Renu S Pillai

06/08/2024

When My Daughter Made an Unexpected Connection: A Lesson in Early Learning and AI 😊

When I started learning Machine Learning, my daughter was just two years old. Watching her learn to speak, I became fascinated by the sources of the words she used. I was, in a way, watching the dataset of my own model grow. 📊👶
One day, when she was around three or four, we sat down to watch Anaconda 3. We missed the introduction, so my niece filled us in on the plot. The next morning, as I was leaving for work, my daughter asked me a question that took me by surprise:
“Amma, do you have an anaconda in your office?” 🐍
I smiled and replied, “Lots of them.” 😄
“Whose anaconda is it? Are you going to feed it?” 🤔
Her questions made me pause. How had she made this connection?
After some thought, I remembered my niece’s words: “They are doing research with anacondas. She is a doctor and is taking care of the anacondas.” 🩺🔬
She also knew that I am a doctor, doing research in a lab. She had connected three features: research, doctor, and lady.
It struck me that sometimes, even at an early stage, our minds—and our language models—work in similar ways, making intuitive connections from seemingly unrelated pieces of information. 💡🤖
It’s a reminder to be mindful of the data we consume and the connections we make, whether in AI or life. 🌟

21/11/2023

20/11/2023

The flavors of happiness have been added to everyone's life. Instead of comparing yourself to others, you need to find it within!!!!!

17/11/2023

ഒരു ചെറിയ മോട്ടിവേഷൻ

കഴിഞ്ഞ ദിവസം ഒരു സ്റ്റാൻഡ് അപ്പ് കോമഡി കണ്ടപ്പോഴാണ് ഒരു സുഹൃത്തിനെ കുറിച്ച് ഓര്മ വന്നത്. ജീവിതത്തിലെ ഓരോ ചെറിയകാര്യവും
നല്ല ബിൽഡ് അപ്പ് ഒക്കെ കൊടുത്തു തമാശയാക്കി അവൻ അവതരിപ്പിക്കാറുണ്ട് . എന്നാൽ അവനെ വിളിച്ചു ഒന്ന് മോട്ടിവേറ്റ് ചെയ്യാം ...... ഒരു വോയിസ് മെസ്സേജ് അയച്ചാലോ ..... അല്ലെങ്കിൽ വേണ്ട ഒരു ടെക്സ്റ്റ് മെസ്സേജ് അയച്ചേക്കാം.

ഡാ... നീ സ്റ്റാൻഡ് അപ്പ് കോമഡി കാണാറുണ്ടോ .... ഞാൻ കഴിഞ്ഞാഴ്ച ഒരെണ്ണം കണ്ടു .....അപ്പോഴാ എനിക്ക് തോന്നിയത് നിന്നെക്കൊണ്ടു നന്നായി പറ്റും. അവരൊക്കെ ഓരോ ചെറിയ ചെറിയ കാര്യങ്ങൾ വച്ചിട്ട അവതരിപ്പിക്കുന്നത്. ചിലർക്ക് പിന്നെ വല്യ തീം ഒന്നും കാണില്ല .... നീ പറയുന്നതിനേക്കാളും ഊള കാര്യങ്ങളൊക്കെയാ അവര് പറയുന്നത്..... പിന്നെ ചളി ഒന്നും നിന്റെ അടുത്തുപോലും വരില്ല .... ...പിന്നെ .....പകുതി കൂടുതൽ ആൾക്കാരും അത്ര വല്യ സ്റ്റാൻഡേർഡ് ആയിട്ടൊന്നും അല്ല സംസാരിക്കുന്നതു....അതുകൊണ്ടാ എനിക്ക് തോന്നിയത് നിനക്ക് എന്തായാലും രക്ഷപെടാൻ പറ്റു എന്ന് ....നീ ഒന്ന് ട്രൈ ചെയ്തു നോക്കു....

എഴുതിക്കഴിഞ്ഞപ്പോ എനിക്ക് ഒരു സംശയം "എന്തോ ഒരു കുഴപ്പം ഇല്ലേ".... ഇതു വായിച്ചാ അവൻ മോട്ടിവേറ്റ് ആകുമോ അതോ വണ്ടി വിളിച്ചു ഇവിടെ വന്നു എന്നെ പഞ്ഞിക്കിടുമോ? എന്ന പിന്നെ അയക്കേണ്ട പോസ്റ്റ് ചെയ്തേക്കാം .... എന്തായാലും എഴുതിയതല്ലേ ......

ഓരോ കാര്യങ്ങൾ ചെയ്യുന്നതിന് മുന്നേ രണ്ടു വട്ടം ആലോചിക്കണം എന്ന് പറയുന്നതു ഇതിനാകും .....

17/11/2023

ആരാണ് വിഡ്ഢി

എന്തെങ്കിലും എഴുതിയാലോ എന്ന ചിന്തയിൽ ലാപ്‌ടോപ്പിന് മുന്നിലിരുന്നപ്പോഴാണ് പഠിക്കാൻ ഒരുപാടു ഉണ്ട് ക്ലാസ് വച്ചതാ എന്ന ആവശ്യവുമായി ഒരു Pre K G കാരി വന്നത്. ക്ലാസ്സു കാണാൻ ഒരു മൂഡില്ല ഒരു കഥ വച്ചതാ അടുത്ത ആവശ്യം ഉടനെ വന്നു. വിഡ്ഢിയായ കാക്കയുടെ കഥ ടീച്ചർ പറയുന്നത് കേട്ടുകൊണ്ടിരുന്നു. ഒരിക്കൽ ഒരു കാക്കയ്ക്ക് ഒരു നെയ്യപ്പം കിട്ടുന്നു. കാക്ക അതുമായി മരക്കൊമ്പിൽ വന്നിരിക്കുന്നു. അപ്പൊ അതുവഴി വന്ന കുറുക്കൻ അതുകണ്ടു കാക്കയോട് ഒരു പാട്ടു പാടാൻ ആവശ്യപ്പെടുന്നു. കാക്ക പാട്ടു പാടാൻവേണ്ടി വായ് തുറക്കുമ്പോൾ നെയ്യപ്പം താഴെ വീഴുന്നു. കുറുക്കൻ അതുമായി ഓടുന്നു. ഇതിന്റെ അനിമേഷനും സ്‌ക്രീനിന്റെ സൈഡിൽ കാണുന്നുണ്ട്. കുറുക്കൻ ഓടിപ്പോയതും അവളുടെ ആദ്യത്തെ സംശയം
"കാക്കയുടെ വായിൽ നിന്നു വീണ നെയ്യപ്പം തിന്നുമ്പോൾ കുറുക്കന് ഓക്കാനം വരില്ലേ ?" 🤮
അവളുടെ മുഖത്തെ expression കണ്ടാൽ ആ കുറുക്കൻ മാത്രമല്ല അതിന്റെ അടുത്തിരിക്കുന്ന മൃഗങ്ങൾ കൂടി ഓക്കാനിക്കും.
"ഇല്ലായിരിക്കും അതുകൊണ്ടല്ലേ തിന്നത് " എനിക്ക് വേറൊന്നും പറയാനില്ല
അപ്പോഴേക്കും അടുത്ത സംശയം വന്നു
"ആരുടേങ്കിലും വായിൽ നിന്ന് വീഴുന്നത് കഴിച്ചാൽ കൊറോണ വരില്ലേ "
"വരും " അതിൽ എനിക്കും സംശയമൊന്നും ഇല്ല
"അതാ ഞാൻ പറഞ്ഞത് "
അവളുടെ നോട്ടത്തിൽ കുറുക്കനാണ് വിഡ്ഢി ..... വല്ലവരുടെയും വായിൽനിന്നു വീഴുന്നത് എടുത്തു കഴിക്കുന്നതാണ് ഏറ്റവും വലിയ വിഡ്ഢിത്തരം .... എല്ലാരേയും എല്ലാ കാലത്തും വിഡ്ഢികളാക്കാൻ പറ്റില്ല എന്ന് പറഞ്ഞു കേട്ടിണ്ടു എങ്കിലും ഇന്നലെ വരെ ബുദ്ധിമാനായിരുന്ന കുറുക്കനാനായിരുന്നു ഇന്നിപ്പോ വിഡ്ഢിയായി. കാലഘട്ടത്തിനു അനുസൃതമായി കഥകളൊക്കെ മാറ്റേണ്ട സമയമായിത്തുടങ്ങി.

എനിക്ക് ഒന്നും പറയാനില്ലായിരുന്നു, ഇതു പഴയ കഥയാണ് എന്ന് പറഞ്ഞാൽ പിന്നെ പുതിയ കഥ പറഞ്ഞു കൊടുക്കാൻ പറയും …..ഇങ്ങനെയുള്ള സന്ദർഭങ്ങളിൽ മിണ്ടാതിരിക്കുന്നതാണ് ബുദ്ധി....ക്ഷമ ആട്ടിൻ സൂപ്പിന്റെ ഫലം ചെയ്യും എന്ന് കേട്ടിട്ടുണ്ട് ..ക്ഷമ മാത്രമല്ല മൗനവും ചിലപ്പോഴൊക്കെ ആട്ടിൻ സൂപ്പിന്റെ ഫലം ചെയ്യാറുണ്ട് . ഒരേ കഥയുടെ സാരാംശം ഓരോരുത്തരും ഉൾക്കൊള്ളുന്നത് അവരുടെ അറിവിന്റെയും സംസ്കാരത്തിന്റെയും അടിസ്ഥാനത്തിലായിരിക്കും. എന്തായാലും പറ്റിക്കപ്പെടുന്നവർക്കും നീതി കിട്ടും എന്ന് ഉറപ്പായി.

16/11/2023

അമ്പമ്പട രാവണാ...

രാവണൻ ഒരു സാങ്കല്പിക കഥാപാത്രമാണോ .....? അതോ ജീവിച്ചിരുന്നിട്ടുണ്ടോ .......? അതിനെക്കുറിച്ച് പലതരത്തിലുള്ള ചർച്ചകളും നടക്കുന്നുണ്ട്.... അതൊക്കെ അവിടെ നിൽക്കട്ടെ..... ഉത്തര രാമായണത്തിൽ ഒരു കഥ പറയുന്നുണ്ട്.... രാവണൻ കുബേരനെ പരാജയപ്പെടുത്തി പുഷ്പക വിമാനം മോഷ്ടിച്ച് അതിൽ ഇങ്ങനെ പറന്നു പോകുകയാരിന്നു. വിമാനമുള്ള ഏക വ്യക്തിയായതുകൊണ്ടുതന്നെ പ്രതേകിച്ചു air route കളൊന്നും നോക്കേണ്ട ആവശ്യമില്ല. ഏതു വഴി വേണമെങ്കിലും പറപ്പിക്കാം. രാവണൻ ഇങ്ങനെ പ്രകൃതി ഭംഗി ആസ്വദിച്ചു പറന്നു പോകുമ്പോൾ വിമാനം പെട്ടന്ന് നിന്നുപോയി. എന്താണ് കാര്യം എന്ന് രാവണന് മനസ്സിലായതും ഇല്ല. താഴേക്ക് നോക്കിയപ്പോ അവിടെ ഒരാള് നിൽക്കുന്നുണ്ട് , അയാളോട് കാര്യം അന്വേഷിച്ചു.
"ഇതെന്താ ഈ മലയുടെ മുകളിലൂടെ പറക്കാൻ പറ്റാത്തത്. “
"ഈ മലയുടെ മുകളിലൂടെയോ...... ഇതു കൈലാസം ആണ്.... ശിവനും പാർവതിയും വസിക്കുന്ന സ്ഥലം ......ഇതിനുമുകളൂടെ വിമാനം പോകില്ല ....."
" നീയാരാ .....?"
"ഞാൻ നന്ദികേശൻ.... കൈലാസത്തിന്റെ ഒരു കാവൽക്കാരനെന്നോ രക്ഷധികാരിയെന്നോ ഒക്കെ വേണെമെകിൽ പറയാം "
"കൈലാസം ഇവിടെ ഉള്ളതുകൊണ്ടാണോ വിമാനം പോകാത്തത് ?"
"അതെ ....കൈലാസത്തിനു മുകളിലൂടെ പറക്കാൻ നിങ്ങൾക്ക് കഴിയില്ല "
"എന്നാൽ പിന്നെ കൈലാസം എടുത്തു അങ്ങോട്ട് മാറ്റിവച്ചേക്കാം..... അപ്പൊ പ്രശ്നങ്ങളെല്ലാം തീരുമോ ?"
"ഇതുവരെ ആരും അങ്ങനെ ചെയ്തു കണ്ടിട്ടില്ല.... അതുകൊണ്ടുതന്നെ അതിന്റെ ഫലം എന്തായിരിക്കും എന്ന് എനിക്ക് പറയാൻ കഴിയില്ല..... ".
പത്തു തലയുള്ളതിന്റെ അഹങ്കാരമാണോ ? ഇരുപതു കൈയ്യുള്ളതിന്റെ അഹങ്കാരമാണോ എന്തായാലും അഹങ്കാരത്തിനു കുറവൊന്നും ഇല്ല.
രാവണൻ പതുക്കെ കൈകൾ കൈലാസത്തിന്റെ അടിയിലേക്ക് കയറ്റി, കൈലാസം ഒന്ന് കുലുങ്ങി , ശിവ ഭഗവൻ നോക്കിയപ്പോ ദാ.... ഒരുത്തൻ കൈലാസം എടുക്കാൻ പോകുന്നു..... എന്ന പിന്നെ ഉറച്ചു നിന്നേക്കാം...... ശിവൻ പതുക്കെ ഉപ്പൂറ്റി ഒന്ന് നിലത്തേക്ക് ഉറപ്പിച്ചു....
കൈലാസം അവിടെ ഉറച്ചു മാത്രമല്ല രാവണന്റെ കൈകൾ കൈലാസത്തിനു അടിയിലും പെട്ടുപോയി. രാവണൻ വേദന കൊണ്ട് കരഞ്ഞു.... ഒരു രക്ഷയും ഇല്ല കൈകൾ എടുക്കാൻ പറ്റുന്നേയില്ല.....
അഹങ്കാരം എല്ലാം അടങ്ങിയപ്പോ മനസിലായി കരഞ്ഞിട്ട് കാര്യമില്ല ഭക്തികൊണ്ടു മാത്രമേ ഭഗവാനെ പ്രസാദിപ്പിക്കാൻ സാധിക്കു എന്ന്. അങ്ങനെ കരച്ചിൽ നിർത്തി രാവണൻ ശിവ സ്തുതികൾ ആലപിക്കാൻ തുടങ്ങി. ആയിരം വർഷം അവിടെ നിന്ന് ഭക്തിപൂർവ്വം ശിവസ്തുതികൾ പാടി ശിവനെ പ്രസാദിപ്പിച്ചു എന്നാണ് പറയപ്പെടുന്നത്. ഈ ശിവ സ്തുതികൾ പിന്നീട് ശിവ താണ്ഡവ സ്തോത്രം എന്നറിയപ്പെട്ടു.
ആ സ്തോത്രം നമ്മളെ നന്നായി പരിചയപ്പെടുത്തിയത് രാജ മൗലി യാണ്. ബാഹുബലി സിനിമയിൽ ശിവലിംഗം എടുത്തു കൊണ്ട് പോകുമ്പോൾ കേൾപ്പിക്കുന്ന സംസ്‌കൃത സ്തോത്രം. നന്ദനം സിനിമയിലും അത് കേൾപ്പിക്കുന്നുണ്ട് പക്ഷെ നമ്മൾ അത്ര ശ്രദ്ധിച്ചിട്ടില്ല.
"ജടാ തവീ ഗല ജല പ്രവാഹ പാവിത സ്തലേ
ഗലേവലബ്യ ലംബിതാം ഭുജംഗ തുംഗ മാലികാം
ഡമ ഡമ ഡമ ഡമ നിന്നാദവഡമര്‍വയം
ചകാര ചന്ദ താണ്ഡവം തനോതു ന: ശിവ ശിവം..................................................................."
ഇതു രാവണന്റെ വരികളാണ് .
യു ട്യൂബിൽ സെർച്ച് ചെയ്താൽ കിട്ടും. ഒരിക്കലെങ്കിലും അതൊന്നു കേട്ടാൽ മനസിലാകും രാവണന്റെ പ്രതിഭ. രാവണൻ ഒരു സംസ്‌കൃത പണ്ഡിതനായിരുന്നു ബുക്കുകൾ ഒക്കെ എഴുതിയിട്ടുണ്ട്.
രാവണൻ ജീവിച്ചിരുന്നാലും സങ്കല്പികമായാലും യുഗങ്ങൾ കടന്നു വരാൻ തക്ക ശക്തിയുള്ള രചനകൾ നടത്താൻ കഴിവുള്ള വ്യക്തികൾ അല്ല രാവണൻമ്മാർ ജീവിച്ചിരുന്നു എന്ന് സമ്മതിച്ചേ മതിയാകു.

15/11/2023

സംസ്‌കൃതം ക്ലാസ്

ഭാഷ അറിയാത്തതുകൊണ്ട് ആദ്യമായി ആശയവിനിമയത്തിന് ബുദ്ധിമുട്ടു നേരിടുന്നത് അമൃതയിൽ പി ജി ക്കു പഠിക്കുമ്പോഴായിരുന്നു. അന്ന് ഒരു സംസ്‌കൃതം ക്ലാസ്സിനു ചേർന്നു. ഫസ്റ്റ് ലെവൽ ക്ലാസ് ആണ്. ഒരു മാസത്തെ ക്ലാസ് ആയിരുന്നെന്നു തോന്നുന്നു. ഇന്നും ആ ക്ലാസ് ഓർക്കാൻ കഴിയുന്നത് ആ ക്ലാസ്സിന്റെ മനോഹാരിതകൊണ്ടാണ്. ക്ലാസ് ഒക്കെ നല്ലതാണെങ്കിലും ഈ റോസാപ്പൂവിനു താഴെ കാണുന്ന മുള്ളുപോലെ കുറച്ചു കുറച്ചു നിയമങ്ങൾ അവിടെയും ഉണ്ടായിരുന്നു. അതിലെ ആദ്യത്തെ നിയമമാണ് ക്ലാസ്സിൽ സംസ്‌കൃതത്തിൽ മാത്രമേ സംസാരിക്കാൻ പാടുള്ളു. ഉറക്കത്തിൽ പോലും സംസാരിച്ചു കൊണ്ടിരിക്കുന്ന ഞാനും എന്റെ റൂംമേറ്റും ഒരക്ഷരം പോലും സംസാരിക്കാതെ ക്ലാസ്സിൽ ഇരുന്നു. വേറെ എന്തൊക്കെ വർക്ക് ഉണ്ടെകിലും ഹോം വർക്ക് ഞങ്ങൾ കൃത്യമായി ചെയ്യും കാരണം എഴുന്നേറ്റുനിന്നു "ഹോം വർക്ക് ചെയ്യാത്തതിന്റെ കാരണം സംസ്‌കൃതത്തിൽ പറയാൻ അറിയില്ലല്ലോ ". എല്ലാ ദിവസവും നേരത്തെ ക്ലാസ്സിൽ എത്തും കാരണം താമസിച്ചു വന്നാൽ പിന്നെ ചോദിക്കുന്ന ചോദ്യങ്ങൾ കേട്ടാൽപോലും മനസ്സിലാകില്ല. അങ്ങനെ വളരെ ഭംഗിയായി ഓരോ ദിവസവും ക്ലാസ് കഴിഞ്ഞുകൊണ്ടിരുന്നു. എങ്ങനെ ഒക്കെ പറഞ്ഞാലും ക്ലാസ് ഭയങ്കര രസമായിരുന്നു. അങ്ങനെയിരിക്കെ ഒരു ദിവസം ഞങ്ങൾ ലാബ് കഴിഞ്ഞു ഇറങ്ങിയപ്പോ താമസിച്ചു, ഓടി ക്ലാസ്സിന്റെ അടുത്തെത്തിയപ്പോൾ ക്ലാസ് തുടങ്ങി എന്ന് മനസ്സിലായി. "ഞാൻ ക്ലാസ്സിൽ കയറിക്കോട്ടെ " ഈ വാചകത്തിന്റെ സംസൃതം ഞങ്ങൾക്ക് രണ്ടുപേർക്കും അറിയാം പക്ഷേ അങ്ങനെ അല്ലല്ലോ ചോദിക്കേണ്ടത് "ഞങ്ങൾ ക്ലാസ്സിൽ കയറിക്കോട്ടെ എന്നാണ് " അത് ചോദിക്കാൻ ഞങ്ങൾക്ക് രണ്ടുപേർക്കും അറിയില്ല. അവിടെച്ചെന്നു ഞാൻ കയറിക്കോട്ടെ എന്ന് ചോദിച്ചാൽ തിരിച്ചു ചോദ്യങ്ങളുടെ പെരുമഴയായിരിക്കും. ഞങ്ങൾ ഒരുമിച്ചു പോകുമ്പോഴല്ലേ പ്രശ്നമുള്ളു, ആദ്യം അവള് പോയി "ഞാൻ കയറിക്കോട്ടെ " എന്ന് വളരെ ആത്മവിശ്വാസത്തോടെ ചോദിച്ചു അതുകേട്ടു ടീച്ചറിനും സന്തോഷമായി കയറിക്കൊള്ളു എന്ന് പറഞ്ഞു അല്പസമയം കഴിഞ്ഞു ഞാൻ വന്നു അതെ ആത്മവിശ്വാസത്തോടെ "ഞാൻ ക്ലാസ്സിൽ കയറിക്കോട്ടെ " എന്ന് ചോദിച്ചു. ടീച്ചര് വീണ്ടും ഹാപ്പി നേരെ കയറ്റിവിട്ടു. ഉള്ളതുകൊണ്ട് ഓണം പോലെ എന്ന പഴം ചൊല്ലിന്റെ അർത്ഥം ശരിക്കും മനസിലായത് അപ്പോഴാണ്. ക്ലാസ് കഴിഞ്ഞപ്പോ ടീച്ചർ ചോദിച്ചു "ഇന്നെന്താ നിങ്ങൾ ഒരുമിച്ചു വരാതിരുന്നത്..... നീ എന്താ താമസിച്ചത് ? " ചോദിച്ചത് മനസ്സിലായി ഉത്തരം പറയാനാണ് അറിയാത്തതു, ഞാൻ വളരെ നിസ്സഹായതയോടെ മാതൃഭാഷയിൽ പറഞ്ഞു "ഇത്രേം ഒക്കെ പറയാൻ അറിയാമായിരുന്നെങ്കിൽ ഞങ്ങൾ ഒരുമിച്ചു തന്നെ വന്നേനെ".

ഓരോ കാലഘട്ടത്തിൽ നമ്മുടെ ടെൻഷൻ ഓരോന്നാണ്.പിന്നീട് ചിന്തിച്ചു നോക്കുമ്പോൾ മനസ്സിലാകും ഇത്ര ഒരു ചെറിയ കാര്യത്തിനാണോ ഞാൻ ഇത്രയേറെ ടെൻഷൻ അടിച്ചതെന്നു. “ഈ സമയവും കടന്നു പോകും” എന്ന് പറയുന്നതിന്റെ ശരിക്കുള്ള കാരണവും അതാണെന്ന് തോന്നുന്നു. ഇന്ന് വലുതാണ് എന്ന് തോന്നുന്ന പ്രശ്നം നാളെ ഒരു പക്ഷേ വളരെ ലളിതമായി നമുക്ക് കൈകാര്യം ചെയ്യാൻ പറ്റുന്നതായിരിക്കും. പ്രശ്നങ്ങളെ വളരാൻ അനുവദിക്കാതിരിക്കുക പ്രശനങ്ങൾക്കും മുകളിലേക്കു നമ്മൾ വളരുക നമ്മുടെ മനോഭാവത്തെ വളർത്തിയെടുക്കുക.

15/11/2023

ജീവിതത്തിൽനിന്ന് അടർത്തിയെടുത്ത ഒരേട് ....
ഉറക്കത്തിൽ വിളിച്ചു ചോദിച്ചാലും ഈ കഥ നിങ്ങളു തെറ്റിക്കരുത് എന്ന് പറഞ്ഞാണ് പണ്ടൊക്കെ നമ്മളെ ടീച്ചേർസ് പഠിപ്പിച്ചിരുന്നത്. ടീച്ചറിന്റെ നാക്കിൽ ഗുളികനായിരുന്നെന്നു തോന്നുന്നു. ഈ കഥയൊക്കെ ഉറക്കത്തിൽ ഞാൻ എത്രപ്രാവശ്യം പറഞ്ഞിരിക്കുന്നു.

14/11/2023

അങ്ങനെ ഒരു യാത്രയിൽ ……

ചില സമയത്തിന് നമ്മുടെ വിവേകത്തിനു പകരം വയ്ക്കാനായി മറ്റൊരു വസ്തുവും ഈ ഭൂമിയിൽ ഉണ്ടായെന്നുവരില്ല.

കുറച്ചു വര്ഷങ്ങള്ക്കു മുൻപുള്ള ഒരു അനുഭവം ഇപ്പോഴും മറവിയിലേക്കു പോയിട്ടില്ലാത്തതുകൊണ്ടു എവിടെ എഴുതട്ടെ. നമ്മുടെ ആന വണ്ടിയിലെ ഒരു യാത്രക്കിടയിൽ മൂന്നുപേർക്കു ഇരിക്കാവുന്ന സീറ്റിൽ ഇങ്ങേ അറ്റത്തു ഞാൻ ഇരിക്കുകയാണ്. എന്റെ അടുത്തിരിക്കുന്നത് ഒരു പ്രായമായ മനുഷ്യനും അദ്ദേഹത്തിന്റെ ഭാര്യയും. അതൊരു ജനറൽ സീറ്റ് ആയതുകൊണ്ടും വേറെ ഒഴിഞ്ഞ സീറ്റ് ഇല്ലാതിരുന്നതുകൊണ്ടും ഞാൻ അവിടെ പോയി ഇരുന്നതാണ്. എന്റെ അച്ഛനും അമ്മയും ആകാനുള്ള പ്രായമുണ്ട് അവർക്കു. സാധാരണ നമ്മൾ ബസിൽ ഇരിക്കുമ്പോ കൈ മുന്നോട്ടു വച്ചാണ് ഇരിക്കുന്നത്, പ്രത്യേകിച്ച് അടുത്ത് ആളുണ്ടെകിൽ. പക്ഷേ അദ്ദേഹം കൈ മുന്നോട്ടുവച്ചിട്ടല്ല ഇരിക്കുന്നത്, ആ കൈ എന്റെ ദേഹത്ത് മുട്ടുന്നുണ്ട്. നല്ല വളവും തിരിവും ഉള്ള റോഡ് ആയതുകൊണ്ട് ആ കൈ എന്റെ ദേഹത്ത് മുട്ടികൊണ്ടേയിരുന്നു.
കാഴ്ച്ചയിൽ വളരെ മാന്യനായ ഒരു മനുഷ്യൻ ഭാര്യയെ തൊട്ടടുത്ത് ഇരുത്തി മകളുടെ പ്രായമുള്ള ഒരു പെൺകുട്ടിയെ കൈ കൊണ്ടു മുട്ടി സന്തോഷിക്കും എന്ന് ഞാൻ വിശ്വസിക്കുന്നില്ല....... ഭാര്യയുടെ കൈയിൽ ഒരു സ്കാനിംഗ് റിപ്പോർട്ട് പോലെ എന്തൊക്കയോ ഉണ്ട്......... അവരു ഒന്നുകിൽ ഹോസ്പിറ്റലിലേക്ക് പോകുന്നു ഇല്ലെങ്കിൽ ഹോസ്പിറ്റലിൽ നിന്ന് തിരിച്ചു വരുന്നു. അവര് സംസാരിച്ചു കൊണ്ടേയിരിക്കുകയാണ് ഇടക്ക് ആ അമ്മ എന്നോടും എന്തൊക്കയോ ചോദിച്ചു. ഞാൻ ആകെ ആശയക്കുഴപ്പത്തിലായി. അവരെ കണ്ടാൽ വളരെ സാധാരണക്കാരാണ്. കഷ്ടപ്പെട്ട് ജീവിക്കുന്നവരാണ് എന്ന് മുഖത്ത് തന്നെ എഴുതി വച്ചിട്ടുണ്ട്. പക്ഷേ അപ്പോഴും ആ കൈ എന്റെ ദേഹത്ത് മുട്ടികൊണ്ടിരുന്നു. ഒരു പക്ഷേ അദ്ദേഹം അങ്ങനെ ഒന്നും ഉദ്ദേശിച്ചല്ല എന്റെ ദേഹത്ത് മുട്ടുന്നതെങ്കിൽ ഞാൻ വല്ലതും പറഞ്ഞാൽ മോശമാകില്ലേ.....ജീവിതം തന്നെ അവർക്കു ആവശ്യത്തിന് കഷ്ടപ്പാടും വിഷമങ്ങളും കൊടുത്തിട്ടുണ്ട്...... തെറ്റിദ്ധാരണയുടെ പുറത്തു ഞാൻ കൂടി എന്തിനാ അവരെ വിഷമിപ്പിക്കുന്നത്...... ഇനി ഒരു പക്ഷെ അങ്ങനെ എന്തെങ്കിലും ഉദ്ദേശം ഉണ്ടെങ്കിലോ ..... ഈ ലോകത്തു ആരെയാ വിശ്വസിക്കാൻ പറ്റുന്നത് .... എങ്കിലും ഞാൻ ഉറക്കെ പ്രതികരിച്ചാൽ ആ അമ്മയ്ക്ക് വിഷമമാകില്ലേ.....ഇത്രേം വർഷം അദ്ദേഹത്തിന്റെ നിഴലുപോലെ ജീവിച്ചിട്ട് ഈ വയസുകാലത്തു എങ്ങനെ ഒക്കെ അറിഞ്ഞാൽ ...... ഞാനായിട്ട് അവരെ വിഷമിപ്പിക്കുന്നില്ല ........എങ്കിലും ഈ മുട്ടുന്നുന്നതു എനിക്ക് ഇഷ്ടപ്പെടുന്നതും ഇല്ല .... എന്റെ തലച്ചോറിൽകൂടി ഒരുപാടു if ....else സ്റ്റേറ്റ്മെന്റ്സ് കടന്നുപോയ്ക്കൊണ്ടിരുന്നു .......... എന്റെ ഭാഗ്യത്തിന് അപ്പുറത്തു ഒരു സീറ്റ് ഫ്രീ ആയി... ഞാൻ അങ്ങോട്ട് ഇരിക്കാം എന്ന് ആ അമ്മയോട് പറഞ്ഞു ഞാൻ ആ സീറ്റിലേക്ക് മാറി ഇരുന്നു..... അവിടെ ഇരുന്നു ഞാൻ ആ കൈയിലേക്ക് നോക്കി.... കുറച്ചു സമയത്തേക്കെങ്കിലും അദ്ദേഹത്തെ സംശയിച്ചതിനു എന്റെ കണ്ണുകൾ അറിയാതെ നിറഞ്ഞു ..... അതൊരു തളർന്ന കൈ ആയിരുന്നു ....ആ കൈ അദ്ദേഹത്തിന് അനക്കാൻ കഴിയില്ലായിരുന്നു ...... കുറച്ചു നേരത്തേക്ക് ആ കൈ പോലെ എന്റെ മനസും തളർന്നുപോയി.... പിന്നെ എനിക്ക് അത്രയും വിവേകബുദ്ധി തന്ന ദൈവത്തിനു നന്ദി പറഞ്ഞു. ഞാൻ അവിടെ നിന്ന് ഉറക്കെ പ്രതികരിച്ചിരുന്നെങ്കിൽ നാണം കെട്ടുപോയേനെ.
ഇറങ്ങാൻ നേരത്തും ആ അമ്മ എന്നെ നോക്കി ചിരിച്ചിട്ടാണ് ഇറങ്ങിപ്പോയത്. എനിക്ക് ആശ്വാസമായി, അവർക്കു ഒന്നും തോന്നിയില്ല.

ഇതിനർത്ഥം നമ്മളോട് മോശമായി പെരുമാറുന്നവരോട് പ്രതികരിക്കാതിരിക്കരുത് എന്നല്ല പ്രതികരിക്കുന്നതിനു മുന്നേ അതൊരു തെറ്റിദ്ധാരണ അല്ല എന്ന് ഉറപ്പുവരുത്തണമെന്നു മാത്രം.