Izindatshana NoBongwe New

Izindatshana NoBongwe New Interesting stories to entertain followers

30/01/2025

Ifa Lami 33

Ibhalwe ngu:MH Vilakazi

Usemajujukwini obuthongo ulele obengane impela uSkhindi ungamehlisa embhedeni umbeke phansi angezwa lutho ubhizi uhudula izikhumba."Ufunani la?"kusho izwi lapha ebumnyameni lisho sakuziphinda sadoshiba nyana linjalo.Kube engathi uyaphupha unkabi "Ngifunani kuphi wena Ufunani la?"ephendula esebuthongweni.Liphinde futhi izwi into efanayo naye aphinde agoloze kuthi nya amanenjana "Pha Pha "kusho impama lapha ebumnyameni wavuka eqhasha kuhle kukanogwaja ubona izinja uSkhindi.."Hhayii yeyii yeyeii Hayi khona yeei yini leyo?"eklewulisa okomdlwane unkabi.Iphinde ize "Pha" igcwale ubuso manje kuveke kube mnyama amehlo wathi galo yephuka isicabha wasishaya ngamehlo enqondi kwase kuduma ikhanda.Weboleka empunzini nje usele ngendathawozi wanaphaza ngejubane lase likude kakhulu isango wajomba ucingo wagcwala igceke lakwaGrace.

Wahlaba ngemicondo phansi Waze wayongena nesicabha salapha ekhishini kwaGrace."Lekelelani booh Ngafa hhee"eklabalasa eqonde ekamereni uSkhindi afike angene nesicabha nakhona maqede asivale ngci aze asiyame ngomhlane.Ngalesi skhathi usesakaze amehlo wawahlahla impela ungathi azoqathaka.

Avuke gubhu akhuze imihlola uGrace"Hhayi bo!Hhayi bo!Mameshane Nansi imihlola Makhelwane ungihlolelani ngempela yini Jesu!!"esho ebamba ongezansi.Ababaze aze aqede lutho ukuphendula inkabi kunalokho isuke idinde isililo."Hawu kodwa Makhelwane ngangishilo ukuthi wenza elikhulu iphutha awubheke manje.Seziyakunetha..Angithi awutshelwa wena"abhinqe ithawula lakhe uGrace usevele wayifunda ivaliwe uzwile ngenkathi ibhonga okokuqala lendoda kade elulindile lolusuku kuze kuthi akahleke azibambe."Kwenzenjani Makhelwane wagulukudela usubhonsa nj lapha kwami Kwenzenjani?"

"Hhayi Hhayi Uye impela uyena"esho izinyembezi zigcwele amehlo.

Iyaqhubeka

29/01/2025

Ifa Lami 32

Ibhalwe ngu:MH Vilakazi

Selishaye lagamanxa nefalakahlana ngaphezulu eleshumini ihora kwesikabhadakazi.Lisho liyakhemezela lapha ngaphandle okwenza kube mnyama bhuqe indlela uyiphuthaza ngezandla.USkhindisamabhunu uphuma lapha esipotini ePhuzudele uphethe amabhodlela amabili elilodwa livuliwe elinye lisavaliwe.Uphuma nje useyezwa ukuthi sebugcwele ikhanda manje kanti sekuxega namadolo.Umthetho wakhe ubezama ukuthena ulaka lwakhe phela ubona bemphoxe kabi Kubo bese kukhona nomqondo othi akahlome izikhali ayobafundisa isifundo.

Abambe indlela abheke ezansi akukude kubokaNkosenhle uhamba ethi habu ngapha umungunya nengoma ayikhonze ukubhubha"Sidakiwe Sidakiwe Sbali🎶 abuye ayixube nalena ethi"Tshwala bami" ahhumzele aze ayofika ekhaya.Mayengena nje esangweni ephakamisa amehlo abone umnyango uthe nge ulokhu uthe tsee'tsee'tsee engathi uqeda kuvulwa."Hhayi ngoba bengithi ngihambe ngikhiyile nje lapha ubani lona osevule washiya kuthe nge pho?Kuyobe ilokofeleba komfana kaJudas uyabona uma kuyikho ngizokuhlanganisa nabazali bakho."Aphakamise lebhodlela lakhe alithi mbo mbo mbo lonke alilahlele lapha.

Ayende sakudlathuzela esebheke endlini ne-okapi yakhe useyiqhaqhile uyiphethe ngesandla.Mase ezongena nje emnyango uvaleke ngesankahlu.Aze ethuke awezwe amaphaphu ethi ngqi esifubeni."Nansi imihlola ngiphuzwa inyongi ngempela kela ubani lolandlini.Hheyi phuma wena nyoni sibambane uyangazi kahle ukuthi ngiwubani mina hhe?"usho nje selumqalile uvalo.Agulukudele phakathi akhanyise amalambu aguduze indlu yonke angatholi muntu.Afake ubhiya wakhe kwisiqandisi uyezwa nobuthongo sebugcwele amehlo avele ayoziphosa embhedeni.Kwedlule cishe ihora nemizuzwana engatheni egobe amadlangala uSkhindisamabhunu kwabonakala ngomnyango uvuleka futhi kuhhushe umoyana ungena endlini maqede sivaleke futhi isicabha.

Iyaqhubeka.

28/01/2025

Ifa Lami 31

Ibhalwe ngu:MH Vilakazi

Iyaqhubeka

"Hhayi kuyacaca ukuthi ucasuke ukugcina ke untombo kulokhu kanti niqhathwe yini Lena engaze imenze azibe kwafoni?"

"Akuyona nento etheni Lena ayicasukele ukuthi usengaze angasabambi nefoni noma esefonelwa nguwe."

"Cha khona akufani naye akahlukani nefoni uZakithi."afikelwe umcabango manje.Njengoba umhlaba sewonakele kangaka uzothini mangabe lomfokazi emenzakalisile umngani wakhe.Kube khona okuwuphikisayo lowo mqondo kepha angawususi ekhanda."Ngisathi shwi ngasendlini encane ngicela usale ungibhekela amabhodwe."

"Kulungile."athi shingili angene enini encane afonele uMaXulu lukhale eside isikhathi nolwakhe lungabanjwa.Aphinde aluzame futhi lubanjwe kulokhu.

"Ninjani mama?"

"Ungbani wena futhi ufunani ?"ngezwana elibuthaka elihoshozayo.

"UGugu mama umngani kaZakithi ngikhathazekile ngaye angimtholi ocingweni ingabe unawe?"

"Yebo sisobabili lapha khona esibhizi ngakho ngizomtshela akuthinte masiqeda."

Kuthi gidi amaphaphu kuGugu awudonse aphinde awudedele.

Kuntambama sekuqala nokuba mnyama ngaphandle selivale nangamafu amnyama lapha esibhakabhakeni ungathi lifuna ukuyidedela.Kukubo kaNkosenhle uqhamuka uzenyile usegcwala indlela uSkhindisamabhunu uqhuba imbuzi.Uyenda nje ubhizi ucula nengoma"Tshwala bami;Tshwala bami"uzodlula lapha ngakaGrace.Umuzwe Kanye uGrace waphuma eqhasha kwakhe vele kade emlindile.Adlathuzele ayoyama ijalidi"Yeyi makhelwane dlula ngapha boo awusondele."

Ayendele ngakhona uSkhindisamabhunu"Uthini yenaaa?"esho ehlekela phezulu.

"Unjani makhelwane?"

"Mhh hh imihlola lishonile Ungibona nginjani?"

"Hawu kahle ngempi Makhi ngangithi isikhumelene umlotha kanti usayibeke umkhunsu.Ayi uyaxaka bo.Ngiyazi awukapheki ngingakuphakela yini?"

Angananazi avele avumele phezulu unkabi.Ngempela asitheke endlini abuye nesikhafutini sokudla uGrace amnike.

Iyaqhubeka

25/01/2025

Ifa Lami 30

Ibhalwe ngu:MH Vilakazi

Avele ababheke kabi bonke uSkhindi maqede anxaphe asukume"Yeyi wena Nomusa engathi uyakhohlwa ukuthi ukhuluma nobani.(esho emkhomba ngomunwe maqede amsikaze ngenhlanekela.)Qhubeka ngalento yakho ngizokubonisa amabele enyoka.Wena Diniwe umangazwa yini ngoba nawe uyinkunzi yomthakathi ucabanga ukuthi angazi ukuthi uwena osiqedayo lapha ekhaya hhe?Futhi angazi nikhulumani kwaNkosembi loyo akayona indodana kaJudas wena Sgqiki wena uthengiwe."ubasho nje useyaphuma unkabi"Salani zikhohlakali ndini nimbulele umfwethu senifuna ukugodusa nami futhi nifike kwangqingetshe ngeke nilunge sdalo."anxaphe aze ayophuma ngesango.

Seliyoziphosa ngakunina ilanga isivuvu sokushisa sisagcwele yonke indawo belikhipha inhlanzi emanzini phela namuhla bekungathi lizowa impela.Uyiphe ihlombe uNkosenhle yakusunduzeleka intombazane yase ishintsha umqondo yamkhulula ukuthi aqhubeke ahlale nayo aze akwazi ukuzimela naye.Kuyoshaya ihora lesi-6 ntambama ubhizi ngamabhodwe lapha ekhishini uGugu.Ubuye ahleke yedwa nakhu alokhu eziphinde njalo amazwi kaNkosenhle"Ngiyazi kubuhlungu kusobala ubumthanda lomfokazi kodwa usekubonisile ukuthi akakufanele.Umuhle kabi ukukhalela indoda maningi kabi amadoda angagiya aqephuzele ukuba nawe."aphendule ikhanda ambheke ezwe inhliziyo igcwala ifutha phela ukhona uyathandeka naye uNkosenhle aphinde abe sidlakela nyana.Useyazibona nje eqamele kulesiyasifuba uGugu amamatheke kakhulu.

Uhlezi lapha esofeni uNkosenhle amehlo abheke umabonakude kodwa inqondo ikude kabi.Akukwazi ukuphela kanjalo nje phakathi kwakhe noZakithi.Acabange ngokushesha asukume aye kuGugu.

"Ehh Gugu"

Amoyizele kuqala ngaphambi kokuvuma "Yebo bhuti"

"Ahh ngithe ungathi bhuti ngibize nje ngegama.Ngicela ungisize ngokuthile."

"Noma yini ngingakusiza ngani?"

"Ngicela ufonele uZakithi umuzwe nje ukuthi unjani ngikhathazekile ngaye."

"Ohh Eyishi yazi nami kade ngithi ngizomfonela angazi sengilibele kanjani."ahambe athathe ifoni afone.Lukhale lodwa...

24/01/2025

Ifa Lami 29

Ibhalwe ngu:MH Vilakazi

KukwaSokhela ekhaya elikhulu kuo kaJudas uyise kaNkosenhle.Basendlini enkulu yokuphumula noSgqikisomkhovu ungubo zinuka umswani wakhona lapha eMkhanyakude owaziwayo impela ukuthi akashayi eceleni futhi akukho okufihlakele angeke aze akubone.

"Mkhulu wena ke ngiyakwethemba uyabona lento eyenzeke emalibeni nalento eshiwo ilesangoma sikaNomusa angiyizwa sdalo kunesandla semfene lapha Lena yokuthi umfwethu uyazilwela ufuna lokhu nalokhuya ayikho nje."usho usadiniwe kusuka emalibeni nje akaze abemnandi.

Bathule bambheke lapha endlini bane njengoba kuwu babekazi wabo u-Diniwe nodadewabo omncane kaJudas uNomusa kube uye uSkhindi nenyanga.

"Uyazi mina wena bafo uyangixaka yonke into nje uma yenziwe ngomunye umuntu uyakhalaza noma kungaba into enjani awuhlali ungakhonondi.Uma ngempela uMa-Gasela ebebumba amanga kunjani pho livumile ukuphakanyiswa ibhokisi lafakwa egodini?"

"Ngazi ngani mina angithi uyathakatha vele lomama kungenzeka uyena owenze lento afuna kubuzwe yena asize bese eba yiqhawe ke njengoba nincoma ningaqedi nje manje."

"Chabo anikame Nina nobabili nibambezela umkhulu.Mkhulu sicela ulamule."kuvela uDiniwe edonsa umoya.

Athule ababheke uSgqikisimkhovu "Uyazi ngize lapha ngoba lento ngitsheliwe ngayo.Angizukushaya mathambo ke ngoba zonke izimpendulo zalemibuzwana yenu nginazo."avuke amehlo agqolozele uSkhindisamabhunu ashalaze maqede abheke phansi uSkhindi."Ikanjena ke lento akukho maloyo lapha wena Skhindi lento oyenzile unyathele inyoka emsileni.Umfowenu uthi ayikwazi indodana yakhe ukuzulazula igcwale izinkalo ekubeni inekhaya.Uthi njengokuyixosha kwakho Kubo kuzomele uphinde uyifune uze uyithole ibuye ekhaya kungenjalo angeke uze ukuthole ukuthula."

UNomusa nobabekazi wabo uDiniwe bambheke uSkhindi.

"Hawu uyangizwisa yini ye-anti uyakhumbula utheni kithhiuma simbuza ngoNkosenhle?"eshaywa izandla uNomusa"Ngaze ngafa olwembiza ngawe mtakama kanti ubole kanje ungayenza kanjani into efana naleyo.?"

24/01/2025

Ifa lami 28

Ibhalwe ngu:MH Vilakazi

Asithele egumbinu lokugezela athuse umzimba unkabi.Udlala ngamanzi nje ngapha usacabanga ukuthi mayesuka lapha uzobheka kuziphi izinkalo njengoba eselahlwe uZakithi nje okunguyena muntu obemsiza.Agumule angene kushawa ageze.

Lapha ekhishini usele uGugu ukhuluma yedwa"Mxm uyazi uZakithi unesibindi ibizwa ngani ngempela lento ayenzayo.Okanye ufuna ukungibulalisa ngalomuntu wakhe sengiyabona nje esebhale ngami uMandla Chris lapha ko-facebook esengbulele lomfana.Cha useyongixolela noNkulunkulu impilo iyodwa bakithi angeke nje ngikulinge ukufa mina Cha akageze ahambe khona ugeza ugeza ini."anxaphe kusenjalo kukhale iselula ayibambe kufona isoka lakhe uGedleyihlekisa lona abezikhiphe naye izolo ebusuku.Alubambe "Babazi"

"Babazi wokunuka yeyi wena skhebeleshe ndini uyinikwa ubani indoda Yami sikhohlakali sentombazane."

Ahlahle amehlo kuhle kwembuzi iphekwe nezimpondo uGugu aze ayisuse endlebeni ifoni ayibheke"Hhayi bo sisi uyazi ukhuluma nobani?"

"Angifune kwazi ungathi sisi lapha kimi udukelwe osisi bakho?Lalela ke wena Gugu ndini uGedle owami ngedwa futhi ngizokuxwayisa kube Kanye okwesibili ngizozifikela mathupha kuwena kuyosuka uthuli lwezichwe.Siyezwana!?"

Kuthi nya aluzwe lumdumela uvalo uGugu kuqaqambe inhliziyo ngalowomzuzu nezinyembezi zivele zigcwale amehlo.Avumele phansi "yebo ngizwile.."

"Kuhle ke makunjalo."lucinywe.

Ahambe ayohlala esihlweni namanje akakholwa kwaphinde kwamphinda futhi lokho.Zehle mawala izinyembezi ehluleke nokuzibamba.Esafofobele ekhala kuphithene nekhanda abuye uNkosenhle usepheth neshumpana sakhe useyindlela.Kumethuse naye ukubona uGugu esekhala ebhocobele ekubeni amshiye emoyizela yedwa.

Acabange ukumbuza ukuthi Kwenzenjani abuye anqene usaba ukuthi uzothi uyawubhula awuvuthele lomlilo.

"Sengiqedile mtakwethu ngicela ukubonga isineke nomusa wakho.Ave ifudumele lendlu ukube ngiyazenzela ngabe ngithi mbo obunye ubusuku nje."ahleke kancane uNkosenhle.Angamphenduli uGugu kunalokho avele akhale.

24/01/2025

Ifa lami 27

Ibhalwe ngu:MH Vilakazi

Kusemini yasekuseni libalele nje impela liphekezelwa umoyana opholile.Usahambisa amehlo namanje kulencwadi "Nkosenhle ngizoqala ngibonge iqiniso lakho noma nje enye inxenye kumina ingeneme ngalo.Sengiyabona manje imina othathe ngewala ngehluleka nokuzibamba phela mina nawe asazani.Kuningi engingakwazi ngawe izolo uphume esibhedlela ungakhoni kwakuma lokhu kodwa namuhla uvuke wema engathi awukaze ulimale okungenza ngidideke ngokuningi.Akusenani ngicela uziphathe kahle.Usale kahle."ubuye nakuye umqondo phela izolo ngempela ebehluleka ngisho ukuma bekuvele kuxege amadolo namuhla kwenzeke kanjani ukuthi avuke esehamba.Kubuye lephupho avuke nalo lapho abazali bakhe bebe bambene ngezihluthu besho ukubulalana uthe uzama ukukhuza ubungqayingqayi uyise wahluthula yena ngempama emqumbe phansi.Esathuswe ilokho wathi unina akavuke ahambe.

Esaququdana namathambo ekhanda kanjali uNkosenhle kuvukeke isicabha asukume ngokushesha ezitshela ukuthi mhlampeni uZakithi.Kungene umngani kaZakithi umnikazi wegumbi zehle izihlathi abuyele phansi."Sase sikhona ke thina bo thina nisale kahle kodwa?"ebuza eqalaza nakhu ubheka uZakithi.

"Sisale kahle ayi uyindoda lomfokazi okwenza umoyizele kanje mancane kabi amadoda akwazi ukujabulisa umuntu wesifazane ngalendlela."

"Hawu kanti kuyabonakala ukuthi ungiphathuse okwezikhali zaMaNtungwa lomfana"esho emamatheka kakhulu."Manje wahlalisa okwenkedama nje uphi uZakithi?"abheke isikhwama sakhe phezu kwetafula ayophuza amanzi.

Angamphenduli uNkosenhle kodwa avele amdlulisele lencwadi eshiywe uZakithi.Ahambise amehlo iskhashana uGugu."Ohh ayi angizingeni bheka bhutu mina nawe asazani nokuthi ngize ngivume nje nisale lapha yingoba uZakithi umngani wami.Uma engekho yena Cha angeke ukwazi ukuhlala lapha."

"Ngiyaqonda ngicela ukuthusa umzimba ke bese ngiba indlela."

"Kulungile"

Iyaqhubeka

23/01/2025

Ifa lami 26

Ibhalwe ngu:MH Vilakazi

Lumqanqe uvalo acishe ukuyothi bhu phansi ngenxa yokwethuka uMaXulu wagebhezela kwangathi Kuma umqondo wangazi ukuthiahlanganise ini nani.Ngelikade ubuye umqondo izinyembezi sezigcwele amehlo agijime abambe uZakithi azame ukumvusa"Hhayi bo Zakithi Hawu kodwa ngengane Yami bakithi ngiyazisa."esho ethwala izandla ekhanda"Ngambulala umtanami Hawu kodwa somandla ngenzeni?"ebe ejaha ucingo athinte abezimo eziphuthumayo.Abapholisang maseko bafike esashisa kwazise kuseduze yatheleka i-ambulensi.Kwehle abafana ababili bangene nohlaka begijima endlini bamthathe uZakithi bahambe naye.Uzamile ukuziqinisa uMaXulu kwamehlula wazizwa eseshiselwa umzimba wonke sekaphelelwa nawumoya.Uyilandele Ngemuva i-ambulensi usevele wavuma ukuthi kubhajwa eshoshayo wazisola ngezenzo zakhe zobusathane waze wacela nokuthi okungenani ophezuu akathathe yena ayeke phansi ingane yakhe.Uhleli esitelingini semoto nje ikhanda liyaduma kuningi phela konke akwenzile nakakwenzayo yena ukwenzela yena uZakithi esengamshiya kanjani.

KuseMkhanyakude le emaqaqasini lapho azalelwa khona uJudas.Sekuze kwafika lona usuku lokuthi inhlabathi ibuyele inhlabathini abekwe endaweni yakhe yokugcina umfokaSukazi.Luqale kahle uhlelo lomngcwabo indaba iqale sebesemalibeni lapho sebethi befaka ibhokisi egodini langabe lisasuka phansi.Zasondela izinsizwa ezisenamandla kwangathi azenzi lutho lase lisinda ngokweqile ibhokisi ngisho ukunyakaza lutho.Bazame kaningana baze bamaka kuthiwe yena ubhuti omdala uSkhindisamabhunu akakhulume nomfowabo wazama wehluleka.Kuphele cishe amahora amabili behlangene amakhanda abantu abanye bekhuza ibhadi.Kufunwe isanusi okuyisona esayilamula sathola ukuthi umfokaSukazi wenqaba nje ufuna indodana yakhe.Bamncenga ukuthi avume kuphethwe lomsebenzi umfana bazomletha lingakapheli leviki elizoqala.

Iyaqhubeka.

21/01/2025

Ifa lami 25

Ibhalwe ngu:MH Vilakazi

Kusekuseni kuqeda kugcwala ihira lesificaminwemibili iphakeme inhlavu yelanga kanti licwathile nalo namuhla.Ngemuva kokubhodla atshele uZakithi ukuthi angeke bakwazi ukuthandana ubone kuncono alale phansi.Uphaphama nje selizinqeni avuke azelule.Adavuze ayoshona ekamereni afice umbhede ugqetshiwe kushaya umoya athi qala igumbi lonke kwase kusele iphunga lamakha kaZakithi yena akabonwa.

Lapho esedunyelwa ikhanda ezulazula indlu yonke azithele kwincwajana ayithathe ahlale phansi ayifunde."Ngemuva kwengxoxo esibe nayo ngibone kuncono nalowo ahambe indlela yakhe ngoba asiyi endaweni eyodwa.Ngiyajabula uma ulubonile uthando enginalo ngawe engingakwazi luqhamukephi kodwa lona lubanzi futhi lujulile.Iqiniso ukuthi ngilimele ngiyazi ubungaqonidle futhi angikusoli.Usale kahle."Uthe eyivala bese izinyembezi ezibambe ngezinkophe wayizwa ishaya ngendlela ehlukile manje inhliziyo.

KukwaSokhela uvuke waphuthuma eBakery uMaXulu njengoba was ebuya nje.Ethuswe ukufika endlini umnyango ungakhiyiwe kodwa eshiye ewukhiyile ashutheke isandla ebhekhini abuye nengebe.Ayibambe ngezandka zombili angene sakucathama kuthi gidi "Hawu Zakithi uwena Eyishi nawe kodwa ubungashongo ukuthi nizofika emini yasekuseni.?"

Ziyime emthumeni kuZakithi amehlo abomvu tebhu namanje kuseyiso leso.Esamangazwe ilokho uMaXulu mayethi uphosa amehlo phezu kwetafula azisekho uzikhafutini lumuthi thwansu uvalo ahlahle amehlo kuhle kwembuzi iphekwe nezimpondo."Zakithi?"

"mAh"

"Kushonephi lokudla bekulapha?"

"Usho kuphi lobekusezikhafutinini ayibo mama kanti ibhodwe ukushaya kanje uma uthandile.Uyazi kuvele kwathoba kwanhliziyo Yami lokudla kwakho.Ph..e..l..a"kuhle komuntu obanjwa amalwimi nakhu engathi usevaleka umoya uZakithi asuke abambe isisu ngamanenjana nje wabe esemanzi nte umjuluko maqede wayothi qimu phansi.

Iyaqhubeka

21/01/2025

Ifa lami 24

Ibhalwe ngu:MH Vilakazi

Awajikise emlonyeni amanzi umfana omdala uvuke amfomile kodwa manje useqala nokuphasha ngenxa yokwethuka.Ambheke ezwe eshaywa uvalo naye uZakithi manje asondele athi gqi ngakuye lapha embhedeni avele aqhele uNkosenhle.Angakufaki ekhanda lokho uZakithi "Kwenzenjani Nkosi wavuka ubugubhugubhu kuhle komuntu olale ebheke phezulu wase emisa amadolo?"ebuza ngezwana elikhathazekile.

Anikine ikhanda uNkosenhle amuthi lephu ngeso angamphenduli agobodise.Skhashana abuse ikhanda futhi abheke uZakithi"Eyishi yobe mtakwethu ukukxoshela ubuthongo.Ngiyaliqala iphupho inje kungenzeka bengihhema impela."aphinde anikine ikhanda.

Asondele kuye futhi uZakithi ethi uyamanga avele asukume uNkosenhle afunde kwezakhe noZakithi manje.Aqale ashintshe ebusweni manje.

"Zakithi"

Aphakamise ikhanda ambheke.

"Lalela ngicela ungangizwa kabi kodwa ngibona kuncono ngiyabonga konke osungenzele kona nokuthi uyangithanda ngazi kahle.Angeke ngikwazi ukwenza lento nawe."

"Angeke ukwazi ukwenza ini nami?"

Kuthuleke uNkosenhle useyakuzwa ukushaya ngamandla kwenhlinziyo kaZakithi.Acabange ukumtshela iqiniso uZakithi abuye aziphikise liphi lona iqiniso naye esadinga ubufakazi obuqatha ngalento eshiwo incwadi.Ahlale eduze kukaZakithi ethi uyamanga azame ukumchazela ukuthi naye kungaphezu kwamandlakhe kuncono khona ukuthi bangaqali into engeke iphethe kahle.

"Ngiyakuzwa Nkosenhle uma ususithathile isinqumo akukho engingakusho noma engingakwenza ukushintsha lokho.Yini ekushintshe umqondo ngoba sonke lesikhathi ububonisa ukuthi nawe uyayizwa lento engiyizwayo?"usho usehlengezela izinyembezi uZakithi ngaleso skhathi akafune kwakuthintwa.

"Ngiyafisa ukuktshela kodwa lokho kungaxanganisa izinto kakhulu."

"Kulungile ke."angene engutsheni alale afulathele.Ulala nje usewotha ubomvu kodwa uzibambile eselele zehle mawala izinyembezi.

Asale ejula ezama ukucubungula lephupho avuke nalo uNkosenhle nakhu ephuphe unina noyise bebambene ngezihluthu.

19/01/2025

Sanibona Onyakeni Omusha Anginilahlile bengingenafoni kodwa sekuze kwalunga.

Ngicela ukuzwa ngani ngiqhubeke 'Umthakathi usegcekeni" noma ngiqale entsha?

24/12/2024

Ifa Lami 23

Ibhalwe ngu:MH Vilakazi

Iyaqhubeka*Luphinde lukhale futhi ucingo alubambe ngokudinwa"Ngithe phuma kimi khohlwa ezomabuyelana nginendoda mina engithanda okwempela nxx."

"Hhayi bo Zaza umawakho lona kwenzenjani?"

"Ohh bengithi iles..never mind ufunani mama ngibhizi?"

"Kahle Zakithi uyazibona kodwa ukuthi uvumela lomfana omgaziwa angene phakathi kwethu.Sokhohliwe ukuthi samthembisa ukuthini uyise?"

"Ngithe ufunani mama ngibhizi?"

"Hawu kodwa Zakithi kuyoze kube nini ungiphatha ngalendlela ngisewunyoko njalo.Ukuphi ngipheke isidlo sakho osithandayo namuhla."

"Angibuyi ngizobuya mhla wemukela uNkosenhle ukuthi azohlala nathi uphinde ungichazele ukuthi yini lena akwenze yona eyenza ungamfuni kangaka noma khona eningigihlela kona."

"Ngiyezwa Zaza ngiyavuma mhlawumpe ngithathe ngesinxele ngento yalomfana ngicela ubuye ekhaya sixoxe ngalento."

"Uma ngiza ngiza naye uNkosenhle."

Kuthuleke isikhashana "kulungile ke ungeza naye sokhuluma."

"Asizi ukuzokhuluma mama uzohlala nathi."

"Ok kona lokho ke nginilande nikuphi?"

Ajeqeze uNkosenhle "Cha sizozizela manje uselele uNkosenhle kusasa ke."maqede alucime uZakithi.

Ithe esuka ocingweni noZakithi uMaXulu wafonela ummeli kaSakhola uWilliam embuza ukuthi kanti ayipheli yini lemicikilisho yencwadi yefa kaSokhela.Athi ummeli akusasele mgobo ehawini kuphela ukuthi nje usephesheya kwezilwandle uyoze abuye ngapha eMzansi ngeviki elizayo ngoLwesihlanu.Asuke esecasukile kulo lolo cingo uMaXulu anxaphe aluphose lapha.Asuke ashone emabhodweni aphake izikhafuthini zokudla maqede ashone ekamereni lakhe abuye nebhodlelana afike alivule athele kulesikhafutini esinenyama nesobho maqede agoqoze ngesipuni abeke lapha.

Kusemqashweni lapha ngasekuphumeni kwedolobha kwamngani kaZakithi.Ngemuva kwemizuzwana esuke ocingweni noMaXulu uZakithi uphapheme uNkosenhle wacela amanzi.Igijime imkhele ibuye imnike intokazi aziqinise unkabi awaphuze yize esengakaqini kahle.

Iyaqhubekaâž¡

24/12/2024

Ifa Lami 22

Ibhalwe ngu:MH Vilakazi

Iyaqhubeka*

Sihambe njalo isikhathi sekuyobumbana ihora lesi-8 ebusuku.Lapha emqashweni uhleli uZakithi ugqolozele uNkosenhle okobude ubuthongo ngazuthi ufile.Amehlo uwathe njo kuye nje useqala ukucabanga ngenye indlela manje sewaqala nokuyuthola indawo amazwi kamawakhe athi uzothini uma kugisigebengu lesi sifuna ukuzobahhembula konke abakushiyelwe ubaba wakhe.Yena uhluleka nokufihla imizwa yakhe ngalomfokazi useqala ukusola kodwa ukuthi kukhona okushaya amanzi ngaye.Esathule kanjalo ecabanga kukhale ifoni eside isikhathi engayizwa ngelikade ayizwe.."Engabe ubani ke lowo asethembe akuyena umama ngoba angifune kwakukhuluma naye.Noma engathini ekhaya angeke ngilubhade aze avume ukuthi uNkosi ezohlala nathi."eyothatha ifoni ayibeke endlebeni.

"Hello Zakithi."

Alizwe lephimbo elikaDayimane.

"Ufunani ke wena azange ngithi ungaphinde ungifonele noma ufuna ngikublock!?"

"Hawu cha cha Zakithi ngicela ungadinwa ngiyazi savumelana ngani."

"Manje?"

"Bengithi angibuze bese uzwile yini ngoMashesha?"

"Wenzeni umalume ngicela uvele usho ofuna ukukusho uma ungazi uzothini ungiyeke phansi."kuzwakala nje ukuthi uyadineka uZakithi.

"UMashesha akasekho emhlabeni nami ngithola manje ntambama."

"Ini!! Kuyoba kuhle awukabhemi lezinto zakho uchaza ukuthini mawuthi akasekho ngoba bengikhuluma naye nje emini."

"Nami angazi okuningi bengithi angikwazise nje umawakho kodwa nginesiqiniseko unolwazi ukuthi kwenzekeni.Enye into Zakithi ngiyaxolisa ngakho konke ngicela s**e sibonane nje sixoxe uyazi ukuthi enhliziyweni yami uyohlale uyindlovukazi.Le..."luthi ti ti esehlale kwelibomvu uZakithi.

Ashaluze indlu yonke okunye kuthi angayikholwa lento kodwa ngendlela amazi ngayo uDayimane angeke adlale ngento enje.Acabange ukuphuma ayobona umawakhe abuye acabange ukuthi uNkosenhle uzobese usala nobani.Azizwe zigcwala amehlo ngokushesha izinyembezi kodwa ukufa kumzweni kulenyanga edlule kudlule noyise manje sekumthathela umalume wakhe abemkhonze kangak

22/12/2024

Ifa Lami 21

Ibhalwe ngu:MH Vilakazi

Sekuhlwile langaphandle ligaxela kwelesi-7 manje ihora.Selivele lavala ngenkungu ehambisana namakhazana langaphandle kuqala ukumnyama impela.Uwotha ubomvu uMashesha uhambe ekhuluma yedwa yonke indlela"Mhh uyazi lokomfazi ngiyabona sekukhohliwe ukuthi kulapha okukhona nje imisebenzi yami.Akangiboni ngempela lo mina kade ngimbekezelela ngokuba untethe zosiwa muva nokulokhu engibambisa umnyama ongenafu kodwa yena unesibindi sokuxosha mina namuhla.Ujwayela abantu abamnyama amasimba lo."usho uyadavuzela ugcwele indlela zilokhu zimshayela amabheli izimoto nakhu ubuye eme mpo phakathi nomgwaqo.Afake isandla ekhukhwini akhiphe ifoni yakhe abheke izinombolo zikaZakithi azithole.Abe ehlala kwelihlaza aluphose lungene lungabanjwa."Eyishi ingabe uyishiyephi ifoni uZakithi madoda.Seyiskhathi manje ukuthi athole iqiniso ngalempisi ewuMaXaba lingaze naye limshonele."Eme futhi achofoze iselula esabheke phansi kanjalo qhamu imoto emnyama bhuqe nasemawindweni imbala iyandiza.Ifike imshayise gudlu athi shwathi ngaphansi kwayo imgibele yedlule iphinde ibuye ngorivesi imgibele futhi maqede isuke ngethayi imshiye enebe eseyiscephu igazi ligcwele yonke indawo ibe iyosithela ngejubane.

Kukubo kaZakithi uthe esesele yedwa uMaXulu wayodumela isikhwama sikaNkosenhle efuna lencwadi nokunye angakuthola okuphathekayo ukuthi ngempela uNkosenhle lento ayikhulumayo iyiyo futhi maningi amathuba okuthi uyindodana kaSokhela.Asibuke isikhwama akhiphe konke lokwamanikinikana akuphose lapha akhuthuze nalokwamabhulukwe lutho incwadi avule bonke noziphu besikhwama lutho.Avele ajuluke ukudinwa manje azizwe eshiselwa umzimba wonke athi gqi khona embhedeni athule athi ukuhlafuna amathambo ekhanda ajule.

Esandwazile kanjalo kukhale ifoni eside isikhathi angayizwa njengoba esaduke emicabangweni nje.Skhashana kuzwakale ngomsindo wamaphoyisa nabezimo eziphuthumayo awuzwe loyo asukume aphenqe ikhetheni ahlole."Minus 1 sekusele lokwephara komfana engingakwazi kuvumbukephi."âž¡

21/12/2024

Ifa Lami 20

Ibhalwe ngu:MH Vilakazi

KukwaSokhela uhlali noMashesha lapha ekhishini uMaXulu udinwe uyaqhuma njengoba eqeda kusuka ocingweni lapho ebekhuluma khona nalomfana uDayimane."Namanje angiqondi mina MaXulu ukuthi yini ungamfuni kangaka lomfana usungaze ulahlekelwe uZakithi nje ngento engathi shu.Phela angeke kuze kukuyocule ndawo ukuvula inhliziyo wemukele indodana kaSokhela njengonkosikazi wakhe."ukhuluma kanje uMashesha igwebu lwezinkambi selisemqaleni isidakiwe imizwa usevulela kuphela amagama awasakhetheki.

Angakhohlwa uMaXulu ukuthi uMashesha lona ombhedela kanje asukume ayothatha igedlela aligcwalise amanzi abandayo abuye nalo afike alithi fuu lonke ebusweni kuMashesha.Aketuke nesitulo ayothi dinsi phansi uMashesha lumuthi gubhu uvalo abe ezithinta ngokushesha ebheka ukuthi akashanga yini."Hhayi bo wenzani manje ufuna ukungibulala kanti unjani wena mama wena!?"esho enxapha."Phuma lamzini wami usungiphuza inyongo wena nxx awuphume ngingaze ngenze into engizozisola ngayo.Uhlulwa mabele ubani ingane kaSokhela nxx udakwa."abe emkhipha ngomnyango.Anxaphe noMashesha aphume ngesango isale imoto abe egcwala indlela ngocetshwayo aqhube imbuzi indlela yonke.

Asale eshiselwa umzimba wonke uMaXulu "Sengisebenze kangaka kuyini khona kwececevane osekuzofika kumoshe yonke lento.NoMashesha useqala ukungibhedela manje sengimfake kakhulu phansi kwesidwaba kuzomele ngimkhiphe uzoba inkinga naye."Athathe ifoni achofoze ashayele uDayimane lubanjwe ngokushesha.

"Mfana"

"Boss Lady"

"Uphi lomfana obunaye izolo?"

"Ubani uJojo ukhona Mam' nginaye lapha."

"Awumnike ifoni"

Kuthuleke isikhashana esaludlulisa.

"Boss Lady"

"Yeah mfana lalela ke nginomsebenzi engifuna ungenzele wona ngokuphazima kweso.Ngingakuthemba?"

"Nakanjani Ngingowakho."

"Kuhle ke ngizokuthemba angifune phutha.Useqala ukuba inkinga uMashesha ngifuna engaliboni elakusasa.Udakwe unya amaphepha kuzoba lula kakhulu wenze kubukeke engathi kube yingozi."

"Kulungile mama"..lucinywe.âž¡

21/12/2024

Ifa Lami 19

Ibhalwe ngu:MH Vilakazi

Afike aphinde athi ukumhlola hlola uDk athole kungenashintsho kulokhu akugcine kungekuhle kuNkosenhle.Aqede lapho uDk abizele uZakithi eceleni badephuzane ngokuthile engezwa uNkosenhle.Skhashana abuye nesihlalo sabakhubazeki uDk elandelwa uye uZakithi.Bamvuse unkabi bamhlalise esihlalweni baphume esibhedlela.

Kungaphandle kwesibhedlela basalinde imoto kaMaXulu othe uyavela maduzane esuka edolobheni.Kuphele imizuzu engu-30 engabonwa aphinde ashone ocingweni uZakithi amhlole ukuthi usekude kangaka nani lumphike kulokhu.Selishonile impela ilanga sekuqala nokuhwalala manje.Aqale akhungatheke manje uZakithi(Kodwa umama engangenza yini?Kusobala ukuthi namanje akamfuni uNkosenhle ebevuma nje enza mina imbuzi.Kulungile uma engamfuni uNkosi nami angeke ngize ngilubhade emzini wakhe.)ekhulumela ngaphakathi uZakithi kusenjalo kuqhamuke imoto kaDayimane ifike ime ngakubona.Sehle lesguqa sifike sibingelele siqonde kuZakithi sithi siyomanga anqabe."Kunjani Zakithi?"aqale athule aqhubeke nokufuna imoto ezobalanda lapha efonini."Namanje usangidinelwe Zakithi hawu kahle bo!Ngangithi sidlulile nje lapho kanti wawuyibeke umkhunsu yini lento?"amuthi lephu nje ngesouZakithi asuke lapho aphushe uNkosenhle aqhela qhele kuDayimane.

Kuthi xhimfi kumfana ethelwa ngamanzi kodwa abuye aziqinise akhumbule ukuthi usemsebenzini.Abalandele"Ayibe yincane phela mtakwethu kunganjani nginiphe izinyawo ezilula nginibeke lapho niya khona?Uthini bafo awunankinga?"ebuza ebhekise kuNkosenhle.Aphakamise ikhanda uNkosenhle abheke uZakithi"Uyayazi lendoda?"..*Akubalulekile lokho kanti nosizo lwakhe asiludingi iyeza imoto izosithatha."Engakaligwinyi qhamu imoto ibathathe uyikhomba emqashweni uZakithi lapho kuhlala khona umngani wakhe afunda naye eCollege.Bathe befika khona baphambane naye emnyango eyindlela abashiye nokhiye bangene.

Kucwebe ngempela ekhanda likaNkosenhle iyodwa into ayikhumbulayo ukuthi uhlangane nentombazane angazimisele nangephutha ukwehlukana nayo.

21/12/2024

Ifa Lami 18

Ibhalwe ngu:MH Vilakazi

Iyaqhubeka*Bangene labafana ehhovisi likaMaXulu unoMashesha babingelele.Kuthi gqi lesikhwama okusiphethe lokhu okumpofu komfana.Asondele asivuke uMashesha sigcwele izindodla zemali.Abe eyibala bese ebheka uMaXulu avume ngekhanda.Labafana ibona abashushumbisa izidakamizwa lapha eCollege.Asuke uMashesha athi akuphumele ngaphandle lokhu okumpofu kusale lokwesguqa okuwuDayimane.Udayimane lo isoka likaZakithi lakudala.

"Muhle umsebenzi mfana uzimisele impela."ehleka kancane uMaXulu.

"Ngenze okumele ngikwenze Ndlovukazi noma sibizelwe phezulu nje angisakwazanga nokukuphathela isipho."

"Ayi khululeka ndodana namuhla isipho uzosithola kimi."alule isandla akhiphe ibhola elilodwa lemali lapha esikhwameni alibeke phambi komfana.Asuke lapho amtshele ngomsebenzi afuna amenzele wona lowo msebenzi ukunamathela kuZakithi kakhulu kunakuqala enze isiqiniseko ukuthi balungisa izinto.Uma esenze njalo uzobe esesondele nakuNkosenhle bese emgodusa.Avumele phezulu unkalakatha ngenkulu injabulo phela ukuhlukana kwakhe noZakithi kwaba isandla sakhe uMaXulu.Behlukane.

Kudlule izinsuku ezintathu waphaphama uNkosenhle esibhedlela,umuntu ambone kuqala kube uZakithi ongakaze waphuthwa nawusuku engakezi ukuzomhlola.Baphinde bamthatha igazi oDk bamhlola ilapho bathole khona ukuthi ulimele kabi emqondweni okungadala ukuthi angakhumbuli lutho.Aphendule ikhanda abheke uZakithi abonakale ehluba ebusweni emamatheke.Ikhanda lisaduma liyankenketha linjalo"Zakithi"esho ngezwana elithambile sadoshiba nyana.Asukume ngokushesha uZakithi ayomuthi ngqi emanga "Nkosi ..ngishilo ukuthi angeke uze uhambe kanjalo nje eyami nawe indlela inde kakhulu."esho emuthi manqa manqa esihlathini nakwizindebe ngenxa yenjabulo abuye azikhuze esebona ukuthi usemshaye ngesibhamu sonwabu engaqondile.Athi uyamdedela uZakithi ambambe amqinise uNkosenhle abonakale esecweba izinyembezi emehlweni kuphele cishe imizuzu eyimficaminwebili bebambene.Baze baphazanyiswe ukungena kukaDokotela.âž¡

Address

5th Avenue
Johannesburg
2090

Telephone

+27637065404

Website

Alerts

Be the first to know and let us send you an email when Izindatshana NoBongwe New posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Izindatshana NoBongwe New:

Shortcuts

Share

Category