UdayaTv

11/05/2024

නැවුම් දළු සඳ....

පෙරාගෙන හොටු නාවර
ඇදගෙන ජංගි කොටය
එල්ලීගෙන අම්මාගේ චීත්තේ
බංගලාවේ කුස්සියේ දුව පැන්න

"දැන් හරි හැඩකාරියක් වෙලානේ
ලෙච්චමි උඹේ කෙල්ල..."

වත්තේ මහත්තයගේ ඇස් දෙකේ
ඇවිලෙන පුරුදු ගින්දර
ගිනි තිබ්බා
මැරුණ හදවතකට ආයෙම...

වියලුණ දෙතොළට
වැටුණා උණු කඳුලක් ලේ රහට...

බොඳවුණ දෑසින් ඈ බැලීය
දහසක් දොම්නස් විළිලා බිහි කළ
යාන්තමින් ඇස් අරින
පුංචි එරමුදු කැකුළ දෙස....

තවත් එක් කාලකණ්නි හැන්දෑවක
මෘග පහරින්
පෙති සිඳී තැලී පොඩිවන

අමාවකට ,
වැරදී නෙත් හරින
නැවුම් දළු සඳ දෙස...

කිසිත් නොදන්නා ලපටි සඳ
හිනැහෙනවා අහසම පිරෙන්නට....


උදයශාන්ත කුමාරසිංහ -

08/05/2024

මනමේට වැරදුණ තැන....

වැද්දාගේ කඩු පහරින් නොවේ මනමේ මියැදුණේ
කුමාරිය වැද්දාට කඩුව දුන් මොහොතෙයි
මනමේට කෙළවුණේ...
ඒ වෙලාවෙයි පපුව හොඳටම රිදුණේ
හදවත ❤️ නැවතිලයි කුමරු මියැදුණේ...

කෝකිලයින්ගේ රන් ස්වරය නැවතුනේ
රෑන ගිරවුන්ට ගී සිංදු පැටළුනේ
සුකුමාල පෙම් හිතක කිමද මේ සිදු වුණේ...
ගෑණු හිත් ගැන දිසාපාමොක් කියූ පාඩම වැරදුණේ...

ප්‍රේමයෙන් නෙත් අන්ධ වූ කල රජුන්ටත්
වැඩ වැරදුණේ
උරය පළලා රුහිරු පුදලත් සමහරුන් නෑ
නැවතුනේ
ප්‍රේමයට දිවි පුදා පැරදුන උන්ට කවි ගී
පබැඳුණේ
යසෝධරාගෙන් මිදුණු පසුවයි කුමරු සිදුහත්
බුදු වුණේ....

උදයශාන්ත කුමාරසිංහ ~
2024.05.08

02/05/2024

මගෙ ආලවන්ත සංකර බිසොවුන්
ගංදොරට නුඹේ පිරුවට හැඩ නෑ
මහ වැවේ සොරොව් දොර ඇරගෙන ගලනා සරදම්

නුඹෙ පුංචි හිතට දරන්න හැකිවේද මේ තරම්.....

කොටට කැපුව නීලවරළ
පාට පිරුණ සොඳුරු දෙතොල
තුන් යාමෙට ගම්මානේ කතා ගොඩගැහෙයි

නුඹෙ ඉංගිරීසි වදන් වලට උන්ට හිනායයි....

යාන් ඔයට කඩා වැටුණ
කඳුළු සලන අටවක සඳ
දෝතට ගෙන හිත හදන්න වදන් මට හිඟයි

අපේ ලොවට නුඹේ කඳුළු බොහොම බර වැඩියි....

උදයශාන්ත කුමාරසිංහ -

08/04/2024

සමනලයට වන්දනාව
මගහැරී ගියා.....


සිරීපාදේ වදින්න ගොස්
මංමුලා වෙලා
සමනලයෙක් උඩු හුළඟට
පියාඹා ගියා...

රෝස මලක ලස්සන ළඟ
ඇස් නතර වෙලා
සමනලයට වන්දනාව
මගහැරී ගියා...

සමනල හදවතක් උල්
නියෙන් පාරලා
රෝස මලක් හිනාවුණා
නටු අගට වෙලා...

සිරීපාදේ වදින්න ගොස්
මංමුලා වෙලා
සමනලයට වන්දනාව
මගහැරී ගියා...

උදයශාන්ත කුමාරසිංහ~

02/03/2024

තවත් සාර්ථක වැඩමුළුවක නිමාව... ස්තූතියි සහය දුන් සැමට...

02/03/2024

01/03/2024

වැඩමුළුව පෑවැත්වෙන ස්ථානය...

27/02/2024

ඔබේ දරුවා යහපත් පුරවැසියෙකු කරන්න....
නිවැරදි තැනකින් පටන් ගන්න...

එන්න අපිත් එක්ක ඉගිල්ලෙන්න..

අපේ පැටව් අනුරාධපුර කණ්ඩායමට දරුවන් බඳවා ගන්නා ළමා කුසලතා සංවර්ධන වැඩමුළුව....

2024.03.022 සෙනසුරාදා,
උදෑසන 09 ට
අනුරාධපුර පුල්ලෙයාර් හන්දිය

Mango Three
hotel & resort හීදී..

වැඩමුළු ගාස්තුව
රුපියල් 1000

හාවා ගියා කඩේ ප්‍රසංගයට මෙන්ම අනෙකුත් අපගේ නිර්මාණ සඳහා ඔබේ දරුවාට සම්බන්ධ වීමට ඇති මේ අවස්ථාව මඟ හැර නොගන්න.

වැඩමුළු අධ්‍යක්ෂණය,
ගී පද රචක,ළමා වැඩසටහන් අධ්‍යක්ෂක උදයශාන්ත කුමාරසිංහ

24/02/2024

සෑම දරුවෙක්ම සුවිශේෂී දරුවෙක්.....

සෑම දරුවෙක් තුළම ඔවුන්ට සුවිශේෂී විවිධ දක්ෂතා තියෙනවා. වැදගත්ම කාරණාව ඔවුන්ගේ දක්ෂතා අප විසින් හඳුනා ගැනීමයි.

දරුවන් නිරන්තරයෙන් වෙසෙන්නේ දෙමව්පියන්ගේ හා ගුරුවරුන්ගේ සෙවනෙයි. එනිසාවෙන් දරුවන් තුළ පවතින දක්ෂතාවයන් මෙන්ම හැකියාවන්ද හඳුනා ගත හැක්කේ ඔවුන්ටය.
තරඟකාරී අධ්‍යාපන ක්‍රමයත් ආවරණය කළ යුතු දැවැන්ත විෂය නිර්දේශයත් නිසාවෙන් ගුරුවරුන්ට දරුවන්ගේ බාහිර හැකියාවන් කෙරෙහි අවධානය යොමු කරන්නට ඇති කාලය අල්පයි. දෙමව්පියන්ද ඉතා දුෂ්කර ආර්ථික අභියෝග මැද දරුවන් පෝෂණය කරනවා විනා ඔවුන්ගේ ඇතුලාන්තයේ සැඟවී ඇති සුවිශේෂී හැකියාවන්ට කන් දීමට ඇති ඉඩ ප්‍රස්ථාව අවම වී සිටිනවා.

අපගේ ළමා කුසලතා සංවර්ධන වැඩමුළුවේ සුවිශේෂීම කාරණාව වන්නේ දරුවන් තුළ සැඟවී ඇති දක්ෂතාවන්, හැකියාවන්, නිපුණතාවයන් හඳුනා ගෙන ඒවා ඔපමට්ටම් කොට සංවර්ධනය කොට ඒවාට අවස්ථාවන් ලබා දී ඒ තුළින් ඔවුන්ගේ අනාගත ජීවිතය සාර්ථක යහපත් එකක් කර ගැනීමට අවශ්‍ය මූලික පියවර සකසා දීමයි.

ඔබේ දරුවා අප වෙත යොමු කරන්නට ඔබට ඇරයුම් කරන්නේ එනිසාවෙනි.

මා උපන් බිමේ මගේ ආදරණීය දුවා දරුවන් සමඟ මා මෙතෙක් කල් නෙළු අස්වැන්න ආදරයෙන් බෙදා ගන්නට මඟබලා සිටිනවා.

2024. 03. 02 සෙනසුරාදා
පෙරවරු 09 ට
අනුරාධපුර පුල්ලෙයාර් හන්දියේ

"Mango Three "
Hotel & Resort හීදී

" එන්න අපිත් එක්ක ඉගිල්ලෙන්න "

23/02/2024

අනුරාධපුර
"අපේ පැටව් "
වෙනුවෙන්...

18/02/2024

ආදරෙයි නන්දා
~~~~~~~~~~

ආදරෙයි නන්දා..
මං හරි ආදරෙයි නන්දා

රැයට කළුවර අන්දා
සඳ හැංගුනේ ඇයි ද මන්දා
හිතට දුක වැඩි හින්දා
හිත හොරෙන් ඉකිබින්ඳා...

ආදරෙයි නන්දා
මං හරි ආදරෙයි නන්දා...

මහමෙරක හීන බන්දා
ඒ ළඟින් කඳුලකුත් රන්දා
අතරමඟ අත්හැරෙන හින්දා
කුමට මෙතරම් ළංවුනිද මන්දා
මං හරි ආදරෙයි නන්දා....

ආදරෙයි නන්දා
මං හරි ආදරෙයි නන්දා...

වසන්තය දුර හින්දා
කැකුළු මල් නටු අගින් මිදුනා
තනි යහන නිදි සුවය හංගා
සිංහලේටත් නුඹෙ සුවඳ දැනුනා
මං හරි ආදරෙයි නන්දා....

ආදරෙයි නන්දා...
මං හරි ආදරෙයි නන්දා...

උදයශාන්ත කුමාරසිංහ~

මීට අවුරුදු තුනකට පෙර ලියූවක්. අද නැවත වරක් සංස්කරණය කරන්නට හැකි වුණා. මෙය පළමු වරට පළකළ අවස්ථාවේ ආදරණීය නන්දා පුණ්‍යා හීන්දෙණිය මහත්මිය අගය කොට තිබුණා. ඈත්තටම එය මගේ ජීවිතයට මා ලැබූ ඉහළම අගය කිරීමක්. ස්තූතියි හැම දෙනාටම. දිනෙක ගීතයක් බවට පත්වෙනවා දකින්නට කැමති පදමාලාවක්.

26/01/2024

හෙට උදෑසන 09.00ට හෝමාගම ස්පේස් පාර්ක් හීදී ළමා කුසලතා සංවර්ධන දෙදින වැඩමුළුව පැවැත්වෙයි.
ආරම්භක දේශනය හා ප්‍රායෝගික පුහුණුව ප්‍රවීණ රංගනවේදී සරත් කුලාංග මහතා සමඟ රංගනවේදය....
සවස කාලය නිවේදනය හා කථික පුහුණුව ජාතික රූපවාහිනියේ ප්‍රවීණ සංවේදිකා නීතීඥ යශෝමි විජේරත්න මහත්මිය....
හරි තැනකින් ගමන ආරම්භ කරන්න ඔබේ දරුවා අප වෙත යොමු කරන්න.

20/01/2024

ඔබේ දරුවා යහපත් පුරවැසියෙකු කරන්න....
නිවැරදි තැනකින් පටන් ගන්න...

එන්න අපිත් එක්ක ඉගිල්ලෙන්න..

අපේ පැටව් ළමා කණ්ඩායමට දරුවන් බඳවා ගන්නා ළමා කුසලතා සංවර්ධන දෙදින වැඩමුළුව....

2024.01.27/28 සෙනසුරාදා, ඉරිදා
හෝමාගම ස්පේස් පාර්ක් හීදී
ඔබේ දරුවා ඇතුලත් කිරීම සඳහා පහත අංකයට Whatsapp මඟින් අමතන්න
0712177421

වැඩමුළු ගාස්තුව
රුපියල් 3000

පුහුණුවෙන් පසු දිවයින පුරා පවත්වන හාවා ගියා කඩේ ප්‍රසංගයට මෙන්ම අනෙකුත් අපගේ නිර්මාණ සඳහා ඔබේ දරුවාට සම්බන්ධ වීමට ඇති මේ අවස්ථාව මඟ හැර නොගන්න.

සම්පත් දායකත්වය,
රංගනය ,
ප්‍රවීණ රංගන ශිල්පී සරත් කුලාංග
සංගීත භාවිතාව,
ප්‍රවීණ සංගීතඥ විශාරද කරුණාරත්න විජේවර්ධන
නර්තනය,
ප්‍රවීණ බැලේ නර්තනාචාර්ය දිනේන්ද්‍ර පනාවල
නිවේදන හා කථික පුහුණුව,
ජාතික රූපවාහිනියේ සංනිවේදිකා
නීතිඥ යශෝමි විජේරත්න
නිර්මාණශීලි ලේඛණය හා වැඩමුළු අධ්‍යක්ෂණය,
ගී පද රචක,ළමා වැඩසටහන් අධ්‍යක්ෂක උදයශාන්ත කුමාරසිංහ

10/01/2024

24/12/2023

හෝර්ටන් තැන්න - ඔහීය මාර්ගය

24/12/2023

Water world - kelaniya

01/09/2022

අදින් ඇරඹෙන සාහිත්‍යය මාසය නිමිත්තෙනි...

සිංහල කවීන්ගේ ස්වාධීනත්වය....

ග්‍රන්ථාගත සිංහල සාහිත්‍යය, විශේෂයෙන්ම පද්‍යය, දෙස බලන කල්හි අපට ඉතා පැහැදිලිව පෙනෙන දෙයක් නම් එයට ලැබී ඇති සංස්කෘත බලපෑමයි. එතරම් ප්‍රබල සාහිත්‍ය සම්ප්‍රදායක් නොපවතිනා රටක හෝ අවස්ථාවක අසල්වැසි රටක ප්‍රබල සාහිත්‍යයක් පවත්නේ නම් ඉන් ආභාසයක් ලැබීම කොහි වුවද සිදු වන්නකි. සිංහල සාහිත්‍යය සම්බන්ධයෙන්ද මෙය සාධාරණ සිද්ධාන්තයක් විය. මුලින්ම සිංහලයට බලපෑවේ පාලි සාහිත්‍යය ‍සම්ප්‍රදායයි. අනතුරුව සංස්කෘත සාහිත්‍ය සම්ප්‍රදායයි. පාලි සාහිත්‍යය ලෝකෝත්තර අරමුණු පෙරදැරි කරගෙන රචිත ආගමික සාහිත්‍යයක් විය.සංස්කෘතය එසේ නොව ලෝකෝත්තර මෙන්ම ලෞකික වූද විවිධ ක්ෂේත්‍රයන් අළලා රචිත ග්‍රන්ථ සම්භාරයකින් යුක්ත වූවකි. පාලියට මෙන් නොව දියුණු වූ ඡන්දස් ශාස්ත්‍රයක්ද එයට පැවතිණ.පතංජලි, කේදාරභට්ට ආදිහූ එය දියුණු කිරීමෙහිලා විශාල සේවයක් ඉටු කළහ. මෙවන් තත්ත්වයක් යටතේ රසාස්වාදනය පෙරදැරි කරගෙන කාව්‍යකරණයට බසින කවියෙකු විවිධ වර්ණ,ගන්ධ හා ආකෘතීන්ගෙන් යුක්ත අලංකාර උද්‍යානයක් වැනි සංස්කෘත කාව්‍යයෙන් වශී වීම පුදුමයක් නොවේ. මෙය කොතරම් ප්‍රබල වීද යතහොත් පැරණි සිංහල සම්භාව්‍ය කවීන් විෂයෙහි ඔවුන්ගේ ස්වාධීනත්වයට පවා හානිකර ප්‍රපංචයක් විය.

කෙසේ වුවද මේ තත්වයෙන් මිදී පවත්නා කාව්‍යාංශයක්ද තවමත් සිංහලයේ පවතී. ඒ වනාහී ජනකවි සාහිත්‍යයයි. මේ අතින් බලන කල්හි නම් සීගිරි ගීයද ජනකවියට සමාන කළ හැකිය.මේ දෙකෙහිම ස්වාධීනත්වය ආරක්ෂා වී තිබීමට එක් සරල සාධාරණ හේතුවක්ද වෙයි. එනම් ජනකවි සියල්ලටම පාහේත් සීගිරි ගී විශාල විශාල සංඛ්‍යාවකටත් සරල කවි සංකල්පනා පදනම් වී තිබීමය. ඕනෑම සහජ කවියෙකුට අපූරු කෙටි කවි සංකල්පනාවක් දෙකක් පහළ වෙයි. එය ඒ පහළ වූ ආකාරයටම ප්‍රකාශ කළද ඉන් ඔහුගේ කවීත්වය විශද වෙයි. මේ කවි ශක්තිය ඉබේ වර්ධනය වන්නේ නොවේ. එය ඔහු විසින් වෑයමෙන් වර්ධනය කරගත යුතු වෙයි. මේ සඳහා වෙනත් කාව්‍ය නිර්මාණ විශාල වශයෙන් පරිභාවිතා කිරීම අවශ්‍යය. ආභාසය, බලපෑම ආදිය පිළිබඳ ප්‍රශ්න පැන නගින්නේ මෙහිදීය. කාව්‍ය ග්‍රන්ථ නිර්මාණය කරන කවීන්ට මුහුණ දීමට සිදු වන්නේද මේ ප්‍රශ්නයටය. අද සිංහල කවීන් විදේශීය සාහිත්‍යයන්ගෙන් විශේෂයෙන් ඉංග්‍රීසි - ආභාසය ලබන්නාක් මෙන් පැරණි කවීහූ එදා පැවති පොහොසත් ලෞකික සාහිත්‍යය වූ සංස්කෘතයෙන් ආභාසය ලැබූහ. පුළුල් ලෙස කාව්‍ය රචනාවෙහි නොයෙදූණූ ජනකවීන්ට මෙන්ම සීගිරි කවීන්ටද මෙවැන්නක් අවශ්‍ය නොවීය.

අර්ථ, උපමා, අලංකාර ආදිය අතින් සංස්කෘත කවීන්ට සිංහල කවීන් දක්වා ඇති ණයගැතිභාවය ඉස්මතු කරමින් බොහෝ උගතුන් විසින් ලිපි ලේඛන ලියා පළ කොට ඇත. එහෙත් මේ කවුරුත් සිංහල කවීන්ගේ ස්වාධීනත්වයක් ගැන කතා කර ඇත්නම් ඒ ස්වල්ප වශයෙනි.

උපුටා ගැනීම -

කේ. ජයතිලක
සීගිරි ගී
සංස්කෘතික පුස්තිකා මාලා -7
සංස්කෘතික කටයුතු දෙපාර්තමේන්තුවේ ප්‍රකාශනයකි.
1997