19/01/2021
Udaba ngokubiswa Kuka Tshatha okhozini
OWOMTHETHO UBONA UBUDEDENGU KUTSHATHA
UDABA NGU: JOHN HLONGWA
USENGCUPHENI yokuxoshwa umsakazi woKhozi FM, uKhathide "Tshatha" Ngobe uma engatholakala enecala ngezinsolo eziholele ekumisweni kwakhe emsebenzini zokudicilela phansi isithunzi salo msakazo ngokudalula izimfihlo zawo ezinkundleni zokuxhumana.
Lona ngumbono kaMnu Cyril Zondi wenkampani yabameli iCS Zondi and Association inc, othe uma uTshatha engatholakala ephule umthetho angazithola esebhekana necala elingagcina limxoshisa.
"Phela phakathi kwesisebenzi nomqashi kuba nezivumelwano ezithile. Kuyenzeka phakathi kwazo kube khona ezithinta ukuthi izimfihlo zenkampani kazidalulelwa umphakathi. Uma wena njengesisebenzi ukwenza lokho usuke ususephulile isivumelwano.
Into ezokwenzeka njengamanje wukumumisa (njengoba benzile) bese bephenya.
"Uma bethola ephule umthetho bazobe sebembizela esigcawini sokumqondisa izigwegwe lapho izinhlangothi zombili zizofike zenze izethulo bese kungena icala. Uma bemthola enecala sebengaxoxisana mhlawumbe ngasese kuze kube izinhlangothi zombili kuba khona ezivumelana ngakho. Icala angase abhekane nalo libi, kusho uMnu Zondi.
Ephawula ngabaculi abathintekayo uthe: "UShwi noMtekhala bangakwazi ukufaka icala lamademeshe ngoba ingoma ehlukanise unyaka umculi wayo uba nethuba eliningi lokuthola ukuqashwa okuningi, okungenzekanga kubona."
Kuthiwa isisusa salolu daba kube nguKhuzani "iNdlamlenze" Mpungose onameke uhlu ekhasini lakhe lwezingoma ezahlukanisa unyaka oKhozini FM kusukela ngo-1998 kuze kube yinyakenye lapho unyaka uhlukaniswe nguyena ngengoma yakhe ethi, "Ijele".
Kuthiwa uTshatha ungene lapho waqondisa umlando ngendlela yakhe, wathi: "Okusempeleni ngo-2005 kwaba nguShwi noMtekhala abadla ubhedu ngalowo nyaka. Kwakuyimi noLinda Sibiya esasisakaza ngalelo langa. Kwaba nesizathu esaholela ekutheni kube yiMalaika eyahlukanisa unyaka ngengoma ethi, '2bhobho' oShwi bagcine bephume isibili.
"Ingoma kaShwi noMtekhala ethi, 'Ngafa' yayidume kakhulu ngisho eSwatini saze sayidlala kabili ngenxa yokuthi abantu abaningi babebheke yona kodwa yagcina ingawuhlukanisanga unyaka ngoba kwakungathenjwa ukuthi umasikandi
ungahlukanisa unyaka.
"Abaphathi bangaleso sikhathi bagcina bethathe isinqumo sokuthi kube yiMalaika kwaba wukukhalwa kwamabhinca ngaphansi (esho ezibala naye). Uzokhumbula ukuthi kwenzeka konke lokhu nje lwalungakaqali uhlelo lokuvota," esho.
UMnu Bongani Manyathi okhulumela iqembu likaShwi noMtekhala, uthe kudala bawezwa la mahlebezi.
"Ababesitshela bathi izikhulu zeSABC zazingenalo ithemba lokuthi umasikandi ungakwazi ukwehlukanisa unyaka. Sakwamukela lokho kodwa iminjunju ibuye ngo-2016 ngesikhatho uMroza Fakude esehlukanisa unyaka ngengoma ethi, 'Van Damme'. Lokho kwenza saba nombuzo wokuthi yena ulithole kanjani ithuba?
"Sifisa ukuxolisela uTshatha kubaphathi boKhozi ngesenzo sakhe. Naye ubethi uzama ukudlulisa umlando kamasikandi kanti uxamu usugeja umgodi. Sithi yobe, ubethi uzama ukuqondisa umlando kamasikandi," kusho uMnu Manyathi.
Imizamo yokuthola iMalaika kayiphumelelanga ngoba ucingo belukhala lungabanjwa, nomlayezo othunyeliwe kawuphendulwanga. Osabambe kwesokukhulumela iSABC uMmoni Seapolelo, utshele leli phephandaba ukuthi impela uTshatha usasusiwe emoyeni kuze kuphele uphenyo lwangaphakathi.
Sekungokwesibili esikhathini esifishane lomsakazi emiselwa indaba yezinkundla zokuxhumana njengoba esanda kusolwa ngokuthuka umlaleli.
