09/12/2024
Lum e shyqyr, ministri i Kulturës është prizrenas! 👇
Kur një ministër kulture është nga Prizreni, natyrshëm pritet që ai të jetë avokati i parë i trashëgimisë së qytetit dhe, akoma më e rëndësishme, i trashëgimisë kombëtare.
Shikoni gjendjen e Xhamisë së Gazi Mehmet Pashës, apo siç i thonë prizrenasit, “Bajrakli Xhamia”, e cila nuk është thjesht një monument arkitekturor, por vendi ku nisi historia moderne shqiptare. Aty ku u mbajt Lidhja e Prizrenit, aty ku shqiptarët guxuan të mendojnë dhe të veprojnë për veten si komb. Sot, është në një gjendje që vetëm fjalët “para shembjes” mund ta përshkruajnë.
Dhe ministri? Asnjë euro, asnjë projekt, asnjë plan nuk është parashikuar për të shpëtuar këtë simbol të identitetit tonë. Ndërsa themelet e kombit plasariten nga neglizhenca, qindra mijëra euro derdhen për DokuFestin, Fondacionin Lumbardhi, apo Autostradën Biennale — që, pavarësisht rëndësisë së tyre për kulturën bashkëkohore, janë kthyer në vrima të zeza të fondeve publike, të menaxhuara nga familjarë dhe klientelistë të lidhur me subjektin politik të ministrit.
Ironia është e pashmangshme. Ndërsa trashëgimia kombëtare lëngon, projektet me lidhje familjare apo klienteliste marrin përparësi. Këto nuk janë vetëm gropa financiare, por edhe arena ku ministri dhe rrethi i tij i ngushtë shfaqin shkëlqimin e rremë të pushtetit të tyre. Dhe të gjithë në Prizren e dimë si funksionon kjo skemë, sepse qyteti është i vogël dhe njohim njëri-tjetrin.
Prizrenasit, në vend që të thonë “lum e shyqyr,” do të duhej të thërrasin “mjerë Prizreni” për një ministër që sheh vetëm interesin e “dostave” në vend të detyrës së tij për të mbrojtur krenarinë kombëtare.
Ministër, a ka mbetur ndopak nder për të ruajtur kujtesën e një kombi? Apo edhe ajo ka një çmim në skemën tuaj të klientelizmit?
Ka shkruar Blerim Saramati aktivist nga Prizreni.
