https://www.facebook.com/101881847986243/

அக்கம்-பக்கம்

Home
Canada
London, ON
அக்கம்-பக்கம்

இந்த "அக்கம் பக்கம்" எமது வாழ்வியலின் பல்வேறு விடயங்களையும் பேசும், விமர்சிக்கும் ஒரு தளமாகும்.

09/15/2024

சேலமும் பிரியாணியும்!
===================

இலங்கையில் இந்த மாதம் யாழ்ப்பாணத்துக்கு புதுவரவு, சேலம் R.R பிரியாணி அல்லது Salem R.R Biriyani. இலங்கையில் முதல் கிளையை யாழில் திறந்து அதன் உரிமையாளரான தமிழ்ச்செல்வன் தானே முன்னின்று பிரியாணி செய்து பரிமாறுகிறாராம். பிரியாணி ரசிகர்கள் அவரது கைப்பக்குவத்தை ருசித்து, அதனை ரசித்துப் பாராட்டுகிறார்களாம்.

கடைக்குச் சென்று பிரியாணியை அங்கு சென்று சுவைப்பவர்கள் ஒருபுறம் இருக்க, தமிழில் ஏன் பதாகை இல்லை, அது சேலமா இல்லை சலீமா என்று “தமிழறிஞர்கள்” இன்னொரு புறம் சமூக வலைத்தளத்தில் மகாநாடு வைத்துக் கொண்டிருக்கிறார்கள். அதிலும் சிலர் சேலம் என்ற “தூய தமிழ்” வார்த்தையை எப்படி ஆங்கிலத்தில் எழுத வேண்டும் என்று மறுபுறத்தில் வகுப்பெடுத்துக் கொண்டிருக்கிறார்கள்.

இவர்களின் பதிவுகளும் பின்னூட்டங்களும் Salemஇன் பின் செல்லத் தூண்டியதில், தேடத் தொடங்கியதில் சில சுவாரசியமான தகவல்கள் கிடைத்தன.

தமிழ்நாட்டில் இருக்கும் சேலம் என்ற இடத்திற்கு அந்தப் பெயர் எப்படி வந்தது என்பதற்கு பல்வேறு கதைகளும் காரணங்களும் சொல்லப்படுகின்றன. இந்த இடம் சமணர்களின் முக்கிய தளமாக இருந்ததால் சைலம் என்று அழைக்கப்பட்டு பின்னர் சேலம் என்று மருவியதாகச் சொல்லப்படுகிறது. மலைகளால் சூழப்பட்ட பகுதி என்பதால் அசலம் என்ற சமஸ்கிருதச் சொல்லில் இருந்து இந்தப் பெயர் வந்தது என்றும் சொல்லப்படுகிறது. அக் காலத்தில் சேரர்களின் ஆட்சியின் கீழ் இருந்த பகுதி இதுவென்றும், சேரலம் என்பதே மருவி சேலம் என்று ஆனது என்று விவாதிப்போரும் உண்டு. சேலை நெசவில் பெயர் பெற்ற சேலையூர் என்ற பெயர் சேலம் ஆனது என்று கூறுவோரும் உண்டு.

அதே நேரம், ஆங்கிலேயர்கள் இந்தியாவின் சில பகுதிகளைக் கைப்பற்றிய பின்னர், 1792இல் தமது நிர்வாக அலகுகளில் ஒன்றாக சேலம் மாவட்டத்தை உருவாக்கியதாகச் சொல்லப்படுகிறது. ஆங்கிலேயர் ஏற்கனவே இந்தியாவில் பாவனையில் இருந்த சேலம் என்ற சொல்லை இந்த சேலம் மாவட்டத்திற்குச் சூட்டினார்களா அல்லது இங்கிலாந்தில் இருக்கும் Salem என்ற இடப் பெயரைப் பின்பற்றி Salem District என்று பெயர் வைத்தார்களா? என்பது விவாதத்திற்குரியது.

ஏனெனில் இந்தியாவிற்கு வெளியே Salem என்ற பெயரில் சிறு நகரங்கள், பெருநகரங்கள் அமெரிக்க, ஆஸ்திரேலியா, ஆபிரிக்க மற்றும் ஐரோப்பாக் கண்டங்களில் இருக்கின்றன. அமெரிக்காவில் Masssachusettes, New Hampshire, Virginia, Oregon, Indiana, North Carolina, New York, Ohio, Michigan, எனப் பல மாநிலங்களில் Salem என்ற நகரம் இருக்கிறது. அதேபோல தென்னாபிரிக்கா, ஜெர்மனி, இங்கிலாந்து, ஆஸ்திரேலியா (Adelaide), கனடா என்று பல இடங்களில் Salem என்ற நகரம் இருக்கிறது.

ஆனால் இந்த சேலம் (say’luhm) Shalom என்ற Hebrew வார்த்தையிலிருந்து மருவி வந்ததாகச் சொல்லப்படுகிறது. இதன் அர்த்தம் சமாதானம் என்று சொல்லப்படுகிறது. பைபிளில் சொல்லப்படும் புனித நகரான ஜெருசலேமைக் (Jerusalem) குறிக்கப் பயன்படுத்தப்படும் சொல்தான் Shalom என்றும் சொல்லப்படுகிறது.

மத்திய கிழக்கைப் பொறுத்தவரை யூதர் மற்றும் அராபியர் மத்தியில் Salem என்பது ஆட்களுக்கு வைக்கப்படும் முதற் பெயராகவும் சில குழுக்களில் குடும்பப் பெயராகவும் பயன்படுத்தப்பட்டு வந்திருக்கிறது. பாதுகாப்பு, அமைதியான, முழுமையான, பூரணமான என்று பொருள் வரும் இந்தப் பெயர் ஆண் பெண் இருவருக்கும் பொதுப் பெயராகவும் பயன்படுத்தப்பட்டிருக்கிறது. அராபியர் மத்தியில் Saleem, Salem, Selim, Salim என்று வெவ்வேறு பகுதிகளில் எழுதப்படும் வழக்கம் இருந்தாலும் அங்கு சலீம் என்றே உச்சரிக்கப்படுகிறது. Selima, Salima Saleemah, Salma போன்ற பெயர்கள் Salem என்ற வார்த்தையிலிருந்து வந்ததாகச் சொல்லப்படுகிறது.

ஒட்டமான் பேரரசை உருவாக்கிய துருக்கியில் Selam என்ற வார்த்தை (செலம் என்று உச்சரிக்க வேண்டும்) இன்னொருவரைச் சந்திக்கும்போது முகமன் கூறப் பயன்படும் வார்த்தையாக இருக்கிறது. Selamun Aleykum என்ற வார்த்தைகளின் சுருக்கமே இந்த செலம்.

இப்படி சேலம் அல்லது Salem ஒவ்வொரு பிராந்தியத்தில் ஒவ்வொரு வரலாற்றைக் கொண்டிருக்கிறது. எனினும் Salem என்ற வார்த்தையை அதிக இடங்களுக்குக் காவிச் சென்ற பெருமையை ஆங்கிலேயர்களே தட்டிச் சென்றுள்ளார்கள். ஆங்கிலேயர்களுக்கு ஒரு பழக்கம் இருந்தது. தாம் செல்லுமிடமெல்லாம் இங்கிலாந்தில் உள்ள ஊர்கள், நகரங்களின் பெயரை தாம் கைப்பற்றிய உலக நாடுகளில் சூட்டும் வழக்கம்தான் அது. நான் வாழும் கனடாவிலும் ஒன்ராரியோவில் உள்ள லண்டன் நகரமும் அவ்வாறு சூட்டப்பட்ட பெயர்தான்.

தமிழகத்தில் சேலம் என்று தமிழில் பெயர் வழங்கப்பட்டாலும் ஆங்கிலத்தில் இன்றும் Salem என்று எழுதப்படுவதற்கு இந்திய நகரங்களுக்கு தமது ஆட்சிக் காலத்தில் பெயர் சூட்டி ஆங்கிலத்தில் ஆவணப்படுத்திய ஆங்கிலேயர்களின் செல்வாக்கே காரணமாக இருக்க வேண்டும். இன்றும் இந்தியாவில் அரச ஆவணங்களில் Salem என்பதே பாவனையில் இருக்கிறது.

நாங்கள் Facebookஇல் எவ்வளவுதான் சண்டை பிடித்தாலும் தமிழ்செல்வனும் Salem என்பதை Selam என்று மாற்றப் போவதில்லை. தமிழக அரசும் தனது ஆவணங்களில் Selam என்று மாற்றப் போவதில்லை. எனவே வீண் விவாதங்களை விட்டு விட்டு தமிழ்ச்செல்வன் தனது கையாலே விறகடுப்பில் சமைத்துப் பரிமாறும் பிரியாணியைச் சாப்பிட்டு சந்தோசமாக இருங்கள்.

- வீமன் –

09/12/2024

மருத்துவம், மக்கள் மற்றும் அரசியல் – 4
===============================

சாவகச்சேரி வைத்தியசாலையின் மீள் கட்டமைப்பு, புதிய கட்டிட நிர்மாணம், தொடர்பாக கிடைத்த ஆவணங்கள், றோட்டரிக் கிளப்புடன் இணைந்து நிதி வழங்கிய தென்மராட்சி அபிவிருத்திக் கழக உறுப்பினர்களின் பேட்டிகள், தகவல் அறியும் உரிமை மூலம் கிடைத்த தகவல்களின் மற்றும் பல தனிநபர்களிடம் சேகரித்த தகவல்கள் அடிப்படையில் குறித்த வைத்தியசாலையின் கட்டுமான வேலைகள் 2015இலிருந்து கட்டம் கட்டமாகவே நிறைவேற்றப்பட்டிருப்பதை அறிய முடிகிறது. இதில் உலக வங்கி நிதிமூலம் 2015 முதல் 2024 வரை 201.8 மில்லியன் ரூபா நிதி கிடைத்திருந்தது. TDA மற்றும் ரோட்டரி கிளப் உதவியில் 90,817 டொலர் நிதி 2022 முதல் 2024 வரையான காலப் பகுதியில் கிடைத்தது.

குறித்த வைத்தியர் குற்றம் சாட்டியது போல 400 மில்லியன் புலம்பெயர் சமூகத்திடமிருந்து குறித்த வைத்தியசாலைக்கு வழங்கப்பட்டதற்கு எந்த ஆதாரமும் இதுவரை காட்டப்படவில்லை. TDA+ Rotary Club வழங்கிய தொகையை 1$ க்கு 350 ரூபா என வைத்துக் கொண்டாலும் 30 மில்லியன் ரூபா நிதியே கிடைத்துள்ளது.

சாவகச்சேரிக்கு வழங்கப்பட்ட நிதியில் 200 மில்லியனை வவுனியாவிற்கு அனுப்பி விட்டார்கள்; கொள்ளை அடித்து விட்டார்கள் என்று கூறியதும் ஆதாரமற்ற குற்றச்சாட்டாகவே மாறிவிடப் போகிறது. கட்டிட வேலை முடிக்கப்பட்டு 2022இல்தான் திறக்கப்பட்டிருக்கிறது. எனவே “கடந்த பதினைந்து வருடங்களாக திறக்கப்படாமல் மூடிக் கிடந்த கட்டிடத்தை திறந்து இயங்க வைத்தேன்” என்ற கூற்றும் பொய் என்று நிரூபணமாகிறது.

அதேநேரம் இந்த வைத்தியசாலைக்கான செயற்திட்டத்தின் திட்டமிடலில் குறைபாடுகள் இல்லை, நடைமுறைப்படுத்தலில்தான் குறைபாடுகள் உண்டு என்று Dr. புவிதரன் ஒரு பேட்டியில் குறிப்பிட்டிருந்தார். அவர் கூறுவது போல

இந்த செயற்திட்டத்தை நடைமுறைப்படுத்துவதில் சில குறைபாடுகள் இருந்திருக்க சந்தர்ப்பம் உள்ளது. அந்தக் குறைபாடுகள் இல்லாதிருந்தால் சிலவேளை கட்டிட வேலையை சிறிது காலம் முன்னதாகவே முடித்திருக்க முடியும் என்பதை ஒரு ஊகமாகவே சொல்ல முடியும்.

ஏனெனில் இவ்வாறான திட்டங்களுக்கு ஒதுக்கப்படும் நிதி ஒரே தடவையில் வழங்கப்படுவதில்லை. ஒவ்வொரு கட்டமாக பூர்த்தி செய்யப்பட்ட அறிக்கை சமர்ப்பிக்கப்பட்ட பின்னரே அடுத்த கட்ட நிதி விடுவிக்கப்படும். கட்டுமான வேலை என்பதால் குறைந்தது மூன்று ஒப்பந்தக்காரர்களிடம் விலைகோரல் செய்யப்பட்டு அதில் பொருத்தமானது தெரிவு செய்யப்பட்டு அதன் பின்னர் அந்த ஒப்பந்தகாரருடன் எழுத்து மூல ஒப்பந்தமும் செய்யப்பட வேண்டும்.

கட்டுமான விடயத்தில் ஊழல் நடைபெற்றதாக கூறியவர் இதுவரை அதற்கான தகுந்த ஆதாரத்தைச் சமர்ப்பிக்கப்படவில்லை. அதேநேரம் கட்டுமான வேலைகள் நடைபெறும்போது ஊழல் செய்வதும் பல இடங்களில் நடைபெறுவதுதான். தெரிந்தவர், நண்பர், உறவினருக்கு ஒப்பந்தத்தை வழங்குவது, மற்றவர் கொடுத்த ஒப்பந்தத் தொகையை இரகசியமாக குறித்த ஒப்பந்தகாரருக்கு தெரிவித்து அவருக்கே ஒப்பந்தம் கிடைக்கும் வகையில் deal போடுவது எல்லாம் இலங்கையில் மட்டுமல்ல வேறு நாடுகளிலும் நடக்கும் ஊழல்தான். அதனால் இப்படி ஒரு குற்றச்சாட்டை மக்கள் எளிதாக நம்பியிருக்க வேண்டும்.

ஆனால் ஆதாரத்தைச் சமர்ப்பிக்காது ஒருவர் வாய் வார்த்தையாக சொன்னதை வைத்துக் குற்றம் சாட்டுவது அர்த்தமற்றது. உண்மையில் இந்த விடயத்தில் அக்கறை உள்ளவர்கள் இலங்கையில் நடைமுறையில் இருக்கும் தகவல் அறியும் உரிமைச் சட்டத்தைப் பயன்படுத்தி உண்மையான விபரங்களை உரிய திணைக்களங்களிடம் பெற்றுக் கொள்ள முடியும். அதனைச் செய்து உண்மையாகவே இந்தக் கட்டிட வேலையில் ஊழல் நடைபெற்றிருந்தால் அதன் வெளிக்கொண்டு வந்து மக்களுக்குத் தெரியப்படுத்துங்கள். அதனை நாமும் வரவேற்போம்.
ஆனால் குறித்த முன்னாள் பதில் அத்தியேட்சகருக்கு சாவகச்சேரி சமூகம் ஒரு விடயத்தில் நன்றி சொல்லத்தான் வேண்டும். அவர் சமூக வலைத்தளத்தில் சரமாரியாக குற்றச்சாட்டுகளை முன்வைத்த பின்னர்தான் இலஞ்சம் பெறும் நோக்கில், விடுவிக்கப்படாமல் துறைமுகத்தில் தடுத்து வைக்கப்பட்டிருந்த மின்பிறப்பாக்கியை உடனடியாக விடுவித்ததாகச் சொல்லப்படுகிறது. அது உண்மையாயின், சாகவச்சேரி வைத்தியசாலையைப் பொறுத்தவரை அது ஒரு நன்மையே. ஆனால் அது உண்மையா அல்லது காகம் இருக்கப் பனம்பழம் விழுந்த கதையா என்பது குறித்த துறைமுக அதிகாரிகள் வந்து சொன்னால்தான் தெரியும்.

கட்டுமானம் சம்பந்தமான விடயங்கள் ஒருபுறம் இருக்க, அவர் வைத்திய சமூகத்தை நோக்கி இன்னும் சில குற்றச்சாட்டுகளை முன்வைத்திருந்தார். சில வைத்தியர்கள் வேலை நேரத்தில் தனியார் மருத்துவமனையில் வேலை செய்கிறார்கள், சில உத்தியோகத்தர்களின் பாலியல் சேட்டைகள், இறந்த சடலத்தை வைத்து செய்யப்படும் வியாபாரம் என அவரது பட்டியல் நீண்டதாக அமைந்திருந்தது. பலநாட்கள் கழித்து அவர் இது தொடர்பாக சில தொலைபேசி ஒலிப்பதிவுகளை வெளியிட்டதைத் தவிர வேறு எந்த முறையான ஆதாரத்தையும் முன்வைக்கவில்லை. நீதிமன்றம் ஒன்றுக்கு மேற்பட்ட தடவைகள் நினைவுபடுத்தியும் இன்றுவரை எதையும் சமர்ப்பித்ததாகத் தெரியவில்லை.

ஆனால் இவர் முன்வைத்த குற்றச்சாட்டுகளில் மேலே கூறப்பட்ட சில விடயங்கள் உண்மைதான் என்பதை வைத்தியத்துறை சார்ந்த சிலரே ஒப்புக் கொண்டிருக்கிறார்கள். பொதுமக்களும் இதற்கு முகம் கொடுத்திருக்கிறார்கள். அவர்களில் சிலர் குரல் எழுப்பியிருக்கிறார்கள். ஆனால் ஏழை சொல் அம்பலம் ஏறாததால் அவர்களுக்கான நீதி கிடைக்கவில்லை என்ற ஆதங்கம்தான் பலரும் சமூக வலைத்தளங்களில் குறித்த வைத்தியருக்கு ஆதரவாகவும் வடமாகாண வைத்தியத் துறைக்கு எதிராகவும் பேச காரணமாக அமைந்தது.

தொடர்ந்து பேசுவோம்!

- வீமன் –

09/08/2024

மருத்துவம், மக்கள் மற்றும் அரசியல் – 3
===============================

2015இல் ஆரம்பிக்கப்பட்ட புதிய கட்டிடத் தொகுதியின் முதல் கட்ட கட்டுமான வேலைகள் 2020-21 காலப் பகுதியில் கட்டி முடிக்கப்பட்டாலும் அதனைப் பயன்யன்பாட்டுக்குத் திறந்து வைப்பதில் கால தாமதம் ஏற்பட்டதற்கு அங்கு தேவையான உபகரணங்கள் இல்லாமை முக்கியமான ஒரு காரணமாக இருந்துள்ளது. சாவகச்சேரி வைத்தியசாலைக்கு உலக வங்கி போன்ற அமைப்புகளிடமிருந்து கிடைத்த நிதி அங்கு தேவையான அனைத்து உபகரணங்களையும் பெற்றுக் கொள்ளப் போதாத நிலை இருந்ததாக சொல்லப்படுகிறது.

இந்த நிலையில்தான் 2019 இல் விடுக்கப்பட்ட வேண்டுகோளின் அடிப்படையில் ஒரு தொகுதி உபகரணங்களை வாங்குவதற்கு உதவ TDA முன்வந்தது. இவர்களுக்கு கை கொடுக்க றோட்டரிக் கழகமும் முன்வந்தது. TDA 60% நிதியை சேகரித்தால் றோட்டரிக் கழகம் 40% நிதியைத் தர முன்வந்தது. இதனை Dr. புவிநாதன் ஒரு ஊடக சந்திப்பில் கூறியிருந்தார். அதன்படி TDA 54,500 டாலரும் சேர்த்த நிலையில் இலங்கை, ஆஸ்திரேலியா உட்பட பல றோட்டரிக் கழகங்கள் 36,317 டாலரைப் பங்களித்தன. சேகரித்த பணத்தின் விபரம் அவுஸ்திரேலியா Strathfield றோட்டரிக் கழகத்தின் பக்கத்தில் காணப்படுகிறது. TDA சேகரித்த முழு நிதியும் றோட்டரிக் கழகத்தினூடாகவே வைத்தியசாலைக்கு வழங்கப்பட்டதாக கூறப்படுகிறது.

இந்தக் காலப்பகுதியில்தான் 2021 மார்ச் மாதம் பல வைத்தியர்கள், மருத்துவ நிர்வாகிகள் ஒரு காணொளி ஊடாக நிதி கோரி மக்களிடம் கோரிக்கை வைத்தனர். கனடா, இங்கிலாந்து, ஆஸ்திரேலியா போன்ற நாடுகளில் உள்ள TDA கிளைகள், மற்றும் ரோட்டரி கிளப் நிதியுதவி வைத்தியசாலைக்கு 2022 இல் கிடைத்தது. குறித்த புதிய கட்டிடத் தொகுதி 2022 அக்டோபர் மாதம் திறந்து வைக்கப்பட்டதாக கூறப்படுகிறது. மேலும் சிறு வேலைகள் பூர்த்தி செய்யப்பட வேண்டிய தேவை இருந்தாலும் இந்தத் திட்டம் ஆரம்பித்தபோது MS ஆக இருந்த Dr. தயாளினி மாற்றாலாகி செல்லும் நிலையில் புதிய கட்டிடத்திற்கு பால் காய்ச்சி திறப்பு விழா நடத்தப்பட்டதாகத் தெரிகிறது. அன்றைய தினம்தான் புதிய MS ஆக Dr. குமாரவேல் சாவகச்சேரி வைத்தியசாலையைப் பொறுப்பெடுத்திருக்கிறார். இந்தத் திறப்பு விழாவைத்தான், வைத்தியசாலை இயங்குநிலையில் இருப்பதாக காட்டி, TDA, ரோட்டரி கிளப் என்பவற்றை ஏமாற்றும் ஒரு நாடகம் நடத்தப்பட்டது என்றும் சிலர் குற்றம் சாட்டுகிறார்கள்.

கட்டிடம் திறந்து வைக்கப்படாலும் மேலும் சில வேலைகள் செய்யப்பட வேண்டிய நிலை ஒருபுறம் இருக்க, இதனை இயங்க வைப்பதற்குத் தேவையான ஆளணிப் பிரச்சனை இன்னொரு முக்கிய பிரச்சனையாக ஆரம்பம் முதலே இருந்துள்ளது. ஆனால் கட்டிடத்தைக் கட்டி, உபகரணங்களையும் பெற்ற பின்னர் அவற்றைக் காட்டி அமைச்சுக்கும் அரசுக்கும் அழுத்தம் கொடுத்து தேவையான வைத்தியர்கள், மற்றும் ஏனைய உத்தியோகத்தர்களைப் பெற்றுக் கொள்ள முடியும் என்பதுதான் அவர்களின் எண்ணமாக இருந்திருக்கிறது. 2019 இல் TDA இடம் நிதியுதவி கேட்டபோது இதனைக் குறிப்பிட்டார்கள் என்று Dr.புவிதரன் நேர்காணலில் குறிப்பிட்டிருந்தார். 2022 அக்டோபரில் நடைபெற்ற திறப்பு விழாவிலும் பகிரங்கமாக தேவையான ஆளணியினரைத் தந்துதவுமாறு வைத்திய நிர்வாகிகள் சுகாதார அமைச்சிடம் கேட்ட விடயம் செய்திகளில் ஆவணப்படுத்தப்பட்டுள்ளது.

மேலதிகமாகத் தேவையான தாதியர், சுகாதார உதவியாளர்கள் தொடர்பாக மாகாண பணிப்பாளர், வடமாகாண சுகாதார அமைச்சின் செயலாளர் ஆகியோரிடம் 2022இல் வேண்டுகோள் விடுக்கப்பட்டிருக்கிறது. அப்போது சுகாதார அத்தியேட்சகராக இருந்த Dr. குமாரவேல் இது தொடர்பாக அமைச்சுக்குக் கடிதம் எழுதியபோது 2026 இல்தான் தேவையான ஆளணியைத் தரமுடியும் எனப் பதில் கொடுக்கப்பட்டதாகச் சொல்லப்படுகிறது. அதேநேரம் 2022 காலப் பகுதியில் சாவகச்சேரிக்கு வந்திருக்க வேண்டிய நான்கு வைத்தியர்கள் யாழ் போதனா வைத்தியசாலையுடன் இணைந்திருந்தாகவும் சொல்லப்படுகிறது. இதுவும் வைத்தியர்/ஆளணி பற்றாக்குறைக்குக் காரணமாக இருந்திருக்கலாம். தற்போது அவ்வாறு சாவகச்சேரிக்கு வரவேண்டிய 7 வைத்தியர்கள் யாழ் போதனா வைத்தியசாலையில் இருப்பதாக அங்கிருந்து வரும் தகவல்கள் தெரிவிக்கின்றன.

இன்னொரு சர்ச்சைக்குரிய விடயமான மின்பிறப்பாக்கி விடயத்தில், 2022 இல் திறப்பு விழா நடக்கும்போதுதான் 500 kw மின்பிறப்பாக்கி தேவை என்று Dr. குமாரவேல் தன்னிடம் கேட்டதாகக் Dr. புவிதரன் கூறுகிறார். உபகரணங்கள் கேட்கும்போது மின்பிறப்பாக்கியின் தேவை சொல்லப்படவில்லை என்று கூறுகிறார். அதன் பின்னர் மின்பிறப்பாக்கியை அரசின் மூலம் நடவடிக்கை எடுக்கப்பட்டிருக்கிறது. ஆரம்பத்தில் முழு வைத்தியசாலைக்கும் மின்தடை நேரத்தில் மின்சாரம் வழங்கும் வகையில் 500 kw மின்பிறப்பாக்கியை வாங்க முன்மொழிவு செய்யப்பட்டிருக்கிறது. ஆனால் 2022 காலப்பகுதியில் வடமாகாண PDஆக இருந்தவர் அதனை அங்கீகரிக்கவில்லை.

அதன் பின்னர் மின்சார சபை உதவியுடன் மீண்டும் மதிப்பீடு செய்யப்பட்டு 400 kw மின்பிறப்பாக்கி வாங்குவதற்கு 2024இல் ஏற்பாடுகள் செய்யப்பட்டதாகச் சொல்லப்படுகிறது. இந்த வருட மே மாத இறுதியளவில் மின்பிறப்பாக்கி துறைமுகத்திற்கு வந்து சேர்ந்ததாகச் சொல்லப்படுகிறது. ஆனால் துறைமுக அதிகாரிகள் லஞ்சம் கோரி மின்பிறப்பாக்கியை தடுத்து வைத்தது மேலும் தாமதத்தை ஏற்படுத்தியதாகவும் சொல்லப்படுகிறது.

கடந்த ஜூலை மாத இறுதியில் ஒரு வழியாக மின்பிறப்பாக்கி வைத்திய சாலைக்கு வந்து சேர்ந்தாலும் அதை இயங்க வைக்கத் தேவையான ஒரு பகுதி அதனுடன் வரவில்லை என்று சொல்லப்படுகிறது. தற்போது அதனைப் பெற்றுக் கொள்ள நடவடிக்கை எடுக்கப்பட்டிருப்பதாகச் சொல்கிறார்கள். இதனால் புதிய மின்பிறப்பாக்கியை இயங்க வைக்க மேலும் காலதாமதமாகப் போகிறது. அதனை விடல் கட்டிடத்தில் மேலும் சிறு வேலைகளைப் பூர்த்தி செய்ய வேண்டியிருப்பதாகக் கூறுகிறார்கள். எனவே, புதிய கட்டிடத் தொகுதியை முழுமையாக இயங்க வைக்க இன்னும் சில மாதங்கள் எடுக்கலாம்.

தொடர்ந்து பேசுவோம்.....!

- வீமன் -

09/03/2024

மருத்துவம், மக்கள் மற்றும் அரசியல் - 2
===============================

சாவகச்சேரி வைத்தியசாலை தொடர்பில் முன்வைக்கப்பட்ட குற்றச்சாட்டுகளில் முக்கியமானவை, புதிதாக கட்டப்பட்ட கட்டிடம் மற்றும் மருத்துவ உபகரணங்களுக்காக சேகரிக்கப்பட்ட நிதி தொடர்பான குற்றச்சாட்டுகள் ஆகும்.

புதிய கட்டிடம் கடந்த 15 வருடங்களுக்கு மேலாகப் பயன்படுத்தப்படாது பாழடைந்து இருக்கிறது என்பது வைத்தியரின் முதலாவது குற்றச்சாட்டு. சாவகச்சேரி வைத்தியசாலைக்கு ஒதுக்கப்பட்ட 400 மில்லியன் நிதியில் 200 மில்லியன் ரூபாவை ஊழல் செய்துவிட்டார்கள் என்பது இரண்டாவது குற்றச்சாட்டு. அதைத் தொடர்ந்து, வழங்கப்பட்ட வைத்திய உபகரணங்கள் இன்றுவரை சரியாக பயன்படுத்தப்படவில்லை. வைத்தியசாலைக்குத் தேவையான ஜெனரேட்டர் வாங்கப்படவில்லை என வரிசையாக குற்றச்சாட்டுகள் முன்வைக்கப்பட்டன.

Sri Lanka State of the Economy Report 2010 அறிக்கையின்படி (Page 83) யாழ் மாவட்டத்தில் சுகாதார சேவைகளின் கட்டமைப்பை மேம்படுத்த 350 மில்லியன் ரூபா ஒதுக்கப்பட்டது. இந்தத் திட்டத்தில் யாழ் போதனா வைத்தியசாலை, சாவகச்சேரி வைத்தியசாலை, மானிப்பாய், கரவெட்டி மற்றும் இளவாலை ஆகிய ஐந்து வைத்தியசாலைகள் உள்ளடங்கியிருந்தன. சாவகச்சேரியில் இந்தத் திட்டத்தின் கீழ், நிர்வாகக் கட்டிடம், வெளிநோயாளர் பிரிவு என்பவற்றைக் கட்டும் திட்டம் இருந்தததாக மேற்படி அறிக்கை தெரிவிக்கிறது. ஆனால் இவை ஏற்கனவே இருந்த கட்டிடங்கள் என்று கூறப்படுகிறது. எனவே மேற்படி நிதியில் குறித்த கட்டிடத்தின் திருத்த வேலைகள் நடைபெற்றிருக்க வேண்டும்.

ஊடகங்களில் அதிகம் பேசப்பட்ட மூன்று மாடி கட்டிடம் 2015இல் ஆரம்பிக்கப்பட்ட திட்டமாகும். இந்தத் திட்டத்தின் கீழ் அவசர சிகிச்சைப் பிரிவு, சிறு சத்திர சிகிச்சைகள் நிலையம் மற்றும் இரத்த வங்கிக்கான உள்கட்டமைப்பு வசதிகள் உருவாக்கப்பட்டன. இது 2015இல் ஆரம்பிக்கப்பட்டுக் கட்டம் கட்டமாக கட்டப்பட்டு 2019-20 காலப் பகுதியில் முடிக்கப்பட்டதாக கூறப்படுகிறது. அதன் பின்னர் 2021இல் 4.9 மில்லியன் ரூபா பாதீடு மின்தூக்கி கட்டுமான வேலை தொடங்கப்பட்டுள்ளது. இன்னமும் சில வேலைகள் முடிக்கப்பட வேண்டியுள்ளதாக அங்கிருந்து வரும் தகவல்கள் தெரிவிக்கின்றன.

தகவல் அறியும் உரிமையின் கீழ் பசுந்தேசம் அமைப்பும் யாழ் பிராந்திய சுகாதார சேவைகள் பணிமனையிலிருந்து பெற்றுக் கொண்ட தகவல் அடிப்படையில் 2015 - 2022 காலப் பகுதியில் - $131.75 மில்லியன் ரூபா ஒவ்வொரு வருடமும் பகுதி பகுதியாக பெறப்பட்டு செலவிடப்பட்டுள்ளது. 2022 - 2024 காலப் பகுதியில் மேலும் 70.06 மில்லியன் செலவிடப்பட்டுள்ளது. மொத்தமாக 2015 இலிருந்து 2024 வரை 201.81 மில்லியன் செலவிடப்பட்டுள்ளது. இந்த மூன்று மாடிக் கட்டிடத்திற்கான முழு வேலைத்திட்டமும் வடமாகாண சுகாதாரத் துறையை மேம்படுத்த வழங்கப்பட்ட கட்டம் கட்டமாக வழங்கப்பட்ட உலக வங்கியின் நிதியில் நிறைவு செய்யப்பட்டுள்ளது..

இந்த வேலைத் திட்டத்துடன் தொடர்புபடுத்தித்தான் சாவகச்சேரிக்கு ஒதுக்கிய 400 மில்லியன் ரூபா நிதியில் பாதியைத்தான் கொள்ளையடித்து விட்டார்கள் என்ற குற்றச்சாட்டு ஜூலை மாதம் குறித்த வைத்தியரால் முன்வைக்கப்பட்டது. அதைத் தொடர்ந்து, பலரும் சாவகச்சேரிக்கு அனுப்பிய பணத்தில் பாதியை யாரைக் கேட்டு வவுனியாவிற்கு ஒதுக்கினார்கள்? யாரூடாக பணம் சென்றது? மாவட்டச் செயலாளருக்கும் இந்த ஊழலில் தொடர்புண்டா? என்று கம்பு சுத்தினார்கள்.

இது தொடர்பாக நிதி கிடைத்த காலத்தில் வடமாகாண சுகாதார அமைச்சராக இருந்த Dr. சத்தியலிங்கம் எந்த ஒரு கட்டத்திலும் எந்த ஒரு நிதியும் எந்த ஒரு வைத்தியசாலைக்கும் தனியாக ஒதுக்கப்படவில்லை, ஒவ்வொரு கட்டத்திலும் வடமாகாணத்திற்கே ஒதுக்கப்பட்ட நிதியிலிருந்தே குறித்த வைத்தியசாலையின் அபிவிருத்தி வேலைகள் செயப்பட்டன என்பதை விளக்கியிருந்தார். அந்த நிதி புலம்பெயர் சமூகம் அனுப்பிய பணமல்ல.

ஒரு மாகாணத்திற்கு ஒதுக்கப்பட்ட நிதியைத் தேவை அடிப்படையில் ஒவ்வொரு பிரதேசத்துக்கும் ஒதுக்க நிர்வாகக் கட்டமைப்புக்கு அதிகாரம் இருக்கிறது என்பதை பொதுமக்கள் புரிந்து கொள்ள வேண்டும். அவ்வாறு தேவை அடிப்படையில் நிதி ஒதுக்குவதே சரியாக நிர்வாகம் செய்யும் ஒரு அமைச்சுக்கு அழகும் கூட.

இந்தக் கட்டிடத் தொகுதி கட்டி முடிக்கப்படும் தறுவாயில் 2019இல் சாவகச்சேரி வைத்தியசாலைச் சமூகம் தம்மிடம் உபகரணங்கள் வாங்குவதற்கு உதவி கோரியதாக தென்மராட்சி அபிவிருத்திக் கழகத்தின் (TDA) இங்கிலாந்து கிளையின் தலைவர் Dr. புவிநாதன் தெரிவித்துள்ளார். உபகரணங்கள் வாங்க உலக வங்கி மூலம் கிடைத்த நிதி போதமையாலேயே இவ்வாறான நிதிக் கோரிக்கை முன்வைக்கப்பட்டிருக்க வேண்டும். ஆரம்பத்தில், பிரித்தானியாவைத் தளமாகக் கொண்ட TDA அமைப்பே நிதியை சேகரிக்க முன் வந்ததாக சொல்லப்படுகிறது. பின்னர், தேவையான நிதியை குறிப்பிட்ட காலத்தினுள் திரட்டும் முகமாக கனடா, ஆஸ்திரேலியா போன்ற ஏனைய நாடுகளிலுள்ள TDA அமைப்புகளும் இதில் இணைந்து கொண்டதாக கூறப்பட்டது.

அதன் பின்னர் 2021 மார்ச் மாதம் அவசர சத்திர சிகிச்சைப் பிரிவை இயங்கு நிலைக்குக் கொண்டுவர சாவகச்சேரி வைத்தியசாலையின் வைத்தியர்களும் வடமாகாண வைத்திய அதிகாரிகளும் ஒரு காணொளியில் சாவகச்சேரி வைத்தியசாலையின் தேவைகளை முன்னிறுத்தி மக்களிடம் நிதி கோரினர். பிரதானமாக புலம்பெயர் சமூகத்திடமே இந்தக் கோரிக்கை முன் வைக்கப்பட்டது எனலாம்.

தொடர்ந்து பேசுவோம்!

- வீமன் –

09/02/2024

மருத்துவம், மக்கள் மற்றும் அரசியல் - 1
===============================

சாவகச்சேரி வைத்தியசாலைக்கு ஜூன் மாதம் பதில் அத்தியேட்சகராக நியமிக்கப்பட்டு ஒருமாத காலத்திற்குள் அந்த வைத்தியர், சமூக வலைத்தளத்தைப் பயன்படுத்தி குறித்த வைத்தியசாலை வைத்தியர்கள், நிர்வாகக் கட்டமைப்பு என்பவற்றின் மீது பல குற்றச்சாட்டுகளை முன்வைத்தார். அதன் பின்னர் அவர் வரிசையாக வெளிப்படுத்திய விடயங்கள் அவரை மக்கள் மத்தியில் ஒரு போராளியாக வெளிப்படுத்தின.

கடந்த காலங்களில் தமக்கு நேர்ந்த கசப்பான, துயரமான சம்பவங்களை வெளிப்படையாகப் பேசி நியாயத்தைப் பெற்றுக் கொள்ளமுடியாத, குரலற்றவர்களாக மனக் குமுறல்களோடு இருந்த மக்களுக்கு இவர் வெளிப்படுத்திய விடயங்கள், அவர்மீது ஒரு அதீத நம்பிக்கையை ஏற்படுத்தியது. கடந்த பல வருடங்களாக சரியான, நம்பகமான ஒரு தலைமைத்துவம் இல்லாத சமூகமாக இயங்கி வந்த தமிழர்களுக்கு இந்த வைத்தியர் ஒரு தலைவனாக, கதாநாயகனாகத் தெரிந்ததில் ஆச்சரியமில்லை.

இவரது தொடர் FB நேரலைகள் சாவகச்சேரி மக்களை வீதிக்கு வந்து குரல் எழுப்பச் செய்தது. இது, மக்கள் தமது உரிமைக்காக போராடத் தயாராக இருக்கிறார்கள் என்ற நம்பிக்கையைத் தந்தது. அவர்கள் மட்டுமன்றி ஏனைய பிரதேச மக்களும் குறித்த வைத்தியர் முன்வைத்த விடயங்களைப் பற்றிப் பிடித்து வடக்குக் கிழக்கில் குறைபாடுள்ள வைத்தியசாலைகளின் முறைகேடுகளை வெளிப்படுத்திப் போராடுவார்கள் என்ற எதிர்பார்ப்பு சேர்ந்தே எழுந்தது.

உண்மையில் இந்தத் தருணத்தைப் பயன்படுத்தி ஒவ்வொரு பிரதேசத்திலும் நடைபெற்ற முறைகேடுகள், ஊழல் தொடர்பாக அந்தந்தப் பிரதேச அமைப்புகள், சனசமூக நிலையங்கள் அமைதியான மக்கள் போராட்டத்தை முன்னெடுத்திருந்தால் GMOAவின் நெருக்குதலையும் தாண்டி, ஊழலுக்கு எதிரான விசாரணையை முன்னெடுக்க வேண்டிய சூழல் அரசுக்கு ஏற்பட்டிருக்கலாம். அப்படி நிகழ்ந்திருந்தால் மருத்துவத்துறையின் முறைகேடுகளை ஆதாரங்களுடன் வெளிப்படுத்தவும் எதிர்காலத்தில் சிறப்பான மருத்துவ சேவைகளை மக்கள் பெறவும் வழி கிடைத்திருக்கலாம்.

ஆனால் மக்களின் செயற்பாடுகள் அந்தத் திசையில் பயணிக்கவில்லை. குறித்த வைத்தியரைப் பாதுகாப்போம், அவருக்குப் பின்னால் அணி திரள்வோம் என்றளவில் நின்று கொண்டார்கள். அவர் ஊழலை ஒழிக்கும் வேலையைப் பார்த்துக் கொள்வார் என்பதாகவே அவர்களில் பேச்சும் செயலும் இருந்தன. இந்த சமயத்தில் வைத்தியர் தனது உடல்நிலை, GMOA, சாவகச்சேரி வைத்திய நிலையம் என்பன தனக்கு நெருக்கடி கொடுப்பதாக அவர் அடிக்கடி வெளியிட்ட காணொளிகளும் அதற்குக் காரணமாக இருந்திருக்கலாம்.

குறித்த வைத்தியசாலைச் சமூகம் தொடர்பாக அந்த வைத்தியர், சில வைத்திய அதிகாரிகள் மீது சேவை நேரத்தில் தனியார் வைத்தியசாலையில் மருத்துவம் செய்து பணம் சம்பாதித்தல், போதை மருந்து வியாபாரம், பாலியல் குற்றச்சாட்டு எனப் பல குற்றச்சாட்டுகளை முன்வைத்தார். எல்லாவற்றுக்கும் அவரிடம் ஆதாரம் இருப்பதாகவும் சொல்லப்பட்டது. குறித்த வைத்தியர் அடுத்த கட்டமாக தன்னிடமிருக்கும் ஆதாரங்களை நீதிமன்றில் சமர்ப்பித்து தவறிழைத்தவர்களுக்கு எதிராக வழக்குத் தொடர்வார் என்று அவரது அபிமானிகள் நம்பினார்கள். ஆனால் அவர் அப்போது தான் குற்றம் சுமத்திய எவருக்கு எதிராகவும் வழக்குத் தொடரவில்லை.

இந்த சாவகச்சேரி விவகாரம் தமிழ் அரசியல்வாதிகளின் கவனத்தையும் பெற்றது. இது தேர்தல் காலம் என்பதால் அரசியல்வாதிகளின் கவனம் பெற்றதில் எந்த ஆச்சரியமும் இல்லை. யாழ் மாவட்ட அபிவிருத்திக் குழுவின் தலைவரும் இலங்கை அரசில் அமைச்சராகவும் உள்ள டக்ளஸ் நேரடியாகவே வைத்தியசாலைக்குச் சென்று பார்வையிட்டதோடு இது தொடர்பாக விசாரித்து நடவடிக்கை எடுக்க தன்னாலானவற்றைச் செய்வதாகவும் கூறிச் சென்றார். அதன்பின்னர் ஜூலை 9ம் திகதி இந்த விடயத்தில் விசாரணைக்கு அமைச்சரவை அங்கீகாரம் கிடைத்திருப்பதாகவும் அமைச்சர் ஊடகங்களுக்குத் தெரிவித்தார்.

குறித்த வைத்தியர் முன்வைத்த குற்றச்சாட்டுகளில் முக்கியமானது சாவகச்சேரி வைத்தியசாலையின் சத்திரசிகிச்சைப் பிரிவுக்காக வழங்கப்பட்ட 400 மில்லியன் ரூபா கொடைநிதி மற்றும் தென்மராட்சி அபிவிருத்திக் கழகம் வழங்கிய நன்கொடை தொடர்பானது ஆகும். இந்தக் வேலைத் திட்டத்தோடு தொடர்புபட்ட மின்பிறப்பாக்கி பெறப்படாமையும் இந்த வைத்தியரால் சுட்டிக் காட்டப்பட்டது. இதற்கான நிதித் திரட்டலில் ஈடுபட்ட TDA எனப்படும் தென்மராட்சி அபிவிருத்திக் கழகமும் அதற்கு நிதி கொடுத்த பொதுமக்களும் இது தொடர்பில் ஊடகங்களில் பேச, இந்த விவகாரம் மேலும் சூடு பிடித்தது.

ஆனால் அதன் பின் நடைபெற்ற நிகழ்வுகளால் இந்த விவகாரம் திசைமாறிப் போனது. அந்த வைத்தியரும் தனது ஆரம்ப இலக்கிலிருந்து விலகி வேறு திசையில் பயணித்ததை அவதானிக்க முடிந்தது. இதன் தொடர்ச்சியாக வைத்தியரின் நோக்கம் பற்றிப் பலமான விமர்சனங்கள் எழுந்தன. அவரை நம்பிப் பின்பற்றுவோர் இந்த விமர்சனங்களை எதிர்த்து வைத்தியரின் செயற்பாடுகளை நியாயப்படுத்தும் செயலில் இறங்கினர். மொத்தத்தில் முக்கியமான பிரச்சனையில் கவனம் செலுத்துவதை விடுத்து தனி மனிதர் ஒருவரில் கவனம் குவிந்தது.

- வீமன் -

(தொடரும்...)

08/25/2024

பொது வேட்பாளரும் தேர்தல் பகிஸ்கரிப்பும்
==================================

எமது ஈழ அரங்கில் கடந்த சில வாரங்களாக வெற்றிகரமாக இரண்டு படங்கள் ஓடிக் கொண்டிருக்கின்றன. ஒன்று “மருத்துவ ஊழல்” மற்றயது “தமிழ் பொது வேட்பாளர்”.

இன்று “தமிழ் பொது வேட்பாளர்” படத்தைப் பற்றிதான் பார்க்கப் போகிறோம். ஆரம்பத்தில் என்ன திசையில் கதை போகிறது, என்ன முடிவு வரும், பொது வேட்பாளராக ஒருவர் தெரிவு செய்யப்படுவாரா? என்று பல ஊகங்களோடு படம் ஆரம்பித்தது. ஆரம்பிக்கும் போதே இது வீண் வேலை என்ற விமர்சனங்களும் ஆய்வுக் கட்டுரைகளும் தாரளமாக வெளிவந்தன. தேநீர் கடையில் அமர்ந்து அரசியல் பேசும் பாத்திரங்கள் தமது பங்கிற்கு இவர்களாவது ஒன்று சேர்ந்து ஒருவரை ஒற்றுமையாக ஒரு பொது வேட்பாளரை தெரிவு செய்வதாவது! கொஞ்சமாவது நடக்கிற கதையைப் பேசுங்கள் என்று டீ குடித்துக் கொண்டு வசனம் பேசினார்கள்.

நடக்குமா இல்லையா என்று ரசிகர்கள் ஊகிக்க முடியாத வகையில் நகர்ந்த கதையில் இடைவேளை நெருங்கும்போது தமிழரசுக் கட்சி, தமிழ் தேசிய மக்கள் கூட்டணி தவிர்ந்த ஏனைய ஏழு தமிழ் கட்சிகள் ஒப்பந்தத்தில் கையெழுத்திட்டனர். ஒரு வழியாக பொதுவேட்பாளர் தெரிவு நடைபெற்ற நிலையில் இடைவேளையின் பின்னர் படம் மேலும் விறுவிறுப்பாக நகரும் என்று எதிர்பார்த்தபோதும் ஒரு சில காட்சிகள் தவிர்த்து, பல காட்சிகள் எதிர்பார்த்தது போலவே நகர்ந்ததில் ரசிகர்களுக்கு கொஞ்சம் சலிப்பைக் கொடுத்தது என்றுதான் கூற வேண்டும்.

கிழக்கு மாகாணத்தைச் சேர்ந்த அரியநேத்திரன் பொது வேட்பாளராகத் தெரிவு செய்யப்பட்டு பிரச்சாரம் செய்யத் தொடங்கிவிட்ட நிலையில் இந்தப் பொது வேட்பாளர் தெரிவுக்கு தாம் ஆதரவில்லை என்று தமிழரசுக் கட்சி அறிவித்தது. மத்திய செயற்குழு உறுப்பினராக இருந்த அரியநேத்திரனை கட்சியிலிருந்து நீக்க முயற்சிப்பதாகவும் ஒரு கதை பரவியது. ஆனால் பின்னர் ஸ்ரீதரன் MP அறியநேத்திரனைச் சந்தித்து மாலை போட்டு வாழ்த்தி இந்த திருப்பத்திற்கும் ஒரு முற்றுப் புள்ளி வைக்கப்பட்டது. ஆனாலும் பொது வேட்பாளர் தொடர்பில் இன்னமும் வாதப் பிரதிவாதங்கள் முற்றாக நின்றுவிடவில்லை. இவருக்கு வடக்கில் ஆதரவில்லை; கிழக்கில் வாக்குக் கிடைக்கலாம் என்று இவர் தெரிவாகும் முன்னரே கணிப்புகள் பகிரப்பட்டன.

ரணிலின் ஆள் என்று சொல்லப்படும் தேசிய அரசியலில் (தமிழ் தேசிய அரசியலில் அல்ல) ஆர்வமுள்ளவரான சுமந்திரன் இன்னமும் தமிழ் பொது வேட்பாளர் என்பது வீண் வேலை. நாம் எதையும் சாதிக்கப்போவதில்லை, மாறாக எமது பலத்தை நாமே சிதைக்கப் போகிறோம் என்ற தன் பிரசாரத்தை இன்னமும் கைவிடவில்லை. சாணக்கியனும் அதே பாதையில்தான் பயணிக்கிறார். இப்படி, கிழக்கில் இருந்து வந்த பொது வேட்பாளருக்கு கிழக்கிலிருந்தே எதிர்ப்புக் கிளம்பியதை ரசிகர்கள் எதிர்பார்த்திருக்க மாட்டார்கள்.

ஆனால், தமிழர்களின் பலத்தைக் காட்டவும் தமிழ் தேசிய உணர்வை வெளிக்காட்டவும் இது ஒரு சந்தர்ப்பம் என்பது தமிழ் பொது வேட்பாளரை ஆதரிப்போரின் நிலையாக இருக்கிறது. வெற்றி வாய்ப்புள்ள சிங்கள வேட்பாளருடன் ஒப்பந்தம் செய்து, தேர்தலின் பின்னர் எமக்குச் சாதகமான விடயங்களைச் செய்ய முயற்சிக்க வேண்டும் என்பது “தமிழ் பொது வேட்பாளர்” தேவையற்றது என்போரில் ஒரு சாராரின் வாதமாக இருக்கிறது.

“ஆனால் இம்முறை ரணில், சஜித், அனுர ஆகியோர் இருக்கும் நிலையில் அவர்களும் எந்த உறுதியான வாக்குறுதியையும் தரப்போவதில்லை. யார் வெல்வார்கள் என்பதையும் சொல்வது இலகுவானதாக இருக்கப் போவதில்லை. இதனைவிட, கடந்த எழுபது வருடங்களாக சிங்களத் தலைமைகள் தமிழ்த் தரப்புடன் ஒப்பந்தம் செய்வதும் பின்னர் அவற்றைக் கிழித்து எறிவதும் வழமை என்பதால், எந்தப் பிரதான கட்சியுடன் ஒப்பந்தம் செய்தாலும் எந்தப் பயனும் இருக்கப் போவதில்லை” போன்ற வசனங்கள் படத்திற்கு வலுச் சேர்த்தன என்றே சொல்லலாம்.

அதேநேரம், படத்தில் இரண்டாவது வில்லன் அணியாகக் காட்டப்பட்ட, பொது வேட்பாளர் விடயத்தில் அக்கறை காட்டாத இன்னொரு தரப்பான த.தே.ம.கூ. மீண்டும் மீண்டும் இந்தத் தேர்தலை நாங்கள் முற்றாகப் புறக்கணிக்க வேண்டும், பகிஸ்கரிக்க வேண்டும் என்று கோசம் எழுப்பி தமது இருப்பைப் படத்தில் பதிவு செய்தார்கள். ஆனால் வடக்கில் மட்டுமே ஓரளவு செல்வாக்குள்ள இவர்கள் சொல் அம்பலம் ஏறுமா என்று படத்தின் கிளைமாக்ஸ் வரும்போதுதான் தெரியும்.

இந்தப் படத்தைப் பார்க்கும்போது, தமிழ்ப் பொது வேட்பாளரை ஆதரிக்கும் தரப்பின் வாதத்தையும் சிங்களத் தலைமையில் ஒன்றை நாம் ஆதரிக்க வேண்டும் என்ற முதலாவது வில்லன் கூட்டத்தின் நிலைப்பாட்டையும் எனது சிறிய அரசியல் அறிவைக் கொண்டு புரிந்து கொள்ள முடிகிறது. ஆனால் இரண்டாவது வில்லன் அணியின் நிலைப்பாட்டைத்தான் என்னால் புரிந்து கொள்ள முடியவில்லை.

சிங்கள அரசு எதையும் செய்யாது என்ற வாதத்தை ஏற்றுக் கொள்ளலாம். தமிழ் பொது வேட்பாளர் வெற்றி பெறப் போவதில்லை என்ற வாதமும் ஏற்புடையது. ஆனால் வாக்களிக்காமல் பகிஸ்கரிப்பு என்ற நிலைப்பாட்டினால் யாருக்கு என்ன செய்தியைச் சொல்ல முடியும்? பகிஸ்கரிப்பால் யாருக்கு என்ன நன்மை கிடைக்கப் போகிறது? சிங்கள வேட்பாளருக்கு வடக்குக் கிழக்கில் தமிழர் போடும் வாக்குகள் ஆவணத்தில் குறித்த சிங்கள வேட்பாளருக்கு தமிழர்கள் போட்ட வாக்காக பதியப்படும். அரியநேத்திரனுக்கு போடப்படும் வாக்குகள் தமிழர்களின் நிலைப்பாட்டை வெளிப்படுத்தும் வாக்குகளாக ஆவணப்படுத்தப்படும்.

இவர்கள் சொல்வது போல தமிழர்கள் தேர்தலைப் பகிஸ்கரித்தால் அது எங்கு ஆவணப்படுத்தப்படும்? தேர்தல் முடியும் வரையே இந்தப் பகிஸ்கரிப்புப் பேசுபொருளாக இருக்கும். அதன் பின்னர் தேர்தலில் ஏனைய வாக்களிக்காத வாக்காளர் எண்ணிக்கையினுள் பகிஸ்கரித்தோர் எண்ணிக்கையும் புதைந்து காணாமல் போய்விடும். எனவே தேர்தலை பகிஸ்கரிக்கக் கோருவோர் மாறாக அனைவரும் வாக்களிக்கும் நிலையங்களுக்கு சென்று ஒன்றில் தமிழ் பொது வேட்பாளருக்கு வாக்களிக்கக் கூறுங்கள். அல்லது வாக்குகளைச் செல்லுபடியாக்கும்படி கூறுங்கள். அப்படியே மறக்காமல் அடுத்த பாராளுமன்ற அமர்வில், இந்தியாவில் இருப்பது போல NOTA (None of the above) தெரிவை இலங்கையிலும் அறிமுகப்படுத்த அரசுக்கு அழுத்தம் கொடுங்கள்.

- வீமன் -

08/17/2024

ஊழலும் மக்களும்
===============

சாவகச்சேரி வைத்தியசாலை தொடர்பாக அங்கு பதில் அத்தியேட்சகராக வந்த ஒரு வைத்தியர் ஜூலை மாத ஆரம்பத்தில் சமூக ஊடகத்தின் வாயிலாக முன் வைத்த முறைகேடுகள் தொடர்பான குற்றச்சாட்டுகள், அரச வைத்தியசாலைகளில் நீண்டகாலமாகக் காணப்படும் ஊழல்கள், முறைகேடுகள் தொடர்பாக சில வைத்தியர்களும் பொது மக்களும் பேசுவதற்கு களம் அமைத்துக் கொடுத்தது.

இதனைத் தொடர்ந்து வைத்தியத்துறையின் ஊழலைத் தட்டிக் கேட்க ஒரு தலைவன் கிடைத்து விட்டான் என்ற நம்பிக்கை சிலருக்கு ஏற்பட்டது. நியாயத்தை தட்டிக் கேட்கும் வேலையை முறைப்படி அந்த வைத்தியர் செய்வார் என்ற என்ற எதிர்பார்ப்பும் எழுந்தது. இந்த வைத்தியசாலைக்கு அண்மைக் காலத்தில் நிதியுதவி செய்த தென்மராட்சி அபிவிருத்தி சபையும் தாம் வழங்கிய நிதி முறையாகப் பயன்படுத்தப்பட்டு மக்களுக்கு சேவை வழங்கப்படவில்லை என்று விசனம் தெரிவித்திருந்தது.

ஆனால் இன்றுவரை இந்த விடயம் தொடர்பாக, குறிப்பாக நிதி மோசடிக் குற்றச்சாட்டுத் தொடர்பாக எந்த வழக்கும் வைத்தியசாலை நிர்வாகத்தின் மீது தொடரப்படவில்லை. ஆதாரங்கள் தன்னிடம் இருப்பதாகக் கூறும் வைத்தியரும் இன்னமும் அவற்றை நீதிமன்றில் சமர்ப்பிக்கவோ, பொதுநல வழக்குப் போடவோ முயற்சி எடுத்ததாகத் தெரியவில்லை.

ஆனாலும் இந்த வைத்தியர் குரல் எழுப்பிய பின்னர் பல இடங்களில் வைத்தியர்கள், ஏனைய மருத்துவத் துறை ஊழியர்கள் ஒழுங்காக வேலை செய்யத் தொடங்கியிருக்கிறார்கள் என்று சிலர் சொல்கிறார்கள். அது நல்ல விடயம்தான். தற்போது மன்னாரிலும் மருத்துவ அலட்சியத்தால் மரணித்த இளம் தாயின் மரணம், நிலைமை சரியாக இன்னும் நீண்ட காலம் எடுக்கும் என்றே எண்ண வைக்கிறது.

ஆனால் இப்படி அங்கும் இங்கும் ஓரிரு வைத்தியர்கள், தாதியர்கள் தண்டிக்கப்படுவதால் வைத்தியசாலைகளில் உள்ள குறைபாடுகள் முழுமையாகச் சரியாகிவிடப் போவதில்லை. இவையெல்லாம் மரத்தின் கிளையை வெட்டும் வேலைதான். ஊழலை முற்றாக ஒழிக்க வேண்டும் என்றால் இதன் ஆணிவேர் அகற்றப்பட வேண்டும். அதற்கு system சரிசெய்யப்பட வேண்டும். இங்கு நான் system என்று சொல்வது அரசாங்க நிர்வாகக் கட்டமைப்பை மட்டுமல்ல, முக்கியமாக எமது சமூகக் கட்டமைப்பையும் நாம் சரிசெய்ய வேண்டியுள்ளது.

ஆனால் சுகாதாரத் துறையை சீர்செய்வதும் இலகுவான இலக்காக இருக்கப் போவதில்லை. ஏற்கனவே கடந்த சில வருடங்களாக பல வைத்தியர்கள் பயிற்றப்பட்ட தாதிமார் பசுமை தேடி நாட்டை விட்டு வெளியேறி வருகிறார்கள். அண்மையில் ஜனாதிபதி ஊடகப் பிரிவின் அறிக்கைப்படி 30 – 40% ஆனவர்கள் நாட்டை விட்டு வெளியேறியுள்ளார்கள். இது இலங்கை முழுவதுமே வைத்தியசாலைகளில் போதுமான வைத்தியர்களையும் தாதிமாரையும் நியமிக்க முடியாத நிலையை ஏற்படுத்தியுள்ளது.

சில வைத்தியசாலைகளில் ஆண் அதிகாரிகள், ஆண் உத்தியோகத்தர்களால் அங்கு பணிபுரியும் பெண் ஊழியர்கள் மட்டுமன்றி பெண் வைத்தியர்களும் பாலியல் தொந்தரவிற்கு உள்ளாவதும் தீர்க்கப்படாமல் இருக்கும் இன்னொரு முக்கிய பிரச்சனையாகவே இருக்கிறது.

அதேநேரம், மருத்துவ முறைகேடுகளால் பாதிக்கப்படும் நடுத்தர மற்றும் ஏழைக் குடும்பங்களுக்கு நியாயத்தை எப்படிப் பெற்றுக் கொள்ள வேண்டும் என்பது தொடர்பான தெளிவான விளக்கத்தைக் கொடுப்பதற்கான ஏற்பாடு இலங்கையில் இல்லை. அதேநேரம் சட்ட உதவி பெற்றுக் கொள்ளவதும் அவர்களின் பொருளாதாரச் சூழலில் கடினமானதாக இருக்கிறது.

மறுபுறத்தில் சாதாரண மக்கள் தமது வியாதிகள் பற்றியும், அதற்கு வழங்கப்படும் மருந்துகள், அவற்றின் பக்கவிளைவுகள், சத்திர சிகிச்சை செய்யவேண்டிய நிலை வந்தால் அது தொடர்பான விடயங்கள், சிகிச்சையின் பின்னரான பராமரிப்பு என்பவற்றை நோயாளிகளும் அவர்களின் உறவினர்களும் விளக்கமாகத் தெரிந்து கொள்வதற்கும் இலங்கையில் இருக்கும் மருத்துவக் கட்டமைப்பில் போதிய வசதிகள் இல்லையென்றே கூறலாம்.

ஆனால் நாம் மனது வைத்தால் இவை எல்லாமே செய்யக்கூடியவைதான். இதற்கு வைத்தியசாலைகளும் அவை சார்ந்த சமூகங்களும் இணைந்து பயணிக்க முன்வரவேண்டும். அப்போது இவையெல்லாமே சாத்தியமாகும்!

- வீமன் -

Address

London, ON

Website

facebook.com

Alerts

Be the first to know and let us send you an email when அக்கம்-பக்கம் posts news and promotions. Your email address will not be used for any other purpose, and you can unsubscribe at any time.