්තමේන්තුව ජනතාවගෙන් ඉල්ලා සිටිනවා.

16/01/2023

නිදහස් ජනතා සන්ධානයේ විශේෂ විධායක සභා රැස්වීමක් අද (16) පැවැත්වෙනවා.
උත්තර ලංකා සභාගය නියෝජනය කරන පක්ෂ සහ ශ්‍රී ලංකා නිදහස් පක්ෂය ඇතුළු පක්ෂ 12ක් එක්ව පසුගිය දා හෙලිකොප්ටරය ලකුණින් නිදහස් ජනතා සන්ධානය පිහිටවනු ලැබුවා.
ඒ අනුව එම සන්ධානයේ විධායක සභා රැස්වීම අද පස්වරු 6.00ට ශ්‍රී ලංකා නිදහස් පක්ෂ මුලස්ථානයේ දී එම රැස්වීම පැවැත්වෙන බව දේශපාලන ආරංචි මාර්ග සඳහන් කළා.
මෙහිදි ඉදිරි පළාත් පාලන මැතිවරණය සඳහා නාමයෝජනා භාරදීම සම්බන්ධයෙන් පක්ෂ අතර අවසන් එකඟතාවක් ඇති කර ගැනීමට නියමිතයි
කෙසේවෙතත් මේ වන ශ්‍රී ලංකා නිදහස් පක්ෂය එම සන්ධානයෙන් ඉවත් වීමේ සුදානමක් පවතින බවට වාර්තා වනවා.
ශ්‍රී ලංකා නිදහස් පක්ෂය එම සන්ධානයෙන් ඉවත් වී පළාත් පාලන මැතිවරණයට තනිව තරග කිරීම සම්බන්ධයෙන් යෝජනාවක් ඉදිරිපත් වී ඇති බව වාර්තා වනවා .
ඊයේ (15) දිනයේ ද මේ සම්බන්ධයෙන් ශ්‍රී ලංකා නිදහස් පක්ෂ නියෝජිතයින් අතර සාකච්ඡා වට කිහිපයක් පැවැත්වුණු අතර නව සන්ධානය සමග ඉදිරියට කටයුතු කරන්නේ ද ? නැද්ද ? යන්න පිළිබඳව එහිදි සාකච්ඡා වී තිබෙනවා.
ඒ සම්බන්ධයෙන් ගනු ලැබු තීරණ ශ්‍රී ලංකා නිදහස් පක්ෂ නියෝජිතයින් විසින් අද පැවැත්වෙන නිදහස් ජනතා සන්ධානයේ විශේෂ විධායක සභා රැස්වීමේ ප්‍රකාශයට පත්කරන බව පක්ෂ මහ ලේකම් දයාසිරි ජයසේකර මහතා සඳහන් කළා.

16/01/2023

පිළියන්දල පොලිස් වසමේ පැලැන්වත්ත ප්‍රදේශයේ දී යතුරුපැදියකින් පැමිණි පුද්ගලයෙකු විසින් තරුණියක් පැහැරගෙන ගොස් තිබෙනවා.
අදාළ සිදුවීම සම්බන්ධයෙන් ඊයේ (15) පිළියන්දල පොලීසියට ලද පැමිණිල්ලක් මත විමර්ශන ආරම්භ කළ බව පොලිස් මාධ්‍ය කොට්ඨාසය පැවසුවා.
පැහැරගැනීම සිදුකළ සැකකරු මැදවච්චිය ප්‍රදේශයේ පදිංචි නාවික හමුදා සෙබළෙකු වන විවාහක පුද්ගලයෙක් බව පොලීසිය පවසනවා.
සැකකරු විසින් පැහැරගත් තරුණිය සමග ප්‍රේම සබඳතාවයක් පවත්වා ඇති අතර, පසුව එය මාස 6කට පමණ පෙර නවතා දමා ඇති බව විමර්ශනවලදී හෙළිව තිබෙනවා.
ඒ සම්බන්ධයෙන් සැකකරු පැහැරගත් තරුණියට අවස්ථා ගණනාවක දී තර්ජනය කර ඇති බව ද පොලිස් විමර්ශනවලදී හෙළිව තිබෙනවා.
කෙසේවෙතත් පැහැරගැනීම සම්බන්ධයෙන් පිළියන්දල පොලීසිය විමර්ශන සිදුකරනවා.

16/01/2023

පුද්ගලික ආරවුලක් හේතුවෙන් තියුණු ආයුධවලින් පහරදී පුද්ගලයින් දෙදෙනෙකු ඝාතනය කර තිබෙනවා.
ඊයේ (15) රාත්‍රි කාලයේ ගිරිඋල්ල පොලිස් වසමේ උදියාවල ප්‍රදේශයේදී එම ඝාතනය සිදුව ඇති බව පොලීසිය පවසනවා.
එසේ මියගොස් ඇත්තේ, අවුරුදු 41 හා 39 වයසවල පසුවන දඹදෙණිය ප්‍රදේශයේ පදිංචිකරුවන් දෙදෙනෙක්.
ඉන් එක් පුද්ගලයෙක් පොලිස් විශේෂ කාර්ය බළකා සැරයන්වරයෙක් බව පොලීසිය පවසනවා.මෘත ශරීර දඹදෙණිය රෝහලේ මෘත ශරීරාගාරයේ තැන්පත් කර ඇති අතර මහෙස්ත්‍රාත් පරීක්ෂණය අද (16) සිදුකිරීමට නියමිතයි.
සැකකරුවන් අත්අඩංගුවට ගැනීම සඳහා ගිරිඋල්ල පොලීසිය වැඩිදුර විමර්ශන සිදුකරනවා.
මේ අතර වැල්ලම්පිටිය පොලිස් වසමේ ලංසියාවතත් ප්‍රදේශයේදී‍ කාන්තාවක් නිවසක් තුළ දී තියුණු ආයුධයකින් පහරදී ඝාතනය කර තිබෙනවා.
එසේ මියගොස් ඇත්තේ, 61 හැවිරිදි ලංසියාවත්ත, වැල්ලම්පිටිය ප්‍රදේශයේ පදිංචිකාරියක්.
මෙම ඝාතනය නිවසේ මෙහෙකාර කාන්තාව විසින් සිදුකර ඇති බවට අනාවරණය වී ඇති අතර සැකකාර කාන්තාව ප්‍රදේශයෙන් පළාගොස් තිබෙනවා සැකකාරිය අත්අඩංගුවට ගැනීම සඳහා වැල්ලම්පිටිය පොලීසිය වැඩිදුර විමර්ශන සිදුකරනවා.

16/01/2023

දකුණ, සබරගමුව, ඌව, බස්නාහිර, මධ්‍යම සහ වයඹ පළාත්වල සවස් කාලයේදී හෝ රාත්‍රී කාලයේදී තැනින් තැන වැසි හෝ ගිගුරුම් සහිත වැසි ඇතිවිය හැකි බව කාලගුණවිද්‍යා දෙපාර්තමේන්තුව පවසනවා.
එම දෙපාර්තමේන්තුව සඳහන් කරන්නේ, දකුණ, සබරගමුව සහ ඌව පළාත්වල සහ කළුතර දිස්ත්‍රික්කයේ ඇතැම් ස්ථානවලට මි. මී 75ක පමණ තරමක තද වැසි ද ඇතිවිය හැකි බවයි.
නැගෙනහිර පළාතේත්, පොළොන්නරුව දිස්ත්‍රික්කයේත් වැසි වාර කිහිපයක් ඇතිවනවා.
ගිගුරුම් සහිත වැසි සමග ඇතිවිය හැකි තාවකාලික තද සුළංවලින් සහ අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස කාලගුණවිද්‍යා දෙපාර්තමේන්තුව ජනතාවගෙන් ඉල්ලා සිටිනවා.

14/01/2023

2023 වර්ෂයට අදාළව පාසැල් සිසුන්ට නිල ඇදුම් ලබාදීම මාර්තු මස 20 වනදා ට පෙර සිදුකරන බව අධ්‍යාපන අමාත්‍ය සුසිල් ප්‍රේම්ජයන්ත මහතා පවසනවා.
ඔහු පවසන්නේ මෙරට පාසැල් සිසුන්ට වාර්ෂිකව අවශ්‍ය පාසැල් නිල ඇඳුම් අවශ්‍යතාවයෙන් සියයට 70 සපුරාලීමට චීන රජය එකඟතාව පළකර ඇති බවයි.
ඊට අදාළ පළමු රෙදි තොගය චීන රජය මඟින් අධ්‍යාපන අමාත්‍යාංශය වෙත ලබාදීම ඊයේ (13)සිදුකෙරුණා

14/01/2023

විදෙස්ගත ශ්‍රමිකයින්ගේ පවුල් වෙනුවෙන් සහන වැඩසටහනක් ආරම්භ කිරීමට ශ්‍රී ලංකා විදේශ සේවා නියුක්ති කාර්යංශය පියවර ගෙන තිබෙනවා.
ඒ අනුව විගමණික ශ්‍රමිකයින්ගේ දරුවන් වෙනුවෙන් පාසල් උපකරණ සහ ස්වයං රැකියා ආධාර ලබාදීමේ වැඩසටහනක් මෙලෙස ආරම්භ කර ඇති බව එම කාර්යංශය සඳහන් කළා
ජපානය, කොරියාව සහ ඔස්ට්‍රේලියාව යන රටවල හැර වෙනත් රටවල සිටින විගමණික ශ්‍රමිකයින්ගේ පවුල්වල එක් දරුවෙකු වෙනුවෙන් රුපියල් 5,000 ක පාසල් උපකරණ මෙහිදී ලබාදීමට නියමිතයි.
මීට අමතරව විදෙස්ගතව සිට මෙරටට පැමිණ වසර 5 ක කාලයක් නොඉක්මවූ ශ්‍රමිකයින්ගේ දරුවන්ට ද පාසල් උපකරණ ලබාගැනීමේ වැඩසටහන සඳහා අයදුම් කිරීමේ හැකියාව පවතිනවා.
මේ අතර විදෙස්ගතව සිට මෙරටට පැමිණ වසර 5 නොඉක්මවූ විගමණික ශ්‍රමිකයින් සඳහා රුපියල් 50,000 ක වටිනාකමින් යුක් ස්වයං රැකියා ආධාර ලබාදීමේ වැඩසටහනක් ද විදේශ සේවා නියුක්ති කාර්යංශය විසින් ආරම්භ කර තිබෙනවා.
මෙම සහන වැඩසටහන් සඳහා අයදුම්පත්‍ර ඉදිරිපත් කිරීමේ හැකියාව පවතින අතර මේ සම්බන්ධයෙන් ප්‍රාදේශිය ලේකම් කාර්යාලවල විදේශ රැකියා සංවර්ධන නිලධාරීවරයාගේ අවශ්‍ය උපදෙස් ලබා ගත හැකි බව විදේශ සේවා නියුක්ති කාර්යංශය පැවසුවා.

14/01/2023

මෙවර පළාත් පාලන ආයතන ඡන්ද විමසීමට අදාළව දේශපාලන පක්ෂ 11 ක් සහ ස්වාධීන කණ්ඩායම් 11ක් ඊයේ (13) ඇප මුදල් තැන්පත් කර තිබෙනවා.ඊයේ (13) පෙරවරු 08.30 සිට පස්වරු 04.30 දක්වා කාලය තුළ එම පක්ෂ සහ ස්වාධීන කණ්ඩායම් ඇප මුදල් තැන්පත් කර ඇති බව මැතිවරණ කොමිෂන් සභාව සඳහන් කළා.
ජාතික ජන බලවේගය නුවරඑළිය, මහනුවර, පොළොන්නරුව, අම්පාර, වව්නියාව, ගාල්ල සහ රත්නපුර යන දිස්ත්‍රික්ක සඳහා ඇප මුදල් තැන්පත් කිරිම ඊයේ දිනය තුළ සිදුකර ඇතැයි සඳහන් .
ශ්‍රි ලංකා පොදු ජන පෙරමුණ ද කෑගල්ල සහ රත්නපුර දිස්ත්‍රික්ක සඳහා ඇප මුදල් තැන්පත් කළ බව මැතිවරණ කොමිෂන් සභාව සඳහන් කළා.
එමෙන්ම ප්‍රජාතන්ත්‍රවාදී එක්සත් පෙරමුණ ද ඊයේ දිනයේ ගම්පහ සහ කොළඹ දිස්ත්‍රික්ක සඳහා ඇප මුදල් තැන්පත් කර තිබෙනවා.
ජාතික ප්‍රජාතන්ත්‍රවාදී පෙරමුණ ගම්පහ, හම්බන්තොට, බදුල්ල, අම්පාර සහ ගාල්ල යන දිස්ත්‍රික්ක සඳහා ඇප මුදල් තැන්පත් කර ඇති බව සඳහන් .
එමෙන්ම සමගි ජන බලවේගය ද මාතර, හම්බන්තොට, බදුල්ල සහ කළුතර යන දිස්ත්‍රික්ක සඳහා ඇප මුදල් තැන්පත් කිරිම ඊයේ සිදුකර තිබෙනවා.
සමාජවාදී සමානතා පක්ෂය, ශ්‍රී ලංකාවේ සමාජවාදී පක්ෂය, ජනතා සේවක පක්ෂය, සිංහලදීප ජාතික පෙරමුණ, නව ප්‍රජාතන්ත්‍රවාදී මාක්ස් ලෙනන්වාදී පන්ෂය සහ ඊළාම් ජනතා ප්‍රජාතන්ත්‍රවාදී යන පක්ෂය ද ඊයේ දිනයේ දිස්ත්‍රික්ක කිහිපයක් සඳහා ඇප මුදල් තැන්පත් කළ බව මැතිවරණ කොමිෂන් සභාව සඳහන් කළා
මීට අමතරව ඊයේ දිනයේ ස්වාධීන කණ්ඩායම් 11ක් ද මෙවර පළාත් පාලන ආයතන ඡන්ද විමසීම සඳහා ඇප මුදල් තැන්පත් කර තිබෙනවා

14/01/2023

ඉදිරි දින කිහිපයේදී, දිවයිනේ දකුණු අර්ධයේ අපරභාගයේ ගිගුරුම් සහිත වැසි ඇති වීමට හිතකර වායුගෝලීය තත්ත්වයක් ඇතිවෙමින් පවතින බව කාලගුණවිද්‍යා දෙපාර්තමේන්තුව පවසනවා.
දකුණ, සබරගමුව සහ ඌව පළාත්වලත් මහනුවර සහ නුවරඑළිය දිස්ත්‍රික්කවලත් ස්ථාන ස්වල්පයක සවස් කාලයේදී හෝ රාත්‍රී කාලයේදී වැසි හෝ ගිගුරුම් සහිත වැසි ඇතිවනවා.
දිවයිනේ සෙසු ප්‍රදේශවල ප්‍රධාන වශයෙන් වැසි රහිත කාලගුණ තත්ත්වයක් පවතිනවා.ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මගින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස කාලගුණවිද්‍යා දෙපාර්තමේන්තුව ජනතාවගෙන් ඉල්ලා සිටිනවා.

13/01/2023

එක්දින තරගවලදී වැඩිම පරාජයන් සංඛ්‍යාවක් ලැබූ රට බවට ශ්‍රී ලංකාව පත්ව තිබෙනවා. නවතම වාර්තාවන්ට අනුව එක්දින තරග 880කට ක්‍රීඩා කර ඇති ශ්‍රී ලංකා කණ්ඩායම මේ වන විට ඉන් තරග 437ක් පරාජයට පත්ව තිබෙනවා.
එක්දින තරග වලදී ශ්‍රී ලංකාවේ ජයග්‍රහණ ප්‍රතිශතය සීයයට 47.74ක් ලෙසයි සටහන් වනවා. 1990 වර්ෂයේ සිට 2011 වර්ෂය දක්වා ශ්‍රී ලංකා කණ්ඩායම එක්දින ජාත්‍යන්තර තරඟවල පාලනය සිය අතට ගැනීමට සමත්වූ කණ්ඩායමක් ලෙසයි වාර්තා පොත් අතරට එක්ව සිටියේ.
1996 වසරේ අර්ජුන රණතුංග ගේ නායකත්වයෙන් යුතුව ලෝක කුසලානය ජයග්‍රහණය කළ ශ්‍රී ලංකා පිලට අරවින්ද සිල්වා, සනත් ජයසුරිය, මහේල ජයවර්ධන, කුමාර් සංගක්කාර වැනි ලෝප්‍රකට ක්‍රීඩකයින් ගේ විශ්‍රාම යාමෙන් පසු තරග දිනවීමට හැකි ක්‍රීඩකයින් සොයා ගැනීමට නොහැකි වීම මෙම තත්ත්වයට පත්වීමට මුලික හේතුව වී ඇතැයි වාර්ථා වනවා.
එක්දින තරග වලදී වැඩිම පරාජයන් සංඛ්‍යාවක් ලැබූ දෙවන රට බවට අසල්වැසි ඉන්දියාව පත්ව සිටින අතර ඔවුන් ක්‍රීඩා කළ තරග 1022 කින් පරාජයට පත්වී ඇති තරග සංඛ්‍යාව 436ක් වනවා. එමෙන්ම ඕස්ට්‍රේලියාවට පසුව වැඩිම එක්දින තරග සංඛ්‍යාවක් ජයග්‍රහණය කර ඇති රට ලෙස දෙවන ස්ථානයේ පසුවන්නේ ඉන්දියාවයි. ඉන්දියාව ජයග්‍රහණය කර ඇති එක්දින තරග සංඛ්‍යාව 534ක්.

13/01/2023

අද (13) අලුයම හබරණ ගල්ඔය ප්‍රධාන දුම්රිය මාර්ග‍යේ දී මඩකලපුවේ සිට කොළඹ බලා ධාවනය වූ පුලතිසි
සිග්‍රගාමි දුම්රියෙ ගැටි වනඅලියෙකු මියගොස් තිබෙනවා.
මෙම වනඅලියා ගැටිම නිසා දුම්රියෙ ඉදිරිපස ඇන්ජීම පිලිපැන ඇති අතර අනතුර නිසා නැගෙනහිර පළාතේ
දුම්රිය ගමනා ගමනය ද මේ වන විට ඇණහිට ඇති බවයි වාර්තා වනවා.
මෙම අනතුරින් දුම්රිය මාර්ගයෙ මිටර් 15ක් පමණ දුරට වනඅලියා ඈදිගොස් තිබෙන අතර දුම්රිය මාර්ගයේ
අතුරා තිබූ කොන්ක්‍රීට් කණු 10ක් පමණ ද කැඩිගොස් තිබෙනවා.
අනතුරින් මිය ගිය වනඅලියා වසර 20ක් පමන වයස වන අලියකූ බවයි වනජීවි නිලධාරීයෙකූ සඳහන් කරනවා.

13/01/2023

වහාම ක්‍රියාත්මක වන පරිදි මොනරාගල කොට්ඨාසය භාරව සිටි ජ්‍යෙෂ්ඨ පොලිස් අධිකාරී සිසිල කුමාර හේරත්ගේ වැඩ තහනමට ලක්කර තිබෙනවා. ජාතික පොලිස් කොමිසමේ ආවරණ අනුමැතියට යටත්ව පොලිස්පතිවරයා විසින් මෙම තීරණය ගෙන ඇතයි සඳහන්.
ඒ අනුව පසුගිය 10 වනදා සිට ක්‍රියාත්මක වන පරිදි මොනරාගල කොට්ඨාසය භාරව සිටි ජ්‍යෙෂ්ඨ පොලිස් අධිකාරී සිසිල කුමාර හේරත් මහතාගේ වැඩ තහනම ක්‍රියාත්මක වනු ඇති.
අදාළ ජ්‍යෙෂ්ඨ පොලිස් අධිකාරිවරයාගේ නිල නිවසේ තිබී වේළීම සඳහා සකස් කර තිබූ ගංජා පැළ 650කට ආසන්න සංඛ්‍යාවක් සොයාගත් බව පොලීසිය පැවසුවා.මේ අතර සිදුකළ විමර්ශනවලට අදාළව අදාළ සිද්ධිය සම්බන්ධයෙන් ඇතිමලේ පොලීසියේ ස්ථානාධිපතිවරයාවද අත්අඩංගුවට ගෙන තිබෙනවා.
ඊට අමතරව මෙම සිද්ධිය සම්බන්ධයෙන් ජ්‍යෙෂ්ඨ පොලිස් අධිකාරී සිසිල කුමාර ගේ නිල රියදුරු ලෙස කටයුතු කළ පොලිස් කොස්තාපල්වරයා, නිවසේ රාජකාරි කළ පොලිස් සැරයන්වරයෙක්, මොනරාගල ප්‍රදේශයේ පදිංචිකරුවෙක් හා මොරටුව, එගොඩඋයන ප්‍රදේශයේ පදිංචිකරුවන් දෙදෙනෙකුත් අත්අඩංගුව ගෙන ඇතැයි සඳහන්.
සැකකරුවන් භාවිත කළ ජීප් රථයක් හා භූගත ලෝහ වැනි ද්‍රව්‍ය නිරීක්ෂණය කළ හැකි ස්කෑන් යන්ත්‍රයක් ද පොලිස් භාරයට ගෙන තිබෙනවා.

13/01/2023

ශ්‍රී ලංකා නිදහස් පක්ෂ කළුතර දිස්ත්‍රික් නායක හිටපු බස්නාහිර පළාත් මහ ඇමති රෙජිනෝල්ඩ් කුරේ
අභාවප්‍රාප්ත වී තිබෙනවා.ඊයේ රාත්‍රි වාද්දුව හෝටලයක පැවතී රැස්වීමක් අතරතුර හදිසි හෘද ආබාධයකට ලක් වී රෝහල් ගතකර
ඇති හිටපු මහ ඇමතිවරයා එම රෝහල් දී අභාවප්‍රාප්ත වී තිබෙනවා.පැවති රැස්වීම අතරතුර පපුව අල්ලාගෙන සිටි හිටපු මහ ඇමතිවරයා පානදුර මූලික රෝහලට ඇතුලත් කර ඇති අතර, ඔහුගේ තත්ත්වය බරපතළ බැවින් ගිලන් රථයකින් කළුතර ශීක්ෂණ රෝහලට යොමුකළ බවත්
වාර්තා වනවා.ඔහු මෙලෙස හදිසියේ රෝගාතුර වී ඇත්තේ ඉදිරි පලාත් පාලන මැතිවරණය සම්බන්ධයෙන් සහ අපේක්ෂකයන්
තෝරාගැනීම සදහා සාකච්ඡාව සිදුව ඇතැයි ද කරුණු වාර්තා වනවා. මෙම සාකච්ඡාවට ජාතික නිදහස් පෙරමුණ සහ ශ්‍රී ලංකා පොදුජන පෙරමුණේ නියෝජිතයන් පිරිසක්ද සහභාගි වී සිට ඇතැයි වාර්තා වනවා.