23/10/2024
Ek sien op Beeld se Facebook is daar 'n hewige bespreking aan die gang oor die aankondiging dat Siya Kolisi van sy blanke vrou gaan skei. Mense beskuldig mekaar oor en weer van rassisme, want party meen huwelike tussen verskillende rasse werk nie en ander weer sê "ons is almal dieselfde in God (en dalk liberale sosio-ingenieurs?) se oë".
Ek wil nie eintlik 'n mening hieroor uitspreek nie. Ten eerste is ek nie so 'n groot rugbygeesdriftige nie en kan dit my dus nie veel skeel nie. 'n Paar jaar gelede het ek egter in 'n argument met 'n wildvreemde Italiaanse vrou betrokke geraak op die place des Vosges in Parys toe ek bloot genoem het dat gemengde huwelike in SA nie algemeen is nie. Sy het Frans met 'n taamlike sterk Italiaanse aksent gepraat en het soos 'n stereotipiese Italianer gelyk, sou mens kon sê: donker, kortgeknipte hare. Ek het bloot 'n feit gestel en geen waardeoordeel daaroor uitgespreek nie. Maar blykbaar is dit genoeg om die gebreinspoeldes oor "een wêreld" se argwaan op die hals te haal en sy het vir my 'n lang, polities korrekte toespraak afgesteek. Dit het amper vir my die aristokratiese, sewentiende-eeuse place des Vosges, bederf.
George Bernard Shaw was blykbaar meer as 'n eeu gelede op besoek in Suid-Afrika en het toe reeds gesê dat ons 'n "bruin land" gaan word. Ek meen Jonathan Jansen het ook al so iets voorspel en sien die mensdom se toekoms as "bruin". Gaan ons as Afrikaners bloot deur die swart meerderheid geassimileer word? Maar ek sien nog baie jong Afrikaners wat met mekaar trou. Trou is al opsigself 'n uitsondering want in vele Europese lande trou slegs die welgesteldes; die meeste woon net saam en ná 'n jaar of twee beskou die reg hulle as 'n "paartjie".
Dan wonder ek ook oor al die gemengde pare in advertensies in Suid-Afrika... Is daar bewustelik deur die ANC-bewind of die groot maatskappye en die media 'n besluit geneem dat daar propaganda behoort te wees dat ons moet "meng"? En is om met 'n blanke meisie te trou en blanke kinders te hê binne dié konteks amper al 'n "daad van verset"? En sou dit iewers in die toekoms verbode wees om met iemand van dieselfde ras te trou, nes dit in Suid-Afrika en in die Amerikaanse Suide baie lank onwettig was om met iemand van 'n ander ras te trou of seksueel te verkeer? Die wyse waarop die "woke"-kultuur op ons afgedwing word, laat dié vraag by my ontstaan. Of dalk sal blankes van dieselfde geslag nog mag trou, ek weet nie.
Ek het so vinnig na die akademiese literatuur oor dié kwessie geloer en dit wil voorkom - in elk geval in die VSA - a*of die egskeidingskoers onder gemengde pare hoër is as dié onder blankes. Aan die ander kant is die egskeidingskoers onder gemengde pare min of meer dieselfde as onder swartes.
'n Ander statistiek wat vir my nogal ongelooflik is, is dat 60% van swart kinders in Suid-Afrika nie weet wie hul vaders is nie. Of ten minste word dit op 60% van geboortesertifikate nie aangedui nie. Dit impliseer dat verhoudings onder SA swartes nie eintlik blywend van aard is nie.
Ek het ook al die Engelse frase "tragic mulatto" gehoor. As mens dit google, kom jy op die volgende Wikipedia-inskrywing af:
The tragic mulatto is a stereotypical fictional character that appeared in American literature during the 19th and 20th centuries, starting in 1837.[1] The "tragic mulatto" is a stereotypical mixed-race person (a "mulatto"), who is assumed to be depressed, or even suicidal, because they fail to completely fit into the "white world" or the "black world".[1] As such, the "tragic mulatto" is depicted as the victim of the society that is divided by race, where there is no place for one who is neither completely "black" nor "white".
Ek is nie so bekend met die ouer Amerikaanse letterkunde nie; wel het ek as student omtrent al die moderne Amerikaanse skrywers, wat hoofsaaklik Joods was, gelees.
Maar hier by ons d**k ek ook aan Adam Small se drama, "Kanna hy kô hystoe" waarin hy insgelyks 'n soort "tragiese wêreld" skets.
Daar is natuurlik stereotipes oor gemengde pare: Die ouer man en die jonger swart vrou, a*ook die vet, lelike blanke meisie met 'n swart kêrel. Dis altyd vir my amusant om toe sien hoe hierdie stereotipes hul in die werklikheid herhaal. Daar is een of ander transaksie daar aan die gang waar die een vir die ander begeerlik raak.
Dis ook 'n cliché dat vrouens tot status en geld aangetrokke is, van Melania Trump tot Rachel Kolisi. Of wat was daardie Sweedse blondine se naam nou weer wat met Tiger Woods getroud was? Elin Nordegren; dankie google! Maar daardie huwelik het ook nie gehou nie.
Blykbaar lei groot ouderdomsverskille insgelyks meermale tot die skeihof. Hoe groter die ouderdomsgaping, hoe groter die kans dat die verhouding skipbreuk gaan lei. Daar bestaan statistiek daaroor.
'n Ou oom wat glo 'n baie goeie en slim sjirurg was, het eenmaal vir my gesê: "Die grootste geskenk wat jy van jou ouers ontvang, is jou gene."
Waarskynlik was hy reg. In weerwil van dertig jaar van anti-blanke diskriminasie in ons land -- die ergste wat daar nog ooit op aarde bestaan het -- sien 'n mens hoe blankes op feitlik alle gebiede presteer. Hulle word nie meer tot mediese skole toegelaat nie, maar hulle klim op vliegtuie en gaan haal daardie graad in 'n ander land waar hulle nie eens die taal kan praat nie. Jong Afrikanermans wat nie 'n kat se kans staan om 'n werk by die staat of 'n groot maatskappy te bekom nie, begin eie ondernemings in hul slaapkamers of koshuiskamers en doen naderhand sake oor die hele aardbol. Dalk sal hulle nooit so ryk soos 'n ANC-tenderpreneur wees nie, maar hulle kan trots wees op wat hulle sélf, met hul eie vermoëns bereik.
Sonder geld of staatsteun, het ons kunstefeeste begin, skryf en publiseer ons Afrikaanse boeke. Die genadelose sisteem verarm ons, maar in ons gees bly ons ryk en veral verryk.
Iemand anders op Twitter of X soos dit tans bekendstaan, het gesê: "As jy blank gebore word, het jy klaar die lotery gewen." Dis nogal 'n vreemde gedagte en 'n Koreaan of 'n Japannees sal seker daarvan verskil, want hulle glo dat hul eie groep verhewe bo blankes is. Daar is egter iets deterministies aan ras en biologie, want jy kan nie daaraan verander nie. Met die ontwikkeling van genetika en tegnologie, kan hulle selfs die DNS van 'n mummie of 'n oermens vanuit 'n gletser in die Alpe ontleed. Net so sal kenners oor tweeduisend jaar steeds uit die oorblywende skedels en beendere van ons huidige geslag met 'n oogopslag kan bepaal wie tot watter ras behoort het. Forensiese ondersoekers wat misdade probeer oplos, doen dit al jare lank.
As die foto van die Kolisi-egpaar 'n x-straal was, waar velkleur nie meer ter sake is nie, sou jy nogtans baie maklik kon sê watter een van die twee blank of swart is.
Die magte wat oor ons regeer het egter besluit dat daar rasvermenging sal wees en daar is niks wat ons daaraan kan doen nie. Om jou daarteen uit te spreek, is reeds strafbaar en ek wil dit ook nie hier doen nie. Ons is net klein mensies wat in 'n vyandige wêreld probeer oorleef. Maar juis om te kan oorleef, gaan jou kind die beste uit jou stamboom nodig hê. Hy of sy sal moet planne maak, 'n magdom kennis van wiskunde en tegnologie, a*ook vreemde tale, moet bemeester.
Eintlik is dit 'n wonder dat ons Afrikaners nog in die land bestaan: ons het reeds die Oosgrens, Bloukrans en die Britse konsentrasiekampe oorleef. Maak dit nie elkeen van ons kosbaar nie? Presies net soos ons lyk en soos ons voorouers gelyk het nie?
