12/02/2019
🥺😥😥
Kanmarad mwen yo, di pwofesè matematik la pou mwen: "M fè devwa li te bay la, Men m' pap ka pote l' lekòl la lendi pou li paske m'ap absan pou tout ane a, epetèt pou tout an".
Se yon dwòl vwayaj, M' pat menm prepare m' pou sa
M' te jis ap chache konsève souf yon fanmi menm si laj mwen te piti, m' pat gen le chwa, Men isiba chache lavi se detwi lavi.
Si sa pap deranje w', Di manman m' pou mwen al dòmi aswè a, Di l m' pap antre.
Di l' se vi m' m' vann nan plas ti bak komès li a, M' pèdi benefis la nan wout, PNH pran l'.
M te toujou di ti Zanmi m' yo: "Jwe avè m' tankou se te yon dènye fwa."
"Souri avè m' tankou se te yon dènye fwa." " Nou pa lwen wè chagren m' neye nan tristès mwen."
"Kidonk, fè tout sa nap fè avè m' pou jis yon dènye fwa; Paske lè w' soti isit ou gen plis chans pou w' tou pa antre, se la grand mòd." Deyò a tou ap tann souf ou, lè w' di bonjou lavi, se lanmò ki reponn ou.
Male, prezans mwen pat vo anyen.
Ki koulè fiti m' t'ap ka genyen pandan prezan m' toujou nwa?
M regrèt selman, m' potko menm jèn nou fè m' vyeyi.
Dlo kò m' benyen kò m'
Sa k' pi mal la m' pat menm manje lajan chango men e mwen nou fè peye l'.
Inosan pase pou koupab.
Nou ka trouve m' te fou lè m' ta l' ramase komès ti madanm nan pandan bal tap chante: "Tiye poul la depi nan ze".
(Mizik doulè ak mati, si w' ta wè kijan malere ap gouye nan dans sa anba lavil la)
M pat gen le chwa, fanmi m' te vle konn ki gou sèl genyen nan jou sila, paske depi jedi 7 fevriye nou te bliye ki gou manje genyen; Grangou anmè kou fyèl nan trip nou!
Si aksyon sa fè m' fou, Nou tout fout fou tou. Paske chak jou n'ap chache lavi pandan yap detwi lavi nou grenn pa grenn, Nou bouche nen nou nou bwè dlo santi a.
Nou fè silans malgré y'ap peze kou nou.
Ki moun tèt dwat kap alèz, kap fè silans nan yon vi kote se kochon kap manje moun? Hmmm!
Chak jou son risk pou nou respire oubyen yon chans.
Vi nou ensèten
Byennèt pa ladann, pito nou lèd nou nou la!
Ensekirite fè kenken
Bal mawon, Bal ble, Bal wouj, Bal nwa fè nou tou nwa.
Nou wè nou pa wè
Tande m': "Pa gen bal mawon vre non , se pito yon mawon ki tire yon bal ok" !!!
Nou wè atò nan kisa m' te pran.
Anplis,
Lè w'al lopital jeneral, se nan simityè antre.
Pa gen lekol, pa gen inivèsite pandan nap tann kanaval.
Adye!!!
Nou tout fout fou!
Si lanmò yon adolesan pa touche kè yon *pre-zi-dan* pou l' deside, pou jan l' tap di li renmen m' anvan li fè nòs la, Si sa pa di l' anyen anverite lanmò nou tout pap vle di anyen pou zòt.
Nou tout ap bannann!
Swa nou reveye n' oubyen nou kontinye dòmi.
M pa konn konbyen pitit ki gen pou kite manman yo tankou m'.
Kounya Se tou pa m'.
Si sa pap deranje w', kouri al di manman m' pou mwen, Se depi lè m' tap viv isit la m' te gentan mouri vivan; lanmou l' te jis ap goumen ak lanmò m'.
Kidonk, di l' fin fè katòz kout rèl
Plen katòz bokit ak dlo je l'
Fè katòz kout roule nan sann
Katòz benyen nan san m'
Katòz kout regrè
Katòz plenn nan kè
Katòz kout koto nan kè
Katòz kout soupi
Katòz kout ponya nan do
Katòz kòb lekòl
Katòz lane mizè w'
Katòz baton vyeyès ou
Katòz kout anmwey
Katòz min nan fwon, Menmsi memwa w' pap ka efase m', Eseye kite zonbi m' tande bri kè w'.
Kite m' di w' sa k' nan kè m' kòm regrè: "Kiyès ki pral dèyè komès la pou ou Kounya?"
*Vens le penseur*