04/06/2024
পখিলা খেদা বয়সতে থমকি ৰৈছে কণমানি কৃতিকা কাকতি
কন্যাৰ ব্ৰেইন টিউমাৰৰ চিকিৎসাৰ বাবে সহায় ভিক্ষা পিতৃ জয়ন্ত কাকতিৰ
দিপেন ভৰালী,কমলপুৰ, ৩জুনঃ এটি কণমানি মৰমলগা ছোৱালী।নাচি বাগি ভালপোৱা ছোৱালীজনী সম্প্ৰতি গুৱাহাটী চিকিৎসা মহাবিদ্যালয়ত চিকিৎসাধীন হৈ আছে।অসম গৃহৰক্ষী বাহিনীত কৰ্মৰত পিতৃ জয়ন্ত কাকতিয়ে জানিবলৈ দিয়া মতে, মাতৃহীনা কৃতিকা কাকতিৰ জীৱন আন হাজাৰজনী ছোৱালীৰ দৰে অতিবাহিত হৈছিল আনন্দৰ মাজেৰে।লগৰীয়াৰ লগত খেলিছিল,হাঁহিছিল, নাচিছিল।স্কুললৈ গৈছিল প্ৰতিদিনে বান্ধৱীৰ সৈতে। বিগত এমাহমানৰ পৰা ছয় বছৰীয়া কন্যা কৃতিকা কাকতিৰ হাত,ভৰি কঁপা আৰু ভৰিৰ ভাৰসাম্য নথকা এক সমস্যা হয়। সেয়েহে পিতৃয়ে ২মে'ত চাংসাৰিস্থিত ভাৰতীয় আয়ুবেদ প্ৰতিষ্ঠান চমুকৈ এইমছত দেখুৱায়।এইমছৰ চিকিৎসকে নাৰ্ভ-লিভাৰ-কিডনীৰ পৰীক্ষা কৰোৱায় যদিও সেয়া নিগেটিভ ওলায় ।ইয়াৰ পিছত ব্ৰেইনৰ পৰীক্ষা কৰে ২০মে'ত।২৯মে'ত পৰীক্ষাৰ ৰিপ'ৰ্টত কৃতিকাৰ ব্ৰেইন টিউমাৰ হোৱা বুলি চিকিৎসকে জানিবলৈ দি এসপ্তাহৰ ভিতৰত অপাৰেচন কৰাবলৈ গুৱাহাটী চিকিৎসা মহাবিদ্যালয়লৈ প্ৰেৰণ কৰে।কন্যা দেহত ধাৰণ কৰা অসুখৰ নাম শুনি পিতৃ জয়ন্ত কাকতিৰ লগতে পৰিয়ালটোৰ মাজলৈ এন্ধাৰ নামি আহে।গৃহৰক্ষী বাহিনীৰ সামন্য দৰমহাৰে পৰিয়ালটো কোনোমতে পোহপাল দিয়া জয়ন্তই এতিয়া কন্যাৰ চিকিৎসা কৰিবলৈ গৈ চকুৰে ধুৱলি কুঁৱলি দেখিছে।পিতৃ জয়ন্ত কাকতিয়ে দুখেৰে জনাই যে, জীৱনটো আৰম্ভ কৰিয়েই এক জটিল ৰোগত জন্মদাত্ৰী মাকক অকালতে হেৰুৱাইছিল কৃতিকাই। মাক ঢুকুৱাৰ সময়ত কণমানি কৃতিকাৰ বয়স আছিল তিনি বছৰ। সম্প্ৰতি ছয় বছৰ ছয়মাহত ভৰি দিয়া কণমানিজনী বাইহাটাস্থিত বাইহাটা আদৰ্শ স্কুলত ক্লাছ ৱানত পঢ়ি আছে।মৰম, চেনেহৰে বুৰাই ৰখা কন্যা কৃতিকা এনে জটিল ৰোগত আক্ৰান্ত হোৱাত পৰিয়ালটো দিশহাৰা হৈছে।কৃতিকাৰ ব্ৰেইনৰ অপাৰেচনৰ বাবে বুজন পৰিমানৰ টকাৰ আৱশ্যক। যিমানখিনি টকাৰ প্ৰয়োজন সিখিনি একেলগে দেখি পোৱাই নাই বুলি জয়ন্তই জানিবলৈ দিয়ে।ঘৰৰ ভেটিটোৰ বাদে মাটি-বাৰী একো নথকা পিতৃ জয়ন্ত কাকতিয়ে এই প্ৰতিবেদকৰ জৰিয়তে স্বাস্থ মন্ত্ৰী কেশৱ মহন্ত,কমলপুৰৰ বিধায়ক দিগন্ত কলিতা, দল-সংগঠন, অনুষ্ঠান-প্ৰতিষ্ঠান তথা সদাশয় ব্যক্তিৰ পৰা সহায় ভিক্ষা বিচাৰিছে।আপোনালোকৰ সহায়-সহযোগিতাত কৃতিকাই পুনৰ হাঁহিব,নাচিব,আগৰ দৰে কথা ক'ব।এইকণৰ পৰা বঞ্চিত নকৰিবলৈ যেনেকৈ নহওক সহায় আগবঢ়াবলৈ পিতৃয়ে আটাইকে প্ৰাৰ্থনা জনায়।কণমানিজনীক সহায় কৰিবলৈ আগ্ৰহীসকলে ভাৰতীয় ষ্টেট বেংক(সোণেশ্বৰ শাখা)ৰ জয়ন্ত কাকতিৰ একাউণ্ট নম্বৰ-৩১৬১৯১৫৮৪৩৩
আইএফএছচি নম্বৰ-এছবিআইএন
০০০৭০৩৮
অথবা জি পে নম্বৰ-৯৫০৮৬-৫৪৫৮৯ত যোগাযোগ কৰিব পাৰিব। Himanta Biswa Sarma Following Zubeen Garg Fans (All India) News Live Homoy
