Iwe Iroyin Yoruba

30/07/2024

Ṣé ẹ ti ra àpò ìrẹsì tiyín?

30/07/2024

Najatu Salisu, akẹ́kọ̀ọ́ ilé ìwé gíga Abubakar Tafawa Balewa jáde láyé.
Ó bani lọ́kàn jẹ́ pé Najatu, akẹ́kọ̀ọ́bìnrin ìpele kẹta iléèwé Tafawa Balewa ti jáde láyé lánàá lẹ́yìn tó ṣubú ní balùwẹ̀.
Àbúrò rẹ̀ tí wọ́n jọ ń gbé ni ó kíyèsí pé Najatu kò jáde ní balùwẹ̀ fún ìgbà pípẹ́ ló bá yọjú wòó, ibẹ̀ ló ti ríi pé ó ti ṣubú sílẹ̀. Wọ́n dùú dé ilé ìwòsàn àmọ́ ẹ̀pa kò bá oró mọ́.

29/07/2024

A ti já ìrẹsì káàkiri Nàìjíríà, ogójì ẹgbẹ̀rún péré la ń tàá - Mohammed Idris
Mínísítà Mohammed Idris ti jábọ̀ fún ààrẹ Bola Ahmed Tinubu pé ọ̀kan gbóògì nínú àwọn ohun tí àwọn aṣètò ìfẹ̀hónúhàn ń béèrè fún náà ni kí oúnjẹ ó pọ̀ yanturu. Ó wí pé ilé iṣẹ́ òun ti ṣètò ìrẹsì sí gbogbo ìletò ìletò àti ìgbèríko ní ogójì ẹgbẹ̀rún.
Ó wí pé iṣẹ́ ń lọ ní ẹ̀ka ohun ọ̀gbìn pé láìpẹ́ láìjìnnà, oúnjẹ yóò pọ̀ bíbà tí a ó máa jẹ àjẹyó àti àjẹṣekùn-gbendu.
Mohammed idris rọ àwọn tí wọ́n ń pète-pèrò ìfẹ̀hónúhàn náà pé kí wọn ó ṣe sùúrù kí wọn ó túbọ̀ fún ààrẹ ní àkókò díẹ̀ síi kí wọn ó figi gún ìwọ́de náà.

29/07/2024

Àjọ tó ń rí sí ètò ìbáraẹnisọ̀rọ̀ nílẹ̀ yìí NCC ti pàṣẹ kí àwọn ilé iṣẹ́ ojú òpó ìpè ó ṣí ojú òpó ìpè tí wọ́n tì.
Lẹ́yìn ìpàdé pàjáwìrì tó wáyé nílé iṣẹ́ NCC, wọ́n forí okòó ṣọ̀ọ́dún pé kí àwọn ilé iṣẹ́ ojú òpó ìpè ó yara lọ ṣí gbogbo ojú òpó ìpè tí wọ́n tì lópin ọ̀sẹ̀.
Ìgbésẹ̀ yìí wáyé làtàrí àwọn rògbòdìyàn tó ṣẹlẹ̀ káàkiri àwọn ilé iṣẹ́ ojú òpó ìpè lónìí. Àmọ́ o, àjọ NCC kìlọ̀ pé fún ìgbà díẹ̀ ni ṣíṣí yìí o, bí wọn kò bá so nọ́ḿba ìdánimọ̀ orílẹ̀-èdè yìí mọ́ ojú òpó ìpè wọn, yóò padà jẹ́ títì náà ni.

29/07/2024

Ṣé wọn kò dí ojú òpó ìpè tiyín?

29/07/2024

Ẹsẹ̀ kò gbèrò ní ilé iṣẹ́ ojú òpó ìbánisọ̀rọ̀ MTN.
Làtàrí bí MTN ṣe dí ojú òpó ìbánisọ̀rọ̀ àwọn oníbàárà rẹ̀ ní òpin ọ̀sẹ̀ tó kọjá, èrò ya bo ilé iṣẹ́ wọn tó wà ní ìdí ape ní ìbàdàn.
Àwọn oníbàárà kó ara jọ sí ilé iṣẹ́ MTN tó wà ní ìdí ape lónìí fún ìfẹ̀hónúhàn dídí ojú òpó ìpè wọn. Àlàyé tí MTN ṣe fún wọn náà ni pé wọn kò ṣe àsopọ̀ nọ́mbà ìdánimọ̀ orílẹ̀-èdè yìí mọ́ ojú òpó wọn ní ìbámu pẹ̀lú òfin.
Ohun tó fa rògbòdìyàn níbẹ̀ ni pé ọ̀pọ̀ àwọn oníbàárà ló wí pé àwọn ti ṣe àsopọ̀ náà látọ́jọ́ tó ti pẹ́ pé àwọn kò fara mọ́ àwíjàre náà rárá.

29/07/2024

29/07/2024

Ìfẹ̀hónúhàn kọ́ ló kàn báyìí, ìfọwọ́sowọ́pọ̀ yín ni Tinubu nílò lásìkò yìí - àjọ AMG
Àjọ ASIWAJU MANDATE GROUP rawọ́ ẹ̀bẹ̀ sí àwọn ọmọ orílẹ̀-èdè Nàìjíríà pàápàá jùlọ àwọn ọ̀dọ́ láti sinmi agbaja lórí ìwọ́de ìfẹ̀hónúhàn tí wọ́n ń pète-pèrò yìí.
Wọ́n wí pé ààrẹ Bola Ahmed Tinubu kò fi ẹ̀dọ̀ lé orí òróǹro tàbí fi ìgbà kan kọ iyán àwọn tí wọ́n ń darí kéré pé gbogbo ìgbà ni ààrẹ ń wá ọ̀nà tí ìrọ̀rùn yóò fi dé bá gbogbo mùtúmùwá.
Wọn kò ṣàì tọ́ka sí àwọn àpẹẹrẹ ipa ààrẹ láti mú ayé rọrùn, wọ́n ṣe àpẹẹrẹ àfikún owó oṣù òṣìṣẹ́ tí yóò bẹ̀rẹ̀ láìpẹ́, àpẹẹrẹ mìíràn ni ètò ẹ̀yáwó-kàwèé tí ìjọba gbé kalẹ̀.
Ohun tí àjọ AMG béèrè lọ́wọ́ àwọn ọmọ Nàìjíríà ni ìfọwọ́sowọ́pọ̀, ìrètí, ààwẹ̀ àti ádùrá kí ààrẹ ó le wa ọkọ̀ Nàìjíríà dé èbúté ògo.

29/07/2024

Epo bẹntiróòlù fò sókè; àwọn aráàlú kérora.
Láti bí ọjọ́ mélòó kan ni ọ̀wọ́ngógó epo bẹntiróòlù ti ń rúgbó bọ̀ àmọ́ láaárọ̀ yìí, ó kàmọ̀mọ̀. Ọ̀pọ̀ ilé epo ni kò ṣí rárá nígbà tí àwọn péréte tó ṣí kò gba èrò.
Àìrépo-rà yìí ló mú kí bàràǹdà epo ó gbérí tí wọ́n sì ń ta jálá kan ní ẹ̀ẹ́dẹ́gbẹ̀jọ náírà.
Wàyí o, àjọ NNPC wí pé àwọn kò fojú ba oorun lórí ọ̀rọ̀ yíì tí àwọn sì ń gbé gbogbo ìgbésẹ̀ tó yẹ láti mú epo wà káàkiri ilẹ̀ yìí.

28/07/2024

Ìpínlẹ̀ Ogun pàdánù èèkan kan gbòógì- Ọ̀mọ̀wé Tokunbo Oshin kí ayé pé ó dìgbóṣe.
Ọ̀mọ̀wé Tokunbo Oshin, ẹni tó ti fi ìgbà kan jẹ́ agbẹnusọ ilé ìgbìmọ̀ aṣòfin ti ìpínlẹ̀ Ogun tó sì tún jẹ́ olùkọ́ ní ilé ìwé gíga olùkọ́ni Tai Solarin ti ta téru nípàá lálẹ́ àná lẹ́yìn àìsàn ráńpẹ́.
Ilé ìwòsàn aládàáni kan ní Sagamu ni ikú ká wọ́n mọ́ lẹ́ni ọdún mẹ́rìndìnláàdọ́rin.
Ọ̀gbẹ́ni Ademola Balógun; ẹni tó jẹ́ kọ́míṣọ́nà fún ìdàgbàsókè àti ìfọwọ́sowọ́pọ̀ ìlú ti ìpínlẹ̀ Ogun àti onímọ̀ ẹ̀rọ Bayo Dayo; ẹni tó jẹ́ alága tẹ́lẹ̀rí fún ẹgbẹ́ òṣèlú alábùradà ti ìpínlẹ̀ Ogun fi ìdí ìṣẹ̀lẹ̀ náà múlẹ̀ pé ọ̀mọ̀wé Tokunbo Oshin ti gba èkuru jẹ lọ́wọ́ ẹbọra láṣàálẹ́ àná ọjọ́ àbámẹ́ta. Wọ́n wí pé ó bá àwọn lójijì àmọ́ kò sí oògún ikú, wọ́n ṣe àpèjúwe olóògbé gẹ́gẹ́ bíi olóòótọ àti ẹni tó nífẹ̀ẹ́ ìpínlẹ̀ Ogun àti Nàìjíríà lápapọ̀ tí ó sì fi ara ṣiṣẹ́ fún ìdàgbàsókè rẹ̀.

28/07/2024

Kenneth Okonkwo; ẹni tó jẹ́ abẹnugan ìgbìmọ̀ ìpolongo ìbò fún ẹgbẹ́ òṣèlú LABOUR ti yapa kúrò nínú ẹgbẹ́ náà báyìí.
Okonkwo sọ̀rọ̀, ilẹ̀ kún nínú àtẹ̀jáde tó gbé jáde lójú òpó ayélujára rẹ̀ lánàá pé òun ti jáwọ́ nínú àpọ̀n tí kò yọ̀ o, omi ilá ni òun ṣetán àti gbé kaná báyìí.
Àwíjàre rẹ̀ ni pé ẹgbẹ́ òṣèlú LABOUR kò ní ọjọ́ ọ̀la kankan làtàrí àwọn rògbòdìyàn abẹ́lé tó ń ṣẹlẹ̀ nínú ẹgbẹ́ náà tí àwọn èèkàn inú rẹ̀ ò sì rí nǹkankan ṣe sí i. Àlàyé náà tẹ̀síwájú pé kódà ẹgbẹ́ òṣèlú gbankọgbì méjì tó wà nílẹ̀ yìí ìyẹn ẹgbẹ́ òṣèlú ọlọ́wọ̀ àti alábùradà kò ní afojúsùn rere kánkan fún orílẹ̀-èdè yìí bíkòṣe jíjẹ kan eegun.
Ohun tó fi gúnlẹ̀ ọ̀rọ̀ rẹ̀ ni pé òun ń wá àwọn èèyàn tí wọ́n ní afojúsùn rere fún orílẹ̀-èdè Nàìjíríà bíi ti òun tí àwọn yóò jọ kó ẹgbẹ́ òṣèlú titun jọ láti mú Nàìjíríà gòkè àgbà.

28/07/2024

Ọwọ́ tẹ tọkọtaya tó ra ọmọ ọwọ́ lọ́jọ́ ìkómọjáde.
Ojú agbo ìsọmọlórukọ tọkọtaya James Uwam ni àwọn ọlọ́pàá ti wá kó wọn fún ẹ̀sùn pé wọ́n ra ọmọ tí wọ́n ń kó náà lọ́wọ́ àwọn ajọ́mọgbé ni.
Ọmọ oṣù méjì tó sọnù tí ìyá rẹ̀ fi tó àwọn ọlọ́pàá létí ni wọ́n ń wá, Gloria Sunday ni ọwọ́ kọ́kọ́ tẹ̀ tí ó sì jẹ́wọ́ pé òun ti ta ọmọ náà ní ẹgbẹ̀rún lọ́nà ẹ̀ẹ́dẹ́gbẹ̀ta náírà fún Pásítọ̀ Udoh, ìgbà tí ọwọ́ tẹ Udoh ní Ikenne, ìpínlẹ̀ Ogun,ó jẹ́wọ́ pé òun ti tàá fún Loretta Nelson ní mílíọ̀nù kan àti ẹ̀ẹ́dẹ́gbẹ̀ta-ó-dín-àádọ́ta náírà.
Agbègbè Festac lÉkòó ni wọ́n ti mú Loretta, òun ló mú àwọn agbófinró dé ilé àwọn tọkọtaya tó ta ọmọ náà fún ní mílíọ̀nù méjì àti ọdúnrún-ó-lé-àádọta náírà. Dídé tí wọn yóò dé ilé Ọ̀gbẹ́ni James Uwam àti aya rẹ̀, àgbò ìsọmọlórukọ ọmọ náà ni wọ́n bá wọn tí wọ́n ń ṣe ìkómọjáde ọmọ náà.
Ní báyìí, gbogbo wọn ti wà ní àhámọ́ àwọn ọlọ́pàá títí wọn yóò fi fojú ba ilé-ẹjọ́.

27/07/2024

Ifeanyi Ubah; Ọmọ ilé ìgbìmọ̀ aṣòfin ilẹ̀ yìí ti ta téru nípàá.
Ọ̀kan lára àwọn ọmọ ilé ìgbìmọ̀ aṣòfin ilẹ̀ wa tó ń ṣojú ẹ̀kun gúúsù Anambra ló ti gba èkuru jẹ lọ́wọ́ ẹbọra lónìí ní ẹni ọdún méjìléláàdọ́ta.
Ifeanyi Ubah ni aláṣẹ àti Olùdarí ilé iṣẹ́ CAPITAL OIL. Nǹkan bí ọdún márùn-ún sẹ́yìn ni ìjọba fi ẹ̀sùn kan ilé iṣẹ́ náà pé ó lu ìjoba ní jìbìtì bílíọ̀nù márùndínlógóje tí ẹjọ́ náà sì forí ṣọ́pọ́n. Ẹ̀yìn náà ni Ifeanyi wọlé sí ipò aṣòfin ẹ̀kun gúúsù Anambra lakọ́kọ́ àti lẹ́ẹ̀kejì.
Ṣáà kejì ló ń lò lọ́wọ́ ní ipò aṣòfin tí ó sì ti fi èrò rẹ̀ hàn láti du ipò Gómìnà ìpínlẹ̀ Anambra nínú ìdìbò ọdún tó ń bọ̀ àmọ́ ẹlẹ́mìí ti gbàá báyìí. Ilé ìtura kan ní ìlú LONDON ló kú sí láaárọ̀ yìí.
Ohun tó ṣe òkùnfà ikú rẹ̀ kò tíì jẹ́ mímọ̀ ní àsìkò tí a ń kọ ìròyìn yìí.

27/07/2024

Àdó olóró bú gbàmù ní ọjà Buni Yadi ní ìpínlẹ̀ Yobe.
Iná jó ọjà Buni Yadi ní ìjọba ìbílẹ̀ Gujba gúrúgúrú làtàrí bí àdó olóró ṣe bú gbàmù lọ́sàn-án gangan.
Ẹni tó jẹ́ agbẹnusọ fún àjọ àbò ẹ̀ka náà Muhammad Shehu fi ìdí ìṣẹ̀lẹ̀ náà múlẹ̀ pé ọmọbìnrin kan farapa yánnayànna níbi ìṣẹ̀lẹ̀ náà tó sì ń gba ìtọjú nílé ìwòsàn.
Ó fi kún ọ̀rọ̀ rẹ̀ pé àdó olóró méjì ni wọ́n kẹ́ sí agbègbè náà, wọ́n kẹ́ ọ̀kan sí ọjà tó bú wọ́n sì kẹ́ ìkejì sí itòsí ọjà náà. Ó wí pé àwọn ológun ti yọ àdó olóró kejì náà báyìí.

27/07/2024

Bí ìjọba fẹ́ bí ó kọ̀, a ó ṣe ìwọ́de wa - àwọn àjọ ẹlẹ́gbẹ́jẹgbẹ́
Làtàrí bí ìdúnkokò, ẹ̀bẹ̀, ọ̀rọ̀ ìtùnú ṣe ń pàdé láti dènà ìwọ́de ìfẹ̀hónúhàn tí yóò wáyé lọ́jọ́ kìíní oṣù Ògún, àwọn ẹlẹ́gbẹ́jẹgbẹ́ tó tó ọgbọ̀n ló tì fèsì pé ìhalẹ̀ lásán ni gbogbo ìwọ̀nyẹn pé awoj yóò wọ́de tí mìmì kan ò sì le mi àwọn.

26/07/2024

Ẹ fi orúkọ yín àti àpèjúwe ibùgbé yín ṣọwọ́ sí àjọ ọlọ́pàá - ọ̀gá ọlọ́pàá pátápátá
Olórí ọlọ́pàá ilẹ̀ yii; Kayode Egbetokun wí fún àwọn tí wọ́n ń gbèrò ìwọ́de tí yóò bẹ̀rẹ̀ ní ọjọ́ kìíní oṣù Ògún tó ń bọ̀ lọ́nà yìí pé kí wọn ó lọ sí àgọ́ ọlọ́pàá tó bá sún mọ́ wọn láti fi orúkọ sílẹ̀ àti àpèjúwe ibùgbé wọn pẹ̀lú gbogbo ìlànà ìwọ́de náà.
Ó wí pé èyí yóò ran àwọn ọlọ́pàá lọ́wọ́ láti pèsè àbò tó péye fún wọn lọ́jọ́ ìwọ́de náà yóò sì tún jẹ́ kí wọn ó ṣe ìdámọ̀ àwọn tí wọ́n ń kópa nínú ìwọ́de náà gan-an yàtọ̀ sí ọ̀daràn.

26/07/2024

Ààrẹ Bola Ahmed Tinubu ṣe ìpàdé pẹ̀lú àwọn ọba aládé.
Àná ni àwọn ọba aládé ilẹ̀ yìí àti Sultan ti Sokoto pàdé ààrẹ Tinubu ní ààfin rẹ̀ lÁbùjá. Erédìí ìpàdé náà ni láti wá wọ̀rọ̀kọ̀ fi ṣadàá lórí ìfẹ̀hónúhàn tí àwọn ọmọ Nàìjíríà ń pète-pèrò.
Ọjọ́ kìíní oṣù Ògún ni àwọn ọmọ Nàìjíríà fẹ́ bẹ̀rẹ̀ ìwọ́de ọlọ́jọ́ mẹ́wàá láti tako iyàn tó ń jà nílùú.
Àtìgbà tí ìkéde ìwọ́de náà ti ń fẹ́ kiri orí ẹ̀rọ ayélujára ni ààrẹ kò ti ní ìbalẹ̀ ọkàn tí ó sì ti ń bá àwọn alẹ́nulọ́rọ̀ láàrin ìlú sọ̀rọ̀.

25/07/2024

Àwọn agbóògùn-olóró méjìlélógún ni ọwọ̀ wa ti tẹ̀ nínú oṣù Agẹmọ yìí - àjọ NDLEA
Àjọ tó ń gbógun ti oògùn olóró ẹ̀ka ìpínlẹ̀ Kano ti sọ̀rọ̀ sókè. Ohun tí ọ̀gá won; Abubakar Idris-Ahmad sọ náà ní pé àjọ náà ṣiṣẹ́ takuntakun láti dènà oògùn olóró ní Kano tí ọwọ́ àwọn sì tẹ àwọn oníṣòwò rẹ̀ méjìdínlógún nínú oṣù Agẹmọ yìí nìkan tí àwọn sì ti fà wọ́n lé àwọn agbófinró lọ́wọ́.
Abubakar kí àwọn ọmọlẹ́yìn rẹ̀ kú iṣẹ́ ó sì gbà wọ́n níyànjú láti má kó àárẹ̀ ọkàn títí wọn yóò fi fọ ìpínlẹ̀ Kano mọ́.

25/07/2024

Ilé alájà-mẹ́ta dà wó ní Maryland, Èkó.
Ilé alájà-mẹ́ta kan tí wọ́n ṣì ń kọ́ lọ́wọ́ ní òpópónà Wilson Mba, Arowojobe, Maryland ní ìpínlẹ̀ Èkó ló dà wó lulẹ̀ ní nǹkan bí aago mẹ́rin ìdájí ń lọ lù.
Ìpè pàjáwìrì tí àwọn òṣìṣẹ́ ìsẹ̀lẹ̀ pàjáwìrì gbà ni wọ́n fi ta mọ́ra dé ibẹ̀ ní wàràǹsesà. Èèyàn mẹ́fà ni wọ́n bá níbi ìṣẹ̀lẹ̀ náà, ọ̀kunrin ni gbogbo wọn, ibi tí wọ́n ti ń ṣe iṣẹ́ ilé náà lọ́wọ́ ló ti ya bò wọ́n mọ́lẹ̀.
Mẹ́ta nínú wọn ló farapa yánnayànna nígbà tí àwọn mẹ́ta yòókù ti gba èkuru jẹ lọ́wọ́ ẹbọra.
Akọ̀wé àjọ òṣìṣẹ́ pàjáwìrì NEMA; Ọ̀gbẹ́ni Olufemi Oke-Osanyintolu fi ìdí ìṣẹ̀lẹ̀ náà múlẹ̀.

25/07/2024

Àjọ MEDICAL GUILD ṣe ìwọ́de ìfẹ̀hónúhàn lórí àìrówó oṣù gbà.
Àwọn Oníṣègùn òyìnbó ìpínlẹ̀ Èkó ni wọ́n parapọ̀ dá ẹgbẹ́ MEDICAL GUILD sílẹ̀. Alága ẹgbẹ́ náà ni Dokita Moruf Abdulsalam. Òun ló ṣe àlàyé erédìí ìwọ́de náà sí ojú òpó ìbánidọ́rẹ̀ẹ́ X rẹ̀ pé láti oṣù Agẹmọ ọdún tó kọjá ni ìjọba kò tí san àfikún owó oṣù àwọn dọ́kíta ní ìbámu pẹ̀lú àdéhùn àfikún tí wọ́n ṣe tí wọ́n sì ti bu ọwọ́ lù. Ó wí pé iye tí àwọn ń gbà ṣáájú àfikún náà ni àwọn ṣì ń gbà di ìsìnyìí pé àfikún inú ìwé lásán ni wọ́n ṣe.
Dọ́kítà Abdulsalam fi kún àlàyé rẹ̀ pé ó di dandan kí ìjọba ó san àwọn owó náà fún àwọn báyìí o pé iyàn tó mú nílẹ̀ yìí kan àwọn náà. Wọ́n tún ṣe ìkìlọ̀ pé ìfanilétí lásán ni ìwọ́de náà jẹ́ o, bí ìjọba kò bá ṣe ojúṣe rẹ̀, àwọn yóò da iṣẹ́ sílẹ̀ ni.

24/07/2024

Big shout out to my newest top fans! 💎 Christianah Temitope Oluwatosin Adekunle, Basheerat Haryinke, Jimoh Adio Olayori, Sikiru Ayo Adeyemo, Areo Aderonke, Salimon Mikail, Andrew Oluwaseun, Jimoh Nojeemdeen Holah, Lawal Moshood, Abdulazeez Zainab, Hon Talented, Akintayo Akinwumi, Ojo Iyiade, Abu Abdulsalam, Atinuke Ganiyat, Bola Blacky

24/07/2024

Big shout out to my newest top fans! 💎 Christianah Temitope Oluwatosin Adekunle, Basheerat Haryinke, Jimoh Adio Olayori, Sikiru Ayo Adeyemo, Areo Aderonke, Salimon Mikail, Andrew Oluwaseun, Jimoh Nojeemdeen Holah, Lawal Moshood, Abdulazeez Zainab, Hon Talented, Akintayo Akinwumi, Ojo Iyiade, Abu Abdulsalam, Atinuke Ganiyat, Bola Blacky

Drop a comment to welcome them to our community,

24/07/2024

🎉 Adesola Okunade Atemo, Adewale Enoch, Akinpelu Olushola, Areo Aderonke, Al Ameen Abdul Akeem, Paul Iyesaga, Sunday Alade Lawal, Sikiru Ayo Adeyemo, Ismail Muili, Mosobalaje Nurudeen Omo Aladeomi
A dúpẹ́ púpọ̀ lọ́wọ́ yín fún ipa yín lórí àwọn àtẹ̀jáde wa. Ẹ ṣeun

24/07/2024

Ipá ti kún mi o, bùkátà yìí ti fẹ́ ga ju ẹ̀mí mi lọ - bàbá ìbẹrin titun ló sọ bẹ́ẹ̀.
Ọ̀gbẹ́ni Sodiq Oladoye ló ké gbàjarè síta lẹ́yìn ọ̀sẹ̀ kan tí ìyàwó rẹ̀; Abíọ́dún bí ìbẹrin làntìlanti.
Ohun tó sọ náà ni pé owó tí òun fi ra ilédìí àti àwọn ohun èlò wọn láàrin ọjọ́ péréte náà kò kéré tí òun sì ti ń yá owó lọ́wọ́ àwọn ọ̀rẹ́. Ó wí pé bí ó ṣe ń lọ yìí, òun kò lérò pé ipá òun le tọ́ àwọn ọmọ náà pẹ̀lú méjì tí òun ti bí tẹ́lẹ̀.
Pẹ̀lú ìyọ̀nda rẹ̀ ni àwọn ọ̀rẹ́ Sodiq fi báa fi sí orí ẹ̀rọ ayélujára pé ẹni Ọlọ́hun bá bùn kó bun àwon àlejò ayé titun yìí o, kí wọ́n ké rí ìtọ́jú tó péye.
Bínú ti rí ni obí ṣe ń yàn, láàrin wákàtí mérìnlélógún, owó tó lé ní mílíọ̀nù mẹ́rin ti wọ àpò ìṣúná baba ìbẹrin.
A kí àwọn òbí ọmọ titun kú oríire, Elédùà yóò wò wọ́n.

24/07/2024

Ọkọ̀ òfurufú Jóná gúgúrú pẹ̀lú èèyàn mọ́kàndínlógún ní NEPAL.
Ọkọ̀ òfurufú SAURYA ló gbéra ní pápákọ̀ òfurufú KATHMANDU ní NEPAL tó sì gbaná kí ó tó dé òkè rárá.
Èèyàn mọ́kàndínlógún ló wà nínú rẹ̀ lásìkò ìṣẹ̀lẹ̀ náà. Nǹkan bí aago mọ́kànlá kọjá ìṣẹ́jú mẹ́tàlá alẹ́ àná ni èyí wáyé.
Àwọn ológun àti àwọn òṣìṣẹ́ adóòlà-ẹ̀mí sa ipá wọn láti pa iná náà àmọ́ a kò tíì lẹ sọ bí ẹnìkankan bá yè lásìkò tí a ń kọ ìròyìn yìí.

23/07/2024

Wọ́n yìnbọn pa akẹ́kọ̀ọ́ ilé ìwé gíga Adekunle Ajasin ní Ìpínlẹ̀ Òndó.
Ariwo ẹkún sọ ní ilé ìwé gíga Adekunle Ajasin tó fìkàlẹ̀ sí Àkókó ní ìpínlẹ̀ Òndó nígbà tí àwọn amóòkùnṣìkà kan wọlé tọ akẹ́kọ̀ọ́ ìpele kẹta; Emmanuel tí wọ́n sì yìnbọn pa á mọ́ orí ibùsùn rẹ̀.
Nǹkan bí aago mẹ́wàá alẹ́ àná tí ọwọ́ ti pa tí ẹsẹ̀ ti pa ní àwọlésùn ni àwọn èèyàn náà wọ ilé ìgbé Emmanuel, wọ́n báa lórí ibùsùn rẹ̀ wọ́n sì yìnbọn pa á fiínfiín.
Àwọn aláṣẹ ilé ìwé náà ti fi ọ̀rọ̀ ìbánikẹ́dùn ránṣẹ́ sí àwọn òbí àti ẹbí rẹ̀ pẹ̀lú ìlèrí láti ṣe ìwádìí fínní lórí ìṣẹ̀lẹ̀ náà tí wọn yóò sì fi ojú àwọn tí ajere ọ̀rọ̀ náà bá sí mọ́ lórí winá òfin.

22/07/2024

Èrò kú sínú kẹ̀kẹ́ márúwá, ọ̀rọ̀ di àkóbá fún oníkẹ̀kẹ́.
Arábìnrin kan ló wọ kẹ̀kẹ́ márúwá láti Isheri-Igando lọ sí ibùdókọ̀ kan ní Isheri kan náà, nígbà tí oníkẹ̀kẹ́ dé ibi tí ó pè fún un pé kí ó bọ́ sílẹ̀ ni ó kíyèsi pé kò mira, ó kàn gbé orí lé irin àárín kẹ̀kẹ́ náà ni.
Nígbà tí ó gbìyànjú láti jíi pé bóyá ó sùn ni, ni ó tó ríi pé kò mí mọ́. Ó ké sí àwọn èèyàn láyìíká pé kí wọn ó bá òun jíi, gbogbo ìgbìyànjú láti jíi, pàbó ló já sí.
Àwọn ọlọ́pàá ni wọ́n wá gbé arábìnrin náà àti oníkẹ̀kẹ́ àti kẹ̀kẹ́ lọ sí àgọ́ wọn fún ìwádìí àti ìfọrọ̀wánilẹ́nuwò.