24/01/2025
Einde van 'n era vir Swartland Oval Karting
'n Tydperk van stof, geraas, petroldampe en opwinding het na 20 jaar tot 'n einde gekom.
Die Swartland Oval Karting (SOK), 'n geliefde instelling in die plaaslike motorsportgemeenskap, het onlangs sy deure gesluit.
Die klub het ontstaan danksy die inisiatief van Johan Odendaal, sy familie en vriende.
In die vroeë jare is die basis gelê vir wat later 'n ikoniese renbaan sou word.
Saterdae is bande in die vorm van 'n baan uitgelê op die plek waar die huidige Tafelsig woonbuurt staan. Hier het deelnemers hul bestuursvernuf geoefen en getoets.
In 2002 het die huidige baan, soos ons dit vandag ken, tot stand gekom, grootliks te danke aan die ruim hulp en donasies van ondersteuners.
Die stigting van 'n amptelike klub het vermoedelik in die 2004/2005-seisoen plaasgevind.
SOK het vinnig bekendheid verwerf, selfs onder deelnemers van ander klubs wat later ontstaan het.
Dit is algemeen beskou as die beste baan om op te ry.
Die klub kon spog met lede wat selfs van so ver as George gereis het om geen ren te mis nie.
Deur die jare het verskeie voorsitters en lede die baan keer op keer herskep, dit omgeploeg en weer gekompakteer om 'n gladde en sterk oppervlakte te verseker.
'n Vraghouer is ook later langs die baan geplaas en het gedien as kantoor en stoorruimte.
Met die uitbreiding van Malmesbury as dorp, het nuwe woonbuurte rondom die renbaan begin ontwikkel.
Dit het genoodsaak dat die tye vir renne aangepas moes word om die nuwe inwoners te akkommodeer.
Die stygende koste om die baan in stand te hou, insluitend water en ander uitgawes, het die klub gedwing om ledegeld aan te pas.
Dit het ongelukkig tot gevolg gehad dat baie deelnemers nie meer die kostes kon bekostig nie. Alhoewel die karretjies klein was, was die instandhoudingskoste hoog. Die ledetal het drasties gekrimp, wat uiteindelik die einde van SOK beteken het.
Op 14 Desember 2024 is die laaste byeenkoms by die klub gehou. 'n Onverwagse 57 deelnemers het ingeskryf, baie van hulle van ander klubs wat graag nog 'n laaste keer op die gewilde baan wou kom deelneem by die oudste go-kart klub.
Dit was 'n hartroerende en nostalgiese oomblik vir almal betrokke.
Met die sluiting van SOK is 'n belangrike hoofstuk in die plaaslike motorsport geskiedenis afgesluit.
